ଭୁବନେଶ୍ବର: ଶୁକ୍ରବାର ବିଦାୟ ନେବେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ । ଆଜି ରାଜଭବନ ପକ୍ଷରୁ ତାଙ୍କୁ ବିଦାୟ ସମ୍ବର୍ଦ୍ଧନା ଦିଆଯିବ। ଏଥିପାଇଁ ରାଜଭବନ ଯିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜଭବନର ସମସ୍ତ ଅଧିକାରୀ ଓ କର୍ମଚାରୀ ଆଜି ଅପରାହ୍ନରେ ପ୍ରଫେସର ଗଣେଶୀ ସମ୍ବର୍ଦ୍ଧନା ଦେବେ। ମେ ୨୯ ୨୦୧୮ରେ ରାଜ୍ୟପାଳ ଭାବେ ଦାୟିତ୍ବ ନେଇଥିଲେ ପ୍ରଫେସର ଗଣେଶୀ ଲାଲ୍। ଓଡ଼ିଶାର ନବନିଯୁକ୍ତ ରାଜ୍ୟପାଳ ରଘୁବର ଦାସ ଆସନ୍ତା ୨୯ ତାରିଖ ଦିନ ଭୁବନେଶ୍ବରରେ ପହଞ୍ଚିବେ । ୩୦ ତାରିଖ ଦିନ ବିଭିନ୍ନ ବର୍ଗର ଲୋକଙ୍କୁ ଭେଟିବା ସହ ପୁରୀ ଯାଇ ଜଗନ୍ନାଥଙ୍କୁ ଦର୍ଶନ କରିବେ। ୩୧ ତାରିଖରେ ନୂଆ ରାଜ୍ୟାପାଳ ଭାବେ ଦାୟିତ୍ବ ନେବେ ରଘୁବର ଦାସ ।
ରାଜ୍ୟ ସରକାରଙ୍କ ସହ ଘରୋଇ ବସ ମାଲିକ ସଂଘର ବୈଠକ ସଫଳ
ଭୁବନେଶ୍ବର: ଆଲୋଚନା ମାଧ୍ୟମରେ ହେବ ସବୁ ଦାବିର ସମାଧାନ। ଆଉ ଆଗକୁ ହେବନି ବସ ଧର୍ମଘଟ । ଶୁକ୍ରବାର ଘରୋଇ ବସ ମାଲିକ ସଂଘ ସହ ପରିବହନ ମନ୍ତ୍ରୀଙ୍କ ଆଲୋଚନା ସଫଳ ହୋଇଛି । ବୈଠକ ପରେ ଏହି ସୂଚନା ଦେଇଛନ୍ତି ପରିବହନ ମନ୍ତ୍ରୀ ଟୁକୁନି ସାହୁ । ଆଲୋଚନା ମାଧ୍ୟମରେ ବସ ମାଲିକ ସଂଘର ଦାବିର ସମାଧାନ ହେବ । ତେଣୁ ଆଗକୁ ବସ ଧର୍ମଘଟ ହେବ ନାହିଁ ବୋଲି ସଂଘର ମିଳିଛି ପ୍ରତିଶ୍ରୁତି । ତେବେ ଘରୋଇ ବସ୍ ମାଲିକ ସଂଘ ୩୦ ସୁଦ୍ଧା ଲିଖିତ ଦାବି ଦେବେ । ବ୍ଲକରୁ ଜିଲାକୁ ଗଡିବ ଲକ୍ଷ୍ମୀ ବସ । ସଂଘ ପକ୍ଷରୁ ଦିଆଯାଇଥିବା ଦାବିକୁ ବିଚାର କରିବ ପରିବହନ କମିଟି । ପ୍ରାରମ୍ଭିକ ସ୍ତରରେ ଯେଉଁ ବ୍ଲକରେ ପରିବହନ ସେବା ନାହିଁ, ସେଠାରେ ଲକ୍ଷ୍ମୀ ଗଡ଼ିବ ବୋଲି ନିଷ୍ପତ୍ତି ହୋଇଛି । ଲକ୍ଷ୍ମୀ ବସ ରୁଟ ଯାହା ଥିଲା ସେମିତି ରହିବ । ସେହି ଅନୁସାରେ ସାରା ରାଜ୍ୟରେ ଲକ୍ଷ୍ମୀ ବସ ଗଡିବ । ଲକ୍ଷ୍ମୀ ବସ ଚାଲିଲେ ଘରୋଇ ବସ ମାଲିକ ସଂଘର କିଛି କ୍ଷତି ହେବନି।
୬ଦିନରେ ବିଶ୍ବକପ ସେମିଫାଇନାଲ ଦୌଡ଼ରୁ ବାଦ ପଡ଼ିପାରନ୍ତି ଏହି ୫ ଟିମ୍
ନୂଆଦିଲ୍ଲୀ: ଚଳିତ ବିଶ୍ବକପ ବେଶ ରୋମାଞ୍ଚକ ହେଉଛି । କେଉଁ ମ୍ୟାଚ୍ କାହା ସପକ୍ଷରେ ଯିବ ଜାଣିବା କଷ୍ଟସାଧ୍ୟ ହୋଇ ପଡ଼ୁଛି । ପାକିସ୍ତାନ ଭଳି ଶକ୍ତିଶାଳି ଟିମ୍ ଚଳିତ ବିଶ୍ବକପରେ ଆଫଗାନିସ୍ତାନଠାରୁ ପରାସ୍ତ ହୋଇଛି । ସେପଟେ ଦକ୍ଷିଣ ଆଫ୍ରିକା ନେଦରଲାଣ୍ଡଠାରୁ ହାରି ସାରିଛି । ସେମିଫାଇନାଲରେ କେଉଁ ୪ଟିମ ସ୍ଥାନ ପକ୍କା କରିବେ ତାକୁ ନେଇ ସମସ୍ତଙ୍କ ମନରେ ଦ୍ବନ୍ଦ ଉପୁଜୁଛି । ତେବେ ଆସନ୍ତା ୬ ଦିନ ମଧ୍ୟରେ ୫ ଟିମ ବିଶ୍ବକପ ସେମିଫାଇନାଲ ଦୌଡ଼ରୁ ବାଦ ପଡ଼ିପାରନ୍ତି ।
ପଏଣ୍ଟ ଟେବୁଲ ଉପରେ ଯଦି ନଜର ପକାଇବା ତାହେଲେ ଏବେ ଭାରତ ୫ ମ୍ୟାଚରୁ ୫ ବିଜୟ ସହ ୧୦ ପଏଣ୍ଟ ପାଇଁ ଟେବୁଲ ଶୀର୍ଷରେ ରହିଛି । ଭାରତ ସେମିଫାଇନାଲ ଟିକେଟ ପାଇଁ ଆଉ ମାତ୍ର ଗୋଟିଏ ବିଜୟ ଆବଶ୍ୟକ । ଭାରତର ୪ଟି ମ୍ୟାଚ ବାକି ଥିବାବେଳେ ଭାରତ ସେମିରେ ପହଞ୍ଚିବା ଏକପ୍ରକାର ନିଶ୍ଚିତ ବୋଲି କ୍ରିକେଟ ପଣ୍ଡିତମାନେ ମତ ଦେଉଛନ୍ତି । ସେପଟେ ଭାରତ ସାଙ୍ଗକୁ ସାଉଥ ଆଫ୍ରିକା, ନ୍ୟୁଜିଲାଣ୍ଡ ଭଲ ପ୍ରଦର୍ଶନ ସହ ପଏଣ୍ଟ ଟେବୁଲର ଦ୍ବିତୀୟ ଏବଂ ତୃତୀୟ ସ୍ଥାନରେ ରହିଛନ୍ତି । ଯଦି ମ୍ୟାଚ ଗୁଡ଼ିକ ଉପରେ ନଜର ପକାଇବା ତାହେଲେ ଏମାନେ ମଧ୍ୟ ସେମିଫାଇନାଲ ଯିବା ରାସ୍ତା ଏକପ୍ରକାର ସଫା ରହିଛି ।
ଚତୁର୍ଥ ସ୍ଥାନ କଥା ଯଦି ବିଚାର କରିବା ତାହେଲେ କେଉଁ ଦଳ ଯିବ ତାକୁ ନେଇ ଏବେ ଅନେକ ବିଚାରବିମର୍ଶ ଆରମ୍ଭ ହୋଇଛି । ଅଷ୍ଟ୍ରେଲିଆ ୫ ମ୍ୟାଚରୁ ୩ ବିଜୟ ସହ ଚତୁର୍ଥ ସ୍ଥାନରେ ରହିଛି । ଶେଷ ମ୍ୟାଚରେ ନେଦରଲାଣ୍ଡକୁ ଏକ ବଡ଼ ରନ ବ୍ୟବଧାନରେ ହରାଇଛି । ଦଳ ମଧ୍ୟ ଦମଦାର ପ୍ରଦର୍ଶନ ଜାରି ରଖିଛି । ଅଷ୍ଟ୍ରଲିଆ ପଛକୁ ପାକିସ୍ତାନ ଏବଂ ଆଫଗାନିସ୍ତାନ ୫ ମ୍ୟାଚରୁ ୨ଟି ବିଜୟ ହାସଲ କରି ପଞ୍ଚମ ଏବଂ ଷଷ୍ଠ ସ୍ଥାନରେ ରହିଛନ୍ତି । ପାକିସ୍ତାନର ଲଗାତାର ପରାଜୟ ପରେ ଦଳ ବହୁ ସମାଲୋଚନାକୁ ସାମନା କରିଛି ।
ଏଣୁ ଆଗାମି ମ୍ୟାଚରେ ଦଳ ସଂଘର୍ଷ କରିବା ସହ ଟୁର୍ଣ୍ଣାମେଣ୍ଟକୁ ଫେରିବା ସହ ସେମି ଦୌଡ଼ରେ ରହିବ । ଅଷ୍ଟ୍ରେଲିଆ ଏବଂ ପାକିସ୍ତାନ ମଧ୍ୟରେ ଚତୁର୍ଥ ସ୍ଥାନ ପାଇଁ ଟକ୍କର ହେବାର ସମ୍ଭାବନା ଅଧିକ ରହିଛି । ସେପଟେ ନେଦରଲାଣ୍ଡ, ଶ୍ରୀଲଙ୍କା, ବାଂଲାଦେଶ ଏବଂ ଇଂଲଣ୍ଡ ଗୋଟିଏ ଲେଖାଏଁ ମ୍ୟାଚ ଜିତିଛନ୍ତି । କିନ୍ତୁ କୌଣସି ଟିମ୍ ଏଯାବତ ସେମି ଦୌଡ଼ରୁ ବାଦ ପଡ଼ିନଥିବାବେଳେ ସଂଘର୍ଷ ଜୋରଦାର ହେବ ବୋଲି କ୍ରିକେଟପ୍ରେମୀମାନେ ଆଶା ରଖିଛନ୍ତି ।
ପାରା ଏସିଆନ୍ ଗେମସ ବ୍ୟାଡମିଣ୍ଟନ ସିଙ୍ଗଲସ ଫାଇନାଲରେ ପ୍ରମୋଦ ଭଗତ
ବ୍ୟୁରୋ ରିପୋର୍ଟ: ପାରା ଏସିଆନ୍ ଗେମସ ବ୍ୟାଡମିଣ୍ଟନ ସିଙ୍ଗଲସ ଫାଇନାଲରେ ପ୍ରମୋଦ ଭଗତ । ଫାଇନାଲକୁ ପ୍ରବେଶ ସହ ରୌପ୍ୟ ପଦକ ପକ୍କା କରିଛନ୍ତି ବ୍ୟାଡମିଣ୍ଟନ ଖେଳାଳି ପ୍ରମୋଦ ଭଗତ। ସେମିଫାଇନାଲରେ ଥାଇଲାଣ୍ଡ ପ୍ରତିଯୋଗୀ ମଙ୍ଗଖୋନ ବୁନସୁନଙ୍କ ଲଗାତର ୨ଟି ସେଟରେ ପରାସ୍ତ କରି ରୌପ୍ୟ ପଦକ ପକ୍କା କରିଛନ୍ତି । ଦମଦାର ଖେଳ ପ୍ରଦର୍ଶନ କରିଥିଲେ ପ୍ରମୋଦ।
ପ୍ରଥମ ସେଟକୁ ୨୧-୧୩ ପଏଣ୍ଟ ବ୍ୟବଧାନରେ ଜିତିଥିବାବେଳେ ଦ୍ବିତୀୟ ସେଟକୁ ୨୧-୧୨ ପଏଣ୍ଟରେ ଜିତି ନେଇଥିଲେ । ପୂର୍ବରୁ ବ୍ୟାଡମିଣ୍ଟନ ମିଳିତ ବର୍ଗ ସେମିଫାନାଲରେ ପରାସ୍ତ ହୋଇ ବ୍ରୋଂଜ ହାତେଇଛନ୍ତି ପ୍ରମୋଦ ଭଗତ ଓ ସୁକାନ୍ତ କଦମ ଯୋଡ଼ି । ଇଣ୍ଡୋନେସିଆର ଦ୍ବାଇକୋ ଏବଂ ଫ୍ରେଡି ସେଟିୱାନ ଯୋଡ଼ିଙ୍କଠାରୁ ୨-୧ ସେଟରେ ପରାସ୍ତ ହୋଇ ବ୍ରୋଂଜରେ ସନ୍ତୁଷ୍ଟ ହେବାକୁ ପଡିଛି । ମିଳିତ ବର୍ଗ ମ୍ୟାଚଟି ବହୁତ ସଂଘର୍ଷପୂର୍ଣ୍ଣ ଥିଲା।
ପ୍ରଥମ ସେଟ୍ ରେ ଭଲ ଖେଳ ଦେଖାଇ ୨୨-୨୦ ପଏଣ୍ଟରେ ଜିତିଥିଲେ। ଦ୍ୱିତୀୟ ସେଟ୍ ରେ ବି ଭଲ ପ୍ରଦର୍ଶନ କରି ୧୯-୧୪ ଲିଡରେ ପ୍ରମୋଦ ସୁକାନ୍ତ ଥିଲେମଧ୍ୟ ଇଣ୍ଡୋନେସିଆ ଦଳ ସମସ୍ତଙ୍କୁ ଚକମା ଦେଖାଇ ଲଗାଦାର ୫ ପଏଣ୍ଟ୍ ହାତେଇ ୨୦-୨୦ ବରାବରା କରିଥିଲା ପରେ ଦ୍ୱିତୀୟ ସେଟ୍ ୨୩-୨୧ ରେ ବିଜୟ ହୋଇଥିଲା । ତୃତୀୟ ସେଟ୍ ପାଇଁ ଭାରତୀୟ ଦଳରେ ଜିତିବା କଷ୍ଟ ହୋଇଯାଇଥିଲା । ଇଣ୍ଡୋନେସିଆ ଦଳ ବହୁତ୍ ଭଲ ପ୍ରଦର୍ଶନ କରି ୨୧-୧୨ ରେ ବିଜୟ ହୋଇଥିଲା ।
ମର୍ମନ୍ତୁଦ ସଡ଼କ ଦୁର୍ଘଟଣାରେ ଚାଲିଗଲା ୧୨ ଜଣଙ୍କ ଜୀବନ
ବାଙ୍ଗାଲୋର: କର୍ଣ୍ଣାଟକରେ ମର୍ମନ୍ତୁଦ ସଡକ ଦୁର୍ଘଟଣା । ଟ୍ୟାଙ୍କର ସହ ଟାଟା ସୁମୋ ଭ୍ୟାନ ମୁହାଁମୁହିଁ ଧକ୍କା । ଘଟଣାରେ ୧୨ଜଣଙ୍କ ମୃତ୍ୟୁ , ଜଣେ ଗୁରୁତର । ବାଙ୍ଗୋଲୋର ଓ ହାଇଦ୍ରାବାଦର ୪୪ ନମ୍ବର ଜାତୀୟ ରାଜପଥରେ ଘଟିଛି ଅଘଟଣ । ଶୁକ୍ରବାର ସକାଳ ୭ଟା ୧୫ ମିନିଟରେ କର୍ଣ୍ଣାଟକ ଚିକ୍କାବଲାପୁରରେ ଘଟିଛି ଦୁର୍ଘଟଣା । ଘନ କୁହୁଡି ଯୋଗୁଁ କାର ଡ୍ରାଇଭର ରାସ୍ତାରେ ଥିବା ଟ୍ୟାଙ୍କରକୁ ଦେଖି ନପାରି ଘଟିଛି ଅଘଟଣ ।
ଘଟଣାରେ ୧୨ ଜଣଙ୍କ ମୃତ୍ୟୁ ସମେତ ଜଣେ ଗୁରୁତର ହୋଇଛନ୍ତି । ଘଟଣାର ସୂଚନା ପାଇଲାପରେ ପୋଲିସ ଘଟଣା ସ୍ଥଳରେ ପହଞ୍ଚି ଆହତଙ୍କୁ ମେଡିକାଲରେ ଭର୍ତ୍ତି କରିଛନ୍ତି । ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଆହତଙ୍କ ଚିକିତ୍ସା ଜାରି ରହିଛି । ମୃତକଙ୍କ ମଧ୍ୟରେ ୮ଜଣ ପୁରୁଷ ଓ ୪ଜଣ ମହିଳା ଥିଲେ । ଏହି ଖବର ପାଇବା ପରେ ପରିବାର ଲୋକଙ୍କ ମଧ୍ୟରେ ଖେଳି ଯାଇଛି ଶୋକର ଛାୟା । କୁହୁଡ଼ି ପାଇଁ ପୂର୍ବରୁ ମଧ୍ୟ ଅନେକ ଦୁର୍ଘଟଣାମାନ ଘଟିଥିବାବେଳେ ସତର୍କତାର ସହ ଗାଡ଼ି ଚଳାଇବା ପାଇଁ ଟ୍ରାଫିକ ପୋଲିସ ପକ୍ଷରୁ ସତର୍କ କରାଯାଉଛି ।
ଇସ୍ରାଏଲ୍ ଏବଂ ହମାସ ସଂଘର୍ଷ, ଖସୁଛି ସେନସେକ୍ସ
ନୂଆଦିଲ୍ଲୀ: ଇସ୍ରାଏଲ୍ ଏବଂ ହମାସ ସଂଘର୍ଷର ପରିଣାମ ଦିନକୁ ଦିନ ଭୟଙ୍କର ହେବାରେ ଲାଗିଛି । ବିଶ୍ବ ବଜାରରେ ଅର୍ଥନୈତିକ ସ୍ଥିତି ବିଗିଡିବାରେ ଲାଗିଛି । ମାତ୍ର ୬ ଦିନରେ ୩୦୦୦ ପଏଣ୍ଚ କ୍ରାସ୍ କରିଛି ଭାରତୀୟ ସେୟାର ବଜାର । ବମ୍ବେ ଷ୍ଟକ୍ ଏକ୍ସଚେଞ୍ଜ ସୂତକାଙ୍କରେ ଗୁରୁବାର ପୁଣିଥରେ ୭୦୦ ପଏଣ୍ଟର ଫଲ୍ ଦେଖିବାକୁ ମିଳିଛି । ୮ ମାସ ତଳକୁ ଖସିଛି ସେନସେକ୍ସ । ୬୩ ହଜାର ୭୦୦ରେ BSE ପହଞ୍ଚିଥିବା ବେଳେ ନିଫଟି-୫୦ ୧୮୯୦୦ର ବଡ଼ ସପୋର୍ଟ ଲେବଲ ବ୍ରେକ୍ କରିଛି । ବ୍ୟାଙ୍କ ନିଫଟି ୪୨୪୦୦ ତଳକୁ ଖସିଛି । ସବୁ ସେକ୍ଟରରେ ବ୍ଲଡ୍ ବାଥ୍ ଦେଖିବାକୁ ମିଳିଛି ।
ନିବେଶକମାନେ ଲସରେ ମଧ୍ୟ ମାର୍କେଟରୁ ଟଙ୍କା ବାହାର କରୁଥିବା ଦେଖିବାକୁ ମିଳିଛି । ଗତ ୬ ଦିନର ଟ୍ରେଡିଂ ସେସନରେ FII ବା ଫରେନ୍ ଇନଷ୍ଟିଚ୍ୟୁସନାଲ୍ ଇନଭେଷ୍ଟର ୮ ହଜାର କୋଟିରୁ ଅଧିକ ଟଙ୍କା ଭାରତୀୟ ବଜାରରୁ ଉଠାଇସାରିଲେଣି । ଘରୋଇ ନିବେଶକ ୫୦୦୦ କୋଟି ଟଙ୍କାର ଅଧିକ ନିବେଶ କରିଛନ୍ତି । ମୋଟ୍ ଉପରେ ନିବେଶକଙ୍କୁ ୨୦ ଲକ୍ଷ କୋଟି ଟଙ୍କାର କ୍ଷତି ସହିବାକୁ ପଡ଼ିଛି । କେବଳ ସୋମବାର ଓ ବୁଧବାର ୧୨ ଲକ୍ଷ କୋଟି ଟଙ୍କାର କ୍ଷତି ହୋଇଛି। ଗୁରୁବାର ବ୍ୟାଙ୍କ ନିଫଟି ଏବଂ ନିଫଟି-୫୦ର ଏକ୍ସପାୟାରି ଥିବା ବେଳେ ମାର୍କେଟ ତଳକୁ ତଳକୁ ଖସିବା ଘୋର ଆଲୋଡ଼ନ ସୃଷ୍ଟି କରିଛି। ବିଶେଷକରି ମେଟାଲ, ଫାଇନାନ୍ସ, ବ୍ୟାଙ୍କ, ଫାର୍ମା, ଆଇଟି, ମିଡିଆ ଏବଂ ପାଓ୍ବାର ସେକ୍ଟରରେ ବଡ଼ ଧରଣର ହ୍ରାସ ପରିଲକ୍ଷିତ ହୋଇଛି ।
ସ୍ମଲ୍ କ୍ୟାପ୍ ସେକ୍ଟର ଗୁଡିକରେ ୧୫ରୁ ୨୩ ପ୍ରତିଶତ ପର୍ଯ୍ୟନ୍ତ ହ୍ରାସ ଇକ୍ବିଟିରେ ଦେଖିବାକୁ ମିଳିଥିବା ବେଳେ ମିଡ୍ କ୍ୟାପରେ ୧୩ରୁ ୧୭ ଓ ଲାର୍ଡ କ୍ୟାପରେ ୭ରୁ ୧୩ ପ୍ରତିଶତ ପର୍ଯ୍ୟନ୍ତ ଫଲ୍ ଦେଖିବାକୁ ମିଳିଛି । ଓଭରଅଲ୍ ପୋର୍ଟଫୋଲିଓ ଦେଖିଲେ ୭ରୁ ୧୧ ପ୍ରତିଶତ ପର୍ଯ୍ୟନ୍ତ ଫଲ୍ ହୋଇଛି। ଆମେରିକାର ପ୍ରମୁଖ କଂପାନୀ ଗୁଡିକର ସେୟାରରେ ୩ରୁ ୪ ପ୍ରତିଶତ ପର୍ଯ୍ୟନ୍ତ ହ୍ରାସ ଦେଖିବାକୁ ମିଳିଥିବା ବେଳେ ନାସଡାକ୍ ଗତକାଲି ୩୦୦ ପଏଣ୍ଟ ଖସିଛି ଯାହାକି ଅଢେଇ ପ୍ରତିଶତ ହେବ। ହଂଙ୍କଠାରୁ ଆରମ୍ଭ କରି ଜାପାନ୍ ପର୍ଯ୍ୟନ୍ତ ସବୁଠି ମାର୍କେଟରେ ବଡ଼ ସେଲ୍ ଓ ଫଲ୍ ଦେଖିବାକୁ ମିଳିଛି।
ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅ ବୈଭବଙ୍କୁ ଇଡି ସମନ୍
ଜୟପୁର: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅଙ୍କୁ ଇଡି ସମନ୍। ଅଶୋକ ଗେହଲଟଙ୍କ ପୁଅ ବୈଭବ ଗେହଲଟଙ୍କୁ ସମନ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ଶୁକ୍ରବାର ପଚରାଉଚରା ପାଇଁ ବୈଭବଙ୍କୁ ଡାକିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ବୈଦେଶିକ ମୁଦ୍ରା ପ୍ରବନ୍ଧନ ଅଧିନିୟମ ଉଲ୍ଲଂଘନ ଅଭିଯୋଗରେ ବୈଭବଙ୍କୁ ସମନ କରିଛି ଇଡି । ଏହାସହ ରାଜସ୍ଥାନ କଂଗ୍ରେସ ଗୋବିନ୍ଦ ସିଂ ଡୋଟାସରାଙ୍କ ଘରେ ଚଢାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ରାଜସ୍ଥାନର ପୃଥକ ପୃଥକ ୧୧ଟି ସ୍ଥାନରେ ରେଡ୍ କରିଛି ଇଡି । ଜୟପୁରରେ ଥିବା ସରକାରୀ ବାସଭବନ ସହ ଅନ୍ୟ କିଛି ସ୍ଥାନରେ ରେଡ୍ ହୋଇଛି ।
ପରୀକ୍ଷା ପ୍ରଶ୍ନପତ୍ର ଲିକ୍ ଘଟଣାରେ ଏହି ଚଢାଉ ଚାଲିଛି । ଅର୍ଥ ହେରଫେର ମାମଲାରେ ଇଡି ଏହି ରେଡ୍ କରୁଛି । ରାଜସ୍ଥାନର ମହୁଆ ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ ଗୋବିନ୍ଦ ସିଂ ଡୋଟାସରା। ରାଜସ୍ଥାନର ଶିକ୍ଷାମନ୍ତ୍ରୀ ଥିଲେ ଗୋବିନ୍ଦ ସିଂ। ଇଡିର ରେଡକୁ ନେଇ ବିଜେପିକୁ ସମାଲୋଚନା କରିଛି ଇଡି। ଆସନ୍ତା ୨୩ ନଭେମ୍ବରରେ ରାଜସ୍ଥାନରେ ଭୋଟ ହେବାକୁ ଥିବାବେଳେ ଜାଣିଶୁଣି କେନ୍ଦ୍ରୀୟ ତଦନ୍ତକାରୀ ସଂସ୍ଥାର ଅପବ୍ୟବହାର କରୁଥିବା କହିଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲଟ। ପୂର୍ବରୁ ମଧ୍ୟ ଦିଲ୍ଲୀରେ ଇଡି ପକ୍ଷରୁ ବଡ଼ ବଡ଼ ନେତାଙ୍କୁ ନୋଟିସ ମଧ୍ୟ ପଠାଯାଇଛି । ତେବେ ରାଜସ୍ଥାନରେ ମୁଖ୍ୟମନ୍ତ୍ରୀଙ୍କ ପୁଅଙ୍କୁ ଇଡିର ନୋଟିସ ହେବା ପରେ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି ।
କଂଗ୍ରେସ ନେତାଙ୍କ ଉପରେ ଇଡି ରେଡର ପ୍ରତିବାଦ କରି ବିକ୍ଷୋଭ ପ୍ରଦର୍ଶନ । ଇଡି କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି କଂଗ୍ରେସ ସମର୍ଥନକ। ନିର୍ବାଚନ ପାଖେଇ ଆସୁଥିବାରୁ ବିଜେପି ଜାଣିଶୁଣି କଂଗ୍ରେସ ନେତାଙ୍କ ଉପରେ ଚଢାଉ କରୁଛି ବୋଲି ଅଭିଯୋଗ କରିଛନ୍ତି କଂଗ୍ରେସ ସମର୍ଥକ । ଦେଶର ଜନତାଙ୍କ ପାଖରେ ବିଜେପି ବିଶ୍ବାସ ହରାଉଥିବାରୁ ଇଡି, ସିବିଆଇ ଏବଂ ଆଇଟି ଭଳି କେନ୍ଦ୍ରୀୟ ସଂସ୍ଥାର ଅପବ୍ୟବହାର କରୁଛି ବୋଲି ଅଭିଯୋଗ କରିଛନ୍ତି କଂଗ୍ରେସ ନେତା ।
ଭସାଣି ବେଳେ ପୋଲିସ ଉପରେ ଢ଼େଲା ମାଡ଼
ବାଲେଶ୍ବର: ବାଲେଶ୍ବରରେ ଭସାଣି ଉତ୍ସବରେ ଗଣ୍ଡଗୋଳ । ପୋଲିସ ଉପରକୁ ଢେଲା, ପଥର ମାଡ଼ ପରେ ସିନେମା ବଜାରରେ ପୋଲିସ କଲା ଲାଠିମାଡ଼ । ଢେଲା, ପଥର ମାଡ଼ ଓ ଲାଠିଚାର୍ଯରେ ଜଣେ ପୋଲିସ କର୍ମଚାରୀ ସମେତ ମୋଟ 5ଜଣ ଆହତ ହୋଇଛନ୍ତି । ବିଳମ୍ବ ଭସାଣି ଓ ଡ଼ିଜେ ସାଉଣ୍ଡ ବଜାଇବାକୁ ନେଇ ପୋଲିସ ଓ ପୂଜା କମିଟି ମଧ୍ୟରେ ଗଣ୍ଡଗୋଳ ହୋଇଥିଲା । ଗତକାଲି ବାଲେଶ୍ବରର ସିନେମା ଛକରେ ଭସାଣି ଚାଲିଥିବାବେଳେ, ରାତି ୧୨ଟା ପରେ ଡ଼ିଜେ ବଜାଇବାକୁ ପୋଲିସ ବାରଣ କରିଥିଲା ।
ଏଥିସହିତ ବେଢ ଗୁଡ଼ିକୁ ଭସାଣି ନକରି ରାସ୍ତା ଉପରେ ଦୀର୍ଘ ସମୟ ରଖି ନାଚିବାକୁ ପୋଲିସ ବିରୋଧ କରିଥିଲା । ଏହି ସମୟରେ ଏକ ନିର୍ଦ୍ଧିଷ୍ଟ ପୂଜା କମିଟି ଡ଼ିଜେ ବଜାଇବାକୁ ଜିଦ୍ ଧରିଥିଲା । ଏହି ଘଟଣାକୁ ନେଇ ପ୍ରଶାସନ ସହିତ ଆଲୋଚନା ଚାଲିଥିବା ସମୟରେ ପଛରେ ଥିବା କମିଟି ସଦସ୍ୟମାନେ ପୋଲିସକୁ ଠେଲାପେଲା କରିଥିଲେ । ଫଳରେ ପୋଲିସ ବିଶୃଙ୍ଖଳା ସୃଷ୍ଟି କରୁଥିବା ଲୋକଙ୍କୁ ଘଉଡ଼ାଇବାକୁ ଲାଠିଚାର୍ଯ କରିଥିଲା ।
କେବେ ସୁସ୍ଥ ହେବେ ହାର୍ଦ୍ଦିକ ପାଣ୍ଡ୍ୟା?
ନୂଆଦିଲ୍ଲୀ: ଟିମ୍ ଇଣ୍ଡିଆର ଚିନ୍ତା ବଢ଼ାଇଛି ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଆହତ । ବାଂଲାଦେଶ ବିପକ୍ଷ ମ୍ୟାଚରେ ଆହତ ହୋଇଥିଲେ ପାଣ୍ଡ୍ୟା । ନ୍ୟୁଜିଲାଣ୍ଡ ବିପକ୍ଷ ମ୍ୟାଚରେ ଆହତ କାରଣରୁ ପାଣ୍ଡ୍ୟା ଖେଳି ନଥିଲେ । ତେବେ ଆଗାମି ତିନି ମ୍ୟାଚରେ ମଧ୍ୟ ହାର୍ଦ୍ଦିକ ଖେଳି ନପାରନ୍ତି ବୋଲି କୁହାଯାଉଛି । ତେବେ ଏଯାବତ ବିସିସିଆଇ ପକ୍ଷରୁ କୌଣସି ସୂଚନା ମିଳିନାହିଁ । ଲିଗାମେଣ୍ଟରେ ଆଘାତ ଲାଗିଥିବାବେଳେ କୌଣସି ହାଡ଼ ଭାଙ୍ଗି ନାହିଁ । ଏବେ ପାଣ୍ଡ୍ୟା ଚିକିତ୍ସିତ ହେଉଥିବାବେଳେ ସେମିଫାଇନାଲ ବେଳକୁ ଫିଟ୍ ହେବା ସହ ଦଳକୁ ଫେରିପାରନ୍ତି ବୋଲି ଚର୍ଚ୍ଚା ହେଉଛି ।
ସେପଟେ ଦକ୍ଷିଣ ଆଫ୍ରିକା ଏବଂ ଇଂଲଣ୍ଡ ଭଳି ଶକ୍ତିଶାଳି ଦେଶ ବିପକ୍ଷରେ ଭାରତ ମ୍ୟାଚ ଥିବାବେଳେ ପାଣ୍ଡ୍ୟାଙ୍କ ଅନୁପସ୍ଥିତି ଦଳ ପାଇଁ ମହଙ୍ଗା ସାବ୍ୟସ୍ତ ହୋଇପାରେ । ସେପଟେ କୁହାଯାଉଛି କି, ଅଶ୍ବିନୀଙ୍କୁ ଦଳରେ ସ୍ଥାନ ମିଳିପାରେ । ଭାରତ ଚଳିତ ବିଶ୍ବକପରେ ୫ ମ୍ୟାଚରୁ ୫ ବିଜୟ ସହ ପଏଣ୍ଟ ଟେବୁଲର ଶୀର୍ଷରେ ରହିଛି । ଦଳର ଖେଳାଳିମାନେ ଦମଦାର ଫର୍ମରେ ରହିଥିବାବେଳେ ଭଲ ପ୍ରଦର୍ଶନ କରୁଛନ୍ତି । ଆଗାମି ଭାରତ ସେମିରେ ପହଞ୍ଚିବା ପାଇଁ ଆଉ ମାତ୍ର ୨ଟି ମ୍ୟାଚ ଆବଶ୍ୟକ ହେଉଛି । କିନ୍ତୁ ଗୋଟିଏ ମ୍ୟାଚ ଜିତିଲେ ମଧ୍ୟ ସେମିରେ ପହଞ୍ଚି ପାରିବ ।
ଆଜି ଖୋର୍ଦ୍ଧା ଓ ଜଗତସିଂହପୁର ଜିଲ୍ଲାରେ ଆମ ଓଡ଼ିଶା ନବୀନ ଓଡ଼ିଶାର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
ଭୁବନେଶ୍ବର: ଗୁରୁବାର ଆମ ଓଡ଼ିଶା ନବୀନ ଓଡ଼ିଶାରେ ସାମିଲ ହେବ ଖୋର୍ଦ୍ଧା ଓ ଜଗତସିଂହପୁର ଜିଲ୍ଲା । ଦୁଇ ଜିଲ୍ଲାରେ ବିଭିନ୍ନ ଉନ୍ନୟନ୍ନମୂଳକ ପ୍ରକଳ୍ପର ଉଦଘାଟନ ହେବ । ଖୋର୍ଧା ଜିଲ୍ଲାରେ ୯୫ କୋଟି ଟଙ୍କା ବ୍ୟୟରେ ୨ ହଜାର ୭୬୩ଟି ପ୍ରକଳ୍ପ ଏବଂ ଜଗତସିଂହପୁରରେ ୯୯ କୋଟି ଟଙ୍କା ବ୍ୟୟରେ ୨ ହଜାର ୯୨୨ଟି ଉନ୍ନୟନ୍ନପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ସୂଚନାଯୋଗ୍ୟ ଯେ, ଗତ ୧୦ ତାରିଖରେ ରାଜ୍ୟ ସରକାରଙ୍କର ମହତ୍ତ୍ଵାକାଂକ୍ଷୀ ଯୋଜନା ‘ଆମ ଓଡିଶା ନବୀନ ଓଡିଶା’ ଆରମ୍ଭ ହୋଇଛି। ଏହି କାର୍ଯ୍ୟକ୍ରମର ଫୋକସରେ ରହିଛି ପ୍ରତି ପଞ୍ଚାୟତ, ପ୍ରତି ଗାଁ। ପ୍ରଥମେ କେନ୍ଦୁଝର ଓ ଭଦ୍ରକ ଜିଲ୍ଲାରେ ଏହି ଯୋଜନାର ଶୁଭାରମ୍ଭ ହୋଇଥିଲା । ପରେ ପୁରୀ, ନୟାଗଡ଼, ମୟୂରଭଞ୍ଜ, ବରଗଡ଼ ଓ ଦେବଗଡ଼, କଟକ ଓ କେନ୍ଦ୍ରାପଡା ଜିଲ୍ଲାରେ ଏହି ଯୋଜନା ଆରମ୍ଭ କରାଯାଇଛି ।
ସାରା ରାଜ୍ୟରେ ଆମ ଓଡିଶା ନବୀନ ଓଡିଶା କାର୍ଯ୍ୟକ୍ରମ ପାଇଁ ୩ ହଜାର ୩୯୭ କୋଟି ଟଙ୍କା ଖର୍ଚ୍ଚ ହେବ । ଏହି ଯୋଜନାରେ ରାଜ୍ୟର ୬ ହଜାର ୭୯୪ଟି ପଞ୍ଚାୟତ ସାମିଲ ହେବେ । ମୋଟ କ ୯୦ ହଜାର ୭୨୩ଟି ପ୍ରକଳ୍ପ କାର୍ଯ୍ୟକାରୀ ହେବ । ଏହି ଯୋଜନାରେ ପ୍ରତି ପଞ୍ଚାୟତକୁ ୫୦ ଲକ୍ଷ ଟଙ୍କା ଲେଖାଏଁ ମିଳିବ । ପ୍ରତି ଗାଁରେ ଓଡିଶାର ସଂସ୍କୃତିର ମୂଳଭିତ୍ତିକୁ ସୁଦୃଢ କରାଯିବା ସହିତ ଡିଜିଟାଲ ଭିତ୍ତିଭୂମିର ବିକାଶ କରାଯିବ।