ନନ୍ଦିଘୋଷ ବ୍ୟୁରୋ: ଆଜି ପବିତ୍ର ଅମୃତ ସ୍ନାନ। ପ୍ରୟାଗରାଜରେ ମହାକୁମ୍ଭର ଆଜି ତୃତୀୟ ଅମୃତ ସ୍ନାନର ଶୁଭାରମ୍ଭ ହୋଇଯାଇଛି । ବିଭିନ୍ନ ଆଖଡ଼ା ତରଫରୁ ଅମୃତ ସ୍ନାନ ଚାଲିଛି । ସାଧୁ ସନ୍ଥ ଓ ନାଗା ସାଧୁମାନେ ମହାକୁମ୍ଭରେ ବୁଡ଼ ପକାଉଛନ୍ତି । ବସନ୍ତ ପଞ୍ଚମୀ ଅବସରରେ ଅନୁଷ୍ଠିତ ହେଉଛି ଅମୃତ ସ୍ନାନ। ମହାକୁମ୍ଭରେ ଏବେ ଜମୁଛି ଅଜସ୍ର ଶ୍ରଦ୍ଧାଳୁଙ୍କ ଭିଡ଼ ଲାଗିଛି । ଆଜି ତୃତୀୟ ଅମୃତ ସ୍ନାନ ଅବସରରରେ କୋଟି କୋଟି ଶ୍ରଦ୍ଧାଳୁ ବୁଡ଼ ପକାଉଛନ୍ତି । ଏହି ମହାକୁମ୍ଭରେ ଦେଶବିଦେଶର କୋଟି କୋଟି ଶ୍ରଦ୍ଧାଳୁ ସାମିଲ ହୋଇଛନ୍ତି। ପୂର୍ବରୁ ଦୁଇଟି ଅମୃତ ସ୍ନାନ ସରିଥିବା ବେଳେ ଆଜି ତୃତୀୟ ଅମୃତ ସ୍ନାନ ହେଉଛି । ଆସନ୍ତା ଫେବୃଆରୀ ୧୨ ତାରିଖ ମାଘ ପୂର୍ଣ୍ଣିମାରେ ଆସିବ ପରବର୍ତ୍ତୀ ଅମୃତ ସ୍ନାନ। ତୃତୀୟ ଅମୃତ ସ୍ନାନ ପାଇଁ ୟୁପି ପୋଲିସ ପକ୍ଷରୁ ସୁରକ୍ଷା କଡ଼ାକଡ଼ି କରାଯାଇଛି। ପୋଲିସ ପକ୍ଷରୁ ଫ୍ଲାଗମାର୍ଚ୍ଚ କରାଯାଇଛି। ସୁରକ୍ଷା ବ୍ୟବସ୍ଥା କଡ଼ାକଡ଼଼ି କରାଯାଇଛି। ଏହି ମହାକୁମ୍ଭ ମେଳା ୨୬ ଫେବୃଆରୀ ପର୍ଯ୍ୟନ୍ତ ଚାଲିବ। ଦେଢ଼ ମାସ ପର୍ଯ୍ୟନ୍ତ ଚାଲିବାକୁ ଥିବା ଏହି ମହାକୁମ୍ଭରେ ଯୋଗଦେବା ପାଇଁ ଦେଶ ବିଦେଶରୁ ବହୁ ସାଧୁସନ୍ଥ ଓ ଭକ୍ତଙ୍କ ସୁଅ ଛୁଟୁଛି। ଅପରେସନ ଇଲେଭେନ୍ ଅନୁଯାୟୀ ଭୀଡ଼କୁ ନିୟନ୍ତ୍ରଣ କରାଯାଉଛି । ସୁରକ୍ଷାକୁ ନେଇ ୱାନ ୱେ ରୁଟ୍ ବ୍ୟବସ୍ଥା କରାଯାଇଛି । ତ୍ରିବେଣୀ ଘାଟରେ ଅତ୍ୟଧିକ ବିଡ଼ ରୋକିବାକୁ ପୋଲିସ ଉଦ୍ୟମ ଜାରି ରଖିଛି । ସୁରକ୍ଷା ବଳ ସହିତ ବ୍ୟାରିକେଡକୁ ବଢ଼ାଇ ଦିଆଯାଇଛି ।
୧୫୦ ରନରେ ଇଂଲଣ୍ଡକୁ ହରାଇ ୪-୧ରେ ଟି-ଟ୍ବଣ୍ଟି ସିରିଜ ହାତେଇଲା ଭାରତ
ମୁମ୍ବାଇ: ସୂର୍ଯ୍ୟକୁମାର ବ୍ରିଗେଡର ଦ୍ଵିତୀୟ ବଡ଼ ବିଜୟ । ଟି-ଟ୍ଵେଣ୍ଟି ସିରିଜର ମୁମ୍ବାଇ ମ୍ୟାଚକୁ ବଡ଼ ବ୍ୟବଧାନରେ ଜିତିଛି ସୂର୍ଯ୍ୟକୁମାରଙ୍କ ଟିମ । ବ୍ଯାଟିଂ ଓ ବୋଲିଂରେ ଜବରଦସ୍ତ ପ୍ରଦର୍ଶନ କରି ସିରିଜର ଶେଷ ମ୍ୟାଚକୁ ହାତେଇଛି ଟିମ ଇଣ୍ଡିଆ । ଏହି ବିଜୟ ସହ ଭାରତ ଟି-ଟ୍ଵେଣ୍ଟି ସିରିଜକୁ ୪-୧ ବ୍ୟବଧାନରେ ଜିତି ନେଇଛି । ଇଂଲଣ୍ଡକୁ ୧୫୦ ରନରେ ପରାସ୍ତ କରିଛି ଭାରତ । ଆନ୍ତର୍ଜାତିକ ଟି-ଟ୍ଵେଣ୍ଟିରେ ଏହା ଭାରତର ଦ୍ଵିତୀୟ ବୃହତ ବିଜୟ । ୨୪୮ ରନର ଟାର୍ଗେଟକୁ ପିଛା କରି ଇଂଲଣ୍ଡ ଦଳ ମାତ୍ର ୯୭ ରନ କରି ୧୦ ଓଭର ୩ଟି ବଲରେ ଅଲଆଉଟ ହୋଇଯାଇଥିଲା । ଇଂଲଣ୍ଡର ୱିକେଟ କିପର ଫିଲ ସଲ୍ଟ ୨୩ ବଲରେ ଧୂଆଁଧାର ୫୫ ରନ କରିଥିଲେ । ତେବେ ଟିମକୁ ବିଜୟ ଦେଇପାରି ନଥିଲେ ସଲ୍ଟ । ବେଥେଲ ୧୦ ରନ କରିଥିଲେ । ଅନ୍ୟ କୌଣସି ଇଂଲିଶ ବ୍ଯାଟ୍ସମ୍ୟାନ ଦୁଇ ଅଙ୍କ ଛୁଇଁ ପାରିନଥିଲେ ।
ମହମ୍ମଦ ସାମି ସର୍ବାଧିକ ୩ଟି ୱିକେଟ ନେଇଥିଲେ । ଭାରତର ବରୁଣ ଚକ୍ରବର୍ତ୍ତୀ, ଶିବମ ଦୁବେ ଏବଂ ଅଭିଶେକ ଶର୍ମା ଦୁଇଟି ଲେଖାଏଁ ୱିକେଟ ନେଇଥିଲେ । ରବି ବିଷ୍ଣୋଇ ଗୋଟିଏ ୱିକେଟ ନେଇଥିଲେ ।
ପ୍ରଥମେ ବ୍ଯାଟିଂ କରି ଇଂଲଣ୍ଡ ଆଗରେ ୨୪୮ ରନର ଟାର୍ଗେଟ ଦେଇଥିଲା ଭାରତ । ୩୭ ବଲରେ ଦ୍ରୁତତମ ଶତକ ହାସଲ କରି ଦଳ ପାଇଁ ବିଶାଳ ସ୍କୋର ଛିଡା କରିଥିଲେ ଅଭିଷେକ ଶର୍ମା । ଅଭିଷେକ ୫୪ ବଲରୁ ସର୍ବାଧିକ ୧୩୫ ରନ କରିଥିଲେ । ଶିବମ ଦୁବେ ୩୦ ରନ କରିଥିବାବେଳେ ଅନ୍ଯମାନେ ସେପରି ଆଖିଦୃଶିଆ ସ୍କୋର କରିପାରି ନଥିଲେ । ଇଂଲଣ୍ଡ ପକ୍ଷରୁ ବ୍ରାଇଡନ କାର୍ସେ ୩ ୱିକେଟ ଓ ମାର୍କ ଉଡ ୨ଟି ୱିକେଟ ନେଇଥିଲେ । ୨୪୮ ରନ ଟାର୍ଗେଟ ନେଇ ଖେଳ ଆରମ୍ଭ କରିଛି ଇଂଲଣ୍ଡ ।
ବର୍ଣ୍ଣବୋଧକୁ ବି ଛାଡିଲେନି: ନୂଆ ସଂସ୍କରଣରେ ପ୍ରକୃତ ବର୍ଣ୍ଣବୋଧର ବାଖ୍ୟାକୁ ନେଇ ବିବାଦ
ଭୁବନେଶ୍ବର: ଭକ୍ତ କବି ମଧୁସୂଦନ ରାଓଙ୍କ ୧୭୨ତମ ଜୟନ୍ତୀ ଅବସରରେ ତାଙ୍କ ଦ୍ବାରା ଲିଖିତ ବର୍ଣ୍ଣବୋଧର ନୂତନ ସଂସ୍କରଣ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଉନ୍ମୋଚନ କରିଛନ୍ତି । ଓଡ଼ିଶା ଭାଷା ପ୍ରତିଷ୍ଠାନ ପକ୍ଷରୁ ପ୍ରକାଶିତ ନୂତନ ସଂସ୍କରଣ ଯୁବପିଢୀଙ୍କୁ ଓଡ଼ିଆ ଭାଷା ବିଷୟରେ ଅଧିକ ଜ୍ଞାନ ଆହରଣର ସୁଯୋଗ ଦେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ୧୮୫୩ରେ ଜନ୍ମିତ ମଧୁସୂଦନ ରାଓ ୧୮୯୫ରେ ବର୍ଣ୍ଣବୋଧର ରଚନା କରିଥିଲେ । ଯେଉଁଥିରେ ଓଡ଼ିଆର ଅକ୍ଷର, ବର୍ଣ୍ଣ, ଆକାର, ଶବ୍ଦ ବାବଦରେ ବିସ୍ତୃତ ଭାବେ ବର୍ଣ୍ଣନା କରିଥିଲେ । ପରେ ଏଥିରେ ଛବି ଯୋଡ଼ାଯାଇ ପ୍ରଚ୍ଛଦରେ ବିଲେଇର ଫଟୋ ଥାଇ ଛବିଳ ମଧୁ ବର୍ଣ୍ଣବୋଧ ଭାବେ ବ୍ୟାପକ ଭାବେ ଆଦୃତ ହେଲା । ହେଲେ ଆଜିର ସଂସ୍କରଣ ଉନ୍ମୋଚନ ଉତ୍ସବରେ ଅତିଥିମାନଙ୍କ ବକ୍ତବ୍ୟକୁ ନେଇ ଭାଷାବିତ୍ ମାନେ ଅସନ୍ତୋଷ ପ୍ରକାଶ କରିଛନ୍ତି ।
ବଦଳିଲା ବର୍ଣ୍ଣବୋଧ । ନୂଆ ରୂପରେ ନୂଆ ରଙ୍ଗରେ ବର୍ଣ୍ଣବୋଧ ଉନ୍ମୋଚିତ । ଭକ୍ତକବି ମଧୁସୂଦନ ରାଓଙ୍କ ରଚିତ ବର୍ଣ୍ଣବୋଧର ନୂତନ ସଂସ୍କରଣ ମୁଖ୍ୟମନ୍ତ୍ରୀଙ୍କ ଦ୍ବାରା ଉନ୍ମୋଚିତ ହୋଇଛି । ବିଲେଇ ବଦଳରେ ପ୍ରଚ୍ଛଦ ପୃଷ୍ଠାରେ ହରିଣ ଚିତ୍ର ସ୍ଥାନ ପାଇଛି । କଳାଧଳା ବଦଳରେ ରଙ୍ଗୀନ ହୋଇଛି ବର୍ଣ୍ଣବୋଧ । କାନ୍ଥବାଡ଼, କୋଠାବାଡ଼ିର ରଙ୍ଗ ଭଳି ବର୍ଣ୍ଣବୋଧ ବି ଗେରୁଆ ରଙ୍ଗରେ ପ୍ରକାଶିତ ହୋଇଛି । ଓଡ଼ିଆ ଭାଷା ପ୍ରତିଷ୍ଠାନ ପକ୍ଷରୁ ପ୍ରକାଶିତ ନୂଆ ବର୍ଣ୍ଣବୋଧକୁ ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ, ବିଭାଗୀୟ ସଚିବ ଓ ନିର୍ଦ୍ଦେଶକ ଉନ୍ମୋଚନ କରିଛନ୍ତି । ଶ୍ରୀପଞ୍ଜମୀ ହେଉଛି ମଧୁସୂଦନ ରାଓଙ୍କ ଜନ୍ମଦିନ । ଏହି ଅବସରରେ ପ୍ରକାଶିତ ନୂଆ ସଂସ୍କରଣ ଦ୍ବାରା ପିଲାମାନଙ୍କୁ ଓଡ଼ିଆ ଭାଷା ବିଷୟରେ ଜ୍ଞାନ ଆହରଣ କରିବାରେ ସୁଯୋଗ ଦେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ବିଲେଇ ବଦଳରେ ହରିଣ ଫଟୋ ଥିଲେ ବି ଏହାର ମୌଳିକତା ବଜାୟ ରହିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ହେଲେ ବର୍ଣ୍ଣବୋଧର ନୂତନ ସଂସ୍କରଣ ଓ ଏହାର ଲେଖା, ଛବିକୁ ନେଇ ପ୍ରଶ୍ନ ଉଠାଇଛନ୍ତି ଭାଷାବିତ । ୧୮୯୫ରେ ପ୍ରକାଶିତ ପ୍ରଥମ ସଂସ୍କରଣ ବହିର ନାଁ ଥିଲା ବର୍ଣ୍ଣବୋଧ । ପରେ ଏହାକୁ ଆଉ ଏକ ପ୍ରକାଶନ ସଂସ୍ଥା ଏଥିରେ କିଛି ଛବି ଯୋଡ଼ି ଛବିଳ ମଧୁ ବର୍ଣ୍ଣବୋଧ ନାଁରେ ବଜାରକୁ ଛାଡ଼ିଲେ । ହେଲେ ବିଲେଇ ଫଟୋ ଥିବା ଛବିଳ ମଧୁ ବର୍ଣ୍ଣବୋଧ ବ୍ୟାପକ ଭାବେ ଆଦୃତ ହୋଇଥିଲେ ବି ବହିର ଟାଇଟଲ ସହ ମଧୁବାବୁଙ୍କ କିଛି ସମ୍ପର୍କ ନଥିଲା । ହେଲେ ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ ସମସ୍ତେ ଛବିଳ ମଧୁ ବର୍ଣ୍ଣବୋଧ ମଧୁବାବୁଙ୍କ ଲିଖିତ ବୋଲି ବାରମ୍ବାର କହିବା ଦ୍ବନ୍ଦ ସୃଷ୍ଟି କରିଛି । ନୂତନ ସଂସ୍କରଣ ଓଡ଼ିଆ ଅସ୍ମିତାର ପ୍ରତୀକ ବୋଲି ମୁଖ୍ୟମନ୍ତ୍ରୀ କହିଥିବା ବେଳେ ପୁରୁଣା ବହିରେ ବିଲେଇର ଛବିକୁ ନେଇ ଅତିଥିମାନଙ୍କ ଉପାଖ୍ୟାନକୁ ନାପସନ୍ଦ କରିଛନ୍ତି ଭାଷାବିତ । ଏହାସହ ବହିର ରଙ୍ଗ ଶାସକ ଦଳର ରଙ୍ଗ ଗେରୁଆ ଭଳି ହୋଇଥିବାରୁ ଏହାକୁ ନେଇ ବି ପ୍ରଶ୍ନ ଉଠିଛି ।
୧୯୦୧ରେ ଏହାର ଅଷ୍ଟମ ସଂସ୍କରଣର ପ୍ରଚ୍ଛଦପଟକୁ ଆଧାର କରି ୨୦୨୫ରେ ମଧୁସୂଦନ ରାଓଙ୍କ ଜନ୍ମ ତିଥିରେ ନୂତନ ସଂସ୍କରଣ ଉନ୍ମୋଚିତ ହୋଇଛି । ଏହା ଆଗାମୀ ପିଢୀ ପାଇଁ ଖୁବ୍ ଉପାଦେୟ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ହେଲେ ଅତିଥିମାନେ ବର୍ଣ୍ଣବୋଧ ଓ ଛବିଳ ମଧୁ ବର୍ଣ୍ଣବୋଧ ଭିତରେ ଥିବା ତଫାତକୁ ଜାଣି ପାରୁ ନଥିବାରୁ ଭାଷାବିତମାନେ କ୍ଷୋଭ ପ୍ରକାଶ କରିଛନ୍ତି ।
ଫେବୃଆରୀ ୮ ତାରିଖରେ ମିଳିବ ସୁଭଦ୍ରା ପ୍ରଥମ କିସ୍ତିର ଚତୁର୍ଥ ପର୍ଯ୍ୟାୟ ଟଙ୍କା
ଭୁବନେଶ୍ବର: ଫେବୃଆରୀରେ ମିଳିବ ସୁଭଦ୍ରା ଯୋଜନାର ପ୍ରଥମ କିସ୍ତିର ଚତୁର୍ଥ ପର୍ଯ୍ୟାୟ ଟଙ୍କା । ଫେବୃଆରୀ ୮ ତାରିଖରେ ଚତୁର୍ଥ ପର୍ଯ୍ୟାୟ ଟଙ୍କା ମିଳିବ । ଏନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୂଚନା ଦେଇଛନ୍ତି ।
ଆହୁରି ଅଢେଇ ଲକ୍ଷ ଏନପିସିଆଇ ଏବଂ ଇ-କେଓ୍ବାଇସି କରିବାକୁ ବାକି ଅଛନ୍ତି । ୮ ତାରିଖ ପୂର୍ବରୁ ବ୍ୟାଙ୍କକୁ ଯାଇ ବାୟୋମେଟ୍ରିକ ସହ NPCI କରିବାକୁ ଅପିଲ କରିଛନ୍ତି ଉପମୁଖ୍ୟମନ୍ତ୍ରୀ । ୩ ଓ ୪ ତାରିଖରେ ବ୍ୟାଙ୍କକୁ ଯାଇ ଏନପିସିଆଇ ଚେକ କରିପାରିବେ । ଏହି ପର୍ଯ୍ୟାୟରେ ୨୦ ଲକ୍ଷ ହିତାଧିକାରୀଙ୍କୁ ସୁଭଦ୍ରା ଟଙ୍କା ପ୍ରଦାନ କରାଯିବ । ଚଳିତବର୍ଷ ମାର୍ଚ୍ଚ ୩୦ ସୁଦ୍ଧା ସୁଭଦ୍ରା ଆବେଦନ କଲେ ବି ଆବେଦନକାରୀ ମହିଳାଙ୍କୁ ୨୦୨୪ରେ ବାକିଥିବା ୨ଟି କିସ୍ତି ମିଳିବ । ସବୁଠୁ ଅଧିକ NPCI ଷ୍ଟେଟ ବ୍ୟାଙ୍କ ଅଫ ଇଣ୍ଡିଆରେ ବାକି ଅଛି । ତେଣୁ ଷ୍ଟେଟ ବ୍ୟାଙ୍କରେ ଆକାଉଣ୍ଟ ଥିବା ଆବେଦନକାରୀମାନେ ଷ୍ଟେଟ ବ୍ୟାଙ୍କ ଶାଖାକୁ ଯାଇ ଏନପିସିଆଇ କରାଇ ନିଅନ୍ତୁ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ।
ମଲ୍ଟି ଡ୍ରଗ୍ସ ରେସିଷ୍ଟାଣ୍ଟ୍ ପ୍ରଭାବ: ସହଜରେ ଯକ୍ଷ୍ମାରୁ ଭଲ ହୋଇ ପାରୁ ନାହାନ୍ତି ପିଲା
ଭୁବନେଶ୍ବର: ମଲଟି ଡ୍ରଗସ୍ ରେସିଷ୍ଟାନସ ଯୋଗୁଁ ଯାହାକୁ ଯକ୍ଷ୍ମା ହେଉଛି, ସହଜରେ ସେ ଭଲ ହେଉ ନାହାନ୍ତି । ବିଶେଷ କରି ପିଲାଙ୍କ କ୍ଷେତ୍ରରେ ଏହି ସମସ୍ୟା ଅଧିକ । ନବଜାତଠାରୁ ଆରମ୍ଭ କରି ତରୁଣ ତରୁଣୀଙ୍କ କ୍ଷେତ୍ରରେ ଏହା ହେଉଛି । ଏହାର ମୁଖ୍ୟ କାରଣ ହେଉଛି ଡ୍ରଗସ୍ ରେସିଷ୍ଟାନସ । କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅନୁଧ୍ୟାନରୁ ଜଣାପଡ଼ିଛି, ନିଜେ ନିଜେ ମନ ଇଚ୍ଛା ଔଷଧ କିଣି ଖାଉଥିବାରୁ ଏହି ସମସ୍ୟା ହେଉଛି । ଏପରି ନ କରିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ ।
ଛୋଟ ପିଲାଙ୍କୁ ହେଉଛି ଯକ୍ଷ୍ମା । ଯଦି ଗର୍ଭବତୀଙ୍କୁ ଯକ୍ଷ୍ମା ହୁଏ, ତାଙ୍କ ସନ୍ତାନକୁ ମଧ୍ୟ ଯକ୍ଷ୍ମା ହେବାର ଆଶଙ୍କା ଅଛି । ଏପରିକି ବାହାର ସଂକ୍ରମଣ ଯୋଗୁଁ ଯକ୍ଷ୍ମାରେ ୫ ବର୍ଷରୁ କମ ବୟସର ପିଲାଙ୍କ ଜୀବନ ଯାଉଛି । ୧୮ରୁ ୧୯ ବର୍ଷ କିଶୋର କିଶୋରୀ ବି ଯକ୍ଷ୍ମାରେ ଆକ୍ରାନ୍ତ ହେଉଛନ୍ତି । ଭାରତ ଓ ଦକ୍ଷିଣ ଆଫ୍ରିକାର ୧୯ ବର୍ଷରୁ କମ୍ ବୟସର ୨୩ ହଜାର ୩୬୯ ପିଲାଙ୍କ ଉପରେ ୪୨ ପ୍ରକାର ବିଶ୍ଲେଷଣ କରି ଏହି ଉଦବେଗଜନକ ତଥ୍ୟ ପାଇଛନ୍ତି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟର ବୈଜ୍ଞାନିକ । ଏଥିପାଇଁ ମଲ୍ଟି ଡ୍ରଗସ୍ ରେସିଷ୍ଟାଣ୍ଟ୍ ଓ ରିଫାମ୍ସିନ୍ ରେସିଷ୍ଟାଣ୍ଟ୍ ଦାୟୀ । ରିଫାମ୍ସିନ୍ ଔଷଧ ଯକ୍ଷ୍ମାକୁ ଭଲ କରିବା ପାଇଁ ବ୍ୟବହାର କରାଯାଏ । ଯଦି ପିଲାଟିର ଓଜନ କମୁଛି, କାଶ, କଫ, ଥଣ୍ଡା ସହ ଜ୍ବର ଅଧିକ ଦିନ ଲାଗି ରହୁଛି ତା’ହେଲେ ସେହି ପିଲାକୁ ତୁରନ୍ତ ଛାତି ରୋଗ ବିଶେଷଜ୍ଞଙ୍କୁ ଦେଖାଇବା ଦରକାର । ନହେଲେ ଭିତରେ ଭିତରେ ସେ ଯକ୍ଷ୍ମାରେ ଆକ୍ରାନ୍ତ ହେବାର ଆଶଙ୍କା ଅଛି ।
ସାଧାରଣତଃ ପିଲାଙ୍କୁ ଥଣ୍ଡା କାଶ ହେଲେ ମାଆବାପା ନିଜେ ନିଜେ ଔଷଧ ଦୋକାନରୁ ମେଡିସିନ୍ କିଣି ଦେଇଥାନ୍ତି । ହେଲେ ଏଭଳି କରିବା ଭୁଲ । ଥଣ୍ଡା ଓ କାଶ କିମ୍ବା ଜ୍ଵର ଯଦି ୩ ସପ୍ତାହରୁ ଅଧିକ ଦିନ ଲାଗି ରହୁଛି, ତା’ହେଲେ ଛାତି ବିଶେଷଜ୍ଞଙ୍କ ସହ ପରାମର୍ଶ କରିବା ଉଚିତ । ବିଶେଷଜ୍ଞ କହୁଛନ୍ତି, ମନଇଚ୍ଛା ନିଜେ ଔଷଧ କିଣି ଆଣି କିମ୍ଵା କ୍ଵାକରୁ ଔଷଧ ନେଇ ପିଲାକୁ ଦେବା ଅନୁଚିତ । ଭାରତରେ ବିନା ପ୍ରେସକ୍ରିପସନରେ ଅଧିକ ଔଷଧ କାରବାର ହେଉଥିବାରୁ ପିଲା ଓ ତରୁଣଙ୍କ ଶରୀରରେ ଔଷଧର ପାର୍ଶ୍ଵ ପ୍ରତିକ୍ରିୟା ଅଧିକ ଦେଖାଯାଉଛି । ଗବେଷଣାରୁ ଜଣାପଡ଼ିଛି ମଲଟି ଡ୍ରଗ୍ସ ରେସିଷ୍ଟାଣ୍ଟ୍ ଯୋଗୁ ଭାରତରେ ୯୦ ପ୍ରତିଶତ ପିଲାଙ୍କ ଦେହରେ ଯକ୍ଷ୍ମା ରୋଗର ଲକ୍ଷଣ ଦେଖାଦେଉଛି ।
ନୂଆ ଏଜୁକେସନ ପଲିସି କେବଳ ବାହାନା: ଅଙ୍ଗନବାଡି ଦିଦିଙ୍କ ହକ ଛଡାଇ ନେବାକୁ ଷଡ଼ଯନ୍ତ୍ର
ଭୁବନେଶ୍ବର: ଅଙ୍ଗନବାଡି ଦିଦିଙ୍କ ହକ୍ ଛଡ଼ାଇ ନେବାକୁ ଚାଲିଛି ଷଡଯନ୍ତ୍ର । ହେଲେ ଦିଦିଙ୍କ ହକ୍ ପାଇଁ ରାସ୍ତାକୁ ଓହ୍ଲାଇବ ବିଜୁ ଶ୍ରମିକ ସାମୁଖ୍ୟ । ରାଜ୍ୟରେ ଥିବା ଦେଢ ଲକ୍ଷରୁ ଅଧିକ ଅଙ୍ଗନବାଡି କର୍ମୀଙ୍କୁ ସରକାରୀ ମାନ୍ୟତା ସହ ଦରମା ବୃଦ୍ଧି ଓ ସାମାଜିକ ସୁରକ୍ଷା ପ୍ରଦାନ ପାଇଁ ରାଜ୍ୟ ଏବଂ କେନ୍ଦ୍ର ସରକାରଙ୍କୁ ଘେରିବ ଦଳ । ଅଙ୍ଗନବାଡି କର୍ମୀମାନେ ଦୀର୍ଘ ୫୦ ବର୍ଷରୁ ଅଧିକ ସମୟ ଧରି କାର୍ଯ୍ୟ କରୁଥିବା ବେଳେ ଏବେ କେନ୍ଦ୍ର ସରକାର ଜାତୀୟ ଶିକ୍ଷାନୀତି ଆଣି ସେମାନଙ୍କୁ ଛଟେଇ କଲା ଭଳି ପରିସ୍ଥିତି ସୃଷ୍ଟି କରୁଛନ୍ତି । ଯାହାକୁ ନେଇ ଦିଦିମାନେ ଏବେ ଚିନ୍ତାରେ ଥିବା ଦଳ କହିଛି । ଏନେଇ ଆଜି ବିଜୁ ଶ୍ରମିକ ସାମୁଖ୍ୟର ଏକ ଜରୁରୀ ବୈଠକ ଅନୁଷ୍ଠିତ ହେବା ସହ ଆନ୍ଦୋଳନ ପାଇଁ ସଜବାଜ ହେଉଛି ବିଜେଡି ।
ନୂଆ ଏଜୁକେସନ ପଲିସି କେବଳ ବାହାନା । ଅଙ୍ଗନବାଡି ଦିଦିଙ୍କ ହକ ଛଡାଇ ନେବାକୁ ଷଡ଼ଯନ୍ତ୍ର । କେନ୍ଦ୍ର ସରକାରଙ୍କ ବିରୋଧରେ ବଡ ଆନ୍ଦୋଳନ ପାଇଁ ସଜବାଜ । ରାସ୍ତାକୁ ଓହ୍ଲାଇବ ଅଙ୍ଗନବାଡି କର୍ମୀ ଓ ସହାୟିକା ସଂଘ । ଦାବି ପୂରଣ ପାଇଁ ସହଯୋଗ କରିବ ବିଜୁ ଶ୍ରମିକ ସାମୁଖ୍ୟ । ନୂଆ ଏଜୁକେସନ ପଲିସିରେ ତୁରନ୍ତ ଅଙ୍ଗନବାଡି ଦିଦିଙ୍କ ଦାୟିତ୍ବ ସ୍ପଷ୍ଟ କରିବାକୁ ଦାବି କରାଯାଇଛି । ସପ୍ଲିମେଣ୍ଟାରୀ ନ୍ୟୁଟ୍ରେସନ୍ କାର୍ଯ୍ୟକମ୍ରରେ ମୂଲ୍ୟବୃଦ୍ଧିକୁ ଦେଖି ଅଣ୍ଡା ଦର ନିର୍ଦ୍ଧାରଣ କରିବାକୁ ଅଙ୍ଗନବାଡି କର୍ମୀ ଓ ସହାୟିକା ସଂଘ ଜିଦ୍ ଧରିଛି । ଦାବି ପୂରଣ ନହେଲେ କାର୍ଯ୍ୟ ଛାଡି ପୁଣି ଲୋୟର ପିଏମଜିରେ ଗର୍ଜନ କରିବେ ବୋଲି ଚେତାବନୀ ଦେଇଛନ୍ତି । ଏନେଇ ଆଜି ବିଜୁ ଶ୍ରମିକ ସାମୁଖ୍ୟ ପକ୍ଷରୁ ଏକ ଜରୁରୀ ବୈଠକରେ ଆଲୋଚନା ହୋଇଛି । ବର୍ତ୍ତମାନ ରାଜ୍ୟରେ ଲାଗୁ କରାଯାଇଥିବା ନୂଆ ଜାତୀୟ ଶିକ୍ଷା ନୀତି ଅନୁସାରେ ଅଙ୍ଗନବାଡି ଦିନି କ’ଣ କାର୍ଯ୍ୟ କରିବେ ସେ ନେଇ ଦ୍ବନ୍ଦ୍ବରେ ରହିଛନ୍ତି । ଏହାସହ ଶିଶୁବାଟିକାରେ ଅଙ୍ଗନବାଡି କର୍ମୀଙ୍କୁ କୌଣସି ଶିକ୍ଷାଗତ ଯୋଗ୍ୟତା ଓ ବୟସ ସୀମା ନରଖି ସିନିୟରିଟି ବେସିସରେ ଶିକ୍ଷକର ମାନ୍ୟତା ପ୍ରଦାନ କରିବାକୁ ସଂଘ ଦାବି କରିଛି ।
ସେପଟେ ରାଜ୍ୟରେ ଦେଢ ଲକ୍ଷରୁ ଅଧିକ ଅଙ୍ଗନବାଡି କର୍ମୀ କାର୍ଯ୍ୟ କରୁଥିବା ବେଳେ ଅଙ୍ଗନବାଡି ଦିଦିଙ୍କୁ ୧୦ ହଜାର ଓ ସହାୟିକାଙ୍କୁ ୫ ହଜାର ଟଙ୍କା ଦରମା ପ୍ରଦାନ କରାଯାଉଛି । ଦୀର୍ଘ ୫୦ ବର୍ଷରୁ ଅଧିକ ସମୟ ଧରି କର୍ଯ୍ୟ କରିଆସୁଥିଲେ ମଧ୍ୟ ଅଙ୍ଗନବାଡି କର୍ମୀଙ୍କୁ କେନ୍ଦ୍ର ସରକାର ସରକାରୀ କର୍ମଚାରୀ ମାନ୍ୟତା ପ୍ରଦାନ କରିନାହାଁନ୍ତି । ଦିନକୁ ଦିନ କେନ୍ଦ୍ର ଏବଂ ରାଜ୍ୟ ସରକାର ବିଭିନ୍ନ ଯୋଜନାଗୁଡିକୁ କାର୍ଯ୍ୟକାରୀ କରିବାକୁ ଅଙ୍ଗନବାଡି କର୍ମୀଙ୍କୁ ନିୟୋଜିତ କରୁଥିବା ବେଳେ ସେହି ଅନୁସାରେ ପାରିଶ୍ରମିକ ଦେଉ ନାହାଁନ୍ତି । ତେଣୁ ସେମାନଙ୍କୁ ତୁରନ୍ତ ସରକାରୀ ମାନ୍ୟତା ପ୍ରଦାନ ସହ ଜାତୀୟ ଶିକ୍ଷା ନୀତିରେ ସେମାନଙ୍କର କାର୍ଯ୍ୟ ଏବଂ ଦାୟିତ୍ବ ସ୍ପଷ୍ଟ କରିବା ପାଇଁ ବିଜୁ ଶ୍ରମିକ ସାମୁଖ୍ୟ ଦାବି କରିଛି । ଏନେଇ ଆଜି ସାମୁଖ୍ୟ ପକ୍ଷରୁ ଅଙ୍ଗନବାଡି କର୍ମୀମାନଙ୍କୁ ନେଇ ବୈଠକ କରାଯିବା ସହ ଆଗାମୀ ଆନ୍ଦୋଳନ ପାଇଁ ବ୍ଲ୍ୟୁପ୍ରିଣ୍ଟ ପ୍ରସ୍ତୁତ ହୋଇଛି ।
ପୂର୍ବରୁ ଅଙ୍ଗନବାଡି ଦିଦିମାନେ ୫ ବର୍ଷ ବୟସର ଶିଶୁମାନଙ୍କୁ ପାଠ ପଢାଇବା ସହ ବିଭିନ୍ନ ସରକାରୀ କାର୍ଯ୍ୟରେ ନିୟୋଜିତ ରହିଥିଲେ । କିନ୍ତୁ ଜାତୀୟ ଶିକ୍ଷାନୀତି ପରେ ଏବେ ସମସ୍ତେ ଦ୍ବନ୍ଦରେ ଅଛନ୍ତି ।
କାଲି ସରିବ ଦିଲ୍ଲୀ ପ୍ରଚାର: ହାଟ୍ରିକ ଲକ୍ଷ୍ଯରେ ଆପ, ଶାସନକୁ ଫେରିବାକୁ କଂଗ୍ରେସ-ବିଜେପିର ପ୍ରାଣମୂର୍ଚ୍ଛା ଉଦ୍ଯମ
ନୂଆଦିଲ୍ଲୀ: ଆସନ୍ତାକାଲି ସରିବ ଦିଲ୍ଲୀ ବିଧାନସଭା ପାଇଁ ପ୍ରଚାର । ୫ ତାରିଖରେ ଭୋଟ । ୮ ତାରିଖରେ ଗଣତି । ସବୁ ରାଜନୈତିକ ଦଳର ଆଖିରୁ ହଜିଯାଇଛି ନିଦ । ଭୋଟ ହାତେଇବା ଲାଗି ବିଜେପିର ଉଦ୍ଯମକୁ ଖୁଲାସା କରିଛନ୍ତି କେଜ୍ରିଓ୍ବାଲ । ବ୍ଲାକମେଲର ଶିକାର ନହେବାକୁ ସେ ଦେଇଛନ୍ତି ଆହ୍ବାନ । ତେଣେ ପ୍ରଚାରରେ ସାମିଲ ହୋଇଛନ୍ତି ବହୁ କେନ୍ଦ୍ରମନ୍ତ୍ରୀ । ଅମୃତସରରେ ଆମ୍ବେଦକର ପ୍ରତିମୂର୍ତ୍ତି ଭଙ୍ଗା ରାଜନୀତିର ପ୍ରଭାବ ପଡିଛି ଦିଲ୍ଲୀରେ ।
ବର୍ତ୍ତମାନ ଦିଲ୍ଲୀ ଦଖଲ ପାଇଁ ବଡ଼ ଷଡଯନ୍ତ୍ର ଚର୍ଚ୍ଚା । ଭୋଟ ହାତେଇବା ଲାଗି ଖୋଲାଖୋଲି ଭୋଟରଙ୍କୁ କରାଯାଉଛି ବ୍ଲାକମେଲ । ଏପରିକି ଘର ଘର ବୁଲି ଇଙ୍କ ଲଗାଇବା ପାଇଁ ଚାଲିଛି ଯୋଜନା । ଏଭଳି ବ୍ଯକ୍ତି ବିଶେଷଙ୍କ ଜାଲରେ ନପଡିବାକୁ ଆହ୍ବାନ ଦେଇଛନ୍ତି ଆପ୍ ନେତା ଅରବିନ୍ଦ କେଜ୍ରିଓ୍ବାଲ । ସେ କହିଛନ୍ତି- ଯଦି ବିଜେପି ସରକାରକୁ ଆସିବ ତେବେ କିଛି ମାସରେ ଦିଲ୍ଲୀରୁ ବସ୍ତି ମୂଳପୋଛ ହୋଇଯିବ । ବିଜେପିରେ ମିଶିବା ଲାଗି ନେତାଙ୍କୁ ବାଧ୍ଯ କରାଯାଉଛି । ବିଭିନ୍ନ ଧମକ ଚମକ ଦିଆଯାଉଛି । ରାଜଧାନୀରେ ଆଇନ ଶୃଙ୍ଖଳା ସ୍ଥିତି ବିଗିଡିଯାଇଛି ।
ତେବେ କେଜ୍ରିଓ୍ବାଲଙ୍କ ଅଭିଯୋଗକୁ ଖଣ୍ଡନ କରିଛି ବିଜେପି । ଦିଲ୍ଲୀରେ ନିରପେକ୍ଷ ନିର୍ବାଚନ ଉପରେ ଗୁରୁତ୍ବ ଆରୋପ କରିଛନ୍ତି କଂଗ୍ରେସ ପ୍ରାର୍ଥୀ ସନ୍ଦୀପ ଦୀକ୍ଷିତ । ଦିଲ୍ଲୀବାସୀ ସଠିକ୍ ନିଷ୍ପତ୍ତି ନେବେ ବୋଲି କହିଛନ୍ତି ଶିବସେନା ୟୁବିଟି ସାଂସଦ ପ୍ରିୟଙ୍କା ଚତୁର୍ବେଦୀ ।
ଆସନ୍ତାକାଲି ସରିବ ବିଧାନସଭା ନିର୍ବାଚନ ପ୍ରଚାର । ଭୋଟରଙ୍କୁ ମନାଇବାକୁ ମଇଦାନରେ ପ୍ରାଣମୂର୍ଚ୍ଛା ଉଦ୍ୟମ କରୁଛନ୍ତି ତିନି ପ୍ରମୁଖ ରାଜେନୖତିକ ଦଳ ଆପ, ବିଜେପି ଓ କଂଗ୍ରେସ । ଆପ ହାଟ୍ରିକ ଲକ୍ଷ୍ୟରେ ରହିଛି । ଅନ୍ୟପକ୍ଷେ କୌଣସି ପ୍ରକାରେ କ୍ଷମତାକୁ ଆସିବା ଲାଗି ବିଜେପି ଓ କଂଗ୍ରେସ ଚଳାଇଛନ୍ତି କସରତ । ପ୍ରଚାରରେ ସାମିଲ ହୋଇଛନ୍ତି ବିଜେପିର ବହୁ କେନ୍ଦ୍ରମନ୍ତ୍ରୀ । ଘରକୁ ଘର ଯାଇ ଭୋଟରଙ୍କୁ କରୁଛନ୍ତି ଆକର୍ଷିତ । ତେଣେ ପଞ୍ଜାବ ଅମୃତସରରେ ଆମ୍ବେଦକରଙ୍କ ପ୍ରତିମୂର୍ତ୍ତି ଭଙ୍ଗାରୁଜା ଘଟଣାରେ ବଢିଛି ରାଜନୀତି । ଏହି ଘଟଣାରେ ଆପକୁ ଦାୟୀ କରି କେଜ୍ରିଓ୍ବାଲଙ୍କ ବାସଭବନ ଆଗରେ ବିକ୍ଷୋଭ କରିଛି କଂଗ୍ରେସ । ନିରପେକ୍ଷ ନିର୍ବାଚନ ପାଇଁ ସମସ୍ତ କ୍ଷେତ୍ର ପ୍ରସ୍ତୁତ ଥିବା କହିଛନ୍ତି ନିର୍ବାଚନ ଅଧିକାରୀ ।
୫ମ ଟି-ଟ୍ବଣ୍ଟି: ଇଂଲଣ୍ଡକୁ ୨୪୮ ରନର ଟାର୍ଗେଟ୍ ଦେଲା ଭାରତ
ମୁମ୍ବାଇ: ଓ୍ବାଙ୍ଖଡେ ଷ୍ଟାଡିୟମରେ ଚାଲିଥିବା ୫ମ ଟି-ଟ୍ବଣ୍ଟି ମ୍ୟାଚରେ ଇଂଲଣ୍ଡ ଆଗରେ ଭାରତ ୨୪୮ ରନର ଟାର୍ଗେଟ ରଖିଛି । ପ୍ରଥମେ ବ୍ୟାଟି କରି ଭାରତ ୯ ଓ୍ବିକେଟ ହରାଇ ୨୪୭ ରନ୍ କରିଛନ୍ତି । ଆଜିର ମ୍ୟାଚରେ ଭାରତୀୟ ଓପନର ଅଭିଶେକ ଶର୍ମାଙ୍କ ଧୂଆଁଧାର ବାଟିଂ ଦେଖିବାକୁ ମିଳିଛି । ଅଭିଶେକ ୫୪ ବଲର ସମ୍ମୁଖୀନ ହୋଇ ୧୩ ଛକା ଓ ୭ ଚୌକା ସହାୟତାରେ ୧୩୫ ରନ୍ କରିଛନ୍ତି । ଏହାସହ ସେ ଭାରତୀୟ ବ୍ୟାଟର ଭାବେ ଟି-ଟ୍ବଣ୍ଟିରେ ସର୍ବାଧିକ ରନ୍ କରିବାର ରେକର୍ଡ କରିଛନ୍ତି । ଅଭିଶେକ ରୋହିତଙ୍କ ୧୨୮ ରନର ରେକର୍ଡକୁ ଭାଙ୍ଗିଛନ୍ତି ।
ଟିସ୍ ହାରିବା ପରେ ବ୍ୟାଟିଂ ଆମନ୍ତ୍ରଣ ପାଇଥିବା ଭାରତର ଆରମ୍ଭ ଭଲ ହୋଇଥିଲା । ସଞ୍ଜୁ ଏବଂ ଅଭିଶେକ ଭାରତକୁ ଭଲ ଷ୍ଟାର୍ଟ ଦେଇଥିଲେ । ସଞ୍ଜୁ ୧୬ ରନ୍ କରି ଆଉଟ ହୋଇଥିଲେ । ପରେ ଟି. ବର୍ମା ୨୪, ସୂର୍ଯ୍ୟକୁମାର ଯାଦବ ୨ ରନ୍ କରି ଆଉଟ୍ ହୋଇଥିଲେ । ଏହାପରେ ଅଭିଶେକଙ୍କ ସହ ଶିଭମ୍ ଦୁବେ ଭାରତର ସ୍କୋରକୁ ଆଗକୁ ବଢ଼ାଇଥିଲେ । ସୁବେ ୧୩ ବଲରେ ୨ ଛକା ଓ ୪ ଚୌକା ସହାୟତାରେ ଧୂଆଁଧାର ୩୦ ରନର ପାରି ଖେଳିଥିଲେ । ପରେ ହାର୍ଦ୍ଧିକ ଏବଂ ରିଙ୍କୁ ସିଂ ୯ ରନ୍ ଲେଖାଏଁ କରି ପ୍ୟାଭିଲିୟନ ଫେରି ଯାଇଥିବା ବେଳେ ଅକ୍ସର ପଟେଲ ୧୫ ରନ କରି ନଟ ଆଉଟ ଥିଲେ । ରବି ବିଷ୍ଣୋଇ ଖାତା ଖୋଲି ପାରି ନଥିଲେ ।
ଇଂଲଣ୍ଡ ପକ୍ଷରୁ କାରସେ ୩ଟି ଓ୍ବିକେଟ ନେଇଥିବା ବେଳେ ମାର୍କ ଉଡ ୨ଟି ଓ୍ବିକେଟ୍ ନେଇଥିଲେ । ସେହିପରି ଜୋଫ୍ରା, ଓଭରଟନ ଏବଂ ରସିଦ ଗୋଟିଏ ଲେଖାଏଁ ଓ୍ବିକେଟ ନେଇଛନ୍ତି ।
ବନ୍ଦ ହେଲା ସୋଭେରିନ୍ ଗୋଲ୍ଡ ବଣ୍ଡ ଯୋଜନା: ଆହୁରି ବଢ଼ିବ ସୁନା ଦର, ଗରିବ ଓ ମଧ୍ୟବିତ୍ତଙ୍କ ପାଇଁ ସ୍ବପ୍ନ ପାଲଟିବ ସୁନା
ଭୁବନେଶ୍ବର: କେନ୍ଦ୍ର ସରକାର ବନ୍ଦ କଲେ ସୋଭେରିନ୍ ଗୋଲ୍ଡ ବଣ୍ଡ୍ ଯୋଜନା । ସୁନା ବଣ୍ଡ୍ ଜମାକାରୀଙ୍କୁ ମିଆଦ ପୂରଣ ପରେ ସରକାରଙ୍କୁ ଋଣ କରିବାକୁ ପଡ଼ୁଛି । ଗତକାଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଏ ନେଇ ଗଣମାଧ୍ୟମକୁ ସୂଚନା ଦେଇ ଏକ ପ୍ରକାର ସ୍ପଷ୍ଟ କରି ଦେଇଛନ୍ତି । ଯାହାକୁ ନେଇ ବଜାରରେ ବାସ୍ତବ ସୁନା ଚାହିଦା ଆହୁରି ବଢିବ ବୋଲି ଆଶଙ୍କା ପ୍ରକାଶ ପାଇଛି । ଏହସହ ସୁନା ଦର ଆହୁରି ବଢ଼ିବ ।
ଘୋଡ଼ା ୬ ଟଙ୍କା, ଦାନା ୯ ଟଙ୍କା । ସୋଭେରିନ୍ ଗୋଲ୍ଡ ବଣ୍ଡ କିଣିଥିବା ପୁଞ୍ଜି ବିନିଯୋଗକାରୀଙ୍କୁ ଅଧିକ ଅର୍ଥ ଗଣିବାକୁ ପଡ଼ିଲା । ଏଣିକି ଆଉ ଜାରି ହେବନି ସୋଭେରିନ୍ ଗୋଲ୍ଡ ବଣ୍ଡ । ବଣ୍ଡ୍ ଜାରିକୁ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ଗତକାଲି ବଜେଟ୍ ଆଗତ କଲା ପରେ ଗଣମାଧ୍ୟମକୁ ଏହି ସୂଚନା ଦେଇଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଫଳରେ ବାସ୍ତବ ସୁନା ଦର ଆହୁରି ବଢିବ । ସୁନା ବଣ୍ଡ୍ ମିଆଦ ପୂରିବା ପରେ ସରକାରଙ୍କୁ ଅଧିକ ଅର୍ଥ ପୁଞ୍ଜି ବିନିଯୋଗକାରୀଙ୍କୁ ଦେବାକୁ ପଡ଼ୁଛି । ସେଥିପାଇଁ କେନ୍ଦ୍ର ସରକାରଙ୍କୁ ଋଣ କରିବାକୁ ପଡ଼ୁଛି । ଏବେ ବଜାରରେ ୨୪ କ୍ୟାରେଟ୍ ସୁନା ୧୦ ଗ୍ରାମ ପିଛା ୮୭ ହଜାର ଟଙ୍କା । ୨୨ କ୍ୟାରେଟ୍ ସୁନା ୧୦ ଗ୍ରାମ ପିଛା ୭୭ ହଜାର ୪୫୦ ଟଙ୍କା । ସୋଭେରିନ୍ ଗୋଲ୍ଡ ବଣ୍ଡ୍ ବନ୍ଦ ହେଲେ ପୁଞ୍ଜି ନିବେଶକାରୀ ବାସ୍ତବ ସୁନା କିଣିବାକୁ ଆହୁରି ଚାହିଦା ବଢିବ । ଫଳରେ ଆହୁରି ଅଧିକ ଆମଦାନୀ ହେବ ଓ ଦର ଆହୁରି ବଢିବ ।
ସୁନା ଆମଦାନୀକୁ ନିରୁତ୍ସାହ କରିବାକୁ ୨୦୧୫ରେ କେନ୍ଦ୍ର ସରକାର ସୋଭେରିନ୍ ଗୋଲ୍ଡ ବଣ୍ଡ ଜାରି କରିଥିଲେ । ମୂଳ ବଣ୍ଡ ଉପରେ ସ୍ଥାୟୀ ଭାବେ ଅଢେଇ ପ୍ରତିଶତ ସୁଧ ମିଳିବା ସହ ବଜାରରେ ବାସ୍ତବ ସୁନା ଦରବୃଦ୍ଧି ଉପରେ ସରକାରଙ୍କୁ ପରିଶୋଧ ସମୟରେ ଅର୍ଥ ଦେବାକୁ ପଡ଼ୁଥିଲା । ଏପରିକି ବିଶେଷଜ୍ଞଙ୍କ ମତ ଏହି ଯୋଜନାଟି କେନ୍ଦ୍ର ସରକାର ଯେଉଁ ଉଦ୍ଦେଶ୍ୟରେ କରିଥିଲେ । ସେଥିରେ କୌଣସି ଲାଭ ମିଳିଲାନି । ଯାହା ପାଖରେ ବଳକା ଅର୍ଥ ଅଛି ସେହିମାନେ ହିଁ ବଣ୍ଡ କିଣୁଥିଲେ । ଯଦିଓ ଏହା ବାସ୍ତବ ସୁନା କିଣିବାଠୁ ସୁରକ୍ଷିତ ଥିଲା । କିନ୍ତୁ ଏହି ଯୋଜନା ଏକ ପ୍ରକାର କେନ୍ଦ୍ର ସରକାରଙ୍କ ଭୁଲ ନିଷ୍ପତ୍ତି ଥିଲା । ଏବେ ବନ୍ଦ ହେଲା ପରେ ସେପରି କୌଣସି ବଜାରରେ ଚାହିଦା ବୃଦ୍ଧି ହେଲା ଭଳି ଲାଗୁନି । ଯାହା ପାଖରେ ଅର୍ଥ ଅଛି ସେମାନେ ସେୟାର ମାର୍କେଟ୍, ମ୍ୟୁଚୁଆଲ ଫଣ୍ଡ କିମ୍ବା ଅନ୍ୟ ସରକାରୀ ଲାଭଦାୟକ ଯୋଜନାରେ ପୁଞ୍ଜି ଲଗାଇବେ ।
କେନ୍ଦ୍ର ବଜେଟ୍ ଆସିବା ପୂର୍ବରୁ ସୁନା ବଣ୍ଡ ବନ୍ଦ ହେବା ନେଇ ପୂର୍ବାନୁମାନ କରାଯାଉଥିଲା । ଏବେ ସୁନା ବଣ୍ଡ ବନ୍ଦ କଲା ପରେ ବଜାରରେ ସୁନା ଚାହିଦା ବଢିଲେ ଗରିବ ଓ ମଧ୍ୟବିତ୍ତ ଆଉ ସୁନା କିଣିବାକୁ ସମର୍ଥ ହେବେ କି ନାହିଁ ସେ ନେଇ ସବୁ ମହଲରେ ଉଦବେଗ ପ୍ରକାଶ ପାଇଛି ।
ଅଭିଶେକ ଶର୍ମାଙ୍କ ଧୂଆଁଧାର ବ୍ୟାଟିଂ, ୩୭ ବଲରେ ସେଞ୍ଚୁରୀ
ମୁମ୍ବାଇ: ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଚାଲିଥିବା ଇଂଲଣ୍ଡ ବିପକ୍ଷ ୫ମ ଟି-୨୦ ମ୍ୟାଚରେ ଭାରତୀୟ ଓପନର ଅଭିଶେକ ଶର୍ମାଙ୍କ ଜଲଓ୍ବା ଦେଖିବାକୁ ମିଳିଛି । ବର୍ତ୍ତମାନ ଖେଳ ଚାଲିଥିବା ବେଳେ ଇଂଲଣ୍ଡ ବୋଲରଙ୍କୁ ନିର୍ଦ୍ଦୟ ଭାବେ ଛକା, ଚୌକା ମାରି ଚାଲିଛନ୍ତି ଅଭିଶେକ । ୩୭ ବଲରେ ସେ ତାଙ୍କ ସେଞ୍ଚୁରୀ କରିଛନ୍ତି । ଏଥିରେ ୬ଟି ଚୌକା ଏବଂ ୧୦ଟି ଛକା ରହିଛି । ବର୍ତ୍ତମାନ ୧୦୬ ରନରେ ଅଭିଶେକ ବ୍ୟାଟିଂ କରୁଛନ୍ତି । ଏହାସହ ୧୩.୩ ଓଭରରେ ଭାରତ ୪ ଓ୍ବିକେଟ ହରାଇ ୧୮୩ ରନ୍ କରି ଖେଳୁଛି ।
ଅନ୍ୟମାନଙ୍କ ମଧ୍ୟରେ ସଞ୍ଜୁ ସୁମନ ୭ ବଲରୁ ୧୬ ରନ୍ କରିଥିବା ବେଳେ ଟି. ବର୍ମା ୨୪, ସୂର୍ଯ୍ୟକୁମାର ଯାଦବ ୨ ଏବଂ ଶିବମ ଦୁବେ ଧୂଆଁଧାର ୩୦ ରନ୍ କରି ଆଉଟ ହୋଇଛନ୍ତି । ବର୍ତ୍ତମାନ ଫିଲ୍ଡରେ ଅଭିଶେକଙ୍କ ସମହ ହାର୍ଦ୍ଧିକ ପାଣ୍ଡ୍ୟା ବାଟିଂ କରୁଛନ୍ତି ।