ପୁରୀ : ଶ୍ରୀମନ୍ଦିରରେ ଅଘଟଣ। ମହାପ୍ରଭୁଙ୍କର ହେଲା ବଡ଼ ମହାସ୍ନାନ । ଭିତରକାଠ ନିକଟରେ ରକ୍ତଛିଟା ପଡିବାରୁ ମହାପ୍ରଭୁଙ୍କର ହେଲା ବଡମହାସ୍ନାନ। ମଙ୍ଗଳାଳତି ପୂର୍ବରୁ ମହାସ୍ନାନ ହେଲେ ମହାପ୍ରଭୁ। ସକାଳ ୫ଟା ୨୧ରେ ସିଂହଦ୍ଵାର ଫିଟିବା ପରେ ପ୍ରଥମେ ସେବାୟତ ଘରର ମହିଳାମାନେ ମହାପ୍ରଭୁଙ୍କ ଦର୍ଶନ ପାଇଁ ପ୍ରବେଶ କରିଥିଲେ। ଭିତରକାଠ ନିକଟ ଧୁକୁଡି ଦ୍ୱାର ନିକଟରେ ଜଣେ ସେବାୟତ ମହିଳାଙ୍କ ଆଙ୍ଗୁଠିରୁ ରକ୍ତଛିଟା ଲାଗିଥିଲା। ଏଥିପାଇଁ ମଙ୍ଗଳାଳତି ପୂର୍ବରୁ ନୀତିକାନ୍ତି ବନ୍ଦକରାଯାଇଥିଲା । ପରେ ମହାପ୍ରଭୁଙ୍କ ବଡ଼ ମହାସ୍ନାନ ହେବା ପରେ ନୀତି ଆଗକୁ ବଢିଛି । ଏବେ ଦର୍ଶନ ବ୍ୟବସ୍ଥା ସ୍ୱାଭାବିକ ହୋଇଛି ।
ତାଇୱାନରେ ଏକାଧିକ ଶକ୍ତିଶାଳୀ ଭୂମିକମ୍ପ ଝଟକା , ରିକ୍ଟର ସ୍କେଲରେ ସବୁଠୁ ଅଧିକ ୬.୩ ତୀବ୍ରତାର କମ୍ପନ ରେକର୍ଡ
ନନ୍ଦିଘୋଷ ବ୍ୟୁରୋ : ତାଇୱାନରେ ଏକାଧିକ ଶକ୍ତିଶାଳୀ ଭୂମିକମ୍ପ ଝଟକା । ଶୌଫେଙ୍ଗ ଟାଉନସିପ୍, ହୁଆଲିନ୍ କାଉଣ୍ଟିରେ ୯ ମିନିଟ୍ ମଧ୍ୟରେ ୫ଟି ଭୂମିକମ୍ପ ଅନୁଭୂତ ହୋଇଛି। କାଲି ବିଳମ୍ବିତ ରାତିରେ ତାଇୱାନର ପୂର୍ବ ଉପକୂଳର ମ୍ୟାଗ୍ନିଚ୍ୟୁଡର ୬.୩ ତୀବ୍ରତାର କମ୍ପନ ଅନୁଭୂତ ହୋଇଥିବା ସୂଚନା ମିଳିଛି । ଗତକାଲି ୮୦ରୁ ଅଧିକ ଭୂମିକମ୍ପ ଅନୁଭୂତ ହୋଇଥିବା ବେଳେ ଆଜି ସକାଳ ସୁଦ୍ଧା ରାଜଧାନୀ ତାଇପେରେ ୫ଥର ଭୂମିକମ୍ପ ଅନୁଭୂତ ହୋଇଛି ।
ଏହା ତାଇଓ୍ୱାନର ଗ୍ରାମୀଣ ପୂର୍ବ କାଉଣ୍ଟି ହୁଆଲିନ୍ ଉପରେ ଅଧିକ ଅନୁଭୂତ ହୋଇଛି , ଯେଉଁଠାରେ ଏପ୍ରିଲ ୩ ରେ ୭.୨ ତୀବ୍ରତାର ଭୂମିକମ୍ପରେ ପାଖାପାଖି ୧୪ ଜଣଙ୍କର ମୃତ୍ୟୁ ହୋଇଥିଲା । ସେବେଠାରୁ ତାଇୱାନରେ ପାଖାପାଖି ୮୦ରୁ ଅଧିକ ଝଟକା ଅନୁଭୂତ ହେଲାଣି । ବଡ ବଡ କୋଠା ଓ ହୋଟେଲ ଏବେ ବି ଝୁଲି ରହିଥିବା ଦେଖିବାକୁ ମିଳିଛି । ଆଜିକାର ଭୂମିକମ୍ପରେ ୨ଟି ବଡ ବଡ କୋଠା ଭୁଷୁଡି ପଡିଥିବା ସୂଚନା ରହିଥିବାବେଳେ କୌଣସି ଜନଜୀବନ କ୍ଷତି ନେଇ ସୂଚନା ମିଳିନି ।
ଭାରତ ନିର୍ମାଣ କରୁଛି ସ୍ବତନ୍ତ୍ର ଏୟାର ଡିଫେନ୍ସ ମିସାଇଲ ସିଷ୍ଟମ
ନୂଆଦିଲ୍ଲୀ : ପଡ଼ୋଶୀ ରାଷ୍ଟ୍ରଠାରୁ ବଢୁଛି ଭାରତ ଲାଗି ବିପଦ । ଶତ୍ରୁ ପକ୍ଷରୁ ଡ୍ରୋନ ଓ ଲଢୁଆ ଯୁଦ୍ଧ ବିମାନର ମୁକାବିଲା ଲାଗି ଭାରତ ନିର୍ମାଣ କରୁଛି ସ୍ବତନ୍ତ୍ର ଏୟାର ଡିଫେନ୍ସ ମିସାଇଲ ସିଷ୍ଟମ । କାନ୍ଧରେ ରଖି ପ୍ରୟୋଗ କରାଯାଇପାରୁଥିବା ଏହି ସିଷ୍ଟମ ଖୁବ୍ ଶୀଘ୍ର ଭାରତକୁ ଶକ୍ତିଶାଳୀ କରିବାରେ ସକ୍ଷମ ହେବ । ସୀମାରେ ପାକିସ୍ତାନ ଓ ଚୀନ ପକ୍ଷରୁ ବିପଦ କ୍ରମାଗତ ଭାବେ ବଢୁଥିବାବଳେ ଏହାକୁ ପ୍ରତିହତ କରିବା ଲାଗି ସେନା ଓ ବାୟୁସେନାକୁ ୩୫୦ ଲଞ୍ଚର ଓ ୨ ହଜାର ମିସାଇଲ ପ୍ରଦାନ କରିବାକୁ ନିଆଯାଇଛି ପଦକ୍ଷେପ ।
ପ୍ରତିରକ୍ଷା ବିଭାଗ ସୂତ୍ର ଅନୁସାରେ ଏକ ଅତ୍ୟନ୍ତ ପ୍ରଭାବଶାଳୀ ଲେଜର ବିମ୍ ରାଇଡିଂ ଭେରି ସର୍ଟ ରେଞ୍ଜ ଏୟାର ଡିଫେନସ ସିଷ୍ଟମ ପ୍ରସ୍ତୁତ କରାଯାଉଛି । ଏକ ରାଷ୍ଟ୍ରାୟତ୍ତ ସଂସ୍ଥା ଓ ଏକ ଘରୋଇ ସଂସ୍ଥା ପକ୍ଷରୁ ଏହାର ନିର୍ମାଣ କରାଯାଉଛି । ସେହିପରି ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ ବା ଡିଆରଡିଓ ଅନ୍ଯ ସଂସ୍ଥା ସହ ମିଶି ପ୍ରସ୍ତୁତ କରୁଛି ସ୍ବତନ୍ତ୍ର ପ୍ରକାର ମିସାଇଲ ଯାହାକି କାନ୍ଧରୁ ପ୍ରୟୋଗ କରାଯାଇପାରିବ । ଭାରତ ନିକଟରେ ରହିଥିବା ରୁଷିଆ ନିର୍ମିତ ଇଗଲା-1 ଏମର ଏହା ବିକଳ୍ପ ହେବ ।
ଆଜି ସରୁଛି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଓ ବିଆରଏସ ନେତ୍ରୀ କେ. କବିତାଙ୍କ ହେପାଜତ ଅବଧି
ନୂଆଦିଲ୍ଲୀ : ଦିଲ୍ଲୀ ମଦ ନୀତି ମାମଲା । ଆଜି ସରୁଛି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଓ ବିଆରଏସ ନେତ୍ରୀ କେ. କବିତାଙ୍କ ବିଚାର ବିଭାଗୀୟ ହେପାଜତ ଅବଧି । ସ୍ବତନ୍ତ୍ର ବିଚାରପତି କାବେରୀ ବାଓ୍ବେଜା ଦୁହିଁଙ୍କୁ ବିଚାର ବିଭାଗୀୟ ହେପାଜତକୁ ପଠାଇଥିଲେ ।
ଗତ ମାର୍ଚ୍ଚ ୨୧ ତାରିଖରେ ଦିଲ୍ଲୀ ମଦନୀତି ମାମଲାରେ କେଜ୍ରିଓ୍ବାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଗିରଫ କରିଥିଲା । ସେହିପରି ମାର୍ଚ୍ଚ ୧୫ରେ ବି କବିତାଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ତିହାର ଜେଲରେ ଥିବା କେଜ୍ରିଓ୍ବାଲଙ୍କ ଲାଗି ଅନେକ କଟକଣା ଜାରି କରାଯାଇଥିବାବେଳେ ସାପ୍ତାହିକ ଦୁଇ ଥର ବଦଳରେ ସାପ୍ତାହିକ ପାଞ୍ଚଥର ବୈଠକ ନିମନ୍ତେ କରାଯାଇଥିବା ଆବେଦନକୁ ଖାରଜ କରିଥିଲୋ କୋର୍ଟ । ସେହିପରି ଗିରଫଦାରୀର ବିରୋଧରେ ସେ କରିଥିବା ଆବେଦନକୁ ବି ଦିଲ୍ଲୀ ହାଇକୋର୍ଟ ଖାରଜ କରିଥିଲେ ।
ଆସନ୍ତାକାଲି ଠୁ ହିଞ୍ଜିଳିରୁ ମୁଖ୍ୟମନ୍ତ୍ରୀଙ୍କ କ୍ୟାମ୍ପେନ ; ଏଥର ଯୋଡ଼ି ଶଙ୍ଖର ଆହ୍ଵାନ ଦେଲେ ନବୀନ
ଭୁବନେଶ୍ୱର : ଆସନ୍ତାକାଲିଠୁ ପ୍ରଚାର ଆରମ୍ଭ କରୁଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ଗଂଜାମ ଜିଲ୍ଲା ହିଞ୍ଜିଳିରୁ ଆରମ୍ଭ କରିବେ ନିର୍ବାଚନୀ ପ୍ରଚାର। ଏହି ଅବସରରେ ଓଡ଼ିଶାବାସୀଙ୍କୁ ଅପିଲ କରିଛନ୍ତି ମୁଖ୍ୟମନ୍ତ୍ରୀ, କହିଛନ୍ତି ଏଥର ଯୋଡ଼ି ଶଙ୍ଖ । ଗୋଟିଏ ଏମଏଲଏ ପାଇଁ ଆଉ ଗୋଟିଏ ଏମପି ପାଇଁ।
ଡବଲ ଶଙ୍ଖରେ ଭୋଟ ଦେଇ ଦୁଇ ପ୍ରାର୍ଥୀଙ୍କୁ ବିଜୟୀ କରାଇବାକୁ ଅପିଲ କରିଛନ୍ତି ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ। ସେହିପରି ବିଜେଡି ନେତା ତଥା ଫାଇଭ-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ମଧ୍ୟ ଓଡ଼ିଶାବାସୀଙ୍କୁ ଏଥର ଯୋଡ଼ି ଶଙ୍ଖ ବୋଲି ଆହ୍ଵାନ କରିଛନ୍ତି। ଗୋଟିଏ ଏମପି ପାଇଁ ଆଉ ଗୋଟିଏ ଏମଏଲଏ ପାଇଁ ବୋଲି କହିଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ଆସନ୍ତା ୨୪ରୁ ନିର୍ବାଚନୀ ପ୍ରଚାର ଆରମ୍ଭ ହେଉଥିବାରୁ ଓଡ଼ିଶାବାସୀଙ୍କୁ ଏଥର ଯୋଡ଼ି ଶଙ୍ଖ ବୋଲି ଉଦବୋଧନ କରିଛନ୍ତି।
ଆସନ୍ତାକାଲି ସକାଳ ସାଢ଼େ ୧୦ଟାରେ ହିଞ୍ଜିଳିରେ ଆୟୋଜିତ ଏକ ଜନସଭାରେ ମୁଖ୍ୟମନ୍ତ୍ରୀ ସମ୍ବୋଧନ କରିବେ। ସାଢ଼େ ୧୧ଟାରେ ଶେରଗଡ଼ରେ ବି ସେ ଉଦବୋଧନ ଦେବେ। ଆସନ୍ତା ୩୦ ତାରିଖରେ ହିଞ୍ଜିଳି ବିଧାନସଭା ଆସନ ଲାଗି ମୁଖ୍ଯମନ୍ତ୍ରୀ ନିଜର ପ୍ରାର୍ଥିପତ୍ର ଦାଖଲ କରିବେ। ସେହିଦିନ ସେ ତାରାତାରିଣୀ ଦର୍ଶନ କରିବେ ଏବଂ ପ୍ରାର୍ଥିପତ୍ର ଦାଖଲ ପରେ ଚିକିଟିରେ ଏକ ସମାବେଶକୁ ସମ୍ବୋଧିତ କରିବେ।
୧ ତାରିଖରେ ବ୍ରହ୍ମପୁର ଲୋକସଭା ଆସନ ଅନ୍ତର୍ଗତ ଖଲ୍ଲିକୋଟ, ଦିଗପହଣ୍ଡି, ଛତ୍ରପୁର ଓ ଆସ୍କା ଲୋକସଭା ଆସନ ଅନ୍ତର୍ଗତ କବିସୂର୍ଯ୍ୟନଗରରେ ନିର୍ବାଚନ ପ୍ରଚାର କରିବେ। ୩ ତାରିଖରେ କନ୍ଧମାଳ ଲୋକସଭା ଆସନ ଅନ୍ତର୍ଗତ ଭଞ୍ଜନଗର, ଆସ୍କା ଲୋକସଭା ଆସନ ଅନ୍ତର୍ଗତ ପୋଲସରା, ସାନଖେମୁଣ୍ଡି ଓ ସୋରଡାରେ ପ୍ରଚାର କରିବେ। ସେହିପରି ୬ ତାରିଖରେ ବ୍ରହ୍ମପୁର ଲୋକସଭା ଅନ୍ତର୍ଗତ ଗୋପାଳପୁର ଓ ଆସ୍କା ଲୋକସଭା ଆସନ ଅନ୍ତର୍ଗତ ଆସ୍କାରେ ଦୁଇଟି କାର୍ଯ୍ୟକ୍ରମରେ ସାମିଲ ହେବେ। ୭ ତାରିଖରେ ଶେରଗଡ଼, ହିଞ୍ଜିଳି,ବ୍ରହ୍ମପୁରରରେ ୩ଟି ରୋଡସୋରେ ଯୋଗଦେବେ। ୯ ତାରିଖରେ ଗୋପାଳପୁରରେ ଏକ ରୋଡସୋରେ ମୁଖ୍ଯମନ୍ତ୍ରୀ ଯୋଗଦେବେ।
ସମସ୍ତ କାର୍ଯ୍ୟକ୍ରମରେ ଫାଇଭ-ଟି ଓ ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ସାମିଲ ହେବେ। ରାଜ୍ଯ ସରକାରଙ୍କ ବିକାଶମୂଳକ କାର୍ଯ୍ୟ ତଥା 5T ଅଧୀନରେ ଚାଲିଥିବା ରୂପାନ୍ତରଣ ରାଜ୍ଯରେ ମୁଖ୍ଯମନ୍ତ୍ରୀଙ୍କ ଲୋକପ୍ରିୟତାକୁ ବଢ଼ାଇଛି। ଚବିଶ ନିର୍ବାଚନ ଲାଗି ମୁଖ୍ଯମନ୍ତ୍ରୀ ପ୍ରଚାର ମଇଦାନକୁ ଓହ୍ଲାଇବା ଦଳରେ ଉତ୍ସାହ ସୃଷ୍ଟି କରିଛି।
କର୍କଟ ରୋଗ ପାଇଁ ବରଦାନ ସାଜିଛି କଟକ ଆଚାର୍ଯ୍ଯ ହରିହର କର୍କଟ ପ୍ରତିଷ୍ଠାନ
କଟକ: କର୍କଟ ରୋଗ ପାଇଁ ଆଉ ବିକିବାକୁ ପଡ଼ିବନି ଜମି । କଟକ ଆଚାର୍ଯ୍ଯ ହରିହର କ୍ଯାନ୍ସର ପ୍ରତିଷ୍ଠାନରେ ବିନା ମୂଲ୍ଯରେ ମିଳୁଛି ସମସ୍ତ ସେବା । ଅତ୍ଯାଧୁନିକ ଚିକିତ୍ସା ସହ ଔଷଧ ବି ମାଗଣା । ପ୍ରାରମ୍ଭିକ ପର୍ଯ୍ଯାୟରେ ରୋଗ ଚିହ୍ନଟ ହୋଇ ପାରୁଥିବାରୁ ଅନେକ ଆରୋଗ୍ଯ ଲାଭ କଲେଣି । ରାଜ୍ଯ ସରକାରଙ୍କ ଏହି ଅଭିନବ ଉଦ୍ଯମ ପାଇଁ ଖାଲି ରାଜ୍ଯରୁ ନୁହେଁ ବାହାର ରାଜ୍ଯର ରୋଗୀ ମଧ୍ଯ ଏହି ହସପିଟାଲକୁ ଆସୁଛନ୍ତି ।
ବରଦାନ ସାଜିଛି କଟକ ଆଚାର୍ଯ୍ଯ ହରିହର କର୍କଟ ପ୍ରତିଷ୍ଠାନ। ବଦଳିଛି ହସପିଟାଲର ରୂପରେଖ । ସମୟ ସାଥିରେ ବଦଳିଛି ଚିକିତ୍ସା ପଦ୍ଧତି । ରୋଗ ନିରୂପଣ ଓ ଚିକିତ୍ସାରେ ବ୍ଯବହାର ହେଉଛି ଅତ୍ଯାଧୁନିକ କୌଶଳ । ମାଗଣା ଚିକିତ୍ସା ସୁବିଧା ପାଇ ଉପକୃତ ରାଜ୍ଯ ଓ ରାଜ୍ଯ ବାହାର ରୋଗୀ । ପୂର୍ବରୁ କର୍କଟ ରୋଗକୁ ଚିହ୍ନଟ କରିବାକୁ ଅନେକ ସମୟ ଲାଗୁଥିଲା । ପ୍ରଥମେ ଶଲ୍ୟ ଚିକିତ୍ସା ରେଡ଼ିଓ ଥେରାପି ମାଧ୍ୟମରେ ଚିକିତ୍ସା କରାଯାଉଥିଲା । କିନ୍ତୁ ଏବେ ରୋଗ ଚିହ୍ନଟ ସହ ଚିକିତ୍ସା କ୍ଷେତ୍ରରେ କଟକ ଆଚାର୍ଯ୍ଯ କର୍କଟ ପ୍ରତିଷ୍ଠାନକୁ ମିଳିଛି ନୂଆ ଦିଗନ୍ତ । ପେଟ୍ ସ୍କାନ ମାଧ୍ଯମରେ ତୁରନ୍ତ ରୋଗ ଚିହ୍ନଟ ହେଉଛି । ଏହି ପରୀକ୍ଷା ଅଧିକ ବ୍ଯୟ ବହୁଳ ହୋଇଥିବାରୁ ଅନେକ ରୋଗୀ ଅକ୍ଷମତା ପ୍ରକାଶ କରୁଥିଲେ । ତେବେ କଟକ ଆଚାର୍ଯ୍ଯ ହରିହର କର୍କଟ ପ୍ରତିଷ୍ଠାନରେ ଏହା ମାଗଣାରେ ଉପଲବ୍ଧ ହେଉଛି । ପ୍ରାଥମିକ ପର୍ଯ୍ଯାୟରେ ରୋଗ ଚିହ୍ନଟ ହୋଇ ପାରୁଥିବାରୁ ଚିକିତ୍ସାରେ ମିଳୁଛି ଅନେକ ସଫଳତା । ଏହାସହ ରୋଗୀଙ୍କୁ ମିଳୁଛି ମାଗଣା କେମୋ ଥୋରପି ।
କର୍କଟ ରୋଗୀ ଅନେକ ପ୍ରକାର ଅଛି । କିନ୍ତୁ ଏହାର ସଠିକ୍ ନିରୂପଣ ହୋଇ ପାରିଲେ ରୋଗୀ ଆରୋଗ୍ୟ ହୋଇଥାଏ । ଓଡ଼ିଶାରେ ଏପରି ଅତ୍ଯାଧୁନିକ ସୁବିଧା ମିଳୁଥିବାରୁ ଖାଲି ଆମ ଓଡ଼ିଶା ନୁହେଁ କୋଲକାତା, ଝାଡଖଣ୍ଡ, ବିହାରରୁ ମଧ୍ଯ ବହୁ ରୋଗୀ ଏଠାକୁ ଆସୁଛନ୍ତି । ପେଟ ସ୍କାନ, MRI, ସିଟି ସ୍କାନ, କେମୋ ଥେରାପି, ଆଦି ବ୍ୟୟ ବହୁଳ ପରୀକ୍ଷା ରୋଗୀଙ୍କୁ ମାଗଣାରେ ଯୋଗାଇ ଦିଆଯାଉଛି । ଏହାସହ ଚିକିତ୍ସା ପରେ ମାଗଣାରେ ଔଷଧ ମଧ୍ଯ ଯୋଗାଇ ଦିଆଯାଉଛି ।
ଲୋକାଭିମୁଖୀ ଯୋଜନା ବିଜେଡିକୁ ଦେବ ବଡ଼ ବିଜୟ!
ନନ୍ଦିଘୋଷ ବ୍ୟୁରୋ: ରୂପାନ୍ତରଣ ଓଡିଶା,BSKY ସହ ଏକାଧିକ ଲୋକାଭିମୁଖୀ ଯୋଜନା ବିଜେଡିକୁ ଦେବ ବଡ଼ ବିଜୟ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁଦୃଢ ନେତୃତ୍ବ ଓଡ଼ିଶାରେ ବିକାଶକୁ ନୂଆ ପରିଚୟ ଦେଇଛି। ତୃଣମୂଳସ୍ତରରେ ଏହାକୁ ମୁଖ୍ୟଅସ୍ତ୍ର କରି ବିଜେଡି ଟିକେଟ ପାଇଥିବା ନେତା ବଡ଼ ବିଜୟ ଲକ୍ଷ୍ୟ ରଖିଛନ୍ତି। ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବାକୁ ଓଡ଼ିଶାବାସୀ ମନସ୍ଥ କରିଥିବାରୁ ବିଜେଡ଼ି ୧୨୮ ବିଧାନସଭା ଓ ୧୮ ଲୋକସଭା ଆସନରେ ବିଜୟୀ କରିବାକୁ ଟାର୍ଗେଟ ରଖିଛି। ଯାହାକୁ ନେଇ ଉଷ୍ମ ନିର୍ବାଚନୀ ରାଜନୀତି।
ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଓଡିଶାବାସୀଙ୍କ ପାଇଁ ବରଦାନ। ବଡ଼ ବଡ଼ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି ସାଧାରଣ ଖଟିଖିଆ ଶ୍ରମିକ। ମହିଳାଙ୍କୁ ୧୦ ଲକ୍ଷ ଟଙ୍କା ଏବଂ ପୁରୁଷଙ୍କୁ ୫ ଲକ୍ଷ ଯାଏ ଚିକିତ୍ସା ଖର୍ଚ୍ଚର ସୁବିଧା ମିଳୁଛି। ସୁସ୍ଥ ଓଡ଼ିଶା ଓ ସୁଖି ଓଡ଼ିଶା ଗଠନ ଲକ୍ଷ୍ୟ ପୂରଣ ହେବାରେ ଲାଗିଛି। ନବୀନଙ୍କ BSKY କାର୍ଡ ଏବେ ପୁରା ଦେଶ ପାଇଁ ଲାଜିଛି ରୋଲ ମଡ଼େଲ। ଓଡ଼ିଶାବାସୀଙ୍କ ପାଇଁ ମୁଖ୍ୟମନ୍ତ୍ରୀ BSKY କାର୍ଡ ବେଶ ଗ୍ରହଣୀୟ ହୋଇଛି। ସେହିପରି ବିଭିନ୍ନ ଧାର୍ମୀକ ପୀଠର ଉନ୍ନତି, ପର୍ଯ୍ୟଟନୀସ୍ଥଳିର ବିକାଶ, 5T ସ୍କୁଲ, ଲକ୍ଷ୍ମୀ ବସ , ଗମନାଗମନରେ ସୁଦୃଢ ଭିତ୍ତିଭୂମି ଓଡ଼ିଶାକୁ ନୂଆ ପରିଚୟ ଦେଇଛି। ଏଥିଲାଗି ଓଡ଼ିଶାବାସୀ ମୁଖ୍ୟମନ୍ତ୍ରୀ ନବୀନଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବାକୁ ମନସ୍ଥ କରିଛନ୍ତି। ତେଣୁ ବିଧାୟକ ଓ ସାଂସଦ ଟିକେଟ ପାଇଥିବା ନେତାଙ୍କ ପାଇଁ ଏହା ନିର୍ବାଚନରେ ବଡ଼ ଆର୍ଶୀବାଦ ହେବ। ନିର୍ବାଚନରେ ସମୟରେ ବିରୋଧୀ ଯେତେ ଅପ୍ରଚାର କଲେବି ବିଜେଡ଼ି ପ୍ରାର୍ଥୀଙ୍କ ଉପରେ କୌଣସି ପ୍ରଭାବ ପଡ଼ିବନି ବୋଲି ଟିକେଟ ପାଇଥିବା ନେତାମାନେ କହିଛନ୍ତି।
୨୫ ବର୍ଷ ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାବାସୀଙ୍କ ସେବା କରିଛନ୍ତି। ସାଢେ ୪ କୋଟି ଓଡ଼ିଆଙ୍କୁ ନିଜର ପରିବାର ଭାବେ ଗ୍ରହଣ କରି ସେମାନଙ୍କ ସୁଖ ଦୁଃଖର ସାଥୀ ହୋଇଛନ୍ତି। ଯେଉଁଥିଲାଗି ନବୀନ ଲୋକପ୍ରିୟ ଓ ଶ୍ରେଷ୍ଠ ନେତାର ମାନ୍ୟତା ବଜାୟ ରଖିଛନ୍ତି। ନବୀନଙ୍କ ଲୋକାଭିମୁଖୀ ଯୋଜନା ଓ ବିକାଶମୂଳକ କାର୍ଯ୍ୟକ୍ରମ ବିଜେଡିକୁ ୨୪ରେ ବଡ଼ ବିଜୟ ଦେବ ବୋଲି ବିଭିନ୍ନ ସର୍ଭେ ରିପୋର୍ଟରେ ପ୍ରକାଶ ପାଇସାରିଛି। ତେଣୁ ବିଜେଡି ଟିକେଟ ପାଇଥିବା ନେତାଙ୍କୁ ଲୋକଙ୍କ ଆର୍ଶୀବାଦ ମିଳିବ ବୋଲି ରାଜନୈତିକ ସମୀକ୍ଷକ କହିଛନ୍ତି।
ବିଜେଡ଼ି ୧୪୧ ବିଧାୟକ ଓ ୨୧ ସାଂସଦ ପ୍ରାର୍ଥୀକୁ ମଇଦାନକୁ ଓହ୍ଲାଇଛି। ନିର୍ବାଚନ ତାରିଖ ଯେତିକି ପାଖେଇ ଆସୁଛି ବିଜେଡିର ହାଓ୍ବା ତୂଣମୂଳସ୍ତରରେ ସେତିକି ବଢିବାରେ ଲାଗିଛି। ନବୀନଙ୍କ ବିକାଶ ୨୪ରେ ବଡ଼ ବିଜୟ ଆଣିବା ନେଇ ସବୁ ମହଲରେ ଚର୍ଚ୍ଚା।
ଗୁଳିମାଡ କରି ଲୁଟ୍ ଉଦ୍ୟମ
ଖୋର୍ଦ୍ଧା: ଗୁଳିମାଡ କରି ଲୁଟ୍ ଉଦ୍ୟମ । ଅଳ୍ପକେ ବର୍ତ୍ତିଗଲେ ଦମ୍ପତି । ଖୋର୍ଦ୍ଧା ଜାତୀୟ ରାଜପଥରେ ଆତଙ୍କ ଖେଳାଇଲା ବ୍ଲାକ୍ ପଲସର । ଫାଇରିଂ କରି ମହିଳାଙ୍କ ବେକରୁ ସୁନା ଚେନ ଲୁଟ ଉଦ୍ୟମ କଲେ ଦୁଇ ବାଇକ୍ ଆରୋହୀ । ଘଟଣା ଘଟିଛି ୫୭ନ ଜାତୀୟ ରାଜପଥ ଖୋର୍ଦ୍ଧା ଜିଲ୍ଲା ବାଘମାରି ବାଙ୍କୀ ରାସ୍ତାରେ । ତପସ୍ଵିନୀ ବିଶ୍ଵାଳ ତାଙ୍କ ସ୍ଵାମୀ, ପିଲାଙ୍କ ସହ ବାଙ୍କୀରୁ ସାରୁଅ ବାଇକ୍ ଯୋଗେ ଆସୁଥିବା ବେଳେ ଦୁଇଜଣ ଦୁର୍ବୃତ୍ତ ଦମ୍ପତିଙ୍କୁ ଫାୟାରିଂ କରି ବେକରୁ ସୁନା ଚେନ ଝାଂପି ନେବାକୁ ଉଦ୍ୟମ କରିଥିଲେ । ମହିଳା ପାଟି କରିବାରୁ ଦୁର୍ବୃତ୍ତ ଖସି ପଳାଇଥିଲେ । ପୋଲିସ ଘଟଣା ପହଞ୍ଚି ଛାନଭିନ୍ନ କରି ଗୁଳି ଖୋକା ଜବତ କରିଛି । ତେବେ ଗୁଳିମାଡରେ କାହାର କୌଣସି କ୍ଷତି ହୋଇ ନଥିବା କହିଛି ପୋଲିସ୍ ।
୨୦୨୩-୨୪ ଆର୍ଥିକ ବର୍ଷରେ ରିଲାଏନ୍ସ ଜିଓର ନେଟ ଲାଭ ୨୦୪୬୬ କୋଟି ଟଙ୍କା
ଭୁବନେଶ୍ୱର: ଦେଶର ସର୍ବବୃହତ ଦୂରସଂଚାର ସେବା ପ୍ରଦାନକାରୀ କମ୍ପାନୀ ରିଲାଏନ୍ସ ଜିଓ ଇନ୍ଫୋକମ ଲିମିଟେଡ଼ ପକ୍ଷରୁ ଆଜି ୨୦୨୩-୨୪ ଆର୍ଥିକ ବର୍ଷର ଚତୁର୍ଥ ତ୍ରୟମାସ ତଥା ସମ୍ପୂର୍ଣ୍ଣ ଆର୍ଥିକ ବର୍ଷର ଆର୍ଥିକ ଫଳାଫଳ ଘୋଷଣା କରାଯାଇଛି। ୨୦୨୩-୨୪ ଆର୍ଥିକ ବର୍ଷର ଜାନୁୟାରୀ ରୁ ମାର୍ଚ୍ଚ ଯାଏ ଚତୁର୍ଥ ତ୍ରୟମାସରେ ରିଲାଏନ୍ସ ଜିଓ ଇନ୍ଫୋକମ ଲିମିଟେଡ଼ ୫୩୩୭ କୋଟି ଟଙ୍କା ନେଟ ଲାଭ ହାସଲ କରିଥିବା ବେଳେ ସମ୍ପୂର୍ଣ୍ଣ ଆର୍ଥିକ ବର୍ଷରେ ରିଲାଏନ୍ସ ଜିଓର ନେଟ ଲାଭ ୨୦୪୬୬ କୋଟି ଟଙ୍କା ହୋଇଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି।
ଜାନୁୟାରୀରୁ ମାର୍ଚ୍ଚ ଯାଏ ଚତୁର୍ଥ ତ୍ରୟମାସରେ ରିଲାଏନ୍ସ ଜିଓ ଇନ୍ଫୋକମ ଲିମିଟେଡ଼ର ନେଟ ଲାଭ ପୂର୍ବ ବର୍ଷ ସମାନ ଅବଧି ତୁଳନାରେ ୧୩.୧୬ ପ୍ରତିଶତ ବୃଦ୍ଧି ପାଇଛି। ଏହି ତ୍ରୟମାସରେ କମ୍ପାନୀର ପରିଚାଳନାଗତ ରାଜସ୍ୱ ୨୫୯୫୯ କୋଟି ଟଙ୍କାକୁ ବୃଦ୍ଧି ପାଇଛି।
ସେହିଭଳି ୨୦୨୩-୨୪ ସମ୍ପୂର୍ଣ୍ଣ ଆର୍ଥିକ ବର୍ଷରେ ରିଲାଏନ୍ସ ଜିଓର ନେଟ ଲାଭ ପୂର୍ବ ବର୍ଷ ତୁଳନାରେ ୧୨.୪ ପ୍ରତିଶତ ବୃଦ୍ଧି ସହିତ ୨୦୪୬୬ କୋଟି ଟଙ୍କାରେ ପହଞ୍ଚିଛି। ଆଲୋଚ୍ୟ ଆର୍ଥିକ ବର୍ଷରେ କମ୍ପାନୀର ମୋଟ ପରିଚାଳନାଗତ ରାଜସ୍ୱ ୧୦.୨ ପ୍ରତିଶତ ବଢି ୧,୦୦,୧୧୯ କୋଟି ଟଙ୍କା ରହିଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି।
ମାର୍ଚ୍ଚ ଶେଷ ସୁଦ୍ଧା ଦେଶରେ ଜିଓର ଟ୍ରୁ ୫ଜି ନେଟୱାର୍କରେ ୧୦.୮ କୋଟିରୁ ଉର୍ଦ୍ଧ୍ୱ ଉପଭୋକ୍ତା ରହିଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି। ଜିଓର ମୋଟ ଗ୍ରାହକ ସଂଖ୍ୟା ୪୮.୧୮ କୋଟିକୁ ବୃଦ୍ଧି ପାଇଥିବା ବେଳେ ଗ୍ରାହକ ପ୍ରତି ରାଜସ୍ୱ ପ୍ରତିମାସ ୧୮୧.୭ ଟଙ୍କା ରହିଛି।
ହଂକଂରେ ବ୍ଯାନ ହେଲା ଏମଡିଏଚ ଓ ଏଭେରେଷ୍ଟ କମ୍ପାନୀର ମସଲା
ନନ୍ଦିଘୋଷ ବ୍ୟୁରୋ: ଭାରତରେ ଘରେ ଘରେ ପରିଚିତ ଦୁଇଟି ସ୍ପାଇସ ବ୍ରାଣ୍ଡର ସାମଗ୍ରୀ ଉପରେ ନିଷେଦ୍ଧାଦେଶ ଜାରି କରିଛି ହଂକଂ। ଏମଡିଏଚ ପ୍ରାଇଭେଟ ଲିମିଟେଜ ଓ ଏଭେରେଷ୍ଟ ଫୁଡ ପ୍ରଡକ୍ଟସ ପ୍ରାଇଭେଟ ଲିମିଟେଡର ସାମଗ୍ରୀ ଉପରେ ହଂକଂରେ ଜାରି ହୋଇଛି ନିଷେଧାଦେଶ। ଏହି ଦୁଇ କମ୍ପାନୀର ମସଲା ସାମଗ୍ରୀରେ କାର୍ସିନୋଜେନିକ ପେଷ୍ଟିସାଇଡ ଏଥିଲିନ ଅକ୍ସାଇଡ ଥିବାର ପ୍ରମାଣ ମିଳିବା ପରେ ହଂକଂ ସରକାର ଏହି ପଦକ୍ଷେପ ନେଇଛନ୍ତି। ଗତସପ୍ତାହରେ ଏଭେରେଷ୍ଟ କମ୍ପାନିର ସାମଗ୍ରୀ ଉପରେ ସମଧରଣର କଟକଣା ଲଗାଇଥିଲେ ସିଙ୍ଗାପୁର ସରକାର। ହଂକଂର ସେଣ୍ଟର ଫର ଫୁଡ ସେଫଟି ପକ୍ଷରୁ ଏହି ମସଲା ସାମଗ୍ରୀ ଉପରେ ନଜର ରଖାଯିବା ସହ ଗବେଷଣା କରାଯାଉଥିଲା।
ଏମଡିଏଚ ଗ୍ରୁପର ମାଡ୍ରାସ କରି ପାଉଡର, ସମ୍ବର ମସଲା ପାଉଡର ଓ କରି ପାଉଡରରେ ଏଥିଲିନ ଅକ୍ସାଇଡ ଥିବା ପ୍ରମାଣ ମିଳିବା ପରେ ସରକାର ଏହି ପଦକ୍ଷେପ ନେଇଥିଲେ। ସେହିପରି ଏଭେରେଷ୍ଟର ଫିସ୍ କରି ପାଉଡରରେ ଏଥିଲିନ ଅକ୍ସାଇଡ ଥିବାର ବି ପ୍ରମାଣ ମିଳିଥିଲା। କର୍କଟ ରୋଗ ସୃଷ୍ଟିକାରୀ ଏଜେଣ୍ଟ ଠାବ ହେବା ପରେ ଏହି ଦୁଇଟି କମ୍ପାନିର ମସଲାକୁ ବ୍ଯାନ କରାଯାଇଛଇ। ବିଶେଷ କରି ଏହି ଏଜେଣ୍ଟ ସ୍ତନ କର୍କଟ ଲାଗି କାରଣ ହୋଇଥିବାରୁ ହଂକଂ କର୍ତ୍ତୃପକ୍ଷ ଚିନ୍ତାବ୍ଯକ୍ତ କରିଥିଲେ। ୨୦୨୩ରେ ବି ଆମେରିକାର ଫୁଡ ଆଣ୍ଡ ଡ୍ରଗ ଆଡମିନିଷ୍ଟ୍ରେସନର ନିର୍ଦ୍ଦେଶ କ୍ରମେ ଏଭେରେଷ୍ଟ କମ୍ପାନି ସାମଗ୍ରୀକୁ ବଜାରରୁ ହଟାଇଦିଆଯାଇଥିଲା। ସେପଟେ ଦେଶର ସମସ୍ତ ମସଲା କମ୍ପାନିଙ୍କ ନମୁନା ସଂଗ୍ରହ କରିବା ଲାଗି ଫୁଡ୍ କମିଶନରମାନଙ୍କୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର।