spot_img
Home Blog Page 1168

ଭୂକମ୍ପ କ୍ଷତିଗ୍ରସ୍ତ ମିଆଁମାରର ସହାୟତା ପାଇଁ ଭାରତର ‘ଅପରେସନ ବ୍ରହ୍ମା’ ଆରମ୍ଭ

ନନ୍ଦିଘୋଷ ବ୍ୟୁରୋ: ଭୂକମ୍ପରେ ଧ୍ବସ୍ତ ବିଧ୍ବଂସ ମିଆଁମାରର ସହାୟତା ପାଇଁ ଆଗକୁ ଆସିଲା ଭାରତ । ମିଆଁମାରକୁ ସହାୟତା ପଠାଇବା ସହ ଆରମ୍ଭ ହୋଇଛି ‘ଅପରେସନ ବ୍ରହ୍ମା’ । ଭାରତ ସରକାରଙ୍କ ଦ୍ୱାରା ଆରମ୍ଭ ହୋଇଥିବା ରିଲିଫ୍ ଅଭିଯାନ ହେଉଛି ବ୍ରହ୍ମା । ଗତକାଲିଠାରୁ ଆରମ୍ଭ ହୋଇଛି ଏହି ଅପରେସନ ।

ଭାରତୀୟ ସେନା ପକ୍ଷରୁ ମିଆଁମାରକୁ ରିଲିଫ୍ ସାମଗ୍ରୀ ଓ ସାହାଯ୍ୟ ପଠାଇବା ପାଇଁ କାର୍ଯ୍ୟ ଆରମ୍ଭ ହୋଇଛି । ଏହି ଅଭିଯାନର ମୁଖ୍ୟ ଲକ୍ଷ୍ୟ ମିଆଁମାରରେ ଭୂକମ୍ପ ପରେ କ୍ଷତିଗ୍ରସ୍ତ ଲୋକଙ୍କୁ ତୁରନ୍ତ ସାହାଯ୍ୟ ପ୍ରଦାନ କରିବା । ଏଥିରେ ଖାଦ୍ୟ, ଔଷଧ, ପୋଷାକ ଏବଂ ଅନ୍ୟାନ୍ୟ ଜରୁରୀ ସାମଗ୍ରୀ ପଠାଯାଇଛି ।

ଗତକାଲି ଭାରତୀୟ ବାୟୁସେନାର ପ୍ରଥମ ବିମାନ ହିଣ୍ଡନ ବାୟୁସେନା ଘାଟିରୁ ୧୫ ଟନ୍ ରିଲିଫ୍ ସାମଗ୍ରୀ ନେଇ ମିଆଁମାରର ରାଜଧାନୀ ୟାଙ୍ଗୁନରେ ପହଞ୍ଚିଥିଲା । ଏଥିରେ ଭାରତୀୟ ବାୟୁସେନା, ନୌସେନା ଓ NDRF ଟିମ ସାମିଲ ଅଛନ୍ତି । NDRFର ୮୦ ଜଣିଆ ଟିମ୍ ଉଦ୍ଧାର କାର୍ଯ୍ୟରେ ମୁତୟନ ହେବେ । ଅନ୍ୟାନ୍ୟ ଉପକରଣ ସହ ସନ୍ଧାନୀ କୁକୁରଙ୍କୁ ମିଆଁମାର ପଠାଯାଇଛି । ଭାରତୀୟ ନୌସେନାର ଦୁଇଟି ଜାହାଜ INS ସାବିତ୍ରୀ ଓ INS ସାତପୁରା ପ୍ରାୟ ୫୦ ଟନ୍ ରିଲିଫ୍ ସାମଗ୍ରୀ ନେଇ ଆସନ୍ତାକାଲି ସୁଦ୍ଧା ୟାଙ୍ଗୁନରେ ପହଞ୍ଚିବା କାର୍ଯ୍ୟକ୍ରମ ରହିଛି । ଏହି ସାମଗ୍ରୀ ମଧ୍ୟରେ ପୋଷାକ, ଜରୁରୀ ଔଷଧ, ଖାଦ୍ୟ ଓ ସାନିଟାଇଜର ରହିଛି ।

ମିଆଁମାରରେ ପ୍ରାୟ ୫୦ରୁ ୬୦ ହଜାର ଭାରତୀୟ ନାଗରିକ ରହୁଛନ୍ତି । ଏ ପର୍ଯ୍ୟନ୍ତ ସେମାନଙ୍କ ମଧ୍ୟରୁ କାହାର ମୃତ୍ୟୁ ଘଟିଥିବା ସୂଚନା ମିଳିନି । ଭାରତୀୟ ଦୂତାବାସ ସେମାନଙ୍କ ସହ ଯୋଗାଯୋଗରେ ଅଛନ୍ତି ।

ମୁଖ୍ୟମନ୍ତ୍ରୀଙ୍କ କଳାହାଣ୍ଡି ଗସ୍ତକୁ ବିରୋଧ ବେଳେ କଂଗ୍ରେସ କର୍ମୀଙ୍କୁ ପୋଲିସର ମାଡ଼ ଅଭିଯୋଗ

କଳାହାଣ୍ଡି: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ କଳାହାଣ୍ଡି ଗସ୍ତକୁ କଂଗ୍ରେସ କର୍ମୀଙ୍କ ବିରୋଧ । କଂଗ୍ରେସ କର୍ମୀଙ୍କ କଳାପତାକା ପ୍ରଦର୍ଶନ ବେଳେ ପୋଲିସ ମାଡ଼ ମାରିଥିବା ଅଭିଯୋଗ ।

ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଆଗି କଳାହାଣ୍ଡି ଗସ୍ତରେ ଯାଇଛନ୍ତି । ମୁଖ୍ୟମନ୍ତ୍ରୀଙ୍କ ଏହି ଗସ୍ତକୁ ଜିଲ୍ଲା କଂଗ୍ରେସ ପକ୍ଷରୁ ବିରୋଧ କରାଯାଇଛି । ଶ୍ରୀକୃଷ୍ଣ ନଗର ଅଞ୍ଚଳରେ ଯୁବ କଂଗ୍ରେସ ସଭାପତି ମହମ୍ମଦ ସାହେବଙ୍କ ନେତୃତ୍ବରେ କର୍ମୀମାନେ କଳାପତାକା ପ୍ରଦର୍ଶନ କରିଥିଲେ । ପୋଲିସ କଂଗ୍ରେସ କର୍ମୀଙ୍କୁ ଅଟକାଇବା ସହ ସେମାନଙ୍କୁ ଅଟକ ରଖିଥିଲେ । ଏହି ସମୟରେ ପୋଲିସ କଂଗ୍ରେମ କର୍ମୀଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି ।

ଗଞ୍ଜାମରେ ଯୁବକଙ୍କୁ ଗୁଳିମାରି ହତ୍ୟା

କବିସୂର୍ଯ୍ୟନଗର: ଗଞ୍ଜାମରେ ପୁଣି ଫୁଟିଲା ଗୁଳି । ଗୁଳି ମାଡ଼ରେ ଜଣେ ଯୁବକଙ୍କ ମୃତ୍ୟୁ ଘଟିଥିବା ଅଭିଯୋଗ । ମୃତକ ହେଲେ ଲକ୍ଷ୍ମୀ ନାରାୟଣ ପାଇକରାୟ ଓରଫ କୁନା । ପଥରପାଲ୍ଲି ରାସ୍ତାରେ ଗୁଳିମାଡ଼ ହୋଇଛି ।

ମିଳିଥିବା ସୂଚନା ଅନୁସାରେ କୁନା ବାଇକରେ ପଥରପାଲ୍ଲି ଅଞ୍ଚଳକୁ ଯାଇଥିଲେ । ଏହି ସମୟରେ ତାଙ୍କୁ ଗୁଳି କରି ହତ୍ୟା କରାଯାଇଛି । ଖବର ପାଇବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଛି । ତେବେ କୁନାଙ୍କୁ ଗୁଳି କରି ହତ୍ୟା କରିବାର କାରଣ ସ୍ପଷ୍ଟ ହୋଇନି ।

ଉତ୍କଳ ବିଶ୍ବବିଦ୍ୟାଳୟ ଛାତ୍ରାବାସରେ ଛାତ୍ରଙ୍କ ମୃତ୍ୟୁ

ଭୁବନେଶ୍ବର: ଉତ୍କଳ ବିଶ୍ଵବିଦ୍ୟାଳୟ ଛାତ୍ରାବାସରେ ଛାତ୍ରଙ୍କ ମୃତ୍ୟୁ । ମଧୁସୂଦନ ଛାତ୍ରାବାସରେ ଘଟିଛି ଅଘଟଣ । ଖବର ପାଇବା ପରେ ପୋଲିସ ହଷ୍ଟେଲରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ମୃତ ଛାତ୍ର ହେଲେ ତାପସ ରଞ୍ଜନ ନାୟକ । ସେ ଫେଲୋସିପ ବିଭାଗର ଦ୍ଵିତୀୟ ବର୍ଷର ଛାତ୍ର ଥିଲେ ।

ତେବେ ତାପସଙ୍କ ମୃତ୍ୟୁ କେମିତି ମୃତ୍ୟୁ ହୋଇଛି ତା’ର କାରଣ ଏବେ ବି ଅସ୍ପଷ୍ଟ ରହିଛି । ଅନ୍ୟପକ୍ଷରେ ଗତକାଲି ରାତିରେ ସେ ସୁସ୍ଥ ଥିଲେ ଓ ସାଙ୍ଗମାନଙ୍କ ସହ ଭଲରେ କଥା ହୋଇଥିଲେ ବୋଲି ସାଙ୍ଗମାନେ କହିଛନ୍ତି ।

କାନାଡାକୁ ୫୧ ତମ ପ୍ରଜାତନ୍ତ୍ର ଘୋଷଣା କରିବେ କି ଟ୍ରମ୍ପ ?

ନନ୍ଦିଘୋଷ ବ୍ୟୁରୋ: କାନାଡାକୁ ୫୧ତମ ପ୍ରଜାତନ୍ତ୍ର ଭାବେ ଘୋଷଣା କରିବେ କି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ । ଟ୍ରମ୍ପଙ୍କ ଏହି ଲଗାତାର ଘୋଷଣାର ପ୍ରଭାବ ପଡିଛି ଅନେକ କ୍ଷେତ୍ରରେ । ଫଳସ୍ବରୂପ ଦୁଇ ଦେଶ ମଧ୍ୟରେ ବିମାନ ଟିକେଟ ବୁକିଂ ସଂଖ୍ୟା ବ୍ୟାପକ ହ୍ରାସ ପାଇଛି । ଗତବର୍ଷ ମାର୍ଚ୍ଚରେ ଦୁଇ ଦେଶ ମଧ୍ଯରେ ଫ୍ଲାଇଟ ଟିକେଟ ବିକ୍ରୀ ୧୨ ଲକ୍ଷ ଥିଲା । ଚଳିତ ମାର୍ଚ୍ଚରେ ଏହି ସଂଖ୍ୟା ହ୍ରାସ ପାଇ ୩ ଲକ୍ଷରେ ପହଞ୍ଚିଛି ।

ସେପଟେ ଆମେରିକାରେ ହୋଇଥିବା ସର୍ଭେରେ ପ୍ରତି ୫ ଜଣ ନାଗରିକଙ୍କ ମଧ୍ୟରୁ ଜଣେ ଆମେରିକାରେ କାନାଡାକୁ ମିଶାଇବା ସପକ୍ଷରେ ଥିବା ଜଣାଯାଇଛି । ଆସନ୍ତା ମାସରେ କାନାଡା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହି ନିର୍ବାଚନ ପରେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ କାନାଡା ପ୍ରଧାନମନ୍ତ୍ରୀ ମାର୍କ କାର୍ଣ୍ଣିଙ୍କ ମଧ୍ୟରେ ଆଲୋଚନା ହେବ ବୋଲି ସୂଚନା ମିଳିଛି । ଗତ ୨୮ ତାରିଖରେ ଦୁଇ ନେତାଙ୍କ ମଧ୍ୟରେ ସକାରାତ୍ମକ ଆଲୋଚନା ହୋଇଥିଲା । ଆସନ୍ତା ଏପ୍ରିଲ ୨ ତାରିଖରେ ଟ୍ରମ୍ପ ନୂଆ ଟାରିଫ ନୀତି ଘୋଷଣା କରିବାକୁ ଯାଉଥିବାରୁ କାନାଡାର ପ୍ରତିକ୍ରିୟା କ’ଣ ହେବ ତାହାରି ଉପରେ ନଜର ରହିଛି ।

ପୂର୍ବରୁ କାର୍ଣ୍ଣି ଘୋଷଣା କରିଥିଲେ, ଅନ୍ୟ ରାଷ୍ଟ୍ର ଉପରେ ବିଶେଷ ନିର୍ଭରଶୀଳ ନହେବା ଦିଗରେ କାନାଡାକୁ ଗଠନ କରିବା ଲାଗି ସେ ଉଦ୍ୟମ କରିବେ । ସେପଟେ କାନାଡାକୁ ବିଦେଶୀ ଶ୍ରମିକ, ଅନ୍ତରାଷ୍ଟ୍ରୀୟ ଛାତ୍ରଛାତ୍ରୀ ଓ ପର୍ଯ୍ୟଟକଙ୍କ ଆଗମନ ସଂଖ୍ୟା ବ୍ୟାପକ ହ୍ରାସ ପାଉଥିବା ସୂଚନା ମିଳିଛି । ଗତବର୍ଷ ୨.୩୫ ନିୟୁତ ଅସ୍ଥାୟୀ ଆବାସିକ ଆବେଦନପତ୍ରକୁ କାନାଡା ଅଗ୍ରାହ୍ୟ କରିଥିବା ଜଣାଯାଇଛି । ଏହି ଧାରା ବର୍ତ୍ତମାନ ଜାରି ରହିଥିବା କୁହାଯାଇଛି ।

ନେପାଳର ପୂର୍ବତନ ରାଜାଙ୍କୁ ପ୍ରଚଣ୍ଡଙ୍କ ଚେତାବନୀ: ଅତୀତରେ କରିଥିବା ଭୁଲ ଦୋହରାଅନି

କାଠମାଣ୍ଡୁ: ନେପାଳର ପୂର୍ବତନ ରାଜା ଜ୍ଞାନେନ୍ଦ୍ର ଶାହଙ୍କୁ ସିପିଏନ-ମାଓଇଷ୍ଟ ସେଣ୍ଟର ନେତା ପୁଷ୍ପକମଲ ଦହଲ ପ୍ରଚଣ୍ଡଙ୍କ ଚେତାବନୀ । ଅତୀତରେ କରିଥିବା ଭୁଲ ପରି ପୁଣି ଭୁଲ୍ ନ କରିବାକୁ ଦେଲେ ଚେତାବନୀ । ଏହାସହ ରାଜତନ୍ତ୍ର ସପକ୍ଷବାଦୀ ବାହିନୀକୁ ହିଂସାରୁ ନିବୃତ୍ତ ରହିବା ଲାଗି ସେ ପରାମର୍ଶ ଦେଇଛନ୍ତି ।

ରାଜନୈତିକ ଦଳଗୁଡିକ ପ୍ରତି ରହିଥିବା ମନୋଭାବର ପରିବର୍ତ୍ତନ କରିବା ଲାଗି ସେ ଜ୍ଞାନେନ୍ଦ୍ରଙ୍କୁ ଆହ୍ବାନ ଦେଇଛନ୍ତି । ଏକ ସଭାରେ ଯୋଗ ଦେଇ ପ୍ରଚଣ୍ଡ କହିଛନ୍ତି, ରାଜତନ୍ତ୍ର ସପକ୍ଷବାବୀ ବାହିନୀ ଲୋକଙ୍କୁ ଆତଙ୍କିତ କରି ରଖୁଛନ୍ତି । ନିଜର ଭୁଲ୍ ଯୋଗୁଁ ଜ୍ଞାନେନ୍ଦ୍ର ଜଣେ ସାଧାରଣ ନାଗରିକ ଭାବେ ରହିଛନ୍ତି । ନେପାଳବାସୀଙ୍କ ଭାବାବେଗ ସହ ଖେଳନି । ଗଣତନ୍ତ୍ରର ସୁରକ୍ଷା, ଦୁର୍ନୀତିମୁକ୍ତ ଶାସନ ଲାଗି ଦଳ ପ୍ରତିଶ୍ରୁତିବଦ୍ଧ ବୋଲି ପ୍ରଚଣ୍ଡ କହିଛନ୍ତି ।

ପ୍ରଚଣ୍ଡଙ୍କୁ ସମର୍ଥନ କରିଛନ୍ତି ସିପିଏନ ୟୁନିଫାଏଡ ସୋସାଲିଷ୍ଟ ଅଧ୍ୟକ୍ଷ ମାଧବ କୁମାର ଏବଂ ନେପାଳ କମ୍ୟୁନିଷ୍ଟ ପାର୍ଟି ସାଧାରଣ ସମ୍ପାଦକ ନେତ୍ର ବିକ୍ରମ ଚାନ୍ଦ । ବିଗତ ୨୦୦୮ରେ ୨୩୯ ବର୍ଷର ରାଜତନ୍ତ୍ରର ପତନ ଘଟିଥିଲା । ମାଓବାଦୀ ବିଦ୍ରୋହର ଅବସାନ ଲାଗି ୨୦୦୮ରେ ଚୁକ୍ତିନାମା ହେବା ପରେ ମାଓବାଦୀ ହିଂସାର ଅବସାନ ହୋଇଥିଲା । ୧୯୯୬ରୁ ୨୦୦୬ ମଧ୍ୟରେ ମାଓବାଦୀ ହିଂସାରେ ଦେଶରେ ପ୍ରାଣ ହରାଇଥିଲେ ପ୍ରାୟ ୧୭ ହଜାର ଲୋକ । ୨୦୦୮ରେ ହିନ୍ଦୁ ରାଷ୍ଟ୍ରରୁ ଏକ ଧର୍ମନିରପେକ୍ଷ, ସଂଘୀୟ ପ୍ରଜାତନ୍ତ୍ରରେ ପରିଣତ ହୋଇଥିଲା ନେପାଳ । ସେବେଠାରୁ ନେପାଳର ଶେଷ ରାଜା ଜ୍ଞାନେନ୍ଦ୍ର ନିଜ ପରିବାର ସହ ସାଧାରଣ ନାଗରିକ ଭାବେ କାଳତିପାତ କରିଆସୁଛନ୍ତି ।

ମିଆଁମାର ଭୂକମ୍ପ: ମୃତ୍ୟୁସଂଖ୍ୟା ୧୬ ଶହ ଟପିଲା

ନନ୍ଦିଘୋଷ ବ୍ୟୁରୋ: ମିଆଁମାର ଭୂକମ୍ପରେ ବଢ଼ିବାରେ ଲାଗିଛି ମୃତ୍ୟୁ ସଂଖ୍ୟା । ୧୬ ଶହରୁ ଅଧିକ ମୃତଦେହ ଉଦ୍ଧାର ହୋଇ ସାରିଛି । ଏବେ ବି ଧ୍ବଂସାବଶେଷ ତଳେ ବହୁ ଲୋକ ଫସି ରହିଛନ୍ତି । ଏମିତି ସ୍ଥିତିରେ ମୃତ୍ଯୁସଂଖ୍ଯା ୧୦ ହଜାର ଟପିବ ବୋଲି ଆଶଙ୍କା କରାଯାଉଛି । ଏବେ ବି ଦେଶର ବିଭିନ୍ନ ଭାଗରେ ଉଦ୍ଧାର କାର୍ଯ୍ୟ ଜାରି ରହିଛି ।

ଧ୍ବଂସସ୍ତୂପ ତଳୁ ମୃତଦେହ ବାହାରୁଥିବାରୁ ପ୍ରକୃତ ସଂଖ୍ୟା ଆକଳନ କରିବା କଷ୍ଟସାଧ୍ଯ ହୋଇଛି । ଗତ ୨୮ରେ ଲାଗ ଲାଗ ୨ଟି ଭୂକମ୍ପ ହୋଇଥିଲା ବେଳେ ଗତକାଲି ପୁଣି ଭୂକମ୍ପ ଝଟକା ଯୋଗୁଁ କ୍ଷୟକ୍ଷତି ଅଧିକ ହୋଇଛି । ଦେଶବାସୀଙ୍କୁ ସହାୟତା ଦେବା ଲାଗି ଆହ୍ବାନ ଦେଇଛନ୍ତି ଜୁଣ୍ଟା ଶାସକ ମିନ ଅଙ୍ଗ ହାଇଙ୍ଗ ।

ସେପଟେ ଥାଇଲାଣ୍ଡରେ ବି ନାହିଁ ନଥିବା କ୍ଷତି କରିଛି ଭୂକମ୍ପ । ଧୂଳିସାତ ହୋଇଛି ଅନେକ କୋଠା ଓ ବ୍ରିଜ । ରାଜଧାନୀ ବ୍ୟାଙ୍କକରେ ୨ ହଜାରରୁ ଅଧିକ କୋଠା କ୍ଷତିଗ୍ରସ୍ତ ହୋଇଛି । ବ୍ୟାଙ୍କକର ଚାଟୁଛକ ମାର୍କେଟରେ ୧୦୦ରୁ ଅଧିକ ଶ୍ରମିକ ପୋତି ହୋଇଥିବା ଆଶଙ୍କା କରାଯାଉଛି ।

ମିଆଁମାରକୁ ସହାୟତାର ହାତ ବଢ଼ାଇଛି ଭାରତ । ‘ଅପରେସନ ବ୍ରହ୍ମା’ରେ ମିଆଁମାରକୁ ଭାରତ ପଠାଇଛି ଔଷଧ, ଖାଦ୍ୟ ପଦାର୍ଥ ସମେତ ୧୫ ଟନ ରିଲିଫ ସାମଗ୍ରୀ । ସେହିପରି ଆଇଏନଏସ ସତପୁରା ଓ ଆଇଏନଏସ ସାବିତ୍ରୀରେ ପଠାଯାଇଛି ୪୦ ଟନ ସାମଗ୍ରୀ । ବାୟୁସେନା ବାହିନୀର ସି-୧୩୦ ଏୟାରକ୍ରାଫରେ ବି ଯାଇଛନ୍ତି ୪୦ ଜଣ ଏନଡିଆରଏଫ ଯବାନ । ମିଆଁମାରକୁ ସହାୟତା ପ୍ରଦାନ ଲାଗି ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ । ଜାତିସଂଘ ପକ୍ଷରୁ ୫ ନିୟୁତ ଡଲାର ସହାୟତା ଦିଆଯାଇଛି ।

ବଢ଼ିବାରେ ଲାଗିଛି ତାପମାତ୍ରା, ୪୧ ଡିଗ୍ରୀ ଉପରେ ତିନି ସହର

ଭୁବନେଶ୍ବର: ରାଜ୍ୟରେ ବଢ଼ିବାରେ ଲାଗିଛି ତାତି । ଅସହ୍ୟ ହେବାରେ ଲାଗିଛି ଗରମ । ବଢ଼ିବାରେ ଲାଗିଛି ବହୁ ସହରର ତାପମାତ୍ରା । ଗତକାଲି ୪୧ ଡିଗ୍ରୀ ଉପରେ ତିନି ସହରର ତାପମାତ୍ରା ରେକର୍ଡ ହୋଇଥିଲା । ୪୨ ଡିଗ୍ରୀ ସହ ରାଜ୍ୟର ସବୁଠୁ ଉତ୍ତପ୍ତ ସହର ପାଲଟି ଥିଲା ସମ୍ବଲପୁର । ସେହିଭଳି ୪୧.୭ ଡିଗ୍ରୀ ସହ ଦ୍ବିତୀୟରେ ରହିଥିଲା ହୀରାକୁଦ । ଝାରସୁଗୁଡା ୪୧.୬ ଡିଗ୍ରୀ ପାରଦ ରେକର୍ଡ ହୋଇଥିଲା ।

ଭୁବନେଶ୍ବରର ତାପମାତ୍ରା ବି ବଢିବାରେ ଲାଗିଛି । ଉଷ୍ମ ଓ ଆଦ୍ର ସ୍ଥିତିକୁ ନେଇ ଗଜପତି, ଗଞ୍ଜାମ, ନୟାଗଡ, ଖୋର୍ଦ୍ଧା, ପୁରୀ, ଜଗତସିଂହପୁର, କଟକ, ଯାଜପୁର, ଭଦ୍ରକ, ବାଲେଶ୍ୱର ଓ କେନ୍ଦ୍ରାପଡା ଜିଲ୍ଲାକୁ ୟେଲୋ ଓ୍ବାର୍ଣ୍ଣଂ ଜାରି କରାଯାଇଛି । ଆଜିଠାରୁ ବିଭିନ୍ନ ଜାଗାରେ ଧୀରେ ଧୀରେ ତାପମାତ୍ରା କମିବ ବୋଲି କହିଛି ପାଣିପାଗ କେନ୍ଦ୍ର । ଦୁଇତିନି ଦିନ ପରେ ତାପମାତ୍ରା ୨ରୁ ୩ ଡିଗ୍ରୀ ତାପମାତ୍ରା ହ୍ରାସ ପାଇବ । ଦକ୍ଷିଣ ଓଡ଼ିଶାରେ ୨, ୩ ଓ ୪ ତାରିଖରେ ହାଲକା ବର୍ଷାର ସମ୍ଭାବନା ରହିଛି ।

ଅଶାନ୍ତ ରାଜଧାନୀ: ଯୁବକଙ୍କୁ ଉଠାଇ ନେଇ ଲକ୍ଷେ ଟଙ୍କା ମୁଣ୍ଡ ଜାମିନ ରଖିଲେ ଦୁର୍ବୃତ୍ତ

ଭୁବନେଶ୍ବର: ପୁଣି ଅଶାନ୍ତ ରାଜଧାନୀ ଭୁବନେଶ୍ବର । ହୋଲିରେ ଦୁଇଟି ହତ୍ୟା ଘଟଣା ରାଜଧାନୀବାସୀଙ୍କ ମନରୁ ଲିଭି ନଥିବା ବେଳେ ଜଣେ ଯୁବକଙ୍କୁ ଉଠାଇ ନେଲେ ଦୁର୍ବୃତ୍ତ । ଯୁବକଙ୍କୁ ଅପହରଣ କରି ମୁଣ୍ଡ ଜାମିନ ରଖିବା ସହ ଲକ୍ଷେ ଟଙ୍କା ମାଗିଛନ୍ତି ଦୁର୍ବୃତ୍ତ ।

ଲକ୍ଷେ ଟଙ୍କା ଦିଅ ଯୁବକଙ୍କୁ ଫେରାଇ ନିଅ । ଏମିତି କିଛି ଚେତାବନୀ ଦେଇଛନ୍ତି ଦୁର୍ବୃତ୍ତ । ଭରତପୁର ଥାନା ଅଞ୍ଚଳରେ ଏପରି ଘଟଣା ଘଟିଛି । ଗତକାଲି ସମ୍ ହସ୍ପିଟାଲ ଛକରୁ କଣ୍ଟ୍ରାକ୍ଟର ମୁନା ଚାନ୍ଦ ନାୟକଙ୍କୁ ଅପହରଣ କରି ନେଇ ନିସ୍ତୁକ ମାଡମାରି ଡମଣା ଛକରେ ଫୋଫାଡ଼ି ଫେରାର ହୋଇଯାଇଥିଲେ ଦୁର୍ବୃତ୍ତ । ଅପହରଣ କରିବା ପରେ ପରିବାର ଲୋକଙ୍କୁ ଏକ ଲକ୍ଷ ଟଙ୍କା ଦେବାକୁ ଦାବି କରିଥିଲେ । ତେବେ ପରିବାର ଲୋକ ଟଙ୍କା ନଦେବାରୁ ଦୁର୍ବୃତ୍ତମାନେ ମାଡ଼ ମାରି ମୁନାଙ୍କୁ ଫୋଫାଡ଼ି ଫେରାର ହୋଇଯାଇଥିଲେ ।

ଘଟଣା ସମ୍ପର୍କରେ ଖବର ପାଇ ମୁନାଙ୍କୁ ଚିକତ୍ସା ପାଇଁ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲା ପୋଲିସ । ସେପଟେ କଣ୍ଟ୍ରାକ୍ଟରଙ୍କୁ ଅପହରଣ ଘଟଣାରେ ଦୁଇ ଜଣଙ୍କୁ ଅଟକ ରଖିଛି ଭରତପୁର ପୋଲିସ । ଘଟଣାରେ ଡ୍ରାଇଭ ଜୋନ ସେଲ୍ଫ ଡ୍ରାଇଭ କାରର ମାଲିକ ଦୀପକ ମହାରଣା ଓ ସହଯୋଗୀ ଉତ୍କଳ କେଶରୀ ଖୁଣ୍ଟିଆଙ୍କୁ ପୋଲିସ ଅଟକ ରଖି ପଚରା ଉଚରା କରୁଛି ।

୨୦୨୫-୨୬ ଆର୍ଥିକ ବର୍ଷ ବ୍ୟୟ ମଞ୍ଜୁରୀ ବିଲ୍ ପାରିତ

ଭୁବନେଶ୍ବର: ବିଧାନସଭାରେ ୨୦୨୫-୨୬ ଆର୍ଥିକ ବର୍ଷ ପାଇଁ ବ୍ୟୟ ମଞ୍ଜୁରୀ ବିଲ ପାରିତ । ଏହାସହ ଗୃହକାର୍ଯ୍ୟ ଆସନ୍ତା ବୁଧବାର ତଥା ଏପ୍ରିଲ ୨ ତାରିଖ ପୂର୍ବାହ୍ନ ୧୦ଟା ୩୦ ଯାଏଁ ମୁଲତବୀ ଘୋଷଣା କରିଛନ୍ତି ବାଚସ୍ପତି ସୁରମା ପାଢୀ । ଗୃହରେ ବି ପାରିତ ହୋଇଛି ୨୦୨୫-୨୬ ଆର୍ଥିକ ବର୍ଷର ଓଡ଼ିଶା ବିନିଯୋଗ ବିଲ୍ ।

ବିରୋଧୀ ବିଜେଡି ବିଧାୟକ ଆଲୋଚନାରେ ଭାଗ ନେଇଥିବା ବେଳେ ମୁଖ୍ୟମନ୍ତ୍ରୀଙ୍କ ଉତ୍ତର ପରିପ୍ରେକ୍ଷୀରେ କକ୍ଷତ୍ୟାଗ କରିଥିଲେ । ସେପଟେ ଜଗତସିଂହପୁରରେ ହେବ ମେଡିକାଲ କଲେଜ । ଏନେଇ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏଥିପାଇଁ ମୁଖ୍ୟମନ୍ତ୍ରୀ ଏବଂ ସ୍ୱାସ୍ଥ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଥିଲେ ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ ।