spot_img
Home Blog Page 1173

ଆଉଟସୋର୍ସିଂ କର୍ମଚାରୀଙ୍କ ସ୍ଥାୟୀ ନିଯୁକ୍ତି ନେଇ ପୁଣି ସମୟ ମାଗିଲେ ସରକାର

ଭୁବନେଶ୍ବର: ଆଉଟସୋର୍ସିଂ କର୍ମଚାରୀଙ୍କ ସ୍ଥାୟୀ ନିଯୁକ୍ତି ନେଇ ପୁଣି ସମୟ ମାଗିଲେ ସରକାର । ଆଜି ବିଧାନସଭା ପ୍ରକୋଷ୍ଠରେ ଓଡ଼ିଶା ସରକାରୀ ଆଉଟସୋର୍ସିଂ କର୍ମଚାରୀ ମହାସଂଘର ୧୦ ଜଣିଆ ପ୍ରତିନିଧିଙ୍କ ସହ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଆଲୋଚନା କରିଛନ୍ତି । ପ୍ରାୟ ଦେଢ଼ଘଣ୍ଟା ଧରି ଚାଲିଥିବା ଆଲୋଚନାରେ ଛଟେଇ ବନ୍ଦ କରିବାକୁ ସରକାର ମହାସଂଘକୁ ପ୍ରତିଶ୍ରୁତି ଦେଇଛନ୍ତି । ଏହାସହିତ ସ୍ଥାୟୀ ନିଯୁକ୍ତି ନେଇ ସରକାର ବିଭିନ୍ନ ଦିଗକୁ ଅନୁଧ୍ୟାନ କରୁଥୁବା ପ୍ରତିନିଧିମଣ୍ଡଳୀ ସଦସ୍ୟଙ୍କୁ ଜଣାଇଥିବା କହିଛନ୍ତି ମହାସଂଘ ଅଧ୍ୟକ୍ଷ । ଆଉଟସୋର୍ସିଂ କର୍ମଚାରୀଙ୍କ ଦାବି ପୂରଣ ନେଇ ଏକ ମନ୍ତ୍ରୀସ୍ତରୀୟ କମିଟି ଗଠନ କରାଯାଇଛି । ଏଣିକି ନିୟମିତ ଭାବେ କମିଟି ମହାସଂଘ ସହ କର୍ମଚାରୀଙ୍କ ବିଭିନ୍ନ ଦାବି ସମ୍ପର୍କରେ ଆଲୋଚନା କରିବ । ଆଲୋଚନା ପରେ ସ୍ଥାୟୀ ନିଯୁକ୍ତି ଦେବା ନେଇ ସରକାର ପ୍ରତିଶ୍ରୁତି ଦେଇଥିବା ମହାସଂଘ କହିଛି । ଗତ ୨୬ ତାରିଖରୁ ସାରା ରାଜ୍ୟରୁ ହଜାର ହଜାର କର୍ମଚାରୀ ଆନ୍ଦୋଳନରୁ ଓହ୍ଲାଇଥିଲେ ।..

ଆହତଙ୍କ ଆଶୁ ଆରୋଗ୍ୟ କାମନା ପାଇଁ ଦୀପଦାନ କଲା କଂଗ୍ରେସ

ଭୁବନେଶ୍ବର: କଂଗ୍ରେସର ନାରୀ ସୁରକ୍ଷା ସମାବେଶ ବେଳେ କଂଗ୍ରେସ କର୍ମୀ, ପୋଲିସ ଓ ସାଧାରଣ ଲୋକ ଆହତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ସେମାନଙ୍କ ଆସୁ ଆରୋଗ୍ୟ କାମନା କରିବା ପାଇଁ ଦୀପଦାନ କଲା କଂଗ୍ରେସ । କଂଗ୍ରେସ ଭବନରୁ ବାହାରି ସମସ୍ତ ବିଧାୟକ ଘଣ୍ଟ ବାଡେଇ ପଦଯାତ୍ରା କରି ଆର୍ଯ୍ୟ ସଂସ୍କୃତି ମନ୍ଦିର ଦୀପ ଜାଳିଥିଲେ । ସମସ୍ତ ଆହତ ବ୍ୟକ୍ତିଙ୍କ ଆସୁ ଅରୋଗ୍ୟ କାମନା କରିଥିଲେ । ବିଜେପି ସରକାର ନାରୀ ମାନେ ଅସୁରକ୍ଷିତ ହୋଇଛନ୍ତି । ଭଗବାନ ବିଜେପି ସରକାରଙ୍କୁ ସଦବୁଦ୍ଧି ଦିଅନ୍ତୁ ବୋଲି ସେମାନେ ପ୍ରାର୍ଥନା କରିଥିବା କହିଛନ୍ତି । ସମାବେଶରେ ୮୦ ପ୍ଲାଟୁନ ପୋଲିସ ଫୋର୍ସ ନିୟୋଜିତ ନ କରି ନାରୀ ସୁରକ୍ଷା ଓ ଅପରାଧୀଙ୍କ ବିରୋଧରେ ପୋଲିସକୁ ସରକାର ଲଗାନ୍ତୁ ବୋଲି ଦଳ ପରାମର୍ଶ ଦେଇଛି ।

ଛାତ୍ରୀ ନିବାସରେ ଅଗ୍ନିକାଣ୍ଡ: ଡେଇଁ ପଡ଼ିବାରୁ କିଛି ଛାତ୍ରୀ ଆହତ ସୂଚନା

ନୋଏଡ଼ା: ଗ୍ରେଟର ନୋଏଡାରେ ଏକ ଛାତ୍ରୀ ନିବାସରେ ଅଗ୍ନିକାଣ୍ଡ। କୋଠାର ଉପର ମହଲାରେ ଲାଗିଥିଲା ନିଆଁ। ନିଆଁ ଲାଗିବା ପରେ ଭୟରେ ବାଲକନି ଦେଇ ଛାତରୁ ତଳକୁ ଓହ୍ଲାଇଥିଲେ ଏକାଧିକ ଛାତ୍ରୀ। ହଷ୍ଟେଲରେ ଲାଗିଥିବା ଏସିରେ ବିସ୍ଫୋରଣ ଘଟିବାରୁ ଲାଗିଥିଲା ନିଆଁ। ଜୀବନ ବଂଚାଇବାକୁ ଯାଇ ଦ୍ଵିତୀୟ ମହଲାରୁ ତଳକୁ ଡେଇଁ ପଡିଥିଲେ ଅନେକ ଛାତ୍ରୀ। ବାଲକନିରୁ ଡେଇଁ କିଛି ଛାତ୍ରୀ ଆହତ ହୋଇଛନ୍ତି। ହଷ୍ଟେଲ ମଧ୍ୟରେ ଥିବା ୧୬୦ ଜଣ ଛାତ୍ରୀଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ଜଣାପଡିଛି। ଗ୍ରେଟର ନୋଏଡାର ପାର୍କ-୩ ଅଂଚଳରେ ଥିବା ଅନ୍ନପୂର୍ଣ୍ଣା ଛାତ୍ରୀ ନିବାସରେ ଲାଗିଥିଲା ନିଆଁ। ଛାତ୍ରୀମାନେ ଛାତ ଉପରକୁ ତଳକୁ ଡେଉଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଅଗ୍ନିକାଣ୍ଡର ଖବର ପାଇ ବିଳମ୍ବରେ ପହଞ୍ଚିଥିଲା ଅଗ୍ନିଶମବାହିନୀର ଟିମ। ତେବେ ହଷ୍ଟେଲକୁ ଅଗ୍ନିଶମ ବାହିନୀର ଏନଓସି ମିଳିଥିଲା କି ନାହିଁ ଜଣାପଡିନାହି। କୌଣସି ପ୍ରକାର ଅବହେଳା ସାମନାକୁ ଆସିଲେ ହଷ୍ଟେଲ ମାଲିକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କର୍ତ୍ତୃପକ୍ଷ ସୂଚନା ଦେଇଛନ୍ତି।

ପ୍ରାଥମିକ ସ୍କୁଲ ମିଶ୍ରଣ ଓ ବନ୍ଦ ପ୍ରସଙ୍ଗରେ ଗଣଶିକ୍ଷା ମନ୍ତ୍ରୀଙ୍କ ଦୋମୁହାଁ ଉତ୍ତର

ଭୁବନେଶ୍ବର: କମ ପିଲା ଥିବା ସ୍କୁଲ ମିଶ୍ରଣ ବା ବନ୍ଦ ନିଷ୍ପତ୍ତି କାହାର ଥିଲା ? ନବୀନ ପଟ୍ଟନାୟକ ସରକାରଙ୍କ ନା ତତ୍କାଳୀନ କେନ୍ଦ୍ର ସରକାରଙ୍କର। ପ୍ରଶ୍ନକାଳରେ ନବୀନ ସରକାରଙ୍କ ଉପରେ ପ୍ରାଥମିକ ସ୍କୁଲ ମିଶ୍ରଣ ଓ ବନ୍ଦ ନେଇ ଦୋଷ ଲଦିବାକୁ ଚେଷ୍ଟା କଲେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ। ହେଲେ ଗୃହ ବାହାରେ ତାଙ୍କ ଉତ୍ତର ସମସ୍ତଙ୍କୁ ଚକିତ କରିଦେଲା।୫ ବର୍ଷ ପୂର୍ବରୁ କମ ପିଲା ଥିବା ସ୍କୁଲକୁ ପାଖ ସ୍କୁଲରେ ମିଶ୍ରଣ କରିବାକୁ ନୀତି ଆୟୋଗ କରିଥିଲେ ସୁପାରିସ। ଯାହାକୁ NDA ସରକାର କାର୍ଯ୍ୟକାରୀ କରିବାକୁ ସବୁ ରାଜ୍ୟକୁ ନିର୍ଦ୍ଦେଶ ଦେଇଥିଲେ। ଯାହାକୁ ସେ ସମୟରେ ତତ୍କାଳୀନ ରାଜ୍ୟ ସରକାର କାର୍ଯ୍ୟକାରୀ କରିଥିଲେ। ହେଲେ ବାରମ୍ବାର ନବୀନ ସରକାରଙ୍କୁ ଟାର୍ଗେଟ କରି ଚାଲିଲେ ନୂଆ ସରକାର।

୨୦୨୪ ନିର୍ବାଚନରେ କ୍ଷମତାକୁ ଆସିଲେ ବନ୍ଦ ସ୍କୁଲ ଖୋଲିବାକୁ ଘୋଷଣା କରିଥିଲା ବିଜେପି। ହେଲେ ଏ ଯାଏଁ ପ୍ରତିଶୃତି ପାଳନ ହୋଇନି। ଏହାକୁ ନେଇ ସରକାରଙ୍କୁ ଘେରିଥିଲେ ବିଜେଡି ବିଧାୟକ ଗଣେଶ୍ୱର ବେହେରା। ପ୍ରଶାସନ କହୁଛି ସ୍କୁଲ ଖୋଲିବାକୁ ସରକାର ନିର୍ଦ୍ଦେଶ ଦେଇନାହାନ୍ତି। ପୁଣି କେଉଁଠି ଖୋଲିବାକୁ ଆବେଦନ କରାଯିବ ବୋଲି ସେ ପ୍ରଶ୍ନ କରିଛନ୍ତି। ଗୃହ ଭିତରେ ଗଣଶିକ୍ଷା ମନ୍ତ୍ରୀ କହିଲେ ସଂରକ୍ଷିତ ଅଞ୍ଚଳରେ ୨୦ ଓ ଅଣସଂରକ୍ଷିତ ଅଞ୍ଚଳରେ ୪୦ ପିଲା ଥିଲେ ସ୍କୁଲ ଖୋଲିବାକୁ ବିଚାର କରାଯିବ। ଏହି ପ୍ରକ୍ରିୟା ଅନୁସାରେ ଆବେଦନ କରାଯିବ। ହେଲେ ଏ ଯାଏଁ ବନ୍ଦ ପଡିଥିବା ପ୍ରାଥମିକ ସ୍କୁଲ ପୁଣି ଖୋଲିବାକୁ ପ୍ରସ୍ତାବ ଆସିନଥିବା କହିଛନ୍ତି।

ପ୍ରସ୍ତାବ ଆସିଲେ ପ୍ରଥମେ ଜିଲ୍ଲା କମିଟି ଯାଞ୍ଚ କରି ରାଜ୍ୟ ସ୍ତରୀୟ କମିଟିକୁ ଯାଞ୍ଚ ପାଇଁ ପଠାଇବ। ରାଜ୍ୟ ସ୍ତରୀୟ କମିଟି ସ୍କୁଲ ଖୋଲିବାକୁ ସୁପାରିସ କରିବେ। ସ୍କୁଲରେ ପିଲା କମ ଥିବାରୁ ପାଖ ସ୍କୁଲରେ ୫,୬୩୨ ସ୍କୁଲ ମିଶ୍ରଣ ହୋଇଛି। ଏ ନେଇ ୧୧ ମାର୍ଚ୍ଚ ୨୦୨୦ରେ ବିଜ୍ଞପ୍ତି ପ୍ରକାଶ ପାଇଥିଲା। ସେହିପରି ୨, ୧୫୨ ସାଟେଲାଇଟ ସ୍କୁଲ ଶହେ ମିଟର ପାଖ ଥିବା ସ୍କୁଲରେ ମିଶ୍ରଣ କରାଯାଇଛି।ଗୃହରେ ଏହା ଅବଗତ କରିଛନ୍ତି ବିଦ୍ଯାଳୟ ଓ ଗଣଶିକ୍ଷାମନ୍ତ୍ରୀ। ତେବେ ଗୃହ ବାହାରେ ମିଶ୍ରଣର ଆବଶ୍ୟକତା ଥିବା ନେଇ ଓକିଲାତି ଗଣଶିକ୍ଷା ମନ୍ତ୍ରୀଙ୍କ ଦୋମୁହାଁ ନୀତି ସ୍ପଷ୍ଟ ହୋଇଛି ।

ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥା ନେଇ ବିଜେପି ବିଧାୟକ ବି ସରକାରଙ୍କୁ ଘେରିଛନ୍ତି। ଚିକିଟି ବିଧାୟକ ମନୋରଞ୍ଜନ ଦ୍ୟାନସାମନ୍ତରାୟଙ୍କ ଗୁରୁତର ଅଭିଯୋଗ। ଗୋଡିପଦର ଓ ବଳରାମପୁର ପଂଚାୟତରେ ସ୍କୁଲ ନଥିବାରୁ ସୀମାନ୍ତ ଆନ୍ଧ୍ରପ୍ରଦେଶକୁ ପଢିବାକୁ ଯାଉଛନ୍ତି ପିଲା। ବ୍ଲକ ଗ୍ରାଣ୍ଟ ଓ ଅନୁଦାନପ୍ରାପ୍ତ ସ୍କୁଲରେ ବି ଶିକ୍ଷକ ନାହାନ୍ତି। ତେବେ ଓଡ଼ିଆ ପିଲାଙ୍କ ଆନ୍ଧ୍ର ମୁହାଁ ପ୍ରସଙ୍ଗରେ ଉତ୍ତର ନ ଦେଇ ରଖିଥିଲେ ଦ୍ଵିତୀୟ ପ୍ରଶ୍ନର ଉତ୍ତର। ସ୍କୁଲ ମ୍ୟାନେଜମେଣ୍ଟ ଶିକ୍ଷକ ନିଯୁକ୍ତି କରୁଥିଲେ। ସରକାର କେବଳ ଅନୁଦାନ ଦେଉଥିଲେ। ଏବେ ଯେଉଁଠି ଶିକ୍ଷକ ନାହାନ୍ତି ଅତିଥି ଶିକ୍ଷକ ଜରିଆରେ ପଢା ଯାଉଛି ବୋଲି କହିଥିଲେ ମନ୍ତ୍ରୀ । ସରକାର ଯେତେ ମୌଖିକ ଭାବେ କହିଲେ ମଧ୍ୟ ଲିଖିତ ଭାବେ ମାନିଛନ୍ତି ଯେ ନବୀନ ପଟ୍ଟନାୟକଙ୍କ ସରକାର ସମୟରେ ଶିକ୍ଷାର ବିକାଶ ସହ ଡ୍ରପଆଉଟ କମିଛି। ପ୍ରାଥମିକ ସ୍ତରରେ ଡ୍ରପଆଉଟ ହାର ଶୂନ। ଉଚ୍ଚ ପ୍ରାଥମିକ ସ୍ତରରେ ୨ ପ୍ରତିଶତ, ଉଚ୍ଚ ମାଧ୍ୟମିକ ସ୍ତରରେ ୧୨.୮ ପ୍ରତିଶତ ଡ୍ରପ ଆଉଟ ହାର ରହିଛି। ଯାହା ଜାତୀୟ ହାର ତୁଳନାରେ ରାଜ୍ୟର ଡ୍ରପ ଆଉଟ ହାର କମ।

ବିଧାୟକଙ୍କ ଦରମା ବୃଦ୍ଧି ପାଇଁ ବିଧାନସଭାରେ ଶାସକ ଓ ବିରୋଧୀଙ୍କ ସ୍ବର ଏକ: କମିଟି ସୁପାରିଶକୁ କାର୍ଯ୍ୟକାରୀ କରିବାକୁ ଦାବି

ଭୁବନେଶ୍ବର: ବଢ଼ାଅ ବିଧାୟକଙ୍କ ଦରମା । ବିଧାନସଭାରେ ଶାସକ ଓ ବିରୋଧୀଙ୍କ ସ୍ବର ଏକ । ବିଧାୟକ କହିଲେ ଦରମା ଅଣ୍ଟୁନି । ବିଧାନସଭା କମିଟି ସୁପାରିଶକୁ କାର୍ଯ୍ୟକାରୀ କରିବାକୁ ଦାବି । ବଜାର ଦର ବୃଦ୍ଧି ପାଇଁ ଜୁନ ମାସରୁ ପିଛିଲା ଭାବେ ଲାଗୁ କରିବା ଦାବି । ସାଂସଦଙ୍କ ଦରମା ବୃଦ୍ଧି ହେବା ପରେ ବିଧାୟକ ଓ ପୂର୍ବତନ ବିଧାୟକଙ୍କ ପେନସନ୍ ଓ ଭତ୍ତା ବୃଦ୍ଧି କରିବାକୁ ବିଧାନସଭାରେ ଉଠିଲା ସ୍ବର  । ଶୂନ୍ୟକାଳରେ ଏକ ହୋଇଛି ଶାସକ ଓ ବିରୋଧୀଙ୍କ ସ୍ବର। ବିରୋଧୀ ଦଳ ମୁଖ୍ୟ ସଚେତକ ଏହି ପ୍ରସଙ୍ଗ ଉଠାଇ କହିଛନ୍ତି ଯେ, ବର୍ତ୍ତମାନ ବଜାର ଦର ବଢ଼ିଛି। ପେନସନ ବଢ଼ାଇବାକୁ ଦାବି କରୁଛନ୍ତି ଅନେକ ପୂର୍ବତନ ବିଧାୟକ। ପେନସନ ବାବଦକୁ ଯେତିକି ଟଙ୍କା ମିଳୁଛି, ତାହା ମେଡିସିନ ଖର୍ଚ୍ଚ ହେଉ କି ବଜାର ଦର ଆଗରେ ଯଥେଷ୍ଟ ନୁହେଁ। ବିଜେପି ବିଧାୟକ ଭାସ୍କର ମଢେଇଙ୍କ ଅଧ୍ୟକ୍ଷତାରେ ଗଠନ ହୋଇଥିବା କମିଟି ସରକାରଙ୍କୁ ଦରମା ବୃଦ୍ଧି ପାଇଁ ସୁପାରିଶ କରିଛି। ତେଣୁ ସେହି ସୁପାରିଶକୁ କାର୍ଯ୍ୟକାରୀ କରିବାକୁ ବାଚସ୍ପତି ସରକାରଙ୍କୁ ନିର୍ଦ୍ଦେଶ ଦିଅନ୍ତୁ ବୋଲି ଦାବି କରିଛନ୍ତି ପ୍ରମିଳା ମଲ୍ଲିକ। ସେହିପରି ପୂର୍ବତନ ବିଧାୟକ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ସରକାରୀ କର୍ମଚାରୀଙ୍କ ପାଇଁ ବେତନ କମିଶନ ଅଛି, କିନ୍ତୁ ବିଧାୟକଙ୍କ ପାଇଁ କିଛି ନାହିଁ। ତେଣୁ ଜୁନ ମାସରୁ ପିଛିଲା ଭାବେ ଦରମା ବୃଦ୍ଧି କରିବାକୁ ଦାବି କରିଛନ୍ତି ବିଜେପି ବିଧାୟକ ପୂର୍ଣ୍ଣଚନ୍ଦ୍ର ସେଠୀ। ସେହିପରି ବରିଷ୍ଠ ବିଧାୟକ ଜୟ ନାରାୟଣ ମିଶ୍ର ମଧ୍ୟ ଦରମା ବୃଦ୍ଧି ସପକ୍ଷରେ ଯୁକ୍ତି ବାଢିଛନ୍ତି।

ବର୍ତ୍ତମାନ ରାଜ୍ୟର ବିଧାୟକଙ୍କୁ ଦରମା ବାବଦରେ ୩୫ ହଜାର ଟଙ୍କା ଓ ବିଭିନ୍ନ ଭତ୍ତା ବାବଦକୁ ୬୫ ହଜାର ଟଙ୍କା ମିଳୁଛି। ଯେଉଁଥିରେ କନଭିନିଏନ୍ସ ବାବଦକୁ ୧୫ ହଜାର, ମେଡିକାଲ ପାଇଁ ୫ ହଜାର, ଟେଲିଫୋନ ବାବଦକୁ ୮ ହଜାର ଟଙ୍କା ପ୍ରଦାନ କରାଯାଉଛି। ବିଧାୟକଙ୍କ ଦରମା ବୃଦ୍ଧି କରିବାକୁ ପୂର୍ବରୁ ରାଜ୍ୟ ସରକାରଙ୍କୁ ସୁପାରିଶ କରି ସାରିଛି ବିଧାନସଭା ଦ୍ବାରା ଗଠିତ କମିଟି। ଯାହା କି ସରକାରଙ୍କ ବିଚାରାଧୀନ ରହିଛି। ପୂର୍ବ ଅଧିବେଶନରେ ମଧ୍ୟ ବିଧାୟକଙ୍କ ପେନସନ ଓ ଭତ୍ତା ବୃଦ୍ଧି ନେଇ ଗୃହରେ ଉଭୟ ଶାସକ ଓ ବିରୋଧୀଙ୍କ ସ୍ବର ଏକ ହୋଇଥିଲା। ଦେଶର ଅନେକ ରାଜ୍ୟ ତୁଳନାରେ ଓଡ଼ିଶାର ବିଧାୟକଙ୍କ ଦରମା ସବୁଠୁ କମ୍  । ରାଜ୍ୟର ବିଧାୟକଙ୍କ ଦରମା ୨୭ ନମ୍ବରରେ ରହିଛି। ୨୦୧୭ରେ ଶେଷ ଥର ପାଇଁ ବଢିଥିଲା ବିଧାୟକଙ୍କ ଦରମା  ।

ପାଟୀଦାରଙ୍କ ଅର୍ଦ୍ଧଶତକ ବଳରେ ଚେନ୍ନାଇକୁ ୧୯୭ ରନର ଟାର୍ଗେଟ ଦେଲା ବେଙ୍ଗାଲୁରୁ

ଚେନ୍ନାଇ: ଆଜି ଆଇପିଏଲରେ ଦୁଇ ଅନ୍ୟତମ ଶକ୍ତିଶାଳୀ ଟିମ ବେଙ୍ଗାଲୁରୁ ଓ ଚେନ୍ନାଇ ମଧ୍ୟରେ କଡ଼ା ମୁକାବିଲା ଚାଲିଛି । ପ୍ରଥମେ ବ୍ୟାଟିଂ କରି ଆରସିବି ଅଧିନାୟକ ରଜତ ପାଟୀଦାରଙ୍କ ଅର୍ଦ୍ଧଶତକୀୟ ଇନିଂସ ବଳରେ ୭ ଓ୍ବିକେଟ ହରାଇ ୧୯୬ ରନ୍ ସଂଗ୍ରହ କରିଛି । ଅନ୍ୟମାନଙ୍କ ମଧ୍ୟରେ ଫିଲିପ ସଲ୍ଟ ୩୨, ବିରାଟ କୋହଲି ୩୧ ରନ୍ ସଂଗ୍ରହ କରିଥିଲା । ଟିମ୍ ଡେଭିଡ ୮ଟି ବଲରୁ ୨୨ ରନ୍ ସଂଗ୍ରହ କରିଥିବା ବେଳେ ଦେବତତ୍ତ ପାଡିକଲ ୧୪ଟି ବଲରୁ ୨୭ ରନ୍ ସଂଗ୍ରହ କରିଥିଲେ । ଦଳର ପ୍ରାରମ୍ଭିକ ବ୍ୟାଟିଂ ଭଲ ରହିବା ଫଳରେ ଦଳ ଏକ ବଡ଼ ସ୍କୋର କରିବାକୁ ସକ୍ଷମ ହୋଇଥିଲା । ଅନ୍ୟପକ୍ଷରେ ଚେନ୍ନାଇ ପକ୍ଷରୁ ନୁର ଅହମଦ ସର୍ବାଧିକ ୩ଟି ଓ୍ବିକେଟ ହାସଲ କରିଥିବା ବେଳେ ମାଥିଶା ପାଥିରଣା ୨ଟି, ଖଲିଲ ଅହମଦ ୨ଟି ଓ ରବିଚନ୍ଦ୍ରନ ଅଶ୍ବିନ ୧ଟି ଓ୍ବିକେଟ ଅକ୍ତିଆର କରିଥିଲେ ।

ସ୍ବର୍ଗତ ଦେବେନ୍ଦ୍ର ପ୍ରଧାନଙ୍କ ଶ୍ରଦ୍ଧାଞ୍ଜଳି ସଭା: ସ୍ମୃତି ଚାରଣ କଲେ ବହୁ ବିଶିଷ୍ଟ ବ୍ୟକ୍ତିବିଶେଷ

ଭୁବନେଶ୍ବର: ସ୍ବର୍ଗତ ଦେବେନ୍ଦ୍ର ପ୍ରଧାନଙ୍କ ଶ୍ରଦ୍ଧାଞ୍ଜଳି ସଭାରେ ସାମିଲ ହୋଇଛନ୍ତି ବହୁ ବିଶିଷ୍ଟ ବ୍ୟକ୍ତି। ଭୁବନେଶ୍ବର ସ୍ବାଧିନତା ସଂଗ୍ରାମୀ ପଡିଆରେ ଅନୁଷ୍ଠିତ ଶ୍ରଦ୍ଧାଞ୍ଜଳି ସଭାରେ ରାଜ୍ୟ ତଥା ରାଜ୍ୟ ବାହାରୁ ବହୁ ବିଶିଷ୍ଟ ବ୍ୟକ୍ତି ଯୋଗଦେଇ ସ୍ବର୍ଗତ ପ୍ରଧାନଙ୍କ ସ୍ମୃତି ଚାରଣ କରିଛନ୍ତି। ଦିଲ୍ଲୀରେ ୮୩ ବର୍ଷ ବୟସରେ ପୂର୍ବତନ କେନ୍ଦ୍ରମନ୍ତ୍ରୀ ଦେବେନ୍ଦ୍ର ପ୍ରଧାନଙ୍କ ପରଲୋକ ହୋଇଥିଲା

ଏପ୍ରିଲ ୨ରୁ ଯୁକ୍ତ ଦୁଇ ଖାତାଦେଖା: ମେ ୧୫ ସୁଦ୍ଧା ବାହାରିବ ରେଜଲ୍ଟ

ଭୁବନେଶ୍ବର: ଯୁକ୍ତ ଦୁଇ ପରୀକ୍ଷା ଖାତା ଦେଖା ପାଇଁ ମୂଲ୍ୟାଙ୍କନ କେନ୍ଦ୍ର ସଂଖ୍ୟାରେ ବୃଦ୍ଧି । ଉଭୟ ଅନଲାଇନ ଓ ଅଫଲାଇନ ପରୀକ୍ଷା କେନ୍ଦ୍ର ସଂଖ୍ୟା ବଢ଼ାଇଛି ଉଚ୍ଚ ମାଧ୍ୟମିକ ଶିକ୍ଷା ପରିଷଦ। ଆସନ୍ତା ଏପ୍ରିଲ ଦୁଇ ତାରିଖରୁ ଆରମ୍ଭ ହେବ ଯୁକ୍ତ ଦୁଇ ପରୀକ୍ଷା ଖାତା ଦେଖା । ଅତ୍ୟଧିକ ଖରା ଓ ମୂଲ୍ୟାଙ୍କନ କେନ୍ଦ୍ରର ଦୂରତା ଯୋଗୁଁ ଅନେକ ଶିକ୍ଷକ ଶିକ୍ଷୟିତ୍ରୀ ଖାତା ଦେଖିବାକୁ ଆସିବା ବେଳେ ସମସ୍ୟାରେ ପଡି ପାରନ୍ତି । ଯାହାକୁ ଆଖି ଆଗରେ ରଖି ମୁଲ୍ୟାଙ୍କନ କେନ୍ଦ୍ର ବଢାଯାଇଛି । ଖାତା ଦେଖା ପାଇଁ ପ୍ରାଥମିକ ପର୍ଯ୍ୟାୟରେ ୮ ହଜାର ଶିକ୍ଷକ ଶିକ୍ଷୟିତ୍ରୀ ନିଯୁକ୍ତି ହୋଇଛନ୍ତି । ଏକଜାମିନରଙ୍କ ସୁବିଧା ଦୃଷ୍ଟିରୁ ସେମାନଙ୍କୁ ନିଜ ଜିଲ୍ଲାରେ ହୋଇଥିବା ମୁଲ୍ୟାଙ୍କନ କେନ୍ଦ୍ରରେ ଖାତା ଦେଖିବା ପାଇଁ ନିୟୋଜିତ କରାଯାଇଛି। ଏଥିସହିତ ଆଉ ଏକ ବଡ଼ ନିଷ୍ପତ୍ତି ନେଇଛି ସିଏଚଏସଇ । ଏଥର ମାଲ ପ୍ରାକ୍ଟିସ ବା ଏମପିରେ ବୁକ ହୋଇଥିବା ଛାତ୍ରଛାତ୍ରୀଙ୍କୁ ଦିଆଯିବ ବଡ଼ ଆଶ୍ବସ୍ତି । କୌଣସି ଭୁଲ ନ ଥାଇ ତ୍ରୁଟିପୂର୍ଣ୍ଣ ଭାବେ ଏମପିରେ ବୁକ ହୋଇଥିଲେ ସେମାନଙ୍କ ପରୀକ୍ଷା ଫଳ ସାଧାରଣ ପରୀକ୍ଷାର୍ଥୀଙ୍କ ସହ ଏକାସାଙ୍ଗରେ ପ୍ରକାଶ ପାଇବ । କାଉନସିଲ ଦ୍ୱାରା ଗଠିତ ସ୍ୱତନ୍ତ୍ର କମିଟିର ଯାଞ୍ଚରେ ଏମପିରେ ବୁକ ହୋଇଥିବା ଛାତ୍ରଛାତ୍ରୀ ନିଜର ପକ୍ଷ ରଖିବେ।

ସେପଟେ ମୂଲ୍ୟାଙ୍କନକୁ ସ୍ୱଚ୍ଛ କରିବା ପାଇଁ ଖାତା ଦେଖା ସମୟ ମଧ୍ୟ ଧାର୍ଯ୍ୟ କରାଯାଇଛି। ୩୫, ୪୦ ଓ ୫୦ ମାର୍କ ଥିବା ବିଷୟ ଗୁଡ଼ିକ ପାଇଁ ୩୦ ଟି ଖାତା ୫ ଘଣ୍ଟାରେ ଦେଖାଯାଇପାରିବ । ସେହିପରି ୭୦ ଓ ୮୦ ମାର୍କ ଥିବା ବିଷୟ ପାଇଁ ୫ ଘଣ୍ଟାରେ ୨୦ ଟି ଖାତା ଦେଖିପାରିବେ । ସେପଟେ ଖାତା ଦେଖା କେନ୍ଦ୍ର ଗୁଡ଼ିକ ମଧ୍ୟ ପ୍ରସ୍ତୁତ ହୋଇଛଇ । ପ୍ରବଳ ଖରାକୁ ଆଖି ଆଗରେ ରଖି କେନ୍ଦ୍ରଗୁଡ଼ିକୁ ଶୀତତାପ ନିୟନ୍ତ୍ରିତ କରାଯିବା ସହ ସିସିଟିଭି ଲଗାଯାଇଛି। ଏଥିସହିତ ସମସ୍ତ ଆନୁଷଙ୍ଗିକ ବ୍ୟବସ୍ଥା ହୋଇଛି। ଖାତା ଦେଖା ପ୍ରକ୍ରିୟା ସଠିକ ସମୟରେ ସାରି ମେ’ ୧୫ ତାରିଖ ସୁଦ୍ଧା କେଜଲ୍ଟ ବାହାରିବ ବୋଲି ସୂଚନା ଦେଇଛନ୍ତି ପରୀକ୍ଷା ନିୟନ୍ତ୍ରକ। ଏଥର ରିଚେକିଂ ଓ ରିଆଡିସନ ସଂଖ୍ୟା ମଧ୍ୟ ଅଧିକ ରହିବ ନାହିଁ ବୋଲି ସିଏଚଏସଇ ଆଶା ରଖିଛି।

ଧମକ ଓ ଷଡ଼ଯନ୍ତ୍ରକୁ ଖାତିର କରିବନି କଂଗ୍ରେସ: ଆହୁରି ଶାଣିତ ହେବ ମହିଳା ନିର୍ଯାତନା ବିରୋଧୀ ଲଢ଼େଇ

ଭୁବନେଶ୍ବର: ନାରୀ ନିର୍ଯାତନା ପ୍ରସଙ୍ଗରେ କଂଗ୍ରେସର ଲଗାତାର ଆନ୍ଦୋଳନ ପରେ ଡ଼ରିଯାଇଛି ଶାସକ ଦଳ। ବିଧାୟକମାନଙ୍କୁ ବିଧାନସଭାରୁ ନିଲମ୍ବିତ କରାଯିବା ସହ ମାଡ଼ ମରାଯାଇଥିଲା। ବିଧାନସଭା ଘେରାଉକୁ ମଧ୍ୟ ଶାସକ ବିଜେପିର ସଦସ୍ୟଙ୍କ ଦ୍ୱାରା ଭଣ୍ଡୁର କରିବାକୁ ଉଦ୍ୟମ ହୋଇଥିଲା ବୋଲି କହିଛି କଂଗ୍ରେସ। ସରକାରଙ୍କ ନିର୍ଦ୍ଦେଶରେ ପୋଲିସ ଗତକାଲି କଂଗ୍ରେସ କର୍ମୀଙ୍କ ଉପରେ ମାତ୍ରାଧିକ କାଯ୍ୟାନୁଷ୍ଠାନ କରିଥିବା ଅଭିଯୋଗ ହେବା ସହ ଏହାକୁ ଦୃଢ଼ ନିନ୍ଦା କରାଯାଇଛି। କଂଗ୍ରେସ କର୍ମୀଙ୍କୁ ଅଟକାଇବା ପାଇଁ ରାଜ୍ୟ ସରକାର ଯେତିକି ପୋଲିସ ନିୟୋଜିତ କରିଥିଲେ, ରାଜ୍ୟରେ ଆଇନଶୃଙ୍ଖଳା ସ୍ଥିତି ସଜାଡ଼ିବା ଏବଂ ମା’ମାନଙ୍କୁ ସୁରକ୍ଷା ଦେବା କ୍ଷତ୍ରରେ ସେତିକି ପୋଲିସ ନିୟୋଜିତ କରିଥିଲେ ଭଲ ହୋଇଥାନ୍ତା ବୋଲି ଦଳ କହିଛି। ସେପଟେ ସରକାର ଆତଙ୍କରାଜ ସୃଷ୍ଟି କରି ଯଦି କଂଗ୍ରେସର ସ୍ୱର ଦାବିବାକୁ ଉଦ୍ୟମ କରନ୍ତି ତେବେ ଆଗକୁ ଜୋରଦାର ଲଢେଇ ହେବ ।

ସେପଟେ ସରକାରଙ୍କୁ କଂଗ୍ରେସର ଡର ଘାରିଛି ବୋଲି ଅଭିଯୋଗ ଆଣିଛି କଂଗ୍ରେସ। ସେଥିପାଇଁ ଭୟରେ ଗତକାଲି ଆନ୍ଦୋଳନ ପୂର୍ବରୁ କଂଗ୍ରେସ ନେତାଙ୍କୁ ବିଭିନ୍ନ ସ୍ଥାନରେ ଅଟକ ରଖାଗଲା। କିନ୍ତୁ କୌଣସି ସ୍ଥିତିରେ ମଧ୍ୟ କଂଗ୍ରେସ ଡ଼ରିବାର ପ୍ରଶ୍ନ ଉଠୁନି। ମା, ଭଉଣୀଙ୍କ ପାଇଁ ଏହି ଲଢେଇ ତୃଣମୂଳ ସ୍ତରକୁ ଯିବ ଓ ଆହୁରି ଜୋରଦାର ହେବ ବୋଲି କୁହାଯାଇଛି। ସେପଟେ ସରକାର ପୋଲିସକୁ ଲଗାଇ ସମସ୍ତ ପ୍ରକାର ବେଆଇନ ପନ୍ଥା ଆପଣାଉଥିବା ଅଭିଯୋଗ ହୋଇଛି। ଖୋଦ ସରକାର ସବୁ ଆଇନ ଉଲ୍ଲଂଘନ କରୁଥିବା ବେଳେ ଓଲଟା ନାରୀଙ୍କ ପାଇଁ ଲଢ଼ୁଥିବା କଂଗ୍ରେସ ନେତା ଓ କାର୍ଯ୍ୟକର୍ତ୍ତାଙ୍କ ଉପରେ କାର୍ଯ୍ୟାନୁଷ୍ଠାନ ନେଉଛନ୍ତି। ଏହାର ଜବାବ ଦୃଢ଼ ହସ୍ତରେ ଦିଆଯିବ ବୋଲି କୁହାଯାଇଛି। ବିଧାନସଭାରେ ଲଗାତର ଆନ୍ଦୋଳନ କରି ବିଧାୟକମାନେ ନିଲମ୍ବିତ ହେବା ପରେ ରାଜରାସ୍ତାରେ ଦମ ଦେଖାଇଛି କଂଗ୍ରେସ। ଆଗକୁ ଜିଲ୍ଲା ଓ ବ୍ଲକ ସ୍ତରରେ ଆହୁରି ଜୋରଦାର କାର୍ଯ୍ୟକ୍ରମ କରିବାକୁ ବ୍ଲୁପ୍ରିଣ୍ଟ ପ୍ରସ୍ତୁତ କରିଛି ଦଳ।

ପୂର୍ବତନ ମନ୍ତ୍ରୀ ଗିରିଶ ନାରାୟଣ ପାଣ୍ଡେଙ୍କ ବିୟୋଗ: ପାଣ୍ଡେଙ୍କ ସାକ୍ଷ୍ୟ ଦ୍ବାରା ପଦ ହରାଇଥିଲେ ଇନ୍ଦିରା ଗାନ୍ଧୀ

ନୂଆଦିଲ୍ଲୀ: ଭାରତର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ବିରୋଧରେ ସାକ୍ଷ୍ୟ ଦେଇ ଏକଦା ସାରା ଦେଶରେ ଚର୍ଚ୍ଚିତ ହୋଇଥିବା ପୂର୍ବତନ ଆଇନ ମନ୍ତ୍ରୀ ଗିରିଶ ନାରାୟଣ ପାଣ୍ଡେଙ୍କ ପରଲୋକ ଘଟିଛି । ଶ୍ରୀ ପାଣ୍ଡେ ରାୟବରେଲିର ସରେନୀ ଥାନା ଅଞ୍ଚଳର ଶିବପୁର ଗ୍ରାମର ବାସିନ୍ଦା ଥିଲେ । ଆଜି ସକାଳୁ ତାଙ୍କର ପରଲୋକ ଘଟିଥିଲା । ଇନ୍ଦିରାଙ୍କ ବିରୋଧରେ ସାକ୍ଷ୍ୟ ଦେଇଥିବା ଭାଜପାର ବରିଷ୍ଠ ନେତା ପାଣ୍ଡେଙ୍କ ଧମର୍ପତ୍ନୀ ଗୋଟିଏ ଦିନ ପୂର୍ବରୁ ଶେଷ ନିଃଶ୍ବାସ ତ୍ୟାଗ କରିଥିଲେ ।

୧୯୭୧ ଲୋକସଭା ନିର୍ବାଚନ ସମୟରେ କଂଗ୍ରେସ ନେତୃତ୍ବାଧୀନ କେନ୍ଦ୍ର ସରକାର ଉପରେ ନିର୍ବାଚନରେ ଭ୍ରଷ୍ଟାଚାର ନେଇ ଅଭିଯୋଗ ଆସିଥିଲା । ନିଜେ ଇନ୍ଦିରା ରାୟବରେଲିରୁ ଜିତିଥିଲେ ଓ ତାଙ୍କ ବିପକ୍ଷରେ ଲଢ଼ୁଥିବା ରାଜନାରାୟଣ ଇନ୍ଦିରାଙ୍କ ବିଜୟକୁ କୋର୍ଟରେ ଚ୍ୟାଲେଞ୍ଜ ଦେଇଥିଲେ । ଏହି ମାମଲାର ଶୁଣାଣି ତତ୍କାଳୀନ ଜଜ ଜଗେମାହନ ଲାଲ ସିହ୍ନା କରୁଥିଲେ । ସେହି ସମୟରେ ଲାଲଗଞ୍ଜରେ ସଂଘର କାର୍ଯ୍ୟକର୍ତ୍ତା ଥିବା ପାଣ୍ଡେ ଇନ୍ଦିରାଙ୍କ ବିରୋଧରେ ମୁଖ୍ୟ ସାକ୍ଷୀ ଥିଲେ । ପାଣ୍ଡୋଙ୍କୁ ପ୍ରଲୋଭନ ଦିଆଯାଇଥିଲେ ମଧ୍ୟ ସେ ଅଟଳ ଥିଲେ । ସେ ଇନ୍ଦିରାଙ୍କ ବିରୋଧରେ କୋର୍ଟରେ ସାକ୍ଷ୍ୟ ଦେବା ପରେ ଜଜ ସିହ୍ନା ପ୍ରଧାନମନ୍ତ୍ରୀ ଇନ୍ଦିରାଙ୍କ ନିର୍ବାଚନକୁ ଅବୈଧ ଘୋଷିତ କରିଦେଇଥିଲେ ।