ଭଦ୍ରକ: ରକ୍ତମୁଖା ବିଜେପି କର୍ମୀ । ବିଜେପି କର୍ମୀଙ୍କ ମାଡ଼ରେ ଗୋଟିଏ ପରିବାରର ୭ ଜଣ ଆହତ, ଡାକ୍ତରଖାନାରେ ଭର୍ତ୍ତି । ଭଦ୍ରକ ଜିଲ୍ଲା ପୀରାହାଟ ଥାନା ଅଧୀନ ବାଲିଦାଣ୍ଡି ଗାଁରେ ଏହି ଘଟଣା ଘଟିଛି ।  ବାଲିଦାଣ୍ଡି ଗାଁର ଗୋବର୍ଦ୍ଧନ ନାୟକଙ୍କ ପୁଅ  ଜିତେନ୍ଦ୍ର ଓ ଦେବେନ୍ଦ୍ର  ଗୁଣ୍ଡାଗର୍ଦ୍ଦି କରି ସରକାରୀ ପାଣି ପାଇପ ବାବଦକୁ ଦେୟ ଆଦାୟ କରୁଥିବା ଅଭିଯୋଗ ହୋଇଥିଲା । ଏନେଇ ଗାଁରେ ଡକାଯାଇଥିଲା ବୈଠକ । ଜିତେନ୍ଦ୍ର ଏବଂ ଦେବେନ୍ଦ୍ର ଏଥିରେ ଉତକ୍ଷିପ୍ତ ହୋଇ କୁନିଲତା ନାୟକଙ୍କ ପରିବାର ଉପରେ ଗତକାଲି ମଧ୍ୟାହ୍ନରେ ଆକ୍ରମଣ କରିଥିଲେ । ଯାହାକୁ ନେଇ ପୀରାହାଟ ଥାନାରେ ମାମଲା ରୁଜୁ ହୋଇଛି । ପୁଣି ଗତକାଲି ବିଳମ୍ବିତ ରାତିରେ ଗୋବର୍ଦ୍ଧନ ନାୟକଙ୍କ ତିନି ପୁଅଙ୍କ ସମେତ ମାକ୍ସ ପିନ୍ଧା ୧୫ରୁ ଅଧିକ ବିଜେପି କର୍ମୀ କୁନିଲତାଙ୍କ ପରିବାର ଉପରେ ଆକ୍ରମଣ କରିଥିଲେ । ବାଡ଼ିରେ ପିଟି ପୂରା ପରିବାରକୁ ଲହୁଲୁହାଣ କରି ପକାଇଛନ୍ତି । ପଡ଼ୋଶୀଙ୍କ ସହାୟତାରେ ସେମାନଙ୍କୁ ପ୍ରଥମେ ତିହିଡ଼ି ଓ ପରେ ଭଦ୍ରକ ମେଡ଼ିକାଲରେ ଭର୍ତ୍ତି କରାଯାଇଥିଲା । କିଛି ଆହତଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି । ଗୋବର୍ଦ୍ଧନ ନାୟକଙ୍କ ପରିବାର ଓ ବିଜେପି କର୍ମୀମାନେ ଜୋର ଜବରଦସ୍ତ ପାଣି ପାଇଁ ଟଙ୍କା ଆଦାୟ କରିବା ଓ ବିଦ୍ୟାଳୟ ଗୃହକୁ ବ୍ୟକ୍ତିଗତ କାମରେ ଲଗାଇଥିବା ଅଭିଯୋଗ ହୋଇଛି । କେହି ପ୍ରତିବାଦ କଲେ ମାଡ଼ ମାରି ମୁହଁ ବନ୍ଦ କରନ୍ତି । ଏମିତି ଗୁଣ୍ଡାଗର୍ଦ୍ଦିକୁ ରୋକିବା ସହ ଦୋଷୀକୁ ଦଣ୍ଡ ଦେବାକୁ କୁନିଲତାଙ୍କ ପରିବାର ଦାବି କରିଛନ୍ତି ।…

ଭୁବନେଶ୍ବର: ଡାକ୍ତର ଆଣ୍ଟିବାୟୋଟିକସ ଲେଖିବାର କାରଣ ଦର୍ଶାଇବା ପ୍ରସଙ୍ଗରେ ମତ ରଖିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର । ଏନେଇ ପୂର୍ବରୁ ନିୟମ ରହିଛି । ଆଣ୍ଟିବାୟୋଟିକସର ରେଜିଷ୍ଟାନ୍ସ ବିଶ୍ୱସ୍ତରରେ ବଢୁଛି । ଅପବ୍ୟବହାର  ଯୋଗୁ ଏହା ଉପରେ କଟକଣା ଲାଗୁ କରିବାକୁ ବାହାରିଛନ୍ତି କେନ୍ଦ୍ର ସରକାର । ଏହା ସ୍ୱାଗତଯୋଗ୍ୟ ପଦକ୍ଷେପ ବୋଲି କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର  । ଯେଉଁଠି ଆଣ୍ଟିବାୟୋଟିକସ ଦରକାର, ଦିଆଯିବ । ଡାଇଗ୍ନୋସିସ ପରି ଆଣ୍ଟିବାୟୋଟିକସ ପାଇଁ କାରଣ ଜଣାଇଲେ ମୌଳିକ ବ୍ୟବହାର ହେବ । ଡକ୍ୟୁମେଣ୍ଟେସନ ହୋଇପାରିବ । ଡ୍ରଗ୍ କଣ୍ଟ୍ରୋଲ ଆଇନରେ ମଧ୍ୟ ଏହା ଉଲ୍ଲେଖ ଅଛି ।

ପ୍ରେସକ୍ରିପସନ ନ ଦେଖି ଔଷଧ ଦେବା କଥା ନୁହେଁ । କିଛି ଡ୍ରଗ୍ ବିନା ପ୍ରେସକ୍ରିପସନ ବିକ୍ରି ହୋଇପାରିବ ନାହିଁ । ନନ୍- କମ୍ୟୁନେବଲ ଜୁନୋଟିକ ରୋଗ ପରି ଆଣ୍ଟି ମାଇକ୍ରୋବାଲ ରେଜିଷ୍ଟାନ୍ସ ବଡ଼ ବିପଦ ଆଣିପାରେ । ରୋଗର ସମ୍ବେଦନଶୀଳତା ବୁଝିବାକୁ ପଡ଼ିବ । ଡାକ୍ତର ଆଣ୍ଟିବାୟୋଟିକସର କାରଣ ଜୁଡିସିଅସଲି ଲେଖନ୍ତୁ ବୋଲି  ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର ପରାମର୍ଶ ଦେଇଛନ୍ତି  । ସେପଟେ ଡ୍ରଗସ କଣ୍ଟ୍ରୋଲର ଅଶୋକ କୁମାର ପାତ୍ର କହିଛନ୍ତି, ଡ୍ରଗସ ଏବଂ କସମେଟିକସ ଆକ୍ଟ ଅନୁଚ୍ଛେଦ ଏଚରେ ଏହା ଲେଖା ଅଛି  । ଏଚରେ ୫୫୧ ଡ୍ରଗସ ଥିବାବେଳେ ଏଚ-ୱାନରେ ୪୭ ଡ୍ରଗ୍ସ ସାମିଲ ଅଛି ଯାହା ଉଚ୍ଚ ଆଣ୍ଟିବାୟୋଟିକସ । ଏଥିପାଇଁ ଦୋକାନରେ ରେଜିଷ୍ଟରରେ ଲେଖିବା ନିୟମ ରହିଛି  । ନିୟମ ଉଲ୍ଲଂଘନ କଲେ କାରଣ ଦର୍ଶାଅ ନୋଟିସ ଜାରି ହେଉଛି  । ପରେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ହେଉଛି  । ଆବଶ୍ୟକ ପଡିଲେ ଲାଇସେନ୍ସ ବାତିଲ ହୋଇପାରିବ  । ବିନା ଚିଠାରେ ନ ବିକିବାକୁ ଦୋକାନୀଙ୍କୁ ନିର୍ଦ୍ଦେଶ ଦିଆଯାଇଛି  । କିଛି ଔଷଧ ବିନା ଚିଠା ଦେଇ କିଣି ହେବ  । ଡ୍ରଗସ କଣ୍ଟ୍ରୋଲର ତଦାରଖ କରୁଛନ୍ତି । କାରଣ ଆଣ୍ଟିବାୟୋଟିକ୍ସର ପ୍ରତିକୂଳ ପ୍ରଭାବ ମଧ୍ୟ ରହିଛି ବୋଲି କହିଛନ୍ତି ଡ୍ରଗସ କଣ୍ଟ୍ରୋଲର ଅଶୋକ କୁମାର ପାତ୍ର  ।

ଭୁବନେଶ୍ବର: ସରକାରୀ ମେଡିକାଲ କଲେଜରେ ଡାକ୍ତର ଅଭାବ ଦୂର ପାଇଁ ଆଉ ଏକ ବଡ଼ ପଦକ୍ଷେପ ନେଇଛନ୍ତି ରାଜ୍ୟ ସରକାର । ଏଣିକି ପ୍ରତି ମାସରେ ସାକ୍ଷାତକାର ଆୟୋଜନ କରାଯାଇ ଜୁନିଅର ରେସିଡେଣ୍ଟ, ସିନିୟର ରେସିଡେଣ୍ଟ, ଟ୍ୟୁଟର୍, ଆସିଷ୍ଟାଣ୍ଟ ପ୍ରଫେସର, ଆସୋସିଏଟ୍ ପ୍ରଫେସର ଓ ପ୍ରଫେସରଙ୍କୁ ନିଯୁକ୍ତି ଦିଆଯିବ । ଉଭୟ ରାଜ୍ୟ ଓ ଅନୁଷ୍ଠାନ ସ୍ତରରେ ମାସିକିଆ ସାକ୍ଷାତକାର କରାଯିବ । ଏନେଇ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ସୂଚନା ଅନୁସାରେ, ପ୍ରତି ମାସରେ ସାକ୍ଷାତକାର ପାଇଁ ୧୨ ତାରିଖ ଧାର୍ଯ୍ୟ କରାଯାଇଛି । ଏହି ଦିବସରେ ରାଜ୍ୟର ସମସ୍ତ ମେଡିକାଲ କଲେଜ ସମେତ ପିଜିଆଇଏମ୍ଇଆର କ୍ୟାପିଟାଲ ହସ୍ପିଟାଲ, ଏସସିବି ଡେଣ୍ଟାଲ କଲେଜରେ ନିଯୁକ୍ତି ପ୍ରକ୍ରିୟା ପରିଚାଳନା କରାଯିବ । ସେହିପରି ଖାଲି ଥିବା ବିଭିନ୍ନ ପଦବୀ ପଦବୀରେ ଯୋଗ୍ୟ ବିବେଚିତ ପ୍ରାର୍ଥୀଙ୍କୁ ନିଯୁକ୍ତି ପ୍ରଦାନ ଲକ୍ଷ୍ୟରେ ଡିଏମ୍ଇଟି ପଦକ୍ଷେପ ନେବେ । ରାଜ୍ୟସ୍ତରରେ ଡିଏମ୍ଇଟିଙ୍କ ପକ୍ଷରୁ ପ୍ରତି ମାସ ୨୫ ତାରିଖରେ ସାକ୍ଷାତକାର କରାଯିବ । ଉଭୟ ରାଜ୍ୟ ଓ ଅନୁଷ୍ଠାନ ସ୍ତରୀୟ ନିଯୁକ୍ତି ସମ୍ପର୍କରେ ପରବର୍ତ୍ତି ମାସର ୫ ତାରିଖ ସୁଦ୍ଧା ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗକୁ ରିପୋର୍ଟ ପ୍ରଦାନ କରାଯିବ ।

ନନ୍ଦିଘୋଷ ବ୍ୟୁରୋ: ଚିଲିକାରେ ଚାଲିଛି ଡଲଫିନ୍ ଗଣତି । ଚିଲିକା ବନ୍ୟପ୍ରାଣୀ ଡିଭିଜନର ସାତପଡା ଓ ବାଲୁଗାଁ ୨ଟି ରେଞ୍ଜରେ ଚାଲିଛି ଡଲଫିନ ଗଣନା l ୩ଟି ସେକ୍ଟରରେ ୧୮ଟି ଟିମ ନିୟୋଜିତ ହୋଇଛନ୍ତି । ପ୍ରତି ଟିମରେ ୫ରୁ ୬ ଜଣ ସଦସ୍ୟଙ୍କ ସମେତ ୨ ଜଣ ଡଙ୍ଗା ଚାଳକ ସାମିଲ ଅଛନ୍ତି । ବାଲୁଗାଁ, ବଡ଼କୂଳରେ ୧୦ ଟିମ୍ ଏବଂ ସାତପଡାରେ ୮ ଟିମ ଡଲଫିନ୍ ଗଣନା ପାଇଁ ନିୟୋଜିତ ହୋଇଛନ୍ତି । ଜିପିଏସ ଓ ବାଇନା କୁଲାର ଜରିଆରେ ଡଲଫିନ୍ ଗଣନା ଚାଲିଛି । ଟିମରେ ବନ୍ୟପ୍ରାଣୀ ବିଭାଗ କର୍ମଚାରୀ, ଚିଲିକା ଉନ୍ନୟନ କର୍ତ୍ତୃପକ୍ଷର କର୍ମଚାରି, ଜଙ୍ଗଲ ବିଭାଗ, ଓୟୁଏଟି ଛାତ୍ରଛାତ୍ରୀ, ବୋଟ ଆସୋସିଏସନର କାର୍ଯ୍ୟକର୍ତ୍ତା ଓ ସ୍ବେଚ୍ଛାସେବୀ ସାମିଲ ହୋଇଛନ୍ତି । ଗତବର୍ଷ ଚିଲିକାରେ ମୋଟ ୧୭୩ଟି ଡ଼ଲଫିନ ଠାବ ହୋଇଥିବା ବେଳେ, ଏଥିରୁ ୧୫୪ଟି ଏରାଓ୍ବାଡି ପ୍ରଜାତିର ଏବଂ ୧୯ଟି ବଟଲ ନୋଜ ପ୍ରଜାତିର ଡଲଫିନ ଥିଲେ । …

ଅନ୍ୟପଟେ ଭିତରକନିକା ଜାତୀୟ ଉଦ୍ୟାନ ଓ ଗହୀରମଥାରେ ସାମୁଦ୍ରିକ ଅଭୟାରଣ୍ୟରେ ଆଜିଠାରୁ ଡଲଫିନ ଗଣନା ଆରମ୍ଭ ହୋଇଛି । ଆସନ୍ତା ୨୨ ତାରିଖ ପର୍ଯ୍ୟନ୍ତ ୩ଦିନ ଧରି ଚାଲିବ ଗଣତି । ବନବିଭାଗର ୯ଟି ଟିମ ଡଲଫିନ ଗଣତି କରୁଛନ୍ତି । ଧାମରା ମୁହାଁଣ ଠାରୁ ଦେବୀ ମୁହାଁଣ ଯାଏଁ ସମୁଦ୍ର ମଧ୍ୟରେ ଓ ଭିତରକନିକା ମଧ୍ୟରେ ଥିବା କ୍ରିକ୍ ଓ ନଦୀରେ ଏହି ଗଣନା ଚାଲିବ । ପ୍ରତ୍ୟେକ ଗଣନା ଟିମ ସଦସ୍ୟଙ୍କୁ ସହାୟତା ପାଇଁ ବୋଟ ସହିତ ବାଇନାକୁଲାର, ଜିପିଏସ, ହ୍ୟାଣ୍ଡସେଟ କ୍ୟାମେରା, ହ୍ୟାଣ୍ଡିକ୍ୟାମ ପ୍ରଭୃତି ଉପକରଣ ଯୋଗାଇ ଦିଆଯାଇଛି । ପୂର୍ବରୁ କେବଳ ଚିଲିକାରେ ଡଲ୍‌ଫିନ୍ ଗଣନା କରାଯାଉଥିଲା । ରାଜ୍ୟ ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତନ ବିଭାଗର ନିଷ୍ପତି କ୍ରମେ ୨୦୧୫ ମସିହାଠାରୁ ଭିତରକନିକା ଅଂଚଳରେ ଡଲ୍‌ଫିନ୍ ଗଣନା କରାଯାଉଛି । ପ୍ରତି ଗ୍ରୁପରେ ୩ ରୁ ୫ ଜଣ ଲେଖାଏଁ ଗଣାନାକାରୀ ରହିବେ । ସମୁଦ୍ର ମଧ୍ୟରେ ୫ଟି ଟିମ୍ ଓ ନଦୀ, କ୍ରୀକ୍‌ରେ ୪ଟି ଟିମ୍ ଡଲ୍‌ଫିନ୍ ଗଣନା କରିବେ । ଚିଲିକା ଅଂଚଳରେ କେବଳ ଏରାୱାଡି ପ୍ରଜାତିର ଡଲ୍‌ଫିନ୍ ଦେଖାଯାଆନ୍ତି । ମାତ୍ର ଭିତରକନିକାରେ ୫ ପ୍ରକାର ଡଲ୍‌ଫିନ୍ ଦେଖା ଯାଇଥାନ୍ତି । ଗତବର୍ଷ ଗଣନା ସମୟରେ ସାରା ଓଡିଶାରେ ୭୩୩ଟି ଡଲଫିନ ଚିହ୍ନଟ ହୋଇଥିବା ବେଳେ, ସେଥିମଧ୍ୟରୁ ଗହୀରମଥା ଓ ଭିତରକନିକାରେ ୫୫୦ଟି ଡଲଫିନ ଚିହ୍ନଟ ହୋଇଥିଲା ।

ଭୁବନେଶ୍ବର: ଆଜି ପବିତ୍ର ଶାମ୍ବଦଶମୀ । ପରମ୍ପରା ଅନୁଯାୟୀ ଆଜି ପ୍ରାତଃ କାଳରେ ଘରେ ଘରେ ସୂର୍ଯ୍ୟ ଦେବତାଙ୍କୁ ପୂଜା କରାଯାଇଛି । ନିଜ ପରିବାରକୁ ନିରୋଗ ରଖିବା ପାଇଁ ପ୍ରାତଃ, ମଧ୍ୟାହ୍ନ ଓ ଅପରାହ୍ନରେ ଲୋକେ ସକଳ ଶକ୍ତିର ଆଧାର ସୂର୍ଯ୍ୟ ଦେବତାଙ୍କୁ ଆଜି ପୂଜା କରିଥାନ୍ତି । ସାମ୍ବଦଶମୀ ଅବସରରେ ଅର୍କକ୍ଷେତ୍ର କୋଣାର୍କରେ ଆପ୍ରସିଦ୍ଧ ସୂର୍ଯ୍ୟ ରଥ ବାହାରିବାର ପରମ୍ପରା ରହିଛି । କଥିତ ଅଛି, ଅର୍କକ୍ଷେତ୍ର କୋଣାର୍କରେ ଶ୍ରୀକୃଷ୍ଣଙ୍କ ପୁତ୍ର ଶାମ୍ବ ଉପାସନା କରି ଦୁରାରୋଗରୁ ମୁକ୍ତି ପାଇଥିଲେ । ଏଠାରେ ଥିବା ଅନନ୍ତ ଅବଧୂତ ମଠ ଠାରୁ ଚନ୍ଦ୍ରଭଗା ପର୍ଯ୍ୟନ୍ତ ସୂର୍ଯ୍ୟ ରଥ ଯାତ୍ରା କରିବ । ରଥ ଉପରେ କାକରା, ବରା ଓ ପୋଡପିଠା ଲାଗି କରାଯିବ । ରଥ ୨୭ ଦିନ ପର୍ଯ୍ୟନ୍ତ ଚନ୍ଦ୍ରଭାଗାରେ ରହିବା ପରେ ୨୭ ନକ୍ଷତ୍ରରେ ପୂଜାର୍ଚ୍ଚନା କରାଯାଇ ମାଘ ସପ୍ତମୀରେ ବାହୁଡା ଯାତ୍ରା ଅନୁଷ୍ଠିତ ହେବ ।

ବରଗଡ଼: ଆସନ୍ନ ଯୁଦ୍ଧକୁ ନେଇ ପ୍ରସ୍ତୁତି ଆରମ୍ଭ କରିଛନ୍ତି କଂସ ମହାରାଜା । ବାଳକୃଷ୍ଣଙ୍କୁ ମାରିବାକୁ ପଠାଇଥିବା ସମସ୍ତ ଅସୁରଙ୍କୁ ଗୋଟି ଗୋଟି କରି ବଧ କରିଛନ୍ତି ବେନିଭାଇ ।  ଆଜି ବରଗଡ଼ ଧନୁଯାତ୍ରାର ଷଷ୍ଠ ଦିନରେ ଆସନ୍ନ ଯୁଦ୍ଧ ପାଇଁ ରାଜପରିଷଦ ସହ ମନ୍ତ୍ରଣା କରିବେ ମଥୁରା ଅଧିପତି । ଏହାସହ ତଥାକଥିତ ଅଧିକାରୀଙ୍କ ସହ ଆଲୋଚନା କରିବେ । କୃଷ୍ଣଙ୍କୁ ନେଇ ମଥୁରାବାସୀଙ୍କ ମନରେ ଭକ୍ତିଭାବ ସୃଷ୍ଟି ହୋଇଛି । କଂସର ତାଡନାରୁ ମୁକ୍ତି ପାଇଁ ନିଜ ତ୍ରାଣକର୍ତ୍ତା ଶ୍ରୀକୃଷ୍ଣଙ୍କ ଆସିବା ବାଟକୁ ଚାହିଁ ରହିଛନ୍ତି ମଥୁରାବାସୀ । ଏହାଦେଖି ଭୟଭୀତ କଂସ । ତେଣୁ ନିଜର ଭୟ ଲୁଚାଇବାକୁ ରଙ୍ଗସଭାରେ ନୃତ୍ୟଗୀତ ଆୟୋଜନ କରିଛନ୍ତି ମହାରାଜ । ସେପଟେ ଗୋପରେ କୃଷ୍ଣ ପ୍ରେମରେ ରଙ୍ଗାୟିତ ହୋଇଛନ୍ତି ଗୋପୀ ଗୋପାଙ୍ଗନା । ଆଜି ଗୋପରେ ଗୋପୀଙ୍କ ଦଧିବିକା ଓ ବସ୍ତ୍ର ହରଣ ଦୃଶ୍ୟ ଅଭିନିତ ହେବ । ଯାତ୍ରାର ପଞ୍ଚମ ଦିନରେ ଜାମଳାର୍ଜୁନଙ୍କୁ ଉଦ୍ଧାର କରିବା ସହ କାଳୀୟ ନାଗର ଗର୍ବ ଖଣ୍ଡନ କରି କାଳୀୟ ଦଳନ କରିଛନ୍ତି ଭଗବାନ ଶ୍ରୀକୃଷ୍ଣ । ଏହାସହ ମାଟି ଖାଇ ବିଶ୍ବରୂପ ଦର୍ଶନ କରାଇଛନ୍ତି ।