ଭୁବନେଶ୍ବର: ଚାଲିଛି ଭସାଣ ଉତ୍ସବ । ରାଜଧାନୀରେ ଲାଗିଛି ଲୋକଙ୍କ ଭିଡ଼ । ପାରମ୍ପରିକ ବାଦ୍ୟଯନ୍ତ୍ର ସାଙ୍ଗକୁ ସାଉଣ୍ଡରେ ଫାଟି ପଡ଼ୁଛି ପୁରା ପରିବେଶ । ମା’ଙ୍କ ପୂଜାରେ ନିୟୋଜିତ ପୂଜକ ଓ ଶ୍ରଦ୍ଧାଳୁମାନେ ଭାବବିହ୍ବଳ ହୋଇପଡୁଛନ୍ତି। ଆଖିର ଲୁହକୁ ରୋକିପାରୁ ନାହାନ୍ତି। ଭକ୍ତମାନେ ଶୋଭାଯାତ୍ରାରେ ସାମିଲ ହୋଇଛନ୍ତି। ଯେଉଁ ରାସ୍ତାରେ ମା’ଙ୍କ ଶୋଭାଯାତ୍ରାର ଆୟୋଜନ ହୋଇଛି, ସେହି ରାସ୍ତାଗୁଡ଼ିକରେ ଲୋକଙ୍କର ପ୍ରବଳ ଭିଡ଼ ଦେଖିବାକୁ ମିଳୁଛି। ମା’ଙ୍କ ଆଗରେ ପାରଂପରିକ ଓ ନୃତ୍ୟ ଓ ବାଦ୍ୟ ଚାଲିଛି। ପାରମ୍ପରିକ ବାଦ୍ୟର ଧ୍ବନିରେ ଭୁବନେଶ୍ବର କମ୍ପୁଛି। ମା’ଙ୍କ ଭସାଣ ଯାତ୍ରା ଅପରାହ୍ଣ ୩ଟାରୁ ଆରମ୍ଭ ହୋଇଥିବା ବେଳେ ଏହା ରାତିଯାଏଁ ଚାଲିବ।
ନାଟକର ଅପୂର୍ବ ସଫଳତା ପରେ ବଡ଼ ପରଦାରେ ଆସିବ ସିନେମା ’ନବକଳେବର’
ଭୁବନେଶ୍ବର: ନବକଳେବରକୁ ଚଳଚ୍ଚିତ୍ର ଭାବରେ ଦେଖିବାକୁ ପାଇବେ ଦର୍ଶକ । ନବକଳେବର ନାଟକର ଅପୂର୍ବ ସଫଳତା ପରେ ଏହାକୁ ସିନେମା ଭାବରେ ପ୍ରସ୍ତୁତି କରାଯିବ । ସାଇ ଶ୍ରଦ୍ଧା ପ୍ରଡକ୍ସନ ବ୍ୟାନରରେ ଶ୍ରୀଜଗନ୍ନାଥ ନବକଳେବର ଚଳଚ୍ଚିତ୍ର ପ୍ରସ୍ତୁତ କରାଯିବ । ନାଟକରୁ ଚଳଚିତ୍ରକୁ ରୂପାନ୍ତରିତ କରି ଆଉଥରେ ଜଗନ୍ନାଥଙ୍କ ମହିମା ଓ ଲୀଳା ପ୍ରଚାର ପ୍ରସାର କରିବାକୁ ପ୍ରୟାସ ଆରମ୍ଭ ହୋଇଛି । ରାଜ୍ୟ ତଥା ରାଜ୍ୟ ବାହାରେ ଏହି ଫିଲ୍ମ ନିର୍ମାଣ କାର୍ଯ୍ୟ ପାଇଁ ପ୍ରସ୍ତୁତି ଚୂଡାନ୍ତ ହୋଇଛି । ଚଳଚ୍ଚିତ୍ର ନିର୍ମାଣ କାମ ନଭେମ୍ବର ଏକରୁ ଗୁଜୁରାଟରୁ ଶୁଭାରମ୍ଭ ହେବ ବୋଲି ପ୍ରଯୋଜନା ସଂସ୍ଥା କହିଛି ।
ଚଳଚ୍ଚିତ୍ରର ପ୍ରଯୋଜନା ଭାର ସମ୍ଭାଳିବେ ବିନି ସାମଲ ଓ ଦିଲ୍ଲୀପ ଜେନା । ସେହିପରି ବିନି ସାମଲ ଏହାର ନିର୍ଦ୍ଦେଶନା ଦାୟିତ୍ବରେ ଥିବାବେଳେ ଚିତ୍ରନାଟ୍ୟ, ସଂଳାପରେ ରହିଛନ୍ତି ଶଙ୍କର ତ୍ରିପାଠୀ ଓ ସଂଗୀତରେ ମଳୟ ମିଶ୍ର ରହିଛନ୍ତି । ଚଳଚ୍ଚିତ୍ରରେ ବରିଷ୍ଠ ଅଭିନେତା କୁନା ତ୍ରିପାଠୀ, ସିଦ୍ଧାନ୍ତ ମହାପାତ୍ର, ଶ୍ରୀତମ ଦାସ, ଅଶ୍ରୁମୋଚନ ମହାନ୍ତି, ଜ୍ୟୋତି, ଶିବାନୀ, ସୂର୍ଯ୍ୟମୟୀ, ରୁଷି ପଟ୍ଟନାୟକ, କେଦାର ମିଶ୍ର, ଦେବୁ ପଟ୍ଟନାୟକ, ବିନି ସାମଲ ରହିଛନ୍ତି । ପୂର୍ବରୁ 2022 ମସିହାରେ ନଭେମ୍ବର 4ରୁ 9ତାରିଖ ମଧ୍ୟରେ ଭୁବନେଶ୍ବର ରବୀନ୍ଦ୍ର ମଣ୍ଡପ ଓ ରାଉରକେଲାରେ ଫେବ୍ରୁଆରୀ 1 ଓ 2 ତାରିଖରେ ନବକଳେବର ନାଟକକୁ ଅପୂର୍ବ ସଫଳତା ମିଳିଥିଲା ବୋଲି ପ୍ରଯୋଜକ କହିଛନ୍ତି ।
ପର୍ଯ୍ୟଟକଙ୍କୁ ଡଲଫିନ୍ ଦେଖାଇବାକୁ ଯାଇ ଡଙ୍ଗାରୁ ଖସିପଡ଼ିଲେ ଚାଳକ
ଖୋର୍ଦ୍ଧା: ଚିଲିକାରେ ଅଘଟଣ । ପର୍ଯ୍ୟଟକଙ୍କୁ ଡଲଫିନ୍ ଦେଖାଇବାକୁ ଯାଇ ଡଙ୍ଗାରୁ ଖସିପଡ଼ିଲେ ଚାଳକ । ନିଖୋଜ ଡଙ୍ଗା ଚାଳକ ହେଲେ ବିକ୍ରମ ଜାଲି । ୫ ଜଣ ପର୍ଯ୍ୟଟକଙ୍କୁ ନେଇ ଚିଲିକାରେ ଡଲଫିନ ଦେଖାଇବାକୁ ନେଇଥିଲେ ବିକ୍ରମ । ଡଲଫିନ ଦେଖାଇ ଫେରୁଥିବା ବେଳେ ହଠାତ୍ ଡଙ୍ଗାଟିର ମୋଟର ବନ୍ଦ ହୋଇଯିବାରୁ ଚାଳକ ମୋଟରକୁ ଚାଲୁ କରିବାବେଳେ ପାଣିରେ ଖସିପଡ଼ିଥିଲେ । ନିକଟରେ ଥିବା ଅନ୍ୟଏକ ଡଙ୍ଗା ପର୍ଯ୍ୟଟକଙ୍କ ସହିତ ଡଙ୍ଗାଟିକୁ ଉଦ୍ଧାର କରିଛି । ତେବେ ଚାଳକଙ୍କର ଏଯାଏ ପତ୍ତା ମିଳିନି । ସମସ୍ତ ପର୍ଯ୍ୟଟକ ସୁରକ୍ଷିତ ଥିବା ବେଳେ ଡଙ୍ଗା ଚାଳକ ବିକ୍ରମ ଜାଲିଙ୍କୁ ସ୍ଥାନୀୟ ମତ୍ସ୍ୟଜୀବୀ ଓ ବ୍ରହ୍ମଗିରି ଅଗ୍ନିଶମ ବାହିନୀ ଖୋଜାଖୋଜି କରୁଛନ୍ତି ।
ହମାସ କବଳରେ ଥିବା ପଣବନ୍ଦୀଙ୍କ ସମ୍ପର୍କରେ ସମସ୍ତ ତଥ୍ୟ ଦେବାକୁ ଗାଜାବାସୀଙ୍କୁ ଇସ୍ରାଏଲର ନିର୍ଦ୍ଦେଶ
ବ୍ୟୁରୋ ରିପୋର୍ଟ: ଖୁବ୍ ଶୀଘ୍ର ଗାଜା ଉପରେ ବଡ଼ଧରଣର ଆକ୍ରମଣ । ହମାସ କବଳରେ ଥିବା ପଣବନ୍ଦୀଙ୍କ ସମ୍ପର୍କରେ ସମସ୍ତ ତଥ୍ୟ ଦେବାକୁ ଗାଜାବାସୀଙ୍କୁ ଇସ୍ରାଏଲର ନିର୍ଦ୍ଦେଶ । ଏପରିକି ଯେଉଁମାନେ ଅର୍ଥ ପ୍ରଦାନ କରିବେ ସେମାନଙ୍କୁ ପୁରସ୍କାର ରାଶି ମିଳିବା ସହ ସେମାନଙ୍କୁ ସୁରକ୍ଷା ଦିଆଯିବ ବୋଲି କହିଛି ଇସ୍ରାଏଲ ସେନା । ହମାସର କବଳରେ ୨୨୦ ପଣବନ୍ଦୀ ଥିବାବେଶେ ସେମାନଙ୍କ ସମ୍ପର୍କରେ ଖୋଜଖବର ମିଳୁନାହିଁ ।
ଯଦି ଗାଜାରେ ଶାନ୍ତିରେ ରହିବାକୁ ଚାହାଁନ୍ତି ତେବେ ତୁରନ୍ତ ପଣବନ୍ଦୀଙ୍କ ସମ୍ପର୍କରେ ସୂଚନା ଦେବା ଲାଗି ଗାଜାବାସୀଙ୍କୁ ନିର୍ଦ୍ଦେଶ ଦେଇଛି ଇସ୍ରାଏଲ । ପ୍ରଥମେ ଆମେରିକାର ଦୁଇ ଜଣ ପଣବନ୍ଦୀଙ୍କୁ ଓ ପରେ ଦୁଇ ଜଣ ଇସ୍ରାଏଲୀ ମହିଳାଙ୍କୁ ମୁକ୍ତି କରିଛି ହମାସ । ପଣବନ୍ଦୀଙ୍କ ସମ୍ପର୍କରେ ସୂଚନା ଦେବା ଲାଗି ଆକାଶ ମାର୍ଗରୁ ପ୍ରଚାରପତ୍ର ପକାଇଛି ଇସ୍ରାଏଲ । ସେପଟେ ସିରିଆର ସାମରିକ ଭିତ୍ତିଭୂମି ଉପରେ ଆକ୍ରମଣ କରିଛି ଇସ୍ରାଏଲ ।
ତେଣେ ଗାଜା ଉପରେ ଯେକୌଣସି ସମୟରେ ଆକ୍ରମଣ କରାଯିବ ବୋଲି କହିଛନ୍ତି ଆଇଡିଏଫ ଚିଫ ଅଫ ଷ୍ଟାଫ ଲେଫଟନାଣ୍ଟ ଜେନେରାଲ ହେର୍ଜି ହାଲେଭି । ତେଣେ ଗ୍ରାଉଣ୍ଡ ଆଟାକ ସମ୍ପର୍କରେ ଇସ୍ରାଏଲ ନିଜେ ନିଷ୍ପତ୍ତି ବୋଲି କହିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ଜାତିସଂଘରେ ଭାରତର ପ୍ରତିନିଧି ଆର. ରବୀନ୍ଦ୍ର କହିଛନ୍ତି- ଇସ୍ରାଏଲ- ପାଲେଷ୍ଟାଇନ ଯୁଦ୍ଧରେ ହେଉଥିବା ଧନଜୀବନ କ୍ଷତି ନେଇ ଭାରତ ଉଦବେଗ ପ୍ରକାଶ କରୁଛି ।
ଇଣ୍ଡିଆ ବଦଳରେ ଏନସିଇଆରଟି ପାଠ୍ୟ ପୁସ୍ତକରେ ବ୍ୟବହାର ହୋଇପାରେ ଭାରତ
ନୂଆଦିଲ୍ଲୀ: ପୁଣି ଏନସିଇଆରଟି ପାଠ୍ୟ ପୁସ୍ତକରେ ଦେଖିବାକୁ ମିଳିବ ପରିବର୍ତ୍ତନ। ଇଣ୍ଡିଆ ବଦଳରେ ପାଠ୍ୟପୁସ୍ତକରେ ବ୍ୟବହାର ହୋଇପାରେ ଭାରତ । ଭାରତକୁ ଏନସିଇଆରଟି ବହିରେ ସ୍ଥାନ ଦେବା ପ୍ରସ୍ତାବକୁ ଗ୍ରହଣ କରିଛି ପ୍ୟାନେଲ । ପ୍ରସ୍ତାବକୁ ସର୍ବସମ୍ମତି କ୍ରମେ ଗ୍ରହଣ କରିଛି ଏନସିଇଆରଟି ପ୍ୟାନେଲ । ବିରୋଧ ଦଳ ମେଣ୍ଟ ଇଣ୍ଡିଆ ନାମକରଣ ପରେ ଏହାକୁ ନେଇ ସାରା ଦେଶରେ ଏବେ ବି ଚର୍ଚ୍ଚା ଲାଗି ରହିଛି ।
ତେବେ ଏନସିଇଆରଟି ପାଠ୍ୟ ପୁସ୍ତକରୁ ଇଣ୍ଡିଆ ନାମ ହଟାଇବାକୁ ନିଷ୍ପତ୍ତି ନିଆଯାଇଥିଲା । ଏ ନେଇ ଏକ ପ୍ରସ୍ତାବ ଏନସିଇଆରଟି ପ୍ୟାନେଲକୁ ପଠାଯାଇଥିଲା । ଯାହାକୁ ଗ୍ରହଣ କରିଛି ଏନସିଇଆରଟି ପ୍ୟାନେଲ । ଆଗକୁ ଆସିବାକୁ ଥିବା ସବୁ ବହିରେ ଇଣ୍ଡିଆ ନାମ ହଟାଇ ସେହି ସ୍ଥାନରେ ଭାରତ ଉଲ୍ଲେଖ କରାଯିବ ବୋଲି ଏନସିଇଆରଟି କହିଛି । ସେହିପରି ହିନ୍ଦୁଙ୍କ ବିଜୟକୁ ମଧ୍ୟ ପୁସ୍ତକରେ ହାଇଲାଇଟ କରାଯିବ ବୋଲି ସମିତି ପ୍ରସ୍ତାବ ଦେଇଛି । ସେହିପରି ଆନସିଏଣ୍ଟ ହିଷ୍ଟ୍ରି ବଦଳରେ କ୍ଲାସିକାଲ ହିଷ୍ଟ୍ରି ପଢାଯିବାକୁ ମଧ୍ୟ ସମିତି ସୁପାରିସ କରିଛି ।
ଚିନ୍ତା ବଢ଼ାଇଲା ଦିଲ୍ଲୀ ପ୍ରଦୂଷଣ
ନୂଆଦିଲ୍ଲୀ: ଚିନ୍ତା ବଢ଼ାଇଲା ଦିଲ୍ଲୀ ପ୍ରଦୂଷଣ । ବିଭିନ୍ନ ସ୍ଥାନରେ ପ୍ରଦୂଷଣ ସୀମା ସଙ୍କଟଜନକ ସ୍ଥିତି ସୃଷ୍ଟି କରିଛି । ତେବେ ଆଜି ସ୍ଥିତିରେ ସାମାନ୍ୟ ଉନ୍ନତି ଆସିଛି । ବାୟୁଗୁଣବତ୍ତା ଓ ପାଣିପାଗ ଆଗୁଆ ସୂଚନା ଓ ଗବେଷଣା ବା ସଫର ପକ୍ଷରୁ କୁହାଯାଇଥିବା ତଥ୍ୟ ଅନୁସାରେ ଆଜି ଦିଲ୍ଲୀରେ ବାୟୁ ଗୁଣବତ୍ତା ୧୯୦ରେ ପହଞ୍ଚିଛି । ଗତକାଲି ଏକ୍ୟୁଆଇ ୨୩୧ ଥିବାବେଳେ ଆଜି ଏହା ୧୯୦କୁ ଖସିଛି । ଚଳିତ ବର୍ଷ ପ୍ରଥମଥର ଲାଗି ଗତ ସୋମବାର ଦିଲ୍ଲୀର ଏକ୍ୟୁଆଇ ଅତି ସାଂଘାତିକ ହୋଇଥିଲା ।
ଦଶହରା ଲାଗି ଦିଲ୍ଲୀର କେତେକ ଅଞ୍ଚଳରେ ବାଣ ଫୁଟାଇବା କାରଣର ବିଭିନ୍ନ ସ୍ଥାନରେ ବାୟୁ ଗୁଣବତ୍ତା ଖରାପ ହୋଇଥିଲା । ଦିଲ୍ଲୀ ପରି ନୋଏଡାରେ ବି ବାୟୁ ଗୁଣବତ୍ତା ଖରାପ ରହିଛି । ନୋଏଡାରେ ଏକ୍ୟୁଆଇ ୨୧୮ ରହିଛି । ସେପଟେ ଆର୍ଥିକ ରାଜଧାନୀ ମୁମ୍ବାଇରେ ବି ଖରାପ ହେବାରେ ଲାଗିଛି ଏକ୍ୟୁଆଇ । ଆଜି ସହରରେ ଏକ୍ୟୁଆଇ ରହିଛି ୧୪୭ । ମହାନଗରୀରେ ପ୍ରାୟ ୬ ହଜାର ପ୍ରକଳ୍ପ ଚାଲିଥିବାରୁ ଏହି ସମସ୍ୟା ସୃଷ୍ଟି ହୋଇଛି । ଏକ୍ୟୁଆଇ ୦ରୁ ୫୦ ହେଲେ ତାହାକୁ ଉତ୍ତମ କୁହାଯାଏ । ୫୧ରୁ ୧୦୦ ହେଲେ ସନ୍ତୋଷଜନକ, ୧୦୧ରୁ ୨୦୦ ହେଲେ ମଧ୍ୟମ, ୨୦୧ରୁ ୩୦୦ ହେଲେ ଖରାପ, ୩୦୧ରୁ ୪୦୦ ହେଲେ ଅତି ଖରାପ ଓ ୪୦୧ରୁ ୫୦୦ ହେଲେ ଅତି ଗୁରୁତର ବୋଲି ଧରାଯାଏ ।
ସୀମା ଟପିଲେ ମଧ୍ୟପ୍ରଦେଶ ମନ୍ତ୍ରୀ ଗୋବିନ୍ଦ ସିଂ ରାଜପୁତ, ନିଜ ସପକ୍ଷରେ ସର୍ବାଧିକ ଭୋଟ ଆସିଥିବା ବୁଥ ମ୍ୟାନେଜରଙ୍କୁ ଦେବେ ୨୫ ଲକ୍ଷ ଟଙ୍କା
ମଧ୍ୟପ୍ରଦେଶ: ଯେଉଁ ବୁଥରୁ ସର୍ବାଧିକ ଭୋଟ ଆସିବ ସେହି ବୁଥର କାର୍ଯ୍ୟକର୍ତ୍ତାଙ୍କୁ ଦିଆଯିବ ୨୫ ଲକ୍ଷ ଟଙ୍କା । ଏକଥା କେଉଁ ସାଧାରଣ ନେତା କହିନାହାନ୍ତି । ଏହା କହିଛନ୍ତି ମଧ୍ୟପ୍ରଦେଶର ଜଣେ ବରିଷ୍ଠ ମନ୍ତ୍ରୀ ଗୋବିନ୍ଦ ସିଂ ରାଜପୁତ । ଏହାକୁ ନେଇ ଅଡୁଆରେ ପଡିଛନ୍ତି ମନ୍ତ୍ରୀ । ନିର୍ବାଚନ ଆଚରଣ ସଂହିତା ଉଲ୍ଲଂଘନ ଅଭିଯୋଗରେ ତାଙ୍କ ବିରୋଧରେ ମାମଲା ଦାୟର ହୋଇଛି ।
ମଧ୍ୟପ୍ରଦେଶର ସୁର୍ଖି ବିଧାନସଭା ଆସନରେ ବିଜେପିର ପ୍ରାର୍ଥୀ ହୋଇଛନ୍ତି ଗୋବିନ୍ଦ । ରିଟର୍ଣ୍ଣିଂ ଅଫିସରଙ୍କ ରିପୋର୍ଟ ଆଧାରରେ ଏହି ମାମଲା ଦାୟର ହୋଇଛି । ସଗର ଜିଲ୍ଲା ରାହତଗଡ଼ ଥାନାରେ ଗୋବିନ୍ଦଙ୍କ ବିରୋଧରେ ଆଇପିସିର ଧାରା ୧୮୮ ଓ ଜନପ୍ରତିନିଧି ଆଇନର ଧାରା ୧୨୩ ଅନୁସାରେ ମାମଲା ରୁଜୁ ହୋଇଛି । ଗୋବିନ୍ଦ ସିଂ ରାଜପୁତ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଦିଆଙ୍କ ନିକଟତର ବୋଲି ସୂଚନା ମିଳିଛି ।
ଗୋବିନ୍ଦଙ୍କ ବିରୋଧରେ ରାଜ୍ୟ କଂଗ୍ରେସ ନେତା ସନ୍ଦୀପ ସିଂ ବଘେଲ ମୁଖ୍ୟ ନିର୍ବାଚନ କମିଶନରଙ୍କ ନିକଟରେ ଅଭିଯୋଗ ଦାୟର କରିଛନ୍ତି । ପୂର୍ବରୁ ବି ବିଜେପି ନେତା କୈଳାସ ବିଜୟଭର୍ଗିୟଙ୍କ ଏକ ଅଡିଓ ବି ଭାଇରାଲ ହୋଇଥିଲା । ଯେଉଁ ବୁଥରୁ କଂଗ୍ରେସକୁ ଗୋଟିଏ ବି ଭୋଟ ଯିବ ନାହିଁ ସେହି ବୁଥର ଇନଚାର୍ଜଙ୍କୁ ୫୧ ହଜାର ଟଙ୍କା ଦିଆଯିବ ବୋଲି ସେ କହିଥିବା ଅଭିଯୋଗ ହୋଇଥିଲା ।
୧ ଲକ୍ଷ କୋଟି ଟ୍ୟାକ୍ସ ଠକିଛି ଗେମିଂ ଆପ୍, ନୋଟିସ୍ ଜାରି କଲେ ଜିଏସଟି କର୍ତ୍ତୃପକ୍ଷ
ନୂଆଦିଲ୍ଲୀ: ଦେଶରେ ବ୍ୟାପକ କର ଠକେଇ କରୁଛନ୍ତି ଗେମିଂ ଆପ୍ । ପ୍ରାୟ ୧ ଲକ୍ଷ କୋଟି ଟଙ୍କାର ଠକେଇ ଘଟଣାରେ କାରଣ ଦର୍ଶାଇ ନୋଟିସ ଜାରି କରିଛନ୍ତି ଜିଏସଟି କର୍ତ୍ତୃପକ୍ଷ । ତେବେ ଅକ୍ଟୋବର ୧ରୁ ବିଦେଶୀ ଗେମିଂ କମ୍ପାନି ଭାରତରେ ପଞ୍ଜିକରଣ କରିଥିବା ନେଇ କୌଣସି ତଥ୍ୟ ନାହିଁ ବୋଲି କୁହାଯାଇଛି ।
ଅକ୍ଟୋବର ୧ ପରେ ବିଦେଶୀ ଅନଲାଇନ ଗେମିଂ କମ୍ପାନି ଭାରତରେ ପଞ୍ଜିକରଣ କରିବା ଜରୁରୀ ବୋଲି ଜିଏସଟି ଆଇନକୁ ସଂଶୋଧନ କରାଯାଇଛି । ଅନଲାଇନ ଗେମିଂ ପ୍ଲାଟଫର୍ମ ଉପରେ ୨୮ ପ୍ରତିଶତ ଜିଏସଟି ଲାଗୁ ଲାଗି ଗତ ଅଗଷ୍ଟରେ ଜିଏସଟି ପରିଷଦ ନିଷ୍ପତ୍ତି ନେଇଥିଲା ।
୧ ଲକ୍ଷ କୋଟି ଟଙ୍କା ଠକେଇ ଘଟଣାରେ ବିଭିନ୍ନ ଅନଲାଇନ ଗେମିଂ କମ୍ପାନିଙ୍କୁ ନୋଟିସ ଜାରି କରାଯାଇଛି । ସେହି କମ୍ପାନିଙ୍କ ମଧ୍ୟରେ ରହିଛନ୍ତି ଡ୍ରିମ ୧୧ ଓ ଡେଲଟା କର୍ପ ଇତ୍ୟାଦି । ୨୧ ହଜାର କୋଟି ଟଙ୍କା ଠକେଇ ଅଭିଯୋଗରେ ଗେମସକ୍ରାଫ୍ଟ ବିରୋଧରେ ଗତ ସେପ୍ଟେମ୍ବରରେ କାରଣ ଦର୍ଶାଅ ନୋଟିସ ଜାରି ହୋଇଥିଲା ।
ତମାଖୁ ମୁକ୍ତ ଗାଁ ଅଭିଯାନରେ ଓଡ଼ିଶା ହାସଲ କଲା ଶ୍ରେଷ୍ଠ ସ୍ଥାନ
ଭୁବନେଶ୍ବର: ସାରା ଦେଶକୁ ପଛରେ ପକାଇଲା ଓଡ଼ିଶା । ତମାଖୁ ମୁକ୍ତ ଗାଁ ଅଭିଯାନରେ ସାରା ଦେଶରେ ଶ୍ରେଷ୍ଠ ସ୍ଥାନ ହାସଲ କରିଛି ଓଡ଼ିଶା । ଏହା ଟୋବାକୋ ଫ୍ରି ୟୁଥ କ୍ୟାମ୍ପେନ-୨୦୨୩ ଅଧୀନରେ ହୋଇଥିଲା । ଏହି ଅଭିଯାନ ଜୁଲାଇ ଓ ଅଗଷ୍ଟ ଦୁଇ ମାସ ଧରି ଚାଲିଥିଲା ।
ଭାରତ ସରକାରଙ୍କ ପକ୍ଷରୁ ଓଡ଼ିଶାକୁ ଏହି ପୁରସ୍କାର ଦିଆଯାଇଛି । ସାରା ଦେଶରେ ପ୍ରଥମ ରାଜ୍ୟ ଭାବେ ଓଡ଼ିଶାରେ ଟୋବାକୋ ମୁକ୍ତ ଗାଁ ଅଭିଯାନ ଆରମ୍ଭ ହୋଇଥିଲା । ଏଥିରେ ପଂଚାୟତିରାଜ ବିଭାଗକୁ ସରପଞ୍ଚଙ୍କ ଜରିଆରେ କୋଟପା ଆଇନକୁ ଗାଁରେ କାର୍ଯ୍ୟକାରୀ କରିବାକୁ ସ୍ୱାସ୍ଥ୍ୟ ବିଭାଗ ଚିଠି କରିଥିଲା ।
ଏ ଯାଏ ୫୪ ପଞ୍ଚାୟତ ଟୋବାକୋ ମୁକ୍ତ ଘୋଷଣା ହୋଇ ସାରିଛି । ଆହୁରି ୧୧୪ ପଂଚାୟତରେ ଏହି କାମ ଚାଲିଛି । ସାରା ରାଜ୍ୟରେ ସଫଳତା ସହ ଟୋବାକୋ ମୁକ୍ତ ସ୍କୁଲ ଅଭିଯାନ ଚାଲିଛି ।
ଛାତ୍ର ମାଡ଼ରେ ଅଧ୍ୟାପକ ମୃତ, ୯ ମାସ ଧରି ଚିକିତ୍ସିତ ହେଉଥିଲେ ଅଧ୍ୟାପକ
ଝାରସୁଗୁଡ଼ା: ଝାରସୁଗୁଡ଼ା କଟାପାଲି ପିକେଏସ୍ଏସ୍ ସ୍ନାତକ ମହାବିଦ୍ୟାଳୟର ଅଧ୍ୟାପକଙ୍କୁ ଛାତ୍ରଙ୍କ ମାଡ ଘଟଣା । ମାଡ଼ରେ ଅଧ୍ୟାପକ ଅମିତ ବାରିକ ଗୁରୁତର ହେବା ପରେ ୯ ମାସ ପରେ ତାଙ୍କର ମୃତ୍ୟୁ ହୋଇଯାଇଛି । ଗତକାଲି ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଯାଇଛି ।
ଅଧ୍ୟାପକ ଗୁରୁତର ହେବା ପରେ ପ୍ରଥମେ ଝାରସୁଗୁଡା ହସ୍ପିଟାଲ ପରେ ଓ ପରେ ବୁର୍ଲା ହସ୍ପିଟାଲ କୁ ସ୍ଥାନାନ୍ତର କରାଯାଇଥିଲା । ହେଲେ ଶେଷରେ ସେ ଆଖି ବୁଜିଛନ୍ତି । ଗତ ଫେବ୍ରୁଆରୀରେ ୨୨ ତାରିଖରେ କଲେଜର ଜଣେ ଯୁକ୍ତ ତିନି ଦ୍ବିତୀୟ ବର୍ଷର ଛାତ୍ର ରାଜେଶ ସହିସ ଅମିତଙ୍କୁ ଆକ୍ରମଣ କରି ମାଡ ମାରିଥିଲେ । ଏଥିରେ ଅମିତ ଗୁରୁତର ହୋଇ ପଡିଥିଲେ ଏବଂ ତାଙ୍କୁ ବୁର୍ଲାରେ ଚିକିତ୍ସା କରାଯାଉଥିଲା ।
ତେବେ ୯ ମାସ ଧରି ଚିକିତ୍ସା ହେବା ପରେ ଗତ ବିଳମ୍ବିତ ରାତିରେ ଅଧ୍ୟାପକଙ୍କ ମୃତ୍ୟୁ ଘଟିଛି । ଘଟଣା ଦିନ ସକାଳେ ଶ୍ରେଣୀକୁ ବିଳମ୍ବରେ ଆସିଥିବାରୁ ଅମିତ ରାଜେସକୁ ତାଗିଦ କରିଥିଲେ । ଏହାକୁ ନେଇ ଖୁବ ବଚସା ମଧ୍ୟ ହୋଇଥିଲା । ଏହାପରେ ରାଜେଶ ରାଗରେ ଅମିତଙ୍କୁ ଆକ୍ରମଣ କରିଥିଲେ । ୯ ମାସ ଧରି ଚିକିତ୍ସିତ ହେବା ପରେ ଗତକାଲି ତାଙ୍କର ମୃତ୍ୟୁ ହୋଇଯାଇଛି । ଘଟଣାରେ ଅଭିଯୁକ୍ତ ଛାତ୍ର ରାଜେଶକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ।