ସହିଦନଗର ଗଣଦୁଷ୍କର୍ମ ମାମଲା । ରେଡ୍ ଫ୍ଲାଗ ଅନ୍ତର୍ଭୁକ୍ତ ହେଲା ଗଣଦୁଷ୍କର୍ମ ମାମଲା। କମିଶନରେଟ ପୋଲିସକୁ ତଦନ୍ତରେ ସହଯୋଗ କରିବ କ୍ରାଇମବ୍ରାଞ୍ଚ। କ୍ରାଇମବ୍ରାଞ୍ଚ ଡିଜିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ହେବ ତଦନ୍ତ । ପୂର୍ବରୁ ଧଉଳି ଗଣଦୁଷ୍କର୍ମ ମାମଲାକୁ ମଧ୍ୟ ରେଡ୍ ଫ୍ଲାଗ ଘୋଷଣା କରାଯାଇଥିଲା। ସହିଦନଗର ଗଣଦୁଷ୍କର୍ମ ମାମଲାରେ ୨ ଜଣଙ୍କୁ ଗିରଫ କରାଯାଇଛି। ଚାକିରି ଦେବାକୁ କହି ଏକ ଭଡା ଘରକୁ ଡାକି ଦୁଷ୍କର୍ମ କରିଥିଲେ ଦୁଇ ଦୁର୍ବୃତ୍ତ। ଦୁଇ ଅଭିଯୁକ୍ତ ହେଲେ ଖୋର୍ଦ୍ଧା କେରଙ୍ଗ ଅଞ୍ଚଳର ଅକ୍ଷୟ ଦାସ ଓ ମୁକୁନ୍ଦପ୍ରସାଦ ଅଞ୍ଚଳର ସାହିଲ ଖାନ।
ଲାଞ୍ଚ ଅଭିଯୋଗରେ ଲେଫ୍ଟନାଣ୍ଟ କର୍ଣ୍ଣେଲଙ୍କୁ ସିବିଆଇ କଲା ଗିରଫ, ତାଙ୍କ ଦିଲ୍ଲୀ ଘରୁ ୨ କୋଟି ଟଙ୍କା ଜବତ
ନନ୍ଦିଘୋଷ ବ୍ୟୁରୋ : ଲାଞ୍ଚ ଅଭିଯୋଗରେ ସିବିଆଇ ଲେଫ୍ଟନାଣ୍ଟ କର୍ଣ୍ଣେଲ ଦୀପକ କୁମାର ଶର୍ମାଙ୍କୁ ଗିରଫ କରିଛି। ବିନୋଦ କୁମାର ନାମକ ଜଣେ ବ୍ୟକ୍ତିଙ୍କୁ ମଧ୍ୟ ଗିରଫ କରାଯାଇଛି। କର୍ଣ୍ଣେଲଙ୍କ ଦିଲ୍ଲୀ ଘରୁ ୨ କୋଟି ଟଙ୍କା ଏବଂ ତାଙ୍କ ପତ୍ନୀଙ୍କ ରାଜସ୍ଥାନ ଘରୁ ୧୦ ଲକ୍ଷ ଟଙ୍କା ଜବତ କରାଯାଇଛି। ଏହା ପରେ, ଅଭିଯୁକ୍ତ କର୍ଣ୍ଣେଲଙ୍କ ପତ୍ନୀଙ୍କ ବିରୁଦ୍ଧରେ ମଧ୍ୟ ଏକ ମାମଲା ରୁଜୁ କରାଯାଇଛି। ସିବିଆଇ କହିଛି ଯେ ପ୍ରତିରକ୍ଷା ଉତ୍ପାଦନ ବିଭାଗରେ ଡେପୁଟି ପ୍ଲାନିଂ ଅଫିସର ଭାବରେ ନିଯୁକ୍ତ ଲେଫ୍ଟନାଣ୍ଟ କର୍ଣ୍ଣେଲ ଦୁର୍ନୀତି ଏବଂ ବେଆଇନ କାର୍ଯ୍ୟକଳାପର ଅଭିଯୁକ୍ତ।
ସିବିଆଇ ତଦନ୍ତରୁ ଜଣାପଡିଛି ଯେ ଲେଫ୍ଟନାଣ୍ଟ କର୍ଣ୍ଣେଲ ଦୀପକ କୁମାର ଶର୍ମା କିଛି ଘରୋଇ ପ୍ରତିରକ୍ଷା କମ୍ପାନୀକୁ ବେଆଇନ ଭାବରେ ଲାଭ ଦେବା ପାଇଁ ଟଙ୍କା ନେଉଥିଲେ । ବେଙ୍ଗାଲୁରୁର ଏକ କମ୍ପାନୀ ଠାରୁ ଡିସେମ୍ବର ୧୮ତାରିଖରେ ଦୀପକ ୩ ଲକ୍ଷ ଲାଞ୍ଚ ନେଉଥିବାର ସୂଚନା ମିଳିଥିଲା। ଏହା ପରେ, ସିବିଆଇ ଏକ ଜାଲ ବିଛାଇ ଶର୍ମାଙ୍କୁ ଗିରଫ କରିଥିଲା। ଘଟଣାସ୍ଥଳରୁ ୩ ଲକ୍ଷ ଜବତ କରିବା ସହିତ, ଟଙ୍କା ଦେବାକୁ ଆସିଥିବା ବିନୋଦ କୁମାରଙ୍କୁ ମଧ୍ୟ ସିବିଆଇ ଗିରଫ କରିଛି ।
ତଦନ୍ତ ସମୟରେ ଜଣାପଡିଥିଲା ଯେ କମ୍ପାନୀର ରାଜୀବ ଯାଦବ ଏବଂ ରଭଜିତ ସିଂହ ଦୀର୍ଘ ଦିନ ଧରି ଦୀପକ ଶର୍ମାଙ୍କ ସହ ଯୋଗାଯୋଗରେ ଥିଲେ। ଜଣାପଡିଥିଲା ଯେ ସେମାନେ ଲେଫ୍ଟନାଣ୍ଟ କର୍ଣ୍ଣେଲ ଦୀପକ କୁମାର ଶର୍ମାଙ୍କ ସହ ମିଶି ବିଭିନ୍ନ ସରକାରୀ ବିଭାଗ ଏବଂ ମନ୍ତ୍ରଣାଳୟରୁ ଲାଭ ପାଇବାକୁ ଚେଷ୍ଟା କରୁଥିଲେ।
ସିବିଆଇ ରିପୋର୍ଟ ଅନୁସାରେ, ଲେଫ୍ଟନାଣ୍ଟ କର୍ଣ୍ଣେଲ ଦୀପକ କୁମାର ଶର୍ମାଙ୍କ ଦିଲ୍ଲୀ ବାସଭବନରେ ଯାଞ୍ଚ ସମୟରେ ୨.୨୩ କୋଟି ଟଙ୍କାର ନଗଦ ଜବତ କରାଯାଇଛି। ରିପୋର୍ଟ ଅନୁଯାୟୀ, ଏହି ପରିମାଣ ଦେଖି ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ। ରାଜସ୍ଥାନର ଶ୍ରୀଗଙ୍ଗାନଗରରେ ୧୬ତମ ପଦାତିକ ଡିଭିଜନ ଅର୍ଡନାନ୍ସର କମାଣ୍ଡିଂ ଅଫିସର ଭାବରେ କାର୍ଯ୍ୟରତ ଶର୍ମାଙ୍କ ପତ୍ନୀ କର୍ଣ୍ଣେଲ କାଜଲ ବାଲିଙ୍କ ବାସଭବନରେ ମଧ୍ୟ ସିବିଆଇର ଏକ ଟିମ୍ ଯାଞ୍ଚ କରିଥିଲା। ୧୦ ଲକ୍ଷ ନଗଦ ଜବତ ହେବା ପରେ କର୍ଣ୍ଣେଲ କାଜଲ ବାଲିଙ୍କ ବିରୋଧରେ ଏକ ମାମଲା ରୁଜୁ କରାଯାଇଛି।
୧୯ ବର୍ଷରୁ କମ ଏସିଆ କପ ଗ୍ରାଣ୍ଡ ଫିନାଲରେ ଭାରତ-ପାକିସ୍ତାନ ଟକ୍କର
ନନ୍ଦିଘୋଷ ବ୍ୟୁରୋ : ସୁପର ସନଡେରେ ସୁପର ମୁକାବିଲା । ୧୯ ବର୍ଷରୁ କମ ଏସିଆ କପ ଗ୍ରାଣ୍ଡ ଫିନାଲରେ ଟସ ଜିତି ଭାରତର ବୋଲିଂ ନିଷ୍ପତ୍ତି । ମୁହାଁମୁହଁ ହେଉଛନ୍ତି ଦୁଇ ପାରମ୍ପରିକ ପ୍ରତିଦ୍ବନ୍ଦୀ ଭାରତ ଓ ପାକିସ୍ତାନ । ଦୁବାଇରେ ଖେଳାଯାଉଛି ମ୍ୟାଚ୍ । ଶ୍ରୀଲଙ୍କାକୁ ସେମିଫାଇନାଲରେ ହରାଇ ଫାଇନାଲରେ ପ୍ରବେଶ କରିଛି ଭାରତ । ସେପଟେ ବାଂଲାଦେଶକୁ ହରାଇ ଫାଇନାଲରେ ପ୍ରବେଶ କରିଛି ପାକିସ୍ତାନ । ଭାରତର ବିଜୟ ଧାରାରେ ବ୍ରେକ ଲଗାଇବାକୁ ପାକିସ୍ତାନ ପୂର୍ଣ୍ଣମାତ୍ରାରେ ଚେଷ୍ଟା କରିବ । ଟୁର୍ଣ୍ଣାମେଣ୍ଟରେ ଟିମ୍ ଇଣ୍ଡିଆର ପଲ୍ଲା ଭାରି ରହିଥିବା ବେଳେ ନବମ ଥର ଲାଗି ଚାମ୍ପିଅନ ହେବା ଲକ୍ଷ୍ୟରେ ଆୟୁଷ ମାଥ୍ରେ ସ୍କ୍ବାଡ । ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ଉପରେ ସମସ୍ତଙ୍କ ନଜର ରହିଛି । ଫାଇନାଲ୍ ମ୍ୟାଚ୍ ବେଶ୍ ପ୍ରତିଦ୍ବନ୍ଦ୍ବିତାଭରା ଏବଂ ହାଇଭୋଲ୍ଟେଜ୍ ହେବ ବୋଲି ଆଶା କରାଯାଉଛି ।
ସୁଧୁରୁନି ଦିଲ୍ଲୀର ବାୟୁ ପ୍ରଦୂଷଣ
ନନ୍ଦିଘୋଷ ବ୍ୟୁରୋ : ଦିଲ୍ଲୀରେ ବଢୁଛି ଏକ୍ୟୁଆଇ ବିପଦ। ଦିନକୁ ଦିନ ସ୍ଥିତି ହେଉଛି ସଂଗୀନ। ପ୍ରବଳ ଶୀତରେ ଦିଲ୍ଲୀ ଥରୁଥିବାବେଳେ ବାୟୁ ଗୁଣବତ୍ତା ବି ଅଧିକ ଚିନ୍ତାଜନକ ହୋଇଛି। ସେପଟେ ଘନ କୁହୁଡ଼ି ଯୋଗୁ ସ୍ଥିତି ଅଧିକ ଦୟନୀୟ ହୋଇଛି। ଗତକାଲି ଦିଲ୍ଲୀ ବିମାନବନ୍ଦରରେ ୧୨୯ଟି ବିମାନ ବାତିଲ ହୋଇଥିବାବେଳେ ଆଜି ବି ସ୍ଥିତି ସେପରି ହେବା ଆଶଙ୍କା କରାଯାଉଛି। ଗତକାଲି ସଫଦରଜଙ୍ଗରେ ସର୍ବାଧିକ ତାପମାତ୍ରା ୧୬.୯ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିବା ବେଳେ ପାଲମରେ ୧୬.୩ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି। ଆଜି ଘନରୁ ଅତି ଘନ କୁହୁଡ଼ି ରହିବ ବୋଲି ଆଇଏମଡି ପୂର୍ବାନୁମାନ କରିଛି ଏବଂ ଏନେଇ ଅରେଞ୍ଜ ଆଲର୍ଟ ଜାରି କରିଛି।.
ସୁଧୁରୁନି ଗାଜା ସ୍ଥିତି : ଜୁଲାଇ ୨୦୨୪ରୁ ବର୍ତ୍ତମାନ ସୁଦ୍ଧା ଗଲାଣି ୧ ହଜାରରୁ ଅଧିକ ରୋଗୀଙ୍କ ଜୀବନ
ନନ୍ଦିଘୋଷ ବ୍ୟୁରୋ : ଯୁଦ୍ଧର ୨ ବର୍ଷ ପରେ ବି ସୁଧୁରୁନି ଗାଜା ସ୍ଥିତି। ଗତ ଜୁଲାଇ ୨୦୨୪ରୁ ବର୍ତ୍ତମାନ ସୁଦ୍ଧା ୧ ହଜାରରୁ ଅଧିକ ରୋଗୀଙ୍କ ମୃତ୍ୟୁ ଘଟିଲାଣି ବୋଲି କହିଛି ବିଶ୍ବ ସ୍ବାସ୍ଥ୍ୟ ସଂଗଠନ। ଗାଜାର ବିଭିନ୍ନ ହସ୍ପିଟାଲରେ ବର୍ତ୍ତମାନ ୧୬ ହଜାର ୫୦୦ରୁ ଅଧିକ ରୋଗୀ ଜୀବନ ମରଣ ସହ ଲଢୁଛନ୍ତି ବୋଲି କହିଛି ସଂଗଠନ। ସେମାନଙ୍କୁ ତୁରନ୍ତ ଉଦ୍ଧାର କରି ଅନ୍ୟତ୍ର ନ ନିଆଗଲେ ସ୍ଥିତି ଅଧିକ ସଂଗୀନ ହେବ ବୋଲି ଆଶଙ୍କା ପ୍ରକାଶ ପାଇଛି। ତେବେ ୧୬ ହଜାର ୫୦୦ ନୁହେଁ ବରଂ ଏହି ସଂଖ୍ୟା ୪ ଗୁଣ ହେବ ବୋଲି କହିଛି ଡକ୍ଟର୍ସ ଉଇଦଆଉଭ ବର୍ଡର୍ସ। ରୋଗୀମାନେ ଔଷଧ ନପାଇ ହାହାକାର ମଧ୍ୟରେ ଗତି କରୁଛନ୍ତି। ବିଶ୍ବ ସ୍ବାସ୍ଥ୍ୟ ସଂଗଠନ ମୁଖ୍ୟ ଟେଡରସ ଅଧନମ ଘେବ୍ରିସିୟସ କହିଛନ୍ତି ୨୦୨୨ରେ ଯୁଦ୍ଧ ଆରମ୍ଭ ପରଠାରୁ ୧୦ ହଜାର ୬୦୦ ରୋଗୀଙ୍କୁ ସ୍ଥାନାନ୍ତର କରାଯାଇଛି। ସେମାନଙ୍କ ମଧ୍ୟରେ ଅଛନ୍ତି ୫ ହଜାର ଶିଶୁ। ଯଦି ରୋଗୀଙ୍କ ଲାଗି ତୁରନ୍ତ ଔଷଧ ବ୍ୟବସ୍ଥା ନକରାଯାଏ ତେବେ ମୃତ୍ୟୁ ସଂଖ୍ୟା ବହୁ ଅଧିକ ହେବ ବୋଲି ଆଶଙ୍କା ପ୍ରକାଶ ପାଇଛଇ। ଡିସେମ୍ବର ୧ ଯାଏ ପ୍ରାୟ ୩୦ ରାଷ୍ଟ୍ର ଗାଜାର ବହୁ ରୋଗୀଙ୍କୁ ନିଜ ନିଜ ଦେଶକୁ ନେଇଛନ୍ତି। ମାତ୍ର ଇଜିପ୍ଟ ଓ ୟୁଏଇ ବହୁ କମ୍ ସଂଖ୍ୟକ ରୋଗୀଙ୍କୁ ନିଜ ଦେଶକୁ ନେଇଛନ୍ତି।
ଭାରତ-ବାଂଲାଦେଶ ମଧ୍ୟରେ ସମ୍ପର୍କ ହେଉଛି ତିକ୍ତ, ଦୁଇ ଦେଶ ମଧ୍ଯରେ କୂଟନୈତିକ ଉତ୍ତେଜନା ଜାରି
ନନ୍ଦିଘୋଷ ବ୍ୟୁରୋ : ଭାରତ-ବାଂଲାଦେଶ ମଧ୍ୟରେ ସମ୍ପର୍କ ହେଉଛି ତିକ୍ତ। ବାଂଲାଦେଶରେ ଭାରତ ବିରୋଧୀ କାର୍ଯ୍ୟକଳାପ ବଢୁଥିବାରୁ ଦୁଇ ଦେଶ ମଧ୍ଯରେ କୂଟନୈତିକ ଉତ୍ତେଜନା ଜାରି ରହିଛି। ବାଂଲାଦେଶର ଅନ୍ତରୀଣ ଶାସକ ମହମ୍ମଦ ୟୁନୁସଙ୍କ ଦୋମୁହାଁ ନୀତି ହିଁ ଭାରତ ଲାଗି ସବୁଠାରୁ ଅଧିକ ବିପଦ ସୃଷ୍ଟି କରୁଛି। ଉଗ୍ରବାଦୀ ସଂଗଠନକୁ ତୋଷଣ କରିବା ଲାଗି ସେ ଦେଶରେ ହିଂସା ରୋକିବାରେ ଅକ୍ଷମ ବୋଲି ଚର୍ଚ୍ଚା ହେଉଛି। ବାଂଲାଦେଶ ଜମାତ-ଇ-ଇସଲାମି, ଇସଲାମି ଛାତ୍ର ଶିବିର, ଅନସୁରୁଲ୍ଲା ବାଂଲା ଟିମ୍, ହିଜବ ଉତ ତାହିର, ଇସଲାମି ଆନ୍ଦୋଳନ ବାଂଲାଦେଶ ଆଦି ସଂଗଠନ ସହ ୟୁନୁସ ହାତ ମିଳାଇଥିବା ସୂଚନା ମିଳୁଛି। ସେପଟେ ଦୁଇ ଦେଶ ମଧ୍ୟରେ ସ୍ଥିରତା ରକ୍ଷା ଲାଗି ଦୁଇ ଦେଶର ସେନାମୁଖ୍ୟମାନେ ଆଲୋଚନା କରିଥିବା ସୂଚନା ମିଳିଛି। ବାଂଲାଦେଶ ସେନା ମୁଖ୍ୟ ଜେନେରାଲ ୱାକର ଉଜ ଜମାନ କହିଛନ୍ତି- ଭାରତର ସେନାମୁଖ୍ୟ ସେ ଦୁଇ ଦେଶ ମଧ୍ୟରେ ସ୍ଥିରତା ପ୍ରସଙ୍ଗରେ ଆଲୋଚନା କରିଛନ୍ତି। ପଡ଼ୋଶୀ ରାଷ୍ଟ୍ର ସହ ଶାନ୍ତି ରକ୍ଷା କରିବା ତାଙ୍କର ଉଦ୍ଦେଶ୍ୟ ବୋଲି ସେ କହିଛନ୍ତି। ଭାରତ ବିରୋଧୀ ନେତା ଶରିଫ ଓସମାନ ହାଦିଙ୍କ ମୃତ୍ୟୁ ପରେ ବାଂଲାଦେଶରେ ହିଂସା ସୃଷ୍ଟି ହୋଇଥଇଲା। ବିଶେଷ କରି ଶେଖ ହସିନା ସରକାରର ପତନ ପରଠାରୁ ବାଂଲାଦେଶରେ ହିନ୍ଦୁ ବିରୋଧୀ ମନୋଭାବ ବଢୁଥିବାରୁ ଭାରତ ପକ୍ଷରୁ ଚିନ୍ତାବ୍ୟକ୍ତ କରାଯାଇଛି। ବାଂଲାଦେଶରେ ଘଟୁଥିବା ହିଂସାକୁ ସାଧାରଣ ଭାବେ ଗ୍ରହଣ କରାଯାଇପାରିବ ନାହିଁ। ଚଟ୍ଟୋଗ୍ରାମସ୍ଥିତ ଭାରତର ସହକାରୀ ଉଚ୍ଚାୟୁକ୍ତଙ୍କ କାର୍ଯ୍ଯାଳୟ ଉଫରେ ଆକ୍ରମଣ ଘଟଣାକୁ ସହଜ ଭାବେ ଗ୍ରହଣ କରାଯାଇପାରିବା ନାହିଁ। ବିଶେଖ କରି ଜମାଏତ-ଇ-ଇସଲାମି ସହ ସମ୍ପର୍କିତ ସଂଗଠନଗୁଡିକ ଜରିଆରେ ଭାରତ ବିରୋଧୀ ହିଂସା ଜାରି ରହିଛି।
ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର ନଥିଲେ ପେଟ୍ରୋଲ ପମ୍ପରେ ମିଳିବନି ତେଲ
ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର ନଥିଲେ ପେଟ୍ରୋଲ ପମ୍ପରେ ମିଳିବନି ତେଲ
ନନ୍ଦିଘୋଷ ବ୍ୟୁରୋ: ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର (PUCC) ନଥିଲେ ତେଲ ମିଳିବ ନାହିଁ । ପରିବହନ କ୍ଷେତ୍ରରେ ପରିବେଶ ସୁରକ୍ଷାକୁ ଦୃଷ୍ଟିରେ ରଖି ପଦକ୍ଷେପ ନିଆଯାଉଛି । ତେଲ ବିକ୍ରୟକାରୀ କମ୍ପାନୀଗୁଡ଼ିକୁ ଚିଠି ଲେଖିଲା ବାଣିଜ୍ୟ ଓ ପରିବହନ ବିଭାଗ ।
ମୋଟର ଯାନ ନିୟମ ଉଲ୍ଲଙ୍ଘନ କରି ପ୍ରଦୂଷଣ ସୃଷ୍ଟି କରୁଥିବା ଯାନ ଉପରେ ଲାଗିବ ଅଙ୍କୁଶ । ମୋଟର ଯାନ ନିୟମ ଉଲ୍ଲଙ୍ଘନ କରି ପ୍ରଦୂଷଣ ସୃଷ୍ଚି କରୁଥିବା ଯାନ ଉପରେ ଅଙ୍କୁଶ ଲଗାଇବାକୁ ବାଣିଜ୍ୟ ଓ ପରିବହନ ବିଭାଗ ପଦକ୍ଷେପ ନେଉଛି । ଯେଉଁ ମୋଟର ଯାନର ବୈଧ ପ୍ରଦୂଷଣ ପ୍ରମାଣପତ୍ର ନଥିବ, କୌଣସି ପେଟ୍ରୋଲ ପମ୍ପରେ ତେଲ ନ ଦେବାକୁ ଚିଠିରେ ଉଲ୍ଲେଖ କରାଯାଇଛି । ମୋଟର ଯାନ ଆଇନ ଅନୁଯାୟୀ ବୈଧ ପ୍ରଦୂଷଣ ପ୍ରମାଣପତ୍ର ରଖିବା ବାଧ୍ୟତାମୂଳକ । ଏଥିପାଇଁ ଗାଡ଼ିଗୁଡିକୁ ନିୟମିତ ବ୍ୟବଧାନରେ ପଞ୍ଜିକୃତ ପ୍ରଦୂଷଣ ପରୀକ୍ଷା କେନ୍ଦ୍ରରେ ଯାଞ୍ଚ କରାଇବାକୁ ହୋଇଥାଏ । ପ୍ରଦୂଷଣ ପ୍ରମାଣପତ୍ର ଯାଞ୍ଚକୁ ଗୁରୁତ୍ୱ ଦେଇ ସମସ୍ତ ଟୋଲଗେଟରେ ଇ-ଡିଟେକ୍ସନ ବ୍ୟବସ୍ଥାରେ ମଧ୍ୟ ଏହାକୁ ଅନ୍ତର୍ଭୁକ୍ତ କରାଯାଇଛି । ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ମୋଟର ଯାନ ବ୍ୟବହାରକାରୀଙ୍କୁ ନିବେଦନ କରାଯାଇଛି ଯେ, ସର୍ବଦା ଗାଡ଼ିର ବୈଧ ପ୍ରଦୂଷଣ ପ୍ରମାଣପତ୍ର ରଖନ୍ତୁ । ପ୍ରଦୂଷଣ ସୃଷ୍ଟି କରୁଥିବା ଯାନକୁ ବ୍ୟବହାର କରନ୍ତୁ ନାହିଁ । ପରିବେଶ ସୁରକ୍ଷାରେ ସହଭାଗୀ ହୁଅନ୍ତୁ ।
ଓଡ଼ିଆ ଭାଷାକୁ ସମୃଦ୍ଧ କରିବ AI: ମୂଲ୍ୟବାନ ଇନପୁଟ ପାଇଁ ଓଡ଼ିଶା ଭର୍ଚୁଆଲ୍ ଏକାଡେମୀ ଶୀଘ୍ର ଆରମ୍ଭ କରିବ ଓଡ଼ିଆ ଭାଷା ଦାନ ଅଭିଯାନ
ଓଡ଼ିଆ ଭାଷାକୁ ସମୃଦ୍ଧ କରିବ AI: ମୂଲ୍ୟବାନ ଇନପୁଟ ପାଇଁ ଓଡ଼ିଶା ଭର୍ଚୁଆଲ୍ ଏକାଡେମୀ ଶୀଘ୍ର ଆରମ୍ଭ କରିବ ଓଡ଼ିଆ ଭାଷା ଦାନ ଅଭିଯାନ
ନନ୍ଦିଘୋଷ ବ୍ୟୁରୋ: ଓଡ଼ିଆ ଭାଷାକୁ ବଳ ଯୋଗାଇବ ଆର୍ଟିଫିସିଆଲ ଇଣ୍ଟେଲିଜେନ୍ସ । ବିଶ୍ୱବ୍ୟାପୀ ଓଡ଼ିଆ ଭାଷାର ପ୍ରଚାର ପ୍ରସାର ପାଇଁ ସାହାଯ୍ୟ କରିବ ଏଆଇ । ଏଥିପାଇଁ ଦରକାର ପଡୁଥିବା ତଥ୍ୟ ହାସଲ ପାଇଁ ଖୁବଶୀଘ୍ର ଆରମ୍ଭ ହେବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଶିକ୍ଷା, ସ୍ୱାସ୍ଥ୍ୟ, ବିପର୍ଯ୍ୟୟ ପରିଚାଳନା କ୍ଷେତ୍ରରେ ମଧ୍ୟ ଉନ୍ନତ ସେବା ପାଇଁ ପ୍ରଶାସନକୁ ସାହାଯ୍ୟ କରିବ ଏଆଇ । ଏସବୁ ପାଇଁ ଆବଶ୍ୟକୀୟ ଭିତ୍ତିଭୂମି ଓ ଟେକ୍ନୋଲୋଜି ପ୍ରସ୍ତୁତି କାମରେ ଲାଗିଛି ରାଜ୍ୟ ସରକାରଙ୍କ ଆଇଟି ବିଭାଗ ।
ଖୁବଶୀଘ୍ର ଆରମ୍ଭ ହେବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଓଡ଼ିଆ ଭାଷା କ୍ଷେତ୍ରର ବିଜ୍ଞ ବ୍ୟକ୍ତି ଓ ଅନୁଷ୍ଠାନ ଦେଇପାରିବେ ସେମାନଙ୍କ ଇନପୁଟ । କାରଣ ଇନପୁଟ୍ ଡାଟା ବା ତଥ୍ୟ ଯେତେ ବଳିଷ୍ଠ ହେବ, ଭାଷା ସେତେ ସମୃଦ୍ଧ ହେବ । ପର୍ଯ୍ୟାପ୍ତ ଡାଟା ମିଳିଲେ ଲୋକେ ଓଡ଼ିଆ ଭାଷାରେ ଓଡିଶା ବିଷୟରେ ଅଧିକ ଜାଣିପାରିବେ । ଓଡ଼ିଆ ଭାଷାର ପ୍ରଚାର ପ୍ରସାର ପାଇଁ ଆର୍ଟିଫିସିଆଲ ଇଣ୍ଟିଲିଜେନ୍ସ ସହାୟକ ହେବ । ଆଇଆଇଟି ମାଡ୍ରାସର ଭାରତ ଏଆଇ ହେଉ କି ଆଇଆଇଟି ଭୁବନେଶ୍ୱରର ଭାସିନୀ ଏଆଇ ମଡ୍ୟୁଲ ଖୁବ ସହାୟକ ହେବ । ଓଡ଼ିଶା ଭରଚୁଆଲ ଏକାଡେମୀ ଆରମ୍ଭ କରିବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଆଇଆଇଟି ଭୁବନେଶ୍ୱର ଦ୍ୱାରା ଖୋଲାଯାଇଥିବା ଏଏଚଆରସି କେନ୍ଦ୍ରରେ ଓଡିଆ ଭାଷା ବାବଦରେ ଯେ କୌଣସି ବ୍ୟକ୍ତି କିମ୍ବା ଅନୁଷ୍ଠାନ ନିଜ ନିଜର ଗବେଷଣାର ତଥ୍ୟ ଦାଖଲ କରିପାରିବେ । ଭାଷା ବିଷୟରେ ଅବଦାନ ପାଇଁ ହାତଲେଖା, ସ୍ୱର କିମ୍ବା ସ୍କ୍ରିପଟିଂ ଗ୍ରହଣ କରାଯିବ । ଡାଟା ଷ୍ଟୋରେଜ ପାଇଁ ସ୍ୱତନ୍ତ୍ର ସର୍ଭର ବ୍ୟବସ୍ଥା କରାଯାଇଛି ।
ଓଡ଼ିଆ ଭାଷାଦାନ ଅଭିଯାନରେ ନିଯୁକ୍ତ ହେବେ ୫ ଶହ ଡାଟା ଇଞ୍ଜିନିୟର । ରାଜ୍ୟସ୍ତରରେ କାମ କରିବେ ଶହେରୁ ଅଧିକ ଏଆଇ ଏକ୍ସପର୍ଟ । ଓଡ଼ିଆ ଭାଷା ବିଷୟରେ କୋଣ ଅନୁକୋଣରୁ ଆସୁଥିବା ଇନପୁଟକୁ ଏମାନେ ଅନୁଧ୍ୟାନ କରି ନିର୍ଭୁଲ ଭାବେ ଉପସ୍ଥାପନ କରିବେ । ଭୁବନେଶ୍ୱରରେ ଚାଲିଥିବା ଦୁଇ ଦିନିଆ ଏଆଇ ଇମ୍ପାକ୍ଟ ସମ୍ମିଳନୀରେ ଏହା ଉପରେ ବିଦେଶରୁ ଆସିଥିବା ଏକ୍ସପର୍ଟମାନେ ଆଲୋଚନା କରିଛନ୍ତି । ମଣିଷ ଭଳି ଦେଖାଯାଉଥିବା ରୋବଟ ଆକର୍ଷଣ ପାଲଟିଛି । ମଣିଷ ଭଳି ଦୌଡ଼ି ପାରୁଛି, ନାଚି ପାରୁଛି । ସେଲ୍ଫି ପାଇଁ ରୋବଟ ପାଖରେ ଭିଡ଼ ମଧ୍ୟ କିଛି କମ୍ ନୁହେଁ । ଓଡ଼ିଆ ଭାଷା ଭଳି ଶିକ୍ଷା, ସ୍ୱାସ୍ଥ୍ୟ, ଶକ୍ତି ଓ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏଆଇର ଉପଯୋଗ ପାଇଁ ଉଦ୍ୟମ ଆରମ୍ଭ ହୋଇଛି । ଏଥିପାଇଁ ଆଇଟି ବିଭାଗ ପକ୍ଷରୁ ଭିତ୍ତିଭୂମି ଓ ଟେକ୍ନୋଲୋଜି ଉପରେ ଗୁରୁତ୍ୱ ଦିଆଯାଉଛି ।
ଓଡ଼ିଶା ପ୍ରଥମ ରାଜ୍ୟ ଭାବେ ଏଆଇ ପଲିସି ଆଣିବା ସହ ଏଆଇ ଭିତ୍ତିଭୂମି ଓ ଟେଲକ୍ନୋଲୋଜି ପାଇଁ ବଜେଟରେ ବ୍ୟବସ୍ଥା କରିଛନ୍ତି ସରକାର । ଏଆଇ ଇମ୍ପାକ୍ଟ ସମ୍ମିଳନୀରେ ଗଣତାନ୍ତ୍ରିକ ପ୍ରକ୍ରିୟାରେ ଏଆଇର ଭୂମିକା ନେଇ ଆଲୋଚନା ଚାଲିଛି ।
୨୬ରେ ପ୍ରତିଷ୍ଠା ଦିବସ ପାଳିବ ବିଜେଡି: ପ୍ରତି ନିର୍ବାଚନ ମଣ୍ଡଳୀରେ ନବୀନ ସରକାର ସମୟର ସଫଳତା ବଖାଣିବେ ନେତା
୨୬ରେ ପ୍ରତିଷ୍ଠା ଦିବସ ପାଳିବ ବିଜେଡି: ପ୍ରତି ନିର୍ବାଚନ ମଣ୍ଡଳୀରେ ନବୀନ ସରକାର ସମୟର ସଫଳତା ବଖାଣିବେ ନେତା
ନନ୍ଦିଘୋଷ ବ୍ୟୁରୋ: ଆସନ୍ତା ୨୬ ତାରିଖରେ ୨୯ତମ ପ୍ରତିଷ୍ଠା ଦିବସ ପାଳନ କରିବ ବିଜୁ ଜନତା ଦଳ । ଏହାକୁ ପ୍ରତି ନିର୍ବାଚନ ମଣ୍ଡଳୀରେ ପାଳନ କରିବ ବିଜେଡି । ଏହି ଅବସରରେ ନବୀନ ପଟ୍ଟନାୟକଙ୍କ ସରକାର ସମୟର ସଫଳତା ଓ ବର୍ତ୍ତମାନ ସରକାରର ପ୍ରତାରଣା ସମ୍ପର୍କରେ ସୃଷ୍ଟି କରାଯିବ ଜନସଚେତନତା । ଜନସେବା ଜାରି ରଖିବାକୁ ପ୍ରତିଷ୍ଠା ଦିବସରେ ସଂକଳ୍ପ ନେବେ ଦଳୀୟ କର୍ମୀ ଓ ନେତୃବୃନ୍ଦ । ଏହାସହ ଭୋଟ ଚୋରି ପରି ପ୍ରସଙ୍ଗ ମଧ୍ୟ ଉଠାଇବ ଦଳ ।
୨୮ ବର୍ଷ ପୂରଣ କରି ୨୯ ବର୍ଷରେ ପଦାର୍ପଣ କରିବ ବିଜୁ ଜନତା ଦଳ । ଏହାକୁ ପ୍ରତି ନିର୍ବାଚନ ମଣ୍ଡଳୀରେ କରାଯିବ ପାଳନ । ଏଥିପାଇଁ ଦଳୀୟ ପଦାଧିକାରୀଙ୍କୁ ଚିଠି ଲେଖି ସେବା କାର୍ଯ୍ୟ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଗତ ୨୮ ବର୍ଷ ଧରି ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାପର ଭାବେ ଜନତାଙ୍କ ପାଇଁ ନିରବଚ୍ଛିନ୍ନ ଭାବେ କାମ କରି ଆସୁଛି ବିଜେଡି । ୨୮ ବର୍ଷର ଏହି ଲମ୍ବା ସମୟରେ ଲୋକଙ୍କ ସେବା ଓ ରାଜ୍ୟର ବିକାଶ କରି ଆସୁଛି ଦଳ । ରାଜନୈତିକ ଓ ସାମାଜିକ ଅଙ୍ଗୀକାର ବଦ୍ଧତା ପାଇଁ ମଧ୍ୟ ବେଶ ପରିଚିତ ଲାଭ କରିଛି । ଖାଲି ସେତିକି ନୁହେଁ, ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି ଦଳ । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଦର୍ଶରେ ଓଡ଼ିଶାର ସବୁ କ୍ଷେତ୍ରରେ ଓ ସବୁ ବର୍ଗର ଲୋକଙ୍କ ବିକାଶ ପାଇଁ ଜନତାଙ୍କ ଅକୁଣ୍ଠ ସମର୍ଥନ ଓ ଶୁଭେଚ୍ଛା ପାଇ ଆସିଛି । ସେହିପରି କର୍ମକର୍ତ୍ତା ଓ ଜନ ପ୍ରତିନିଧିଙ୍କ ନିଷ୍ଠା ମନୋଭାବ ଯୋଗୁଁ ଲୋକଙ୍କ ନିକଟତର ହୋଇଛି ବିଜେଡି ।
ଏକ ଦାୟିତ୍ଵ ସମ୍ପନ୍ନ ବିରୋଧୀ ଦଳ ଭାବେ ବିକାଶର ଆଭିମୁଖ୍ୟକୁ ପ୍ରାଥମିକତା ଦେଇଆସୁଛି ବିଜେଡି । ଏହାସହ ବିଭିନ୍ନ ଜନସ୍ବାର୍ଥ ସମ୍ବଳିତ ପ୍ରସଙ୍ଗରେ ଜନସାଧାରଣଙ୍କୁ ସଚେତନ କରାଉଛି । ରାଜ୍ୟର ସ୍ବାର୍ଥ ପାଇଁ ସ୍ବର ବି ଉତ୍ତୋଳନ କରୁଛି ଦଳ । ଓଡ଼ିଶାବାସୀଙ୍କ ଭଲ ପାଇବାକୁ ପାଥେୟ କରି ବିଜେଡି ତା’ର କାର୍ଯ୍ୟକ୍ରମକୁ ଜାରି ରଖିବ । ସେହିପରି ନବୀନ ସରକାରଙ୍କ ସମୟରେ ନିଆଯାଇଥିବା ସଫଳ କାର୍ଯ୍ୟକ୍ରମ ଓ ବର୍ତ୍ତମାନର ବିଜେପି ସରକାରର ଜନ ବିରୋଧୀ ନୀତି, ଦରଦାମ ବୃଦ୍ଧି, କୁଆଡ଼େ ଗଲା ନିର୍ବାଚନୀ ପ୍ରତିଶୃତି ପରି ପ୍ରସଙ୍ଗରେ ପ୍ରତିଷ୍ଠା ଦିବସରେ ଆଲୋଚନା ହେବ । ଏହି ଅବସରରେ ନବୀନ ପଟ୍ଟନାୟକଙ୍କ ନେତୃତ୍ବରେ ଓଡ଼ିଶାବାସୀଙ୍କ ସ୍ବାଭିମାନକୁ ରକ୍ଷା କରିବାର ସଂକଳ୍ପ ନେବେ ଦଳୀୟ ନେତା ଓ କର୍ମୀ ।
ପ୍ରତିଷ୍ଠା ଦିବସ ଅବସରରେ ଓଡ଼ିଶାବାସୀଙ୍କୁ ଶୁଭକାମନା ଜଣାଇବେ ନବୀନ । ଏହାସହ ନୂଆବର୍ଷ ସମସ୍ତ ପାଇଁ ମଙ୍ଗଳମୟ ହେଉ ବୋଲି ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ସେ ପ୍ରାର୍ଥନା କରିବେ ।
ଆଞ୍ଚଳିକ ଦଳ ଗଠନକୁ ବିଜୟ ମହାପାତ୍ରଙ୍କ ନା, କହିଲେ- କାହାରି ସହ କରିନି ଆଲୋଚନା କି କେହି ମୋ ସହ କରି ନାହାଁନ୍ତି ମନ୍ତ୍ରଣା
ଆଞ୍ଚଳିକ ଦଳ ଗଠନକୁ ବିଜୟ ମହାପାତ୍ରଙ୍କ ନା, କହିଲେ- କାହାରି ସହ କରିନି ଆଲୋଚନା କି କେହି ମୋ ସହ କରି ନାହାଁନ୍ତି ମନ୍ତ୍ରଣା
ନନ୍ଦିଘୋଷ ବ୍ୟୁରୋ: କଂଗ୍ରେସରୁ ବହିଷ୍କୃତ ନେତା ମହମ୍ମଦ ମୋକିମ ଓ ବରିଷ୍ଠ ରାଜନେତା ବିଜୟ ମହାପାତ୍ରଙ୍କ ଭେଟଘାଟ ପରେ ଏବେ ରାଜ୍ୟ ରାଜନୀତିରେ ନୂଆ ଅଙ୍କକଷା ନେଇ ଚର୍ଚ୍ଚା ଚାଲିଛି । ରାଜ୍ୟରେ ଆଉ ଏକ ଆଞ୍ଚଳିକ ଦଳ ମୁଣ୍ଡ ଟେକି ପାରେ ବୋଲି ଚର୍ଚ୍ଚା ହେଉଛି । କିନ୍ତୁ ଏଥିରେ ବର୍ତ୍ତମାନ ଲାଗି ପୂର୍ଣ୍ଣଚ୍ଛେଦ ଟାଣିଛନ୍ତି ନିଜେ ବିଜୟ ମହାପାତ୍ର । ଓଡିଶାରେ ନୂଆ ଆଂଚଳିକ ଦଳ ନେଇ କୌଣସି ଆଲୋଚନା କରିନାହିଁ କି ନିକଟ ଭବିଷ୍ୟତରେ ମଧ୍ୟ ଏହା ହେବାର ସମ୍ଭାବନା ନାହିଁ ବୋଲି ବିଜୟ କହିଛନ୍ତି । ଅନ୍ୟପଟେ ବିଜେଡି କହିଛି, ଯିଏ ଯେଉଁଠି ବସିଗଲେ ଆଞ୍ଚଳିକ ଦଳ ଠିଆ ହୋଇଯାଏ ନାହିଁ ।
ଆଞ୍ଚଳିକ ଦଳ ଗଠନ ଚର୍ଚ୍ଚାକୁ ଖଣ୍ଡନ କଲେ ବରିଷ୍ଠ ରାଜନେତା ବିଜୟ ମହାପାତ୍ର । କଂଗ୍ରେସରୁ ବହିଷ୍କୃତ ପୂର୍ବତନ କଟକ ବାରବାଟୀ ବିଧାୟକ ମହମ୍ମଦ ମୋକିମ ଓ ବିଜୟ ମହାପାତ୍ରଙ୍କ ଭେଟଘାଟକୁ ନେଇ ରାଜ୍ୟ ରାଜନୀତିରେ ନୂଆ ଆଂଚଳିକ ଦଳ ଗଠନ ହେବା ନେଇ ହେଉଥିବା ଚର୍ଚ୍ଚାର ଅନ୍ତ ଘଟାଇଛନ୍ତି ନିଜେ ବରିଷ୍ଠ ରାଜନେତା ବିଜୟ ମହାପାତ୍ର । କହିଛନ୍ତି, ୨୦୨୬ ଓଡିଶା ରାଜନୀତିରେ ବହୁ ଘଟଣା ଘଟିବ ବୋଲି କହିଛନ୍ତି । ନୂଆ ଦଳ ଗଠନ ଚର୍ଚ୍ଚାକୁ ନେଇ ବିଜେଡି ବିଧାୟକ ଅରୁଣ ସାହୁ ତେରେଚ୍ଛା ବାଣ ମାରିଛନ୍ତି । ଅରୁଣଙ୍କ ଯୁକ୍ତି ହେଉଛି କିଏ କେଉଁଠି ଭେଟଘାଟ କଲେ ଆଲୋଚନା କଲେ ନୂଆ ଦଳ ନେଇ ଚର୍ଚ୍ଚା ହେଉଛି, ତାହା ଠିକ ନୁହେଁ । ଓଡ଼ିଶାରେ ଯେଉଁ ସକରାତ୍ମକ ଢଙ୍ଗରେ ରାଜନୀତି ହେବା କଥା ସେ କଥା ହେଉ ନଥିବାରୁ ଭେଟଘାଟକୁ ନେଇ ଏହି ଚର୍ଚ୍ଚା ଜନ୍ମ ନେଉଛି । ରାଜ୍ୟ ଭଲ ସ୍ଥିତିରେ ନାହିଁ । ଅସଲ ମୁଦ୍ଦା ଦୂରେଇ ଯାଉଛି । ତେଣୁ କୌଣସି ଦଳ ଜନ୍ମ ନେବା ପୂର୍ବରୁ ଆକଳନ କରିବା ଠିକ ହେବନି ।
ନୂଆ ଆଞ୍ଚଳିକ ଦଳ ଚର୍ଚ୍ଚାକୁ ନେଇ ରାଜନୈତିକ ସମୀକ୍ଷକ କେ. ରବି ଭିନ୍ନ ଆକଳନ କରିଛନ୍ତି । ତାଙ୍କ ଯୁକ୍ତି ହେଉଛି ଯେହେତୁ ୨୦୨୪ ନିର୍ବାଚନର ପରେ ୩ ପ୍ରମୁଖ ରାଜନୈତିକ ଦଳରେ ଅସନ୍ତୁଷ୍ଟ ନେତାଙ୍କ ସଂଖ୍ୟା ବଢିଛି । ତେଣୁ ରାଜ୍ୟରେ ନୂଆ ରାଜନୈତିକ ଦଳ ଚର୍ଚ୍ଚା ହେଉଛି । ଶାସକ ଦଳର ଅସନ୍ତୋଷ ଓ ଦୁଇ ବିରୋଧୀ ଦଳରେ ରାଜନୈତିକ ବିଶୁଙ୍ଖଳା ଦେଖା ଦେଇଥିବାରୁ ନୂଆ ଆଂଚଳିକ ଦଳ ଚର୍ଚ୍ଚା ଦାନା ବାନ୍ଧୁଛି ।
ଓଡ଼ିଶାର ବରପୁତ୍ର ବିଜୁ ପଟ୍ଟନାୟକଙ୍କ ନାଁରେ ଗଠନ ହୋଇଥିବା ବିଜେଡି ଓଡିଶାର ସଶକ୍ତ ଆଂଚଳିକ ଦଳ ଭାବେ ଉଭା ହୋଇଛି । ୨୪ ବର୍ଷ ଓଡିଶା ଶାସନର ମଙ୍ଗ ଧରି ଆଜି ବିଜେଡି ମୁଖ୍ୟ ବିରୋଧୀ ଦଳ ଭାବେ ଲୋକଙ୍କ ସ୍ଵର ସାଜିଛି । ବିଜେଡି ଛଡ଼ା ଓଡ଼ିଶାରେ ଯେତେ ବି ଆଞ୍ଚଳିକ ଦଳ ଗଢି ଉଠିଛି କାହାକୁ ସଫଳତା ମିଳିନାହିଁ । ତେଣୁ ଓଡ଼ିଶାରେ ପୁଣି ଏକ ଆଂଚଳିକ ଦଳ ଗଠନ ହେବା ଏତେ ସହଜ ନୁହେଁ ।