ରାୟଗଡ଼ା: କାଶୀପୁର ବ୍ଲକ କଂସାରିଗୁଡା ଛକ ନିକଟରେ ଅଟୋ ଚାଳକଙ୍କୁ ହତ୍ୟା । ଧାରୁଆ ଅସ୍ତ୍ରରେ ଅଟୋ ଚାଳକଙ୍କ ଗଳାକାଟି ହତ୍ୟା କରାଯାଇଛି । ଖବର ପାଇ ଘଟଣାସ୍ଥଳରେ ରାୟଗଡା ଏସଡିପିଓଙ୍କ ସହ କାଶୀପୁର ଥାନା ଅଧିକାରୀ ପହଞ୍ଚି ଘଟଣାର ତଦନ୍ତ କରୁଛନ୍ତି ।
ମୃତ ଅଟୋ ଚାଳକ କୋରାପୁଟ ବନ୍ଧୁଗାଁ ବ୍ଲକ ଗରିଡି ଗାଁର । ସେ ଦୀର୍ଘ ଦିନ ଧରି ଦୋରାଗୁଡା ସ୍ଥିତ ଆରଆର କଲୋନୀରେ ରହୁଥିଲେ । ହତ୍ୟାକାଣ୍ଡର କାରଣ ଜଣାପଡିନି । ପୋଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହାସହ ଏକ ହତ୍ୟା ମାମଲା ରୁଜୁ କରି ସାଇଣ୍ଟିଫିକ ଟିମ୍ ସହାୟତାରେ ତଦନ୍ତ କରୁଛି ।
ଭୁବନେଶ୍ବର: ବରିଷ୍ଠ ଆଇଏଏସ ବିଷ୍ଣୁପଦ ସେଠୀଙ୍କ ଅଡ଼ୁଆ ବଢ଼ିବାରେ ଲାଗିଛି । ସିବିଆଇ ହାତରେ ପୁଳାପୁଳା ପ୍ରମାଣ ଲାଗିବା ପରେ ବିଷ୍ଣୁପଦଙ୍କ ପାଇଁ ବଢ଼ିଛି ଅଡୁଆ । ଏପଟେ ସିବିଆଇର ସମନ ପରେ ମଧ୍ୟ ହାଜର ହେଉ ନଥିବା ବିଷ୍ଣୁପଦ ଆଜି ହାଜର ହେବାର ସମ୍ଭାବନା ରହିଛି ।
ରାଜ୍ୟ ସରକାରଙ୍କ ବିଭିନ୍ନ ଏଜେନ୍ସି ଥାଇ ମଧ୍ୟ ବିଷ୍ଣୁପଦ କେଉଁ ଅଦୃଶ୍ୟ କାରଣରୁ ଓପନ୍ ଟେଣ୍ଡର ନକରି କେନ୍ଦ୍ରୀୟ ପିଏସୟୁଗୁଡ଼ିକୁ ସରକାରୀ ଆବାସିକ ଆଶ୍ରମ ସ୍କୁଲର ଉନ୍ନୀତିକରଣ କାର୍ଯ୍ୟ ଟେକି ଦେଉଥିଲେ ତା’ର ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ ସିବିଆଇ ହାତରେ ଲାଗିଥିବା ଜଣାପଡ଼ିଛି । ରାଜ୍ୟର କିଛି ନିର୍ଦ୍ଦିଷ୍ଟ ରିୟଲ ଇଷ୍ଟେଟ୍ ସଂସ୍ଥାକୁ ଏସବୁ କାର୍ଯ୍ୟ ଟେକି ଦେବା ପାଇଁ ଆଇନର ଗଳାବାଟରେ କେନ୍ଦ୍ରୀୟ ପିଏସୟୁକୁ ମାଧ୍ୟମ କରାଯାଇଥିବା ନିର୍ଭରଯୋଗ୍ୟ ସୂତ୍ରରୁ ସୂଚନା ମିଳିଛି ।
ନନ୍ଦିଘୋଷ ବ୍ୟୁରୋ: ଶାହାରୁଖ ଖାନଙ୍କ ଫ୍ୟାନ୍ସ ସବୁଠି । କେବଳ ଭାରତ ନୁହେଁ ବିଦେଶରେ ମଧ୍ୟ ତାଙ୍କର ବେଶ କ୍ରେଜ୍ ଦେଖିବାକୁ ମିଳେ । ବଲିଉଡର ବାଦଶାହାଙ୍କ ଅଭିନୟ ସମସ୍ତଙ୍କୁ ବାନ୍ଧି ରଖି ପାରିଛି । ତାଙ୍କ ସହ ଅଭିନୟ କରିବା ପାଇଁ ହିରୋଇନ ମାନେ ଲାଇନ ଲଗାଇଥାନ୍ତି । ତେବେ ଓସ୍କାର ବିଜେତା ଅଭିନେତ୍ରୀ ମଧ୍ୟ ଶାହାରୁଖଙ୍କ ସହ ଅଭିନୟ କରିବା ପାଇଁ ଚାହୁଁଛନ୍ତି । ହଲିଉଡର ଜଣାଶୁଣା ଅଭିନେତ୍ରୀ ଯିଏକି ଓସ୍କାର ବିଜେତା । ତଥାପି ସେ କିଙ୍ଗ ଖାନଙ୍କ ହିରୋଇନ ହେବାକୁ ଚାହୁଁଥିବା ଏକ ଇଣ୍ଟରଭିୟୁରେ କହିଛନ୍ତି । ତେବେ ସେହି ଅଭିନେତ୍ରୀ ଜଣକ ହେଲେ ନିକୋଲ କିଡମେନ । ସେ କହିଛନ୍ତି ଶହାରୁଖଙ୍କ ସହ କାମ କରିବା ବହୁଲ ଭଲ । ଜୁମରେ ବାର୍ତ୍ତାଳାପ ବେଳେ ନିକୋଲ କହିଛନ୍ତି କି, ମୁଁ ଗୋଆ, ଜୟପୁର ଆଦି ସହରକୁ ଯାଇଛି । ମୁଁ ଐଶର୍ଯ୍ୟା ରାୟ ବଚ୍ଚନଙ୍କ ସହ ମଧ୍ୟ ଭେଟ ହୋଇଛି । ଏହାସହ ’ଦ ପରଫେକ୍ଟ କପଲ’ ସିରିଜରେ ଇଶାନ ଖଟରଙ୍କ ସହ ମଧ୍ୟ ଭଅିନୟ କରିଛନ୍ତି । ଏହାସହ ତାଙ୍କୁ ପଚରା ଯାଇଥିଲା କି, ଆପଣ ଶାହାରୁଖଙ୍କ ସହ ଅଭିନୟ କରିବେ କି ? ଯାହାର ଉତ୍ତରରେ ସେ କହିଥିଲେ ଭଲ ହୁଅନ୍ତା । ସେପଟେ ନିକୋଲଙ୍କ ପୂର୍ବରୁ ବହୁ ଜଣାଶୁଣା ହଲିଉଡ ଅଭିନେତ୍ରୀ ମଧ୍ୟ ଶାହାରୁଖଙ୍କ ସହ ଫିଲ୍ମ କରିବା ପାଇଁ ଚାହୁଁଥିବା ଜଣାଇଛନ୍ତି ।
କହି ରଖୁଛୁ କି, ବଲିଉଡକୁ ବହୁ ହିଟ୍ ଫିଲ୍ମ ଉପହାର ଦେଇଥିବା କିଙ୍ଗ ଖାନଙ୍କ ଜ୍ବଳନ୍ତ ଅଭିନୟ ଦର୍ଶକଙ୍କୁ ଆଜି ମଧ୍ୟ ବାନ୍ଧି ରଖିଛି । ଜଓ୍ବାନ ନିକଟରେ ତାଙ୍କର ବେଶ ହିଟ୍ ହେବା ସହ ବକ୍ସ ଅଫିସରେ ଭଲ ରୋଜଗାର କରିଛି । ତେବେ ଆଗାମୀ ଦିନରେ ’ମୁଫାସା: ଦ ଲାୟନ କିଙ୍ଗ’ ଆସିବାକୁ ଯାଉଛି । ଶାହାରୁଖଙ୍କ ଅଭିନିତ ଏହି ଫିଲ୍ମ ପାଇଁ ସେ ବହୁତ ଉତ୍ସାହିତ ଅଛନ୍ତି । ଏହା ବକ୍ସ ଅଫିସରେ ବଡ଼ ରେକର୍ଡ କରିବ ବୋଲି ସେ ମଧ୍ୟ ଆଶାବାଦୀ ଅଛନ୍ତି ।
ସମ୍ବଲପୁର: ଛତିଶଗଡ଼ର ମନମାନୀ ଓ କେନ୍ଦ୍ର ସରକାରଙ୍କ ପାତରଅନ୍ତର ମନୋଭାବ ପାଇଁ ଓଡ଼ିଶାରେ ମହାନଦୀ ମରିବାକୁ ବସିଛି । ରାଜ୍ୟବାସୀଙ୍କ ଜୀବନରେଖା ମହାନଦୀ ପୋଲାଭରମ ସହ ଛତିଶଗଡ଼ର ଏକାଧିକ ଡ୍ୟାମ୍ ପାଇଁ ସୁଖିଲା ପଡ଼ିଛି । ଛତିଶଗଡ଼ ପାଣି ଛାଡୁ ନାହିଁ । ଫଳରେ ଆଜି ହୀରାକୁଦକୁ ଚଳିତବର୍ଷର ସବୁଠାରୁ କମ୍ ଜଳ ପ୍ରବେଶ କରିଛି ।
ଆଜି ମାତ୍ର ୫୩୯ ଘନଫୁଟ ପାଣି ଜଳଭଣ୍ଡାରକୁ ପ୍ରବେଶ କରିଛି । ଉପରମୁଣ୍ଡରେ କଲମl ବ୍ୟାରେଜର ସମସ୍ତ ଗେଟ୍ ବନ୍ଦ ଥିବାରୁ ହଠାତ୍ ହୀରାକୁଦରେ କମି ଯାଇଛି ଜଳ ପ୍ରବେଶ ମାତ୍ରା । ଆଉ ଏହି ସମୟରେ ଜଳଭଣ୍ଡାରରୁ ନିଷ୍କାସିତ ହେଉଛି ୩୭୧୫ ଘନଫୁଟ ଜଳ । ଯେଉଁ ସମୟରେ ୧୦ ହଜାର ଘନଫୁଟ ପାଣି ଆସିବା କଥା, ସେ ସମୟରେ ମାତ୍ର ୫୩୯ ଘନଫୁଟ ପାଣି ଆସୁ ଥିବାରୁ ଚିନ୍ତା ବଢ଼ିବାରେ ଲାଗିଛି ।
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆ ଏବେ ଅଷ୍ଟ୍ରେଲିଆରେ ବର୍ଡର ଗାଭାସ୍କର ଟ୍ରଫି ଖେଳୁଛି । ସିରିଜ ୧-୧ରେ ବରାବର ରହିଛି । ଏବେ ତୃତୀୟ ମ୍ୟାଚ ଖେଳ ଚାଲିଥିବାବେଳେ ପ୍ରଥମ ଦିନରେ ବର୍ଷା ବାଧକ ସାଜିଥିଲା । ତେବେ ଦ୍ବିତୀୟ ଦିନରେ ଅଷ୍ଟ୍ରେଲିଆ ବ୍ୟାଟ୍ସମ୍ୟାନମାନେ ଦମଦାର ବ୍ୟାଟିଂ ଜାରି ରଖିଛନ୍ତି । ଭାରତୀୟ ଖେଳାଳିଙ୍କୁ ଲଗାତାର ଭାବେ ଅଷ୍ଟ୍ରେଲିୟ ଫ୍ୟାନ୍ସମାନେ ଚିଡ଼ାଉଥିବା ଦେଖିବାକୁ ମିଳୁଛି । ତେବେ ଦ୍ବିତୀୟ ଟେଷ୍ଟରେ ହେଡଙ୍କୁ ବୋଲ୍ଡ ସାଙ୍ଗକୁ ବ୍ୟବହାର ପାଇଁ କଙ୍ଗାରୁ ଦଳର ପ୍ରଂଶସକଙ୍କ ଟାର୍ଗେଟରେ ରହିଛନ୍ତି ସିରାଜ । ତାଙ୍କୁ ବାରମ୍ବାର ଭାବେ ଫ୍ୟାନ୍ସମାନେ ଚିଡ଼ାଉଛନ୍ତି । ସିରାଜଙ୍କୁ ’ବୁ’ କହି ଥଟ୍ଟା କରୁଥିବା ଦେଖିବାକୁ ମିଳିଛି । ଯେତେବେଳେ ସେ ପ୍ରଥମ ଓଭର ବୋଲିଂ କରିଥିଲେ ଫ୍ୟାନ୍ସମାନେ ଏଭଳି ବୁ’ କହି ଚିଲାଇବା ଆରମ୍ଭ କରିଥିଲେ । ପରେ ଯେତେବେଳେ ସିରାଜ ବାଉଣ୍ଡୁରୀ ଲାଇନରେ ଫିଲ୍ଡି କରିଥିଲେ ସେତେବେଳେ ମଧ୍ୟ ପ୍ରଂଶସକମାନେ ଚୁପ୍ ହୋଇ ନଥିଲେ ।
India's man with the golden arm! 😍
Nitish Kumar Reddy breaks a flourishing partnership as Marnus Labuschagne departs! 👏#AUSvINDOnStar 👉 3rd Test, Day 2, LIVE NOW! | #ToughestRivalry #BorderGavaskarTrophy pic.twitter.com/p6wNCCZuTp
— Star Sports (@StarSportsIndia) December 15, 2024
ତେବେ ଲାବ୍ରୁସେନ ନୀତିଶ ରେଡ୍ଡିଙ୍କ ବଲରେ ଖେଳିବାକୁ ଯାଉଥିବାବେଳେ ସ୍ଲିପରେ ଆଉଟ୍ ହୋଇ ପାଭିଲିୟନ ଫେରିଥିଲେ । ଆଉ ଏହି କ୍ୟାଚଟି ବରାଟ କୋହଲି ଧରିଥିଲେ । ଏହାପରେ ଚିରାଚରିତ ଢ଼ଙ୍ଗରେ ବିରାଟ ଆଗ୍ରେସିଭ୍ ମୁଡରେ ଆସିଥିଲେ । ଆଉ ଚିଲାଉଥିବା ଅଷ୍ଟ୍ରେଲିୟ ଫ୍ୟାନ୍ସଙ୍କୁ ଚୁପ୍ କରାଇଥିଲେ । ପାଟିରେ ଆଙ୍ଗୁଠି ଦେଇ ଫ୍ୟାନ୍ସଙ୍କ ଆଡ଼କୁ ନିର୍ଦ୍ଦେଶ କରିଥିଲେ କୋହଲି । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ତେବେ ହେଡଙ୍କ ସହ ସିରାଜଙ୍କ ବିବାଦ ପରେ ଅଷ୍ଟ୍ରେଲିଞ ଫ୍ୟାନ୍ସମାନେ ଲଗାତାର ଭାବେ ସିରାଜଙ୍କୁ ଏଭଳି ଭାବେ ଚିଡ଼ାଉଥିବା ଦେଖିବାକୁ ମିଳୁଛି । ଯେଉଁ କାରଣରୁ ବାଉଣ୍ଡୁରୀ ଲାଇନରେ ଫିଲ୍ଡିଂ କରିବା ଅସୁବିଧା ଉପୁଜାଉଛି ।
ବଣାଇ: ସୁନ୍ଦରଗଡ଼ ଜିଲ୍ଲା ବଣାଇରେ ପୁଣି ଜୀବନ ନେଲା ଦନ୍ତା ହାତୀ । ହାତୀ ଆକ୍ରମଣରେ ଦୁଇ ଶିଶୁଙ୍କ ଜୀବନ ଯାଇଛି । ବଣାଇ ବନଖଣ୍ଡ ତାମଡା ରେଞ୍ଜ ଅଧୀନ କଣ୍ଟାପାଲି ଗାଁରେ ଘଟିଛି ଅଘଟଣ । ହାତୀ ଆକ୍ରମଣରେ ଗାଁର ରଞ୍ଜନ ମୁଣ୍ଡାଙ୍କ ଦୁଇ ପିଲାଙ୍କ ମୃତ୍ୟୁ ଘଟିଛି ।
ଅଭିଯୋଗ ଅନୁସାରେ, ଦନ୍ତା ହାତୀଟି ରଞ୍ଜନଙ୍କ ଘର ଭାଙ୍ଗୁଥିଲା । ଏହି ସମୟରେ ୧୧ ବର୍ଷିୟ ପିଲାଟି ଦୌଡ଼ି ପଳାଇବାକୁ ଚେଷ୍ଟା କରୁଥିବା ବେଳେ ହାତୀଟି ତାକୁ କଚାଡି ମାରି ଦେଇଥିଲା । ସେହିପରି ହାତୀ କାନ୍ଥ ଭାଙ୍ଗୁଥିବା ବେଳେ ଉକ୍ତ କାନ୍ଥ ଅନ୍ୟ ଏକ ଶିଶୁ ଉପରେ ପଡ଼ି ଯାଇଥିଲା । ଯାହା ଫଳରେ ତାର ମୃତ୍ୟୁ ଘଟିଥିଲା । ଅନ୍ୟ ଏକ ଶିଶୁକୁ ତାଙ୍କ ମାଆ ଧରି ଦୌଡ଼ଇ ପଳାଇବାରୁ ସେମାନେ ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଥିଲେ ।
ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ବନ ବିଭାଗର ଅପାରଗତା ଯୋଗୁଁ ଦୁଇ ପିଲାଙ୍କ ଜୀବନ ଚାଲିଗଲା ପୋଲି ଗାଁ ଲୋକେ ଅଭିଯୋଗ କରିଛନ୍ତି । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହାସହ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । ହାତୀଟି ଏବେ ବି ଉକ୍ତ ଅଞ୍ଚଳରେ ରହିଥିବାରୁ ଲୋକଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି ।
ବେଙ୍ଗାଲୁରୁ: ପତ୍ନୀ ଓ ତାଙ୍କ ପରିବାର ଲୋକଙ୍କ ନିର୍ଯାତନାରେ ଅତିଷ୍ଠ ସଫ୍ଟଓ୍ବେ ଇଞ୍ଜିନିୟର ଅତୁଲ ସୁଭାଷଙ୍କ ଆତ୍ମହତ୍ୟା ଘଟଣା । ତାଙ୍କ ପତ୍ନୀ ନିକିତା, ଶାଶୁ ଏବଂ ଶାଳକଙ୍କୁ ଗିରଫ କଲା ପୋଲିସ । ଗିରଫଦାରୀ ଏଡାଇବାକୁ ସମସ୍ତେ ଆଗୁଆ ଜାମିନ ପାଇଁ କରିଥିଲେ ଆବେଦନ । ଗିରଫ ପରେ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ନିକିତାଙ୍କୁ ଗୁରୁଗ୍ରାମରୁ ଗିରଫ କରାଯାଇଥିବା ବେଳେ ତାଙ୍କ ମାଆ ଏବଂ ଭାଇଙ୍କୁ ପ୍ରୟାଗରାଜରୁ ଗିରଫ କରାଯାଇଛି ।
ସ୍ତ୍ରୀର ନିର୍ଯାତନା ସହି ନପାରି ଅତୁଲ ଆତ୍ମହତ୍ୟା କରିଥିଲେ । ମରିବା ପୂର୍ବରୁ ଭିଡିଓ କରି ତାଙ୍କ ଉପରେ ହୋଇଥିବା ନିର୍ଯାତନାର ସବୁ କିଛି କହି ଯାଇଛନ୍ତି । ଏହାସହ ସେ ୨୪ ପୃଷ୍ଠାର ଏକ ସୁଇସାଇଡ୍ ନୋଟ୍ ଛାଡ଼ି ଯାଇଛନ୍ତି । ଏହି ଆଧାରରେ ବେଙ୍ଗାଲୁରୁ ପୋଲିସ ପତ୍ନୀ ନିକିତା, ଶାଶୁ ଏବଂ ଶାଳକଙ୍କୁ ହାଜର ହେବାକୁ ସମନ କରିଥିଲା । ବୟାନ ରେକର୍ଡ କରିବାକୁ ଏହି ସମନ କରାଯାଇଥିଲା । କିନ୍ତୁ ଗିରଫଦାରୀ ଏଡ଼ାଇବାକୁ ସେମାନେ ଆଗୁଆ ଜାମିନ ଆବେଦନ କରିଥିଲେ ।
ଅତୁଲଙ୍କ ଆତ୍ମହତ୍ୟା ଘଟଣା ଏବେ ସାରା ଦେଶରେ ଚର୍ଚ୍ଚା ବିଷୟ ପାଲଟିଛି । ମହିଳାଙ୍କୁ ସୁରକ୍ଷା ଦେବା ପାଇଁ ଯେଉଁ ଆଇନ କରାଯାଇଥିଲା, ତାର ଅପବ୍ୟବହାର କରି କେମିତି ସ୍ଵାମୀମାନଙ୍କୁ ନିର୍ଯାତନା ଦିଆଯାଉଛି, ଏହା ହେଉଛି ତା’ର ଏକ ଉଦାହରଣ । ସ୍ଵାମୀଙ୍କ ବିରୋଧରେ ମିଛ କେସ୍ କରି କୋଟି କୋଟି ଟଙ୍କା ଅସୁଲ କରୁଥିଲେ ନିକିତା । ଅତୁଲଙ୍କ ଆତ୍ମହତ୍ୟା ପରଠାରୁ ସମସ୍ତେ ଫେରାର ଥିଲେ ।
ସାଲେପୁର: କଟକ ଜିଲ୍ଲା ସାଲେପୁର ଥାନା ରାଇସୁଙ୍ଗୁଡ଼ାରେ ଅଘଟଣ । ଯାତ୍ରା ଆରମ୍ଭରୁ ଭୁଶୁଡିଲା ଲୁହାର ଏଣ୍ଟ୍ରି ଗେଟ୍ । ଚାପି ହୋଇ ଶତାଧିକ ଦର୍ଶକ ଆହତ । ଶନି ପଡ଼ିଆରେ ଯାତ୍ରା ରାଜାରାଣୀ ନାଟକ ପରିବେଷଣ କରୁଥିବା ବେଳେ ଏହି ଅଘଟଣ ଘଟିଛି ।
ଯାତ୍ରା ଦେଖିବାକୁ ଲୋକଙ୍କ ପ୍ରବଳ ଭିଡ଼ ଜମିଥିଲା । ଦର୍ଶକମାନେ ଟିକେଟ ଯାଞ୍ଚ କରି ଏଣ୍ଟ୍ରି ଗେଟ୍ ଦେଇ ଭିତରକୁ ପ୍ରବେଶ କରୁଥିବା ବେଳେ ହଠାତ ଲୁହାର ଏଣ୍ଟ୍ରି ଗେଟଟି ଭୁଶୁଡି ପଡିଥିଲା । ଫଳରେ ଶତାଧିକ ମହିଳା, ପୁରୁଷ ଓ ବୟସ୍କ ସମେତ ଛୋଟ ପିଲା ଗେଟ ତଳେ ଚାପି ହୋଇ ଯାଇଥିଲେ । ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ସାଲେପୁର ସମେତ ବିଭିନ୍ନ ମେଡିକାଲରେ ଭର୍ତ୍ତି କରିଥିଲେ ।
ସାଲେପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ୨୦ରୁ ଊର୍ଦ୍ଧ୍ବ ଆହତ ଦର୍ଶକ ଚିକିତ୍ସା ପାଇଁ ଭର୍ତ୍ତି ହୋଇଥିଲେ । ସେମାନଙ୍କ ମଧ୍ୟରୁ ୬ ଜଣଙ୍କ ଅବସ୍ଥା ଗୁରୁତର ହେବାରୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ଅନ୍ୟମାନଙ୍କ ଅବସ୍ଥା ସ୍ଥିର ଥିବାରୁ ସେମାନଙ୍କୁ ଘରକୁ ପଠାଇ ଦିଆଯାଇଛି । ଅଧିକ ଦର୍ଶକ ଏକାସଙ୍ଗେ ପ୍ରବେଶ କରିବାରୁ ଏଭଳି ଦୁର୍ଘଟଣା ଘଟିଥିବା କୁହାଯାଉଛି । ଅଘଟଣ ପରେ ଯାତ୍ରାକୁ ବନ୍ଦ କରାଯାଇଥିଲା ।
ଭୁବନେଶ୍ବର: ପ୍ରବଳ ଜାଡରେ ଥରୁଛି ଓଡ଼ିଶା । ଉପାନ୍ତରୁ ଉପକୂଳ ସବୁଠି ତଳମୁହାଁ ପାରଦ । ସ୍ବଭାବିକଠାରୁ ୨ରୁ ୩ ଡିଗ୍ରୀ ପର୍ଯ୍ୟନ୍ତ କମିଲା ତାପମାତ୍ରା । ଆଉ ଦିନକ ପାଇଁ ଶୀତ ଲହରୀ ନେଇ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆଜି ପାଇଁ ସୁନ୍ଦରଗଡ ଓ ଝାରସୁଗୁଡାକୁ ସତର୍କତା ଜାରି କରାଯାଇଛି ।
ଗତ ତିନି ଦିନ ହେବ ରାଜ୍ୟରେ ତାପମାତ୍ରା କମିବା ସହ ଜାଡ ବଢିଛି । ବିଶେଷ କରି ଆଭ୍ୟନ୍ତରୀଣ ଓଡ଼ିଶାରେ ୫ରୁ ୬ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିଛି । ଆସନ୍ତା ୨ ଦିନ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବା ସହ ପ୍ରବଳ ଜାଡ ଅନୁଭୁତ ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଅଧିକାଂଶ ସହରର ତାପମାତ୍ରା ୧୦ ଡିଗ୍ରୀ ତଳକୁ ଖସିବ । ସୁନ୍ଦରଗଡ, କନ୍ଧମାଳ ଓ କୋରାପୁଟରେ ୧୦୦ ମିଟରରୁ କମ୍ ଦୃଶ୍ୟମାନ ଦୂରତା ରହିବ ବୋଲି ଆକଳନ କରାଯାଇଛି ।
ଆସନ୍ତା ୧୭ ତାରିଖରୁ ରାଜ୍ୟରେ ପୁଣି କୋହଲା ପାଗ ହେବ ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି । ୧୯ ତାରିଖ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ହାଲୁକା ବର୍ଷା ନେଇ ସତର୍କତା ଜାରି କରାଯାଇଛି । ୧୭ରେ ପୁରୀ, ଗଞ୍ଜାମ, ଗଜପତି, ରାୟଗଡାରେ ହାଲୁକା ବର୍ଷା ସମ୍ଭାବନା ରହିଛି । ସେହିଭଳି ୧୮ ତାରିଖରେ ପୁରୀ, ଖୋର୍ଦ୍ଧା, ନୟାଗଡ, ଗଞ୍ଜାମ, ଗଜପତି, ରାୟଗଡା, କୋରାପୁଟ ଓ ମାଲକାନଗିରିରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ୧୯ ରେ ଗଞ୍ଜାମ, କନ୍ଧମାଳ, କଳାହାଣ୍ଡି, ରାୟଗଡା, ଗଜପତି, କୋରାପୁଟ ଓ ମାଲକାନଗିରିରେ ହାଲୁକା ବର୍ଷା ହେବ । ବର୍ଷା ପ୍ରଭାବରେ ରାଜ୍ୟରେ ପୁଣି ଉପରମୁହାଁ ହେବ ପାଦର । ୩ରୁ ୫ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ ବୋଲି ପାଣିପାଗ କେନ୍ଦ୍ର ଆକଳନ କରିଛି । ୨୦ ତାରିଖରୁ ରାଜ୍ୟରେ ଶୁଖିଲା ପାଗ ଜାରି ରହିବ ।
ବେଙ୍ଗାଲୁରୁ: ସ୍ତ୍ରୀ ନିର୍ଯାତନା ସହି ନପାରି ବେଙ୍ଗଳୁରୁର ସଫ୍ଟଓ୍ବାର ଇଞ୍ଜିନିୟର ଅତୁଲ ସୁଭାଷ ଆତ୍ମହତ୍ୟା କରିବା ଘଟଣା । ଆଗୁଆ ଜାମିନ ପାଇଁ ଆବେଦନ କଲେ ପତ୍ନୀ ନିକିତା । ଗିରଫଦାରୀରୁ ବର୍ତ୍ତିବା ପାଇଁ ସେ ଏହି ଜାମିନ ଆବେଦନ କରିଛନ୍ତି । ଆଲ୍ଲାହାବାଦ ହାଇକୋର୍ଟରେ ସେ ଆଗୁଆ ଜାମିନ ଆବେଦନ କରିଛନ୍ତି । ଏହାସହ ତାଙ୍କ ମାଆ ଓ ଭାଇ ମଧ୍ୟ ଆଗୁଆ ଜାମିନ ପାଇଁ ଆବେଦନ କରିଥିବା ଜଣାପଡ଼ିଛି ।
ସ୍ତ୍ରୀର ନିର୍ଯାତନା ସହି ନପାରି ଅତୁଲ ଆତ୍ମହତ୍ୟା କରିଥିବାର ଅଭିଯୋଗ ହୋଇଥିଲା । ସେ ୨୪ ପୃଷ୍ଠାର ସୁଇସାଇଡ୍ ନୋଟ୍ ଛାଡ଼ି ଯାଇଛନ୍ତି । ଯେଉଁଥିରେ ତାଙ୍କ ପତ୍ନୀ ଓ ପରିବାର ଲୋକେ ତାଙ୍କୁ ଦେଇଥିବା ନିର୍ଯାତନା ଗୋଟି ଗୋଟି ଉଲ୍ଲେଖ କରି ଯାଇଛନ୍ତି ।
ଏହାକୁ ଆଧାର କରି ବେଙ୍ଗଲୁରୁ ପୋଲିସ ଆସନ୍ତାକାଲି ସୁଦ୍ଧା ହାଜର ହେବାକୁ ପତ୍ନୀ ନିକିତାଙ୍କୁ ସମନ କରିଛି । ବୟାନ ରେକର୍ଡ କରିବାକୁ ଏହି ସମନ କରାଯାଇଛି । ଗିରଫଦାରିକୁ ଏଡ଼ାଇବାକୁ ସେ ଆଗୁଆ ଜାମିନ ଆବେଦନ କରିଛନ୍ତି । ଏହି ଘଟଣାକୁ ନେଇ ସାରା ଦେଶରେ ଚର୍ଚ୍ଚା ଲାଗି ରହିଛି । ମହିଳାଙ୍କୁ ସୁରକ୍ଷା ଦେବା ପାଇଁ ଯେଉଁ ଆଇନ କରାଯାଇଥିଲା, ତା’ର ଅପବ୍ୟବହାର କରି କେମିତି ସ୍ଵାମୀମାନଙ୍କୁ ନିର୍ଯାତନା ଦିଆଯାଉଛି, ଏହା ତାର ଏକ ଉଦାହରଣ ।
