ମିରଟ: ସାଧାରଣ ନିର୍ବାଚନ ପୂର୍ବରୁ ଉତ୍ତର ପ୍ରଦେଶର ମିରଟରୁ ଚାରି ଚାରିଟି ଜୀବନ୍ତ ଟାଇମ୍ ବମ୍ ଜବତ କରାଯାଇଛି । ବୋମା ଆଣିଥିବା ଅଭିଯୋଗରେ ଜଣେ ଯୁବକଙ୍କୁ ଗିରଫ କରିଛି ଏସଟିଏଫ୍ । ଜାଭେଦ୍ ଶେଖ ନାମକ ଗିରଫ ଯୁବକର ନେପାଳ ଲିଙ୍କ ସାମ୍ନାକୁ ଆସିଛି । ଇମରାନା ନାମକ ଜଣେ ମହିଳା ଏହି ବୋମା ବନାଇବାକୁ ଅର୍ଡର କରିଥିବା ପଚରାଉଚରା ବେଳେ ଜାଭେଦ କହିଛି ।
ଜବତ ଟାଇମ୍ ବମ୍ କାଚ ବୋତଲରେ ଖଞ୍ଜା ଯାଇଛି । କାଚ ବୋତଲ ଏହି ଆଇଇଡି ବନା ଯାଇଛି । ପଚରାଉଚରାରୁ ଜଣାପଡିଛି ଜାଭେଦ ନିୟମିତ ନେପାଳ ଯିବା ଆସିବା କରୁଥିଲା । ତେବେ ଏହି ଘଟଣାରେ ବର୍ତ୍ତମାନ ସୁଦ୍ଧା ଆତଙ୍କବାଦୀ ଲିଙ୍କର ସୂଚନା ମିଳିନି ।
ନୂଆଦିଲ୍ଲୀ: କଂଗ୍ରେସ ଓ ଯୁବ କଂଗ୍ରେସର ୪ ଆକାଉଣ୍ଟ ଫ୍ରିଜ। ଏ ନେଇ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି କଂଗ୍ରେସର ବରିଷ୍ଠ ନେତା ଅଜୟ ମାକେନ। ଦୁଇ ଦିନ ତଳେ ଜଣାପଡିଥିଲା ଯେ, କଂଗ୍ରେସ ଓ ଯୁବ କଂଗ୍ରେସ ଯେଉଁ ଚେକ ଦେଉଛି ତାହା ଭଙ୍ଗା ହୋଇପାରୁନି। ବ୍ଯାଙ୍କ ଟଙ୍କା ଦେଉନାହିଁ। ଏହାପରେ ଦଳ ଖୋଳତାଡ଼ କରିଥିଲା । ପରେ ଜଣାପଡିଥିଲା ସବୁ ଆକାଉଣ୍ଟକୁ ଅଚଳ କରିଦିଆଯାଇଛି।
୨୦୧୮-୧୯ରେ କଂଗ୍ରେସ ୪୦ରୁ ୪୫ ଦିନ ବିଳମ୍ବରେ ଇନକମ ଟ୍ଯାକ୍ସ ରିଟର୍ଣ୍ଣ କରିଥିଲା। ଏହାସହ ୧୪ ଲକ୍ଷ ଟଙ୍କା କ୍ଯାସରେ ଚାନ୍ଦା ଦେବା ନେଇ ଆଇଟି ୫ ବର୍ଷ ପରେ ଏପରି ପଦକ୍ଷେପ ନେଇଛି। ଏହାକୁ ନେଇ ୨୧୦ କୋଟି ଭରଣା କରିବାକୁ ଦାବି କରିଛି । ତେବେ ଆକାଉଣ୍ଟ ଅଚଳ କରିଦିଆଯିବାରୁ ଏବେ ଦଳ ପାଖରେ ଅର୍ଥର ଅଭାବ ଦେଖାଦେଇଛି। ପାଣି, ବିଜୁଳି ବିଲ ଏବଂ କର୍ମଚାରୀଙ୍କ ଦରମା ଦେବାକୁ ଦଳ ଅସମର୍ଥ।
ଭାରତ ଯୋଡୋ ନ୍ଯାୟ ଯାତ୍ରା ମଧ୍ଯ ପ୍ରଭାବିତ ହେବାର ଆଶଂକା ରହିଛି । ଗଣତନ୍ତ୍ରରେ ଏପରି କାର୍ଯ୍ଯ ଆଦୌ ଗ୍ରହଣୀୟ ନୁହେଁ ବୋଲି କହିଛନ୍ତି ଅଜୟ ମାକେନ । ତେବେ ଏତେ ତମ୍ବିତୋଫାନ ହେବା ପରେ ବୁଧବାର ଯାଏଁ ଅଚଳାବସ୍ଥା ହଟାଇ ଦିଆଯାଇଛି । ତେବେ ଏପରି ମନମାନିକୁ କଂଗ୍ରେସ ତୀବ୍ର ସମାଲୋଚନା କରିଛି। ସାଧାରଣ ନିର୍ବାଚନର କିଛି ମାସ ପୂର୍ବରୁ ମୁଖ୍ଯ ବିରୋଧୀ ଦଳର ଆକାଉଣ୍ଟ ଅଚଳ କରିଦେବା ଗଣତନ୍ତ୍ରର ହତ୍ଯା ବୋଲି କହିଛନ୍ତି ଅଜୟ ମାକେନ।
ନୂଆଦିଲ୍ଲୀ: ଦିଲ୍ଲୀର ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି)ର ଜଣେ ଏମଟେକ୍ ଛାତ୍ରଙ୍କ ମୃତଦେହ ହଷ୍ଟେଲ ରୁମରେ ଝୁଲନ୍ତା ଅବସ୍ଥାରେ ମିଳିଛି ।
ସୂଚନା ଅନୁଯାୟୀ, ଛାତ୍ର ଜଣଙ୍କ ଫୋନ ନଉଠାଇବାରୁ ପରିବାର ଲୋକେ ଚିନ୍ତିତ ହୋଇପଡିଥିଲେ । ପରେ ଜଣେ ସାଙ୍ଗକୁ ଏନେଇ ପରିବାର ବର୍ଗ କହିବାରୁ ସେ ଯାଇ ସମ୍ପୃକ୍ତ ଛାତ୍ରଙ୍କ ରୁମ୍ ଯାଞ୍ଚ କରିଥିଲେ । ଯାହା ପରେ ଅଘଟଣ ସମ୍ପର୍କରେ ଜଣାପଡିଥିଲା ।
ଦ୍ରୋଣାଚାର୍ଯ୍ୟ ହଷ୍ଟେଲର ରୁମ ନଂ ୭୫୭ରେ ରହୁଥିଲେ ୨୪ ବର୍ଷୀୟ ନେରକର। ତେବେ ସେ ମହାରାଷ୍ଟ୍ର ନାଶିକର ମୂଳ ବାସିନ୍ଦା ବୋଲି ଜଣେ ପୋଲିସ ଅଧିକାରୀ ସୂଚନା ଦେଇଛନ୍ତି ।
ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ମୃତ ଛାତ୍ରଙ୍କ ପରିବାର ବର୍ଗଙ୍କ ଠାରୁ ଖବର ପାଇବା ପରେ ଅନ୍ୟ ସାଙ୍ଗମାନେ ନରକରଙ୍କ ରୁମକୁ ଯାଇଥିଲେ । କିନ୍ତୁ ସେମାନେ ରୁମ୍ ଭିତରୁ ବନ୍ଦ ଥିବା ଜାଣିବାକୁ ପାଇଥିଲେ। ସେମାନେ ଏନେଇ ହଷ୍ଟେଲ ଗାର୍ଡଙ୍କୁ ଜଣାଇଥିଲେ। ଅଧିକାରୀ ଜଣକ କହିଛନ୍ତି ଯେ, ରୁମ୍ ଖୋଲିବା ପରେ ନରକରଙ୍କ ମୃତଦେହ କୋଠରୀର ଛାତରେ ଝୁଲୁଥିବା ଦେଖିବାକୁ ମିଳିଥିଲା।
ପରବର୍ତ୍ତୀ ସମୟରେ ଛାତ୍ରଙ୍କ ପରିବାର ସଦସ୍ୟଙ୍କୁ ଘଟଣା ସମ୍ପର୍କରେ ସୂଚନା ଦିଆଯାଇଥିଲା । ତେବେ ମୃତ୍ୟୁର କାରଣ ଜାଣିବା ପାଇଁ ତଦନ୍ତ ଚାଲିଛି ବୋଲି ପୋଲିସ ପକ୍ଷରୁ ସୂଚନା ମିଳିଛି।
ନୟାଗଡ଼: ପରକୀୟା ପ୍ରୀତିର ଜଘନ୍ୟ କାହାଣୀ। ସ୍ୱାମୀକୁ ହତ୍ୟା କରି ଘରେ ପୋତିଥିଲା ସ୍ତ୍ରୀ। ଘର ଭିତରୁ ମାଟି ଖୋଳି ଶବ ବାହାର କରିଛି ପୋଲିସ । ନୟାଗଡ଼ ଓଡ଼ଗାଁ ଥାନା କୋମଣ୍ଡ ଗାଁରl ଘଟିଥିବା ହତ୍ୟାକାଣ୍ଡର କ୍ରାଇମ ସିନ ରିକ୍ରିଏସନ କରିଛି ପୋଲିସ। ଅଭିଯୁକ୍ତ ହତ୍ୟା ବେଳର ଦୃଶ୍ୟ ଗୋଟି ଗୋଟି କରି ପୋଲିସ ଆଗରେ କହିଛି। ଘଟଣାସ୍ଥଳରେ ସାଇଣ୍ଟିଫିକ ଟିମ୍ ତଦନ୍ତ କରୁଛି।
ସିନ ରିକ୍ରିଏସନ୍ ପରେ ମୃତଦେହ ବାହାର କରି ବ୍ୟବଚ୍ଛେଦ ପାଇଁ ପଠାଯାଇଛି। ପରକୀୟା ପ୍ରୀତି ଧରା ପଡିଯିବାରୁ ପ୍ରେମିକ ସହ ମିଶି ସ୍ୱାମୀ ପ୍ରକାଶ ନାୟକଙ୍କୁ ମାରି ଘରେ ପୋତିଦେଇଥିଲା ସ୍ତ୍ରୀ ଜ୍ୟୋତ୍ସ୍ନାରାଣୀ। ରୋହିବାଙ୍କ ଗାଁରେ ପ୍ରକାଶଙ୍କ ଘର। ପ୍ରାୟ ୨୦ ଦିନ ହେବ ସେ ନିଖୋଜ ଥିଲେ। ବିବାହ ପରେ ଶାଶୂଘର କୋମଣ୍ଡ ଗାଁରେ ରହୁଥିଲେ ପ୍ରକାଶ। ୧୪ ବର୍ଷ ପୂର୍ବେ ଜ୍ୟୋତ୍ସ୍ନାରାଣୀ ଏବଂ ପ୍ରକାଶ ବିବାହ କରିଥିଲେ। ତାଙ୍କର ୭ ବର୍ଷର ଗୋଟିଏ ଝିଅ ଓ ୫ ବର୍ଷର ପୁଅ ଅଛି
ତେବେ ସେହି ଗାଁର ପ୍ରତାପ ସାମଲଙ୍କୁ ଭଲ ପାଇ ଆସୁଥିଲେ ଜ୍ୟୋତ୍ସ୍ନାରାଣୀ। ହତ୍ୟା ଘଟଣାରେ ଜ୍ୟୋସ୍ନାରାଣୀ ନାୟକ, ଶାଶୁ ଡ଼ମଣି ପ୍ରଧାନ, ପ୍ରେମିକ ପ୍ରତାପ ସାମଲକୁ ଗିରଫ କରିଛି ପୋଲିସ।
ବୌଦ୍ଧ: ବୌଦ୍ଧ ଆରଟିଓ ବସନ୍ତ ମହାପାତ୍ର ଗିରଫ। ବସନ୍ତଙ୍କୁ ଗିରଫ କରିଛି ଭିଜିଲାନ୍ସ। ଆୟ ବହିର୍ଭୂତ ସମ୍ପତ୍ତି ଠୁଳ ମାମଲରେ ବସନ୍ତ ମହାପାତ୍ରଙ୍କୁ ଭିଜିଲାନ୍ସ ଗିରଫ କରିଛି। ବସନ୍ତଙ୍କର ୧୯ କୋଟି ଟଙ୍କାରୁ ଅଧିକ ଆୟ ବହିର୍ଭୂତ ସମ୍ପତ୍ତି ଠାବ କରିଛ ଭିଜିଲାନ୍ସ। ଯେଉଁଥିରେ ୧୪ କୋଟି ୫୦ ଲକ୍ଷର ଫ୍ଲାଟ୍, ୪ କୋଟି ୫୦ ଲକ୍ଷର ସୁନା ଗହଣା, ଗାଡ଼ି ଓ ଆସବାବପତ୍ର ରହିଛି।
ଚଢ଼ାଉ ବେଳେ କେବଳ ଭୁବନେଶ୍ବରରୁ ଏହି ବାବୁଙ୍କର ୫ଟି ଦାମୀ ଫ୍ଲାଟ୍ ସାଙ୍ଗକୁ ଗୋଟିଏ ସପିଙ୍ଗ କମ୍ପ୍ଲେକ୍ସ ଠାବ କରାଯାଇଛି। ବୌଦ୍ଧ ଆରଟିଓ ବସନ୍ତ ମହାପାତ୍ରଙ୍କର ପାହାଳ ଅଞ୍ଚଳରେ ଉତ୍କଳ ସିଗ୍ନେଚରରେ ୩ ହଜାର ବର୍ଗଫୁଟ୍ରେ ନିର୍ମିତ କୋଟିଏ ଟଙ୍କାର ଫ୍ଲାଟ୍ ଥିବା ବେଳେ ଗୌତମନଗର ଅଞ୍ଚଳରେ ଉତ୍କଳ କନିକା ଗ୍ୟାଲେରିଆ ମଲ୍ରେ ୨ କୋଟି ଟଙ୍କା ମୂଲ୍ୟର ୨୫ ଶହ ବର୍ଗଫୁଟ୍ର ସପିଙ୍ଗ୍ କମ୍ପ୍ଲେକ୍ସ, କଳ୍ପନା ସ୍ଥିତ ଉତ୍କଳ ରୟାଲ୍ ରେସିଡେନ୍ସିରେ କୋଟିଏ ଟଙ୍କା ମୂଲ୍ୟର ଫ୍ଲାଟ, କଳାରାହଙ୍ଗ ଅଞ୍ଚଳରେ ଜେଡ୍-୧ ଆଇକନିକ୍ରେ ଫାଇଭ ବିଏଚ୍କେ ଫ୍ଲାଟ୍ ପାଇଁ ଅଗ୍ରୀମ ୧ କୋଟି ୩୫ ଲକ୍ଷ ଟଙ୍କା ଜମା, ଶୈଳଶ୍ରୀବିହାର ଅଞ୍ଚଳରେ ୱେଷ୍ଟ୍ ଏଣ୍ଡ ଆପାର୍ଟମେଣ୍ଟରେ ଫ୍ଲାଟ୍ ଓ ରଙ୍ଗମାଟିଆ ହରପ୍ରିୟା ଏନ୍କ୍ଲେଭରେ ଫ୍ଲାଟ ଠାବ ହୋଇଛି।
ବେଙ୍ଗାଲୁରୁରେ ମଧ୍ୟ ତାଙ୍କର ଫ୍ଲାଟ ରହିଛି। ସେ ଓଜୋନ୍ ଏଲିଗାଣ୍ଟରେ ଫ୍ଲାଟ ପାଇଁ ୮୮ଲକ୍ଷ ଟଙ୍କା ଅଗ୍ରୀମ ଦେଇଛନ୍ତି। ତାଙ୍କର ବିଭିନ୍ନ ବ୍ୟାଙ୍କ୍ରେ ୩ କୋଟିରୁ ଅଧିକ ଟଙ୍କା ଜମାଥିବା ଭିଜିଲାନ୍ସ ହାତରେ ତଥ୍ୟ ଲାଗିଛି। ଭୁବନେଶ୍ବର ଆକ୍ସିସ ବ୍ୟାଙ୍କରେ ୨ କୋଟି ୧୧ ଲକ୍ଷ ୭୯ ହଜାର ଟଙ୍କା ଥିବା ବେଳେ ଆଇସିଆଇସିଆଇ ବ୍ୟାଙ୍କରେ ୪୪ ଲକ୍ଷ ୩୫ ହଜାର ଟଙ୍କା ଓ ଏସ୍ବିଆଇରେ ୩୯ ଲକ୍ଷ ୫୫ ହଜାର ଟଙ୍କା ରହିଛି। ଇନ୍ସ୍ୟୁରାନ୍ସ ଓ ବଣ୍ଡ୍ ଜମାକୁ ଠାବ କରାଯାଇଛି।
ଏନ୍ଏଚ୍ଏଆଇ କ୍ୟାପିଟାଲ୍ ଗେନ୍ ବଣ୍ଡରେ ୪୮ ଲକ୍ଷ ଟଙ୍କା ଓ ମ୍ୟାକ୍ସ ଲାଇଫ୍ରେ ୩୧ ଲକ୍ଷ ୯୦ ହଜାର ଟଙ୍କା ରହିଛି। ଘରୁ ନଗଦ ୧ ଲକ୍ଷ ୧୬ ହଜାର ୭୦୦ ଟଙ୍କା, ୬୦୦ ଗ୍ରାମ୍ର ସୁନା ଗହଣା, ୩୧୮ ଗ୍ରାମର ରୁପା, ୯ ଲକ୍ଷ ଟଙ୍କାର ଆସବାବପତ୍ର ମଧ୍ୟ ଜବତ କରାଯାଇଛି। ଗୋଟିଏ ବାଇକ୍ ଠାବ ହୋଇଛି। ବୌଦ୍ଧ ଆରଟିଓ ବସନ୍ତ ମହାପାତ୍ରଙ୍କର ଠାବ ହୋଇଥିବା ସ୍ଥାବର ଅସ୍ଥାବର ସମ୍ପତ୍ତିର ମୂଲ୍ୟ ୧୯ କୋଟିରୁ ଅଧିକ ଟଙ୍କା ହେବ ବୋଲି ଆକଳନ କରାଯାଇଛି।
ଢିଙ୍କିଆ: ଶିଳ୍ପାୟନର ନୂଆ ଅଧ୍ଯାୟ। ଜଗତସିଂହପୁର ଢିଙ୍କିଆ ଚାରିଦେଶରେ ଜେଏସଡବ୍ଲ୍ୟୁ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବାର୍ଷିକ ୧୩.୨ ମିଲିୟନ ମେଟ୍ରିକ ଟନ କ୍ଷମତା ବିଶିଷ୍ଟ ସମନ୍ଵିତ ଇସ୍ପାତ ପ୍ରକଳ୍ପ ସହିତ ୫୨ ମିଲିୟନ ମେଟ୍ରିକ ଟନ ବିଶିଷ୍ଟ ନିଜସ୍ବ ଜେଟିର ଭୂମିପୂଜନ ଓ ଭିତ୍ତିପ୍ରସ୍ତରର ଶୁଭ ଦେଇଛନ୍ତି ମୁଖ୍ୟମନ୍ତ୍ରୀ।
ଏହାସହ ରିନ୍ଯୁ ଇ-ଫୁଏଲ ଗ୍ରୀନ ଆମୋନିଆ ଓ ସିଲକ୍ସ କେମିକାଲ ମାନ୍ଯୁଫାକଚରିଂ ପ୍ଲାଣ୍ଟର ଶିଳାନ୍ଯାସ କରିଛନ୍ତି ମୁଖ୍ଯମନ୍ତ୍ରୀ। ଏହି ସବୁ ପ୍ରକଳ୍ପରେ ୯୦ ହଜାର କୋଟିର ନିବେଶ ହେବା ସହ ୩୫ ହଜାର ଯୁବକଯୁବତୀଙ୍କୁ ନିଯୁକ୍ତି ମିଳିବ ବୋଲି ଏହି ଅବସରରେ ଉଦବୋଧନ ଦେଇ କହିଛନ୍ତି ନବୀନ । ଆଜିର ଏହି ସବୁ ପ୍ରକଳ୍ପ ଲାଗି ମୁଖ୍ଯମନ୍ତ୍ରୀ କମ୍ପାନୀଗୁଡିକୁ ଧନ୍ଯବାଦ ଜଣାଇଛନ୍ତି । ନିରନ୍ତର ସହାୟତା ଓ ସହଯୋଗ ଲାଗି ଜେଏସଡବ୍ଲ୍ୟୁ ଅଧ୍ଯକ୍ଷ ସଜ୍ଜନ ଜିନ୍ଦଲଙ୍କୁ ସ୍ବତନ୍ତ୍ର ଧନ୍ଯବାଦ ଦେଇଛନ୍ତି ମୁଖ୍ଯମନ୍ତ୍ରୀ । ଜଣେ ଭଲ ସହଯୋଗୀ ଭାବେ ଜେଏସଡବ୍ଲ୍ୟୁ ଓଡ଼ିଶାରେ ଶିଳ୍ପ ପ୍ରତିଷ୍ଠା କରି ରାଜ୍ଯକୁ ଦେଶରେ ଏକ ଇଣ୍ଡଷ୍ଟ୍ରିଆଲ ପାୱାରହାଉସ ଭାବେ ପରିଚିତି କରାଇପାରିଛି।
ବିକାଶ ଆଜି ଓଡ଼ିଶାର ପରିଚୟ ହୋଇଛି । ଶିଳ୍ପ ଭିତ୍ତିଭୂମି, ଶିକ୍ଷା, ସ୍ବାସ୍ଥ୍ଯ, ସବୁ କ୍ଷେତ୍ରରେ ଏକ ନୂଆ ଯୁଗ ଆରମ୍ଭ ହୋଇଛି । 5T ଉପକ୍ରମରେ ଓଡ଼ିଶାର ବିକାଶଧାରା ଆହୁରି ଉଜ୍ଜ୍ବଳ ହେଉଛି । ସାଧାରଣ ଲୋକ, ଚାଷୀ, ମାଆ, ଯୁବକମାନେ ବିକାଶର ଅଂଶ ପାଲଟିଛନ୍ତି । ସହଯୋଗ ପାଇଁ ଜଗତସିଂହପୁରକୁ ଧନ୍ଯବାଦ ଜଣାଇବା ସହ ଏହି ସବୁ ପ୍ରକଳ୍ପ ଦ୍ବାରା ଏଠିକାର ସବୁ ପରିବାର ଉପକୃତ ହେବେ ବୋଲି ମୁଖ୍ଯମନ୍ତ୍ରୀ ଆଶା କରିଛନ୍ତି।
ଉଦବୋଧନ ଆରମ୍ଭରୁ ଜଗତସିଂହପୁର ସହ ବିଜୁ ବାବୁଙ୍କ ସଂପର୍କ ବିଷୟରେ ଆଲୋକପାତ କରିଥିଲେ ମୁଖ୍ଯମନ୍ତ୍ରୀ । ଜଗତସିଂହପୁର ଆସିଲେ ବିଜୁ ବାବୁଙ୍କ କଥା ମନକୁ ଆସିଥାଏ । ୬୦ ଦଶକ ଆରମ୍ଭରେ ବିଜୁ ବାବୁ ଏକ ଡାଇନାମିକ ନିଷ୍ପତ୍ତି ନେଇ ପାରଦୀପରେ ବନ୍ଦର ପ୍ରତିଷ୍ଠା କରିଥିଲେ । ଯାହା ଆଜି ବିକାଶର ଇତିହାସରେ ଏକ ମାଇଲଖୁଣ୍ଟ ହେବା ସହ ପୂର୍ବାଞ୍ଚଳରେ ଏକ ଟପ ଡେଷ୍ଟିନେସନର ମାନ୍ଯତା ହାସଲ କରିପାରିଛି। ବନ୍ଦର ନଗରୀ ଭାବେ ସୁନାମ ଅର୍ଜୁଛି ବୋଲି କହି ଗର୍ବିତ ମନେ କରିଥିଲେ ।
ଭୁବନେଶ୍ୱର: ବିଜେଡିରେ ମିଶିଲେ ଢେଙ୍କାନାଳର ଡକ୍ଟର ଅବିନାଶ ସାମଲ। ଶଙ୍ଖ ଭବନରେ ଆୟୋଜିତ ମିଶ୍ରଣ ପର୍ବରେ ଦଳରେ ସାମିଲ ହୋଇଛନ୍ତି ଅବିନାଶ। ସାଂସଦ ମାନସ ମଙ୍ଗରାଜଙ୍କ ଉପସ୍ଥିତିରେ ସେ ହୋଇଛନ୍ତି ସାମିଲ। ମୁଖ୍ଯମନ୍ତ୍ରୀ ନବୀନ ପଟ୍ଟନାୟଙ୍କଙ୍କ ଆଦର୍ଶରେ ଅନୁପ୍ରାଣୀତ ହୋଇ ବିଜେଡିରେ ସାମିଲ ହୋଇଛନ୍ତି ବୋଲି କହିଛନ୍ତି ଅବିନାଶ।
ଢେଙ୍କାନାଳ ଖଡଗପ୍ରସାଦର ଡକ୍ଟର ଅବିନାଶ ସାମଲ ସମାଜ ସେବାରେ ନିଜକୁ ବ୍ରତୀ କରିଛନ୍ତି। ସାଂସଦ ମାନସ ମଙ୍ଗରାଜ କହିଛନ୍ତି- ଅବିନାଶ ହେଉଛନ୍ତି ଢେଙ୍କାନାଳର ଜଣେ ପ୍ରସିଦ୍ଧ ଡାକ୍ତର ଓ ଉଦ୍ଯୋଗବିତ୍। ମୁଖ୍ଯମନ୍ତ୍ରୀଙ୍କ ବିକାଶର ପର୍ବରେ ସେ ଅନୁପ୍ରାଣୀତ ହୋଇଛନ୍ତି। ତାଙ୍କର ଯୋଗଦାନ ବିଜେଡିକୁ ଅଧିକ ଶକ୍ତିଶାଳୀ କରିବ। ଅବିନାଶ କହିଛନ୍ତି ଯେ ଗତ ୧୦ ବର୍ଷରେ ବିଜେଡିର ଯେଉଁ କାମ ରହିଛି, ସେଥିରେ ତାଙ୍କର କିଛି ଯୋଗଦାନ ରହିଛି। ମୁଖ୍ୟମନ୍ତ୍ରୀ ଓଡ଼ିଶାକୁ ଗ୍ଲୋବାଲ ସ୍ତରକୁ ନେଉଛନ୍ତି। ତାଙ୍କ ନିର୍ଦ୍ଦେଶରେ ସେବା କରି ଚାଲିବି।
ଭୁବନେଶ୍ୱର: ତିନିଦନିଆ ଓଡିଶା ଗସ୍ତରେ ନିର୍ବାଚନ କମିଶନର ଓ ଟିମ୍। । ୨୦୨୪ ସାଧାରଣ ନିର୍ବାଚନ ନେଇ ପ୍ରସ୍ତୁତିର ସମୀକ୍ଷା କରିଛନ୍ତି ରାଜୀବ କୁମାର । ରାଜନୈତିକ ଦଳର ପ୍ରତିନିଧିଙ୍କ ସହ ମୁଖ୍ୟ ନିର୍ବାଚନ କମିଶନର ରୁଦ୍ଧଦ୍ବାର ଆଲୋଚନା କରିଛନ୍ତି। ଓଡ଼ିଶାରେ ଆସନ୍ତା ଦିନରେ ଲୋକସଭା ଓ ବିଧାନସଭା ନିର୍ବାଚନ ଏକସଙ୍ଗେ ଅନୁଷ୍ଠିତ ହେବାକୁ ଯାଉଛି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ମୁକ୍ତ ଓ ଅବାଧ ନିର୍ବାଚନକୁ ଗୁରୁତ୍ଵ ଦେଇଆସୁଛନ୍ତି। ଦୀର୍ଘ ୨୫ ବର୍ଷ ଧରି ରାଜ୍ୟବାସୀଙ୍କ ସେବାରେ ବିଜେଡି ସରକାର ସହଯୋଗ କରିଆସୁଛି। ବହୁ ଜନ କଲ୍ୟାଣକାରୀ ଯୋଜନା ମୁଖ୍ୟମନ୍ତ୍ରୀ ଦେଇଛନ୍ତି। ଏସବୁ ନିର୍ବାଚନ ଆଚରଣ ବିଧି ଲାଗୁ ହେବା ପୂର୍ବରୁ ରାଜ୍ୟରେ କାର୍ଯ୍ୟକାରୀ ହୋଇଛି। ନିର୍ବାଚନ ସମୟରେ ଏହିସବୁ ଯେପରି ଚାଲୁ ରହିବ ସେଥିପାଇଁ ଅନୁରୋଧ କରାଯାଇଛି।
ଏପରି ଏକ ଭୁଲ ବୁଝାମଣା ୨୦୧୯ରେ ହୋଇଥିଲା। ଯଦି କିଛି ଆପତ୍ତି ଆସେ ତା ହେଲେ ସରକାରୀ ଦଳକୁ ଶୁଣିବାକୁ ପର୍ଯ୍ୟାପ୍ତ ସୁଯୋଗ ଦିଆଯାଉ ବୋଲି କହିଛନ୍ତି ବିଜେଡି ରାଷ୍ଟ୍ରୀୟ ମୁଖପାତ୍ର ସଂତୃପ୍ତ ମିଶ୍ର । ସେପଟେ EVM, ବୁଥ୍ ସ୍ତରରେ ପ୍ରସ୍ତୁତି ଆଦିର ବି ସମୀକ୍ଷା କରିବେ ଇସିଆଇ । ଏହାସହ ମୁଖ୍ୟ ଶାସନ ସଚିବ, ପୋଲିସ ଡିଜି, ମୁଖ୍ୟ ନିର୍ବାଚନ ଅଧିକାରୀ, ଗୃହ ସଚିବ, ଉନ୍ନୟନ କମିଶନ ଓ ସବୁ ଜିଲ୍ଲାପାଳ ଏବଂ ଏସ୍ପିଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି । ସେହିପରି ୧୭ ତାରିଖରେ ରାଜ୍ଯ ମୁଖ୍ଯ ନିର୍ବାଚନ ଅଧିକାରୀ, ମୁଖ୍ଯ ଶାସନ ସଚିବ ଓ ଡିଜିପିଙ୍କ ସହ ଆଲୋଚନା କରିବେ ନିର୍ବାଚନ କମିଶନର ଓ ତାଙ୍କ ଟିମ।
ଖଣ୍ଡଗିରି: ଆଜି କମ୍ପିବ ଖଣ୍ଡଗିରି। ଆରମ୍ଭ ହେବ ପ୍ରସିଦ୍ଧ ମାଘସପ୍ତମୀ କୁମ୍ଭମେଳା। ନାମ, ଧ୍ବନି, ସଂର୍କୀତ୍ତନ କୋଳାହଳରେ କମ୍ପିବ ଖଣ୍ଡଗିରି ଗୁମ୍ଫା। ବାବାଙ୍କ ଆଖଡାରୁ ଦେବସଭା ସବୁଠି ଚଳଚଞ୍ଚଳ। ରାଜ୍ଯ ତଥା ରାଜ୍ଯ ବାହରର ସାଧୁସନ୍ଥ ଏବେ ଭୁବନେଶ୍ବରରେ ଡେରା ପକାଇଲେଣି। ପାହଡର ପାଦ ଦେଶରୁ ଉପର ଯାଏଁ ପରିମଳ, ସଫେଇ, ସୌନ୍ଦଯ୍ଯକରଣ, ସ୍ବଚ୍ଛତା ଉପରେ ଫୋକସ କରିଛି ବିଏମସି।
ଆଲୋକୀକରଣ ସାଙ୍ଗକୁ ସୌନ୍ଦଯ୍ଯକରଣ ନେଇ ରୋଡ ମ୍ଯାପ ପ୍ରସ୍ତୁତ ହୋଇଛି। ଖଣ୍ଡଗିରି ଛକରୁ ପାହଡ ପଯ୍ଯନ୍ତ କିଭଳି ଭିଡ ନ ହେବ ସେ ନେଇ ସମସ୍ତ ବ୍ୟବସ୍ଥା କରାଯାଇଛି। ସିସିଟିଭି ଓ ପାର୍କିଂ ନେଇ ପ୍ଳାନ କରିଛି ବିଏମସି। ଏକ ହଜାରରୁ ଅଧିକ ସାଧୁସନ୍ଥ ଆସିବା ପାଇଁ ବ୍ୟବସ୍ଥା କରାଯାଇଛି। ଉତ୍କଳ ପଞ୍ଚଶଖା ଭାଗବତ ଆଖଡା ପକ୍ଷରୁ ୯ ଦିନ ଧରି ହେବାକୁ ଥିବା ମେଳାରେ ଏକ ହଜାରରୁ ଅଧିକ ସାଧୁସନ୍ଥ ଯୋଗ ଦେଇ ଆଧ୍ଯାତ୍ମିକ ଦିଗଦର୍ଶନ, ଐତିହ, ସଂସ୍କୃତି ଓ ପରମ୍ପରାର ଉପରେ ଜନ ସଚେତନା ସୃଷ୍ଟି କରିବେ।
ବେଦପାଠ ସହିତ ଜାଗମରା ଠାରୁ ଖଣ୍ଡଗିରି ପଯ୍ଯନ୍ତ ସଂର୍କୀତନ ଓ କଳସ ଶୋଭାଯାତ୍ରା କରାଯିବ। ପ୍ରତିଦିନ ସନ୍ଧ୍ଯାରେ ଧର୍ମ ଆଲୋଚନା, ବିଶିଷ୍ଟ ଗବେଷକଙ୍କ ଦ୍ବାରା ପ୍ରବଚନ ଅନୁଷ୍ଠିତ ହେବ। ଏହି ଅବସରରେ ୧୮ ତାରିଖରୁ ଖଣ୍ଡଗିରିରେ ଆରମ୍ଭ ହେବ ଯାତ୍ରା ମହାସମର। ୬ଟି ମଞ୍ଚରେ ଦେଖିବାକୁ ମିଳିବ ନାଚ, ଗୀତ ଓ ଅଭିନୟର ମନୋରଞ୍ଜନ। ଯାତ୍ରା ପରିବେଷଣ ବେଳେ ଅଶ୍ଳୀଳ ନୃତ୍ଯ ପରିବେଷଣକୁ ପ୍ରସୟ ଦେବନି ବିଏମସି। ଯେଉଁ ମଞ୍ଚରେ ଅଶ୍ଳୀଳ ପ୍ରଦର୍ଶନ ହେବ ଅଧାରୁ ଯାତ୍ରା ବନ୍ଦ କରିବା ନେଇ ଚେତାବନୀ ଦେଇଛି ବିଏମସି। ମଞ୍ଚରେ ଅଶ୍ଳୀଳତା ପ୍ରଦର୍ଶନ ହେବ ନାହିଁ ବୋଲି ମତ ରଖିଛି ଯାତ୍ରା କମିଟି।
ଜଗତସିଂହପୁର: ଦୀର୍ଘ ଦିନର ସ୍ବପ୍ନ ପୂରଣ। ଆଜି ଜଗତସିଂହପୁର ଢିଙ୍କିଆ ଚାରିଦେଶରେ ଜେଏସଡବ୍ଲ୍ୟୁ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବାର୍ଷିକ ୧୩.୨ ମିଲିୟନ ମେଟ୍ରିକ ଟନ କ୍ଷମତା ବିଶିଷ୍ଟ ସମନ୍ଵିତ ଇସ୍ପାତ ପ୍ରକଳ୍ପ ସହିତ ୫୨ ମିଲିୟନ ମେଟ୍ରିକ ଟନ ବିଶିଷ୍ଟ ନିଜସ୍ବ ଜେଟିର ଭୂମିପୂଜନ ଓ ଭିତ୍ତିପ୍ରସ୍ତରର ଶୁଭ ଦେବେ ମୁଖ୍ୟମନ୍ତ୍ରୀ ।
ଏଥିରେ ଜେଏସଡବ୍ଲ୍ୟୁ ଗୃପର ଅଧ୍ଯକ୍ଷ ସଜ୍ଜନ ଜିନ୍ଦଲ ଓ ସ୍ଥାନୀୟ ବିଧାୟକ ଓ ଅନ୍ଯ ପ୍ରମୁଖ ନେତା ଉପସ୍ଥିତ ରହିବେ। ଏହି କାର୍ଯ୍ୟକ୍ରମରେ ପାଖାପାଖି ୩୦ ହଜାର ଲୋକଙ୍କ ସମାଗମ ହେବାର ଅନୁମାନ କରାଯାଉଛି। ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ନେଇ ବେଶ ଉତ୍ସାହିତ ହୋଇପଡିଛନ୍ତି ସ୍ଥାନୀୟ ବାସିନ୍ଦା । ଢିଙ୍କିଆ ଚାରିଦେଶରେ ବାର୍ଷିକ ୧୩.୨ ମିଲିୟନ ଟନ ବିଶିଷ୍ଟ ଷ୍ଟିଲ ପ୍ଳାଣ୍ଟ, ବାର୍ଷିକ ୫୨ ମିଲିୟନ ମେଟ୍ରିକ ଟନ କ୍ଷମତା ବିଶିଷ୍ଟ ଜେଟ୍ଟି ପ୍ରତିଷ୍ଠା କରିବ ଜେଏସଡବ୍ଲ୍ୟୁ।
ଏଥିପାଇଁ ୨୯୫୦.୫୧ ଏକର ଜମି ଅଧିଗ୍ରହଣ ସରିଥିବା ବେଳେ ପରିବେଶ ମଞ୍ଜୁରୀ ମଧ୍ଯ ମିଳିସାରିଛି। ଏହି ପ୍ରକଳ୍ପ ପାଇଁ ଜେଏସଡବ୍ଲ୍ୟୁ ପକ୍ଷରୁ ୬୫ ହଜାର କୋଟି ଟଙ୍କା ଖର୍ଚ୍ଚ ହେବ। ଯାହା ସ୍ଥାନୀୟ ଲୋକଙ୍କ ଆଶା ଓ ଅଭିଳାଷ ପୂରଣ କରିବ l ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସ୍ବପ୍ନର ପାରାଦ୍ଵୀପକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳ୍ପସମୃଦ୍ଧ କରିବା ପାଇଁ ନେଇଥିବା ସଙ୍କଳ୍ପ ଆଜି ପୂରଣ ହେବାକୁ ଯାଉଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଖୁସିର ମାହୋଲ ଦେଖିବାକୁ ମିଳିଛି ।
