spot_img
Home Blog Page 1158

ହାତୀଛୁଆର ଏକୋଇଶିଆ ଆଡ଼ମ୍ବର ସହକାରେ ପାଳନ

ଅନୁଗୁଳ: ପରିବାରରେ ପିଲାଟିଏ ଜନ୍ମ ହେଲେ ଲୋକେ ନାମକରଣ କରିବା ସହିତ ଏକୋଇଶିଆ ପାଳନ କରିଥା’ନ୍ତି । କିନ୍ତୁ ଗୁରଙ୍ଗ ଗାଁରେ ଏକ ହାତୀଛୁଆର ଏକୋଇଶିଆ ପାଳନ କରାଯାଇଛି । ଜଙ୍ଗଲ ସୁରକ୍ଷା ଦିଗରେ ଏ‌ହି ଗାଁର ସ୍ବତନ୍ତ୍ର ପରିଚୟ ରହିଛି । ଏବେ ପୁଣି ଗ୍ରାମବାସୀଙ୍କ ବନ୍ୟପ୍ରାଣୀଙ୍କ ପ୍ରତି ଭଲପାଇବାର ଆଉ ଏକ ଉଦାହରଣ ଦେଖିବାକୁ ମିଳିଛି।

ଅନୁଗୁଳ ବନାଞ୍ଚଳ ଗୁରଙ୍ଗ ଗାଁର ଲୋକମାନେ ଠେଙ୍ଗା ପାଳି କରି ପ୍ରାୟ ୪୦ ବର୍ଷ ହେଲା ଜଙ୍ଗଲ ସୁରକ୍ଷା କରି ଆସୁଛନ୍ତି । ଫଳରେ ଗାଁ ନିକଟ ଜଙ୍ଗଲରେ ଏବେ ବଡ଼ ବଡ଼ ଶାଳଗଛ ଛିଡ଼ା ହୋଇଛି। ଆଉ ଏହି ଜଙ୍ଗଲ ମଧ୍ୟ ବନ୍ୟଜନ୍ତୁଙ୍କ ସୁରକ୍ଷିତ ବାସସ୍ଥଳୀ ପାଲଟିଛି । ଏହି ଜଙ୍ଗଲରେ ୨୧ ଦିନ ପୂର୍ବରୁ ଏକ ହାତୀଛୁଆ ଜନ୍ମ ହୋଇଥିବା ବେଳେ ଗୁରଙ୍ଗ ଗାଁର ଲୋକମାନେ ଆଜି ହାତୀଛୁଆର ଏକୋଇଶିଆ ଆଡ଼ମ୍ବର ସହକାରେ ପାଳନ କରିଛନ୍ତି ।

ଏଥିପାଇଁ ଗାଁରେ ଭୋଜିଭାତର ଆସର ମଧ୍ୟ ଜମିଥିଲା । ଗ୍ରାମବାସୀ ଏକାଠି ବସି ଭୋଜି ଖାଇ ଖୁସିରେ ମସ୍‌ଗୁଲ ହୋଇଥିଲେ। ହାତୀଛୁଆର ଦୀର୍ଘ ଜୀବନ କାମନା କରି ସେମାନେ ତ୍ରିନାଥ ମେଳା ଆୟୋଜିତ କରିବା ସହିତ ହୋମଯଜ୍ଞ କରିଥିବା ଜଣାପଡ଼ିଛି । ହାତୀ- ମଣିଷ ଲଢ଼େଇ ପାଇଁ ଉଭୟଙ୍କ ଜୀବନ ବିପଦରେ ପଡ଼ୁଥିବା ବେଳେ ଗୁରଙ୍ଗ ଗ୍ରାମବାସୀଙ୍କ ନିଆରା ଉଦ୍ୟମ ପ୍ରଶଂସନୀୟ।

ୱାକଫ ବିଲ୍- ୨୦୨୪ : ମୁସଲମାନଙ୍କ ପାଇଁ ଲାଭ ନା କ୍ଷତି, ଜାଣନ୍ତୁ …

ନନ୍ଦିଘୋଷ ବ୍ୟୁରୋ: ଲୋକସଭାରେ ଉପସ୍ଥାପିତ ହେଲା ସଂଶୋଧିତ ୱାକଫ ବିଲ୍- ୨୦୨୪ । ପ୍ରବଳ ହଟ୍ଟଗୋଳ ମଧ୍ୟରେ ବିଲକୁ ଆଗତ କରିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ। ନରେନ୍ଦ୍ର ମୋଦୀ ତୃତୀୟ ଥର ପାଇଁ ସରକାର ଗଠନ କରିବା ପରେ ଡକାଯାଇଥିବା ବଜେଟ ଅଧିବେଶନରେ ସରକାର ଦୁଇଟି ବିଲ୍ ଆଣିଥିଲେ। ପ୍ରଥମ – ୱାକଫ (ସଂଶୋଧନ) ବିଲ୍ ୨୦୨୪ ଏବଂ ଦ୍ୱିତୀୟ – ମୁସଲିମ ୱାକଫ (ବାତିଲ) ବିଲ୍ ୨୦୨୪। ଏହି ଦୁଇଟି ବିଲ୍ ଲୋକସଭାରେ ଅଣାଯାଇଥିଲା। ସରକାର କହିଥିଲେ ଯେ ଏହା ମାଧ୍ୟମରେ ୱାକଫ ସମ୍ପତ୍ତିଗୁଡ଼ିକୁ ଭଲ ଭାବରେ ପରିଚାଳନା କରାଯାଇପାରିବ। ଏହା ସହିତ, ୱାକଫ ବୋର୍ଡର କାର୍ଯ୍ୟକୁ ଅଧିକ ପ୍ରଭାବଶାଳୀ କରାଯିବ। ତେବେ ନୂତନ ୱାକଫ ଆଇନ ସମ୍ପର୍କରେ ସରକାରଙ୍କ ଦାବି କ’ଣ, ଏବଂ ବିରୋଧୀ ଦଳ କିମ୍ବା ମୁସଲିମ ସମ୍ପ୍ରଦାୟଙ୍କ ଚିନ୍ତା କ’ଣ ? ୱାକଫ କ’ଣ, ଏହା କେଉଁଠାରୁ ଆସିଛି ଏବଂ ଏହାର ମୋଟ ସମ୍ପତ୍ତି କେତେ ତାହା ପ୍ରଥମେ ଜାଣନ୍ତୁ…

୧. ୱାକଫର ଅର୍ଥ କ’ଣ?

ୱାକଫ ହେଉଛି ଏକ ସମ୍ପତ୍ତି ଯାହା ଧାର୍ମିକ ଏବଂ ଦାନଶୀଳ ଉଦ୍ଦେଶ୍ୟ ପାଇଁ ସଂରକ୍ଷିତ। ଇସଲାମିକ ଆଇନ ଅନୁଯାୟୀ, ଏହି ସମ୍ପତ୍ତିକୁ ଦାନ କିମ୍ବା ଧାର୍ମିକ ଉଦ୍ଦେଶ୍ୟ ବ୍ୟତୀତ ଅନ୍ୟ କୌଣସି କାମରେ ବ୍ୟବହାର କରିବା ନିଷେଧ। ସମ୍ପତ୍ତିକୁ ୱାକଫ ବୋଲି କହିବା ପଛରେ ଉଦ୍ଦେଶ୍ୟ ହେଉଛି ଏହା ଆଉ କୌଣସି ନିର୍ଦ୍ଦିଷ୍ଟ ବ୍ୟକ୍ତିଙ୍କର ନୁହେଁ। ଏବେ ଏହା ଆଲ୍ଲାଙ୍କ ନାମରେ ନାମିତ । ଥରେ କୌଣସି ସମ୍ପତ୍ତି ୱାକଫ୍ ଘୋଷଣା ହୋଇଗଲେ, ମାଲିକାନା ଅଧିକାର ପୁନର୍ବାର ଅର୍ଜନ କରାଯାଇପାରିବ ନାହିଁ।

୨. ଭାରତରେ ୱାକଫର ଇତିହାସ

ଭାରତରେ ୱାକଫର ଇତିହାସ ଦିଲ୍ଲୀ ଶାସନ ସମୟରୁ ଆରମ୍ଭ ହୋଇଛି। ତତ୍କାଳୀନ ସୁଲତାନ ମହମ୍ମଦ ଘୋରୀ ମୁଲତାନର ଜାମା ମସଜିଦଙ୍କ ନାମରେ ଦୁଇଟି ଗାଁର ନାମକରଣ କରିଥିଲେ। ଏହା ସହିତ, ଏହାର ରକ୍ଷଣାବେକ୍ଷଣ ଦାୟିତ୍ୱ ଇସଲାମିକ ଜଗତର ଜଣେ ପ୍ରସିଦ୍ଧ ଧାର୍ମିକ ବିଦ୍ୱାନ ଶେଖ-ଉଲ-ଇସଲାମଙ୍କୁ ଦିଆଯାଇଥିଲା। ଦିଲ୍ଲୀ ସୁଲତାନତ ଏବଂ ପରବର୍ତ୍ତୀ ସମୟରେ ଭାରତରେ ଇସଲାମିକ ରାଜବଂଶର ବିସ୍ତାର ସହିତ ୱାକଫ ସମ୍ପତ୍ତି ବୃଦ୍ଧି ପାଇବାରେ ଲାଗିଲା ।

୩. ୱାକଫ ନାମରେ କେତେ ସମ୍ପତ୍ତି ଅଛି?

ବର୍ତ୍ତମାନ ସୁଦ୍ଧା, ଭାରତୀୟ ରେଳ ଏବଂ ଭାରତୀୟ ସେନା ପରେ, ୱାକଫ୍ ବୋର୍ଡ ଦେଶର ତୃତୀୟ ସର୍ବବୃହତ ସମ୍ପତ୍ତିର ମାଲିକ । ବର୍ତ୍ତମାନ, ୱାକଫ୍ ବୋର୍ଡ ସାରା ଦେଶରେ ପ୍ରାୟ ୮ ଲକ୍ଷ ୭୦ ହଜାର ସମ୍ପତ୍ତିକୁ ନିୟନ୍ତ୍ରଣ କରୁଛି। ଏହି ସମ୍ପତ୍ତିଗୁଡ଼ିକ ପ୍ରାୟ ୯ ଲକ୍ଷ ୪୦ ହଜାର ଏକର ଜମିରେ ବିସ୍ତୃତ। ଏହାର ଆନୁମାନିକ ମୂଲ୍ୟ ୧ ଲକ୍ଷ ୨୦ ହଜାର କୋଟି ଟଙ୍କା। ବିଶ୍ୱରେ ସର୍ବାଧିକ ସଂଖ୍ୟକ ୱାକଫ ସମ୍ପତ୍ତି ଭାରତରେ ଅଛି ।

୪. ୱାକଫ – ଦାବି ଏବଂ ଚିନ୍ତା

ସରକାରଙ୍କ ଯୁକ୍ତି-

ପ୍ରଥମ – ୱାକଫ ସଂଶୋଧନ ବିଲ୍ ୨୦୨୪, ଯାହାକୁ ସରକାର ଆଜି ଲୋକସଭାରେ ପାରିତ କରିବାକୁ ଚେଷ୍ଟା କରିବେ, ଏହା ୧୯୯୫ ମସିହାର ୱାକଫ ଆଇନରେ କିଛି ବଡ଼ ପରିବର୍ତ୍ତନ ଆଣିବ। ଏହା ଭାରତରେ ୱାକଫ ସମ୍ପତ୍ତିର ପରିଚାଳନା ଏବଂ ପ୍ରଶାସନର ଢାଞ୍ଚାକୁ ପରିବର୍ତ୍ତନ କରିବ। ସରକାର ଏହାକୁ ସଂସ୍କାର ବୋଲି କହୁଥିବା ବେଳେ, ବିରୋଧୀ ଦଳ ଏବଂ ଅନେକ ମୁସଲିମ ସଂଗଠନ ଏହାକୁ ଧାର୍ମିକ ମାମଲାରେ ହସ୍ତକ୍ଷେପ ବୋଲି କହୁଛନ୍ତି।

ଦ୍ୱିତୀୟ – ନୂତନ ସଂଶୋଧନ ପରେ, ୱାକଫର ପରିଭାଷା ଏବଂ ପଞ୍ଜୀକରଣ ପ୍ରକ୍ରିୟା ସମ୍ପୂର୍ଣ୍ଣ ବଦଳିଯିବ। ଏହା ସହିତ, ୱାକଫ ରେକର୍ଡ ପରିଚାଳନାରେ ପ୍ରଯୁକ୍ତିର ଭୂମିକା ବୃଦ୍ଧି କରିବାର ଦାବି ମଧ୍ୟ କରାଯାଉଛି। ସରକାର ଦାବି କରୁଛନ୍ତି ଯେ ଏହା ୱାକଫ ବୋର୍ଡର କାର୍ଯ୍ୟରେ ସମାନତା, ସ୍ୱଚ୍ଛତା ଏବଂ ଦାୟିତ୍ୱ ଆଣିବ।

ତୃତୀୟ – ସେହି ସମୟରେ, ମୁସଲିମ ୱାକଫ (ବାତିଲ) ବିଲ୍ ୨୦୨୪ ର ପ୍ରକୃତ ଉଦ୍ଦେଶ୍ୟ ହେଉଛି ୧୯୨୩ର ମୁସଲିମ ୱାକଫ ଆଇନକୁ ରଦ୍ଦ କରିବା। ସରକାର ଏହାକୁ ଏକ ଉପନିବେଶବାଦୀ ଯୁଗର ବିଲ୍ ବୋଲି କହି କହିଛନ୍ତି ଯେ ଏହା କେବଳ ପୁରୁଣା ନୁହେଁ ବରଂ ଆଧୁନିକ ଭାରତରେ ୱାକଫ ସମ୍ପତ୍ତି ପରିଚାଳନା ପାଇଁ ମଧ୍ୟ ଅପର୍ଯ୍ୟାପ୍ତ।

କିନ୍ତୁ, ଏବେ ମୋଦି ସରକାରଙ୍କର ପୂର୍ବ ପରି ସଂସଦରେ ବହୁମତ ନାହିଁ। ତେଣୁ, ତାଙ୍କୁ ତାଙ୍କର ସହଯୋଗୀ ଅଂଶୀଦାରମାନଙ୍କ ସହିତ ପରାମର୍ଶ କରିବା ପରେ ଏ ବିଷୟରେ ଆଗକୁ ବଢ଼ିବାକୁ ପଡିଲା। ବିରୋଧୀ ଏବଂ ମେଣ୍ଟ ଅଂଶୀଦାରମାନଙ୍କ କିଛି ଆପତ୍ତି ପରେ ସରକାର ଏହାକୁ JPC – ସଂସଦର ଯୁଗ୍ମ କମିଟିକୁ ପଠାଇଥିଲେ। କିଛି ପରିବର୍ତ୍ତନ ପରେ, ବିଲ୍‌ଟିକୁ ଏବେ ସଂସଦରେ ନୂତନ ଭାବରେ ଅଣାଯାଉଛି।

ବିରୋଧୀଙ୍କ ଯୁକ୍ତି-:

ପ୍ରଥମ – ବିରୋଧୀ ଦଳ ଏବଂ ମୁସଲମାନମାନଙ୍କ ସହ ଜଡିତ ସଂଗଠନଗୁଡ଼ିକ ନୂତନ ଆଇନକୁ ଅସାମ୍ବିଧାନିକ ଏବଂ ରାଜନୈତିକ ଉଦ୍ଦେଶ୍ୟ ରଖି ଆଣୁଥିବା କହୁଛନ୍ତି। ୱାକଫ ବୋର୍ଡରେ ଦୁଇଜଣ ଅଣ-ମୁସଲିମଙ୍କ ଉପସ୍ଥିତି ସୁନିଶ୍ଚିତ କରିବାକୁ ଅଲ୍ ଇଣ୍ଡିଆ ପର୍ସନାଲ ଲ ବୋର୍ଡ ସମେତ ଅନ୍ୟାନ୍ୟ ମୁସଲିମ ସଂଗଠନଗୁଡ଼ିକର ଆପତ୍ତି ଅଛି। ମୁସଲିମ ସଦସ୍ୟମାନଙ୍କ ମଧ୍ୟରେ ମଧ୍ୟ ଦୁଇଜଣ ମହିଳା ସଦସ୍ୟ ରହିବା ବାଧ୍ୟତାମୂଳକ କରାଯାଇଛି।

ଦ୍ୱିତୀୟ – ଅସଦୁଦ୍ଦିନ ଓୱେସି କହିଥିଲେ ଯେ ୱାକଫ ସମ୍ପତ୍ତି ବ୍ୟକ୍ତିଗତ, ଯେତେବେଳେ କି ଏହି ଆଇନ ପରେ, ସରକାର ଏହାକୁ ସରକାରୀ ସମ୍ପତ୍ତି ଭାବରେ ବିବେଚନା କରିପାରିବେ। ସେ ଦାବି କରନ୍ତି ଯେ ଡିଡ୍ ବିନା, ୱାକଫ୍ ସମ୍ପତ୍ତି ପଞ୍ଜୀକୃତ ହୋଇପାରିବ ନାହିଁ। ଏବଂ ଯଦି କୌଣସି ପଞ୍ଜୀକରଣ ନାହିଁ, ତେବେ ସରକାର ସେହି ସମ୍ପତ୍ତିଗୁଡ଼ିକୁ ଛଡ଼ାଇ ନେବେ।

ତୃତୀୟ – ସାଂସଦ ଇମ୍ରାନ ମାସୁଦ କୁହନ୍ତି ଯେ ଧାରା 2A ଏବଂ 3 (vii) e ବିପଦପୂର୍ଣ୍ଣ କାରଣ ଏଥିରେ କୁହାଯାଇଛି ଯେ ଯେଉଁ ସମ୍ପତ୍ତି ବିବାଦିତ ନୁହେଁ ଏବଂ ସରକାରୀ ସମ୍ପତ୍ତି ନୁହେଁ ତାହା ୱାକଫ୍ ରହିବ। କିନ୍ତୁ ଉତ୍ତର ପ୍ରଦେଶ ସରକାର ୱାକଫ ନାମରେ ପଞ୍ଜିକୃତ ୧୪,୫୦୦ ହେକ୍ଟର ଜମି ମଧ୍ୟରୁ ୧୧,୫୦୦ ହେକ୍ଟରକୁ ସରକାରୀ ସମ୍ପତ୍ତି ଭାବରେ ଘୋଷଣା କରିଛନ୍ତି। ନୂତନ ଆଇନ ଅନୁଯାୟୀ, ଏହାକୁ ଏବେ ସରକାରୀ ସମ୍ପତ୍ତି ଭାବରେ ପଞ୍ଜୀକୃତ କରାଯିବ। ଇମ୍ରାନ ମାସୁଦ ଏହା ଉପରେ ଆପତ୍ତି ପ୍ରକାଶ କରିଛନ୍ତି।

ଚତୁର୍ଥ – ଡିଏମଙ୍କ କ୍ଷମତା ଉପରେ ମଧ୍ୟ ବିବାଦ ଅଛି। ନୂତନ ସଂଶୋଧନ ପରେ, ସରକାର ଏବଂ ୱାକଫ ବୋର୍ଡ ଉଭୟଙ୍କ ଦାବି ଥିବା ଏପରି ସମ୍ପତ୍ତି କିମ୍ବା ଜମି ଉପରେ ନିଷ୍ପତ୍ତି ଡିଏମଙ୍କ ବିବେଚନା ଉପରେ ନିର୍ଭର କରିବ। ଯଦି ଡିଏମ୍ ସେହି ସମ୍ପତ୍ତିକୁ ସରକାରୀ ସମ୍ପତ୍ତି ଭାବରେ ଗ୍ରହଣ କରନ୍ତି, ତେବେ ଏହା ସବୁଦିନ ପାଇଁ ସରକାରୀ ସମ୍ପତ୍ତି ହୋଇଯିବ। ଏହା ବ୍ୟତୀତ, ୱାକଫ ବୋର୍ଡର ସର୍ଭେ କରିବାର ଅଧିକାର ମଧ୍ୟ ଏବେ ଶେଷ ହୋଇଯିବ। ବୋର୍ଡ ସର୍ଭେ କରି ନୂତନ ସମ୍ପତ୍ତି ଦାବି କରିପାରିବ ନାହିଁ।

ଯେଉଁ ବ୍ୟବସ୍ଥାଗୁଡ଼ିକ ଉପରେ କମ୍ ବିବାଦ ଅଛି –

ପ୍ରଥମ – କିଛି ଲୋକଙ୍କର ସିଆ ଏବଂ ସୁନ୍ନି ସମ୍ପ୍ରଦାୟ ବ୍ୟତୀତ ବୋହରା ଏବଂ ଆଗାଖାନି ସମ୍ପ୍ରଦାୟ ପାଇଁ ପୃଥକ ବୋର୍ଡ ଗଠନ ଉପରେ ଆପତ୍ତି ଅଛି।

ଦ୍ୱିତୀୟ – ବିବାଦ କ୍ଷେତ୍ରରେ, ୱାକଫ ବୋର୍ଡ ଟ୍ରିବ୍ୟୁନାଲର ନିଷ୍ପତ୍ତିକୁ ଏପର୍ଯ୍ୟନ୍ତ ଚୂଡ଼ାନ୍ତ ବୋଲି ବିବେଚନା କରାଯାଉଥିଲା। କିନ୍ତୁ ଏବେ ଏହାର ଆଦେଶ ବିରୋଧରେ ୯୦ ଦିନ ମଧ୍ୟରେ ହାଇକୋର୍ଟରେ ମଧ୍ୟ ଆବେଦନ କରାଯାଇପାରିବ। ଏହା ଉପରେ ହାଇକୋର୍ଟ ତାଙ୍କର ନିଷ୍ପତ୍ତି ନେଇପାରିବେ।

ଜୈବିକ ଫସଲ ଓ ଫସଲରେ କୀଟନାଶକ ବ୍ୟବହାର ନେଇ ଘମାଘୋଟ ବିତର୍କ

ନନ୍ଦିଘୋଷ ବ୍ୟୁରୋ: ଜୈବିକ ଫସଲ ଓ ଫସଲରେ କୀଟନାଶକ ବ୍ୟବହାର ନେଇ ପ୍ରଶ୍ନକାଳରେ ଘମାଘୋଟ ବିତର୍କ ହୋଇଛି । ଫସଲରେ ଅଧିକ କୀଟନାଶକ ବ୍ୟବହାର ବ୍ୟବହାର କରାଯାଉଛି, ଜମିର ଗୁଣବତ୍ତା ନଷ୍ଟ ହେଉଛି ଏବଂ କ୍ୟାନ୍ସର ଭଳି ବ୍ୟାଧି ବ୍ୟାପୁଛି । ଅର୍ଗାନିକ ବା ଜୈବିକ ଚାଷ ପାଇଁ କଣ ବ୍ୟବସ୍ଥା କରାଯାଉଛି ବୋଲି ପ୍ରଶ୍ନ କରିଥିଲେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ଚାଷୀ ଅଧିକ ପରିମାଣରେ କୀଟନାଶକ ଏବଂ ରାସାୟନିକ ସାରର ବ୍ୟବହାର କାରଣରୁ ବଲାଙ୍ଗୀର ଏବଂ ଅବିଭକ୍ତ ସମ୍ବଲପୁର ଜିଲ୍ଲାରେ କର୍କଟ ରୋଗୀଙ୍କ ସଂଖ୍ୟା ବଢୁଛି ବୋଲି ଗୃହରେ ଉତ୍ତର ରଖିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ଆଉ ଏଥିପାଇଁ ବଳଭଦ୍ର ଜୈବିକ ମିଶନକୁ କାର୍ଯ୍ୟକାରୀ କରିବା ପାଇଁ ସରକାର ଗୁରୁତ୍ୱ ଦେଉଛନ୍ତି ।

ଜୈବିକ ଚାଷ କ୍ଷେତ୍ରଫଳ ବୃଦ୍ଧି ପାଇଁ ସରକାର ପ୍ରତିଶୃତିବଦ୍ଧ ବୋଲି ମନ୍ତ୍ରୀ କହିଛନ୍ତି । ଅନ୍ୟପଟେ ବିରୋଧୀ ଦଳ ଉପମୁଖ୍ୟ ସଚେତକ ପ୍ରତାପ ଦେବ ଆପତ୍ତି ଉଠାଇ କହିଛନ୍ତି, ବାହାରୁ ବିହନ ଆସୁଛି । ହେଲେ ଏହା ଓଡ଼ିଶାର ଜଳବାୟୁ ପାଇଁ ଠିକ ନୁହେଁ । ଯେଉଁଥି ପାଇଁ ମୁଗ ଜାତୀୟ ଚାଷ ନଷ୍ଟ ହେଉଛି । ଏହାଦ୍ୱାରା କେବଳ ସରକାର କା ମାଲ ଦରିୟା ମେ ଡାଲ ପରି ହେଉଛି । ଏହାର ଉତ୍ତରରେ ଉପମୁଖ୍ୟମନ୍ତ୍ରୀଙ୍କ ପକ୍ଷରୁ ଆଇନ ମନ୍ତ୍ରୀ କହିଥିଲେ ଯେ ସବୁ ବ୍ୟବସ୍ଥିତ ହେବା ଯାଏଁ ଅପେକ୍ଷା କରିବାକୁ ପଡିବ । ଦେଶୀ ପ୍ରଣାଳୀ କାର୍ଯ୍ୟକାରୀ ହେବ । ଅଧିକ ଉତ୍ପାଦନକାରୀ ରାଜ୍ୟ ପଞ୍ଜାବର ମୃତ୍ତିକାର ମାନ ହ୍ରାସ ପାଉଛି । ଭବିଷ୍ୟତରେ କଣ ହେବ କେହି କହି ପାରିବେ ନାହିଁ । ହେଲେ ଓଡ଼ିଶାରେ ମାଟି ଉର୍ବର ରହିଛି ବୋଲି ଭଲ ଚାଷର ସମ୍ଭାବନା ଥିବା ନେଇ ଗୃହକୁ ଅବଗତ କରିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ।

ସେପଟେ ପଞ୍ଜାବ ହରିୟାଣାରେ ପାଞ୍ଚ ଏକର ଜମି ଥିବା ଚାଷୀ କୋଟିପତି ହେଉଛନ୍ତି । ଡାଲି ଜାତୀୟ ଚାଷରେ କମ ସାର ଏବଂ କୀଟନାଶକ ବ୍ୟବହାର କରି ଅଧିକ ଫସଲ ଅମଳ କରାଯାଇପାରିବ ବୋଲି ସରକାର କଣ ପଦକ୍ଷେପ ନେଉଛନ୍ତି ବୋଲି ପ୍ରଶ୍ନ କରିଥିଲେ ବିଜେପି ବିଧାୟକ ସନାତନ ବିଜୁଳି । ପାଣିର ଅଭାବ ପାଇଁ ଖରିଫ ଫସଲ ପରେ ଚାଷ ଜମି ଗୁଡିକ ପଡିଆ ରହୁଛି । ପାଣି ବ୍ୟବସ୍ଥା ଥିବା ଜମି ଗୁଡିକରେ ଡାଲି ଜାତୀୟ ଫସଲ କରାଯାଉଛି । ଜଳ ସମ୍ପଦ ବିଭାଗ ସହିତ ମିଶି ବିଭିନ୍ନ ପଦ୍ଧତିରେ ଜଳସେଚନ ପାଇଁ ପ୍ରକଳ୍ପ କାର୍ଯ୍ୟକାରୀ କରାଯାଉଛି । କୋଲଡ ଷ୍ଟୋରେଜ ପଲିସି ନୂଆ ରାସ୍ତା ଦେଖାଇବ । ହରିୟାଣା ଏବଂ ପଞ୍ଜାବ ତୁଳନାରେ ଆମ ଜମି ଉର୍ବର ଥିବାରୁ ଭବିଷ୍ୟତରେ ପନିପରିବା ଏବଂ ଡାଲି ଜାତୀୟ ଚାଷରେ ବଳକା ରାଜ୍ୟ ହେବାକୁ ଯାଉଛି ଉତ୍ତର ରଖିଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।

ଲୋକସଭା ନିର୍ବାଚନରେ ଭୋଟ ଗଡ଼ବଡ଼ି ପ୍ରସଙ୍ଗ ; ନିର୍ବାଚନ କମିଶନଙ୍କ ଉପରେ ବର୍ଷିଲା ବିଜେଡି

ଭୁବନେଶ୍ବର: ଲୋକସଭା ନିର୍ବାଚନରେ ଭୋଟ ଗଡ଼ବଡ଼ି ପ୍ରସଙ୍ଗ । ବାରମ୍ବାର ଫେରାଦ ପରେ ଉତ୍ତର ନମିଳିବାରୁ ପୁଣି ନିର୍ବାଚନ କମିଶନଙ୍କୁ ଘେରିଛି ବିଜୁ ଜନତା ଦଳ । ଗତ ସାଧାରଣ ନିର୍ବାଚନରେ ସାରା ଦେଶରେ ଭୋଟରେ ଘୋଟାଲା ହୋଇଥିବା ଅଭିଯୋଗ ହୋଇଆସୁଛି । ୯ ମାସ ପରେ ବି ନିର୍ବାଚନ କମିଶନ ଏନେଇ କୌଣସି ଠୋସ ଉତ୍ତର ରଖୁନାହାଁନ୍ତି । ଦିଲ୍ଲୀରେ ଏ ନେଇ ନିର୍ବାଚନ କମିଶନଙ୍କୁ ଭେଟିଥିଲେ ବିଜେଡି ସାଂସଦ । ରାଜ୍ୟର ସବୁ ଲୋକସଭା ନିର୍ବାଚନ ମଣ୍ଡଳିରେ ଥିଲା ଭୋଟ ତାରତମ୍ୟ । ମୁଖ୍ୟମନ୍ତ୍ରୀ ମୋହନ ମାଝୀ ଲଢୁଥିବା ନିର୍ବାଚନ ମଣ୍ଡଳୀରେ ତାରତମ୍ୟ ଥିଲା ୩୦ ପ୍ରତିଶତ । ତେଣୁ ନିର୍ବାଚନ ପ୍ରକ୍ରିୟାରେ ଭୁଲ ଭଟକା ଥିବା ଆଶଙ୍କା କରାଯାଇଛି ।

ନିର୍ବାଚନ କମିଶନଙ୍କ ଉପରେ ବିଶ୍ବାସନୀୟତା ରକ୍ଷା ଲାଗି ହେଉ ଉଦ୍ୟମ ହେଉ ବୋଲି ଆଜି ସାମ୍ବାଦିକ ସମ୍ମିଳନୀ କରି କହିଛି ବିଜେଡି। ମହାରାଷ୍ଟ୍ର, ହରିୟାଣା ଆଦି ରାଜ୍ୟରେ ମଧ୍ୟ ଗଡ଼ବଡ଼ି ଅଭିଯୋଗ ଆସିଥିଲା । ଦିଲ୍ଲୀରୁ ବି ଆସିଥିଲା ଗୁରୁତର ଅଭିଯୋଗ । ଏଥିଲାଗି ୧୧ ଫେବୃଆରୀରେ ପୁଣି ବିଜେଡି ଟିମ ଇସିଙ୍କୁ ଭେଟିଥିଲା । ନିର୍ବାଚନ ପ୍ରକ୍ରିୟାର ପୂରା ଅଡିଟ ହେବା ଦରକାର ବୋଲି ଦାବି ଜଣାଇଥିଲା । ମନିଟରିଂ ପ୍ରକ୍ରିୟାରେ ସିଟିଜେନ ଗୃପକୁ ସାମିଲ କରାଯିବାକୁ ଦାବି କରିଥିଲା । ଭିଭିପାଟଗୁଡ଼ିକ ଇଭିଏମ ସହ ମେଳ ଖାଇବା ଦରକାର । କୁଚିଣ୍ଡାରେ ଏକ ବୁଥରେ ୧୦୩୧ ଭୋଟ ପଡିଥିଲା । ହେଲେ ନିର୍ବାଚନ କମିଶନଙ୍କ ତଥ୍ୟ କହୁଛି ସେଠାରେ ଲୋକ ଭୋଟ ଦେଇ ନଥିଲେ ।

ଇଭିଏମର ତ୍ରୁଟି ହେଲେ ଭୋଟ ଗଣତି ହେବା କଥା ନୁହେଁ । ଫର୍ମ-୧୭ ସି ବିଜେଡି ମାଗିବାର ଯଥାର୍ଥତା ରହିଛି । ପ୍ରାର୍ଥୀ ଓ ଭୋଟର ଯେ କୌଣସି ସମୟରେ ୧୭-୭ ସି ଲାଗି ଆବେଦନ କରିପାରିବେ ବୋଲି ବିଜେଡି ପୁଣି ଦୋହରାଇଛି । ଓଡିଶାବାସୀ ଚାହାଁନ୍ତି ନିର୍ବାଚନ ପ୍ରକ୍ରିୟାରେ ସ୍ବଚ୍ଛତା ରକ୍ଷା କରିବା । ଦେଶରେ ଜାତୀୟ ଦଳ ସହ ବହୁ ଆଞ୍ଚଳିକ ଦଳ ନିର୍ବାଚନ ଲଢୁଛନ୍ତି । ତେଣୁ ସ୍ବଚ୍ଛତା ରକ୍ଷା ନିହାତି ଜରୁରୀ ବୋଲି କହିଛି ବିଜେଡି ।

ୱାକଫ ସଂଶୋଧନ ବିଲ୍: କିଏ ସମର୍ଥନ କରୁଛି ଏବଂ କିଏ ବିରୋଧ କରୁଛି ଜାଣନ୍ତୁ ..

ନନ୍ଦିଘୋଷ ବ୍ୟୁରୋ: ଆଜି ଲୋକସଭାରେ ଆଗତ ହେବ ସଂଶୋଧିକ ୱାକଫ ବିଲ୍- ୨୦୨୪ । ଏବଂ ରାଜ୍ୟସଭାରେ ଏହାକୁ ଗୁରୁବାର ଦିନ ଉପସ୍ଥାପିତ କରାଯିବ। ତେବେ ବିଲ ପାରିତ ନେଇ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି ଯେ ଲୋକସଭାର କାର୍ଯ୍ୟ ପରାମର୍ଶଦାତା କମିଟି (ବିଏସି), ଯେଉଁଥିରେ ସମସ୍ତ ପ୍ରମୁଖ ଦଳର ନେତାମାନେ ସାମିଲ ଅଛନ୍ତି, ଏବଂ ବାଚସ୍ପତି ଓମ୍ ବିର୍ଲାଙ୍କ ଅଧ୍ୟକ୍ଷତାରେ ଗଠିତ, ଏକ ଆଠ ଘଣ୍ଟାର ବିତର୍କ ପାଇଁ ରାଜି ହୋଇଛନ୍ତି, ଯାହାକୁ ଗୃହର ମତ ନେବା ପରେ ବଢ଼ାଯାଇପାରିବ।

ଏହି ବିଲ୍ ପାସ୍ କରିବାରେ ବିଜେପିକୁ ଅସୁବିଧାର ସମ୍ମୁଖୀନ ହେବାକୁ ପଡ଼ିବ ବୋଲି ଆଶା ବହୁତ କମ୍ । ଏହି ପ୍ରସଙ୍ଗରେ ତାଙ୍କର ସହଯୋଗୀମାନେ ଏକାଠି ଅଛନ୍ତି । ବିଜେପି ନେତୃତ୍ୱରେ ଏନଡିଏ ଲୋକସଭାରେ ଆରାମଦାୟକ ବହୁମତ ହାସଲ କରିଛି, ଯେଉଁଠାରେ ଆଇନ ପ୍ରଣୟନ ପାଇଁ ୨୭୨ ଭୋଟ ଆବଶ୍ୟକ। ଏନଡିଏକୁ ସମର୍ଥନ କରୁଥିବା ୨୯୩ ଜଣ ସାଂସଦଙ୍କ ମଧ୍ୟରୁ ବିଜେପି ପାଖରେ ୨୪୦ ଜଣ ସଦସ୍ୟ ଅଛନ୍ତି, ଚନ୍ଦ୍ରବାବୁ ନାଇଡୁଙ୍କ ନେତୃତ୍ୱାଧୀନ ତେଲୁଗୁ ଦେଶମ ପାର୍ଟି (ଟିଡିପି)ର ୧୬ ଜଣ, ନୀତିଶ କୁମାରଙ୍କ ଜନତା ଦଳ (ୟୁନାଇଟେଡ୍)ର ୧୨ ଜଣ, ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନାର ୭ ଜଣ, ଚିରାଗ ପାସୱାନଙ୍କ ଲୋକ ଜନଶକ୍ତି ପାର୍ଟି (ରାମ ବିଳାସ)ର ୫ ଜଣ ଏବଂ ଜୟନ୍ତ ଚୌଧୁରୀଙ୍କ ନେତୃତ୍ୱାଧୀନ ରାଷ୍ଟ୍ରୀୟ ଲୋକଦଳ (ଆରଏଲଡି), ଏଚ୍ଡି କୁମାରସ୍ୱାମୀଙ୍କ ଜନତା ଦଳ-ସେକୁଲାର (ଜେଡିଏସ୍) ଏବଂ ପବନ କଲ୍ୟାଣଙ୍କ ଜନସେନା ପାର୍ଟି (ଜେଏସ୍ପି)ର ୨ ଜଣ ସଦସ୍ୟ ଅଛନ୍ତି। ସରକାରଙ୍କୁ ଅପନା ଦଳ (ସୋନେଲାଲ), ଆସାମ ଗଣ ପରିଷଦ (ଏଜିପି), ଅଲ୍ ଝାଡ଼ଖଣ୍ଡ ଛାତ୍ର ସଂଘ (ଏଜେଏସୟୁ), ହିନ୍ଦୁସ୍ତାନୀ ଆୱାମ ମୋର୍ଚ୍ଚା (ଏଏଏମ), ନ୍ୟାସନାଲିଷ୍ଟ କଂଗ୍ରେସ ପାର୍ଟି (ଏନସିପି), ସିକିମ କ୍ରାନ୍ତିକାରୀ ମୋର୍ଚ୍ଚା (ଏସକେଏମ) ଏବଂ ୟୁନାଇଟେଡ୍ ପିପୁଲ୍ସ ପାର୍ଟି ଲିବରାଲ (ୟୁପିପିଏଲ)ର ପ୍ରତ୍ୟେକ ସଦସ୍ୟ ସମର୍ଥନ କରୁଛନ୍ତି। ଲୋକସଭାର ମୋଟ ସଂଖ୍ୟା ବର୍ତ୍ତମାନ ୫୪୨ ଅଟେ। ମିଳିତ ସଂସଦୀୟ କମିଟି (ଜେପିସି) ସେମାନଙ୍କ ଚିନ୍ତାକୁ ସମାଧାନ କରିଥିବାରୁ ବିଜେପି ଏହାର ସହଯୋଗୀମାନଙ୍କଠାରୁ ପୂର୍ଣ୍ଣ ସମର୍ଥନ ପାଇବାରେ ଆତ୍ମବିଶ୍ୱାସୀ।  

ଅନ୍ୟପକ୍ଷରେ ଇଣ୍ଡି ମେଣ୍ଟ ବିଲ୍‌କୁ ବିରୋଧ କରିବା ପାଇଁ ସେମାନଙ୍କର ରଣନୀତି ଉପରେ ଆଲୋଚନା କରିଛନ୍ତି । ସଂସଦରେ ଉପସ୍ଥିତ ରହିବାକୁ ସୁନିଶ୍ଚିତ କରିବା ପାଇଁ ବିଜେପି ଏବଂ କଂଗ୍ରେସ ଉଭୟ ସେମାନଙ୍କ ସାଂସଦମାନଙ୍କୁ ହ୍ୱିପ୍ ଜାରି କରିଛନ୍ତି ।

ଜେଡିୟୁ ଏବଂ ଟିଡିପି ଦଳର ନେତାମାନେ ସ୍ପଷ୍ଟ ଭାବରେ କହିଛନ୍ତି ଯେ ସେମାନେ ବିଲ୍ ପାସ କରିବାରେ ବାଧା ସୃଷ୍ଟି କରିବେ ନାହିଁ, ଏବଂ ସେମାନେ ଏହା ମଧ୍ୟ କହିଛନ୍ତି ଯେ ବିରୋଧୀଙ୍କ ଅଭିଯୋଗ ଯେ ଏହି ବିଲ୍ ସଂଖ୍ୟାଲଘୁଙ୍କ ଅଧିକାରକୁ ଛଡ଼ାଇ ନେବ, ତାହା ଭୁଲ। ବରିଷ୍ଠ ଜେଡିୟୁ ନେତା କହିଛନ୍ତି ଯେ ଆମ ଦଳ ପୂର୍ବରୁ ମୁସଲିମ ପର୍ସନାଲ ଲ ବୋର୍ଡ, ୱାକଫ ବୋର୍ଡ ଏବଂ ଅନ୍ୟାନ୍ୟ ବିଭିନ୍ନ ଧାର୍ମିକ ନେତାଙ୍କ ପ୍ରତିନିଧିମାନଙ୍କୁ ଭେଟିସାରିଛି ଏବଂ ସେମାନଙ୍କୁ ଆଶ୍ୱାସନା ଦେଇଛି ଯେ ସେମାନଙ୍କର ଚିନ୍ତା ସରକାରଙ୍କୁ ଜଣାଇ ସମାଧାନ କରାଯିବ। ଟିଡିପିର ଜଣେ ବରିଷ୍ଠ ବିଧାୟକ ମଧ୍ୟ ସମର୍ଥନକୁ ନିଶ୍ଚିତ କରି କହିଛନ୍ତି ଯେ ଦଳ ଗରିବ ମୁସଲମାନମାନଙ୍କ ଉପରେ ଏହାର ସମର୍ଥନ କେନ୍ଦ୍ରିତ କରିବାକୁ ଚେଷ୍ଟା କରିବ। ଦଳର ନେତୃତ୍ୱ ନେଉଥିବା କେନ୍ଦ୍ରମନ୍ତ୍ରୀ ଚିରାଗ ପାସୱାନ ମଧ୍ୟ ଲୋକସଭାରେ ତାଙ୍କର ସମସ୍ତ ସାଂସଦଙ୍କୁ ଗୃହରେ ଉପସ୍ଥିତ ରହିବା ପାଇଁ ତିନି ଧାଡିର ହ୍ୱିପ୍ ଜାରି କରିଛନ୍ତି।

ଚନ୍ଦ୍ରବାବୁ ନାଇଡୁଙ୍କ ତେଲୁଗୁ ଦେଶମ ପାର୍ଟି ମଧ୍ୟ ଏହି ବିଲ୍‌କୁ ସମର୍ଥନ କରିବ ବୋଲି କହିଛି। ଟିଡିପି ମୁଖପାତ୍ର ପ୍ରେମ କୁମାର ଜୈନ କହିଛନ୍ତି, ଆମ ଦଳ ଏହାକୁ ସମର୍ଥନ କରିବ। ଚନ୍ଦ୍ରବାବୁ ନାଇଡୁ ପୂର୍ବରୁ କହିସାରିଛନ୍ତି ଯେ ଆମେ ମୁସଲିମ ସମ୍ପ୍ରଦାୟର ସ୍ୱାର୍ଥ ପାଇଁ କାମ କରିବୁ । ଶିବସେନା ସମସ୍ତ ଲୋକସଭା ସାଂସଦଙ୍କୁ ଏପ୍ରିଲ ୨ ଏବଂ ୩ ତାରିଖରେ ଗୃହରେ ଉପସ୍ଥିତ ରହିବା ଏବଂ ସରକାରଙ୍କ ମତକୁ ସମର୍ଥନ କରିବାକୁ ତିନି ଧାଡ଼ିର ହ୍ୱିପ୍ ଜାରି କରିଛି ।

ଏହି ବିଲ୍ ବିରୋଧରେ କିଏ ?

ବିରୋଧୀ ମେଣ୍ଟ ସଂସଦରେ ବିଲ୍‌କୁ ବିରୋଧ କରିବାକୁ ପ୍ରସ୍ତୁତ ହୋଇଛନ୍ତି । ମଙ୍ଗଳବାର ଦିନ ବିରୋଧୀ ଦଳଗୁଡ଼ିକ ସଂସଦ ଭବନରେ ଏକ ବୈଠକ କରି ସେମାନଙ୍କର ରଣନୀତି ପ୍ରସ୍ତୁତ କରିଛନ୍ତି । ଏହି ବୈଠକରେ କଂଗ୍ରେସ ନେତା ରାହୁଲ ଗାନ୍ଧୀ, ମଲ୍ଲିକାର୍ଜୁନ ଖଡଗେ ଏବଂ କେସି ଭେନୁଗୋପାଲ, ସମାଜବାଦୀ ପାର୍ଟି ନେତା ରାମଗୋପାଲ ଯାଦବ, ଏନସିପି ନେତା ସୁପ୍ରିୟା ସୁଲେ, ତ୍ରିନାଥ କଂଗ୍ରେସ ଦଳର କଲ୍ୟାଣ ବାନାର୍ଜୀ ଏବଂ ଆମ୍ ଆଦମୀ ଦଳର ସଞ୍ଜୟ ସିଂ ଯୋଗ ଦେଇଥିଲେ।

ଏହି ସମୟରେ ଡିଏମକେର ଟିଆର ବାଲୁ, ତିରୁଚି ଶିବ ଏବଂ କାନିମୋହି, ଆରଜେଡିର ମନୋଜ କୁମାର, ସିପିଆଇ-ଏମ ଜନ୍ ବ୍ରିଟାସ୍, ସିପିଆଇର ସାନ୍ତୋଷ କୁମାର ପି, ଆରଏସପିର ଏନ.କେ ପ୍ରେମଚନ୍ଦ୍ରନ୍ ଏବଂ ଭାଇକୋ ମଧ୍ୟ ଉପସ୍ଥିତ ଥିଲେ। ଖଡଗେ କହିଛନ୍ତି ଯେ, ସମସ୍ତ ବିରୋଧୀ ଦଳ ଏକଜୁଟ୍ ଅଛନ୍ତି ଏବଂ ୱାକଫ ସଂଶୋଧନ ବିଲ୍ ଉପରେ ମୋଦି ସରକାରଙ୍କ ଅସାମ୍ବିଧାନିକ ଏବଂ ବିଭାଜନକାରୀ ଏଜେଣ୍ଡାକୁ ପରାସ୍ତ କରିବା ପାଇଁ ସଂସଦରେ ଏକାଠି କାମ କରିବେ। କଂଗ୍ରେସ ନେତା ଭେନୁଗୋପାଳ କହିଛନ୍ତି ଯେ ଦେଶର ସାମ୍ବିଧାନିକ ମୂଲ୍ୟବୋଧର ସୁରକ୍ଷା ପାଇଁ ଏହି ବିଲ୍‌କୁ ବିରୋଧ କରାଯିବା ଉଚିତ। ସେ କହିଛନ୍ତି, ଏହା ସମ୍ବିଧାନର ସ୍ପଷ୍ଟ ଉଲ୍ଲଂଘନ। ସମ୍ବିଧାନରେ ବିଶ୍ୱାସ କରୁଥିବା ଲୋକମାନେ ନିଶ୍ଚିତ ଭାବରେ ଏହାର ବିରୋଧ କରିବେ । 

ବିଲ୍ ବିରୋଧରେ ଇଣ୍ଡିଆ ବ୍ଲକ୍‌ର ଅଭିଯାନର ନେତୃତ୍ୱ ନେଉଥିବା କଂଗ୍ରେସ ଲୋକସଭାରେ ୯୯ ଆସନ ପାଇଛି, ଏହା ପରେ ସମାଜବାଦୀ ପାର୍ଟି (ଏସ୍ ପି) – ୩୭, ତୃଣମୂଳ କଂଗ୍ରେସ (ଟିଏମସି) – ୨୮, ଦ୍ରାବିଡ଼ ମୁନେତ୍ର କାଝଗମ (ଡିଏମକେ) – ୨୨, ଶିବସେନା (ୟୁବିଟି) – ୯, ନ୍ୟାସନାଲିଷ୍ଟ କଂଗ୍ରେସ ପାର୍ଟି – ଶରଦଚନ୍ଦ୍ର ପାୱାର (ଏନସିପି-ଏସପି) –  ୮, କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ-ମାର୍କ୍ସବାଦୀ (ସିପିଆଇଏମ୍) – ୪, ରାଷ୍ଟ୍ରୀୟ ଜନତା ଦଳ (ଆରଜେଡି) – ୪, ଆମ ଆଦମୀ ପାର୍ଟି (ଆପ) – ୩, ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) – ୩, ଇଣ୍ଡିଆନ୍ ୟୁନିଅନ୍ ମୁସଲିମ୍ ଲିଗ୍ (ଆଇୟୁଏମଏଲ) – ୩, ଜମ୍ମୁ ଏବଂ କାଶ୍ମୀର ନ୍ୟାସନାଲ୍ କନଫରେନ୍ସ (ଜେକେଏନସି) – ୨, କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ (ସିପିଆଇ) – ୨, କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ (ମାର୍କ୍ସବାଦୀ-ଲେନିନିଷ୍ଟ) ଲିବରେସନ୍ – ୨, ବିଦୁଥଲାଇ ଚିରୁଥୈଗଲ୍ କାଚ୍ଚି (ଭିସିକେ) – ୨ ସଦସ୍ୟ ସମର୍ଥନ କରିଛନ୍ତି। ବିରୋଧୀ ମେଣ୍ଟକୁ କେରଳ କଂଗ୍ରେସ (କେଇସି), ମାରୁମାଲାର୍ଚିର ପ୍ରତ୍ୟେକ ସଦସ୍ୟ ମଧ୍ୟ ସମର୍ଥନ କରିଛନ୍ତି। ଦ୍ରାବିଡା ମୁନ୍ନେଟ୍ରା କାଜଗାମ (ଏମ୍ ଡି ଏମ୍ କେ), ରାଷ୍ଟ୍ରିୟ ଲୋକନନ୍ତ ପାର୍ଟି (ଆରଏଲପି), ଭାରତ ଆଦିବାସୀ ପାର୍ଟି (ବିପି) ଏବଂ ବୈପ୍ଲବିକ ସମାଜବାଦୀ ପାର୍ଟି (ଆରଏସପି)। ଏହି ବ୍ଲକକୁ ପପୁ ଯାଦବ, ମହମ୍ମଦ ହନିଫା ଏବଂ ବିଶାଲ ପାଟିଲଙ୍କ ସମେତ ତିନିଜଣ ସ୍ୱାଧୀନ ବ୍ୟକ୍ତି ସମର୍ଥନ କରିଛନ୍ତି।

ବିଲ୍ ପାସ ପାଇଁ କେତେ ଭୋଟ ଆବଶ୍ୟକ ?

ଲୋକସଭା: ଲୋକସଭାରେ ବିଲ୍ ପାସ୍ କରିବା ପାଇଁ ବିଜେପିକୁ ୨୭୨ ଭୋଟ୍ ଆବଶ୍ୟକ। ୫୪୨ ଜଣ ସାଂସଦଙ୍କ ମଧ୍ୟରୁ ୨୪୦ ଜଣ ବିଜେପିର, ୧୨ ଜଣ ଜେଡି(ୟୁ)ର, ୧୬ ଜଣ ଟିଡିପିର, ୫ ଜଣ ଏଲଜେପି(ଆରଭି)ର, ୨ ଜଣ ରାଷ୍ଟ୍ରୀୟ ଲୋକଦଳ (ଆରଏଲଡି)ର ଏବଂ ୭ ଜଣ ଶିବସେନାର। ଯଦି ସମସ୍ତ ଏନଡିଏ ଦଳ ବିଜେପିକୁ ସମର୍ଥନ କରନ୍ତି, ତେବେ ବିଲ୍ ସହଜରେ ପାରିତ ହୋଇଯିବ।

ରାଜ୍ୟସଭା: ରାଜ୍ୟସଭାରେ ଏନଡିଏର ୧୨୫ ସାଂସଦ ଅଛନ୍ତି। ଏଥିମଧ୍ୟରୁ ବିଜେପିର ୯୮ ଜଣ ସାଂସଦ, ଜେଡି(ୟୁ)ର ଚାରି ଜଣ, ଟିଡିପିର ଦୁଇ ଜଣ, ନ୍ୟାସନାଲିଷ୍ଟ କଂଗ୍ରେସ ପାର୍ଟିର ତିନି ଜଣ, ଶିବସେନାର ଜଣେ ଏବଂ ଆରଏଲଡିର ଜଣେ ସାଂସଦ ଅଛନ୍ତି। ୨୪୫ ସଦସ୍ୟ ବିଶିଷ୍ଟ ଗୃହରେ ଏହି ବିଲ୍ ପାସ୍ କରିବାକୁ ୧୧୯ ସାଂସଦଙ୍କ ସମର୍ଥନ ଆବଶ୍ୟକ। ଏନଡିଏ ଆସାମ ଗଣ ପରିଷଦ ଏବଂ ତାମିଲ ମାନିଲା କଂଗ୍ରେସ ଭଳି ଦଳ ଏବଂ ଛଅ ଜଣ ମନୋନୀତ ସଦସ୍ୟଙ୍କ ସମର୍ଥନ ପାଇବା ନେଇ ଆତ୍ମବିଶ୍ୱାସୀ।

ଆଜିଠାରୁ ବିମସଟେକ ଶିଖର ସମ୍ମିଳନୀ ; ଯୋଗ ଦେବେ ଭାରତ ସମେତ ୭ ସଦସ୍ୟ ରାଷ୍ଟ୍ରମୁଖ୍ୟ

ନନ୍ଦିଘୋଷ ବ୍ୟୁରୋ: ଆଜିଠାରୁ ଆରମ୍ଭ ହେଉଛି ବିମସଟେକ ଶିଖର ସମ୍ମିଳନୀ । ଷଷ୍ଠ ବିମ୍‌ସ୍‌ଟେକ୍ ଶିଖର ସମ୍ମିଳନୀ ଥାଇଲାଣ୍ଡ ରାଜଧାନୀ ବ୍ୟାଙ୍କକରେ ଅନୁଷ୍ଠିତ ହେଉଛି । ଏହି ସମ୍ମିଳନୀ ତିନି ଦିନ ଧରି ଆସନ୍ତା ୪ ତାରିଖ ପର୍ଯ୍ୟନ୍ତ ଚାଲିବ । ଏଥିରେ ଭାରତ, ବାଂଲାଦେଶ, ଭୁଟାନ, ନେପାଳ, ଶ୍ରୀଲଙ୍କା, ମିଆଁମାର ଓ ଥାଇଲାଣ୍ଡର ରାଷ୍ଟ୍ରମୁଖ୍ୟ ଯୋଗଦେବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ସମ୍ମିଳନୀରେ ଅଂଶଗ୍ରହଣ କରିବେ। ଆଜି ଅଂଶଗ୍ରହଣ କରୁଥିବା ରାଷ୍ଟ୍ରସମୂହର ବରିଷ୍ଠ ଅଧିକାରୀମାନଙ୍କ ବୈଠକ ହେବ। ଆସିନ୍ତାକାଲି ଏପ୍ରିଲ୍ ୩ ତାରିଖରେ ବୈଦେଶିକ ମନ୍ତ୍ରୀମାନଙ୍କ ବୈଠକ ଏବଂ ଏପ୍ରିଲ୍ ୪ ତାରିଖରେ ମୁଖ୍ୟ ଶିଖର ସମ୍ମିଳନୀ ଅନୁଷ୍ଠିତ ହେବ। ଏହାର ଉଦ୍ଦେଶ୍ୟ ହେଉଛି ବାଣିଜ୍ୟ, ଯୋଗାଯାଗ, ଶକ୍ତି ଓ ଆଞ୍ଚଳିକ ସହଯୋଗକୁ ମଜଭୁତ କରିବା ।

ଥାଇଲାଣ୍ଡ ଏହି ସମ୍ମିଳନୀର ଆୟୋଜନ କରୁଛି । ବିମ୍‌ସ୍‌ଟେକ୍ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସହଯୋଗିତାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ ବୋଲି ଆଶା କରାଯାଉଛି । ବଙ୍ଗୋପସାଗର ଉପକୂଳବର୍ତ୍ତୀ ରାଷ୍ଟ୍ରଗୁଡ଼ିକର ବହୁମୁଖୀ ବୈଷୟିକ ଓ ଅର୍ଥନୈତିକ ସହଯୋଗିତା ସଂସ୍ଥା ହେଉଛି ବିମସଟେକ । ୧୯୯୭ ଜୁନ୍ ୬ରେ ଗଠିତ ହୋଇଥିଲା ଏହି ସଂଗଠନ । ଏହାର ମୁଖ୍ୟ ଉଦ୍ଦେଶ୍ୟ ହେଉଛି ବଙ୍ଗୋପସାଗର ଅଞ୍ଚଳର ଦେଶଗୁଡ଼ିକ ମଧ୍ୟରେ ବାଣିଜ୍ୟ, ବିଜ୍ଞାନ, ପରିବହନ, ଶକ୍ତି ଓ ସଂସ୍କୃତି ଆଦି କ୍ଷେତ୍ରରେ ସହଯୋଗିତା ବୃଦ୍ଧି କରିବା । ଏହା ୧୪ଟି ପ୍ରମୁଖ କ୍ଷେତ୍ରରେ କାର୍ଯ୍ୟ କରୁଛି। ଯେପରିକି ବାଣିଜ୍ୟ ଓ ବିନିଯୋଗ, ଜଳବାୟୁ ପରିବର୍ତ୍ତନ, ଆତଙ୍କବାଦ ବିରୋଧୀ ଲଢ଼େଇ, କୃଷି, ସ୍ୱାସ୍ଥ୍ୟ ଓ ପର୍ଯ୍ୟଟନ। ଭାରତ ଏହି ସଂଗଠନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି ।

ଆଜିଠାରୁ +୨ ଖାତାଦେଖା ; CHSE ବୋର୍ଡ ପକ୍ଷରୁ ବ୍ୟାପକ ପ୍ରସ୍ତୁତି

ଭୁବନେଶ୍ବର: ଆଜିଠାରୁ ଆରମ୍ଭ ହେଉଛି ଯୁକ୍ତ ଦୁଇ ଖାତାଦେଖା। ଖାତା ଦେଖିବାକୁ ସିଏଚଏସଇ ବୋର୍ଡ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ଯୁକ୍ତ ଦୁଇ ପରୀକ୍ଷା ଖାତା ଦେଖା ପାଇଁ ବଢ଼ିିଛି ମୂଲ୍ୟାଙ୍କନ କେନ୍ଦ୍ରସଂଖ୍ୟା । ଯେଉଁ ଜିଲ୍ଲାରେ କେନ୍ଦ୍ର ନଥିଲା ସେଠି ନୂଆକରି ଖୋଲାଯାଇଛି କେନ୍ଦ୍ର । ଉଭୟ ଅନଲାଇନ ଓ ଅଫଲାଇନ ପରୀକ୍ଷା ଖାତା ଦେଖା କେନ୍ଦ୍ର ସଂଖ୍ୟା ବଢାଇଛି ଉଚ୍ଚ ମାଧ୍ୟମିକ ଶିକ୍ଷା ପରିଷଦ । ଅତ୍ୟଧିକ ଖରା ଯୋଗୁ ବହୁ ଶିକ୍ଷକ ଶିକ୍ଷୟିତ୍ରୀ ଖାତା ଦେଖିବାକୁ ଆସୁ ନ ଥିବାରୁ ଖାତା ଦେଖା କେନ୍ଦ୍ର ବଢାଯାଇଛି ।

ପ୍ରାଥମିକ ପର୍ଯ୍ୟାୟରେ ୮ ହଜାର ଶିକ୍ଷକ ଶିକ୍ଷୟିତ୍ରୀଙ୍କୁ ଖାତା ଦେଖା ପାଇଁ ନିଯୁକ୍ତ କରାଯାଇଛି । ଏକଜାମିନରଙ୍କ ସୁବିଧା ଦୃଷ୍ଟିରୁ ସେମାନଙ୍କୁ ନିଜ ଜିଲ୍ଲାରେ ହୋଇଥିବା ମୂଲ୍ୟାଙ୍କନ କେନ୍ଦ୍ରରେ ଖାତା ଦେଖିବା ପାଇଁ ନିୟୋଜିତ କରାଯାଇଛି । ୩୫, ୪୦ ଓ ୫୦ ମାର୍କ ଥିବା ବିଷୟ ଗୁଡିକ ପାଇଁ ୩୦ଟି ଖାତା ୫ ଘଣ୍ଟାରେ ଦେଖାଯାଇପାରିବ । ସେହିପରି ୭୦ ଓ ୮୦ ମାର୍କ ଥିବା ବିଷୟ ପାଇଁ ୫ ଘଣ୍ଟାରେ ୨୦ ଟି ଖାତା ଦେଖିପାରିବେ । ମେ ୧୫ ତାରିଖ ସୁଦ୍ଧା ସଠିକ ସମୟରେ ପରୀକ୍ଷାଫଳ ବାହାରିବ ବୋଲି ସୂଚନା ଦେଇଛନ୍ତି ପରୀକ୍ଷା ନିୟନ୍ତ୍ରକ ।

ଅକ୍ଷୟ ତୃତୀୟାରେ କାହିଁକି ବୃଦ୍ଧି ପାଏ ସୁନାର ମୂଲ୍ୟ ? ଜାଣନ୍ତୁ କାରଣ ..

ନନ୍ଦିଘୋଷ ବ୍ୟୁରୋ: ହିନ୍ଦୁ ଧର୍ମରେ ଅକ୍ଷୟ ତୃତୀୟାକୁ ସବୁଠାରୁ ଶୁଭ ଦିନ ଭାବରେ ବିବେଚନା କରାଯାଏ। ଏହି ଦିନ, ଆପଣ କୌଣସି ଶୁଭ ସମୟକୁ ନଦେଖି ଯେକୌଣସି ଶୁଭ କାର୍ଯ୍ୟ କରିପାରିବେ। ହିନ୍ଦୁ ଧର୍ମ ଅନୁସାରେ, ଏହି ଦିନ ସୁନା କିଣିବା ବହୁତ ଶୁଭ ବୋଲି ବିବେଚନା କରାଯାଏ । ଏହି ଦିନ ସୁନା କିଣିବା ଦ୍ୱାରା ଆପଣଙ୍କ ଘରେ ସୁଖ, ସମୃଦ୍ଧି ଏବଂ ଧନ ବଜାୟ ରହିଥାଏ । ଏଥର ଅକ୍ଷୟ ତୃତୀୟା ୩୦ ଏପ୍ରିଲ ପଡୁଛି । କିନ୍ତୁ ଆପଣ ଜାଣନ୍ତି କି ଅକ୍ଷୟ ତୃତୀୟା ଦିନ ସୁନା କାହିଁକି ମହଙ୍ଗା ହୁଏ ?

ଅକ୍ଷୟ ତୃତୀୟାରେ ସୁନା କାହିଁକି କିଣାଯାଏ?

ହିନ୍ଦୁ ସଂସ୍କୃତିରେ ଅକ୍ଷୟ ତୃତୀୟା ଦିନ ସୁନା ଏବଂ ଅଳଙ୍କାର କିଣିବା ବହୁତ ଶୁଭ ବୋଲି ବିବେଚନା କରାଯାଏ। ଏହି ଦିନ କରାଯାଇଥିବା ଯେକୌଣସି ନୂତନ ନିବେଶ କିମ୍ବା କ୍ରୟ ସକାରାତ୍ମକ ଫଳାଫଳ ଦେବାର ସମ୍ଭାବନା ଦେଇଥାଏ । ଅକ୍ଷୟ ତୃତୀୟାରେ ସୁନାର ଚାହିଦା ଏବଂ ମୂଲ୍ୟ ଉଭୟ ବୃଦ୍ଧି ପାଏ। ଗତ ବର୍ଷ ୨୦୨୪ ମସିହାରେ, ଅକ୍ଷୟ ତୃତୀୟାରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ପ୍ରାୟ ୭୧,୫୦୦ ଟଙ୍କା ଥିଲା।

ଉତ୍ତମ ନିବେଶ ବିକଳ୍ପ

ସୁନାକୁ ଏକ ସୁରକ୍ଷିତ ନିବେଶ ଭାବରେ ବିବେଚନା କରାଯାଏ, ଏବଂ ଲୋକମାନେ ଏହି ଦିନ ସୁନା କିଣି ସେମାନଙ୍କର ନିବେଶ ଆରମ୍ଭ କରନ୍ତି। ସୁନାରେ ନିବେଶ ଅନେକ ଲାଭ ସହିତ ମୁଦ୍ରାସ୍ଫୀତିରୁ ସୁରକ୍ଷା ଦିଏ । ଆର୍ଥିକ ଅନିଶ୍ଚିତତା ସମୟରେ ଏହାକୁ ଏକ ସୁରକ୍ଷିତ ନିବେଶ ଭାବରେ ବିବେଚନା କରାଯାଏ। ଏହାକୁ ସହଜରେ କିଣାବିକା କରାଯାଇପାରିବ। ସୁନାରେ ନିବେଶ କରିବାର ଅନେକ ଉପାୟ ଅଛି, ଯେପରିକି ଅଳଙ୍କାର, ମୁଦ୍ରା, ବାର୍, ସୁନା ETF, ସୁନା ପାଣ୍ଠି ଏବଂ ସାର୍ବଭୌମ ସୁନା ବଣ୍ଡ ଇତ୍ୟାଦି ।

ଅକ୍ଷୟ ତୃତୀୟାରେ ଚାହିଦା ବୃଦ୍ଧି

ଅକ୍ଷୟ ତୃତୀୟାରେ ସୁନା, ରୂପା ଏବଂ ଅନ୍ୟାନ୍ୟ ଶୁଭ ସାମଗ୍ରୀ କିଣିବାର ଚାହିଦା ବୃଦ୍ଧି ପାଉଛି କାରଣ ଏହି ଦିନକୁ ଶୁଭ ଏବଂ ମାଙ୍ଗଳିକ କାର୍ଯ୍ୟ ପାଇଁ ଏକ ଗୁରୁତ୍ୱପୂର୍ଣ୍ଣ ଦିନ ଭାବରେ ବିବେଚନା କରାଯାଏ ଯାହା ସମୃଦ୍ଧି ଏବଂ ସୌଭାଗ୍ୟ ଆଣିଥାଏ। ଅକ୍ଷୟ ତୃତୀୟାରେ ସୁନା କିଣିବାର ପରମ୍ପରା ଅଛି । ତେଣୁ ଏହି ସମୟରେ ସୁନାର ଚାହିଦା ବୃଦ୍ଧି ପାଏ, ବିଶେଷକରି ବିବାହ ଏବଂ ଅନ୍ୟାନ୍ୟ ଶୁଭ କାର୍ଯ୍ୟରେ । ବିବାହ ସମୟରେ ସୁନା ଅଳଙ୍କାରର ବହୁତ ଚାହିଦା ଥାଏ, ଯାହା ଫଳରେ ମୂଲ୍ୟ ବୃଦ୍ଧି ପାଏ। କିଛି ଲୋକ ସୁନାକୁ ଏକ ସୁରକ୍ଷିତ ନିବେଶ ଭାବରେ ମଧ୍ୟ ଦେଖନ୍ତି, ତେଣୁ ଆର୍ଥିକ ଅନିଶ୍ଚିତତା ସମୟରେ ସୁନାର ଚାହିଦା ବୃଦ୍ଧି ପାଏ।

ଆପଣ ମଧ୍ୟ ଏହି ଉପାୟରେ ନିବେଶ କରିପାରିବେ

ସୁନାରେ ନିବେଶ କରିବାର ଅନେକ ଉପାୟ ଅଛି, ଯେପରିକି ଅଳଙ୍କାର, ମୁଦ୍ରା, ବାର୍, ସୁନା ETF, ସୁନା ପାଣ୍ଠି ଏବଂ ସାର୍ବଭୌମ ସୁନା ବଣ୍ଡ। ଆପଣ ଗୋଲ୍ଡ ETFରେ ମଧ୍ୟ ନିବେଶ କରିପାରିବେ। ଏହା ନିବେଶକଙ୍କ ପାଇଁ ଏକ ଉତ୍ତମ ବିକଳ୍ପ। ଏହା ଡିଜିଟାଲ ରୂପରେ ଡିମାଟ୍ ଆକାଉଣ୍ଟରେ ସୁରକ୍ଷିତ ରହିଥାଏ।

୨୦୧୪ ରୁ ୨୦୨୪ ପର୍ଯ୍ୟନ୍ତ ସୁନା ମୂଲ୍ୟରେ ବୃଦ୍ଧି

୨୦୧୪ ପରଠାରୁ, ପ୍ରତିବର୍ଷ ସୁନା ମୂଲ୍ୟରେ ପରିବର୍ତ୍ତନ ଆସିଛି। ୨୦୧୪ ମସିହାର ଅକ୍ଷୟ ତୃତୀୟା ଏବଂ ୨୦୧୫ ମସିହାର ଅକ୍ଷୟ ତୃତୀୟା ମଧ୍ୟରେ ସୁନା ମୂଲ୍ୟରେ ୧୨ ପ୍ରତିଶତ ହ୍ରାସ ରେକର୍ଡ କରାଯାଇଥିଲା। କିନ୍ତୁ ୨୦୧୭ରେ ପୁଣି ଥରେ ସୁନାର ମୂଲ୍ୟ ୩.୨୩ ପ୍ରତିଶତ ହ୍ରାସ ପାଇଲା। ଏହି ସମୟରେ, ୨୦୨୦ ମସିହାରେ, ସୁନା ୩୨ ପ୍ରତିଶତ ପର୍ଯ୍ୟନ୍ତ ରିଟର୍ଣ୍ଣ ଦେଇଥିଲା। ଯେତେବେଳେ ୨୦୨୩-୨୪ ବର୍ଷ ମଧ୍ୟରେ, ସୁନା ପୁଣି ଥରେ ୧୬ ପ୍ରତିଶତ ପର୍ଯ୍ୟନ୍ତ ରିଟର୍ଣ୍ଣ ଦେଇଥିଲା।

ଭୂକମ୍ପରେ ଥରିଲା ପାକିସ୍ତାନ, ରିକ୍ଟର ସ୍କେଲରେ ତୀବ୍ରତା ୪.୩

ନନ୍ଦିଘୋଷ ବ୍ୟୁରୋ: ମିଆଁମାର ଥାଇଲାଣ୍ଡ ପରେ ଭୂମିକମ୍ପରେ ଥରିଲା ପାକିସ୍ତାନ । ଆଜି ଭୋର ପ୍ରାୟ ୩ଟାରେ ପାକିସ୍ତାନରେ ଭୂମିକମ୍ପ ଝଟକା ଅନୁଭୂତ ହୋଇଛି । ଭୂମିକମ୍ପର ତୀବ୍ରତା ପାଖାପାଖି ୪.୩ ରହିଛି । ବର୍ତ୍ତମାନସୁଦ୍ଧା କୌଣସି କ୍ଷୟକ୍ଷତି ସମ୍ପର୍କରେ ସୂଚନା ମିଳିନାହିଁ। ଏହାପୂର୍ବରୁ ଗତକାଲି ବେଲୁଚିସ୍ତାନରେ ଭୂକମ୍ପ ଝଟକା ଅନୁଭୂତ ହୋଇଥିଲା। ଇଦ୍ ଦିନ କରାଚୀରେ ହୋଇଥିବା ଭୂମିକମ୍ପର କିଛି ଘଣ୍ଟା ପରେ ଏହି ଭୂମିକମ୍ପ ଆସିଥିଲା, ଯାହା ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି । USGS ଅନୁଯାୟୀ, ବେଲୁଚିସ୍ତାନର ବାରଖାନ ଜିଲ୍ଲାରେ ହୋଇଥିବା ଭୂମିକମ୍ପର ତୀବ୍ରତା ୩.୯ ଥିଲା ଏବଂ ଏହାର କେନ୍ଦ୍ରସ୍ଥଳ ଭୂମିରୁ ୧୨ କିଲୋମିଟର ଗଭୀରରେ ଅବସ୍ଥିତ ଥିଲା। ଭୂମିକମ୍ପର କେନ୍ଦ୍ରସ୍ଥଳ ବାରଖାନରୁ ଉତ୍ତର-ପଶ୍ଚିମରେ ୫୯ କିଲୋମିଟର ଦୂରରେ ଥିଲା। ତଥାପି, ଭୂମିକମ୍ପଗୁଡ଼ିକ ମୃଦୁ ଥିବାରୁ କୌଣସି କ୍ଷୟକ୍ଷତିର ରିପୋର୍ଟ ହୋଇନାହିଁ।

କରାଚୀରେ ୪.୭ ତୀବ୍ରତାର ଭୂମିକମ୍ପ

ଇଦ୍ ଦିନ ମଧ୍ୟ ପାକିସ୍ତାନର କରାଚୀରେ ଭୂକମ୍ପର ଝଟକା ଅନୁଭୂତ ହୋଇଥିଲା। ରିପୋର୍ଟ ଅନୁଯାୟୀ କରାଚୀରେ ହୋଇଥିବା ଭୂମିକମ୍ପର ତୀବ୍ରତା ୪.୭ ଥିଲା। ଏହାର କେନ୍ଦ୍ର ସହରରୁ ୭୫ କିଲୋମିଟର ଉତ୍ତରରେ ଅବସ୍ଥିତ ଥିଲା। USGS ଅନୁଯାୟୀ, ଏହି ଭୂମିକମ୍ପର ପ୍ରକୃତ ତୀବ୍ରତା ୪.୬ ଥିଲା। ଏହାର କେନ୍ଦ୍ରସ୍ଥଳ ବେଲୁଚିସ୍ତାନର ପୂର୍ବ-ଦକ୍ଷିଣପୂର୍ବରେ ୬୫ କିଲୋମିଟର ଦୂରରେ ୧୦ କିଲୋମିଟର ଗଭୀରତାରେ ଅବସ୍ଥିତ ଥିଲା ।

୨୭୦୦ ଲୋକଙ୍କ ମୃତ୍ୟୁ 

ଗତ ସପ୍ତାହରେ ମିଆଁମାରରେ ହୋଇଥିବା ୭.୭ ତୀବ୍ରତାର ଶକ୍ତିଶାଳୀ ଭୂମିକମ୍ପରେ ମୃତ୍ୟୁ ସଂଖ୍ୟା ୨୭୦୦ ରୁ ଅଧିକ ହୋଇଥିବା ବେଳେ ହଜାର ହଜାର ଲୋକ ଆହତ ହୋଇଛନ୍ତି । ଭୂକମ୍ପରେ ଅନେକ କୋଠା ଭୁଷୁଡି ପଡିଥିବା ବେଳେ ଭଗ୍ନାବଶେଷରେ ଅନେକ ପୋତି ହେଇରହିଥିବା ଆଶଙ୍କା କରାଯାଉଛି । ଉଦ୍ଧାର କାର୍ଯ୍ୟ ଜାରୀ ରହିଥିବା ବେଳେ ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ଆକଳନ କରାଯାଉଛି ।

୪୪୧ ଜଣଙ୍କର ମିଳୁନି ପତ୍ତା  

ଏକ ରିପୋର୍ଟ ଅନୁଯାୟୀ ଭୂମିକମ୍ପ ଯୋଗୁଁ ଏପର୍ଯ୍ୟନ୍ତ ୨,୭୧୯ ଜଣଙ୍କର ମୃତ୍ୟୁ ହୋଇଛି ଯେତେବେଳେ ୪,୫୨୧ ଜଣ ଆହତ ହୋଇଛନ୍ତି ଏବଂ ୪୪୧ ଜଣ ନିଖୋଜ ଅଛନ୍ତି । ମିଆଁମାରରେ ହୋଇଥିବା ଭୂମିକମ୍ପ ଯୋଗୁ ଅନେକ ଅଞ୍ଚଳ ବିଦ୍ୟୁତ୍, ଟେଲିଫୋନ୍ କିମ୍ବା ମୋବାଇଲ୍ ଫୋନ୍ ସଂଯୋଗ ନଷ୍ଟ ହେଇଯାଇଛି ଏବଂ ରାସ୍ତା ଏବଂ ବ୍ରିଜ କ୍ଷତିଗ୍ରସ୍ତ ହୋଇଛି । ଏହି କାରଣରୁ ବିପର୍ଯ୍ୟୟ ଯୋଗୁଁ ହୋଇଥିବା କ୍ଷୟକ୍ଷତିର ଆକଳନ କରିବା କଷ୍ଟକର ହୋଇପଡ଼ିଛି ।

 

ଆଜି ମହାପ୍ରଭୁଙ୍କର ବନକ ଲାଗି ନୀତି; ୫ ଘଣ୍ଟା ବନ୍ଦ ରହିବ ଦର୍ଶନ

ନନ୍ଦିଘୋଷ ବ୍ୟୁରୋ: ଆଜି ସର୍ବସାଧାରଣଙ୍କ ପାଇଁ ବନ୍ଦ ରହିବ ଶ୍ରୀମନ୍ଦିର । ଚୈତ୍ର, ଶୁକ୍ଳ ପଞ୍ଚମୀ ତିଥିରେ ଶ୍ରୀବିଗ୍ରହମାନଙ୍କ ବନକଲାଗି ନୀତି ଅନୁଷ୍ଠିତ ହେବ। ଏନେଇ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ଆପାତତଃ ଅପରାହ୍ନ ୫ଟାରୁ ରାତ୍ର ୧୦ଟା ଅର୍ଥାତ ୫ଘଣ୍ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀ ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।

ଦ୍ୱିତୀୟ ଭୋଗ ମଣ୍ତପ ପରେ ଦତ୍ତ ମହାପାତ୍ର ସେବାୟତମାନେ ରତ୍ନବେଦୀରେ ମହାପ୍ରଭୁଙ୍କ ଏହି ଗୁପ୍ତ ନୀତି ଆରମ୍ଭ କରିବେ । ବନକଲାଗି ନୀତି ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ଚୂଡ଼ାନ୍ତ ହୋଇଛି । ଏହା ଏକ ଗୁପ୍ତ ସେବା ହୋଇଥିବାରୁ ପ୍ରାୟ ୫ ଘଣ୍ଟା ଧରି ସର୍ବସାଧାରଣ ଦର୍ଶନ ବନ୍ଦ ରହିବ । ପ୍ରଥା ଓ ପରମ୍ପରା ଅନୁଯାୟୀ, ଶ୍ରୀମନ୍ଦିରରେ ପ୍ରତି ବୁଧବାର କିମ୍ବା ଗୁରୁବାର ବନକ ଲାଗି ନୀତି ପାଳନ ହେବାର ବିଧି ରହିଛି । ଶ୍ରୀମନ୍ଦିର ନୀତି ନିର୍ଘଣ୍ଟ ଅନୁଯାୟୀ ଅପରାହ୍ନ ୫ଟାରୁ ମହାପ୍ରଭୁଙ୍କର ଶ୍ରୀମୁଖ ଶୃଙ୍ଗାର ନୀତି ଆରମ୍ଭ କରାଯିବ । ପ୍ରାୟ ୫ ଘଣ୍ଟା ଧରି ଏହି ବନକ ଲାଗି ନୀତି କରାଯାଉଥିବା ବେଳେ ମହାପ୍ରଭୁଙ୍କ ଶ୍ରୀମୁଖକୁ ବିଭିନ୍ନ ପ୍ରାକୃତିକ ରଙ୍ଗରେ ସଜ୍ଜିତ କରାଯିବ । ଏଥିପାଇଁ ଆବଶ୍ୟକ ହେଙ୍ଗୁଳ, ହରିତାଳ, କର୍ପୁର ଓ କସ୍ତୁରୀ ବ୍ୟବହାର କରାଯାଇ ଦତ୍ତ ମହାପାତ୍ର ସେବାୟତମାନେ ଏହି ନୀତି ସମ୍ପନ୍ନ କରିବେ । ବନକ ଲାଗି ବା ଶ୍ରୀମୁଖ ଶୃଙ୍ଗାର ଦ୍ୱାରା ଶ୍ରୀଜିଉଙ୍କ ମୁଖ ମଣ୍ତଳ ଅଧିକ ସୁନ୍ଦର ଓ ଆକର୍ଷଣୀୟ ଦେଖାଯାଇଥାଏ।