ନନ୍ଦିଘୋଷ ବ୍ୟୁରୋ: କାକଟପୁରରୁ କଂଗ୍ରେସ ବିଧାୟକ ପ୍ରାର୍ଥୀ ହେଲେ ବିଶ୍ବ ଭୁଷଣ ଦାସ । ମଙ୍ଗଳବାର ଓଡ଼ିଶାର କାକଟପୁର ବିଧାନସଭା ପାଇଁ ପ୍ରାର୍ଥୀ ଘୋଷଣା କରିଛି ଏଆଇସିସି । ପୂର୍ବରୁ ଏଠାରେ ବିଜେଡି ପ୍ରାର୍ଥୀ ଘୋଷଣା କରି ନଥିବାବେଳେ ବିଜେପି ବାଇଧର ମଲ୍ଲିକଙ୍କ ପ୍ରାର୍ଥୀ କରିଛି ।
ସେବା ଓ ତିତୀକ୍ଷାର ନୂଆ ସୂର୍ଯ୍ଯୋଦୟ ଅପେକ୍ଷାରେ ହିଂଜିଳିରୁ ଓଡ଼ିଶା
ନନ୍ଦିଘୋଷ ବ୍ୟୁରୋ: ସେହି ହିଞ୍ଜିଳି। ସେହି ଛତ୍ରପୁର। ସେହି ନେତା ଅପ୍ରତିଦ୍ବନ୍ଦ୍ବୀ ନବୀନ ପଟ୍ଟନାୟକ। ଏ ସଂପର୍କ ଦୀର୍ଘ ୨୪ ବର୍ଷର। ମଙ୍ଗଳବାର ପୁଣି ତାଜା ହୋଇଯାଇଥିଲା । ୨୦୨୪ ନିର୍ବାଚନ ପାଇଁ ବିଜେଡି ସୁପ୍ରିମୋ ଛତ୍ରପୁର ପହଞ୍ଚି ନାମାଙ୍କନ ଭରିଛନ୍ତି । ମୋଟ ୪ ସେଟ ନାମାଙ୍କନ ପତ୍ର ଦାଖଲ କରିଛନ୍ତି । ଏଥିପାଇଁ ପ୍ରସ୍ତାବକ ଥିଲେ ଶରତ ପାତ୍ର ଓ ସୁରେନ୍ଦ୍ର ପ୍ରଧାନ । ଏହା ପୂର୍ବରୁ ଗଂଜାମର ଇଷ୍ଟଦେବୀ ମାଆ ତାରାତାରିଣୀଙ୍କ ପୀଠରେ ପହଞ୍ଚି ନେଇଥିଲେ ଆଶୀର୍ବାଦ । ସେଠାରୁ ବାହାରି ଦଳର ବରିଷ୍ଠ ନେତାଙ୍କ ସହ ଛତ୍ରପୁର ଉପଜିଲ୍ଲାପାଳଙ୍କ ଅଫିସରେ ପହଞ୍ଚି ଧାର୍ଯ୍ଯ ସମୟ ଅନୁସାରେ ଦାଖଲ କରିଥିଲେ ପ୍ରାର୍ଥିପତ୍ର ।
ଦୁଇ ହଜାର ମସିହାରୁ ଏହି ଅଭିଯାନ। ଏଥର ଷଷ୍ଠ ପାଳି ପାଇଁ ପଡିଲା ନିଅଁ। ରେକର୍ଡ ଅଭିମୁଖେ ନବୀନଙ୍କ ଯାତ୍ରା। ସେବା ଓ ତିତୀକ୍ଷାର ନୂଆ ସୂର୍ଯ୍ଯୋଦୟ ଅପେକ୍ଷାରେ ହିଂଜିଳିରୁ ଓଡ଼ିଶା। ରାସ୍ତାର ଦୁଇ କଡରେ ଜନତାଙ୍କ ଭିଡ଼। ୪୫ ଡିଗ୍ରୀ ଖରାକୁ ବି ନଥିଲା ଖାତିର। ନିଜ ନେତାର ଗୋଟିଏ ଝଲକ ଦେଖବାକୁ ଛୁଟି ଆସିଥିଲେ ଆବାଳବୃଦ୍ଧ ବନିତା । ଅବସର ଥିଲା ପାଞ୍ଚ ପାଞ୍ଚ ଥରର ମୁଖ୍ଯମନ୍ତ୍ରୀ ସାଢେ ଚାରି କୋଟି ଓଡିଆଙ୍କୁ ନିଜ ପରିବାର ଭାବୁଥିବା ମୁଖ୍ଯମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନାମାଙ୍କନ ଦାଖଲର ଦିନ। ଦଳୀୟ ନେତାଙ୍କ ଗହଣରେ ନବୀନ ପହଞ୍ଚିଥିଲେ ଛତ୍ରପୁର ଉପଜିଲ୍ଲାପାଳଙ୍କ ଅଫିସରେ। ୪ ସେଟ ନାମାଙ୍କନପତ୍ର ଦାଖଲ କରିଥିଲେ। ଯେଉଁଥିରେ ପ୍ରସ୍ତାବକ ଥିଲେ ଶରତ ପାତ୍ର ଓ ସୁରେନ୍ଦ୍ର ପ୍ରଧାନ। ଆଇନଗତ କାମ ସୁରୁଖୁରୁରେ ଶେଷ କରିବା ପାଇଁ ସାଙ୍ଗରେ ଥିଲେ ଆଇନଜୀବୀ ବି. ଶ୍ରୀନିବାସ।
ସୁପ୍ରିମୋଙ୍କ ସାଥ ଦେବାକୁ ପାଖେ ପାଖେ ଥିଲେ ବିଜେଡିର ବରିଷ୍ଠ ନେତା ତଥା 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ। ଉପସ୍ଥିତ ଥିଲେ ଗଂଜାମର ବହୁ ହେଭିୱେଟ । ଭଞ୍ଜନଗର ବିଧାନସଭା ପ୍ରାର୍ଥୀ ତଥା ବିକ୍ରମ ଆରୁଖ, ବ୍ରହ୍ମପୁର ଲୋକସଭା ପ୍ରାର୍ଥୀ ଭୃଗୁ ବକ୍ସିପାତ୍ର, ପୋଲସରା ବିଧାନସଭା ପ୍ରାର୍ଥୀ ଶ୍ରୀକାନ୍ତ ସାହୁ, କବିସୂର୍ଯ୍ଯନଗର ବିଧାନସଭା ପ୍ରାର୍ଥୀ ଲତିକା ପ୍ରଧାନ, ଆସ୍କା ସାଂସଦ ପ୍ରାର୍ଥୀ ରଞ୍ଜିତା ସାହୁ, ସୋରଡ଼ା ପୂର୍ବତନ ବିଧାୟକ ପୂର୍ଣ୍ଣ ସ୍ବାଇଁ, ଖଲିକୋଟ ବିଧାନସଭା ପ୍ରାର୍ଥୀ ସୂର୍ଯ୍ଯମଣି ବୈଦ୍ଯ, ଛତ୍ରପୁର ବିଧାନସଭା ପ୍ରାର୍ଥୀ ସୁବାସ ବେହେରା, ସାନଖେମୁଣ୍ଡି ବିଧାନସଭା ପ୍ରାର୍ଥୀ ସୁଲକ୍ଷଣା ଗୀତାଞ୍ଜଳି ଦେବୀ ପ୍ରମୁଖ ଉପସ୍ଥିତ ଥିଲେ। ଓଡିଶା ପାଇଁ ସମର୍ପିତ ମଣିଷ ମୁଖ୍ଯମନ୍ତ୍ରୀ ଯେଉଁ ସ୍ବପ୍ନ ଦେଖିଛନ୍ତି ତାହା ନିଶ୍ଚୟ ପୂରଣ ହେବ । ଏଥର ଦଳର ବୃହତ ବିଜୟ ହେବ। ଓଡିଆ ଅସ୍ମିତାର ବିଜୟ ହେବ ବୋଲି କହିଛନ୍ତି ଦଳୀୟ ନେତା ।
ନବୀନଙ୍କୁ ପାଖରେ ପାଇ ପୂରା ଗଂଜାମ ଖୁସିରେ ଝୁମିଉଠିଥିଲା। ଗଂଜାମ ବିଜେଡିରେ ଉତ୍ସାହର ମାହୋଲ ଦେଖିବାକୁ ମିଳିଥିଲା। ନାମାଙ୍କନ ଭରିବା ପୂର୍ବରୁ ମାଆ ତାରାତାରିଣୀଙ୍କ ଦର୍ଶନ କରି ଆଶୀର୍ବାଦ ଲୋଡିଥିଲେ ପାଞ୍ଚ ପାଞ୍ଚ ଥର ମୁଖ୍ଯମନ୍ତ୍ରୀ ପଦ ଅଳଂକୃତ କରିଥିବା ନବୀନ। ୨୦୦୦ ମସିହାରୁ ଲଗାତାର ହିଞ୍ଜିଳି ଆସନରୁ ବିଜୟୀ ହୋଇ ଓଡିଶା ରାଜନୀତିରେ ଅପ୍ରତିଦ୍ବନ୍ଦ୍ବୀ ହୋଇ ରହିଛନ୍ତି। ୨୪ ବର୍ଷର ଶାସନରେ ଓଡ଼ିଶାକୁ ଆତ୍ମନିର୍ଭର, ଶିଳ୍ପ ସମୃଦ୍ଧ, ଆର୍ଥିକ ସ୍ବଚ୍ଛଳ ରାଜ୍ଯ ଭାବେ ଗଢିତୋଳିଛନ୍ତି ନବୀନ ।
କଟକ ଲୋକସଭା ଆସନରେ ହେବ କଡା ଟକ୍କର
ନନ୍ଦିଘୋଷ ବ୍ୟୁରୋ: କଟକ ଲୋକସଭା ଆସନରେ ହେବ ତ୍ରିମୁଖୀ ଲଢେଇ। ବିଜେଡିର ସତୃପ୍ତ ମିଶ୍ର ପ୍ରଚାରରେ ବେଶ ଆଗୁଆ ଥିବା ବେଳେ ନୂଆ ଦଳକୁ ନେଇ ପ୍ରଚାର ଅଭିଯାନରେ ସାମିଲ ହୋଇଛନ୍ତି ବିଜେପି ପ୍ରାର୍ଥୀ ଭର୍ତ୍ତୃହରି ମହତାବ। ସେପଟେ ବିଳମ୍ବରେ କଂଗ୍ରେସ ସୁରେଶ ମହାପାତ୍ରଙ୍କ ନାମ ଘୋଷଣା କରିଥିବାବେଳେ ହାତରେ ଆଉ ସ୍ବଳ୍ପ ସମୟ ଥିବାରୁ ପ୍ରଚାରକୁ ଜୋରଦାର କରିବାକୁ ସେ ଅଣ୍ଟା ଭିଡିଛନ୍ତି।
କଟକ ଲୋକସଭା ପାଇଁ ମହା ଲଢେଇ। ଅଭିଜ୍ଞ ଓ ନବାଗତଙ୍କ ମଧ୍ଯରେ ହେବ ଟକ୍କର । ବିଳମ୍ବର ନିଜର ପ୍ରଚାର ଅଭିଯାନ ଆରମ୍ଭ କଲା କଂଗ୍ରେସ। କଟକ ଲୋକସଭା ନିର୍ବାଚନ ମଣ୍ଡଳିରେ ଦେଖିବାକୁ ମିଳିବ ତ୍ରିମୁଖୀ ଲଢେଇ। ବିଜେଡିର ସଂତୃପ୍ତ ମିଶ୍ର, ବିଜେପିର ଭର୍ତ୍ତୃହରି ଓ କଂଗ୍ରେସ ପ୍ରାର୍ଥୀ ସୁରେଶ ମହାପାତ୍ରଙ୍କ ଭିତରେ ଟକ୍କର । ବିଜେଡି ସୁପ୍ରିମୋଙ୍କ ଆଶିର୍ବାଦ ନେଇ ପ୍ରଚାରକୁ ଜୋରଦାର କରିଛନ୍ତି ସଂତୃପ୍ତ ମିଶ୍ର। ଯୁଆଡେ ଯାଉଛନ୍ତି ବିକାଶ ପାଇଁ ମିଳୁଛି ବିପୁଳ ଆଶୀର୍ବାଦ। ସେପଟେ ବିଳମ୍ବରେ କଂଗ୍ରେସ ବରିଷ୍ଠ ସୁରେଶ ମହାପାତ୍ରଙ୍କୁ ନିଜର ପ୍ରାର୍ଥୀ କରିଛି। କଟକ ଚଣ୍ଡୀ ମାଆଙ୍କ ଆଶିର୍ବାଦ ନେଇ ନିଜର ପ୍ରଚାର ଅଭିଯାନ ଆରମ୍ଭ କରିଛନ୍ତି ସୁରେଶ। ସମୟ କମ ଥିଲେ ସୁଦ୍ଧା ରାହୁଲ ଗାନ୍ଧୀଙ୍କ ସାଲେପୁର ଗସ୍ତ ପରେ ଦଳର ମନୋବଳ ବୃଦ୍ଧି ପାଇଛି।
ସେପଟେ ବିଜେଡି ପରିଚୟରେ ଲଗାତର ନିର୍ବାଚନ ବୈତରଣୀ ପାର ହୋଇ ଆସିଥିବା ଭର୍ତ୍ତୃହରିଙ୍କ ପାଇଁ କିନ୍ତୁ ନୂଆ ସମିକରଣ ଅଡୁଆ ସୃଷ୍ଟି କରିଛି। ଚଳିତ ବର୍ଷ ବିଜେଡି ଛାଡ଼ି ବିଜେପି ପ୍ରାର୍ଥୀ ହୋଇଛନ୍ତି ଭର୍ତ୍ତୃହରି । ପ୍ରଚାର ମୈଦାନରେ ସେତେଟା ଦମ୍ ନଥିଲେ ସୁଦ୍ଧା ଛୋଟ ଛୋଟ ୱାର୍ଡ ସ୍ତରୀୟ ମିଟିଂ ଓ ବୁଥ୍ ସ୍ତରୀୟ କର୍ମୀ ସମ୍ମିଳନୀ କରି ଭୋଟରଙ୍କ ମନ ଜିତିବାକୁ ପ୍ରୟାସ କରୁଛନ୍ତି । ନିର୍ବାଚନକୁ ଆଉ ୨୫ ଦିନ ବାକି ଥିବା ବେଳେ ଆସନ୍ତା ୩ ତାରିଖରେ ପ୍ରାର୍ଥୀମାନେ ସେମାନଙ୍କ ନାମାଙ୍କନ ଦାଖଲ କରିବେ। ଏହାପରେ ଦେଖିବାକୁ ମିଳିବ ଅସଲ ପ୍ରଚାର ଲଢେଇ ।
ହଂସପାଳ ଫ୍ଲାଏ ଓଭରବ୍ରିଜକୁ ନେଇ ଅପରାଜିତାଙ୍କୁ ମନ୍ମଥଙ୍କ ଟାର୍ଗେଟ
ଭୁବନେଶ୍ବର: ହଂସପାଳ ଫ୍ଲାଏ ଓଭରବ୍ରିଜକୁ ନେଇ ଅପରାଜିତାଙ୍କୁ କାଠଗଡ଼ାକୁ ଟାଣିଲେ ବିଜେଡି ଭୁବନେଶ୍ବର ଲୋକସଭା ପ୍ରାର୍ଥୀ ମନ୍ମଥ ରାଉତରାୟ ଭୁବନେଶ୍ୱର ମେୟର ସୁଲୋଚନା ଦାସ । ସାମ୍ବାଦିକ ସମ୍ମିଳନୀ କରି ମନ୍ମଥ ସାଂସଦ ତଥା ବିଜେପି ଲୋକସଭା ପ୍ରାର୍ଥୀ ଅପରାଜିତା ଷଡ଼ଙ୍ଗୀଙ୍କୁ ଟାର୍ଗେଟ କରିଛନ୍ତି। ଭୁବନେଶ୍ୱର ସାଂସଦ ନିଜ ରିପୋର୍ଟ କାର୍ଡରେ ଦର୍ଶାଇ ଥିଲେ ଯେ ମାର୍ଚ୍ଚ ୩୧ ସୁଦ୍ଧା ଓଭରବ୍ରିଜ କାମ ଶେଷ ହେବ । କିନ୍ତୁ ହଂସପାଳ ଫ୍ଲାଏ ଓଭରବ୍ରିଜ କାମ ଆଜି ପର୍ଯ୍ୟନ୍ତ ଶେଷ ହେଲା ନାହିଁ। ୨୦୧୯ରେ ସେ ହଂସପାଳ ଓଭରବ୍ରିଜ୍ ସଂକ୍ରାନ୍ତରେ ସଂସଦରେ ଆଲୋଚନା କରିଥିଲେ । ଭୁବନେଶ୍ୱର ସାଂସଦ ତାପରେ ଯେମିତି ଏହି କଥାକୁ ଭୁଲି ଯାଇଛନ୍ତି ।
କେବେ ଗୋଟିଏ ଥର ଏହି ଜାଗାକୁ ଆସି ଓଭରବ୍ରିଜ ନିର୍ମାଣ କାର୍ଯ୍ୟ କାହିଁକି ବିଳମ୍ବ ହେଉଛି ସେନେଇ ମଧ୍ୟ ଜାଣିବାକୁ ଚେଷ୍ଟା କରି ନାହାନ୍ତି ବୋଲି ଅଭିଯୋଗ କରିଛନ୍ତି ମନ୍ମଥ । ତାସହିତ ତାଙ୍କ ରିପୋର୍ଟ କାର୍ଡରେ ୧୦ଟି ଓଭରବ୍ରିଜ୍ ଓ ୪ଟି ଫୁଟ ଓଭରବ୍ରିଜ କାମ କରିଥିବା ଦର୍ଶାଇଛନ୍ତି । ତାହେଲେ ଏହି କାମ କାହିଁକି ବାକି ରହିଗଲା ? କାହିଁକି ନିର୍ଦ୍ଧାରିତ ସମୟରେ ସଂପୂର୍ଣ୍ଣ କରି ପାରିଲେ ନାହିଁ ? ଏହି ଫ୍ଲାଏ ଓଭରବ୍ରିଜ କାମ ଶେଷ ନ ହେବାରୁ ଭୁବନେଶ୍ୱର ଲୋକ ବିଭିନ୍ନ ସମସ୍ୟା ଭୋଗୁଛନ୍ତି । ଟ୍ରାଫିକ ଜାମ୍ ହେଉଛି, ଦୁର୍ଘଟଣାରେ ଅନେକ ଲୋକଙ୍କ ଜୀବନ ଯାଉଛି । ଜରୁରୀକାଳୀନ ସେବା ବାଧାପ୍ରାପ୍ତ ହେଉଛି । ରୋଗୀଙ୍କୁ ସଠିକ୍ ସମୟରେ ମେଡିକାଲ ନେଇ ଆମ୍ବୁଲାନ୍ସ ଯାଇପାରୁ ନାହିଁ ।
ଲୋକ ସଠିକ୍ ସମୟରେ ବିମାନବନ୍ଦରରେ ପହଞ୍ଚି ପାରୁନାହାଁନ୍ତି । ଭୁବନେଶ୍ୱର ଲୋକ ଏତେ ସମସ୍ୟାର ସମ୍ମୁଖୀନ ହେଉଥିବା ବେଳେ ସାଂସଦ ମିଛ ରିପୋର୍ଟ କାର୍ଡ ପ୍ରକାଶ କରି ଭୋଟ ନେବାକୁ ଉଦ୍ୟମ କରୁଛନ୍ତି ଏହା ନିନ୍ଦନୀୟ ଘଟଣା ବୋଲି କହିଛନ୍ତି ମନ୍ମଥ । ଆଜି ଭୁବନେଶ୍ୱର ସାଂସଦଙ୍କ କାର୍ଯ୍ୟାଳୟରୁ ଏକ ପ୍ରେସ ବିଜ୍ଞପ୍ତି ଜାରି କରାଯାଇଛି । ଯେଉଁଥିରେ ୧୦ ମେ ସୁଦ୍ଧା ଗୋଟିଏ ପାର୍ଶ୍ଵ ଏବଂ ୩୦ ଜୁନ ସୁଦ୍ଧା ଉଭୟ ପାର୍ଶ୍ୱର କାମ ସଂପୂର୍ଣ୍ଣ ହେବ ବୋଲି ଦର୍ଶାଯାଇଛି । କାଳେ କେହି ପ୍ରଶ୍ନ କରିବେ ବୋଲି ଜାଣିକି ନିଜର ଭୁଲକୁ ଲୁଚାଇବା ପାଇଁ ଭୁବନେଶ୍ୱର ସାଂସଦ ଉଦ୍ୟମ କରୁଥିବା ଅଭିଯୋଗ ଆଣିଛନ୍ତି ମନ୍ମଥ।
ବିଜେପି ବିଧାୟକ ପ୍ରାର୍ଥୀ ସୁରେଶ ପୂଜାରୀଙ୍କୁ ନେଇ ବଢୁଛି ଦଳୀୟ ଅସନ୍ତୋଷ
ନନ୍ଦିଘୋଷ ବ୍ୟୁରୋ: ବ୍ରଜରାଜନଗର ବିଜେପି ବିଧାୟକ ପ୍ରାର୍ଥୀ ସୁରେଶ ପୂଜାରୀଙ୍କୁ ନେଇ ବଢୁଛି ଦଳୀୟ ଅସନ୍ତୋଷ। ୨୦୧୪ରେ ବ୍ରଜରାଜନଗର ବିଧାୟିକା ହେଇଥିବା ରାଧାରାଣୀ ପଣ୍ଡା ଦେଇଛନ୍ତି ବଡ଼ ବୟାନ। ସୁରେଶଙ୍କୁ ଦଳର ଟିକେଟ ଘୋଷଣା ପରେ ପୂର୍ବତନ ଜିଲ୍ଲା ବିଜେପି ସଭାପତି ତଥା ପୂର୍ବତନ ବ୍ରଜରାଜନଗର ବିଧାୟିକାଙ୍କୁ ପୂରା ଭୁଲିଯାଇଛନ୍ତି ସୁରେଶ ପୂଜାରୀ। କେବଳ ରାଧାରାଣୀ ପଣ୍ଡା ନୁହନ୍ତି, ବ୍ରଜରାଜନଗରର ଅନେକ ବିଜେପି କାର୍ଯ୍ୟକର୍ତ୍ତା ଓ କର୍ମୀଙ୍କୁ ସୁରେଶ ଅଣଦେଖା ଏବଂ ଅପମାନ କରୁଥିବା ରାଧାରାଣୀ ପଣ୍ଡା କହିଛନ୍ତି। ଏପରି ଆଭିମୁଖ୍ୟ ଯୋଗୁ ଶୀଘ୍ର ରାଧାରାଣୀ ବିଜେପି ଛାଡ଼ିବେ ବୋଲି ଇସାରା ଦେଇଛନ୍ତି। ଏହାର ପ୍ରଭାବ ବ୍ରଜରାଜନଗର ବିଜେପି ପ୍ରାର୍ଥୀ ସୁରେଶ ପୂଜାରୀଙ୍କ ଉପରେ ବୋଲି ଚର୍ଚ୍ଚା ଜୋର ହେଉଛି। ରାଧାରାଣୀ ପଣ୍ଡା ଓ ସୁରେଶ ପୂଜାରୀଙ୍କୁ ନେଇ ବ୍ରଜରାଜନଗର ବିଜେପିରେ ସୃଷ୍ଟି ହୋଇଛି ଝଡ଼ ।
ଚିକିଟିରେ ପ୍ରଦୀପ ପାଣିଗ୍ରାହୀଙ୍କ ନାଁ ନନେଇ ଟାର୍ଗେଟ କଲେ କାର୍ତ୍ତିକ ପାଣ୍ଡିଆନ୍
ନନ୍ଦିଘୋଷ ବ୍ୟୁରୋ: ଚିକିଟିରେ ପୁଣି ଥରେ ବିଜେପି ନେତା ପ୍ରଦୀପ ପାଣିଗ୍ରାହୀଙ୍କୁ ଟାର୍ଗେଟ କଲେ ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ। ପ୍ରଦୀପଙ୍କ ନାଁ ନନେଇ ପାଣ୍ଡିଆନ ଚିକିଟିବାସୀଙ୍କୁ ସମ୍ବୋଧନ କରି କହିଥିଲେ ଯେ, ଜେଲ ଯାଇ ବେଲରେ ଆସିଥିବା ନେତାଙ୍କୁ ସଂସଦକୁ ନୁହେଁ, ଜେଲକୁ ପଠାଇବାର ଅଛି। ନିଜ ନିର୍ବାଚନମଣ୍ଡଳିରେ ଲୋକଙ୍କୁ ଠକିଥିବା ନେତାଙ୍କୁ ମୁଖ୍ୟମନ୍ତ୍ରୀ ଜେଲ ପଠାଇଥିଲେ। ଚିକିଟିବାସୀ ଏଭଳି ନେତାଙ୍କୁ ଚିହ୍ନନ୍ତୁ ଏବଂ ଭୋଟ ଦେବା ସମୟରେ ଭାବିକି ଭୋଟ ଦିଅନ୍ତୁ। ଜେଲ ଯାଇଥିବା ନେତାଙ୍କୁ ନୁହେଁ, ଭଲ ଲୋକଙ୍କୁ ଭୋଟ ଦେଇ ସଂସଦକୁ ପଠାଇବାକୁ ଅପିଲ କରିଛନ୍ତି କାର୍ତ୍ତିକ ପାଣ୍ଡିଆନ । ଏଥିସହ ସେ ବ୍ରହ୍ମପୁର ପାଇଁ ବିଜେଡି ସାଂସଦ ପ୍ରାର୍ଥୀ ଭୃଗୁ ବକ୍ସିପାତ୍ରଙ୍କୁ ଚିକିଟିରୁ ୫୦ ହଜାର ଲିଡ ଦେବାକୁ ଅପିଲ କରିବା ସହ ଚିକିଟି ବିଧାୟକ ପ୍ରାର୍ଥୀ ଶ୍ରୀରୂପ ଦେବଙ୍କୁ ରେକର୍ଡ ମାର୍ଜିନରେ ଜିତାଇବାକୁ ଅପିଲ କରିଛନ୍ତି ।
ମୁଖ୍ୟମନ୍ତ୍ରୀ ସବୁ ବେଳେ ବିକାଶକୁ ଗୁରୁତ୍ବ ଦିଅନ୍ତି ଆଉ ଲୋକଙ୍କ ସବୁ ସମସ୍ୟାର ସମାଧାନ ପାଇଁ ଦିନରାତି କାମ କରନ୍ତି। ଏବେ ସମୟ ଆସିଛି ତାଙ୍କୁ ସମ୍ମାନ ଦେଇ ବଡ ଭୋଟ ବ୍ୟବଧାନରେ ଜିତାଇବା। ବିରୋଧୀ ଦଳ କେବଳ ଭାଷଣ ଦିଅନ୍ତି, କାମ କରନ୍ତି ନାହିଁ । ଡବଲ ଇଂଜିନ ସରକାର ଗରିବ ଲୋକଙ୍କୁ ୩୦୦ ଟଙ୍କା ଭତ୍ତା ଦେଉଥିବା ବେଳେ ନବୀନ ଇଂଜିନ ମଧୁବାବୁ ପେନସନ ଯୋଜନାରେ ହଜାରେ ଟାଙ୍କ ଭତ୍ତା ଦେଉଛନ୍ତି। ଚିକିଟିର ଦୁଇ ଜଣ ମହିଳାଙ୍କ ଉଦାହାରଣ ଦେଇ କାର୍ତ୍ତିକ ପାଣ୍ଡିଆନ ବିଏସକେୱାଇ ଯୋଜନାରେ କିଭଳି ଗରିବ ପରିବାର ଉପକୃତ ହେଉଛନ୍ତି ତାହା ଦର୍ଶାଇଛନ୍ତି । ଚିକିଟି ନିର୍ବାଚନମଣ୍ଡଳୀର ୬୦ ହଜାର ପରିବାର ବିଏସକେୱାଇ ଯୋଜନାରେ ସାମିଲ ହୋଇଛନ୍ତି ।
କିଛି ବିକାଶ କାର୍ଯ୍ୟର ହିସାବ ଦେବାକୁ ଯାଇ ସେ କହିଥିଲେ ଯେ, ଭୈରବୀ ଚଞ୍ଚଦା ମନ୍ଦିରର ରୂପାନ୍ତରଣ ପାଇଁ କୋଟିଏ ୯୫ ଲକ୍ଷ, ବାଳକୁମାରୀ ମନ୍ଦିରର ଉନ୍ନତିକରଣ ପାଇଁ କୋଟିଏ ୯୦ ଲକ୍ଷ ଟଙ୍କା, ରାମେୟାପାଟଣାରେ ଗାର୍ଡ ୱାଲ ନିର୍ମାଣ ପାଇଁ ୨୩ କୋଟି ଟଙ୍କା ଏବଂ ଘରେ ଘରେ ପାଇପ ପାଣି ପହଁଚାଇବାକୁ ୪୦୦ କୋଟି ଟଙ୍କା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ। ଏହି ଅବସରରେ ମନ୍ତ୍ରୀ ତଥା ଚିକିଟି ରାଣୀ ଉଷାଦେବୀ କାର୍ତ୍ତିକ ପାଣ୍ଡିଆନଙ୍କୁ ନିଜର ବଡ ପୁଅ ବୋଲି ସମ୍ବୋଧନ କରିବା ସହ ମୁଖ୍ୟମନ୍ତ୍ରୀଙ୍କ ହାତମୁଠାକୁ ଟାଣ କରିବାକୁ ଆହ୍ବାନ ଦେଇଥିଲେ।
ରେମୁଣାରେ ଉଷ୍ମ ରାଜନୈତିକ ପରିବେଶ
ନନ୍ଦିଘୋଷ ବ୍ୟୁରୋ: ଉଷ୍ମ ହେବାରେ ଲାଗିଛି ରେମୁଣାର ରାଜନୈତିକ ପରିବେଶ । ଗାଁଠାରୁ ସହର ସବୁଠି ରାଜନୀତିର ଚର୍ଚ୍ଚା। କିଏ କାହାକୁ ଦେବେ ଭୋଟ ? କେଉଁ ପ୍ରାର୍ଥୀ ଭୋଟରଙ୍କ ପ୍ରଥମ ପସନ୍ଦ ? ଆଉ କେଉଁ ପ୍ରସଙ୍ଗ ପାଲଟିବ ପ୍ରାର୍ଥୀଙ୍କ ପାଇଁ ଚ୍ୟାଲେଞ୍ଜ ? ଏନେଇ ଚାଲିଛି ଘୋମାଘୋଟ ଆଲୋଚନା । ଜୁନ୍ ୧ ତାରିଖରେ ଭୋଟ୍ ଥିବାରୁ ପ୍ରାର୍ଥୀମାନେ ବୁଲିବୁଲି ସମର୍ଥନ ଜୁଟାଉଛନ୍ତି । ଦେଖିବା ରେମୁଣା ନିର୍ବାଚନମଣ୍ଡଳୀର ସ୍ଥିତି।
ସଭା, ଶୋଭାଯାତ୍ରା। କିଏ ଦଳୀୟ ପତାକା ଧରି ଘରକୁ ଘର ବୁଲି ଭୋଟ ମାଗୁଛନ୍ତି, କିଏ ମିଶ୍ରଣ ପର୍ବ କରି ଦଳର ଶକ୍ତି ବୃଦ୍ଧି କରିବାରେ ଲାଗିଛନ୍ତି । ବାଲେଶ୍ବର ଜିଲ୍ଲା ରେମୁଣା ନିର୍ବାଚନମଣ୍ଡଳୀର ଏଭଳି ଦେଖିବାକୁ ମିଳୁଛି। ଏହି ନିର୍ବାଚନମଣ୍ଡଳୀରେ ପତ୍ରିପାଳ ପଞ୍ଚାୟତର ସରପଞ୍ଚ ବିଦ୍ୟାସ୍ମିତା ମହାଳିକଙ୍କୁ ବିଜେଡି ପ୍ରାର୍ଥୀ କରିଛି। ପୂର୍ବତନ ବିଧାୟକ ଗୋବିନ୍ଦ ଦାସଙ୍କୁ ବିଜେପି ଓ ସୁଦର୍ଶନ ଜେନାଙ୍କୁ କଂଗ୍ରେସ ଭରସା କରି ପ୍ରାର୍ଥୀ ଭାବେ ମଇଦାନକୁ ଛାଡ଼ୁଛନ୍ତି ।
୨୦୦୯ରେ ରେମୁଣାରୁ ବିଜେଡି ପ୍ରାର୍ଥୀ ସୁଦର୍ଶନ ଜେନା ୫୫ ହଜାର ୮୪୭ ଭୋଟ ପାଇ ନିର୍ବାଚିତ ହୋଇଥିଲେ। ସ୍ବାଧୀନ ପ୍ରାର୍ଥୀ ଗୋବିନ୍ଦ ଦାସ ୨୫ ହଜାର ୧୨୪ ଓ ବିଜେପି ପ୍ରାର୍ଥୀ ଗିରିଧାରୀ ଦାସ ପାଇଥିଲେ ୧୪ ହଜାର ୫୫୩ ଭୋଟ । ୨୦୧୪ରେ ବିଜେପି ପ୍ରାର୍ଥୀ ଗୋବିନ୍ଦ ଦାସ ୭୦ ହଜାର ୯୭୩ ଭୋଟ ପାଇ ନିର୍ବାଚିତ ହୋଇଥିଲେ। । ବିଜେଡି ପ୍ରାର୍ଥୀ ସୁଦର୍ଶନ ଜେନାଙ୍କୁ ୫୭ ହଜାର ୧୪୪ ଓ କଂଗ୍ରେସ ପ୍ରାର୍ଥୀ ପ୍ରତ୍ୟୁଷ ଜେନାଙ୍କୁ ୧୩ ହଜାର ୭୧୬ ଭୋଟ ମିଳିଥିଲା। ୨୦୧୯ରେ ପଲଟି ଯାଇଥିଲା ବାଜି।
ବିଜେଡି ପ୍ରାର୍ଥୀ ସୁଧାଂଶୁ ପରିଡ଼ା ୭୯ ହଜାର ୯୭ ଖଣ୍ଡ ଭୋଟ ପାଇ ବିଜେପି ହାତରୁ ରେମୁଣା ଆସନ ଛଡ଼ାଇ ନେଇଥିଲେ। ବିଜେପି ପ୍ରାର୍ଥୀ ଗୋବିନ୍ଦ ଦାସଙ୍କୁ ୭୪ ହଜାର ୯୭୯ ଓ କଂଗ୍ରେସ ପ୍ରାର୍ଥୀ ପ୍ରତାପ ସେଠୀଙ୍କୁ ୯ ହଜାର ୪୫୪ ଭୋଟ ମିଳିଥିଲା। ରେମୁଣାରେ ଅଛନ୍ତି ୨ ଲକ୍ଷ ୨୫ ହଜାର ୭୪୮ ଭୋଟର । ସେମାନଙ୍କ ମଧ୍ୟରେ ୧ ଲକ୍ଷ ୧୪ ହଜାର ୬୯୯ ପୁରୁଷ, ୧ ଲକ୍ଷ ୧୧ ହଜାର ୨୫ ଜଣ ମହିଳା ଓ ୨୪ ଜଣ ତୃତୀୟ ଲିଙ୍ଗୀ ଭୋଟର ଅଛନ୍ତି। ବିଜେଡି ଏକମାତ୍ର ଦଳ ଭାବେ ତୃଣମୂଳ ସ୍ତରର ଜଣେ ମହିଳାଙ୍କୁ ପ୍ରାର୍ଥୀ କରିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶମୂଳକ ଯୋଜନା ପାଇଁ ବିଦ୍ୟାସ୍ମିତା ଭୋଟରଙ୍କ ମନ ଜିଣୁଛନ୍ତି ।
ଭଦ୍ରକରେ ଜିଏ ମାରିବ ବାଜି?
ନନ୍ଦିଘୋଷ ବ୍ୟୁରୋ: ଚଳଚଞ୍ଚଳ ଭଦ୍ରକ ବିଧାନସଭା ନିର୍ବାଚନମଣ୍ଡଳୀ। ୩ ପ୍ରମୁଖ ଦଳର ପ୍ରାର୍ଥୀଙ୍କ ପ୍ରଚାରରେ ଅଞ୍ଚଳ କମ୍ପୁଛି। ଆରମ୍ଭ ହୋଇଛି ରାଜନୈତିକ ଗୋଟି ଚାଳନା। ବିଜୟର ସମ୍ଭାବନାକୁ ନେଇ ସବୁ ଦଳ ପ୍ରାର୍ଥୀ ଚୟନ କରିଛନ୍ତି। ତେବେ କିଏ ଲୋକଙ୍କ ସାଥୀରେ ଅଛନ୍ତି, କିଏ ଅଧିକ ଗ୍ରହଣଯୋଗ୍ଯ ହେବେ, କାହାକୁ ଭୋଟ ମିଳିବ, ସେନେଇ ଭଦ୍ରକର ଛକ, ବଜାର, ଚା’ ଖଟିରେ ବେଶ୍ ଚର୍ଚ୍ଚା ହେଉଛି।
ଭଦ୍ରକ ବ୍ଲକର ୩୬ଟି ପଞ୍ଚାୟତ ଓ ଭଦ୍ରକ ପୌରାଞ୍ଚଳର ୩୦ଟି ୱାର୍ଡକୁ ନେଇ ଭଦ୍ରକ ବିଧାନସଭା ନିର୍ବାଚନମଣ୍ଡଳୀ ଗଠିତ। ଏଠାରେ ବିଜେଡି ପକ୍ଷରୁ ପ୍ରଫୁଲ୍ଲ ସାମଲ, ବିଜେପିରୁ ସୀତାଂଶୁ ଶେଖର ମହାପାତ୍ର ଏବଂ କଂଗ୍ରେସ ପକ୍ଷରୁ ଅସିତ ପଟ୍ଟନାୟକ ପ୍ରାର୍ଥୀ ହୋଇଛନ୍ତି । ଭଦ୍ରକରେ ମୋଟ୍ ଭୋଟର ସଂଖ୍ୟା ୨ ଲକ୍ଷ ୬୭ ହଜାର ୨ ୬୭। ସେଥିରେ ପୁରୁଷ ୧ ଲକ୍ଷ ୩୬ ହଜାର ୪୯୩, ମହିଳା ୧ ଲକ୍ଷ ୩୦ ହଜାର ୬୦୪ ଓ ତୃତୀୟ ଲିଙ୍ଗୀ ୭୦ ଜଣ ଅଛନ୍ତି। ୧୯୯୫ରେ ଜନତା ଦଳ ପ୍ରାର୍ଥୀ ପ୍ରଫୁଲ୍ଲ ସାମଲ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀଙ୍କଠାରୁ ୨୬ ହଜାର ୫୨୮ ଭୋଟ ବ୍ୟବଧାନରେ ଜିତିଥିଲେ ।
୨୦୦୦ରେ କଂଗ୍ରେସ ପ୍ରାର୍ଥୀ ବୀରେନ ପଲାଇ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀଙ୍କଠାରୁ ୫୩୨ ଭୋଟ ବ୍ୟବଧାନରେ ବିଜୟ ଲାଭ କରିଥିଲେ । ୨୦୦୪ରେ କଂଗ୍ରେସ ପ୍ରାର୍ଥୀ ନରେନ ପଲାଇ ୪ ହଜାର ୮୧୨ ଭୋଟ ବ୍ୟବଧାନରେ ବିଜେଡି ପ୍ରାର୍ଥୀଙ୍କଠାରୁ ବିଜୟ ଲାଭ କରିଥିଲେ। ୨୦୦୯ରେ ବିଜେଡି ପ୍ରାର୍ଥୀ ଯୁଗଳ କିଶୋର ପଟ୍ଟନାୟକ ୨୧ ହଜାର ୪୨୮ ଭୋଟ ବ୍ୟବଧାନରେ କଂଗ୍ରେସ ପ୍ରାର୍ଥୀଙ୍କଠାରୁ ବିଜୟ ଲାଭ କରିଥିଲେ । ୨୦୧୪ରେ ବିଜେଡି ପ୍ରାର୍ଥୀ ଯୁଗଳ କିଶୋର ପଟ୍ଟନାୟକ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ କଂଗ୍ରେସ ପ୍ରାର୍ଥୀଙ୍କଠାରୁ ୨୩ ହଜାର ୫୮୭ ଖଣ୍ଡ ଅଧିକ ଭୋଟ ପାଇ ଜିତିଥିଲେ। ୨୦୧୯ରେ ବିଜେଡିର ସଞ୍ଜୀବ କୁମାର ମଲ୍ଲିକ ୯୩ ହଜାର ୬୬୮ ଭୋଟ ପାଇ ଜିତିଥିବା ବେଳେ ବିଜେପି ପ୍ରାର୍ଥୀ ଡାକ୍ତର ପ୍ରଦୀପ କୁମାର ନାୟକ ୬୦ ହଜାର ୨୭୯ ଓ କଂଗ୍ରେସ ପ୍ରାର୍ଥୀ ୨୨ ହଜାର ୬୩୦ ଖଣ୍ଡ ଭୋଟ ପାଇଥିଲେ । ଏବେ ଭୋଟର ଅଙ୍କ କଷୁଛନ୍ତି, କାହାକୁ ଦେବେ ଭୋଟ।
ଭଦ୍ରକ ବିଧାନସଭା କ୍ଷେତ୍ରର କୋଣ ଅନୁକୋଣରେ ବିକାଶର ଛାପ । ତେବେ ଭଦ୍ରକ ମେଡିକାଲ କଲେଜ ଓ ଭଦ୍ରକ ସ୍ବୟଂଶାସିତ କଲେଜକୁ ବିଶ୍ବବିଦ୍ୟାଳୟ ମାନ୍ୟତା ପ୍ରଦାନକୁ କଂଗ୍ରେସ ଓ ବିଜେପି ପ୍ରସଙ୍ଗ କରିଛନ୍ତି। ଶାସକ ବିଜୁ ଜନତା ଦଳ ମୁଖ୍ୟମନ୍ତ୍ରୀଙ୍କ ଜନକଲ୍ୟାଣ କାର୍ଯ୍ୟକ୍ରମ ଦ୍ବାରା ଭୋଟରଙ୍କୁ ଆକୃଷ୍ଟ କରୁଛି । ଏଥର ନିର୍ବାଚନ ଟିକିଏ ଭିନ୍ନ ହେବ। ଏଠାରେ ପ୍ରଫୁଲ୍ଲ କୁମାର ସାମଲ ପୁରୁଣା । କଂଗ୍ରେସ ଓ ବିଜେପିର ପ୍ରାର୍ଥୀ ନବାଗତ।
କଂଗ୍ରେସ ପ୍ରାର୍ଥୀ ଅସିତ କୁମାର ପଟ୍ଟନାୟକଙ୍କ ବାପା ଯୁଗଳ କିଶୋର ପଟ୍ଟନାୟକଙ୍କର ନିଜସ୍ବ ସଙ୍ଗଠନ ଅଛି, ଯାହା ଅସିତଙ୍କୁ ସାହାଯ୍ଯ କରିପାରେ। ବିଜେପିର ସୀତାଂଶୁ ଶେଖର ମହାପାତ୍ର ନବାଗତ ହେଲେ ମଧ୍ଯ ପୂର୍ବ ନିର୍ବାଚନରେ ବିଜେପି ଦ୍ବିତୀୟ ସ୍ଥାନରେ ଥିଲା। ସୀତାଂଶୁ ବିଭିନ୍ନ ସାମାଜିକ ସଂଗଠନ ଜଡ଼ିତ ଅଛନ୍ତି। ନିଜ ନିଜ ପ୍ରସଙ୍ଗ ଧରି ପ୍ରାର୍ଥୀଙ୍କ ପ୍ରଚାର ଚାଲିଛି।
ଗୋଟିଏ ପାଖରେ ବିରୋଧୀଙ୍କ ସ୍ଥାନୀୟ ପ୍ରସଙ୍ଗ, ଅନ୍ୟପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶ ଧାରା। ଏଥିରୁ ଭୋଟର ଯାହାକୁ ପସନ୍ଦ କରିବେ, ତାହା ହିଁ ବିଜୟର ନିର୍ଣ୍ଣାୟକ ହେବ ।
ନୂଆପଡାରେ ବିଜେଡିର ଜୋରଦାର ପ୍ରଚାର
ନନ୍ଦିଘୋଷ ବ୍ୟୁରୋ: ନୂଆପଡା ନିର୍ବାଚନ ମଣ୍ଡଳୀରେ ବିଜେଡିର ଜୋରଦାର ପ୍ରଚାର। ପ୍ରଚାରକୁ ଜୋରଦାର କରିଛନ୍ତି ଖଡିଆଳ ନିର୍ବାଚନ ମଣ୍ଡଳିର ବିଜେଡି ବିଧାୟକ ପ୍ରାର୍ଥୀ ଅଧିରାଜ ପାଣିଗ୍ରାହୀ।ପ୍ରଚଣ୍ଡ ତାତିରେ ଗାଁ ଗାଁରେ ଲୋକଙ୍କ ସମର୍ଥନକୁ ନେଇ ବିଜୁ ଜନତାଦଳର କର୍ମୀ ଓ ସମର୍ଥକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା। ମୁଖ୍ୟମନ୍ତ୍ରୀଙ୍କ ଜନକଲ୍ୟାଣକାରୀ ଯୋଜନା ଓ ସାମଗ୍ରୀକ ବିକାଶକୁ ମୁଦ୍ଦା କରି ଭୋଟ ଭିକ୍ଷା କରିଥିଲେ ଅଧିରାଜ। ପ୍ରଚାର କରୁଥିବା ସମୟରେ ଗାଁ ଦାଣ୍ଡ ଯୋଡି ଶଙ୍ଖ ଶବ୍ଦରେ ଝୁମି ଉଠୁଥିବା ବେଳେ ଲୋକେ ଅଧିରାଜଙ୍କୁ ସ୍ବାଗତ ଜଣାଉଥିବା ଦେଖିବାକୁ ମିଳିଛି। ପ୍ରଚାର ସମୟରେ ଲୋକଙ୍କ ସମସ୍ୟାକୁ ଶୁଣୁଥିବା ସହ ମୁଖ୍ୟମନ୍ତ୍ରୀଙ୍କୁ ଷଷ୍ଠଥର ମୁଖ୍ୟମନ୍ତ୍ରୀ କରିବା ପାଇଁ ଯୋ ଶଙ୍ଖରେ ଭୋଟ ଦେବାକୁ ଲୋକଙ୍କୁ ନିବେଦନ କରିଥିଲେ ।
ଗଜପତି ଚନ୍ଦ୍ରଗିରିରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ପ୍ରଚାର
ନନ୍ଦିଘୋଷ ବ୍ୟୁରୋ: କିଏ ସେବା ପାଇଁ ରାଜନୀତି କରୁଛନ୍ତି, ଆଉ କିଏ ରାଜନୀତିକୁ ଆସିଛନ୍ତି ସାଧାରଣ ଲୋକଙ୍କୁ ଠକିବାକୁ ଓ ଚାନ୍ଦା ନେବାକୁ ସେମାନଙ୍କୁ ଚିହ୍ନି ରଖନ୍ତୁ। ଲୋକଙ୍କୁ ଠକୁଥିବା ନେତା ଜେଲ ଯିବା ଦରକାର । ସେମାନେ ଜେଲରୁ ଆସିଛନ୍ତି, ପୁଣି ଜେଲ ଯିବେ ବୋଲି ମୋହନାରେ ବିଜେଡି ସାଂସଦ ପ୍ରାର୍ଥୀ ଭୃଗୁ ବକ୍ସିପାତ୍ର ଓ ବିଧାୟକ ପ୍ରାର୍ଥୀ ଅନ୍ତର୍ଯ୍ୟାମୀ ଗମାଙ୍ଗଙ୍କ ପାଇଁ ପ୍ରଚାରର ଅବସରରେ ଏହା କହିଛନ୍ତି ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ। ବିଜେଡିର ଏହି ଦୁଇ ପ୍ରାର୍ଥୀଙ୍କର ଜେଲ ଯିବାର ଅଭ୍ୟାସ ନାହିଁ। ଏମାନେ ମନ୍ଦିର, ମସଜିଦ କିମ୍ବା ଚର୍ଚ୍ଚ ଯାଆନ୍ତି।
ଲୋକଙ୍କୁ ଠକିଥିବା ଲୋକଙ୍କୁ ଉଚିତ ଶିକ୍ଷା ଦେବା ସହ ବିଜେଡି ପ୍ରାର୍ଥୀଙ୍କୁ ଆଶୀର୍ବାଦ କରି ମୋହନାରୁ ବିଜେଡି ସାଂସଦ ପ୍ରାର୍ଥୀଙ୍କୁ ୫୦ ହଜାରର ଲିଡ ଦେବାକୁ ଆହ୍ବାନ ଦେଇଛନ୍ତି ପାଣ୍ଡିଆନ। ମୋହନାବାସୀଙ୍କ ଅନୁରୋଧ ଉପରେ ମୁଖ୍ୟମନ୍ତ୍ରୀ କି ନିଷ୍ପତ୍ତି ନେଇଛନ୍ତି ତାର ହିସାବ ଦେବା ପରେ ଆଜି ମିଳିଥିବା ଦାବି ଉପରେ କି ପଦକ୍ଷେପ ନିଆଯିବ ସେ ସମ୍ପର୍କରେ ନିର୍ବାଚନ ପରେ ପୁଣି ଥରେ ହିସାବ ଦେବାକୁ ଆସିବେ ବୋଲି କହିଛନ୍ତି କାର୍ତ୍ତିକ ପାଣ୍ଡିଆନ। ମୋହନ ନିର୍ବାଚନମଣ୍ଡଳୀ ପାଇଁ ମୁଖ୍ୟମନ୍ତ୍ରୀ ୧୮୦ କୋଟି ଟଙ୍କାର ବିଭିନ୍ନ ପ୍ରକଳ୍ପକୁ ମଂଜୁରୀ ଦେଇଛନ୍ତି।
ମୋହନରେ ଥିବା ଶହେରୁ ଅଧିକ ଚର୍ଚ୍ଚ ଓ ମନ୍ଦିର ମସଜିଦର ଉନ୍ନତିକରଣ ପାଇଁ ଆର୍ଥିକ ସହାୟତା ଦେଇଛନ୍ତି ମୁଖ୍ୟମନ୍ତ୍ରୀ । ମୋହନାରେ ୪ଟି ଆଦିବାସୀ ହଷ୍ଟେଲ, ଖ୍ରୀଷ୍ଟିଆନ ସମ୍ପ୍ରଦାୟ ପାଇଁ ୯ଟି କମ୍ୟୁନିଟି ସେଣ୍ଟର ଓ ବୌଦ୍ଧ ଧର୍ମାବଲମ୍ବୀଙ୍କ ପାଇଁ ଗୋଟିଏ କମ୍ୟୁନିଟି ସେଣ୍ଟରକୁ ମଂଜୁରୀ ଦେଇଛନ୍ତି ମୁଖ୍ୟମନ୍ତ୍ରୀ। ସେହିଭଳି ମୋହନାରେ ସର୍ବାଧିକ ସେତୁ ନିର୍ମାଣ ହେଉଛି।
ମହେନ୍ଦ୍ରତନୟା ନଦୀ ଉପରେ ସେତୁ ପାଇଁ ୧୯ କୋଟି ଟଙ୍କା, ଜମ୍ବଳା ନଦୀ ଉପରେ ସେତୁ ପାଇଁ ୫ କୋଟି ଟଙ୍କା, ରୁଇସିଂ ନାଳ ଉପରେ ସେତୁ ପାଇଁ ୪ କୋଟି ୮୦ ଲକ୍ଷ ଟଙ୍କା ମଂଜୁର କରିଛନ୍ତି ମୁଖ୍ୟମନ୍ତ୍ରୀ। ମୋହନାକୁ ଏନଏସି ଘୋଷଣା ସହ ବିଭିନ୍ନ ସ୍ଥାନରେ ହାଇସ୍କୁଲ ନିର୍ମାଣ ଏବଂ ଆର.ଉଦୟଗିରିରେ ଯୁକ୍ତ ତିନି କଲେଜ ପ୍ରତିଷ୍ଠା ଦାବି ମୁଖ୍ୟମନ୍ତ୍ରୀଙ୍କ ବିଚାରଧିନ। ନିର୍ବାଚନ ସରିଲେ ଖୁବଶୀଘ୍ର ଖୁସି ଖବର ମିଳିବ ବୋଲି ସେ କହିଛନ୍ତି।