ନନ୍ଦିଘୋଷ ବ୍ୟୁରୋ: ରବିବାର ୫ଥର ଲେଖାଏଁ ଚାମ୍ପିୟନ ହୋଇଥିବା ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ଖେଳାଯିବ । ପ୍ରଥମରୁ ପରାଜୟ ବରଣ କରୁଥିବା ମୁମ୍ବାଇ ଏବେ ଫର୍ମକୁ ଫେରିଥିବାବେଳେ ଚେନ୍ନାଇ ବିପକ୍ଷ ମ୍ୟାଚରେ କିଭଳି ପ୍ରଦର୍ଶନ କରିବ ତାକୁ ନେଇ ପ୍ରଂଶସକଙ୍କ ମଧ୍ୟ ଉତ୍ସାହ ଦେଖିବାକୁ ମିଳିଛି । ତେବେ ଏହା ପୂର୍ବରୁ ମୁମ୍ବାଇ ଇଣ୍ଡିଆନ୍ସର ଅଧିନାୟକଙ୍କୁ ନେଇ ସାମ୍ନାକୁ ଆସିଛି ଏକ ବଡ଼ ଖବର । ନ୍ୟୁଜିଲାଣ୍ଡର ପୂର୍ବତନ କ୍ରିକେଟର ତଥା ଭାଷ୍ୟକାର ସାଇମନ ଡୁଲ୍ କହିଛନ୍ତି କି, ହାର୍ଦ୍ଦିକ ପାଣ୍ଡ୍ୟା ଏବେ ଆହତ ଅଛନ୍ତି । ସେ ନିଜର ଆହତକୁ ଲୁଚାଇବାକୁ ଚେଷ୍ଟା କରୁଛନ୍ତି । କାହିଁକି ନାଁ ସେ ନିଜର ପ୍ରଥମ ମ୍ୟାଚରେ ପ୍ରଥମ ଓଭର ବୋଲିଂ କରିଥିଲେ । ପରେ ଦ୍ବିତୀୟ ଓଭର ବୋଲିଂ କରିଥିଲେ । ମାତ୍ର ଶେଷ ମ୍ୟାଚ ଗୁଡ଼ିକରେ ବୋଲିଂ କରୁନାହାନ୍ତି ପାଣ୍ଡ୍ୟା । ଆହତ ଥିବାକାରଣରୁ ସେ ଏହାକୁ ଲୁଚାଇବା ପାଇଁ ପ୍ରୟାସ କରୁଛନ୍ତି । ସେପଟେ ହାର୍ଦ୍ଦିକ ପାଣ୍ଡ୍ୟା ଏହାକୁ ନେଇ କହିଛନ୍ତି କି, ମୁଁ ଫିଟ୍ ଅଛି । ତେବେ ବୋଲିଂ କରିବା ପାଇଁ ମୋର ଆବଶ୍ୟକ ପଡ଼ିନାହିଁ । ଏଣୁ ମୁଁ ବୋଲିଂ କରିନାହିଁ । ଆବଶ୍ୟକ ପଡ଼ିଲେ ମୁଁ ବୋଲିଂ କରିବି ।
ପଣା ସଂକ୍ରାନ୍ତି ପାଇଁ ବଢିବାରେ ଲାଗିଛି ମାଟି ଘୋଡା ଓ ଠେକିର ଚାହିଦା
ବାସୁଦେବପୁର: ରୋଜଗାର ଦେଉଛି ମାଟି ଘୋଡା । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଗଦି ଗାଁର ଶହ ଶହ କାରିଗର ପ୍ରସ୍ତୁତ କରୁଛନ୍ତି ମାଟି ଘୋଡା । ପଣା ସଂକ୍ରାନ୍ତି ପାଇଁ ବଢିବାରେ ଲାଗିଛି ମାଟି ଘୋଡା ଓ ଠେକିର ଚାହିଦା । ମାଟି ଘୋଡା ବିକ୍ରି କରି ବେଶ ଦୁଇ ପଇସା ରୋଜଗାର କରୁଛନ୍ତି ଲୋକ ।
ରବିବାର ପଣା ସଂକ୍ରାନ୍ତି ।ଏହିଦିନ ମାଟି ଠେକି ଓ ମାଟି ଘୋଡାର ଚାହିଦା ଅଧିକ । ଆଧୁନିକତାର ଛାପ ମଧ୍ଯରେ ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଗଦି ଗାଁରେ ଏବେବି ବଞ୍ଚିଛି ମାଟି କାରିଗରୀ । ଦେଖନ୍ତୁ ଘରେ ଘରେ ତିଆରି କରୁଛନ୍ତି ମାଟି ଘୋଡା ଓ ଠେକି । ସକାଳ ଠାରୁ ସନ୍ଧ୍ଯା ପର୍ଯ୍ଯନ୍ତ ଲାଗି ପଡିଛନ୍ତି ସଭିଏଁ । ମାଟି ଘୋଡା ଆମ ସଂସ୍କୃତି ଓ ପରମ୍ପରା ସହିତ ନିବିଡ ଭାବେ ଜଡିତ । ପଣା ସଂକ୍ରାନ୍ତିରେ ସମସ୍ତେ ପିତୃପୁରୁଷଙ୍କ ଉଦ୍ଦେଶ୍ଯରେ ଠେକିରେ ପଣା ଅର୍ପଣ କରିଥାନ୍ତି । କିଏ ପିଲା ଛୁଆଙ୍କ ଭଲ ପାଇଁ ମାଆଙ୍କ ପାଖରେ ସମର୍ପଣ କରିଥାନ୍ତି ମାଟିଘୋଡା । ବର୍ଷକୁ ଥରେ ପଣାସଂକ୍ରାନ୍ତି ସମୟରେ ମାଟି ଘୋଡା ଓ ଠେକି ବିକ୍ରି କରି ବେଶ ଦୁଇ ପଇସା ରୋଜଗାର କରୁଛନ୍ତି କୁମ୍ଭକାର ପରିବାର।
ଗଦି ଗାଁରେ ଅଛନ୍ତି ୨୫ଟି କୁମ୍ଭାର ପରିବାର । ସେହିପରି ବଂଶୀପାଟଣା, ବିନାୟକପୁର, ପାରା ଆଦି ଗାଁରେ ଶହ ଶହ କୁମ୍ଭକାର ପରିବାର ବସବାସ କରୁଛନ୍ତି । ମାଟି ସାମଗ୍ରୀ ତିଆରି କରି ଜୀବିକା ନିର୍ବାହ କରୁଛନ୍ତି । ମାଟିରେ ଦୀପ, ଠେକି, ଆଟିକା, କଳସ, ଘୋଡା ଆଦି ନିର୍ମାଣ କରି ନିଜର ଗୁଜୁରାଣ ମେଣ୍ଟାଉଛନ୍ତି। କୁମ୍ଭାର ପରିବାରକୁ ଚକ ଯୋଗାଇଦେବା ପାଇଁ ସରକାରଙ୍କ ପକ୍ଷରୁ ସହାୟତା ଲୋଡିଛନ୍ତି ଲୋକ ।
କେବେ ସରିବ ଏନଏଚ-୫୫ ଜାତୀୟ ରାଜପଥ କାମ ?
ଢେଙ୍କାନାଳ: ରାଜ୍ଯରେ ବଢିବାରେ ଲାଗିଛି ନିର୍ବାଚନୀ ତାତି । ନିର୍ବାଚନ ସମୟ ଯେତିକି ପାଖେଇ ଆସୁଛି, ସେତିକ ସରଗରମ ହୋଇଉଠୁଛି ରାଜନୀତିକ ମାହୋଲ । ଜୋରଦାର ଚାଲିଛି କ୍ଯମ୍ପେନ। ବିଭିନ୍ନ ଜାଗାରେ ବିଭିନ୍ନ ମୁଦ୍ଦା ନେଇ ଜନତାଙ୍କ ପାଖରେ ପହଞ୍ଚୁଛନ୍ତି ପ୍ରାର୍ଥୀ । ଏହାରି ଭିତରେ କଟକ, ଢେଙ୍କାନାଳ ଓ ସମ୍ବଲପୁର ଏହି ତିନି ଲୋକସଭା କ୍ଷେତ୍ରରେ ଜାତୀୟ ରାଜପଥ NH- ୫୫ ଏବେ ପାଲଟିଛି ପ୍ରମୁଖ ରାଜନୈତିକ ମୁଦ୍ଦା ।
କେବେ ସରିବ ଏନଏଚ-୫୫ ଜାତୀୟ ରାଜପଥ କାମ ? ମରଣଯନ୍ତା ପାଲଟିଛି ଜାତୀୟ ରାଜପଥ । କିଏ ହେବ ଉତ୍ତରଦାୟୀ ? ଏମିତି ଅନେକ ପ୍ରଶ୍ନ ବାଣରେ ଏବେ ଛନ୍ଦି ହେଉଛନ୍ତି ବିଜେପିର ୩ ଲୋକସଭା ସଂସଦୀୟ ପ୍ରାର୍ଥୀ । କଟକରେ ଭର୍ତୁହରି ମହତାବ, ଢେଙ୍କାନାଳରେ ରୁଦ୍ର ନାରାୟଣ ପାଣି, ସମ୍ବଲପୁରରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି ତିନି ପ୍ରାର୍ଥୀଙ୍କୁ ଏବେ ଭୋଟରଙ୍କ ଚିରାଚରିତ ପ୍ରଶ୍ନ କେବେ ସରିବ ଜାତୀୟ ରାଜପଥ କାମ । ବିଶେଷ କରି ସମ୍ବଲପୁର ଓ ଢ଼େଙ୍କାନାଳ ଲୋକସଭା କ୍ଷେତ୍ରରେ ଏପରି ସ୍ଥିତି ବେଶୀ ଦେଖିବାକୁ ମିଳିଛି। ଏହି ଦୁଇ ସଂସଦୀୟ କ୍ଷେତ୍ରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଘର ହୋଇଥିବାରୁ ପ୍ରତ୍ଯେକ ଦିନ ଦୁର୍ଘଟଣା ଘଟିବା ତାଙ୍କୁ ଅଡୁଆରେ ପକାଉଛି । ତେବେ ରାସ୍ତା ନାହିଁ ତ ଭୋଟ ନାହିଁ ବୋଲି ସଫା ସଫା କହି ଦେଇଛନ୍ତି ସମ୍ବଲପୁର ଓ ଢେଙ୍କାନାଳ ସଂସଦୀୟ କ୍ଷେତ୍ରର ଭୋଟର ।
ତେବେ ଚାଲନ୍ତୁ ଏନଏଚ-୫୫ ଉପରେ ଟିକେ ନଜର ପକାଇବା । କଟକ ମଙ୍ଗୁଳି ଛକ ଠାରୁ ଢେ଼ଙ୍କାନାଳ ଅନୁଗୁଳ ଦେଇ ସମ୍ବଲପୁରକୁ ଯାଇଛି ଏନଏଚ-୫୫ ଜାତୀୟ ରାଜପଥ । ବିଶେଷ କରି କଟକ, ଢେ଼ଙ୍କାନାଳ, ଅନୁଗୁଳ ଓ ସମ୍ବଲପୁରର ଲାଇଫ ଲାଇନ୍ ଏହି ରାସ୍ତା । ୨୦୧୮ ମସିହାରୁ ଆରମ୍ଭ ହୋଇଥିବା ଏହି କାର୍ଯ୍ୟ ଦୁଇ ବର୍ଷ ଭିତରେ ଶେଷ ହେବା କଥା ହେଲେ ପୂରିବାକୁ ଯାଉଛି ୭ ବର୍ଷ । ଏନଏଚଆଇ କର୍ତ୍ତୃପକ୍ଷଙ୍କ ପ୍ରତିଶୃତି ଅନୁଯାୟୀ ରାସ୍ତା କାମ ମାର୍ଚ୍ଚ ୩୦ରେ ସରିବା କଥା ହେଲେ ଆଜି ପର୍ଯ୍ଯନ୍ତ କାର୍ଯ୍ଯ ସରିପାରିନାହିଁ । ବାରମ୍ବାର ଦୁର୍ଘଟଣା ଘଟୁଥିଲେ ବି ସଡ଼କ ସୁରକ୍ଷା କମିଟିକୁ ଖାତିର କରୁନାହାଁନ୍ତି ଏନଏଚ କର୍ତ୍ତୃପକ୍ଷ।
କିଏ ଜିତିବ ? ସରଗରମ କଳାହାଣ୍ଡି ଜିଲ୍ଲା ଧର୍ମଗଡ଼ ନିର୍ବାଚନ ମଣ୍ଡଳୀ
ନନ୍ଦିଘୋଷ ବ୍ୟୁରୋ: ନିର୍ବାଚନ ପାଇଁ ସରଗରମ କଳାହାଣ୍ଡି ଜିଲ୍ଲାର ଧର୍ମଗଡ଼ ବିଧାନସଭା ନିର୍ବାଚନମଣ୍ଡଳୀ । ଏଠାରେ ଏଥର ତ୍ରିମୁଖୀ ଲଢ଼େଇ ହେଉଛି । ୨ ହଜାର ମସିହାରୁ ବିଜେଡିର ଗଡ଼ ରହିଆସିଥିବା ଧର୍ମଗଡ଼ରେ ତିନି ପ୍ରମୁଖ ରାଜନୈତିକ ଦଳ ପକ୍ଷରୁ ଜୋରଦାର ପ୍ରଚାର ଚାଲିଛି । ତେବେ କାହା ମୁଣ୍ଡରେ ହାତୀ ସୁନା କଳସ ଢାଳିବ? ଭୋଟରଙ୍କ ମତ- ବିକାଶ ଯେଉଁଠି, ଭୋଟ୍ ସେଇଠି।
ଜମୁଛି ପ୍ରଚାର। ଧର୍ମଗଡ଼ରେ ତିନି ପ୍ରମୁଖ ରାଜନୈତିକ ଦଳ ଜୋରଦାର ପ୍ରଚାର ଆରମ୍ଭ କରିଦେଇଛନ୍ତି । ଧର୍ମଗଡ଼ ବ୍ଲକର ୨୪ଟି ପଞ୍ଚାୟତ, କୋକସରା ବ୍ଲକର ୨୨, କଲମପୁର ବ୍ଲକର ୧୧, ଜୟପାଟଣା ବ୍ଲକର ୪ଟି ପଞ୍ଚାୟତ ଏବଂ ଧର୍ମଗଡ଼ ଏନଏସିକୁ ନେଇ ଧର୍ମଗଡ଼ ନିର୍ବାଚନମଣ୍ଡଳୀ ଗଠିତ । ଏଠାରେ ଭୋଟର ସଂଖ୍ୟା ୨ ଲକ୍ଷ ୫୬ ହଜାର ୭୭ । ଏମାନଙ୍କ ମଧ୍ଯରେ ପରୁଷ ୧ ଲକ୍ଷ ୩୧ ହଜାର ୫୮୭, ମହିଳା ୧ ଲକ୍ଷ ୨୪ ହଜାର ୪୮୪ ଓ ତୃତୀୟ ଲିଙ୍ଗୀ ଭୋଟର ମାତ୍ର ୬ ଜଣ ଅଛନ୍ତି । ଧର୍ମଗଡ଼ରେ ବିଜେଡି ପକ୍ଷରୁ ମଇଦାନକୁ ଓହ୍ଲାଇଛନ୍ତି ପୂର୍ବତନ ମନ୍ତ୍ରୀ ପୁଷ୍ପେନ୍ଦ୍ର ସିଂହଦେଓ । ବିଜେପି ପକ୍ଷରୁ ସୁଧୀର ପାାଟ୍ଟଯୋଶୀ ଓ କଂଗ୍ରେସ ପ୍ରାର୍ଥୀ ହୋଇଛନ୍ତି ରଶ୍ମିରେଖା ରାଉତ । ସମସ୍ତେ ଜୋରଦାର ପ୍ରଚାର କରୁଛନ୍ତି।
୨୦୦୦ ମସିହାରେ ବିଜେଡି- ବିଜେପି ମେଣ୍ଟ ସମୟରେ ବିଜେଡି ପ୍ରାର୍ଥୀ ବୀର ସିପ୍ପକା ୨୯ ହଜାର ୨୭୬ ଭୋଟ ପାଇ ବିଜୟୀ ହୋଇଥିଲେ । ୨୦୦୪ରେ ୫୨ ହଜାର ୨୭୬ ଭୋଟ ପାଇ ପୁଣି ଜିତିଥିଲେ ବିଜେଡି ପ୍ରାର୍ଥୀ ବୀର ସିପ୍ପକା । ୨୦୦୯ ମସିହାରେ ମେଣ୍ଟ ଭାଙ୍ଗିବା ପରେ ବିଜେଡି ପକ୍ଷରୁ ପ୍ରାର୍ଥୀ ହୋଇଥିଲେ ପୁଷ୍ପେନ୍ଦ୍ର ସିଂହଦେଓ, କଂଗ୍ରେସରୁ ରାହାସ ବିହାରୀ ବେହେରା ଓ ବିଜେପିରୁ ଜନାର୍ଦ୍ଦନ ପଣ୍ଡା । ବିଜେଡି ପ୍ରାର୍ଥୀ ପୁଷ୍ପେନ୍ଦ୍ର ସିଂହଦେଓ ୫୬ ହଜାର ୪୭୦ ଭୋଟ ପାଇ ବିଜୟୀ ହୋଇଥିଲେ । ୨୦୧୪ ମସିହାରେ ୫୯ ହଜାର ୯୩୧ ଖଣ୍ଡ ପାଇ ପୁଣି ଜିତିଥିଲେ ବିଜେଡି ପ୍ରାର୍ଥୀ ପୁଷ୍ପେନ୍ଦ୍ର ସିଂହଦେଓ ।
କଂଗ୍ରେସ ପ୍ରାର୍ଥୀ ତୁଷାର ରଞ୍ଜନ ପଟ୍ଟଯୋଶୀ ପାଇଥିଲେ ୩୫ ହଜାର ୫୭୯ ଭୋଟ୍ ଓ ବିଜେପି ପ୍ରାର୍ଥୀ ରବୀନ୍ଦ୍ର ପଟ୍ଟଯୋଶୀଙ୍କୁ ୪୩ ହଜାର ୭୭୩ ଭୋଟ ମିଳିଥିଲା । ୨୦୧୯ରେ ବିଜେଡି ପ୍ରାର୍ଥୀ ମୌଷଧି ବାଗ ୬୮ ହଜାର ୨୯୧ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ବିଜେପି ପ୍ରାର୍ଥୀ ଅନନ୍ତ ପ୍ରତାପ ଦେଓ ୫୨ ହଜାର ୧୯୩ ଓ କଂଗ୍ରେସ ପ୍ରାର୍ଥୀ ଦିଗମ୍ବର ଦୁରିଆ ୪୨ ହଜାର ୫୯୩ ଖଣ୍ଡ ଭୋଟ ପାଇଥିଲେ । ୨ ହଜାର ମସିହାରୁ ଧର୍ମଗଡ଼ ବିଜେଡିର ଗଡ଼ ଭାବେ ପରିଚିତ । ରାଜ୍ଯ ସରକାରଙ୍କ ପକ୍ଷରୁ ଧର୍ମଗଡ଼ରେ ବହୁ ବିକାଶ ହୋଇଛି । ବଡ଼ ପାନୀୟଜଳ ପ୍ରକଳ୍ପ ସହ ଆଇଟିଆଇ, ଇନଡୋର ଷ୍ଟାଡିୟମ ଓ ସ୍କୁଲ ଓ କଲେଜର ହୋଇଛି ରୂପାନ୍ତରଣ । ବିଭିନ୍ନ ପର୍ଯ୍ଯଟନସ୍ଥଳୀର ହୋଇଛି ବିକାଶ । ବିକାଶକୁ ଭୋଟର ଗୁରୁତ୍ବ ଦେଉଛନ୍ତି।
ସରିଲା ମା ଦଣ୍ଡ କାଳୀଙ୍କ ୧୩ ଦିନାତ୍ମକ ଦଣ୍ଡ ଯାତ୍ରା
ବାଲିଗୁଡ଼ା: ସରିଲା ମା ଦଣ୍ଡ କାଳୀଙ୍କ ୧୩ ଦିନାତ୍ମକ ଦଣ୍ଡ ଯାତ୍ରା । ଶନିବାର ମା’ଙ୍କ ମେରୁ ଯାତ୍ରା । କନ୍ଧମାଳ ଜିଲ୍ଲା ବାଲିଗୁଡ଼ା ମା ଦକ୍ଷିଣ କାଳୀଙ୍କ ମନ୍ଦିର ପରିସରରେ ଅନୁଷ୍ଠିତ ହୋଇଛି ମେରୁ ଯାତ୍ରା । ଏପ୍ରିଲ ୧ ତାରିଖରୁ ମା’ଙ୍କ ଦଣ୍ଡଯାତ୍ରା ଆରମ୍ଭ ହୋଇଥିବା ବେଳେ ଆଜି ମେରୁ ଯାତ୍ରାରେ ଉଦଯାପିତ ହୋଇଛି। ୧୩ ଦିନ ଧରି ଦଣ୍ଡୁଆମାନେ ନିଷ୍ଠାର ସହ ମା’ଙ୍କ ସେବା କରିଥାନ୍ତି । ଏହି ମେରୁ ଯାତ୍ରାରେ ୧୬ ଦଣ୍ଡ ଭାଙ୍ଗିବା ପରେ ଶିବ ଓ ଶକ୍ତିଙ୍କୁ ନେଇ ପାଣି ଦଣ୍ଡକୁ ଯାଆନ୍ତି ଦଣ୍ଡୁଆ । ସେଠାରୁ ଫେରିବା ପରେ ମା ଦକ୍ଷିଣ କାଳୀଙ୍କ ମନ୍ଦିର ପରିସରରେ ଯଥା ନିତି ଅନୁଯାୟୀ ପୂଜାର୍ଚ୍ଚନା ଓ ହୋମ କାର୍ଯ୍ୟ ଅନୁଷ୍ଠିତ ହୁଏ । ଶେଷରେ ପାଟ ଭୋକ୍ତା ଖିରରେ ଗାଧୋଇବା ପରେ ଯଜ୍ଞ କୁଣ୍ତର ବ୍ରହ୍ମ ଅଗ୍ନିରେ ଝାସ ଦିଅନ୍ତି । ହଜାର ହଜାର ଭକ୍ତ ଶ୍ରଦ୍ଧାଳୁମାନେ ମାଆଙ୍କ ମେରୁ ଯାତ୍ରାରେ ଯୋଗଦେଇ ମାଆଙ୍କ କୃପା ଲାଭ କରିଛନ୍ତି । ଏହି ମେରୁ ଯାତ୍ରାରେ ବର୍ଷର ନୁଆ ଆମ୍ବ, ଖଜୁରୀ କୋଳି ପୂଜା ହୋଇଥାଏ। ନୂଆ ଫଳ ପୂଜା ହେବାପରେ ଅଞ୍ଚଳବାସୀ ଏହାକୁ ସେବନ କରିଥାନ୍ତି ।
ଧର୍ମେନ୍ଦ୍ରଙ୍କ ଉପରେ ବର୍ଷିଲା ବିଜେଡି, `ବିଫଳତା ଲୁଚାଇବାକୁ ମିଛ କହୁଛନ୍ତି କେନ୍ଦ୍ରମନ୍ତ୍ରୀ
ଭୁବନେଶ୍ବର: ନିଜ ବିଫଳତାକୁ ଲୁଚାଇବାକୁ ମିଛ କହୁଛନ୍ତି କେନ୍ଦ୍ରମନ୍ତ୍ରୀ ତଥା ସମ୍ବଲପୁରର ବିଜେପି ଲୋକସଭା ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ । ପ୍ରେସମିଟରେ ଧର୍ମେନ୍ଦ୍ରଙ୍କ ଉପରେ ବର୍ଷିବା ସହ କଡ଼ା ସମାଲୋଚନା କରିଛି ବିଜେଡି । ବିଜେଡି ମୁଖପାତ୍ର ସସ୍ମିତ ପାତ୍ର କହିଛନ୍ତି, ଗତ ୧୦ ବର୍ଷ ହେଲାଣି ଧର୍ମେନ୍ଦ୍ର ପ୍ରଧାନ କେନ୍ଦ୍ରମନ୍ତ୍ରୀ ଅଛନ୍ତି । ହେଲେ ଓଡ଼ିଶା ପ୍ରତି ତାଙ୍କର କିଛି ବି ଅବଦାନ ନାହିଁ । ୧୦ ବର୍ଷରେ ଓଡ଼ିଶା ପ୍ରତି ଧର୍ମେନ୍ଦ୍ରଙ୍କ ଅବଦାନ ଶୂନ । ନିଜ ଅଞ୍ଚଳ ପାଇଁ ବି ୧୦ ବର୍ଷରେ କିଛି କରିନାହାନ୍ତି ଧର୍ମେନ୍ଦ୍ର । ନିଜ ମୁହଁ ଲୁଚାଇବାକୁ ଯାଇ ସେ ମିଛ କହିବାକୁ ବି ପଛାଉନାହାନ୍ତି । ସମସ୍ତେ ଜାଣିଛନ୍ତି ସାରା ଦେଶରେ ବିଏସକେୱାଇ ସର୍ବଶ୍ରେଷ୍ଠ ଯୋଜନା । ଏହି ପ୍ରକାର ଯୋଜନା ଆଣିବାରେ ଓଡ଼ିଶା ଏକମାତ୍ର ରାଜ୍ଯ । ବିଏସକେୱାଇ ମାଧ୍ଯମରେ ଲୋକଙ୍କୁ ମାଗଣାରେ ଚିକିତ୍ସା ଯୋଗାଇ ଦିଆଯାଉଛି । ମହିଳାଙ୍କୁ ବାର୍ଷିକ ୧୦ ଲକ୍ଷ ଓ ପୁରୁଷଙ୍କୁ ବାର୍ଷିକ ୫ ଲକ୍ଷ ଟଙ୍କାର ମାଗଣା ଚିକିତ୍ସା ଯୋଗାଇ ଦିଆଯାଉଛି ।
କିନ୍ତୁ ଦୁର୍ଭାଗ୍ଯର ବିଷୟ ଧର୍ମେନ୍ଦ୍ର ପ୍ରଧାନ ବିଏସକେୱାଇ ବିରୋଧରେ ଷଡ଼ଯନ୍ତ୍ର କରୁଛନ୍ତି । ବିଏସକେୱାଇ ଉପକାରିତା ଅଟକାଇବାକୁ ଧର୍ମେନ୍ଦ୍ର ଚକ୍ରାନ୍ତ କରୁଛନ୍ତି । ବିଏସକେୱାଇରେ ଚିକିତ୍ସା ପାଇ ଯଦି ସାଧାରଣ ଲୋକ ଉପକୃତ ହେଉଛନ୍ତି ତେବେ ଧର୍ମେନ୍ଦ୍ରଙ୍କୁ କାହିଁକି କଷ୍ଟ ହେଉଛି ବୋଲି ସସ୍ମିତ ପ୍ରଶ୍ନ କରିଛନ୍ତି । ବିଏସକେୱାଇ ଯଦି ଏତେ ଖରାପ ଲାଗୁଛି ତାହେଲେ ବିଜେପି ନିର୍ବାଚନୀ ଇସ୍ତାହାରରେ ଏହାକୁ ବନ୍ଦ କରିବାକୁ ଘୋଷଣା କରୁ । ଓଡ଼ିଶା ବିଜେପି ନିର୍ବାଚନ ଇସ୍ତାହାରର ଏକ ନମ୍ବରରେ ବିଏସକେୱାଇ ବନ୍ଦ କରିବାକୁ ଘୋଷଣା କରୁ ବୋଲି ଆହ୍ବାନ ଦେଇଛନ୍ତି ସସ୍ମିତ । ୧୦ ବର୍ଷ କେନ୍ଦ୍ରମନ୍ତ୍ରୀ ଥାଇ ଧର୍ମେନ୍ଦ୍ର ଏନଏଚ ୫୫ କାମ ସାରିପାରିଲେନି । ପ୍ରତିଦିନ ଏନଏଚ ୫୫ରେ ଦୁର୍ଘଟଣା ଘଟି ଲୋକଙ୍କ ଜୀବନ ଯାଉଛି ।
ଏନଏଚ ୫୫ ହିଁ ଧର୍ମେନ୍ଦ୍ରଙ୍କ ବିଫଳତାର ପ୍ରତିମୂର୍ତ୍ତି । ଯିଏ ନିଜେ ରାସ୍ତାଟିଏ ତିଆରି କରିପାରିଲେନି ସେ ଆଜି ଅପରାଗତାକୁ ବଞ୍ଚାଇବାକୁ ବଡ଼ ବଡ଼ ଭାଷଣ ମାରୁଛନ୍ତି । ଲୋକଲଜ୍ଜାରୁ ବିଫଳତାକୁ ଲୁଚାଇବାକୁ ଧର୍ମେନ୍ଦ୍ର ଖ୍ଯାନ୍ତ ରୁହନ୍ତୁ ବୋଲି ସସ୍ମିତ କହିଛନ୍ତି । ଢେଙ୍କାନାଳରେ ଏକ ସାମ୍ବାଦିକ ସମ୍ମିଳନୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏନଏଚ ୫୫ କାମ ବିଳମ୍ବ ହେବା ପ୍ରସଙ୍ଗରେ ରାଜ୍ଯ ସରକାରଙ୍କୁ ଦାୟୀ କରିଥିଲେ । ଏପରିକି ଜାତୀୟ ରାଜପଥରେ ହେଉଥିବା ଦୁର୍ଘଟଣା ପାଇଁ ଟ୍ରାଫିକ ପୋଲିସର ବିଫଳତାକୁ ଅଙ୍ଗୁଳି ଉଠାଇଥିଲେ । ଯାହାର ଜବାବ ରଖିଛି ବିଜେଡି ।
ଭୋଟରଙ୍କୁ ପୁରୀ ଲୋକସଭା ଆସନ ବିଜେପି ପ୍ରାର୍ଥୀଙ୍କ ଘଣ୍ଟା ବାଣ୍ଟିବା ପ୍ରସଙ୍ଗ, ସମ୍ବିତ ପାତ୍ରଙ୍କ ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କୁ ଫେରାଦ ହେଲା ବିଜେଡି
ଭୁବନେଶ୍ବର: ପୁରୀ ଲୋକସଭା ବିଜେପି ପ୍ରାର୍ଥୀ ସମ୍ବିତ ପାତ୍ରଙ୍କ ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହୋଇଛି ବିଜେଡି । ପୁରୀ ଅଞ୍ଚଳରେ ଘରେ ଘରେ ସମ୍ବିତ ପାତ୍ର ଘଣ୍ଟା ବାଣ୍ଟୁଛନ୍ତି । ଦୋକାନୀ ମାନଙ୍କୁ ମଧ୍ୟ ଘଣ୍ଟା ଦେଇଛନ୍ତି । ନିର୍ବାଚନ ରାଲି କରି ବୁଲୁଥିବା ବେଳେ ସମ୍ବିତ ଘଣ୍ଟା ବାଣ୍ଟୁଛନ୍ତି ଏବଂ ଘଣ୍ଟାରେ ନିଜ ଫଟୋ ସହ ଭାରତୀୟ ଜନତା ପାର୍ଟିର ଲୋଗୋ ରହିଛି । ଯାହାକି ନିର୍ବାଚନ ଆଚରଣବିଧି କୁ ସମ୍ପୂର୍ଣ୍ଣ ଉଲ୍ଲଂଘନ କରୁଛି ବୋଲି ଅଭିଯୋଗ କରିଛି ବିଜେଡି। ଅତୀତରେ ମଧ୍ୟ ଉଜ୍ବଳା ଯୋଜନାରେ ସେ ଲୋକଙ୍କୁ ଭ୍ରମିତ କରିଛନ୍ତି । ତେଣୁ ଏହି ଖର୍ଚ୍ଚକୁ ନିର୍ବାଚନୀ ଖର୍ଚ୍ଚରେ ସାମିଲ କରିବାକୁ ଦାବି କରିଛି ବିଜେଡ଼ି। ଏହା ଛଡ଼ା ଏହି ଘଟଣା ଉପରେ ଗୁରୁତ୍ବ ଦେଇ ମୁଖ୍ୟାନିର୍ବଚନ ଅଧିକାରୀଙ୍କ ପାଖରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ବିଜେଡି ।
ରାଜ୍ୟରେ ପୁଣି ୪୦ ଡିଗ୍ରୀ ମୁହାଁ ପାରଦ
ଭୁବନେଶ୍ବର: ରାଜ୍ଯରେ ବଢିଲା ତାପମାତ୍ରା । କିଛିଦିନର ବ୍ଯବଧାନ ପରେ ପୁଣି ୪୦ ଡିଗ୍ରୀ ମୁହାଁ ପାରଦ । ଆଜି ଦିନ ସାଢେ ଦୁଇଟା ସୁଦ୍ଧା ଚାନ୍ଦବାଲି ହୋଇଛି ରାଜ୍ଯର ସବୁଠୁ ଉତ୍ତପ୍ତ ସହର ଚାନ୍ଦବାଲିରେ ୩୮.୫ ଡିଗ୍ରୀ ତାପମାତ୍ରା ରେକର୍ଡ ହୋଇଥିବାବେଳେ ୩୮.୨ ଡିଗ୍ରୀ ସହ ଦ୍ବିତୀୟ ଉତ୍ତପ୍ତ ସହର ହୋଇଛି ଭୁବନେଶ୍ବର । ସେହିପରି ବାଲେଶ୍ୱରରେ ୩୭.୨, ଝାରସୁଗୁଡାରେ ୩୬.୬, ରାଉରକେଲାରେ ୩୬.୧, ସମ୍ବଲପୁର ଓ ହୀରାକୁଦରେ ୩୫.୨, ପାରାଦ୍ୱୀପରେ ୩୪.୯, ପୁରୀ ଓ ଗୋପାଳପୁରରେ ୩୪.୬ ଏବଂ କେନ୍ଦୁଝରରେ ୩୪.୫ ଡିଗ୍ରୀ ତାପମାତ୍ରା ରେକର୍ଡ ହୋଇଛି ।
ବାଡ଼ଘେରାକୁ କେନ୍ଦ୍ରକରି ଗୋଷ୍ଠୀ ସଂଘର୍ଷ, ସ୍ଵାମୀ ଓ ସ୍ତ୍ରୀକୁ ସଂଘବଦ୍ଧ ଆକ୍ରମଣ
ବାଲେଶ୍ବର: ବାଲେଶ୍ଵର ନୀଳଗିରିରେ ଗୋଷ୍ଠୀ ସଂଘର୍ଷ। ନୀଳଗିରି ଥାନା ଅନ୍ତର୍ଗତ ବାବନ୍ଧ ଗାଁରେ ବାଡ଼ଘେରାକୁ କେନ୍ଦ୍ରକରି ଗୋଷ୍ଠୀ ସଂଘର୍ଷ ହୋଇଛି। ବୁଲିଲା ଠେଙ୍ଗା ଓ ଭୁଜାଲି। ଗୋଟିଏ ପରିବାରର ସ୍ଵାମୀ ଓ ସ୍ତ୍ରୀ ଆକ୍ରମଣରେ ଗୁରୁତର ହୋଇଛନ୍ତି। ଉଭୟଙ୍କୁ ମେଡିକାଲରେ ଭର୍ତ୍ତି କରାଯାଇଛି। ଅଜି ସକାଳେ ଗାଁର କିଛି ଯୁବକ କ୍ରିକେଟ ଖେଳିବାକୁ ଯାଉଥିବାବେଳେ ସିଂହସାହି ଛକରେ ହୋଇଥିଲା ବଚସା। ଘଟଣାକୁ କେନ୍ଦ୍ରକରି ସୁକୁରା ବେହେରା ଓ ତାଙ୍କ ପତ୍ନୀ ଆଶାମଣି ବେହେରାଙ୍କୁ ସଂଘବଦ୍ଧ ଆକ୍ରମଣ କରିଥିଲେ। ଏଥିରେ ଉଭୟ ଗୁରୁତର ହୋଇ ପଡିଥିଲେ। ନୀଳଗିରି ପୋଲିସ ଘଟଣାର ତନାଘନା ଆରମ୍ଭ କରିଛି।
ବସିଲା ବିଜେଡିର ପ୍ରଥମ ଇସ୍ତାହାର କମିଟି ବୈଠକ
ଭୁବନେଶ୍ବର: ବସିଲା ବିଜେଡିର ପ୍ରଥମ ଇସ୍ତାହାର କମିଟି ବୈଠକ। କଣ ରହିବ ଇସ୍ତାହାର ରୂପରେଖ ସେନେଇ ଶଙ୍ଖ ଭବନରେ କମିଟିର ପ୍ରଥମ ବୈଠକ ଆରମ୍ଭ ହୋଇଛି। ଗତ ବୁଧବାର ୩୮ ଜଣିଆ ଇସ୍ତାହାର କମିଟି ଗଠନ କରିଥିଲା ବିଜେଡି। ସାଂସଦ ଚନ୍ଦ୍ରଶେଖର ସାହୁ କମିଟିର ଅଧ୍ୟକ୍ଷ ରହିଥିବା ବେଳେ ଉପସଭାପତି ଦେବୀ ମିଶ୍ରଙ୍କ ସମେତ ପ୍ରତାପ ଦେବ, ସୁଦାମ ମାର୍ଣ୍ଡି, ମଙ୍ଗଳା କିଷାନ, ପଦ୍ମନାଭ ବେହେରାଙ୍କ ସହ ମୋଟ ୭ ଜଣ ସହ-ଅଧ୍ୟକ୍ଷ ରହିଛନ୍ତି । ଅମର ପଟ୍ଟନାୟକଙ୍କୁ ଆବାହକ ଭାବେ ଦାୟିତ୍ଵ ଦିଆଯାଇଛି । ୨୫ ଜଣ ସଦସ୍ୟ ରହିଛନ୍ତି । ସରକାରକୁ ଆସିଲେ ବିଜେଡି ଲୋକଙ୍କ ପାଇଁ କଣ କରିବ ସେ ନେଇ ପ୍ରସ୍ତୁତ ହେବ ଇସ୍ତାହାର। ଏହି କମିଟିର ପରାମର୍ଶ ଆଧାରରେ ପ୍ରସ୍ତୁତ ହେବ ଇସ୍ତାହାର।