ନୀଳଗିରି : ନୀଳଗିରି ବରହମପୁର ଥାନା ରାଇପାଳ ଗାଁରେ ଗୁଳିମାଡ଼ । ବିଳମ୍ବିତ ରାତିରେ ଘରେ ପଶି ମହିଳାଙ୍କୁ ଗୁଳି ମାଡ କରିଛନ୍ତି ଦୁର୍ବୃତ୍ତ । ଗୁଳିମାଡ଼ ପରେ ଦୁଇ ଜଣ ଦୁର୍ବୃତ୍ତ ଫେରାର ହୋଇଯାଇଛନ୍ତି । ମହିଳାଙ୍କ ହାତ, ଅଣ୍ଟା ଓ ପେଟରେ ଗୁଳି ବାଜିଛି । ଆହତ ମହିଳା ଜଣକ ରାଇପାଳ ଗାଁର ରସିକ ମୁର୍ମୁଙ୍କ ସ୍ତ୍ରୀ ଲକ୍ଷ୍ମୀ ମୁର୍ମୁ ବୋଲି ଜଣାପଡିଛି । ଗୁରୁତର ଅବସ୍ଥାରେ ତାଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଅନ୍ୟପଟେ ଗୁଳିମାଡ଼ର କାରଣ ଅସ୍ପଷ୍ଟ ଥିବା ବେଳେ, ପୋଲିସ ଘଟଣାର ତଦନ୍ତ ଜାରି ରଖିଛି ।
ତେଲେଙ୍ଗାନାରେ ହେବ ରେବନ୍ତ ସରକାର, ହାଇକମାଣ୍ଡଙ୍କ ଗ୍ରୀନ୍ ସିଗନାଲ
ହାଇଦ୍ରାବାଦ : ତେଲେଙ୍ଗାନାର ନୂଆ ମୁଖ୍ୟମନ୍ତ୍ରୀ ହେବେ କଂଗ୍ରେସ ପ୍ରଦେଶ ମୁଖ୍ୟ ରେବନ୍ତ ରେଡ୍ଡୀ । ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ରେବନ୍ତଙ୍କ ନାଁରେ ମୋହର ମାରିଛନ୍ତି । ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧି, ଏଆଇସିସି ସଭାପତି ମଲ୍ଲିକାର୍ଜ୍ଜୁନ ଖଡ଼ଗେ ଏବଂ କଂଗ୍ରେସ ଜାତୀୟ ମହାସଚିବ କେ.ସି ଭେନୁଗୋପାଳଙ୍କ ସହ ଅନ୍ୟ ନେତାଙ୍କ ବୈଠକରେ ରେବନ୍ତଙ୍କ ନାଁରେ ବାଜିଛି ମୋହର । ଆଜି ହାଇଦ୍ରାବାଦରେ କଂଗ୍ରେସ ବିଧାୟକ ଦଳ ବୈଠକରେ ଆଲୋଚନା ପରେ ବିଧିବଦ୍ଧ ଭାବେ ରେବନ୍ତଙ୍କ ନାଁ ଘୋଷଣା କରାଯିବ ।
ଆସନ୍ତାକାଲି ସେ ମୁଖ୍ୟମନ୍ତ୍ରୀ ଭାବେ ଶପଥ ନେବେ । ରାଜ୍ୟରେ କଂଗ୍ରେସର ବିପୁଳ ନିର୍ବାଚନ ପରେ ସମସ୍ତ କ୍ରେଡିଟ ରେବନ୍ତଙ୍କୁ ମିଳିଥିଲା । ମୁଖ୍ୟମନ୍ତ୍ରୀ ରେସରେ ସେ ସବୁଠୁ ଆଗରେ ଥିଲେ। ରେବନ୍ତ ରେଡି ତେଲେଙ୍ଗାନା ରାଜନୀତିରେ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । ୨୦୧୭ରେ ସେ କଂଗ୍ରେସରେ ଯୋଗ ଦେଇଥିଲେ । ୨୦୨୧ରେ ତେଲଙ୍ଗାନା ପିସିସି ଭାବେ ଦାୟିତ୍ବ ନେଇଥିଲେ । ଏହା ପୁର୍ବରୁ ସେ ତେଲୁଗୁ ଦେଶମ ପାର୍ଟିରେ ଥିଲେ । ଦୁଇ ଦୁଇ ଧର ବିଧାୟକ ଭାବେ ନିର୍ବାଚିତ ହୋଇଛନ୍ତି୍ ରେବନ୍ତ ।
ନିଜର ଜବରଦସ୍ତ ପ୍ରଚାର ଲାଗି ସେ କଂଗ୍ରେସ ରାଜନୀତିରେ ବେଶ ପରିଚିତ । ସେହିପରି ରାଜସ୍ଥାନରେ ବିଜେପିର ମୁଖ୍ୟମନ୍ତ୍ରୀ ପଦ ପାଇଁ ରେସର ସବା ଆଗରେ ଅଛନ୍ତି ରାଜକୁମାରୀ ଦୀୟା କୁମାରୀ । ଏହା ପରେ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ରହିଛନ୍ତି । ଉଭୟ ବସୁନ୍ଧରା ଓ ଦୀୟା ରାଜ ପରିବାରରୁ ଆସିଛନ୍ତି । ୭୧ ହଜାରରୁ ଅଧିକ ବମ୍ପର ଭୋଟରେ ଦିୟା କୁମାରୀ ନିଜ ନିକଟତମ ପ୍ରତିନ୍ଦନ୍ଦୀଙ୍କୁ ପରାସ୍ତ କରିଛନ୍ତି । ଜୟପୁର ରାଜ ପରିବାର ସଦସ୍ୟ ଦୀୟା କୁମାରୀ । ରାଜା ମାନ ସିଂ ଦ୍ବିତୀୟଙ୍କର ନାତୁଣୀ ହେଉଛନ୍ତି ଦୀୟା । ଜୟପୁରର ରାଜତନ୍ତ୍ରର ଶେଷ ସମ୍ରାଟ ଥିଲେ ରାଜା ମାନ ସିଂହ ଦ୍ବିତୀୟ । ତେବେ ବିଜେପିର ସଂସଦୀୟ ଟିମ୍ ମୁଖ୍ୟମନ୍ତ୍ରୀ କିଏ ହେବ ତା ଉପରେ ମୋହର ମାରିବେ । ତେବେ ଛତିଶଗଡ଼ରେ ମଧ୍ୟ ଏଥର ନୂଆ ଚେହେରା ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ହେଉଛି । ମଧ୍ୟପ୍ରଦେଶରେ ମଧ୍ୟ ଶିବରାଜ ସିଂହ ବିଜେପିର ପ୍ରଥମ ପସନ୍ଦ ନୁହେଁ ବୋଲି ଚର୍ଚ୍ଚା ହେଉଛି । କୈଳାଶ ବିଜୟ ବର୍ଗିୟ ଏବଂ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ମୁଖ୍ୟମନ୍ତ୍ରୀ ରେସରେ ଅଛନ୍ତି ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।
ଆହୁରି ସହଜ ହେବ ମାଟ୍ରିକ ପରୀକ୍ଷା; ଛାତ୍ରଛାତ୍ରୀଙ୍କୁ ଯୋଗାଇ ଦିଆଯିବ ନମୁନା ପ୍ରଶ୍ନପତ୍ର
ଭୁବନେଶ୍ୱର : ମାଟ୍ରିକ ପରୀକ୍ଷାର୍ଥୀଙ୍କ ପାଇଁ ପଠାଗଲା ନମୁନା ପ୍ରଶ୍ନପତ୍ର । ମାଧ୍ୟମିକ ଶିକ୍ଷା ପରିଷଦ ଦ୍ବାରା ପରିଚାଳିତ ୨୦୨୪ ଦଶମ ପରୀକ୍ଷାରେ ପରୀକ୍ଷାର୍ଥୀଙ୍କ ସୁବିଧା ପାଇଁ ନମୁନା ପ୍ରଶ୍ନପତ୍ର ପ୍ରସ୍ତୁତ ହୋଇଛି । ଏହି ପ୍ରଶ୍ନପତ୍ର ଛାତ୍ରଛାତ୍ରୀଙ୍କୁ ବଣ୍ଟନ କରିବାକୁ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ନିର୍ଦେଶକ ସୁଶାନ୍ତ କୁମାର ଦାଶ ଏନେଇ ସବୁ ଜିଲ୍ଲା ଶିକ୍ଷା ଅଧିକାରୀଙ୍କୁ ଚିଠି ଲେଖିଛନ୍ତି ।
ବର୍ତ୍ତମାନ ପ୍ରଚଳିତ ପରୀକ୍ଷା ପଦ୍ଧତି ମୁତାବକ ନମୁନା ପ୍ରଶ୍ନପତ୍ର ତିଆରି ହୋଇଛି । ଓଡ଼ିଆ, ଇଂରାଜୀ, ହିନ୍ଦୀ, ସଂସ୍କୃତ, ଗଣିତ, ବିଜ୍ଞାନ, ସାମାଜିକ ବିଜ୍ଞାନ ବିଷୟର ଗୋଟିଏ ଲେଖାଏଁ ସେଟ୍ ନମୁନା ପ୍ରଶ୍ନପତ୍ର ପଠାଯାଇଛି । ବାର୍ଷିକ ପରୀକ୍ଷାରେ ସମାନ ଢଙ୍ଗର ପ୍ରଶ୍ନପତ୍ର ପଡ଼ିବ । ଦଶମ ଶ୍ରେଣୀ ଛାତ୍ରଛାତ୍ରୀ ଆଗକୁ ଦେବାକୁ ଥିବା ବୋର୍ଡ ପରୀକ୍ଷା ପାଇଁ ଏହି ପ୍ରଶ୍ନପତ୍ର ସହାୟକ ହେବ ।
ଡିଇଓ ପ୍ରଶ୍ନପତ୍ର ଗୁଡ଼ିକୁ ବିଦ୍ୟାଳୟ ସ୍ତରରେ କିଭଳି ବିତରଣ କରିବେ, ସେ ଦିଗରେ ପଦକ୍ଷେପ ନେବେ । ପ୍ରଧାନଶିକ୍ଷକଙ୍କୁ ପ୍ରଶ୍ନପତ୍ର ପଠାଇବା ସହ ସମସ୍ତ ଛାତ୍ରଛାତ୍ରୀଙ୍କୁ ନିକଟରେ ପ୍ରଶ୍ନପତ୍ର ପହଞ୍ଚାଇବାକୁ ଡିଇଓ ବ୍ୟବସ୍ଥା କରିବେ । ଜିଲ୍ଲାସ୍ତରର ଅଭିଜ୍ଞ ଶିକ୍ଷକଙ୍କ ଦ୍ବାରା ପ୍ରଶ୍ନପତ୍ର ପ୍ରସ୍ତୁତ କରି ଡିଜିଟାଲ କୋଶ୍ଚିନ୍ ବ୍ୟାଙ୍କ ପାଇଁ ନିର୍ଦ୍ଦେଶାଳୟକୁ ପଠାଇବାକୁ ମଧ୍ୟ କୁହାଯାଇଛି ।
ଆନ୍ଧ୍ରପ୍ରଦେଶର ୮ ଜିଲ୍ଲାରେ ବାତ୍ୟା ବିଭୀଷିକା, ଆଜି ଦୁର୍ବଳ ହୋଇ ଅବପାତରେ ପରିଣତ ହେବ ମିଗଜୋମ୍
ଅମରାବତୀ : ବାତ୍ୟା ମିଗଜୋମର ତାଣ୍ଡବରେ ଆନ୍ଧ୍ରପ୍ରଦେଶ ଓ ଚେନ୍ନାଇ ବେହାଲ । ଆନ୍ଧ୍ରପ୍ରଦେଶର ୮ ଜିଲ୍ଲାରେ ବାତ୍ୟା ବିଭୀଷିକା ଦେଖିବାକୁ ମିଳିଛି । ବଡ଼ବଡ଼ ଗଛ ଉପୁଡ଼ି ପଡ଼ିଥିବାବେଳେ ଘର ଉଡ଼ିଯାଇଛି । ହଜାର ହଜାର ଇଲେକ୍ଟ୍ରିଖୁଣ୍ଟ ଉପୁଡ଼ି ପଡ଼ିଛି । ଉଦ୍ଧାର କାର୍ଯ୍ୟକୁ ଜୋରଦାର କରାଯାଉଥିବା ବେଳେ, ଏବେ ବି ପ୍ରବଳ ବର୍ଷା ଲାଗି ରହିଛି ।
ରେସ୍କ୍ୟୁ ଓ ରିଲିଫ୍ ପାଇଁ କେନ୍ଦ୍ରକୁ ୫ ହଜାର କୋଟି ମାଗିଛନ୍ତି ତାମିଲନାଡୁ ସରକାର । ବର୍ତ୍ତମାନ ବାତ୍ୟାଟି ପୂର୍ବ-ଉତ୍ତର-ପୂର୍ବ ଦିଗରେ ଗତି କରୁଛି । ଆଜି ଏହା ଦୁର୍ବଳ ହୋଇ ଅବପାତରେ ପରିଣତ ହେବ । ଏପଟେ ବାତ୍ୟା ପ୍ରଭାବରେ ଓଡ଼ିଶାରେ ବର୍ଷା ହେଉଛି । ଆଜି ଉପକୂଳ ଓଡ଼ିଶାର ପୁରୀ, ଖୋର୍ଦ୍ଧା, କଟକ, ଜଗତସିଂହପୁର ଏବଂ ନୟାଗଡରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି ।
ସମ୍ଭାବ୍ୟ ସ୍ଥିତିକୁ ନଜରରେ ରଖି ଆଜି ଗଜପତି ଜିଲ୍ଲାରେ ସ୍କୁଲ ଛୁଟି ଘୋଷଣା କରାଯାଇଛି । ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ଆଜି ପର୍ଯ୍ୟନ୍ତ ସମୁଦ୍ରକୁ ଯିବାକୁ ବାରଣ କରାଯାଇଛି । ଏସଆରସିଙ୍କ ସୂଚନା ଅନୁସାରେ ଗତକାଲି କୋରାପୁଟରେ ପ୍ରବଳରୁ ଅତିପ୍ରବଳ ବର୍ଷା ହୋଇଥିଲା । ନାରାୟଣ ପାଟଣା ଓ ପଟାଙ୍ଗି ଅଞ୍ଚଳରେ ସର୍ବାଧିକ ୨୫ ମିଲିମିଟର ବର୍ଷା ହୋଇଥିଲା । ଆଜିପରେ ପାଗ ବଦଳିବା ସହ ଫସଲ କ୍ଷୟକ୍ଷତିର ଆକଳନ କରାଯିବା ସହ ଚାଷୀଙ୍କୁ କ୍ଷତିପୂରଣ ପ୍ରଦାନ କରାଯିବ ।
ଆସନ୍ତା ୧୭ରେ ଇଣ୍ଡିଆ ମେଣ୍ଟର ବୈଠକ, ମତଭେଦ ଓ ମନାନ୍ତରରୁ ସ୍ଥଗିତ ରହିଲା ଆଜିର କାର୍ଯ୍ୟକ୍ରମ
ନୂଆଦିଲ୍ଲୀ : ଆସନ୍ତା ୧୭ ତାରିଖରେ ବସିବ ଇଣ୍ଡିଆ ମେଣ୍ଟର ବୈଠକ । ମେଣ୍ଟ ମଧ୍ୟରେ ମତଭେଦ ଓ ମନାନ୍ତରରୁ ଆଜି ହେବାକୁ ଥିବା ବୈଠକ ସ୍ଥଗିତ ରହିଛି । ଇଣ୍ଡିଆ ମେଣ୍ଟର ବୈଠକରେ ୩ ଦଳର ନେତା ଯୋଗ ଦେବାକୁ ଅସନ୍ତୋଷ ପ୍ରକାଶ କରିବାରୁ ବୈଠକ ଘୁଞ୍ଚିଛି । ୨୦୨୪ ସାଧାରଣ ନିର୍ବାଚନକୁ ନେଇ ଇଣ୍ଡିଆ ମେଣ୍ଟର ବୈଠକ ଆଜି ହେବାର ଥିଲା ।
ବିହାର ମୁଖ୍ୟମନ୍ତ୍ରୀ ନିତିଶ କୁମାର, ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଏବଂ ଟିଏମସି ମୁଖ୍ୟ ମମତା ବାନାର୍ଜୀ ବୈଠକରେ ଯୋଗ ଦେବାକୁ ଅସନ୍ତୋଷ ପ୍ରକାଶ କରିଥିଲେ । ୫ ରାଜ୍ୟ ନିର୍ବାଚନରେ ସିଟ ଆବଣ୍ଟନ ଠିକରେ ହୋଇଥିଲେ ଇଣ୍ଡିଆ ମେଣ୍ଟର ବିଜୟ ହୋଇଥାନ୍ତା ବୋଲି କହିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏହା ଇଣ୍ଡିଆ ମେଣ୍ଟର ହାର ନୁହେଁ କଂଗ୍ରେସର ହାର ବୋଲି କହିଛନ୍ତି ମମତା ।
ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଇଣ୍ଡିଆ ମେଣ୍ଟର ପ୍ରତିଷ୍ଠାତା ହୋଇଥିବାବେଳେ ସେ ମଧ୍ୟ ଏହି ବୈଠକରେ ଯୋଗ ଦେବେନି ବୋଲି କହିଛନ୍ତି । ସେହିପରି ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବ ମଧ୍ୟ ନିର୍ବାଚନ ଫଳାଫଳକୁ ନେଇ କଂଗ୍ରେସକୁ ଟାର୍ଗେଟ କରିଛନ୍ତି । ଏବେ ପରିଣାମ ଆସିଯାଇଥିବାବେଳେ ଅହଂକାର ମଧ୍ୟ ଶେଷ ହୋଇଗଲା । ଆସନ୍ତା ଦିନରେ ପୁଣିଥରେ ନୂଆ ସମାଧାନର ବାଟ ବାହାରିବ ବୋଲି କହିଛନ୍ତି ଅଖିଳେଶ। ହିନ୍ଦି ଭାଷାଭାଷୀ ରାଜ୍ୟରେ କଂଗ୍ରେସର ଜବରଦସ୍ତ ପରାଜୟ ପରେ ଇଣ୍ଡିଆ ମେଣ୍ଟରେ ଏହି ମତାନ୍ତର ଦେଖାଦେଇଛି ।
୫ ରାଜ୍ୟର ନିର୍ବାଚନ ଫଳାଫଳ ପରେ ବରିଷ୍ଠ ବିଜେପି ନେତାଙ୍କ ବୟାନକୁ ନେଇ ଅକଳରେ ରାଜ୍ୟ ବିଜେପି
ଭୁବନେଶ୍ବର: ବିଜେପିର ବରିଷ୍ଠ ନେତା ଖାରାବେଳ ସ୍ବାଇଁଙ୍କ ବିସ୍ପୋରକ ବୟାନ। ୨୪ ନିର୍ବାଚନ ଜିତିବା ନେଇ ଛାତିରେ ହାତ ରଖି କହିପାରିବେନି ରାଜ୍ୟ ବିଜେପିର କୌଣସି ବରିଷ୍ଠ ନେତା। କାରଣ ବିଧାନସଭା ନିର୍ବାଚନ ପାଇଁ ବିଜେପି ପାଖେ ନେତୃତ୍ବ ନାହିଁ । ଆଉ ସେଥିପାଇଁ ଓଡ଼ିଶାରେ ବିଜେପି ଜିତିବ ବୋଲି ଖୋଦ୍ କେନ୍ଦ୍ର ବିଜେପି ବିଶ୍ବାସ କରିପାରୁନି। ଖାଲି ସେତିକି ନୁହେଁ ନିଜ ଦଳର ମନ୍ତ୍ରୀ, ସାଂସଦ ଓ ନେତାଙ୍କୁ ନେଇ ମନଇଚ୍ଛା ଟିପ୍ପଣୀ ଦେବାକୁ ବି ପଛାଇ ନାହାନ୍ତି। ଏତିକିରେ ନରମିନି ବିଜେପିର ବରିଷ୍ଠ ନେତା ଖାରାବେଳ ସ୍ବାଇଁଙ୍କ ତୁଣ୍ଡ। ୨୦୨୪ ସାଧାରଣ ନିର୍ବାଚନରେ କନ୍ଧମାଳ ନୁହେଁ, ବରଂ ବାଲେଶ୍ବରରୁ ନିର୍ବାଚନ ଲଢିବାକୁ ଚାହୁଁଛନ୍ତି। ଏକଥା ସେ କେନ୍ଦ୍ରୀୟ ଓ ରାଜ୍ୟ ନେତୃତ୍ବକୁ ଜଣାଇଛନ୍ତି। ଆଉ ବିଜେପି ଟିକେଟରୁ ବାଲେଶ୍ବର ସାଂସଦ ଭାବେ ଲଢିବା ପାଇଁ ଜିଦ୍ କରିଛନ୍ତି ।
ଉତ୍କଳ ଭାରତ ଦଳ ଗଢି ଫେଲ୍ ମାରିବା ପରେ ବିଜେପିରେ ସାମିଲ ହୋଇଥିଲେ ଐର ଖାରାବେଳ ସ୍ବାଇଁ। ଅନେକ ସମୟରେ ତାଙ୍କ ବୟାନ ରାଜ୍ୟ ବିଜେପିକୁ ଅକଳରେ ପକାଇଛି। ଆଉ ସେଥିପାଇଁ ରାଜ୍ୟ ବିଜେପିରେ ସେ ଏବେ ଆଲୋଡ଼ା ନେତା। ଏପରି ସ୍ଥିତିରେ ଦଳୀୟ ଶୃଙ୍ଖଳାକୁ ଭୁଲି ଖାରାବେଳଙ୍କ ରାଜନୈତିକ ବୟାନବାଜି ଓ ଭବିଷ୍ୟତ ଗଣନାକୁ ନେଇ ପ୍ରଶ୍ନ ଉଠାଇଛନ୍ତି ଅନ୍ୟଦଳର ନେତା ଓ ରାଜନୈତିକ ସମୀକ୍ଷକ।
ଖାରବେଳ ସ୍ବାଇଁଙ୍କ ରାଜନୈତିକ ବୟାନ ରାଜ୍ୟ ବିଜେପିର ପାଣିପାଗକୁ ବିଗାଡିଛି। ୫ରାଜ୍ୟର ଫଳ ଆସିବା ପରେ ପଦ୍ମଦଳ ନେତା ଓ ଓଡ଼ିଶା ରାଜନୀତିକୁ ନେଇ ଖାରବେଳଙ୍କ ଭବିଷ୍ୟବାଣୀ ରାଜ୍ୟ ବିଜେପିକୁ ଅଡୁଆରେ ପକାଇଛି ।
ମୁଖ୍ୟମନ୍ତ୍ରୀ ମକା ମିଶନର ସମୀକ୍ଷା କଲେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ
ଭୁବନେଶ୍ବର: ମୁଖ୍ୟମନ୍ତ୍ରୀ ମକା ମିଶନର କାର୍ଯ୍ୟକାରିତା ସଂପର୍କରେ ସମୀକ୍ଷା କରିଛନ୍ତି ଫାଇଭ-ଟି ତଥା ନବୀନ ଓଡ଼ିଶାର ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ନବରଙ୍ଗପୁର, କୋରାପୁଟ, ଗଜପତି ଓ ନୂଆପଡା ଜିଲ୍ଲାରେ ମକା ମିଶନ କାର୍ଯ୍ୟକାରୀ କରାଯାଉଛି । ମିଶନ ଶକ୍ତି ମାଆମାନେ ଏଥିରେ ଅଂଶଗ୍ରହଣ କରୁଛନ୍ତି। ମୁଖ୍ୟମନ୍ତ୍ରୀ ମକା ମିଶନ କାର୍ଯ୍ୟକ୍ରମ ପାଇଁ ଆରମ୍ଭ ହୋଇଥିବା କ୍ଷେତ୍ର ପ୍ରଦର୍ଶନରେ ଉତ୍ସାହଜନକ ଅଛି ।
ଫସଲ ଉତ୍ପାଦନରେ ଶତକଡା ୫୧ ପ୍ରତିଶତ ବୃଦ୍ଧି ଘଟିଛି ।ନଭେମ୍ବର ଶେଷ ସୁଦ୍ଧା ୪୪ ହଜାର ୭୩୦ କୁଇଣ୍ଟାଲ ମକା ଏଫ.ପି.ଓ ଦ୍ବାରା ସଂଗ୍ରହ କରାଯାଇଛି । ମକା ଚାଷୀ ଯେପରି ଉଚିତ୍ ମୂଲ୍ୟ ପାଇପାରିବେ ସେଥିପାଇଁ ଚଳିତ ବର୍ଷ ଶେଷ ସୁଦ୍ଧା ୧୫ଟି ଏଫ.ପି.ଓ ଗଠନ କରାଯିବାକୁ ଥିବାବେଳେ ୧୩ଟି ଗଠନ ହୋଇସାରିଛି । କେବଳ ମହିଳାମାନଙ୍କୁ ନେଇ ୪ଟି ଏଫ.ପି.ଓ ଗଠନ କରାଯାଇଛି ।
ମିଶନର ପ୍ରଥମ ବର୍ଷରେ ୨୦ ହଜାର ମେଟ୍ରିକ ଟନ୍ ମକା ସଂଗ୍ରହ ଓ ମାର୍କେଟିଂ ଲକ୍ଷ୍ୟ ରଖାଯାଇଛି । ଚାଷୀଙ୍କୁ ଅଧିକ ମୂଲ୍ୟ ଦେବାକୁ ଅଧିକରୁ ଅଧିକ ଘରୋଇ ବ୍ୟବସାୟୀଙ୍କୁ ଏଥିରେ ସଂପୃକ୍ତ କରିବା ଏବଂ ଏଫ.ପି.ଓ ର ଦକ୍ଷତା ବୃଦ୍ଧି ପାଇଁ ମଧ୍ୟ ପଦକ୍ଷେପ ନିଆଯିବ । ଓରମାସ୍ ମଧ୍ୟ ମକାର ପ୍ରାଥମିକ ପ୍ରକ୍ରିୟାକରଣ ଓ ମାର୍କେଟିଂରେ ସହଯୋଗ କରିବ । ଅନ୍ୟପଟେ ଜନଅଭିଯୋଗ ଶୁଣାଣି ଭିତ୍ତିରେ ପାନ ଚାଷୀ, କିଆଫୁଲ ଚାଷୀ ଓ ଲେମନଗ୍ରାସ ଚାଷୀମାନଙ୍କର ବିଭିନ୍ନ ସମସ୍ୟାର ସମାଧାନ ପାଇଁ ଗ୍ରହଣ କରାଯାଇଥିବା କାର୍ଯ୍ୟକ୍ରମର ଅଗ୍ରଗତି ସଂପର୍କରେ କାର୍ତ୍ତିକ ପାଣ୍ଡିଆନ ସମୀକ୍ଷା କରିଛନ୍ତି ।
ଏହି ଚାଷୀଙ୍କ କଲ୍ୟାଣ ପାଇଁ ବିଭିନ୍ନ କାର୍ଯ୍ୟକ୍ରମ ଘୋଷଣା କରିଛନ୍ତି ରାଜ୍ୟ ସରକାର । ପାନ ଚାଷୀଙ୍କ ପାଇଁ ବିନା ସୁଧରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଯୋଗାଣ ସହ ଆପିକଲ୍ ଜରିଆରେ କିଆଫୁଲ ପ୍ରୋସେସିଂ ୟୁନିଟ୍ କରିବା ପାଇଁ ମଧ୍ୟ ଘୋଷଣା କରାଯାଇଥିଲା । କୋରାପୁଟରେ ଲେମନ୍ ଗ୍ରାସ୍ ଚାଷର ବିଶେଷ ଆଦର ରହିଥିବାରୁ ସେଠାରେ ଏହାକୁ ଅଧିକ ବ୍ୟାପକ କରିବା ପାଇଁ ହର୍ଟିକଲଚର ମିଶନ ପ୍ଲସ ଅଧିନରେ ୮୪ ହଜାର ଟଙ୍କା ଏବଂ NHMରେ ୧୬ ହଜାର ଟଙ୍କା ଏହିପରି ୧ ଲକ୍ଷ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ଯୋଗାଇଦେବା ପାଇଁ ନିଷ୍ପତି ହୋଇଥିଲା। ବୈଠକରେ ମୁଖ୍ୟମନ୍ତ୍ରୀ ଘୋଷଣା କରିଥିବା ସହାୟତାକୁ ଆସନ୍ତା ୨୬ ଜାନୁୟାରୀ ପୂର୍ବରୁ ଆରମ୍ଭ କରିବା ପାଇଁ ନିଷ୍ପତି ହୋଇଥିଲା ।
ଆଗକୁ ୨୦୨୪ ସାଧାରଣ ନିର୍ବାଚନ, ଭୋଟର ତାଲିକାରେ ୩ ଲକ୍ଷରୁ ଊର୍ଦ୍ଧ୍ବ ମହିଳା ଭୋଟର
ଭୁବନେଶ୍ବର: ଭୋଟର ତାଲିକାରେ ଯୋଡି ହୋଇଛନ୍ତି ଅଧିକ ସଂଖ୍ୟାରେ ମହିଳା । ୨୦୨୪ ସାଧାରଣ ନିର୍ବାଚନକୁ ଆଖିରେ ରଖି ଭାରତ ନିର୍ବାଚନ କମିଶନଙ୍କ ନିର୍ଦ୍ଦେଶରେ ଗତ ଅକ୍ଟୋବର ମାସରୁ ସ୍ବତନ୍ତ୍ର ଭୋଟର ତାଲିକା ସଂଶୋଧନ କାମ ଚାଲିଛି । ଗତ ଅକ୍ଟୋବର ୨୭ ତାରିଖରୁ ଚଳିତମାସ ୩ ତାରିଖ ଭିତରେ ଭୋଟର ତାଲିକାରେ ଯୋଡିହୋଇଛନ୍ତି ୬ ଲକ୍ଷ ୩୦ ହଜାର ୨୧୬ ନୂଆ ଭୋଟର । ସେମାନଙ୍କ ଭିତରୁ ୩ ଲକ୍ଷ ୫୫ ହଜାର ୬୬ ଜଣ ମହିଳା ଭୋଟର ରହିଛନ୍ତି ।
ସେହିପରି ଏକାଧିକ ସ୍ଥାନରେ ନାମ ଥିବା ଓ ମୃତ୍ୟୁଯୋଗୁ ତାଲିକାରୁ ବାଦ ପଡ଼ିଲେଣି ୨ ଲକ୍ଷ ୪୬ ହଜାର ୨୫୯ ଜଣ । ନିର୍ବାଚନ କମିଶନଙ୍କ ରିପୋର୍ଟ ଅନୁଯାୟୀ ୧ ଲକ୍ଷ ୫୭ ହଜାର ୩୬ ଜଣ ଭୋଟରଙ୍କ ମୃତ୍ୟୁ ହୋଇଥିବାବେଳେ ୭୫ ହଜାର ୧୯୧ ଜଣ ସ୍ଥାୟୀ ଭାବେ ଅନ୍ୟତ୍ର ସ୍ଥାନାନ୍ତର ହୋଇଛନ୍ତି ।
୧୪ ହଜାର ୩୨ ଜଣ ଭୋଟରଙ୍କ ଏକାଧିକ ସ୍ଥାନରେ ନାମ ଥିବାରୁ ସେମାନଙ୍କ ନାମକୁ ଗୋଟିଏ ନିର୍ବାଚନମଣ୍ଡଳୀରେ ପଞ୍ଜୀକୃତ କରାଯାଇଛି । ଏପରିକି ଗୋଟିଏ ଜିଲ୍ଲାରୁ ଆଉ ଗୋଟିଏ କାର୍ଯ୍ୟକ୍ଷେତ୍ର ନେଇ ଭୋଟର ସ୍ଥାନାନ୍ତର ହେଲେ ନୂଆ ସ୍ଥାନରେ ଭୋଟର ତାଲିକାରେ ନାମ ପଞ୍ଜୀକରଣ କରିପାରିବେ । ଏପରିକି ଭଡ଼ା ଘରେ ରହୁଥିଲେ ବି ଭଡ଼ାଘରର ଚୁକ୍ତିନାମା କିମ୍ବା ବିଦ୍ୟୁତ ବିଲ୍ ପ୍ରମାଣ ପତ୍ର ଦେଇ ଭୋଟର ରହୁଥିବା ସ୍ଥାନର ଭୋଟର ହୋଇପାରିବେ ।
ବିଳମ୍ବିତ ରାତି ପର୍ଯ୍ୟନ୍ତ ଅନିଦ୍ରା ହେଲେ ବଢେ ମେଦବହୁଳ, ମଧୁମେହ ଆଶଙ୍କା
ନନ୍ଦିଘୋଷ ବ୍ୟୁରୋ: ବିଳମ୍ବିତ ରାତି ପର୍ଯ୍ୟନ୍ତ ଅନିଦ୍ରା ରହିବା ଲୋକଙ୍କ ଆଧୁନିକ ଜୀବନଶୈଳୀର ଏକ ଅଂଶ । ଅଧିକାଂଶ ଲୋକ ବିଳମ୍ବିତ ରାତି ପର୍ଯ୍ୟନ୍ତ ଜାଗ୍ରତ ରୁହନ୍ତି । କାମ ହେଉ, ପାର୍ଟି ହେଉ କିମ୍ବା ଫୋନ୍ ବ୍ୟବହାର ଏହି କାରଣରୁ ସ୍ୱାସ୍ଥ୍ୟ ସମସ୍ୟା ଦେଖାଦିଏ । ଯଦି ଆପଣ ମଧ୍ୟ ପ୍ରତିଦିନ ବିଳମ୍ବିତ ରାତିରେ ଜାଗ୍ରତ ରୁହନ୍ତି, ତେବେ ଏହି ଅଭ୍ୟାସ ଶୀଘ୍ର ଉନ୍ନତ ହେବା ଉଚିତ୍ । ବିଳମ୍ବିତ ରାତିରେ ରହିବା କେବଳ ଆପଣଙ୍କ ମାନସିକ ଉପରେ ଖରାପ ପ୍ରଭାବ ପକାଇବ ନାହିଁ ବରଂ ଆପଣଙ୍କ ଶାରୀରିକ ସ୍ୱାସ୍ଥ୍ୟ ଉପରେ ମଧ୍ୟ ଖରାପ ପ୍ରଭାବ ପକାଇଥାଏ । ଯଦି ଦୀର୍ଘ ସମୟ ଧରି ଶୋଇବା ରୁଟିନ୍ ବିଚଳିତ ରହେ, ତେବେ ଏହା ଗୁରୁତର ରୋଗର କାରଣ ହୋଇପାରେ ।
ସଫଦରଗଞ୍ଜ ହସ୍ପିଟାଲର ଡାକ୍ତର ଦୀପକ ସୁମନ କହିଛନ୍ତି ଯେ ରାତି 11 ଟା ପର୍ଯ୍ୟନ୍ତ ଶୋଇବା ଭଲ। ଏହାଠାରୁ ଅଧିକ ସମୟ ଜାଗ୍ରତ ରହିବା ସ୍ୱାସ୍ଥ୍ୟ ପାଇଁ ଅନେକ କ୍ଷତି କରିପାରେ । ଯେଉଁ ଲୋକମାନେ ବିଳମ୍ବିତ ରାତି ପର୍ଯ୍ୟନ୍ତ ଜାଗ୍ରତ ରୁହନ୍ତି, ସେମାନଙ୍କର ଶୋଇବା ଅବସ୍ଥା ବ୍ୟାକୁଳିତ ହୁଏ ଏବଂ ଏହି କାରଣରୁ ଅନିଦ୍ରା ସମସ୍ୟା ଦେଖାଦେଇଥାଏ । ଅନିଦ୍ରା ଚାପ ସ୍ତରକୁ ବି କମ କରେ ଯେଉଁ କାରଣରୁ ଚିନ୍ତା ସମସ୍ୟା ଇତ୍ୟାଦି ମୁଡ୍ ସୁଇଙ୍ଗ୍ ହେବାର ସମ୍ଭାବନା ଥାଏ । ଏଥି ସହିତ, ରାତିରେ ଉଠିବା ମଧ୍ୟ ସକାଳର ନିତ୍ୟକର୍ମକୁ ନଷ୍ଟ କରିଥାଏ, ଯାହା ମୋଟାପଣର ସମସ୍ୟା ସୃଷ୍ଟି କରିପାରେ ଏବଂ ମଧୁମେହ ହେବାର ଆଶଙ୍କା ବି ବଢାଇଥାଏ ।
ରାତି ୮ଟା ସୁଦ୍ଧା ଖାଦ୍ୟ ଖାଇବା ଉଚିତ୍। ଆପଣ ଶୋଇବା ଏବଂ ଖାଇବା ସମୟ ମଧ୍ୟରେ ୩ ଘଣ୍ଟାର ବ୍ୟବଧାନ ରହିବା ଉଚିତ । ଯଦି ଆପଣ ରାତିରେ ଅଧିକ ଖାଆନ୍ତି ଏବଂ ତୁରନ୍ତ ଶୋଇବାକୁ ଯାଆନ୍ତି, ତେବେ ହଜମ ପ୍ରକ୍ରିୟା ମଧ୍ୟ ଆରମ୍ଭ ହେବାକୁ ଲାଗେ । ଯଦିଓ ଆପଣ ରାତିରେ ଖାଦ୍ୟ ଖାଉଛନ୍ତି, ସୁସ୍ଥ ଏବଂ ହାଲୁକା ଖାଇବାକୁ ଚେଷ୍ଟା କରନ୍ତୁ । ଆପଣଙ୍କ ଖାଦ୍ୟରେ ଏପରି ଖାଦ୍ୟ ଅନ୍ତର୍ଭୂକ୍ତ କରନ୍ତୁ ଯାହା ଫାଇବରରେ ଭରପୂର ଅଟେ ।
60 ହଜାର ନର୍ସଙ୍କ ଉପରେ ଅଧ୍ୟୟନ
ହାର୍ଭାର୍ଡ ମେଡିସିନ୍ ସ୍କୁଲର ଅନୁସନ୍ଧାନକାରୀମାନେ 60 ହଜାର ମହିଳା ନର୍ସଙ୍କ ଉପରେ ଏକ ଅନୁସନ୍ଧାନ କରିଛନ୍ତି, ଯାହା ଅନୁଯାୟୀ ରାତିରେ ଜାଗ୍ରତ ଥିବା ଲୋକଙ୍କ ମଧ୍ୟରେ ଟାଇପ୍-୨ ମଧୁମେହ ହେବାର ଆଶଙ୍କା ଦିନରେ କାମ କରୁଥିବା ଲୋକଙ୍କ ତୁଳନାରେ 19 ପ୍ରତିଶତ ଅଧିକ।
ବିଳମ୍ବିତ ରାତି ଅନିଦ୍ରା ଟାଇପ୍-୨ ମଧୁମେହ ହେବା ଆଶଙ୍କା
ଅଧ୍ୟୟନରେ ଏହା ଦେଖାଯାଇଥିଲା ଯେ ରାତି ଉଜାଗର ଏବଂ କାର୍ଯ୍ୟ କରୁଥିବା ନର୍ସମାନଙ୍କ ଜୀବନଶୈଳୀ ଗଭୀର ଭାବରେ ପ୍ରଭାବିତ ହୋଇଥିଲା। କାରଣ ସେ କମ୍ ବ୍ୟାୟାମ କରୁଥିଲେ ଏବଂ ଅସ୍ୱାସ୍ଥ୍ୟକର ଖାଦ୍ୟ ଖାଉଥିଲେ । ଅନୁସନ୍ଧାନରୁ ଜଣାପଡିଛି ଯେ ବିଳମ୍ବିତ ରାତିରେ ଶୋଇଥିବା ଲୋକଙ୍କ ଶୋଇବା ଚକ୍ର ବ୍ୟାକୁଳ ହୁଏ । ଏହି କାରଣରୁ, ମେଟାବୋଲିକ୍ ସିଷ୍ଟମ୍ ମଧ୍ୟ ପ୍ରଭାବିତ ହୁଏ ଏବଂ ମେଦବହୁଳତା ବୃଦ୍ଧି ପାଇବାରେ ଲାଗେ, ଯାହା ଟାଇପ୍-୨ ମଧୁମେହର କାରଣ ହୋଇଯାଏ ।
ବଡ଼ଧରଣର ଭୂକମ୍ପ ଝଟକା: ଆସିପାରେ ସୁନାମି, ଆଜି ରାତି ବେଶ ଗୁରୁତ୍ୱପୂର୍ଣ୍ଣ
ଟୋକିଓ: ଜାପାନ ପାଇଁ ବଡ ବିପଦ । ଆସିପାରେ ସୁନାମି । ଏଚଏଚକେ କହିଛି ସୁନାମି ଢେଉ ୩ ଫୁଟ ଉଚ୍ଚକୁ ଉଠି ସ୍ଥଳ ଭାଗକୁ ଆସିବ। ସ୍ଥାନୀୟ ସମୟ ରାତି ୧.୩୦ ବେଳକୁ ସୁନାମି ଜାପାନର ୱେଷ୍ଟର୍ଣ୍ଣ ଉପକୂଳରେ ପହଞ୍ଚିପାରେ। ତେଣୁ ସମସ୍ତଙ୍କୁ ସତର୍କ ରହିବାକୁ କୁହାଯାଇଛି
।
ବଡ଼ଧରରଣ ଭୂକମ୍ପରେ ଦୋହଲିଛି ଫିଲିପାଇନ୍ସର ମିନଡାନାଓ। ରିକ୍ଟର ସ୍କେଲରେ ଏହାର ତୀବ୍ରତା ୭.୫ ରହିଥିବାରୁ ବ୍ୟାପକ କ୍ଷୟକ୍ଷତିର ଆଶଙ୍କା ପ୍ରକାଶ ପାଇଛି। ବିଭନ୍ନ ସ୍ଥାନରେ ବଡ଼ବଡ଼ ଘର ଭୁଶୁଡ଼ି ପଡ଼ିଥିବା ବେଳେ ଲୋକମାନେ ଜୀବନ ବଞ୍ଚାଇବା ପାଇଁ ଦୌଡ଼ୁଥିବାରୁ ଭିଡିଓ ସାମ୍ନାକୁ ଆସିଛି। ସେହିପରି ଭୂକମ୍ପ ଝଟକା ପରେ ଫିଲିପାଇନ୍ସ ଓ ଜାପାନରେ ସୁନାମି ଆସିବାର ଆଶଙ୍କା ପ୍ରକାଶ ପାଇଛି। ଏଥିପାଇଁ ୟୁରୋପ-ମେଡିଟେରିଆନ ସେଇସମୋଲୋଜିକାଲ ସେଣ୍ଟର(ଇଏମଏସସି) ଲୋକଙ୍କୁ ସତର୍କ ରହିବାକୁ କହିଛି।
ଇଏମଏସସି କହିଛି ଯେ ଭୂକମ୍ପ ଟି ଭୂପୃଷ୍ଠରୁ ୬୩ କିମି ଗଭୀରରେ ସୃଷ୍ଟି ହୋଇଛି। ତୀବ୍ରତା ୭.୫ ଥିବାରୁ ଫିଲିପାଇନ୍ସ ଓ ଜାପାନର କିଛି ସ୍ଥାନରେ ଖୁବଶୀଘ୍ର ସୁନାମି ଆସିପାରେ। ଆଜି ରାତି ବେଶ ଗୁରୁତ୍ୱପୂର୍ଣ୍ଣ ବୋଲି ଇଏମଏସସି କହିଛି। ଫିଲିପାଇନ୍ସର ସେଇସମୋଲୋଜି ଏଜେନ୍ସି ଆଶଙ୍କା କରିଛି ଯେ ସୁନାମି ମଧ୍ୟରାତ୍ର ସୁଦ୍ଧା ଦେଶକୁ ପ୍ରଭାବିତ କରିପାରେ। କାରଣ ସ୍ଥାନୀୟ ସମୟ ରାତି ୧୦.୩୭ରେ ଭୂକମ୍ପ ଝଟକା ଅନୁଭୂତ ହୋଇଛି। ଏହାର ଦେଢ଼ ଘଣ୍ଟା ମଧ୍ୟରେ ବଡ଼ବଡ଼ ଢେଉ ସ୍ଥଳ ଭାଗକୁ ମାଡ଼ି ଆସିପାରେ। ବ୍ୟାପକ କ୍ଷୟକ୍ଷତିର ଆଶଙ୍କା ମଧ୍ୟ ସଂସ୍ଥା କରିଛି।