ନୟାଗଡ଼: ଭିଜିଲାନ୍ସ ଜାଲରେ ନୟାଗଡ଼ ଏମଭିଆଇ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଏମଭିଆଇ ପଞ୍ଚାନନ ବେହେରାଙ୍କ ବାସଭବନରେ ଚଢ଼ାଉ କରିଛି ଭିଜିଲାନ୍ସ । ନୟାଗଡ ସହରର ଶ୍ରୀବିହାର ବାସଭବନରେ ଚଢ଼ାଉ ଜାରି ରହିଛି । ନୟାଗଡ଼ ଅଫିସ ଓ ଭଡା ଘର ସମେତ ଏକକାଳୀନ ୭ଟି ସ୍ଥାନରେ ଚଢ଼ାଉ ହୋଇଛି । ଭୁବନେଶ୍ବର ଶୈଳଶ୍ରୀବିହାରରେ ଦୁଇ ମହଲା କୋଠା, ପାଣ୍ଡରାରେ ଏକ ମହଲା କୋଠା ଠାବ ହୋଇଛି । ସେହିପରି ସାଲେପୁର ବାଲିଆପଦା ସ୍ଥିତ ପୈତୃକ ବାସଭବନ ସାଙ୍ଗକୁ ସମ୍ପର୍କୀୟ ଘରେ ମଧ୍ୟ ଚଢ଼ାଉ କରିଛି ଭିଜିଲାନ୍ସ । ଖାନତଲାସିରେ ୬ ଡି,ସପି, ୩ ଇନ୍ସପେକ୍ଟର ଓ ୮ ଏଏସଆଇଙ୍କ ସହ ଅନ୍ୟ ଅଧିକାରୀ ସାମିଲ ହୋଇଛନ୍ତି ।
ୟୁରିଆ ମିଶା ପକୁଡି ଖାଇ ୪ ଗୁରୁତର, ସୋଡା ଭାବି ପକାଇ ଦେଇଥିଲେ ସାର
ଗଜପତି: ୟୁରିଆ ମିଶା ପକୁଡି ଖାଇ ୪ ଗୁରୁତର । ଘଟଣା ଘଟିଛି ଗଜପତି କାଶୀନଗର ବ୍ଲକ ଏସ ବୁରୁଡି ଗାଁରେ । ଘରେ ପକୁଡି ତିଆରି କରିବା ବେଳେ ୟୁରିଆ ଗୁଣ୍ଡକୁ ସୋଡା ଭାବି ପକାଇ ଦେଇଥିଲେ ଘରର ବଡ଼ ଝିଅ । ପରିବାର ସଦସ୍ୟ ଖାଇବା ପରେ ଜଣେ ଶିଶୁ ସମେତ ପରିବାରର ଅନ୍ୟ ତିନି ସଦସ୍ୟ ଅସୁସ୍ଥ ହୋଇପଡିଥିଲେ । ସଙ୍ଗେ ସଙ୍ଗେ ଅସୁସ୍ଥ ୪ ଜଣଙ୍କୁ କାଶୀନଗର ଓ ପରେ ପାରଳାଖେମୁଣ୍ଡି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ଚିକିତ୍ସା ପରେ ସମସ୍ତଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ସୂଚନା ଅନୁସାରେ, ଜମିରେ ସାର ପକାଇବା ପରେ ବଳକା କିଛି ସାର ଗୁଣ୍ଡ ଏକ ଡବାରେ ରଖିଥିଲେ ବାପା । ହେଲେ ଗତକାଲି ସନ୍ଧ୍ୟାରେ ପକୁଡ଼ି ପ୍ରସ୍ତୁତ ପିଠଉରେ ଖାଇବା ସୋଡା ଭାବି ୟୁରିଆ ଗୁଣ୍ଡ ମିଶାଇ ପକୁଡ଼ି ପ୍ରସ୍ତୁତ କରିଥିଲେ ଘରର ବଡ଼ ଝିଅ । ଯାହାକୁ ଖାଇବା ପରେ ବେହୋସ୍ ହୋଇ ଅସୁସ୍ଥ ହୋଇ ପଡ଼ିଥିଲେ ପରିବାର ଲୋକେ ।
ବ୍ରହ୍ମପୁରରେ ଉତ୍ପାଦନ ହେବ ଆନ୍ଥ୍ରାକ୍ସ ଓଇଏନଟିଭି ଟିକା
ବ୍ରହ୍ମପୁର: ବ୍ରହ୍ମପୁରରେ ଉତ୍ପାଦନ ହେବ ଆନ୍ଥ୍ରାକ୍ସ ଓଇଏନଟିଭି ଟିକା । ଏନେଇ ଅତ୍ୟାଧୁନିକ ଜିଏମପି ଲାବୋରେଟୋରୀ ପ୍ରତିଷ୍ଠା ପାଇଁ ମତ୍ସ୍ୟ ଓ ପ୍ରାଣୀସଂପଦ ବିକାଶ ବିଭାଗ ଓ ରାଷ୍ଟ୍ରୀୟ ଦୁଗ୍ଧ ଉନ୍ନୟନ ବୋର୍ଡ ମଧ୍ୟରେ ଚୁକ୍ତିନାମା ସ୍ବାକ୍ଷରିତ । ଚୁକ୍ତିନାମା ସ୍ବାକ୍ଷରିତ ବେଳେ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ଉପସ୍ଥିତ ରହିଥିଲେ । ୩୬ ମାସ ମଧ୍ୟରେ ୫୨.୨ କୋଟି ଟଙ୍କା ବ୍ୟୟରେ ନିର୍ମାଣ ହେବ ଏହି ଅତ୍ୟାଧୁନିକ ଲାବୋରେଟୋରୀ । ବାର୍ଷିକ ୫୦ ଲକ୍ଷ ଆନ୍ଥ୍ରାକ୍ସ ଓ ୨ କୋଟି ଇ.ଏନ୍.ଟି.ଭି ଟିକା ଉତ୍ପାଦନ କରାଯିବାର ଲକ୍ଷ୍ୟ ରଖାଯାଇଛି ।
ଚୁକ୍ତିନାମାରେ ପ୍ରାଣୀପାଳନ ଓ ପାଣୀଚିକିତ୍ସା ନିର୍ଦ୍ଦେଶାଳୟର ନିର୍ଦ୍ଦେଶକ ରମାଶିଷ ହାଜରା ଓ ରାଷ୍ଟ୍ରୀୟ ଦୁଗ୍ଧ ଉନ୍ନୟନ ବୋର୍ଡର ସିନିୟର ଜେନେରାଲ୍ ମ୍ୟାନେଜର ସୁନୀଲ ସିହ୍ନା ସ୍ବାକ୍ଷର କରିଥିଲେ । ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟିସଂପନ୍ନ ପଦକ୍ଷେପ ଫଳରେ ରାଜ୍ୟ ସବୁକ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛି । ପ୍ରାଣୀପାଳନ ରାଜ୍ୟର ଚାଷୀମାନଙ୍କ ରୋଜଗାର ଓ ଆୟବୃଦ୍ଧି ଦିଗରେ ଏକ ପ୍ରମୁଖ ଭୂମିକା ଗ୍ରହଣ କରୁଛି । ଏହା ରାଜ୍ୟର ପ୍ରାଣୀସଂପଦ କଲ୍ୟାଣ କ୍ଷେତ୍ର୍ରରେ ଏକ ମାଇଲଖୁଣ୍ଟ ସାବ୍ୟସ୍ତ ହେବ ବୋଲି କହିଛି ମନ୍ତ୍ରୀ । କାର୍ଯ୍ୟକ୍ରମରେ ଉନ୍ନୟନ କମିଶନର ଅନୁ ଗର୍ଗ, ମତ୍ସ୍ୟ ଓ ପ୍ରାଣୀସଂପଦ ବିକାଶ ବିଭାଗର ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠ, ରାଷ୍ଟ୍ରୀୟ ଦୁଗ୍ଧ ଉନ୍ନୟନ ବୋର୍ଡର ବରିଷ୍ଠ ଜେନେରାଲ ମ୍ୟାନେଜର ସୁନୀଲ ସିହ୍ନା, ନାବାର୍ଡର ସିଜିଏମ୍ ସୁଧାଂଶୁ କେ. କେ. ମିଶ୍ର ପ୍ରମୁଖ ଉପସ୍ଥିତ ରହିଥିଲେ ।
ବାଂଲାଦେଶରେ ସରୁନି ଟେନସନ୍, ଶାନ୍ତିପୂର୍ଣ୍ଣ ଆନ୍ଦୋଳନ କରିବାକୁ ଆହ୍ବାନ ଦେଲା ବାଂଲାଦେଶ ନ୍ଯାସନାଲ ପାର୍ଟି
ଢାକା: ସରିଲା ବାଂଲାଦେଶ ନିର୍ବାଚନ। ମାତ୍ର ସରୁନି ଟେନସନ। ଆଜିଠାରୁ ସାରା ଦେଶରେ ଆଓ୍ବାମି ଲିଗ ବିରୋଧରେ ଶାନ୍ତିପୂର୍ଣ୍ଣ ଆନ୍ଦୋଳନ କରିବାକୁ ଆହ୍ବାନ ଦେଇଛି ବିରୋଧୀ ବାଂଲାଦେଶ ନ୍ଯାସନାଲ ପାର୍ଟି। ସରିଥିବା ନିର୍ବାଚନରେ କମ୍ ଭୋଟ ହାର ହୋଇଥିବାରୁ ଭୋଟ ବର୍ଜନର ପ୍ରଭାବ ପଡିଛି ବୋଲି କହିଛି ବିଏନପି ଓ ସହଯୋଗୀ ଦଳ। ଶାନ୍ତିପୂର୍ଣ୍ଣ ଆନ୍ଦୋଳନ ଜରିଆରେ ଜନଅଧିକାରକୁ ସାବ୍ଯସ୍ତ କରିବାକୁ ଦଳ ଉଦ୍ଯମ କରିବ ବୋଲି କହିଛନ୍ତି ବିଏନପି ନେତା।
ଦ୍ବାଦଶ ଜାତୀୟ ନିର୍ବାଚନରେ ବିଏନପି ସମେତ ଅନେକ ଦଳ ଭାଗ ନନେଇ ଭୋଟ ବର୍ଜନ କରିଥିଲେ। ଅନେକ ବିଏନପି ନେତାଙ୍କୁ ଗିରଫ କରାଯାଇ ସେମାନଙ୍କ ବିରୋଧରେ ମାମଲା ଦାୟର ହୋଇଥିବା ସୂଚନା ମିଳିଛି। ଏହି ସଂସଦୀୟ ନିର୍ବାଚନ ଫେକ୍ ବୋଲି ଦଳ ଅଭିଯୋଗ କରିଛି। ନିର୍ବାଚନରେ ଜାଲିଆତି ହୋଇଥିବା ଅଭିଯୋଗ କ୍ରମେ ଆମେରିକା ଓ ବିଶ୍ବ ସମୁଦାୟର ପ୍ରତିକ୍ରିୟା ଉପରେ ଦୃଷ୍ଟି ରଖାଯାଇଛି ବୋଲି କହିଛନ୍ତି ଦଳର ନେତା ମୋଯିମ ଖାଁ। ଗତ ୭ ତାରିଖରେ ହୋଇଥିବା ଭୋଟରେ ଆଓ୍ବାମି ଲିଗ ପୂର୍ଣ୍ଣ ସଂଖ୍ୟା ଗରିଷ୍ଠତା ହାସଲ କରିବା ସହ ପଞ୍ଚମ ଥର ଲାଗି ଶେଖ ହାସିନା ପ୍ରଧାନମନ୍ତ୍ରୀ ହେବା ଲାଗି ବାଟ ଫିଟାଇଥିଲା। ୩ ଶହ ଆସନ ମଧ୍ୟରୁ ଆଓ୍ବାମି ଲିଗକୁ ୨୦୦ ଆସନ ମିଳିଥିବା ଘୋଷଣା କରାଯାଇଥିଲା। ୧୯୮୬ରୁ ଲଗାତାର ଅଷ୍ଟମ ଥର ଲାଗି ଗୋପାଳଗଞ୍ଜ-୩ ଆସନରୁ ବିଜୟୀ ହୋଇଥିଲେ ହାସିନା। ଏହି ଆସନରେ ହାସିନା ୨ ଲକ୍ଷ ୪୯ ହଜାର ଭୋଟ ପାଇଥିବାବେଳେ ପ୍ରତିପକ୍ଷ ତଥା ବାଂଲାଦେଶ ସୁପ୍ରିମପାର୍ଟି ପ୍ରାର୍ଥୀ ଏମ. ନିଜାମ ଉଦ୍ଦିନ ଲସକର ମାତ୍ର ୪୬୯ ଭୋଟ ପାଇଥିଲେ।
ବିବାଦ ମଧ୍ୟରେ ମାଳଦ୍ବୀପ ରାଷ୍ଟ୍ରପତିଙ୍କ ଚୀନ ଗସ୍ତ, ବିଭିନ୍ନ ପ୍ରସଙ୍ଗରେ କରିବେ ଆଲୋଚନା
ନନ୍ଦିଘୋଷ ବ୍ୟୁରୋ: ଭାରତ ସହ ବିବାଦ ମଧ୍ୟରେ ମାଳଦ୍ବୀପ ରାଷ୍ଟ୍ରପତିଙ୍କ ଚୀନ ଗସ୍ତ । ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବେ ପ୍ରତିପକ୍ଷ ମହମ୍ମଦ ମୁଇଜୁ । ଆସନ୍ତା ୧୨ ତାରିଖ ଯାଏ ବେଜିଂ ଗସ୍ତରେ ଥିବା ମୁଇଜୁ ଓ ଜିନପିଙ୍ଗଙ୍ଗ ମଧ୍ୟରେ ବିଭିନ୍ନ ରାଜିନାମା ସ୍ବାକ୍ଷରିତ ହେବାର କାର୍ଯ୍ୟକ୍ରମ ରହିଛି । ଗତବର୍ଷ ନଭେମ୍ବରରେ କ୍ଷମତାକୁ ଆସିବା ପରେ ମୁଇଜୁଙ୍କ ଏହା ହେବ ପ୍ରଥମ ଚୀନ ଗସ୍ତ ।
ମୁଇଜୁଙ୍କୁ ଚୀନ ପ୍ରଧାନମନ୍ତ୍ରୀ ଲି କ୍ବିଙ୍ଗ ଓ ଅନ୍ୟ ନେତା ସାକ୍ଷାତ କରିବାର କାର୍ଯ୍ୟକ୍ରମ ରହିଛି । ମାଳଦ୍ବୀପର ଅଷ୍ଟମ ରାଷ୍ଟ୍ରପତି ଭାବେ ଦାୟିତ୍ବ ନେଇଥିବା ମୁଇଜୁ ଜଣେ ଚୀନ ସପକ୍ଷବାଦୀ ନେତା । ଭାରତ ସପକ୍ଷବାଦୀ ଇବ୍ରାହିମ ମହମ୍ମଦ ସୁଲିଙ୍କୁ ପରାସ୍ତ କରି ମୁଇଜୁ ହୋଇଥିଲେ ରାଷ୍ଟ୍ରପତି । ୨୦୧୪ରେ ମାଳଦ୍ବୀପକୁ ଗସ୍ତ କରିଥିଲେ ଜିନପିଙ୍ଗ । ସେତେବେଳେ ଦୁଇ ଦେଶ ମଧ୍ୟରେ ବିଭିନ୍ନ ପ୍ରସଙ୍ଗରେ ରାଜିନାମା ସ୍ବାକ୍ଷରିତ ହୋଇଥିଲା । ପ୍ରୋଗ୍ରେସିଭ ପାର୍ଟି ଅଫ ମାଲଡିଭିସ ଓ ପିପୁଲ୍ସ ନ୍ୟାସନାଲ କଂଗ୍ରେସ ମେଣ୍ଟ ପକ୍ଷରୁ ମୁଇଜୁ ହୋଇଛନ୍ତି ନିର୍ବାଚିତ । ଏହି ମେଣ୍ଟ ଚୀନର ସମର୍ଥକ ।
ଆଜି ଉଦଘାଟିତ ହେବ ବହୁପ୍ରତୀକ୍ଷିତ ମାଲକାନଗିରି ବିମାନବନ୍ଦର
ମାଲକାନଗିରି: ସ୍ବାଭିମାନ ଅଞ୍ଚଳରେ ଉଇଁଲା ନୂଆ ସୂର୍ଯ୍ୟ । ରୂପାନ୍ତରଣ ଅଧ୍ୟାୟରେ ମାଲକାନଗିରି । ଆଜି ଉଦଘାଟିତ ହେବ ବହୁପ୍ରତୀକ୍ଷିତ ମାଲକାନଗିରି ବିମାନବନ୍ଦର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିମାନବନ୍ଦରରେ ଅବତରଣ କରି ଏହାର ଶୁଭାରମ୍ଭ କରିବେ । 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ମଧ୍ୟ ମୁଖ୍ୟମନ୍ତ୍ରୀଙ୍କ ସହ ଉପସ୍ଥିତ ରହିବେ । ୨୦୧୮ ମସିହାରେ ଗୁରୁପ୍ରିୟା ସେତୁର ଲୋକାର୍ପଣ ପରେ ବିକାଶର ଗୋଟିଏ ପରେ ଗୋଟିଏ ପାହାଚ ଚଢୁଛି ସ୍ବାଭିମାନ ଅଞ୍ଚଳ । ଜିଲ୍ଲାକୁ ବିମାନସେବା ସ୍ବପ୍ନ ଭଳି ଲାଗୁଥିଲେ ବି ରାଜ୍ୟ ସରକାରଙ୍କ ଉଦ୍ୟମରେ ଆକାଶରେ ଉଡ଼ାଣ ଆଶା ପୂରଣ ହୋଇଛି ।
ପ୍ରାୟ ୧୦୬ ହେକ୍ଟର ଜମିରେ ନିର୍ମିତ ବିମାନ ବନ୍ଦରରେ ୧୬୨୦ ମିଟର ରନଓ୍ବେ ରହିଛି । ଆବଶ୍ୟକସ୍ଥଳେ ୩କିଲୋମିଟର ପର୍ଯ୍ୟନ୍ତ ଏହାକୁ ସଂପ୍ରସାରଣ ହୋଇପାରିବ । ଏଠାରେ ମଧ୍ୟମ ବର୍ଗର ଉଡାଜାହାଜ ଅବତରଣ କରିପାରିବା ସୁବିଧା ରହିଛି । ମାତ୍ର ୧୪ ମାସରେ ୫୪ କୋଟି ଟଙ୍କା ବ୍ୟୟ ଅଟକଳରେ ଏୟାରପୋର୍ଟ ନିର୍ମାଣ ସମ୍ପୂର୍ଣ୍ଣ ହୋଇଛି । ବିମାନ ବନ୍ଦରର ସମସ୍ତ ନିର୍ମାଣ ଖର୍ଚ୍ଚ ରାଜ୍ୟ ସରକାର ବହନ କରିଛନ୍ତି ।
ଭୁବନେଶ୍ୱର, ଝାରସୁଗୁଡ଼ା, ଜୟପୁର, ଉତ୍କେଲା, ରାଉରକେଲା ପରେ ମାଲକାନଗିରି ବିମାନ ଉଡ଼ାଣ ସୂଚୀରେ ସାମିଲ ହେବାକୁ ଯାଉଛି । ବିମାନ ସେବା ଆରମ୍ଭ ହେଲେ ଜିଲ୍ଲାରେ ସାମାଜିକ ଓ ଆର୍ଥିକ ବିକାଶ ତ୍ୱରାନ୍ୱିତ ହେବ । ପୁଞ୍ଜିନିବେଶ ସୁଯୋଗ ସୃଷ୍ଟି ହେବା ସହ ଲୋକଙ୍କୁ କର୍ମନିଯୁକ୍ତି ମିଳିବ । ପୂର୍ବରୁ ପରୀକ୍ଷା ମୂଳକ ଭାବେ ଭିଟି ୧୦୦ ବିମାନ ଅବତରଣ କରିଥିଲା । ଟ୍ରାଏଲ ରନ୍ ସଫଳ ସହ ଭିତ୍ତିଭୂମିକୁ ସମସ୍ତେ ପ୍ରଶଂସା କରିଥିଲେ । ବିମାନ ଉଡ଼ାଣ ପାଇଁ ସମସ୍ତ ପ୍ରସ୍ତୁତି ସରିଥିବାବେଳେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।
ପୁରୀରେ ବଲିଉଡର ପ୍ରଖ୍ୟାତ ସଙ୍ଗୀତ ନିର୍ଦେଶକ ଓ ଗାୟକ ପଦ୍ମଶ୍ରୀ ଶଙ୍କର ମହାଦେବନ
ପୁରୀ: ପୁରୀରେ ବଲିଉଡର ପ୍ରଖ୍ୟାତ ସଙ୍ଗୀତ ନିର୍ଦେଶକ ଓ ଗାୟକ ପଦ୍ମଶ୍ରୀ ଶଙ୍କର ମହାଦେବନ l ପୁରୀ ଗସ୍ତରେ ଆସି ଶ୍ରୀ ମନ୍ଦିର ଯାଇ ମହାପ୍ରଭୁଙ୍କ ଦର୍ଶନ ସହ ସାନିଧ୍ୟ୍ୟ ଲାଭ କରିଛନ୍ତି ଶଙ୍କର l ମହାପ୍ରଭୁଙ୍କ ଦର୍ଶନ କରି ଏକ ସୁନ୍ଦର ଭଜନ ଗାଇଥିଲେ ପ୍ରଖ୍ୟାତ କଣ୍ଠଶିଳ୍ପୀ l ପୂର୍ବ ଅପେକ୍ଷା ପୁରୀ ଏବେ ନୂଆ ରୂପ ନେବାରେ ଲାଗିଛି । ଶ୍ରୀ ମନ୍ଦିର ଚତୁର୍ପାଶ୍ୱରେ ଚାଲିଥିବା ପରିକ୍ରମା ପ୍ରକଳ୍ପ କାର୍ଯ୍ୟ ଭକ୍ତଙ୍କୁ ଏକ ନୂଆ ଅନୁଭୂତି ଆଣିଦେଉଛି l ମହାପ୍ରଭୁଙ୍କ ଜଣେ ଭକ୍ତ ହିସାବରେ ଏହି ପ୍ରକଳ୍ପ କାର୍ଯ୍ୟକୁ ସେ ସ୍ୱାଗତ କରୁଛନ୍ତି ବୋଲି କହିଥିଲେ । ସାରା ଭାରତ ବର୍ଷରୁ ମହାପ୍ରଭୁଙ୍କ ଦର୍ଶନ ପାଇଁ ପ୍ରତିଦିନ ହଜାର ହଜାର ଭକ୍ତ ଶ୍ରଦ୍ଧାଳୁ ପୁରୀ ଆସୁଛନ୍ତି । ପରିକ୍ରମା ପ୍ରକଳ୍ପ ଦ୍ୱାରା ଭକ୍ତ ମାନେ ବିଭିର୍ନ ପ୍ରକାର ସୁବିଧା ସୁଯୋଗ ମଧ୍ୟ ପାଇପାରୁଛନ୍ତି l ମହାପ୍ରଭୁଙ୍କ ଦର୍ଶନ ସାଙ୍ଗକୁ ଶ୍ରୀକ୍ଷେତ୍ର ଆସୁଥିବା ଭକ୍ତ ମାନେ ନୂଆ ଅନୁଭୂତି ନେଇ ଫେରୁଛନ୍ତି l ତାଙ୍କର ସୌଭାଗ୍ୟ ଯେ ସେ ମହାପ୍ରଭୁଙ୍କ ଏହି ପରିକ୍ରମା ପ୍ରକଳ୍ପ କାର୍ଯ୍ୟ ଦେଖିବାକୁ ସୁଯୋଗ ପାଇଲେ | ସାରା ବିଶ୍ୱବାସୀଙ୍କର ମହାପ୍ରଭୁ ମଙ୍ଗଳ କରନ୍ତୁ ବୋଲି ଆଶା ବ୍ୟକ୍ତ କରିଛନ୍ତି ଶଙ୍କର ମହାଦେବନ ।
ସାଧାରଣତନ୍ତ୍ର ଦିବସ ପାଇଁ ରାଜଧାନୀ ଦିଲ୍ଲୀରେ ପ୍ରସ୍ତୁତି ଆରମ୍ଭ
ନୂଆଦିଲ୍ଲୀ: ସାଧାରଣତନ୍ତ୍ର ଦିବସ ପାଇଁ ରାଜଧାନୀ ଦିଲ୍ଲୀରେ ପ୍ରସ୍ତୁତି ଆରମ୍ଭ । କର୍ତ୍ତବ୍ୟ ପଥରେ ପ୍ୟାରେଡ ପାଇଁ ଆରମ୍ଭ ହୋଇସାରିଛି ପ୍ରାକ୍ଟିସ । ଚଳିତ ବର୍ଷ ପ୍ୟାରେଡର ଥିମ୍ ରହିଛି ନାରୀ ଶକ୍ତି । ସେଥିପାଇଁ ପ୍ୟାରେଡର ସମଗ୍ର କଣ୍ଟିଜେଣ୍ଟରେ କେବଳ ମହିଳା ଦେଖିବାକୁ ମିଳିବେ । ଜାତୀୟ ସେବା ସ୍କିମ (NSS) ପ୍ଲାଟୁନ ପାଇଁ ସମଗ୍ର ଦେଶରୁ ୨୦୦ ଜଣ ଛାତ୍ରୀ ମୋନିନିତ ହୋଇ ଦିଲ୍ଲୀ ଆସିଛନ୍ତି । ଓଡ଼ିଶାର ବିଭିନ୍ନ ବିଶ୍ୱବିଦ୍ୟାଳୟ ଏବଂ କଲେଜରୁ ମୋନୋନିତ ହୋଇ ଦିଲ୍ଲୀ ଆସିଛନ୍ତି ୮ ଜଣ ଛାତ୍ରୀ । ସାଧାରଣତନ୍ତ୍ର ଦିବସ ଅବସରରେ କ୍ରୀଡା ଏବଂ ଯୁବ ବ୍ୟାପାର ପକ୍ଷରୁ ଆୟୋଜିତ ବିଭିନ୍ନ କାର୍ଯ୍ୟକ୍ରମ ରେ ସେମାନେ ଭାଗ ନେଉଛନ୍ତି । ସେ ମଧ୍ୟରୁ ମନୋନୀତ ଛାତ୍ରୀ କର୍ତ୍ତବ୍ୟ ପଥରେ ପରେଡ ମଧ୍ୟ ଯୋଗ ଦେବେ। ଜବାହରଲାଲ ଷ୍ଟାଡିୟମ୍ ଠାରେ ସେମାନଙ୍କ ନିୟମିତ ପ୍ରାକ୍ଟିସ ଚାଲିଛି। ଦିଲ୍ଲୀରେ ଶୀତ ଲହରୀ ଜାରି ଥିବା ସତ୍ତ୍ବେ ତାହାକୁ ଖାତିର ନକରି ସକାଳ ୬ ରୁ ଜାରି ରହିଛି ତାଙ୍କ ପ୍ୟାରେଡ ପ୍ରାକ୍ଟିସ୍ । ତାଙ୍କ ସହ ଅଧିକ ଆଲୋଚନା କରିଛନ୍ତି ଆମ ନୂଆଦିଲ୍ଲୀ ପ୍ରତିନିଧି ଲିପିକା ମାହାନ୍ତ।
କ୍ବାର୍ଟର୍ସ ଛାଡିନାହାନ୍ତି ପୂର୍ବତନ ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ରୋ
ନନ୍ଦିଘୋଷ ବ୍ୟୁରୋ: କ୍ବାର୍ଟର୍ସ ଛାଡିନାହାନ୍ତି ପୂର୍ବତନ ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ରୋ । ଘର ଛାଡିବାକୁ ନୋଟିସ ଜାରି କଲା ଡିରେକ୍ଟୋରେଟ ଅଫ ଏଷ୍ଟେଟ୍ସ । ଗତ ଡିସେମ୍ବର ୮ରେ ଲୋକସଭା ସାଂସଦ ପଦରୁ ବହିଷ୍କୃତ ହୋଇଥିଲେ ସାଂସଦ । ପ୍ରଶ୍ନ ଲାଗି ଟଙ୍କା ମାମଲାରେ ବିବାଦରେ ଫସିଥିଲେ ମହୁଆ ମୈତ୍ରୋ । ପୂର୍ବରୁ ଜାନୁଆରୀ ୭ ସୁଦ୍ଧା ବଙ୍ଗଳା ଛାଡିବା ଲାଗି ତାଙ୍କୁ ନୋଟିସ ହୋଇଥିଲା । ମାତ୍ର ସେ କ୍ବାର୍ଟର୍ସ ଛାଡି ନଥିବାରୁ ତାଙ୍କୁ ପୁଣି ନୋଟିସ ଜାରି କରାଯାଇଛି ।
ରାଜସ୍ଥାନରେ ବିଜେପିକୁ ଝଟକା
ଜୟପୁର: ରାଜସ୍ଥାନରେ ବିଜେପିକୁ ଝଟକା । ଶ୍ରୀକରଣପୁର ବିଧାନସଭା ଉପନିର୍ବାଚନରେ ହାରିଲେ ବିଜେପିରୁ ମନ୍ତ୍ରୀ ଥିବା ସୁରେନ୍ଦର ପାଲ ସିଂହ । କଂଗ୍ରେସ ପ୍ରାର୍ଥୀ ରୁପିନ୍ଦର ସିଂ କୁନ୍ନର ସୁରେନ୍ଦ୍ର ପାଲ ସିଂହଙ୍କୁ ପରାସ୍ତ କରି ବିଧାୟକ ଭାବେ ନିର୍ବାଚିତ। ରାଜସ୍ଥାନରେ ମୁଖ୍ୟମନ୍ତ୍ରୀ ଭଜନ ଲାଲଙ୍କ ନେତୃତ୍ବାଧିନ ସରକାରରେ ମନ୍ତ୍ରୀ ହୋଇଥିଲେ ସୁରେନ୍ଦର ପାଲ ସିଂହ । ସୁରେନ୍ଦର ପାଲଙ୍କୁ ରୁପିନ୍ଦର ସିଂହ କୁନ୍ନର ୧୧ ହଜାର ୨୮୪ ଭୋଟରେ ପରାସ୍ତ କରିଛନ୍ତି ।ରୁପିନ୍ଦର ମୋଟ ୯୦ ହଜାର ୯୮ଟି ଭୋଟ ପାଇ ବିଧାୟକ ଭାବେ ନିର୍ବାଚିତ ହୋଇଛନ୍ତି । ରାଜସ୍ଥାନ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ପରେ ସରକାର ଥାଇ ନିର୍ବାଚନ ହାରିବା ବିଜେପି ପାଇଁ ବଡ଼ ଝଟକା ।
କାରଣ ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ବିଜେପି ଏହି ସିଟ୍ ହାତେଇଥିଲା।୧୯୯ ଆସନରୁ ୧୧୫ ସିଟ ପାଇଛି ବିଜେପି । ବିଧାନସଭା ନିର୍ବାଚନରେ ବିପୁଳ ବିଜୟ ପରେ ଉପନିର୍ବାଚନ ହାରିବା କେନ୍ଦ୍ରୀୟ ନେତୃତ୍ବକୁ ବଡ଼ ଝଟକା।କଂଗ୍ରେସ ପ୍ରାର୍ଥୀ ରୁପିନ୍ଦରଙ୍କ ବିଜୟ ପରେ କଂଗ୍ରେସରୁ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ ବିଜୟର ଶୁଭେଚ୍ଛା ଜଣାଇଛନ୍ତି । ଶ୍ରୀକରଣପୁର ଆସନ କଂଗ୍ରେସ ଜିତିବା ପରେ ବିଜେପିର ଗର୍ବ ଅହଂକାର ଚୁରମାର ହୋଇଯାଇଛି ବୋଲି କହିଛନ୍ତି ଅଶୋକ ଗେହଲଟ । ରାଜସ୍ଥାନବାସୀ ବିଜେପିକୁ ତାର ବାଟ ଦେଖାଇଛନ୍ତି। ଶ୍ରୀକରଣପୁରରୁ ବିଧାୟକ ଥିବା ଗୁରମିତ ସିଂହଙ୍କ ମୃତ୍ୟୁ ପରେ ଏହି ଆସନ ଖାଲି ହୋଇଥିଲା । ପରାଜୟ ପ୍ରାର୍ଥୀ ସୁରେନ୍ଦର ପାଲ ସିଂହ ହେଉଛନ୍ତି ଗୁରମିତଙ୍କ ପୁଅ ।