ଭୁବନେଶ୍ବର: ରାଜ୍ଯରେ ବଢୁଛି ଗ୍ରୀଷ୍ମ ପ୍ରବାହ। ଏହାକୁ ଦୃଷ୍ଟିରେ ରଖି ସ୍କୁଲରେ ଛାତ୍ରଛାତ୍ରୀଙ୍କୁ ଦିଆଯିବ ହିଟ୍ ୱେଭ ମୁକାବିଲା ଟିପ୍ସ । ଗଣଶିକ୍ଷା ବିଭାଗ ଏ ନେଇ ସବୁ ଜିଲ୍ଲାପାଳ, ଶିକ୍ଷାଧିକାରୀଙ୍କୁ ଚିଠି ଲେଖିଛି । ସବୁ ଶିକ୍ଷାନୁଷ୍ଠାନ ପାଇଁ ମଧ୍ଯ ମାର୍ଗଦର୍ଶିକା ଜାରି କରିଛି ଗଣଶିକ୍ଷା ବିଭାଗ । ପାନୀୟ ଜଳ ଓ ORS ଗଚ୍ଛିତ ରଖିବାକୁ ନିର୍ଦ୍ଦେଶ ଦେବା ସହିତ ଆଉଟଡୋର କାର୍ଯ୍ୟକଳାପ ଉପରେ କଟକଣା ଲାଗୁ କରାଯାଇଛି । ସ୍କୁଲ, କଲେଜ ଯିବା ବେଳେ ପାଣି ବୋତଲ ନେବାକୁ ପରାମର୍ଶ ରହିଛି । ଏଥିପାଇଁ ଅଭିଭାବକ ସଚେତନ ରହିବାକୁ ନିବେଦନ କରାଯାଇଛି ।
ଇଶାନ- ଶ୍ରେୟସଙ୍କ ଘଟଣାରେ ମୁହଁ ଖୋଲିଲେ ରିଦ୍ଧିମାନ
ନନ୍ଦିଘୋଷ ବ୍ୟୁରୋ: ବିସିସିଆଇ ନିକଟରେ ଘୋଷଣା କରିଥିବା ସେଣ୍ଟ୍ରାଲ କଣ୍ଟ୍ରାକ୍ଟରୁ ବାଦ୍ ପଡ଼ିଛନ୍ତି ଇଶାନ କିଶାନ ଏବଂ ଶ୍ରେୟସ ଆୟାର । ସେମାନେ ରଣଜୀ ଖେଳିବାକୁ ମନା କରିବା ପରେ ଏଭଳି କଠୋର ନିଷ୍ପତ୍ତି ନିଆଯାଇଥିବା କୁହାଯାଉଛି । ତେବେ ଏହି ଘଟଣାକୁ ନେଇ ଚର୍ଚ୍ଚା ଜୋର ଧରିଥିବାବେଳେ ଦୀର୍ଘଦିନ ଧରି ଟିମ ଇଣ୍ଡିଆରୁ ବାହାରେ ଥିବା ଓ୍ବିକେଟକିପର ବ୍ୟାଟ୍ସମ୍ୟାନ୍ ରିଦ୍ଧିମାନ ଶାହା ମୁହଁ ଖୋଲିଛନ୍ତି । ସେ କହିଛନ୍ତି କି, ରଣଜୀ ଖେଳିବାକୁ ସେମାନଙ୍କୁ କାହିଁକି ଦବରଦସ୍ତି କରାଯାଉଛି । ଯଦି ଜଣେ ଖେଳାଳି ଚାହୁଁନି ତାଙ୍କୁ କାହିଁକି ଜବରଦସ୍ତି କରାଯାଉଛି । ଯଦିଓ ପ୍ରଥମ ଶ୍ରେଣୀ କ୍ରିକେଟ ଜଣେ ଖେଳାଳିଙ୍କ କ୍ୟାରିୟରରେ ବହୁତ ପ୍ରଭାବ ପକାଇଥାଏ । ତଥାପି ତାହା ତାଙ୍କ ବ୍ୟକ୍ତିଗତ ବ୍ୟାପାର ।
ଶାହା ଉଦାହରଣ ଦେଇ କହିଛନ୍ତି କି, ମୁଁ ଯେତେବେଳେ ଫିଟ୍ ରହେ ସେତେବେଳେ ପ୍ରତ୍ୟେକ ମ୍ୟାଚକୁ ଗୁରୁତ୍ବ ଦିଏ । ସେ କ୍ଲବ ମ୍ୟାଚ ହେଉ ବା ଅଫିସ କିମ୍ବା ଆନ୍ତର୍ଜାତୀୟ ମ୍ୟାଚ୍ । ତେବେ କିଏ କେଉଁ ମ୍ୟାଚକୁ କେଉଁଭଳି ଭାବେ ତାହା ତାଙ୍କ ଉପରେ ନିର୍ଭର କରେ । କିନ୍ତୁ ପ୍ରତ୍ୟେକ ମ୍ୟାଚକୁ ଗୁରୁତ୍ବର ସହ ନେବା ଉଚିତ । ଯାହାକି କ୍ୟାରିୟରରେ ବହୁ ଉପରକୁ ନେବାରେ ସହାୟକ ହେବ । କହି ରଖୁଛୁ କି, ଓ୍ବେଷ୍ଟବେଙ୍ଗଲ ପାଇଁ ଏବେ ଘରୋଇ କ୍ରିକେଟ ଖେଳୁଛନ୍ତି ରିଦ୍ଧିମାନ ଶାହା । ସେ ଆଇପିଏଲରେ ଗୁଜୁରାଟ ପକ୍ଷରୁ ଖେଳୁଥିବାବେଳେ ପୂର୍ବରୁ ପଞ୍ଜାବ, କୋଲକାତା ପକ୍ଷରୁ ମଧ୍ୟ ଖେଳିସାରିଛନ୍ତ । ପାଳି ଆରମ୍ଭରୁ ବଡ଼ ବଡ଼ ସଟ ଖେଳିବାରେ ମଧ୍ୟ ମାହିର ଶାହା ।
ଆଜି ୧୧୫୨ ନୂଆ ଅଧ୍ଯାପକ, ଅଫିସର ଓ କର୍ମଚାରୀଙ୍କୁ ନିଯୁକ୍ତି ମିଳିଛି
ଭୁବନେଶ୍ୱର: ଅଧ୍ଯାପକ, ଅଫିସର ଓ ଷ୍ଟାଫ ନିଯୁକ୍ତି । ଆଜି ୧୧୫୨ ନୂଆ ଅଧ୍ଯାପକ, ଅଫିସର ଓ କର୍ମଚାରୀଙ୍କୁ ନିଯୁକ୍ତି ମିଳିଛି । ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ସମସ୍ତଙ୍କୁ ନିଯୁକ୍ତି ପତ୍ର ବଣ୍ଟନ କରିଛନ୍ତି । ଯେଉଁଥିରେ ରହିଛନ୍ତି ୯୭୭ ଅଧ୍ଯାପକ, ୮୭ ଗ୍ରାମ ପଞ୍ଚାୟତ ଉନ୍ନୟନ ଅଫିସର, ୫୭ ସମବାୟ ସମିତି ନିରୀକ୍ଷକ, ସୂଚନା ଓ ଲୋକ ସଂପର୍କର ୩୧ ଜଣ କର୍ମଚାରୀ । ନିଜ ନିଜ ଚାକିରି କ୍ଷେତ୍ରରେ 5T ଉପକ୍ରମରେ ଲୋକଙ୍କ ସେବା କରିବାକୁ ଏହି ଅବସରରେ ଆହ୍ବାନ ଦେଇଛନ୍ତି ମୁଖ୍ଯମନ୍ତ୍ରୀ । ନୂଆ ଅଧ୍ଯାପକ ଓ ଅଫିସରଙ୍କ ପ୍ରତିଭା, ପ୍ରତିଶ୍ରୁତି ଓ କଠିନ ପରିଶ୍ରମ ନିଜ ଚାକିରି କ୍ଷେତ୍ରରେ ଅଧିକ ଫଳବତୀ ହୋଇପାରିବ।
5T ଉପକ୍ରମରେ ସରକାର ସବୁ କ୍ଷେତ୍ରରେ ବିକାଶ କାମକୁ ଆଗେଇ ନେଉଛନ୍ତି । 5T ଉପକ୍ରମ ଦ୍ବାରା ଉନ୍ନତିମୂଳକ ପ୍ରକଳ୍ପ ସ୍ବଚ୍ଛତାର ସହ କରାଯାଉଛି। ପ୍ରତ୍ଯେକ କ୍ଷେତ୍ରରେ ସମସ୍ତଙ୍କୁ ଏହା ସଶକ୍ତ କରିବା ଉପାନ୍ତରେ ଥିବା ଶେଷ ଲୋକ ପାଖରେ ସରକାର ପହଞ୍ଚିପାରିଛନ୍ତି । ତେଣୁ ନିଷ୍ଠାର ସହ କାମ କରି ରାଜ୍ଯର ଉନ୍ନତିରେ ଭାଗୀଦାର ହେବାକୁ ମୁଖ୍ଯମନ୍ତ୍ରୀ ନବ ନିଯୁକ୍ତଙ୍କୁ ପରାମର୍ଶ ଦେଇଛନ୍ତି ।
ବାଚସ୍ପତିଙ୍କ ଦ୍ଵାରା ଅଯୋଗ୍ୟ ଘୋଷିତ ୬ କଂଗ୍ରେସ ବିଧାୟକ ହାଇକୋର୍ଟଙ୍କ ଦ୍ବାରସ୍ଥ
ନୂଆଦିଲ୍ଲୀ: ହିମାଚଳ ରାଜନୀତିରେ ତେଜିଲା ବିବାଦ। ବାଚସ୍ପତିଙ୍କ ଦ୍ଵାରା ଅଯୋଗ୍ୟ ଘୋଷିତ ୬ କଂଗ୍ରେସ ବିଧାୟକ ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି। ବାଚସ୍ପତିଙ୍କ ନିଷ୍ପତ୍ତିକୁ ଚ୍ଯାଲେଞ୍ଜ କରି ଉଚ୍ଚ ନ୍ୟାୟାଳୟଙ୍କ ଦ୍ଵାରସ୍ଥ ହୋଇଛନ୍ତି ୬ ବିଧାୟକ। କଂଗ୍ରେସର ୬ ବିଧାୟକ ସୁଧୀର ଶର୍ମା, ରବି ଠାକୁର, ରାଜିନ୍ଦର ରାଣା, ଇନ୍ଦର ଦତ୍ତ ଲଖନପାଲ, ଚେତନ୍ଯ ଶର୍ମା ଓ ଦେବିନ୍ଦର କୁମାର ଭୁଟ୍ଟୋଙ୍କୁ ଦଳ ବିରୋଧୀ କାର୍ଯ୍ୟଲାଗି ଅଯୋଗ୍ୟ ଘୋଷଣା କରିଛନ୍ତି ବାଚସ୍ପତି।
ନିକଟରେ ରାଜ୍ୟସଭା ନିର୍ବାଚନରେ ଦଳୀୟ ହ୍ଵିପକୁ ଉଲ୍ଲଂଘନ କରି ବିରୋଧୀ ସଦସ୍ଯଙ୍କୁ ଦେଇଥିଲେ ଭୋଟ। ଆର୍ଥିକ ବିଲ୍ ଆଗତବେଳେ ମଧ୍ଯ କଂଗ୍ରେସ ସଦସ୍ୟ ଗୃହରେ ଅନୁପସ୍ଥିତ ଥିଲେ। ଏହାକୁ ନେଇ ବାଚସ୍ପତି କୁଲଦୀପ ସିଂ ୬ କଂଗ୍ରେସ ବିଧାୟକଙ୍କୁ ନିଲମ୍ବିତ କରିଛନ୍ତି। ତେବେ ଦଳ ମଧ୍ଯରେ ଥିବା ବିଧିବ୍ୟବସ୍ଥାକୁ ଉଲ୍ଲଂଘନ କରି କଂଗ୍ରେସ ବିଧାୟକଙ୍କ ସଭ୍ୟପଦ ରଦ୍ଦ ହୋଇଥିବା ଅଭିଯୋଗ କରିଛନ୍ତି ବିଧାୟକ।
ଏହା ପୂର୍ବରୁ ଗତକାଲି କଂଗ୍ରେସର ୬ ବିଦ୍ରୋହୀ ନିଷ୍କାଷିତ ବିଧାୟକଙ୍କ ସହ ଆଲୋଚନା କରିଥିଲେ ଦଳର ବରିଷ୍ଠ ନେତା। ବିଦ୍ରୋହୀ ୬ କଂଗ୍ରେସ ବିଧାୟକଙ୍କ ସଭ୍ୟପଦ ରଦ୍ଦ ପରେ ସେମାନଙ୍କୁ ଉତ୍ତର ରଖିବାକୁ ସମୟ ଦିଆଯାଇନଥିଲା ବୋଲି ବିଦ୍ରୋହୀଙ୍କ ପକ୍ଷ ଓକିଲ କହିଛନ୍ତି। ବିଧାୟକଙ୍କ ସଭ୍ୟପଦ ରଦ୍ଦ ପରେ ହିମାଚଳପ୍ରଦେଶରେ ଧରମଶାଳା, ଲାହୋଲ, ସ୍ପିତି, ସୁଜନପୁର, ଗାଗ୍ରେଟ ଏବଂ କୁଟଲେହର ବିଧାୟକ ପଦ ଖାଲି ହୋଇଛି। ବିଧାୟକଙ୍କ ସଭ୍ୟପଦ ରଦ୍ଦ ପରେ ହିମାଚଳ ପ୍ରଦେଶ ବିଧାନସଭାରେ ମୋଟ ଆସନ ସଂଖ୍ଯା ୬୮ ରୁ ୬୨କୁ ଖସି ଆସିଛି। ସେହିପରେ କଂଗ୍ରେସ ବିଧାୟକଙ୍କ ସଂଖ୍ଯା ୪୦ରୁ ୩୪କୁ ଖସିଛି। ବିଜେପି ବିଧାୟକଙ୍କ ସଂଖ୍ଯା ୨୫ ରହିଛି। କଂଗ୍ରେସ ବିଧାୟକଙ୍କ ବିଦ୍ରୋହ ପରେ ମଧ୍ଯ ସରକାର ପ୍ରତି କୌଣସି ବିପଦ ନଥିବା କହିଛନ୍ତି ଦଳର ବରିଷ୍ଠ ନେତା।
ମୃତ୍ଯୁ ପରେ ବି ଅମର: ନିଜେ ଦୁନିଆ ଛାଡ଼ିଗଲେ, କିନ୍ତୁ ଦୁଇ ଜଣଙ୍କ ଜୀବନ ବଞ୍ଚାଇଦେଲେ
ବ୍ୟୁରୋ ରିପୋର୍ଟ: ନିଜେ ଦୁନିଆ ଛାଡ଼ିଗଲେ, କିନ୍ତୁ ଅନ୍ୟ ଦୁଇ ଜଣଙ୍କ ଜୀବନ ବଞ୍ଚାଇଦେଲେ । କେନ୍ଦ୍ରାପଡ଼ା ଡିଲ୍ଲା ପଟ୍ଟାମୁଣ୍ଡାଇ ବ୍ଲକ ନୟାକୋଟ ଗାଁର ଯୁକ୍ତଦୁଇ ଛାତ୍ର ଶ୍ରୀଓମ୍ ଶିବୁଙ୍କ ବ୍ରେନ୍ ଡେଡ୍ ପରେ ତାଙ୍କର ଦୁଇଟି ଯାକ କିଡନୀ ଦାନ କରିଛନ୍ତି ପରିବାର। ବ୍ରେନ୍ ଟ୍ୟୁମରରେ ପୀଡ଼ିତ ହୋଇ ଦେଢ଼ ମାସ ଧରି କଟକ ଏସସିବିରେ ମେଡିକାଲରେ ସେ ଚିକିତ୍ସାଧୀନ ଥିଲେ। ଚିକିତ୍ସାଧୀନ ଅବସ୍ଥାରେ ଗତକାଲି ଶ୍ରୀଓମ ଶିବୁଙ୍କର ବ୍ରେନ୍ ଡେଡ୍ ହୋଇ ଯାଇଥିଲା। ଏହାପରେ ତାଙ୍କ ବାପା, ମାଆ ଓ ପରିବାର ଲୋକ ଶ୍ରୀଓମ ଶିବୁଙ୍କ ଅଙ୍ଗଦାନ କରିବା ପାଇଁ ନିଷ୍ପତ୍ତି ନେଇଥିଲେ। ଆଜି ମୂତ୍ରରୋଗ ଶଲ୍ୟ ଚିକିତ୍ସା ଓ ବୃକକ୍ ପ୍ରତିରୋପଣ ବିଭାଗରେ ତାଙ୍କର ଦୁଇଟି କିଡନୀକୁ ସଫଳତାର ସହ ବାହାର କରାଯାଇ ଅନ୍ୟ ଦୁଇ ଜଣଙ୍କ ଶରୀରରେ ପ୍ରତିରୋପଣ ପାଇଁ ବ୍ୟବସ୍ଥା କରାଯାଇଛି । ଗୋଟିଏ କିଡିନୀ କଟକ ଏସସିବି ମେଡିକାଲ ଏବଂ ଆଉ ଗୋଟିଏ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ପଠାଯାଇଛି ।
ଅନ୍ୟପଟେ କଟକ ବଡ଼ ମେଡିକାଲରେ ନିଶ୍ଚିନ୍ତକୋଇଲି ବଡ଼କ୍ଷୀର ଗ୍ରାମର ମଳୟ କୁମାର ସାମଲଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ଯୁ ହୋଇଥିଲା। ତାଙ୍କ ପରିବାର ସଦସ୍ୟ ମଳୟଙ୍କ ଚକ୍ଷୁଦାନ ପାଇଁ ଆଇବ୍ୟାଙ୍କ୍ ସହିତ ଯୋଗାଯୋଗ କରିଥିଲେ। ମଳୟଙ୍କ ଚକ୍ଷୁଦାନ କରାଯାଇଛି। ମଳୟ ସିନା ଆରପାରିକୁ ଚାଲିଗଲେ, ହେଲେ ତାଙ୍କ ଆଖିରେ ଆଉ ଦୁଇଜଣ ଦୃଷ୍ଟିହୀନ ଦୁନିଆ ଦେଖିପାରିବେ। ଏଥିପାଇଁ ସମସ୍ତେ ମଳୟଙ୍କ ପରିବାରକୁ ପ୍ରଶଂସା କରିଛନ୍ତି।
ମେ’ ମାସରୁ ରାଜ୍ଯ ସରକାର ଗଣିବେ କଲରାପତରିଆ ବାଘ
ଭୁବନେଶ୍ୱର: ମେ’ ମାସରୁ ରାଜ୍ଯ ସରକାର ଗଣିବେ କଲରାପତରିଆ ବାଘ । ନିଜସ୍ବ ଉଦ୍ଯମରେ ହାତୀ ଗଣନା ସହ ଏକକାଳୀନ କଲରାପତରିଆ ବାଘ ଗଣନା କରିବେ ରାଜ୍ୟ ସରକାର । ଏ ନେଇ ବନ୍ୟପ୍ରାଣୀ ପିସିସିଏଫ୍ ସୁଶାନ୍ତ ନନ୍ଦ ସୂଚନା ଦେଇଛନ୍ତି । ସେଥିପାଇଁ NTCA ରିପୋର୍ଟକୁ ତର୍ଜମା କରାଯାଉଛି। ତେବେ ସେଥିରେ କିଛି ତ୍ରୁଟି ଥିବା ଜଣାପଡ଼ିଛି । ତେଣୁ ଏହାକୁ ରାଜ୍ୟ ସ୍ତରରେ ସଂଶୋଧନ କରାଯିବ।
ପ୍ରଥମତଃ ଏହା NTCAର ଏକ ଆକଳନ ରିପୋର୍ଟ । ଦ୍ଵିତୀୟରେ ୨୦୨୨ରେ ସେମାନେ ମାତ୍ର ୩ଟି ସ୍ଥାନରେ କ୍ୟାମେରା ଟ୍ରାପ୍ ଲଗାଇଥିଲେ। ତେବେ ୨୦୧୮ ଆକଳନ ବେଳେ ୧୪ ଜାଗାରେ କ୍ୟାମେରା ଟ୍ରାପ ଲାଗିଥିଲା । ଯେଉଁଥିରୁ ସେମାନେ ୭୬୦ କଲରାପତରିଆ ଥିବା ଜାଣିବାକୁ ପାଇଥିଲେ। ତେବେ ୨୦୨୨ରେ ଶିମିଳିପାଳ ଓ ସାତକୋଶିଆରେ କଲରାପତରିଆ ସଂଖ୍ୟା ବଢ଼ିଥିବା ରାଜ୍ୟ ପାଇଁ ଖୁସି ଖବର। NTCAର କଲରାପତରିଆ ଆକଳନ ରିପୋର୍ଟ ଗ୍ରହଣୀୟ। କିନ୍ତୁ ସେମାନେ ବହୁତ କମ ଅଞ୍ଚଳରେ କ୍ୟାମେରା କଭର କରିଥିବାରୁ ଆକଳନ ନେଇ ସହମତ ହୋଇପାରିନାହୁଁ ବୋଲି ପିସିସିଏଫ କହିଛନ୍ତି।
ବ୍ରହ୍ମପୁର ବିଶ୍ଵବିଦ୍ଯାଳୟ ସମାବର୍ତ୍ତନ ଉତ୍ସବରେ ରାଷ୍ଟ୍ରପତିଙ୍କ ଉଦବୋଧନ
ବ୍ରହ୍ମପୁର : ବ୍ରହ୍ମପୁର ବିଶ୍ଵବିଦ୍ଯାଳୟ ସମାବର୍ତ୍ତନ ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ବ୍ରହ୍ମପୁର ବିଶ୍ଵବିଦ୍ୟାଳୟର ୨୫ତମ ସମାବର୍ତ୍ତନ ଉତ୍ସବରେ ଯୋଗ ଦେଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ବିଶ୍ଵବିଦ୍ୟାଳୟର ବିଜୁ ପଟ୍ଟନାୟକ ଅଡିଟୋରିୟମରେ ଆୟୋଜିତ ହୋଇଛି ସମାବର୍ତ୍ତନ ଉତ୍ସବ। ଏହି ଅବସରରେ କୃତି ଛାତ୍ରଛାତ୍ରୀଙ୍କୁ ସ୍ଵର୍ଣ୍ଣପଦକ ପ୍ରଦାନ କରିଥିଲେ ରାଷ୍ଟ୍ରପତି।
ସମାବର୍ତ୍ତନ ଉତ୍ସବରେ ଛାତ୍ରଛାତ୍ରୀଙ୍କୁ ଉଦବୋଧନ ଦେଇଥିଲେ ରାଷ୍ଟ୍ରପତି। ୧୯୬୭ରେ ସ୍ଥାପିତ ବ୍ରହ୍ମପୁର ବିଶ୍ଵବିଦ୍ଯାଳୟ ଗୁଣାତ୍ମକ ଶିକ୍ଷା ପ୍ରଦାନ କରିଆସୁଛି। ବିଭିନ୍ନ କ୍ଷେତ୍ରରେ ମହିଳାମାନେ ପାରଦର୍ଶିତା ଅର୍ଜନ କରିଛନ୍ତି। ବିଜ୍ଞାନଠାରୁ ଆରମ୍ଭ କରି ସେନାବାହିନୀ ପର୍ଯ୍ୟନ୍ତ ନିଜର ଦକ୍ଷତା ପ୍ରଦର୍ଶନ କରିଛନ୍ତି। ପ୍ରତ୍ଯେକ କ୍ଷେତ୍ରରେ ମହିଳାମାନେ ନେତୃତ୍ଵ ନେଉଛନ୍ତି। ମହିଳାଙ୍କ ଆତ୍ମବିଶ୍ଵାସ ଓ ସୃଜଶୀଳତାରେ ଖୁସି ପ୍ରକାଶ କରିଛନ୍ତି ରାଷ୍ଟ୍ରପତି। ଦେଶର ଉନ୍ନତି କରିବାକୁ ହେଲେ ମହିଳାଙ୍କୁ ସଶକ୍ତ କରିବାକୁ ପଡିବ। ସମାଜର ବିକାଶ ପାଇଁ ଉଭୟ ନାରୀ ଓ ପୁରୁଷଙ୍କ ଗୁରୁତ୍ଵପୂର୍ଣ୍ଣ ଭୂମିକା ରହିଛି। ସମାବର୍ତ୍ତନ ଉତ୍ସବ କେବଳ ପ୍ରମାଣପତ୍ର ନୁହେଁ ସାଧନାର ଉତ୍ସବର ବୋଲି କହିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ସମାଜ କଲ୍ଯାଣରେ ନିଜର ଜ୍ଞାନର ଉପଯୋଗ କରିବାକୁ ସେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ। ନିଜ କଥା ସହ ଦେଶର ଉନ୍ନତି ବିଷୟରେ ଭାବିବା ଆବଶ୍ଯକ ବୋଲି କହିଛନ୍ତି ରାଷ୍ଟ୍ରପତି।
ବହ୍ମପୁର ବିଶ୍ଵବିଦ୍ୟାଳୟ କାର୍ଯ୍ୟକ୍ରମ ପରେ ସେଠାରୁ ବାହାରି ରାଷ୍ଟ୍ରପତି ଭୁବନେଶ୍ୱର ବିମାନ ବନ୍ଦରରେ ପହଞ୍ଚିବେ। ରାଜଭବନରେ ମଧ୍ୟାହ୍ନ ଭୋଜନ କରିବା ପରେ ଅପରାହ୍ନ ୩ଟା ୫୦ରେ କଟକ ଇନଡୋର ଷ୍ଟାଡିୟମରେ ବ୍ରହ୍ମାକୁମାରୀ ଇଶ୍ଵରୀୟ ବିଶ୍ଵବିଦ୍ୟାଳୟର ସୁବର୍ଣ୍ଣ ଜୟନ୍ତୀ ସମାରୋହରେ ସାମିଲ ହେବେ।
ଜେଏନୟୁରେ ଛାତ୍ର ସଂଘର୍ଷ, ଗଣ୍ଡଗୋଳରେ ବହୁ ଛାତ୍ର ଆହତ
ବ୍ୟୁରୋ ରିପୋର୍ଟ: ଜେଏନୟୁରେ ଛାତ୍ର ସଂଘର୍ଷ। ଜେଏନୟୁ କ୍ୟାମ୍ପସରେ ଏବିଭିପି ଓ ବାମପନ୍ଥୀ ଗୋଷ୍ଠୀର ଛାତ୍ରଙ୍କ ମଧ୍ୟରେ ସଂଘର୍ଷ ହୋଇଛି। ଗଣ୍ଡଗୋଳରେ ବହୁ ଛାତ୍ର ଆହତ ହୋଇଥିବା ସୂଚନା ମିଳିଛି। ଆହତ ଛାତ୍ରମାନଙ୍କୁ ସଫଦରଜଙ୍ଗ ହସ୍ପିଟାଲରେ ଭର୍ତ୍ତି କରାଯାଇଛି। ଗୁରୁବାର ରାତିରେ ଜବାହରଲାଲ ନେହରୁ ବିଶ୍ୱବିଦ୍ୟାଳୟ କ୍ୟାମ୍ପସର ଭାଷା ଅନୁଷ୍ଠାନ ବିଭାଗରେ ନିର୍ବାଚନ କମିଟି ସଦସ୍ୟ ଚୟନରେ ଉତ୍ତେଜନା ସୃଷ୍ଟି ହୋଇଥିଲା। ଛାତ୍ରମାନେ ପାଟିତୁଣ୍ଡ କରିବା ସହ ଭଙ୍ଗାରୁଜା କରିଥିଲେ। ଗଣ୍ଡଗୋଳର ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଗଣ୍ଡଗୋଳ ସମୟର ଏକାଧିକ ଭିଡିଓ ସାମ୍ନାକୁ ଆସିଛି।
ଭିଡ଼ିଓରେ ଲାଠିରେ ଛାତ୍ରଙ୍କୁ ମାଡ଼ ମାରୁଥିବା ଦେଖିବାକୁ ମିଳିଛି। କିଏ ସାଇକେଲ ଉଠାଇ ଛାତ୍ରଙ୍କୁ ମାରୁଛି ତ ଅନ୍ୟ ଭିଡ଼ିଓରେ ଛାତ୍ରଙ୍କୁ ବିଶ୍ବବିଦ୍ୟାଳୟର ସୁରକ୍ଷାକର୍ମୀ ବଞ୍ଚାଉଥିବା ମଧ୍ୟ ଦେଖିବାକୁ ମିଳିଛି। ଗୋଷ୍ଠୀ ସଂଘର୍ଷରେ ବହୁ ଛାତ୍ର ଲହୁଲୁହାଣ ହୋଇଛନ୍ତି। ଏବିଭିପି ଓ ବାମପନ୍ଥୀ ଛାତ୍ର ପରସ୍ପର ବିରୋଧରେ ଅଭିଯୋଗ କରିଛନ୍ତି। ଏନେଇ ବିଶ୍ବବିଦ୍ୟାଳୟ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। କିମ୍ବା ଆହତ ଛାତ୍ରଙ୍କ ସମ୍ପର୍କରେ କୌଣସି ସୂଚନା ଦେଇନାହିଁ ବିଶ୍ବବିଦ୍ୟାଳୟ।
ହସ୍ପିଟାଲ ନମ୍ବରକୁ ଫୋନ କଲେ ଆକାଉଣ୍ଟରୁ କଟୁଛି ଟଙ୍କା
ଭୁବନେଶ୍ୱର: ହସ୍ପିଟାଲକୁ ଫୋନ କଲେ ଆକାଉଣ୍ଟରୁ କଟୁଛି ଟଙ୍କା। ଗୁଗୁଲ ସର୍ଚ୍ଚ କରି ହସ୍ପିଟାଲ ନମ୍ବରରେ କଲ୍ କଲେ ଆକାଉଣ୍ଟରୁ ଟଙ୍କା କଟୁଥିବା ଅଭିଯୋଗ ହୋଇଛି। ଏଭଳି ଠକେଇର ଶିକାର ହୋଇଛନ୍ତି ବାଲୁଗାଁର ଜଣେ ଯୁବକ। ସୂଚନା ଅନୁଯାୟୀ, ବାପାଙ୍କର ମୃତ୍ଯୁ ସାର୍ଟିଫିକେଟ୍ ପାଇବା ପାଇଁ ଯୁବକ ମେଡିକାଲକୁ ଫୋନ୍ କରିଥିଲେ। ଏହାପରେ ତାଙ୍କ ଆକାଉଣ୍ଟରୁ ଟଙ୍କା କଟିଥିଲା। ଏନେଇ ସେ ସାଇବର ଥାନାର ଦ୍ୱାରସ୍ଥ ହୋଇଛନ୍ତି।
ସେପଟେ ହସ୍ପିଟାଲ ନମ୍ବର ହ୍ୟାକ ହୋଇଥିବା କହିଛନ୍ତି ହସ୍ପିଟାଲ କର୍ତ୍ତୃପକ୍ଷ।
ଜଙ୍ଗଲରୁ ଗଛ କାଟିବାକୁ ବିରୋଧ କରିବାରୁ ଫରେଷ୍ଟ ଗାର୍ଡଙ୍କ ଉପରେ ଆକ୍ରମଣ
ବାରିପଦା: ଜଙ୍ଗଲରୁ ଗଛ କାଟିବାକୁ ବିରୋଧ କରିବାରୁ ଫରେଷ୍ଟ ଗାର୍ଡଙ୍କ ଉପରେ ଆକ୍ରମଣ ଅଭିଯୋଗ। ଏନେଇ ଏକ ଭିଜୁଆଲ ଭାଇରାଲ ହୋଇଛି। ବାରିପଦା ବନଖଣ୍ଡ ବାଙ୍ଗିରିପୋଷି ବନାଞ୍ଚଳରେ ଏହି ଘଟଣା ଘଟିଛି। ସୂଚନା ଅନୁଯାୟୀ, ବାଙ୍ଗିରିପୋଷି ରେଞ୍ଜ ଯୋକା ବିଟ୍ ସଂରକ୍ଷିତ ଶାଳବଣରେ କିଛି ଲୋକ ଗଛ କାଟୁଥିଲେ। ବୁଧିରାମ ସିଂ ନାମକ ଫରେଷ୍ଟ ଗାର୍ଡ ବିରୋଧ କରିବାରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଗଛ କାଟୁଥିବା ଲୋକମାନେ ଉତ୍ତ୍ୟକ୍ତ ହୋଇ ଫରେଷ୍ଟ ଗାର୍ଡ ବୁଧିରାମ ସିଂଙ୍କ ଉପରେ ଆକ୍ରମଣ କରିଥିବା ବନ ବିଭାଗ କହିଛି। ତେବେ ବର୍ତ୍ତମାନ ସୁଦ୍ଧା ଥାନାରେ ଏନେଇ କୌଣସି ଅଭିଯୋଗ ହୋଇନାହିଁ।
ବାଙ୍ଗିରିପୋଷି ଥାନାରେ ଅଭିଯୋଗ କରାଯିବ ବୋଲି ରେଞ୍ଜ ଅଧିକାରୀ କହିଛନ୍ତି। ତେବେ ଏହି ଘଟଣା ସମ୍ପର୍କରେ ଏକ ଭିଡିଓ ମୋବାଇଲରୁ ମୋବାଇଲରୁ ଘୂରି ବୁଲୁଛି।