ଭୁବନେଶ୍ବର: ନୂଆ ବର୍ଷରେ ରିଲିଜ ହେବାକୁ ଯାଉଛି ଓଡିଆ ଫିଲ୍ମ ସମୟ କହିବ କିଏ କାହାର । ଏହାପୂର୍ବରୁ ସିନେମାର ଅଡିଓ ରିଲିଜ୍ ହୋଇଯାଇଛି । ଅନନ୍ୟା ଏଣ୍ଟରଟେଣ୍ଟମେଣ୍ଟ ବ୍ୟାନରରେ ଏହି ସିନେମାଟି ପ୍ରସ୍ତୁତ ହେଉଥିବାବେଳେ ଏହାର ପ୍ରଯୋଜକ ରହିଛନ୍ତି ରମେଶ ସିଂ । ପ୍ରଥମ ଥର ପାଇଁ ନିର୍ଦ୍ଦେଶନା ଭାର ସମ୍ଭାଳିଛନ୍ତି ବରିଷ୍ଠ ହାସ୍ୟ ଅଭିନେତା ବ୍ରଜ ସିଂ । ସିନେମାରେ ଅମ୍ଳାନ ଓ ଓମଙ୍କାର ଅଧିନାୟକ ଭୁମିକାରେ ରହିଥିବାବେଳେ ତୃପ୍ତି ଓ ସୋନମ ଅଭିନେତ୍ରୀ ଅଛନ୍ତି । ଦେବୁ ବ୍ରହ୍ମା,ପ୍ରଜ୍ଞା,ଅନବିନ୍ଦଙ୍କ ଭଳି ଅନେକ ହାସ୍ୟ ଅଭିନେତାଙ୍କ କମେଡି ଦର୍ଶକ ଉପଭୋଗ କରିପାରିବେ । ଜାନୁଆରୀ ପାଞ୍ଚ ତାରିଖରେ ଓଡ଼ିଶାର ସମସ୍ତ ହଲରେ ସିନେମା ରିଲିଜ୍ କରିବାକୁ ପ୍ରଯୋଜନା ସଂସ୍ଥା ଲକ୍ଷ୍ୟ ରଖିଛି ।
କ’ଣ ଭାରତ ଉପରେ ଆକ୍ରମଣ ପାଇଁ ପାକିସ୍ତାନ ଯୋଜନା କରୁଛି ?
ଇସଲାମାବାଦ: ପାକିସ୍ତାନ ତିଆରି କରିଛି ନୂଆ ଏୟାର ଫିଲ୍ଡ । ଭାରତ ପାଇଁ ବିପଦ ସୃଷ୍ଟି କରିପାରେ ଏହି ଏୟାରଫିଲ୍ଡ । ଭାରତ ସୀମା ଠାରୁ ପ୍ରାୟ ୨୦ କିଲୋମିଟର ଦୂରରେ ପାକିସ୍ତାନ ଏକ ନୂତନ ଏୟାର ଫିଲଡ୍ ତିଆରି କରିଛି । ଏୟାରଫିଲ୍ଡ୍ ର ଲାହୋର ନିକଟରେ ଅବସ୍ଥିତ ଅଛି । ବିମାନଘାଟୀରେ ଚୀନ ଠାରୁ ଆଣିଥିବା SH-15SP ହାଓ୍ବିଜର ତୋପକୁ ଲଗେଇଛି ।
ବର୍ତ୍ତମାନ ସୁଦ୍ଧା ଏହି ବିମାନଘାଟି ବେସାମରିକ ଉଡାଣ ପାଇଁ ବ୍ୟବହୃତ ହେବ କି ସୈନବାହିନୀ ଙ୍କ ବ୍ୟବହାରରେ ଲାଗିବ ତାହା ଜଣା ପଡି ନାହିଁ । ପାକିସ୍ତାନର ଏହି ଦୁଇଟି କାମ ଭାରତ ପାଇଁ ଚିନ୍ତାର ବିଷୟ ଅଟେ । ଏହା ଭାରତର ସୁରକ୍ଷା ପାଇଁ ବିପଦ ସୃଷ୍ଟି କରିପାରେ । ପାକିସ୍ତାନର କୌଣସି ଅଧିକାରୀ ଏବଂ ସୈନବାହିନୀ ଏହି ବାବଦରେ କୌଣସି ବୟାନ୍ ଦେଇନାହାନ୍ତି । କିଛି ଲୋକଙ୍କ କହିବା ଅନୁସାରେ , ଏଠି ପାକିସ୍ତାନି ସୈନ୍ୟବାହିନୀଙ୍କ ବ୍ୟବହାର ପାଇଁ ପାଇଲଟ୍ ଟ୍ରେନିଂ ସ୍କୁଲ୍ ତିଆରି କରାଯାଉଛି ।
ଏହା ମଧ୍ୟ କୁହାଯାଉଛି କି, ଏହି ଏୟାରଫିଲ୍ଡ ର ବ୍ୟବହାର ହେଲିକପ୍ଟର , ଡ୍ରୋନ୍ ଏବଂ ଅନ୍ୟ ବିମାନ ଗୁଡିକର ଉଡାଣ ପାଇଁ କରାଯିବ । ସବୁଠାରୁ ଚିନ୍ତାର ବିଷୟ ଏହା କି ଏହି ଏୟାର ଫିଲ୍ଡ୍ ର ବ୍ୟବହାର ଚୀନ୍ ଏବଂ ତୁର୍କୀରୁ ଆସିଥିବା ଆକ୍ରମଣକାରୀ ଡ୍ରୋନ୍ ର ଉଡାଣ ପାଇଁ କରାଯାଇଛି । କାରଣ ଏହା ଭାରତୀୟ ସୀମା ଠାରୁ ୨୦ କିଲୋମିଟର ଦୂରରେ ଥିବାରୁ ଏଠାରୁ ଏହି ଡ୍ରୋନ୍ ଲଞ୍ଚ କରିବା ସହଜ ହେବ ।
ପାକିସ୍ତାନୀ ସେନା ନିଜର ୨୮ ଏବଂ ୩୨ତମ ଆର୍ଟିଲରୀ ରେଜିମେଣ୍ଟସ୍ କୁ ଚୀନ୍ ଠାରୁ ମଗେଇଥିବା ତୋପ ଦ୍ୱାରା ସଜିତ କରିଛି । ପାକିସ୍ତାନ ଚୀନ୍ ଠାରୁ SH-15 ତୋପ କିଣିଛି । ଚୀନ୍ ପାକିସ୍ତାନକୁ ଶସ୍ତା ଦାମରେ ତୋପ ଦେଇଛି । SH-15SP ହେଉଛି ଚୀନ୍ ଦ୍ବାରା ନିର୍ମିତ ଅତ୍ୟାଧୁନିକ ହାଓ୍ବିଜର ବନ୍ଧୁକ । ୨୦୧୯ ରେ ପାକିସ୍ତାନ ଚୀନ୍ କୁ ୨୩୬ଟି ବନ୍ଧୁକ ମାଗିଥିଲା । ବର୍ତ୍ତମାନ ପାକିସ୍ତାନ ପାଖରେ ୪୨ଟି ତୋପ ଅଛି । ଏହି ତୋପ ଗୁଡିକୁ ପାକିସ୍ତାନ ତାର ଆର୍ମି ଡେ ପରେଡ୍ ରେ ସାମିଲ୍ କରି ନିଜର ଶକ୍ତି ପ୍ରଦର୍ଶନ କରିଥିଲା । ଚୀନ୍ ର ଏହି ତୋପର ଓଜନ ୨୫ ଟନ୍ । ଯାହାର ଲମ୍ବ ୨୧.୪ ଫୁଟ୍ , ମୋଟେଇ ୮.୯ ଫୁଟ୍ ଏବଂ ଉଚ୍ଚତା ୧୧.୧୦ ଫୁଟ୍ । ଏହି ତୋପକୁ ଚଲେଇବା ପାଇଁ ୬ ଜଣ ଆବଶ୍ୟକ। ଏହା ୧୫୫*୫୨ କ୍ୟାଲିଭରି ର ତୋପ ଅଟେ । ଏହି ତୋପ ୯୦ କିଲୋମିଟର ପ୍ରତି ଘଣ୍ଟା ରେ ଚାଲିପାରେ
ବଢୁଛି ମେଟ୍ରୋ ଟ୍ରେନ୍ ଉତ୍ସାହ, ରାଜ୍ୟ ସରକାରଙ୍କୁ ଦିଆଯିବ ପ୍ରସ୍ତାବ
ଭୁବନେଶ୍ବର: ବଢୁଛି ମେଟ୍ରୋ ଟ୍ରେନ୍ ଉତ୍ସାହ । ସିଏମସି ବୈଠକରେ ପ୍ରସ୍ତାବ ନେଇ ଆଲୋଚନା । ସିଏନବିଟି ପର୍ଯ୍ୟନ୍ତ ଟ୍ରେନ ଚଳାଚଳ ପାଇଁ ନିଷ୍ପତ୍ତି । ରାଜ୍ୟ ସରକାରଙ୍କୁ ଦିଆଯିବ ପ୍ରସ୍ତାବ । କଟକ ମେୟରଙ୍କ ଉପସ୍ଥିତିରେ ମେଟ୍ରୋ ଟ୍ରେନ ନେଇ ହୋଇଛି ସବିଶେଷ ଆଲୋଚନା । ଭୁବନେଶ୍ବରରୁ ତ୍ରିଶୁଳିଆ ପର୍ଯ୍ୟନ୍ତ ରାଜ୍ଯ ସରକାରଙ୍କ ସ୍ବପ୍ନର ମେଟ୍ରୋ ଟ୍ରେନ ପ୍ରକଳ୍ପ ଭବିଷ୍ୟତରେ ଗମନାଗମନ କ୍ଷେତ୍ରରେ ଲାଇଫଲାଇନ ପାଲଟିବ । ନୂଆବର୍ଷ ଆରମ୍ଭରୁ ମୁଖ୍ଯମନ୍ତ୍ରୀ ଏହାର ଶିଳାନ୍ୟାସ କରିବେ । ତେବେ କାଠଯୋଡ଼ି ଉପରେ ଏକ ବ୍ରିଜ କରି ଏହାକୁ କଟକ ଭିତରକୁ ଆଣିବାକୁ ମୁଖ୍ଯମନ୍ତ୍ରୀଙ୍କୁ ଅନୁରୋଧ କରାଯାଇଛି ।
କାଠଯୋଡ଼ି ଉପରେ ଆଉ ଏକ ନୂଆ ବ୍ରିଜ ପାଇଁ ସରକାର ଅନୁମୋଦନ ଦେଇ ସାରିଛନ୍ତି । 216 କୋଟି ଟଙ୍କାରେ ହେବାକୁ ଥିବା ଏହି ବ୍ରିଜକୁ ଗୋଦାବରୀ ନଦୀ ଉପରେ ହୋଇଥିବା ବ୍ରିଜ ଭଳି କଲେ ଏଥିରେ ଟ୍ରେନ ଓ ଗାଡି ଉପର-ତଳ ହୋଇ ଯାଇ ପାରିବ । ତେଣୁ ଖୁବଶୀଘ୍ର ଏକ ନେଇ ଏକ ଡିପିଆର ପ୍ରସ୍ତୁତ କରାଯାଇ ସରକାରଙ୍କୁ ଦିଆଯିବ ବୋଲି ବରିଷ୍ଠ କର୍ପୋରେଟ କହିଛନ୍ତି ।
ରାଜ୍ଯ ସରକାରଙ୍କ ଶୁଭଦୃଷ୍ଟି କଟକ ସହର ଉପରେ କିଛିବର୍ଷ ହେବ ପଡିଥିବାରୁ ବଡ ବଡ ପ୍ରକଳ୍ପ କାମ ଚାଲିଛି । ତେଣୁ ଏଭଳି ପରିସ୍ଥିତିରେ ମେଟ୍ରୋ ଟ୍ରେନର ସଂପ୍ରସାରଣ ନେଇ ସମସ୍ତେ ଆଶା ରଖିଛନ୍ତି
ଭାରତ ବିଶ୍ୱର ବଡ଼ ଇନୋଭେସନ କେନ୍ଦ୍ର ହୋଇପାରିବ: ଆକାଶ ଅମ୍ବାନୀ
ମୁମ୍ବାଇ: ରିଲାଏନ୍ସ ଜିଓ ଇନ୍ଫୋକମ୍ର ଅଧ୍ୟକ୍ଷ ଆକାଶ ଅମ୍ବାନୀ କହିଛନ୍ତି ଯେ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି-ବମ୍ବେ ସହ ମିଶି ଦେଶର ସର୍ବବୃହତ ଟେଲିକମ୍ କମ୍ପାନି ଜିଓ “ଭାରତ ଜିପିଟି” ନିର୍ମାଣ କରିବା ଉପରେ କାର୍ଯ୍ୟ କରୁଛି । ଏଥି ସହିତ କମ୍ପାନି ମଧ୍ୟ ଟେଲିଭିଜନ ପାଇଁ ଏକ ନୂଆ ଅପରେଟିଂ ସିଷ୍ଟମ୍ ଆରମ୍ଭ କରିବା ଦିଗରେ କାର୍ଯ୍ୟ କରୁଥିବା ସେ କହିଛନ୍ତି । ଆଇଆଇଟି-ବମ୍ବେର ବାର୍ଷିକ ଟେକ୍ ଫେଷ୍ଟରେ ଯୋଗ ଦେଇ ଆକାଶ ଅମ୍ବାନୀ ଏହା କହିଛନ୍ତି ।
କମ୍ପାନୀ ପାଇଁ ବିକାଶର ପରିବ୍ୟବସ୍ଥା ନିର୍ମାଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ “ଜିଓ ୨.୦’ର ଭିଜନ ଉପରେ କାମ ଚାଲିଥିବା ସେ ପ୍ରକାଶ କରିଛନ୍ତି । ଜିଓ ପକ୍ଷରୁ ଆଇଆଇଟି ବମ୍ବେ ସହିତ ଏକ ଭାରତ ଜିପିଟି କାର୍ଯ୍ୟକ୍ରମ ଆରମ୍ଭ କରିବା ପାଇଁ ଏକ ପ୍ରକଳ୍ପ ଉପରେ କାମ କରାଯାଉଥିବା ସୂଚନା ଦେବା ସହିତ ବର୍ତ୍ତମାନ ଲାର୍ଜ ଲାଙ୍ଗୁଏଜ୍ ମଡେଲ ଏବଂ ଜେନେରେଟିଭ୍ ଏଆଇ ଉପରେ କାମ ଚାଲିଥିବା ସେ କହିଛନ୍ତି । ଏଆଇ ଅର୍ଥ ଆର୍ଟିଫିସିଆଲ ଇଂଟେଲିଜେନ୍ସ, କିନ୍ତୁ ଏହା ସମସ୍ତଙ୍କ ପାଇଁ ଉଦ୍ଦିଷ୍ଟ ବୋଲି ସେ କହିଛନ୍ତି । ଆଗାମୀ ଦିନରେ ଦେଶ ପାଇଁ ଆର୍ଟିଫିସିଆଲ ଇଂଟେଲିଜେନ୍ସ, ପ୍ଲାଟଫର୍ମ ନିର୍ମାଣ ଦିଗରେ ଜିଓ କାର୍ଯ୍ୟ କରୁଥିବା ପ୍ରକାଶ କରି ଏହି କ୍ଷେତ୍ରରେ କମ୍ପାନୀ ଗଣମାଧ୍ୟମ, ବାଣିଜ୍ୟ, ଯୋଗାଯୋଗ ଏବଂ ନୂଆ ଉପକରଣ ବା ଡିଭାଇସ ଉପରେ ମଧ୍ୟ କାର୍ଯ୍ୟ କରୁଥିବା ସେ କହିଛନ୍ତି ।
ଟିଭି ପାଇଁ ଜିଓ ନିଜର ଓଏସ୍ (ଅପରେଟିଂ ସିଷ୍ଟମ୍) ଉପରେ ବେଶ କିଛି ସମୟ ହେବ କାର୍ଯ୍ୟ କରୁଛି ଏବଂ ଏହାକୁ କିପରି ଶୁଭାରମ୍ଭ କରାଯିବ ସେ ନେଇ ଆମେ ବ୍ୟାପକ ଭାବରେ ଚିନ୍ତା କରୁଛୁ ବୋଲି ସେ କହିଛନ୍ତି ।
ଅମ୍ବାନୀ ଭାରତକୁ ଆଗାମୀ ଦଶନ୍ଧି ପାଇଁ ସବୁଠାରୁ ବଡ଼ ଉଦ୍ଭାବନ ତଥା ନବସୃଜନ ବା ଇନୋଭେସନ କେନ୍ଦ୍ର ବୋଲି ଅଭିହିତ କରିବା ସହ ଦଶନ୍ଧି ଶେଷ ସୁଦ୍ଧା ଦେଶ ୫ ରୁ ୬ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବ ବୋଲି ବିଶ୍ୱାସ ପ୍ରକଟ କରିଛନ୍ତି । ଆସନ୍ତା କିଛି ବର୍ଷରେ ଭାରତ ବିଶ୍ୱକୁ ସବୁଠାରୁ ଶ୍ରେଷ୍ଠ ସେବା ଓ ସବୁଠାରୁ ଶ୍ରେଷ୍ଠ ଉତ୍ପାଦ ପ୍ରଦାନ କରିବାର କେନ୍ଦ୍ର ଭାବରେ ଉଭା ହେବ ବୋଲି ସେ ଆଶା ପ୍ରକାଶ କରିଛନ୍ତି ।
୨୦୨୪ ଅମ୍ବାନୀ ପରିବାର ପାଇଁ ଏକ ସ୍ୱତନ୍ତ୍ର ବର୍ଷ, କାରଣ ତାଙ୍କ ସାନ ଭାଇ ଅନନ୍ତ ଏହି ବର୍ଷ ବିବାହ କରିବାକୁ ଯାଉଥିବା ସେ ପ୍ରକାଶ କରିଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ କମ୍ପାନି ୫ଜି ଘରୋଇ ନେଟୱାର୍କ ପ୍ରଦାନ କରିବାକୁ ବେଶ ଉତ୍ସାହିତ ଏବଂ ଯେକୌଣସି ଆକାରର ଉଦ୍ୟୋଗକୁ ଏହା ୫ଜି ଷ୍ଟାକ ପ୍ରଦାନ କରିବ । ଜିଓକୁ ବିଶ୍ୱର ସର୍ବବୃହତ ଷ୍ଟାର୍ଟଅପ୍ ବୋଲି ଅଭିହିତ କରି ସେ କହିଛନ୍ତି ଯେ ଯୁବ ଉଦ୍ୟୋଗୀମାନେ ବିଫଳ ହେବାକୁ ଭୟ ନ କରିବାର ଆବଶ୍ୟକତା ରହିଛି । ସେମାନଙ୍କୁ ସେ ସାମାଜିକ ଉନ୍ନତି ପାଇଁ କାମ କରିବାକୁ ଆହ୍ୱାନ ଦେବା ସହିତ ଜିଓ ସର୍ବଦା ଭବିଷ୍ୟତର ପ୍ରଯୁକ୍ତି ଉପରେ ନଜର ରଖିଛି ବୋଲି ସେ କହିଛନ୍ତି ।

