ସତ୍ୟବାଦୀ : ବିଜେପି ଛାଡ଼ିଲେ ରମାରଞ୍ଜନ ବଳୀୟାରସିଂହ । ସତ୍ୟବାଦୀର ପୂର୍ବତ୍ତନ ବିଧାୟକ ତଥା ରାଜ୍ୟ ବିଜେପିର ମୁଖପାତ୍ର ଥିଲେ ରମାରଞ୍ଜନ । ରାଜ୍ୟ ବିଜେପି ସଭାପତି ମନମୋହନ ସାମଲଙ୍କ ନିକଟକୁ ପଠାଇଲେ ଇସ୍ତଫା ପତ୍ର । ସେ ଇସ୍ତଫା ଦେବା ସହ ରାଜ୍ୟ ବିଜେପି ଉପରେ ବର୍ଷିଛନ୍ତି । ରମାରଞ୍ଜନ ଇସ୍ତଫାପତ୍ରରେ ଲେଖିଛନ୍ତି ବର୍ଷ ବର୍ଷ ଧରି ଦଳ ଯେଉଁ ଦାୟିତ୍ୱ ଦେଇଛି ତାହା ନିଷ୍ଠାରସହ ତୁଲାଇଛି କିନ୍ତୁ ଦଳ କ୍ରମାଗତ ଭାବେ ସତ୍ୟବାଦୀ ଏବଂ ମୋତେ ପ୍ରତାରିତ କରିଛି ।
ଏଣୁ ସେ ବିଜେପିର ପ୍ରାଥମିକ ସଦସ୍ଯ ପଦରୁ ଇସ୍ତଫା ଦେଇଇଥିବା ଇସ୍ତଫା ପତ୍ରରେ ଉଲ୍ଲେଖ କରିଛନ୍ତି ।
ଭୁବନେଶ୍ବର : ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ଗ୍ୟାରେଣ୍ଟି । ଜୁନ୍ ୯ ପରେ ଛାଡ଼ ହେବ ବିଜୁଳି ବିଲ୍ । ଜୁଲାଇ ମାସରେ ନିଃଶୁଳ୍କ ବିଜୁଳି । ସମସ୍ତ ଯୋଗ୍ୟ ହିତାଧିକାରୀଙ୍କୁ ମିଳିବ ବିଏସକେୱାଇ କାର୍ଡ । ଦେବଗଡ ପ୍ରଚାର ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଗ୍ୟାରେଣ୍ଟି ଦେଇଛନ୍ତି । ଏହା ନବୀନ ପଟ୍ଟନାୟକଙ୍କ ବିଜୁଳି ଗ୍ୟାରେଣ୍ଟି ଓ ଶଙ୍ଖ ଚିହ୍ନର ଗ୍ୟାରେଣ୍ଟି ବୋଲି କହିଛନ୍ତି ମୁଖ୍ୟମନ୍ତ୍ରୀ। ବିଏସକେୱାଇ, ମିଶନ ଶକ୍ତି, ଲକ୍ଷ୍ମୀ ବସ, ମମତା ଯୋଜନା, ଫାଇଭ-ଟି ସ୍କୁଲ, ନୂଆ ଓ ଛାତ୍ରବୃତ୍ତି ଓ କାଳିଆ ଯୋଜନା ଆଦି ସମ୍ପର୍କରେ ଉଲ୍ଲେଖ କରିଥିଲେ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ। ଜୁନ ୯ରେ ନବୀନ ପଟ୍ଟନାୟକ ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ ଭାବେ ଦାୟିତ୍ବ ନେଲେ ତିନୋଟି ଗୁରୁତ୍ବପୂର୍ଣ୍ଣ ଫାଇଲ ଦସ୍ତଖତ କରିବେ । ପ୍ରଥମ ବିଜୁଳି ବିଲ ଛାଡ, ଦ୍ବିତୀୟରେ ବିଏସକେୱାଇ ଯୋଜନାରୁ ବାଦ ପଡିଥିବା ସବୁ ଯୋଗ୍ୟ ହିତାଧିକାରୀଙ୍କୁ ନବୀନ-କାର୍ଡ ଓ ତୃତୀୟରେ ୬୦ ବର୍ଷରୁ ଉର୍ଦ୍ଧ୍ବ ସବୁ ମିଶନ ଶକ୍ତି ମାଙ୍କୁ ମିଳିବ ପେନସନ ।
ଭୁବନେଶ୍ବର : ଭୁବନେଶ୍ବର ପାଣ୍ଡରା ଛକରେ ଭୟାବହ ଅଗ୍ନିକାଣ୍ଡ । ଗତକାଲି ରାତିରେ ରାସ୍ତା କଡ଼ରେ ଥିବା କ୍ଯାବିନରେ ହଠାତ ନିଆଁ ଲାଗିଯାଇଥିଲା । ସର୍ଟସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି କାରଣ ଅଧରାତିରେ ହଠାତ ଅଗ୍ନିକାଣ୍ଡ ଘଟିଥିଲା । ଘଅଗ୍ନିକାଣ୍ଡରେ ଏକାଧିକ କ୍ଯାବିନ ସମ୍ପୂର୍ଣ୍ଣ ଜଳିଯାଇଛି । ଘଟଣାସ୍ଥଳରେ ତୁରନ୍ତ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । ତେବେ କ୍ଯାବିନ ଭିତରେ ଥିବା ୨ରୁ ୩ ଲକ୍ଷ ଟଙ୍କାର ସାମଗ୍ରୀ ପୋଡ଼ିଯାଇଥିବା ସୂଚନା ମିଳିଛି ।
ଭୁବନେଶ୍ବର : ଆଜି ଭୁବନେଶ୍ବରରେ ହେବ ନବୀନ ଶୋ । ବିଶାଳ ରୋଡ ଶୋ କରିବେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହି ରୋଡ ଶୋ ଗଙ୍ଗନଗର ଛକରୁ ଆରମ୍ଭ ହୋଇ ଶିଶୁଭବନ ଛକରେ ଶେଷ ହେବ । ସନ୍ଧ୍ଯା ସାଢେ ୬ଟାରେ ୟୁନିଟ-୬ ଗଙ୍ଗନଗର ଛକରୁ ମୁଖ୍ଯମନ୍ତ୍ରୀଙ୍କ ରୋଡ୍ ଶୋ’ ଆରମ୍ଭ ହେବ । ପ୍ରାୟ ଘଣ୍ଟାଏ ଚାଲିବାକୁ ଥିବା ହାଇଭୋଲଟେଜ ରୋଡ ଶୋରେ ନବୀନ ୮ଟି ସ୍ଥାନରେ ଉଦବୋଧନ ଦେବା କାର୍ଯ୍ଯକ୍ରମ ରହିଛି । ଶୋଭାଯାତ୍ରା ଆରମ୍ଭ ପୂର୍ବରୁ ନବୀନ ପ୍ରଥମେ ଗଙ୍ଗନଗର ଛକରେ ଜନସଭାକୁ ସମ୍ବୋଧିତ କରିବେ । ଏହାପରେ ଏଲଆଇସି ଛକ ଦେଇ ଗୋପବନ୍ଧୁ ଛକରେ ପହଞ୍ଚିବେ । ଯୁନିଟ-୮ ଡିଏଭି ସ୍କୁଲ ନିକଟରେ ପହଞ୍ଚି ସାଧାରଣ ଲୋକଙ୍କ ଉଦ୍ଦେଶ୍ଯରେ ଉଦବୋଧନ ଦେବେ । ସେଠାରୁ ବାହାରି ଏଚଡିଏଫସି ଛକ, ବାଲୁଙ୍କେଶ୍ବର ମନ୍ଦିର, ମମତାଜ ଅଲ୍ଲୀ ସ୍କୁଲ ଦେଇ ଶ୍ରୀକୃଷ୍ଣ କ୍ଲବ ନିକଟରେ ପହଞ୍ଚିବେ ।
ଏଠାରେ ମଧ୍ଯ ମୁଖ୍ଯମନ୍ତ୍ରୀ ଜନସଭାକୁ ସମ୍ବୋଧିତ କରିବା କାର୍ଯ୍ୟକ୍ରମ ରହିଛି । ଏହାପରେ କଳିଙ୍ଗ ଷ୍ଟାଡିୟମ ଛକ ଓ ନିକୋପାର୍କ ଛକ ଦେଇ ବାୟାବାବା ମଠ ରାସ୍ତା ନିକଟରେ ନବୀନଙ୍କ ରୋଡ୍ ଶୋ ପହଞ୍ଚିବ । ସେଠାରେ ମୁଖ୍ଯମନ୍ତ୍ରୀ ଅଭିଭାଷଣ ରଖି ରୂପାଲି ଛକ ଦେଇ ସତ୍ଯନଗର ନିକଟକୁ ଯିବେ । ସେଠାରେ ମଧ୍ଯ ଉପସ୍ଥିତ ଜନସଧାରଣଙ୍କୁ ସମ୍ବୋଧିତ କରିବେ । ପରେ ଶ୍ରୀୟା ଛକ, ରାଜମହଲ, ମାଷ୍ଟରକ୍ଯାଣ୍ଟିନ ଦେଇ ସନ୍ଧ୍ଯା ସାଢେ ୭ଟାରେ ଶିଶୁଭବନ ଛକରେ ପହଞ୍ଚିବେ । । ରୋଡ ଶୋରେ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗିବେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ନବୀନଙ୍କ ରୋଡ ଶୋ ପାଇଁ ଦଳୀୟ ନେତା ଓ କର୍ମୀ ବେଶ୍ ଉତ୍ସାହିତ ହୋଇପଡ଼ିଛନ୍ତି । ପ୍ରାୟ ଏକ ଘଣ୍ଟା ଧରି ମୁଖ୍ଯମନ୍ତ୍ରୀଙ୍କ ରୋଡ ଶୋ ଚାଲିବାକୁ ଥିବାବେଳେ ବ୍ଯାପକ ସୁରକ୍ଷା ବ୍ଯବସ୍ଥା ଗ୍ରହଣ କରାଯାଇଛି । କମିଶନରେଟ ପୋଲିସର ବରିଷ୍ଠ ଅଧିକାରୀମାନେ ସୁରକ୍ଷା ବ୍ଯବସ୍ଥା ଦାୟିତ୍ବରେ ରହିବେ। ରୋଡ ଶୋ ଦୁଇ ପାର୍ଶ୍ଵରେ ଥିବା କୋଠାମାନଙ୍କରେ ବି ସୁରକ୍ଷା କର୍ମୀ ନିୟୋଜିତ ହେବେ ।
କେନ୍ଦୁଝର: ଦୁଇ ଟ୍ରକ ମଧ୍ୟରେ ଚାପିହୋଇଗଲା କାର । ୬ କାର ଯାତ୍ରୀ ମୃତ । କେନ୍ଦୁଝର ଜିଲ୍ଲା ଚମ୍ପୁଆ ଥାନା ଅର୍ନ୍ତଗତ ରିମୁଳି ଜାତୀୟ ରାଜପଥରେ ଘଟିଛି ଏହି ମର୍ମନ୍ତୁଦ ସଡ଼କ ଦୁର୍ଘଟଣା । ସମସ୍ତ ମୃତକ ବଡ଼ବିଲ ଭଦ୍ରାସାହି ଅଞ୍ଚଳର ହିରାଲାଲ ପଲେଇଙ୍କ ପରିବାର ସଦସ୍ୟ ହୋଇଥିବା ସୂଚନା ରହିଛି । ନିଜ ପରିବାର ସହ ସେ ବାଂଶପାଳ ବ୍ଲକ୍ ତରମାକାନ୍ତକୁ ଯାଉଥିବା ବେଳେ ଏହି ଅଘଟଣ ଘଟିଛି ।
କାରଟି ସମ୍ପୁର୍ଣ୍ଣ ଚୁରମାର ହୋଇଯାଇଛି । କାରଟି ଦୁଇ ଟ୍ରକ୍ ମଝିରେ ଚାପି ହେବାରୁ ଦୁର୍ଘଟଣା ଘଟିଥିବା କୁହାଯାଉଛି । କାର ଆଗରେ ଏକ ଟ୍ରକ୍ ଯାଉଥିବା ବେଳେ ପଛରୁ ଆଉ ଏକ ଟ୍ରକ୍ ଧକ୍କା ଦେଇଥିଲା । ଆଗ ଟ୍ରକ୍ ବ୍ରେକ ମାରିବାରୁ କାରଟି ପିଟି ହୋଇ ଚୁରମାର ହୋଇଯାଇଥିଲା ।
ବ୍ରାଟିସ୍ଲାଭା: ସ୍ଲୋଭାକିଆର ପ୍ରଧାନମନ୍ତ୍ରୀ ରବର୍ଟ ଫିକୋଙ୍କୁ ମରଣାନ୍ତକ ଆକ୍ରମଣ । କ୍ୟାବିନେଟ ବୈଠକ ପରେ ସମ୍ବୋଧିତ କରୁଥିବା ବେଳେ ଏହି ଆକ୍ରମଣ ଘଟିଛି। ତାଙ୍କୁ ହତ୍ୟା କରିବା ପାଇଁ ଆକ୍ରମଣକାରୀ ଅନେକ ରାଉଣ୍ଡ ଗୁଳି ଚଳାଇଥିଲା। ଗୁରୁତର ଅବସ୍ଥାରେ ଫିକୋଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସ୍ଲୋଭାକିଆ ପ୍ରଧାନମନ୍ତ୍ରୀଙ୍କୁ ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ଭଳି ଗୁଳିମାଡ କରାଯାଇଥିଲା । ଜଣେ ଆକ୍ରମଣକାରୀ ଥିଲେ କି ଜଣେରୁ ଅଧିକ ଥିଲେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଗଣମାଧ୍ୟମର ରିପୋର୍ଟ ଅନୁଯାୟୀ ପୋଲିସ ଜଣଙ୍କୁ ଅଟକ ରଖିଛି।
ଗତ ବର୍ଷ ଅକ୍ଟୋବରରେ ଚତୁର୍ଥ ଥର ପାଇଁ ସ୍ଲୋଭାକିଆର ପ୍ରଧାନମନ୍ତ୍ରୀ ଭାବେ ରବର୍ଟ ଫିକୋ ଦାୟିତ୍ବ ହୋଇଥିଲେ। ସେ ୨୨.୯୪ ପ୍ରତିଶତ ଭୋଟ୍ ସହ ଜିତିଥିଲେ। ରୋବର୍ଟ ଋଷ ରାଷ୍ଟ୍ରପତି ପୁଟିନଙ୍କ ନିକଟତର ଅଟନ୍ତି।
ସ୍ଲୋଭାକିଆ ପୂର୍ବ ୟୁରୋପର ଏକ ଦେଶ । ଏହି ଦେଶର ପୂର୍ବରେ ୟୁକ୍ରେନ, ପଶ୍ଚିମରେ ଚେକ୍ ରିପବ୍ଲିକ୍, ଉତ୍ତରରେ ପୋଲାଣ୍ଡ ଏବଂ ଦକ୍ଷିଣରେ ହଙ୍ଗେରୀ ସୀମା ରହିଛି ।
ଭୁବନେଶ୍ବର: ନାଁ ନନେଇ ଭୁବନେଶ୍ବର ସାଂସଦଙ୍କୁ ନିଶାଣ କରିଛନ୍ତି ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ । ଲୋକଙ୍କ ଆଶୀର୍ବାଦରେ ସାଂସଦ ହେଲେ । କେନ୍ଦ୍ରରୁ ୩ଶହ କୋଟି ଆଣି ଆଇଟି ପାର୍କ କରି ରୋଜଗାର ଦେବେ ବୋଲି କହିଲେ । ହେଲେ ଭୁବନେଶ୍ୱର ସାଂସଦ କର୍ପୋରେଟର ଓ ସରପଞ୍ଚଙ୍କ କାମରେ ମୁଣ୍ଡ ପୂରାଇଲେ ।
ଏମିତି ସାଂସଦ ଆଉ ଦରକାର ନାହିଁ ବୋଲି କହିଛନ୍ତି ଫାଇଭ-ଟି ଅଧ୍ଯକ୍ଷ ତଥା ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ । ଆଜି ଭୁବନେଶ୍ବର ଏକାମ୍ର ପାଇଁ ପ୍ରଚାର କରି ଲିଙ୍ଗରାଜ ମନ୍ଦିର ଆଗରୁ ଏପରି ସମାଲୋଚନା କରିଛନ୍ତି ପାଣ୍ଡିଆନ । ୧୪ ଜାଗା ବୁଲି ଆସିବାରୁ ବିଳମ୍ବ ହେଲା ବୋଲି ପ୍ରଥମେ କ୍ଷମା ମାଗିଥିଲେ ପାଣ୍ଡିଆନ ।
ଲିଙ୍ଗରାଜ ମନ୍ଦିର ଆଗରେ କେବେ ଭାଷଣ ରଖିବେ ବୋଲି ଭାବିନଥିଲେ ବୋଲି କହିବା ସହ ଭୁବନେଶ୍ବର ସାଂସଦଙ୍କ କାମକୁ ସମାଲୋଚନା କରିଥିଲେ । ଏକାମ୍ର ପାଇଁ ବିଜେଡି ପ୍ରାର୍ଥୀ ଅଶୋକ ଚନ୍ଦ୍ର ପଣ୍ଡା ଭଲ କାମ କରୁଛନ୍ତି ତାଙ୍କୁ ଆଶୀର୍ବାଦ କରିବାକୁ ସେ ନିବେଦନ କରିଥିଲେ । ଏହାସହ ସାଂସଦ ପ୍ରାର୍ଥୀ ମନ୍ମଥ ରାଉତରାୟଙ୍କୁ ମଧ୍ଯ ଆଶୀର୍ବାଦ କରିବାକୁ ପାଣ୍ଡିଆନ ନିବେଦନ କରିଥିଲେ । ଏହି ଅଞ୍ଚଳ ପାଇଁ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ବହୁତ କାମ କରିଛନ୍ତି ।
ଏକାମ୍ର ପ୍ରକଳ୍ପ କିପରି ରୂପ ନେଲା ସେ ନେଇ ଲୋକଙ୍କୁ କହିଥିଲେ ପାଣ୍ଡିଆନ । ଲିଙ୍ଗରାଜ ମନ୍ଦିରକୁ ହଜାର ହଜାର ଲୋକ ଆସୁଛନ୍ତି । ହେଲେ ଠିଆ ହେବାକୁ ଜାଗା ନଥିଲା । ତାପରେ ଅଶୋକ ବାବୁଙ୍କ ସହ କଥା ହୋଇ ଏକାମ୍ର ପ୍ରକଳ୍ପ ଆରମ୍ଭ ହେଲା । ପ୍ରକଳ୍ପ ଲାଗି ଯିଏ ସହଯୋଗ କରିଛନ୍ତି, ଘର ହୋଟେଲ ଦାନ କରିଛନ୍ତି, ତାଙ୍କୁ ଇତିହାସ ମନେ ରଖିବ ।
ଏହି କାମ ବନ୍ଦ କରିବାକୁ ଭୁବନେଶ୍ୱର ସାଂସଦ ଓ କେନ୍ଦ୍ରମନ୍ତ୍ରୀ ବହୁ ଚେଷ୍ଟା କଲେ । ହେଲେ ବନ୍ଦ କରି ପାରିଲେ ନାହିଁ । ହେଲେ ବିଳମ୍ବ କରାଇଦେଲେ । ପୁରୀ କାମ ଆଗ ହେଲା । ଜମି ଅଧିଗ୍ରହଣ କାମ ବିଳମ୍ବ ହେଲା । ଏଠି କାମ ଭଲ ହେଉଛି ବୋଲି କହିଛନ୍ତି ପାଣ୍ଡିଆନ । ଏକାମ୍ର ରାଜାମହାରାଜାଙ୍କ ସମୟରେ ଯେମିତି ଥିଲା, ମୁଖ୍ୟମନ୍ତ୍ରୀ ସେମିତି ରୂପାନ୍ତର କରିଛନ୍ତି । ଏହି ମନ୍ଦିର ହଜାର ହଜାର ବର୍ଷ ରହିବ । ଦୋକାନ, ହୋଟେଲ ଵି ଥଇଥାନ ହୋଇଛି । ହଜାର ହଜାର ପର୍ଯ୍ୟଟକ ଆସିବେ ରୋଜଗାର ବଢିବ । ଜୀବନ ଧାରାରେ ସକାରାତ୍ମକ ପ୍ରଭାବ ପଡିବ ।
ରାଞ୍ଚି: ଝାଡଖଣ୍ଡ ଗ୍ରାମ୍ୟ ଉନ୍ନୟନ ମନ୍ତ୍ରୀ ତଥା କଂଗ୍ରେସ ନେତା ଆଲାମଗିର ଆଲାମଙ୍କୁ ଇଡି ଗିରଫ କରିଛି। ବୁଧବାର ସକାଳେ ଦ୍ୱିତୀୟ ଥର ପାଇଁ ଇଡି ଆଲାମଗିରଙ୍କୁ ପଚରାଉଚରା ପାଇଁ ଡକାଇଥିଲା। ତଦନ୍ତରେ ସହଯୋଗ ନକରିବାରୁ ମନ୍ତ୍ରୀ ଆଲାମଗିରଙ୍କୁ ଗିରଫ କରାଯାଇଛି।
ଟେଣ୍ଡର ସ୍କାମରେ ନିକଟରେ ଆଲାମଗିରଙ୍କ ବ୍ୟକ୍ତିଗତ ସଚିବ ସଞ୍ଜୀବ ଲାଲଙ୍କ ଘରୋଇ ସହାୟକ ଜାହାଙ୍ଗୀର ଆଲାମଙ୍କ ଘରେ ଇଡି ଚଢାଉ କରିଥିଲା। ଏହି ଚଢାଉରେ ଇଡି ପ୍ରାୟ ୩୭ କୋଟି ଟଙ୍କା ଜବତ କରିଛି । ଘରୋଇ ସହାୟକ ଜାହାଙ୍ଗୀର ଆଲାମଙ୍କ ଘରୁ ପ୍ରାୟ ୩୫.୫ କୋଟି ଟଙ୍କା ଜବତ କରାଯାଇଥିଲା।
ଏହି ମାମଲାରେ ସଞ୍ଜୀବ ଲାଲ ଏବଂ ଜାହାଙ୍ଗୀର ଆଲାମଙ୍କୁ ଇଡି ଗିରଫ କରିଥିଲା। ପରେ ସଞ୍ଜୀବ ଲାଲଙ୍କ କାର୍ଯ୍ୟାଳୟରେ ଖୋଜାଖୋଜି ବେଳେ ପ୍ରାୟ ଅଢେଇ କୋଟି ଟଙ୍କା ମୂଲ୍ୟର ନଗଦ ଟଙ୍କା ଜବତ କରାଯାଇଥିଲା। ସଂଜୀବ ଲାଲ ଏବଂ ଜାହାଙ୍ଗୀର ଆଲାମ ବର୍ତ୍ତମାନ ଇଡି ରିମାଣ୍ଡରେ ଅଛନ୍ତି। ଏଠାରେ କହିରଖୁଛୁ ଯେ ଇଡି ଚଢାଉ କରି କୋଟି କୋଟି ନଗଦ ଟଙ୍କା ମିଳିବା ଘଟଣାରେ ଝାଡଖଣ୍ଡ ମୁକ୍ତି ମୋର୍ଚ୍ଚାର ନେତାମାନଙ୍କୁ ଟାର୍ଗେଟ କରିଛି ବିଜେପି।
ଆଲାମଗିର ଆଲାମ ହେଉଛନ୍ତି ରାଜ୍ୟର ଗ୍ରାମ୍ୟ ଉନ୍ନୟନ ମନ୍ତ୍ରୀ। ଗତ ସପ୍ତାହରେ ତାଙ୍କ ଘରୋଇ ସହାୟକ ଘରୁ କୋଟି କୋଟି ଟଙ୍କା ଜବତ ପରେ ସେ ବିବାଦକୁ ଆସିଥିଲେ ।
ବଲାଙ୍ଗୀର: ଜୁନ ୪ରେ କେନ୍ଦ୍ରରେ ଇଣ୍ଡି ମେଣ୍ଟ ସରକାର ଗଢିବ । ବିରୋଧୀଙ୍କୁ କଡ଼ା ଭାଷାରେ ସମାଲୋଚନା କରି ଏହି ଦମ୍ଭୋକ୍ତି ଦେଖାଇଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ବଲାଙ୍ଗୀରକୁ ରାହୁଲ ଗାନ୍ଧୀ ପ୍ରଚାରରେ ଆସି କେନ୍ଦ୍ର ସରକାରଙ୍କ ଉପରେ ଗର୍ଜିଛନ୍ତି । ୨୨ ଜଣ ଶିଳ୍ପପତିଙ୍କୁ ୧୬ ଲକ୍ଷ କୋଟି ଟଙ୍କା ଛାଡ କରି କେନ୍ଦ୍ର ସରକାର ଧନୀକଙ୍କୁ ପ୍ରୋତ୍ସାହନ ଦେଇଛନ୍ତି ।
କେନ୍ଦ୍ର ସରକାର ୨୨/ ୨୫ ଜଣଙ୍କ ପାଇଁ କାମ କରୁଛନ୍ତି । ସରକାରକୁ ୯୦ ଅଫିସର ଚଳାଉଛନ୍ତି । ସେଥିରୁ ମାତ୍ର ତିନି ଜଣ ଦଳିତ । ଏଥିରୁ ଜଣାପଡୁଛି କେନ୍ଦ୍ରର ଆଦିବାସୀ ଓ ଦଳିତ ପ୍ରୀତି । ବିଜେପି ସରକାର ଏଥର କ୍ଷମତାକୁ ଆସିଲେ ସମ୍ବିଧାନ ବଦଳାଇଦେବେ ବୋଲି କହୁଛନ୍ତି । ଦୁନିଆର କୌଣସି ଶକ୍ତି ସମ୍ବିଧାନ ବଦଳାଇପାରିବନି ବୋଲି ରାହୁଲ ଚେତାବନୀ ଦେଇଛନ୍ତି ।
ଇଣ୍ଡି ମେଣ୍ଟ ସରକାରକୁ ଆସିଲେ ପ୍ରଥମେ ଗରିବ ଲୋକଙ୍କ ତାଲିକା ହେବ । ପ୍ରତ୍ଯେକ ପରିବାରରୁ ଜଣେ ମହିଳାଙ୍କୁ ବଛାଯିବ । ୪ ଜୁଲାଇରେ ସେହି ମହିଳାଙ୍କ ଖାତାକୁ ପ୍ରଥମ କିସ୍ତିରେ ୮ ହଜାର ୫ଶହ ଟଙ୍କା ଯିବ । ଏପରି ଭାବେ ବର୍ଷକରେ କୋଟି କୋଟି ମନୋନୀତ ମହିଳାଙ୍କ ଖାତାକୁ ଏକ ଲକ୍ଷ ଟଙ୍କା ଯିବ ବୋଲି କହିଛନ୍ତି ରାହୁଲ । ସେହିପରି ଖାଲି ପଡିଥିବା ୩୦ ଲକ୍ଷ ସରକାରୀ ଚାକିରି ପୂରଣ କରାଯିବ । ମନରେଗା ମଜୁରୀକୁ ୨୫୦ରୁ ୪ଶହ ଟଙ୍କା କରିବ ଇଣ୍ଡି ମେଣ୍ଟ ସରକାର । ଇଣ୍ଡି ମେଣ୍ଟ ଆସିଲେ ସଂରକ୍ଷଣ ବ୍ଯବସ୍ଥା ଉଚ୍ଛେଦ କରିବା ସହ ସମସ୍ତ ଚାଷୀଙ୍କ ଋଣ ଛାଡ କରିବ ବୋଲି ରାହୁଲ ପ୍ରତିଶୃତି ଦେଇଛନ୍ତି ।
ନୂଆଦିଲ୍ଲୀ: ଦେଶରେ CAA ଲାଗୁ କରିବା ପରେ ପ୍ରଥମ ଥର ପାଇଁ କେନ୍ଦ୍ର ସରକାର ୩୦୦ ଶରଣାର୍ଥୀଙ୍କୁ ଭାରତୀୟ ନାଗରିକତ୍ୱ ଦେଇଛନ୍ତି। ଏହି ଶରଣାର୍ଥୀମାନେ ଗତ କିଛି ବର୍ଷ ଧରି ଭାରତୀୟ ନାଗରିକତା ପାଇବା ପାଇଁ ସଂଗ୍ରାମ କରିଆସୁଥିଲେ ।
ନାଗରିକତା (ସଂଶୋଧନ) ନିୟମର ୨୦୨୪ ଅଧିସୂଚନା ଲାଗୁ ହେବା ପରେ ପ୍ରଥମ ଥର ପାଇଁ ୩୦୦ ଜଣଙ୍କୁ ଭାରତୀୟ ନାଗରିକତ୍ୱ ଦିଆଯାଇଛି। ଗୃହ ମନ୍ତ୍ରଣାଳୟ ନୂଆଦିଲ୍ଲୀରେ ଶରଣାର୍ଥୀଙ୍କୁ ଡାକି ନାଗରିକତ୍ୱ ଦେଇଥିଲା। କେନ୍ଦ୍ର ଗୃହ ସଚିବ ଅଜୟ କୁମାର ଭାଲା ୧୪ ଆବେଦନକାରୀଙ୍କୁ ପ୍ରମାଣପତ୍ର ପ୍ରଦାନ କରି ସେମାନଙ୍କୁ ଅଭିନନ୍ଦନ ଜଣାଇଛନ୍ତି।
ଚଳିତ ବର୍ଷ ମାର୍ଚ୍ଚ ୧୧ରେ କେନ୍ଦ୍ର ସରକାର ନାଗରିକତ୍ୱ ସଂଶୋଧନ ଆଇନ ଅର୍ଥାତ୍ CAA କାର୍ଯ୍ୟକାରୀ କରିଥିଲେ। ଏହି ଅଧିନିୟମ ଅନୁଯାୟୀ ଭାରତର ତିନି ପଡୋଶୀ ଦେଶ ପାକିସ୍ଥାନ, ବାଂଲାଦେଶ ଏବଂ ଆଫଗାନିସ୍ତାନରୁ ନିର୍ଯାତିତ ସଂଖ୍ୟାଲଘୁମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରାଯିବ। ତେବେ ୩୧ ଡିସେମ୍ବର ୨୦୧୪ ବା ତା ପୂର୍ବରୁ ଭାରତ ଆସିଥିବା ଶରଣାର୍ଥୀ କେବଳ ଏହି ଆଇନର ଲାଭ ନେଇପାରିବେ। ଏହି ଅଧିନିୟମ ଅନୁଯାୟୀ ପଡୋଶୀ ଦେଶର ହିନ୍ଦୁ, ଶିଖ, ଜୈନ, ବୌଦ୍ଧ, ପାରସୀ ଏବଂ ଖ୍ରୀଷ୍ଟିଆନମାନେ ଆବେଦନ କରିଥିଲେ।
୨୦୧୪ ଡିସେମ୍ବର ପୂର୍ବରୁ ଭାରତର ଶରଣ ନେଇଥିବା ଆବେଦକମାନେ ଭାରତର ପ୍ରମାଣପତ୍ର ଦେବାକୁ ପଡିବ । ଏଥିପାଇଁ ପୁରୁଣା ଭିସା, ପାନ କାର୍ଡ, ବୀମା ପଲିସି ଭଳି ଦସ୍ତାବିଜ ପ୍ରମାଣ ସ୍ବରୂପ ଦେଖାଇବାକୁ ହେବ । ପୂର୍ବୋତ୍ତର ରାଜ୍ୟର କିଛି ଅଞ୍ଚଳକୁ ସିଏଏ ମୁକ୍ତ କରାଯାଇଛି ।
