ନନ୍ଦିଘୋଷ ବ୍ୟୁରୋ: କ୍ରିକେଟରେ ରେଡ୍ କାର୍ଡ ଦେଖାଇଲେ ଅମ୍ପାୟାର । ସାଧାରଣତଃ ହକି ଏବଂ ଫୁଟବଲ ପଡ଼ିଆରେ ରେଫରି ରେଡ୍ କାର୍ଡ ଦେଖାଇଥାନ୍ତି । କିନ୍ତୁ କ୍ରିକେଟ ମଇଦାନରେ କେବେ ରେଡ୍ କାର୍ଡ ଲାଗୁ ହେଲାଣି, ଆପଣ ଜାଣିନଥିବେ । ବାସ୍ତବରେ କହିବାକୁ ଗଲେ ଏବେ କାରବିଆନ ଲିଗ ଚାଲିଛି । ଆଉ ଏହି ମ୍ୟାଚରେ ଅମ୍ପାୟାର ରେଡ କାର୍ଡ ଦେଖାଇଥିବାବେଳେ ସୁନିଲ ନରିନ ପଡ଼ିଆ ବାହାରକୁ ଯାଇଛନ୍ତି । ମାତ୍ର ୧୦ଜଣ ଖେଳାଳି ଫିଲ୍ଡି କରିଛନ୍ତି । ଚଳିତ ସିପିଏଲ ଲିଗରେ ଏଭଳି ନୂଆ ନିୟମ କରାଯାଇଛି । ନିର୍ଦ୍ଧାରିତ ୨୦ ଓଭର ୮୫ ମିନିଟ ମଧ୍ୟରେ ସାରିବାକୁ ପଡ଼ିବ । ଯଦି ବୋଲିଂ ଦଳ ବିଳମ୍ବ କରନ୍ତି ତାହେଲେ ଶେଷ ଓଭରରେ ୧୦ ଜଣ ଖେଳାଳି ଫିଲ୍ଡି କରିବେ । ଆାଉ ମାତ୍ର ୨ଜଣ ଖେଳାଳି ଥାର୍ଟି ୟାର୍ଡ ବାହାରେ ରହିବେ । ଏଣୁ ୧୯ତମ ଓଭର ୮୦ ମିନିଟ୍ ୪୫ ସେକେଣ୍ଡ ସୁଦ୍ଧା ସରିବା ଆବଶ୍ୟକ । ଯାହା ଟିକେଆର କରିପାରିନଥିବାବେଳେ ଅମ୍ପାୟାର ରେଡ୍ କାର୍ଡ ଦେଖାଇଥିଲେ । ଅଧିନାୟକ କିରଣ ପେଲାର୍ଡ ସୁନୀଲ ନରିନଙ୍କୁ ବାହାରକୁ ଯିବାକୁ କହିଥିଲେ । ଏହି ନିୟମ ଏବେ ସିପିଏଲରେ ଲାଗୁ ହୋଇଛି ।
ସରକାରୀ ଅର୍ଥ ହଡ଼ପ ଅଭିଯୋଗରେ କଣ୍ଟ୍ରାକ୍ଟର ବାପ-ପୁଅଙ୍କୁ ବାନ୍ଧିଲା ଭିଜିଲାନ୍ସ
ସୋନପୁର: ବନ୍ଧାହେଲେ ଠିକାଦାର ବାପ ପୁଅ । ସରକାରୀ ଅର୍ଥ ହଡ଼ପ ଅଭିଯୋଗରେ ସ୍ପେଶାଲ କ୍ଲାସ୍ କଣ୍ଟ୍ରାକ୍ଟର ବିଜୟ ଅଗ୍ରୱାଲ ଓ ତାଙ୍କ ପାୱାର ଅପ୍ ଆଟର୍ଣ୍ଣିଂ ହୋଲଡର ଦୀପକ କୁମାର ଅଗ୍ରୱାଲ ଗିରଫ । ଉଭୟଙ୍କୁ ଭିଜିଲାନ୍ସ ଗିରଫ କରିଛି । ସୋନପୁର ଜିଲ୍ଲାରେ ଅନୁସୂଚିତ ଜାତି ଛାତ୍ରଛାତ୍ରୀଙ୍କ ପାଇଁ ଶହେ ଶଯ୍ୟା ବିଶିଷ୍ଟ ୪ଟି ହଷ୍ଟେଲ ନିର୍ମାଣ ପାଇଁ ସ୍ପେଶାଲ କ୍ଲାସ୍ କଣ୍ଟ୍ରାକ୍ଟର ବିଜୟ ଅଗ୍ରୱାଲ ଠିକା ନେଇଥିଲେ । ଏହି କାମରେ ଅର୍ଥ ହେରଫେର ଅଭିଯୋଗ ହୋଇଥିଲା ।
ଅଭିଯୋଗ ଆଧାରରେ ଓଡ଼ିଶା ଭିଜିଲାନ୍ସର ଏକ ଟେକ୍ନିକାଲ ଟିମ୍ ଯାଞ୍ଚ କରିବା ପରେ ନିମ୍ନ ମାନର ନିର୍ମାଣ କାର୍ଯ୍ୟ ହୋଇଥିବା ନେଇ ପ୍ରମାଣ ପାଇଥିଲା। ଆଜି ଦୁଇଜଣଙ୍କୁ ରାଉରକେଲାରୁ ଗିରଫ କରାଯାଇଛି । ପୂର୍ବରୁ ଭିଜିଲାନ୍ସ ତଦନ୍ତ ଆରମ୍ଭ ପରେ ବିଜୟ ଅଗ୍ରୱାଲ ଓ ଦୀପକ ବଲାଙ୍ଗୀର ବାସଭବନରୁ ଫେରାର ହୋଇଯାଇଥିଲେ । ଏବେ ଉଭୟଙ୍କୁ କଟକସ୍ଥିତ ଭିଜିଲାନସ ଅଫିସକୁ ଆଣି ପଚାରାଉଚରା କରି କୋର୍ଟ ଚାଲାଣ କରିଛି ଭିଜିଲାନ୍ସ । ନିକଟରେ ଫାଇଭ-ଟି ସଚିବ ସୋନପୁର ଗସ୍ତବେଳେ ହଷ୍ଟେଲରେ ନିମ୍ନମାନର କାମ ନେଇ ଅଭିଯୋଗ ହୋଇଥିଲା ।
ଏନେଇ ତଦନ୍ତ କରିବାକୁ ଫାଇଭ-ଟି ସଚିବ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ । ତଦନ୍ତ ପାଇଁ ଭିଜିଲାନ୍ସକୁ ଚିଠି ଲେଖିଥିଲେ ସୁବର୍ଣ୍ଣପୁର ଜିଲ୍ଲାପାଳ । ୮୦ ଲକ୍ଷ ଟଙ୍କା ବ୍ୟୟରେ ନିର୍ମାଣ ହୋଇଥିବା ହଷ୍ଟେଲ କାମ ନିମ୍ନମାନର ହୋଇଥିବା ହୋଇଥିଲା । କୋଠାର ଉଭୟ ଭିତରେ ଓ ବାହାରେ ଫାଟ ଦେଖିବାକୁ ମିଳିଥିଲା। ସେହିପରି କୋଠାରେ ଲାଗିଥିବା ଫିଟିଙ୍ଗ୍ସ ନିମ୍ନମାନର ବୋଲି ଅନୁଧ୍ୟାନରୁ ଜଣାପଡିଥିଲା । ଭୁବନେଶ୍ବରର ହିନ୍ଦୁସ୍ତାନ ଷ୍ଟିଲ ଆଣ୍ଟ କନଷ୍ଟ୍ରକସନ ପକ୍ଷରୁ ଆଶ୍ରମ ସ୍କୁଲ ପାଇଁ ହଷ୍ଟେଲ ନିର୍ମାଣ କରାଯାଇଥିଲା ।
ଏସିଆ କପରେ ଭାରତର ଏହି ଖେଳାଳିଙ୍କ ଉପରେ ରହିବ ନଜର..
ନନ୍ଦିଘୋଷ ବ୍ୟୁରୋ: ଏସିଆ କପକୁ ଆଉମାତ୍ର ଦିନ କେଇଟା ବାକିଥିବାବେଳେ ଟୁର୍ଣ୍ଣାମେଣ୍ଟରେ କିଏ ଚାମ୍ପିୟନ ହେବ କେଉଁ ଖେଳାଳି କିଭଳି ପ୍ରଦର୍ଶନ କରିବେ ତାକୁ ନେଇ ଅନେକ ଚର୍ଚ୍ଚା ହେଉଛି । ଭାରତର ୫ଜଣ ଖେଳାଳିଙ୍କ ଉପରେ ରହିବ ସମସ୍ତଙ୍କ ନଜର । ଭାରତ ନିଜର ଅଭିଯାନ ଶତୃ ଦେଶ ବିପକ୍ଷରେ ଆରମ୍ଭ କରିବାକୁ ଯାଉଥିବାବେଳେ କିଭଳି ପ୍ରଦର୍ଶନ କରିବ ତାକୁ ନେଇ ବିଭିନ୍ନ କଳ୍ପନା ଜଳ୍ପନା ଆରମ୍ଭ ହୋଇଛି । ଟିମ୍ ଇଣ୍ଡିଆର ପାଞ୍ଚଜଣ ଖେଳାଳି ଭାରତକୁ ଟାଇଟଲ୍ ଜିତାଇପାରିବେ । ତେବେ ଏହି ତାଲିକାରେ ପ୍ରଥମେ ବିରାଟ କୋହଲି ନାମ ଆସିବ । କୋହଲିଙ୍କ ସହ ତିଲକ ଭର୍ମା, ଜସପ୍ରୀତ ବୁମ୍ରା, ରବିନ୍ଦ୍ର ଜାଡେଜା ଏବଂ ଇଶାନ କିଶନ ଭଲ ପ୍ରଦର୍ଶନ କରିପାରିବେ।
ଯୁବ ବ୍ୟାଟ୍ସମ୍ୟାନ୍ ତିଲକ ଭର୍ମା ୱେଷ୍ଟଇଣ୍ଡିଜ୍ ବିପକ୍ଷରେ ଟି -20 ଆନ୍ତର୍ଜାତୀୟ ଡେବ୍ୟୁ କରିଥିଲେ। ସେ ଭାରତ ପାଇଁ ଏପର୍ଯ୍ୟନ୍ତ ଖେଳାଯାଇଥିବା 7 ଟି ମ୍ୟାଚରେ 174 ରନ୍ ସଂଗ୍ରହ କରିଛନ୍ତି। ତିଲକ ତାଙ୍କର ବିସ୍ଫୋରକ ବ୍ୟାଟିଂ ଦ୍ୱାରା ସମସ୍ତଙ୍କ ହୃଦୟ ଜିତିଛନ୍ତି। ସେଥିପାଇଁ ସେ ଏସିଆ କପ୍ ପାଇଁ ଦଳରେ ସ୍ଥାନ ପାଇଛନ୍ତି। ଏଣୁ ତିଲକ ଏସିଆ କପରେ ଭଲ ପ୍ରଦର୍ଶନ କରିପାରନ୍ତି ବୋଲି ଆଶା ରଖାଯାଇଛି |
ୱେଷ୍ଟଇଣ୍ଡିଜ୍ ବିପକ୍ଷରେ ଇଶାନ କିଶନ କ୍ରମାଗତ ୪ଟି ଅର୍ଦ୍ଧଶତକ ହାସଲ କରିଥିଲେ। ସେ ODIରେ ତିନି ଅର୍ଦ୍ଧଶତକ ହାସଲ କରିଥିଲେ। ଚଳିତ ଏସିଆ କପରେ ମଧ୍ୟ ଇଶାନ ଭଲ ପ୍ରଦର୍ଶନ କରିବେ ବୋଲି ଆଶା ରଖାଯାଇଛି ।
ଅଭିଜ୍ଞ ଅଲରାଉଣ୍ଡର ରବିନ୍ଦ୍ର ଜାଡେଜା ଅନେକ ଥର ଭାରତ ପାଇଁ ଚମତ୍କାର ପ୍ରଦର୍ଶନ କରିଛନ୍ତି। ସେ ଏପର୍ଯ୍ୟନ୍ତ ୧୭୭ଟି ODI ରେ ୨୫୬୦ ରନ୍ ସଂଗ୍ରହ କରିଛନ୍ତି। ଏହା ସହିତ ୧୯୪ ୱିକେଟ୍ ନେବାରେ ସକ୍ଷମ ହୋଇଛନ୍ତି। ଏପରିକି ବଡ଼ ଟୁର୍ଣ୍ଣାମେଣ୍ଟରେ ଜାଡେଜା ଭଲ ପ୍ରଦର୍ଶନ କରନ୍ତି ।
ଭାରତର ଦ୍ରୁତ ବୋଲର ଜସପ୍ରୀତ ବୁମ୍ରା ଏକ ଭଲ ପ୍ରତ୍ୟାବର୍ତ୍ତନ କରିଛନ୍ତି। ନିକଟରେ ସେ ଆୟର୍ଲାଣ୍ଡ ବିପକ୍ଷ ଟି -20 ସିରିଜରେ ୪ଟି ୱିକେଟ୍ ନେଇଥିଲେ। ଆହତ କାରଣରୁ ବୁମ୍ରା ଦୀର୍ଘ ସମୟ ଧରି ଟିମ୍ ଇଣ୍ଡିଆରୁ ବାହାରେ ରହିଥିଲେ। ସେ ଏସିଆ କପରେ ଟିମ୍ ଇଣ୍ଡିଆ ପାଇଁ ମ୍ୟାଚ୍ ଜିତିବା ପ୍ରଦର୍ଶନ କରିପାରିବେ |
ମଝି ଆକାଶରେ ଶିଶୁର ବନ୍ଦ ହୋଇଗଲା ଶ୍ବାସକ୍ରିୟା, ଏମିତି ଜୀବନ ବଞ୍ଚାଇଲେ ବିମାନରେ ଥିବା ଏମ୍ସର ୫ ଡାକ୍ତର
ନୂଆଦିଲ୍ଲୀ: ମଝି ଆକାଶରେ ୨ ବର୍ଷର ଶିଶୁର ବନ୍ଦ ହୋଇଗଲା ଶ୍ବାସକ୍ରିୟା । ସମସ୍ତଙ୍କ ହଜିଗଲା ବୁଦ୍ଧି । ହେଲେ ଡାକ୍ତରଙ୍କ ଉଦ୍ୟମକ୍ରମେ ଶିଶୁଟି ବଞ୍ଚିଯିବା ଘଟଣା ସମସ୍ତଙ୍କୁ କରିଛି ଆଶ୍ଚର୍ଯ୍ୟ । ଶିଶୁଟିର ଶ୍ବାସକ୍ରିୟା ବନ୍ଦ ହୋଇଯିବା ପରେ ବିମାନରେ ଯାଉଥିବା ଡାକ୍ତର ଟିମଙ୍କ ଅକ୍ଲାନ୍ତ ଉଦ୍ୟମ ଯୋଗୁ ଶିଶୁଟି ଦେଖିପାରିଛି ଆଲୋକ । ଘଟଣାଟି ଥିଲା ଏହିପରି । ଗତକାଲି UK-814 ଭିସ୍ତାରା ବିମାନରେ ବେଙ୍ଗାଳୁରୁରୁ ଦିଲ୍ଲୀ ଯାଉଥିଲେ ଏକ ପରିବାର । ସେହି ବିମାନରେ ବି ଥିଲେ ଏମସର ୫ ଜଣ ଡାକ୍ତର ।
ସେହି ଡାକ୍ତରମାନେ ଏକ କାର୍ଯ୍ୟକ୍ରମ ସାରି ଦିଲ୍ଲୀ ଫେରୁଥିଲେ । ତେବେ ମଝିଆକାଶରେ ହଠାତ୍ ଦୁଇ ବର୍ଷ ବୟସ୍କ ଶିଶୁର ଶ୍ବାସକ୍ରିୟା ବନ୍ଦ ହୋଇଯାଇଥିଲା । ସଂଗେସଂଗେ ବିମାନକୁ ନାଗପୁର ଆଡକୁ ଦିଗପରିବର୍ତ୍ତନ କରାଯାଇଥିଲା । ଡାକ୍ତର ଏହି ବିଷୟରେ ସୂଚନା ପାଇବା ପରେ ସେମାନେ ଦେଖିଲେ ପିଲାଟିର ଶରୀର ଥଣ୍ଡା ହୋଇଯିବା ସହ ତାହାର ନାଡି ସ୍ଥିର ହୋଇଯାଇଥିଲା ।
ଡାକ୍ତରମାନେ ପିଲାଟିକୁ ପରୀକ୍ଷା କରିବା ପରେ ଆଇଭି କାନୁଲା ଏବଂ ଅରୋଫାରିଞ୍ଜିଆଲା ଏୟାର ଓ୍ବେ ବ୍ୟବସ୍ଥା କରାଯାଇଥିଲା । ଏହି କ୍ଷେତ୍ରରେ ଏକ ଏଇଡି ବି ବ୍ୟବହୃତ ହୋଇଥିଲା । ପ୍ରାୟ ୪୫ ମିନଟର ଉଦ୍ୟମ ଜାରି ରହିଥିବାବେଳେ ବିମାନଟି ନାଗପୁର ଆସିଥିଲା । ସେଠାରେ ଉପସ୍ଥିତ ଥିବା ଶିଶୁ ବିଭାଗ ଡାକ୍ତରମାନେ ତୁରନ୍ତ ଶିଶୁର ଚିକିତ୍ସା ଆରମ୍ଭ କରିଥିଲେ । ଶେଷରେ ଡାକ୍ତରଙ୍କ ଉଦ୍ୟମ ବ୍ୟର୍ଥ ଯାଇନଥିଲା ଏବଂ ଶିଶୁଟି ବଞ୍ଚିଯାଇଥିଲା ।
‘ନିଜ ଅପାରଗତା ଲୁଚାଇବାକୁ ସାଧାରଣ ଲୋକ ଓ ମହିଳାଙ୍କୁ ଗୁଣ୍ଡା କହୁଛନ୍ତି ଭୁବନେଶ୍ବର ସାଂସଦ’
ଭୁବନେଶ୍ୱର: ନିଜ ଅପାରଗତା ଲୁଚାଇବାକୁ ସାଧାରଣ ଲୋକ ଓ ମହିଳାଙ୍କୁ ଗୁଣ୍ଡା କହୁଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ । ନୀତି ନୈତିକତା ଭୁଲି ଏସଏଚଜି ମାଆମାନଙ୍କୁ ଗୁଣ୍ଡା ବୋଲି ସୋସିଆଲ ମିଡିଆରେ ପ୍ରଚାର କରୁଛନ୍ତି ଅପରାଜିତା । ତାଙ୍କର ଏଭଳି ହୀନ ଆଚରଣକୁ ନିନ୍ଦା କରିବା ସହିତ କ୍ଷମା ମାଗିବାକୁ ବିଜେଡି ଦାବି କରିଛି । ଅପରାଜିତାଙ୍କୁ ସମାଲୋଚନା କରିଛନ୍ତି ବିଜେଡି ମୁଖପାତ୍ର ଶ୍ରୀମୟୀ ମିଶ୍ର । ଅହଂକାରୀ ହୋଇପଡ଼ିଛନ୍ତି ସାଂସଦ ଅପରାଜିତା ଷଡ଼ଙ୍ଗୀ । ଏକଛତ୍ରବାଦ ଚଳାଇବାକୁ ଉଦ୍ୟମ କରୁଛନ୍ତି ।
ଅପରାଜିତା ଚାହୁଁଛନ୍ତି ତାଙ୍କୁ କେହ ବି ପ୍ରଶ୍ନ ପଚାରିବେନି କି ସେ କାହାକୁ ଉତ୍ତର ଦେବେନି । ଏଥିପାଇଁ ନିଜ ନିର୍ବାଚନମଣ୍ଡଳୀର ସାଧାରଣ ଲୋକ ଓ ଏସଏଚଜି ମାଆଙ୍କୁ ଗୁଣ୍ଡା ଆଖ୍ୟା ଦେଇଛନ୍ତି । ଜଣେ ମହିଳା ସାଂସଦ ହୋଇ ମହିଳାଙ୍କୁ ନିନ୍ଦିତ କରିବା ଅପରାଜିତାଙ୍କ କେଉଁ ନୀତି ନୈତିକତା ବୋଲି ଶ୍ରୀମୟୀ ପ୍ରଶ୍ନ କରିଛନ୍ତି । ଯେଉଁ ଲୋକମାନେ ତାଙ୍କୁ ଭୋଟ୍ ଦେଇ ସାଂସଦ ଭାବେ ନିର୍ବାଚିତ କରିଛନ୍ତି, ସେମାନଙ୍କର ପ୍ରଶ୍ନ ପଚାରିବାର ଅଧିକାରୀ ଅଛି । ବିକାଶକୁ ନେଇ ଲୋକ ପ୍ରଶ୍ନ କଲା ବେଳେ ଅପରାଜିତା ନିଜ ଅପରାଗତା ଲୁଚାଇବାକୁ ହୀନ ଉଦ୍ୟମ କରୁଛନ୍ତି ।
ମାଆମାନଙ୍କର ଫଟୋକୁ ଏଡିଟ୍ କରି ସେମାନଙ୍କୁ ନିଜ ସୋସିଆଲ ମିଡିଆରେ ଗୁଣ୍ଡା ଆଖ୍ୟା ଦେଇ ନିନ୍ଦିତ କରୁଛନ୍ତି । ଅପରାଜିତା ଏଭଳି କରି ଶାନ୍ତିପ୍ରିୟ ଓଡ଼ିଶାର ଛବିକୁ ମଳିନ କରିବାକୁ ଅପଚେଷ୍ଟା କରୁଛନ୍ତି । ମାଆଙ୍କୁ ବଦନାମ କରିଥିବାରୁ ଅପରାଜିତା କ୍ଷମା ପ୍ରାର୍ଥନା କରନ୍ତୁ ବୋଲି ବିଜେଡି ଦାବି କରିଛି । କ୍ଷମା ନମାଗିଲେ ଆଗକୁ ଓଡ଼ିଶାବାସୀ ଓ ଭୁବନେଶ୍ବରବାସୀ ଅପରାଜିତାଙ୍କୁ କେବେ କ୍ଷମା ଦେବେନି ବୋଲି ଶ୍ରୀମୟୀ କହିଛନ୍ତି ।
ରାଜନୈତିକ ଫାଇଦା ହାସଲ ପାଇଁ ବିଜେପି ଗୁଣ୍ଡାଶ୍ରେଣୀୟ ନେତାଙ୍କୁ କୋଳାଇ ନେଉଛି: ସସ୍ମିତ ପାତ୍ର
ଭୁବନେଶ୍ୱର: ହିଂସା କିମ୍ବା ସାଧାରଣ ଜୀବନଯାତ୍ରାରେ ବାଧା ସୃଷ୍ଟି କରିବାରେ ବିଶ୍ବାସ କରେନି ବିଜେଡି । ଏଭଳି କୌଣସି ଘଟିଥିବା ବିଜେଡି ପାଖରେ ସୂଚନା ନାହିଁ । ଏଭଳି ଘଟଣା ହୋଇଥିଲେ ପ୍ରଥମେ ବିଜେଡି ହିଁ ଏହାକୁ ନିନ୍ଦା କରିଥାନ୍ତା ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସେ ଉଦାହରଣ ଦେଇଛନ୍ତି । ତତ୍କାଳୀନ ଚିଲିକା ବିଜେଡି ବିଧାୟକ ପ୍ରଶାନ୍ତ ଜଗଦେବ ବାଲୁଗାଁରେ ବିଜେପିର ନଗର ମଣ୍ଡଳ ସଭାପତି ନିରଞ୍ଜନ ସେଠୀଙ୍କୁ ୨୦୨୧ରେ ଆକ୍ରମଣ କରିଥିଲେ । ତୁରନ୍ତ ଜଗଦେବଙ୍କୁ ବିଜେଡିରୁ ନିଲମ୍ବନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏହାପରେ ତାଙ୍କୁ ଦଳରୁ ବହିଷ୍କାର ମଧ୍ୟ କରାଯାଇଥିଲା। ମୁଖ୍ୟମନ୍ତ୍ରୀ ହିଂସା ଓ ଗୁଣ୍ଡାଗର୍ଦ୍ଦିରେ ବିଶ୍ବାସ କରନ୍ତିନି । ଏହାସତ୍ତ୍ବେ ବି ପ୍ରଶାନ୍ତଙ୍କୁ ବିଜେପି କୋଳାଇ ନେବାକୁ ଦ୍ବିଧାବୋଧ କରୁନି । ବିଜେପିରେ ଯୋଗ ଦେବା ପାଇଁ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ଆଶୀର୍ବାଦ ନେଉଛନ୍ତି ଜଗଦେବ । ଏହାଦ୍ବାରା କେଉଁ ଉଦାହରଣ ସୃଷ୍ଟି କରିବାକୁ ଧର୍ମେନ୍ଦ୍ର ଚାହୁଁଛନ୍ତି ବୋଲି ସସ୍ମିତ ପ୍ରଶ୍ନ କରିଛନ୍ତି । ଏନେଇ ରାଜ୍ୟବାସୀଙ୍କୁ କଣ ଉତ୍ତର ଦେବେ । ଗୁଣ୍ଡାଗର୍ଦ୍ଦି ପାଇଁ ଯେଉଁ ନେତାଙ୍କୁ ବିଜେଡି ଦଳରୁ ବହିଷ୍କାର କରିଛି, ତାଙ୍କୁ କୋଳେଇ ନେଇ ବିଜେପି କେବଳ ରାଜନୈତିକ ଫାଇଦା ଉଠାଇବାକୁ ଚାହୁଁଛି । ଗଣତନ୍ତ୍ରକୁ ନେଇ ଧର୍ମେନ୍ଦ୍ରଙ୍କ ବୟାନ ଧୁଆଁବାଣ, ଏକଥା ଲୋକେ ଜାଣିବେ ବୋଲି ସସ୍ମିତ କହିଛନ୍ତି ।
ସେପ୍ଟେମ୍ବର ୨ ସକାଳ ୧୧ଟା ୫୦ରେ ଉତକ୍ଷେପଣ ହେବ ଆଦିତ୍ୟ L-1, ଟ୍ୱିଟ୍ କରି ସୂଚନା ଦେଲା ଇସ୍ରୋ
ନୂଆଦିଲ୍ଲୀ: ସୂର୍ଯ୍ୟ ମିଶନ ଲାଗି ବଢିଲା ତତ୍ପରତା । ଆସନ୍ତା ସେପ୍ଟେମ୍ବର ୨ ତାରିଖ ସକାଳ ୧୧ଟା ୫୦ରେ ଆଦିତ୍ୟ ଏଲ-୧ର ହେବ ଉତକ୍ଷେପଣ । ଏନେଇ ଘୋଷଣା କରିଛି ଇସ୍ରୋ । ଶ୍ରୀହରିକୋଟା ସତୀଶ ଧାଓ୍ବନ ସ୍ପେସ ସେଣ୍ଟରରୁ ଲଞ୍ଚ ହେବ ସ୍ପେସକ୍ରାଫ୍ଟ । ଇସ୍ରୋ ଏହି ମିଶନର ଲଞ୍ଚକୁ ଦେଖିବା ପାଇଁ ସାଧାରଣ ଲୋକଙ୍କୁ ମଧ୍ୟ ନିମନ୍ତ୍ରଣ କରିଛି । ଶ୍ରୀହରିକୋଟା ସ୍ଥିତ ଲଞ୍ଚ୍ ଭ୍ୟୁ ଗ୍ୟାଲେରିରୁ ଏହାର ଉତକ୍ଷେପଣ ଦେଖାଯାଇପାରିବ । ଏଥିପାଇଁ ଲୋକଙ୍କୁ ୱେବସାଇଟ୍ ଜରିଆରେ ରେଜିଷ୍ଟ୍ରେସନ କରିବାକୁ ପଡ଼ିବ ।
ଇସ୍ରୋ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ରେ ୱେବସାଇଟର ଲିଙ୍କ ମଧ୍ୟ ଛାଡ଼ିଛି । କେଉଁଦିନଠୁ ରେଜିଷ୍ଟେସନ କରାଯିବ ସେନେଇ ଘୋଷଣା କରାଯିବ ବୋଲି ଇସ୍ରୋ ସୂଚନା ଦେଇଛି । ଚନ୍ଦ୍ର ମିଶନ ପରେ ସୂର୍ଯ୍ୟ ମିଶନ ଲାଗି ସାରା ଦେଶବାସୀଙ୍କ ଏବେ ରହିଛି ପ୍ରତୀକ୍ଷା । ଇସ୍ରୋର ପ୍ରଥମ ମହାକାଶଭିତ୍ତିକ ସୋଲାର ଅଭଜର୍ଭଟୋରୀ ଆଦିତ୍ୟ ଏଲ୧ର ସଫଳତା ଉପରେ ରହିଛି ନଜର । ସୂର୍ଯର ଗବେଷଣା କ୍ଷେତ୍ରରେ ଇସ୍ରୋର ସନ୍ ମିଶନ ପ୍ରଥମ । ସୂର୍ଯ୍ୟ ଓ ପୃଥିବୀ ଅନ୍ତର୍ଗତ ଲାଗରେଞ୍ଜ ପଏଣ୍ଟ ୧ରେ ଏକ କକ୍ଷ ପଥରେ ସ୍ପେସକ୍ରାଫ୍ଟକୁ ମୁତୟନ କରାଯିବ ।
ମୁଖ୍ୟମନ୍ତ୍ରୀଙ୍କ ଘୋଷଣା: କିଶୋରଙ୍କୁ ୨୫ ଲକ୍ଷ ଟଙ୍କା ପୁରସ୍କାର
ଭୁବନେଶ୍ବର: ବିଶ୍ବ ଦୌଡ଼କୁଦ ପ୍ରତିଯୋଗିତାର ଜାଭଲିନ ଥ୍ରୋ ଫାଇନାଲିଷ୍ଟ ତଥା ଓଡ଼ିଶା ଖେଳାଳି କିଶୋର କୁମାର ଜେନାଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୁରସ୍କାର ଘୋଷଣା । ୨୫ ଲକ୍ଷ ଟଙ୍କାର ପୁରସ୍କାର ଘୋଷଣା କଲେ ମୁଖ୍ୟମନ୍ତ୍ରୀ ।
ସୂଚନାଯୋଗ୍ୟ, ପ୍ରଥମ ଓଡ଼ିଆ ଜାଭଲିନ ଖେଳାଳି ଭାବେ କିଶୋର ବିଶ୍ବ ଦୌଡ଼କୁଦ ପ୍ରତିଯୋଗିତାରେ ଅଂଶ ଗ୍ରହଣ କରିଥିଲେ । ପ୍ରଥମ ପଦାର୍ପଣରେ ଚମକି ଥିଲେ ଓଡ଼ିଶାର ଏହି ତାରକା ଖେଳାଳି । ଗୋଲଡେନ ବୟ ନୀରଜ ଚୋପ୍ରା ଏବଂ ଡିପି ମନୁଙ୍କ ସହ କିଶୋର ଫାଇନାଲକୁ ପ୍ରବେଶ କରିଥିଲେ । ଫାଇନାଲରେ ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ କରି ୮୪.୭୭ ମିଟର ଥ୍ରୋ କରିଥିଲେ ମଧ୍ୟ କିଶୋର ମେଡାଲ ତାଲିକାରୁ ବାଦ ପଡ଼ି ୫ମ ସ୍ଥାନରେ ରହିଥିଲେ ।
ତେବେ ଏହି ପ୍ରତିଯୋଗିତାରେ ଇତିହାସ ରଚିଥିଲେ ନୀରଜ । ବିଶ୍ବ ଖେଳକୁଦ ପ୍ରତିଯୋଗିତାର ୪୦ ବର୍ଷ ଇତିହାସରେ ପ୍ରଥମ ଥର ଭାରତକୁ ସ୍ବର୍ଣ୍ଣ ପଦକ ଭେଟି ଦେଇଥିଲେ ନୀରଜ । ସେହିପରି ଅନ୍ୟତମ ଫାଇନାଲିଷ୍ଟ ଡିପି ମନୁ ୮୪.୧୪ ମିଟର ଥ୍ରୋ କରି ଷଷ୍ଠ ସ୍ଥାନରେ ଅଭିଯାନ ଶେଷ କରିଥିଲେ ।
ବ୍ରଜମଣ୍ଡଳ ଯାତ୍ରାକୁ ନେଇ ହରିୟାଣାରେ ପୋଲିସ ଛାଉଣୀ
ନୁହ: ବ୍ରଜମଣ୍ଡଳ ଯାତ୍ରାକୁ ନେଇ ପୋଲିସ ସୁରକ୍ଷା ବଳୟରେ ହରିୟାଣାର ନୁହ । ପ୍ରଶାସନର ବିନା ଅନୁମତିରେ ବିଶ୍ବ ହିନ୍ଦୁ ପରିଷଦ ପକ୍ଷରୁ ବ୍ରଜମଣ୍ଡଳ ଯାତ୍ରାର ଆୟୋଜନ କରାଯାଇଥିବାରୁ ହାଇ ଆଲର୍ଟ ଜାରି କରାଯିବା ସହ ସହର ସାରା ପୋଲିସ ଫୋର୍ସ ନିୟୋଜିତ କରାଯାଇଛି । ସମ୍ବେଦନଶୀଳ ଜିଲ୍ଲାଗୁଡ଼ିକର ସୀମାରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି ।
ନୁହରେ ସମସ୍ତ ସ୍କୁଲ, କଲେଜ ଓ ଶିକ୍ଷାନୁଷ୍ଠାନ ବନ୍ଦ ରଖାଯାଇଛି । ଏହାସହ ଇଣ୍ଟରନେଟ ଓ ମେସେଜ ସେବା ବନ୍ଦ କରାଯାଇଥିବା ବେଳେ ୧୪୪ ଧାରା ଜାରି ହୋଇଛି । ଗୋଟିଏ ସ୍ଥାନରେ ୪ରୁ ଅଧିକ ଲୋକ ଏକାଠି ହେବାରେ କଟକଣା ଜାରି କରାଯାଇଛି ।
ଜୁଲାଇ ୩୧ ତାରିଖରେ ବ୍ରଜମଣ୍ଡଳ ଶୋଭାଯାତ୍ରା ବେଳେ ଦୁଇ ଗୋଷ୍ଠୀ ମଧ୍ୟରେ ହୋଇଥିବା ସଂଘର୍ଷରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଥିଲେ । ଏବେ ବି ସ୍ଥିତି ସମ୍ପୂର୍ଣ୍ଣ ଶାନ୍ତ ପଡ଼ି ନଥିବାରୁ ପୁଣି ଶୋଭାଯାତ୍ରା ପାଇଁ ପୋଲିସ ପ୍ରଶାସନ ଅନୁମତି ଦେଇ ନଥିଲା । ଏହାସତ୍ତ୍ବେ ଶୋଭାଯାତ୍ରାର ଆୟୋଜନ କରାଯାଇଥିବାରୁ ସୀମାବର୍ତ୍ତୀ ଅଞ୍ଚଳରେ ଚେକିଂ କଡ଼ାକଡ଼ି କରିଛି ପୋଲିସ । ନୁହ ମେଓ୍ବାତ ଯାଉଥିବା ସବୁ ଗାଡ଼ିକୁ ଅଟକାଇ ଯାଞ୍ଚ କରାଯାଉଛି । କଡ଼ା ସିକ୍ୟୁରିଟି ସହ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବାକୁ ଡ୍ରୋନ ମୁତୟନ କରାଯାଇଛି । ଭିଏଚପି ଶୋଭାଯାତ୍ରାରେ ସାମିଲ ହେବାକୁ ଆସୁଥିବା ବେଳେ ସୋନଲା ଟୋଲ ପ୍ଲାଜାରେ ଅଯୋଧ୍ୟାରୁ ଆସିଥିବା ସୀର ଜଗଦଗୁରୁ ପରମହଂସ ଆଚାର୍ଯ୍ୟଙ୍କୁ ପୋଲିସ ଅଟକାଇଛି ।
କଥା ରଖିଲେ 5T ସଚିବ: ଝାଡ଼େଶ୍ୱର ମନ୍ଦିର ଉନ୍ନତିକରଣ ପାଇଁ ୩ କୋଟିରୁ ଊର୍ଦ୍ଧ୍ବ ଟଙ୍କା ମଞ୍ଜୁର
ଦେବଗଡ଼: କଥା ଦେଇ କଥା ରଖିଲେ 5T ସଚିବ ଭି. କେ. ପାଣ୍ଡିଆନ । ଦେବଗଡ଼ ଜିଲ୍ଲାର ପ୍ରାଚୀନ ଶୈବପୀଠ ଝାଡ଼େଶ୍ୱର ମହାଦେବଙ୍କ ମନ୍ଦିରର ବିକାଶ ପାଇଁ ୩ କୋଟିରୁ ଊର୍ଦ୍ଧ୍ବ ଟଙ୍କା ମଞ୍ଜୁର ।
ଗତ ଜୁଲାଇ ମାସରେ 5T ସଚିବ ମନ୍ଦିର ପରିଦର୍ଶନ କରିଥିଲେ । ଏହି ସମୟରେ ଜନସାଧାରଣ, ମନ୍ଦିର ପରିଚାଳନା କମିଟି ଓ ସେବାୟତମାନେ ମନ୍ଦିରର ବିକାଶ ପାଇଁ ତାଙ୍କୁ ଅନୁରୋଧ କରିଥିଲେ । ଏଥିପାଇଁ ପ୍ରତିଶ୍ରୁତି ଦେଇଥିଲେ 5T ସଚିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅବଗତ କରିବା ପରେ ମୁଖ୍ୟମନ୍ତ୍ରୀ ୩ କୋଟିରୁ ଊର୍ଦ୍ଧ୍ବ ଟଙ୍କା ମଞ୍ଜୁର କରିଛନ୍ତି । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଫାଇଭ-ଟି ସଚିବ ଭି.କେ. ପାଣ୍ଡିଆନଙ୍କୁ ଅଞ୍ଚଳବାସୀ ଧନ୍ୟବାଦ ଜଣାଇଛନ୍ତି । ଏପରିକି ମନ୍ଦିରର ଉନ୍ନତିକରଣ ପାଇଁ ଟଙ୍କା ମଞ୍ଜୁର କରିଥିବାରୁ ବିରୋଧୀ ଦଳର ନେତାମାନେ ମଧ୍ୟ ମୁଖ୍ୟମନ୍ତ୍ରୀଙ୍କୁ ପ୍ରଶଂସା କରିଛନ୍ତି ।