spot_img
Home Blog Page 1153

ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥ ଯାତ୍ରା ପାଇଁ ଚଳଚଞ୍ଚଳ ରଥଖଳା

ଭୁବନେଶ୍ବର: ଆସନ୍ତା ୫ ତାରିଖରେ ଏକାମ୍ର କ୍ଷେତ୍ରରେ ବାବା ଲିଙ୍ଗରାଜଙ୍କ ରୁକୁଣା ରଥଯାତ୍ରା । ମହାପ୍ରଭୁ ଲିଙ୍ଗରାଜ ଦୋଳଗୋବିନ୍ଦ ଓ ଭଉଣୀ ରୁକୁଣା ରଥରେ ବିଜେ ହୋଇ ମାଉସୀ ଘରକୁ ଯାତ୍ରା କରିବେ । ଏନେଇ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ରଥ ଖଳାରେ ଜୋରଦାର ଚାଲିଛି ରଥ ନିର୍ମାଣ । ୯୫ ପ୍ରତିଶତ ରଥ କାମ ଶେଷ ହୋଇଥିବାବେଳେ ଆସନ୍ତାକାଲି ମନ୍ଦିର ପ୍ରଶାସନକୁ ହସ୍ତାନ୍ତର କରିବେ ସେବାୟତ । ସେପଟେ ସୌନ୍ଦର୍ଯ୍ୟକରଣ, ଆଲୋକୀକରଣ, ଫୁଲ ସଜ୍ଜା ଓ ସ୍ବଛତା ନେଇ ବିଏମସି ପ୍ରସ୍ତୁତି କରିଛି ।

ଶନିବାର ଲିଙ୍ଗରାଜଙ୍କ ରୁକୁଣା ରଥଯାତ୍ରା । ରଥ ନିର୍ମାଣରେ ବ୍ୟସ୍ତ ମହାରଣା, କୁମ୍ଭାର ଓ ବେହେରା ସେବାୟତ । ରଥ ଖଳାରେ ୬୫ ଜଣ ସେବାୟତ ଦୀର୍ଘ ୧୦ ଦିନ ରଥ ନିର୍ମାଣ କରୁଛନ୍ତି । ୯୫ ପ୍ରତିଶତ କାମ ସରିଥିବା ବେଳେ ଶୁକ୍ରବାର ପ୍ରଶାସନକୁ ରଥା ହସ୍ତାନ୍ତର ପରେ ସନ୍ଧ୍ୟାରେ ରଥ ପ୍ରତିଷ୍ଠା କରାଯିବ । ବର୍ତ୍ତମାନ ସୁଦ୍ଧା ଚକ ଅଖ, ୫ଟି ଦଣ୍ଡା, ୧୬ କୋଣ ସିଂହା, ୩୩ ପଟା ବିଜ, ଚାରି ନାହାକା, ୧୬ ଜୋକା, ଘଣ୍ଟି, ଓରା ଲାଗି ସାରିଲାଣି । ଏବେ ରଥର ଚାରି ଦୁଆର କାର୍ଯ୍ୟ ଚାଲିଛି । ସେପଟେ ଏକାମ୍ର ସାଂସ୍କୃତିକ ପ୍ରକାଶନ ପକ୍ଷରୁ ୬ ଦିନ ଧରି ଲିଙ୍ଗରାଜ ଫେଷ୍ଟିଭାଲ ପାଳନ ହେବ । ୧୧ଟି ରାଜ୍ୟର ୩୬ ଟି ଗ୍ରୁପ କଳାକାରଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ । ୮ଶହରୁ ଉର୍ଦ୍ଧ୍ବ କଳାକାର ସାମିଲ ହେବେ । ପ୍ରତ୍ୟେକ ଦିନ ୬ ଟି ଗ୍ରୁପ , ୩ ଓଡ଼ିଶାର ଓ ୩ ଟି ଗ୍ରୁପ ଓଡ଼ିଶା ବାହାରୁ ଆସିବେ ।

ରୁକୁଣା ରଥଯାତ୍ରା ନେଇ ବିଏମସି ସ୍ବତନ୍ତ୍ର ରଣନିତୀ କରିଛି । ଲିଙ୍ଗରାଜ ମନ୍ଦିର ପାଖରୁ ନେଇ ରଥ ରୋଡ ସବୁର ପରିଷ୍କାର କରାଯିବ । ୫ରୁ ୯ ତାରିଖ ପର୍ଯ୍ୟନ୍ତ ମନ୍ଦିରରୁ ମରିଚିକୋଟ ଛକ ପର୍ଯ୍ୟନ୍ତ ଆଲୋକମାଳାରେ ସଜାଯିବ । ଫୁଲରେ ସଜେଇ ହେବ ମନ୍ଦିର । ବିଭିନ୍ନ ସ୍ଥାନରେ ଅସ୍ଥାୟୀ ଶୌଚାଳୟ ସହ ପ୍ରାଥମିକ ଚିକିତ୍ସା ସେଣ୍ଟର୍ କରାଯିବ । ଜରୁରୀ ପରିସ୍ଥିତି ପାଇଁ ପ୍ରସ୍ତୁତ ରହିବ ଆମ୍ବୁଲାନ୍ସ । ଖରାକୁ ଦେଖି ବିଭିନ୍ନ ସ୍ଥାନରେ ପିଇବା ପାଣି ଘୋଳ ଦହି ଆଦିର ବ୍ୟବସ୍ଥା କରାଯାଇଛି । ମ୍ୟୁନିସପାଲିଟି ହସ୍ପିଟାଲରେ ଗାଡି ପାର୍କିଂ ପାଇଁ ବାରଣ କରାଯାଇଛି । ୫ ତାରିଖ ଅପରାହ୍ନ ୩ଟାରେ ରଥଟଣା ଆରମ୍ଭ ହେବ । ଏହାର ୬ ଦିନ ପରେ ବାହୁଡା ଯାତ୍ରା ।

ଆଜିଠାରୁ ମାଆ ବୁଢ଼ୀ ଠାକୁରାଣୀ ଯାତ୍ରା, ମୁଖ୍ୟ ମନ୍ଦିରରୁ ବାପ ଘରକୁ ଯିବେ ମାଆ

ବ୍ରହ୍ମପୁର: ଆଜିଠାରୁ ଆରମ୍ଭ ହେବ ବ୍ରହ୍ମପୁର ଆରାଧ୍ୟା ଦେବୀ ମାଆ ବୁଢୀ ଠାକୁରାଣୀଙ୍କ ଯାତ୍ରା । ମଧ୍ୟ ରାତ୍ରିରେ ମୁଖ୍ୟ ମନ୍ଦିର ଛାଡ଼ି ବାପା ଘର ଦେଶୀ ବେହେରା ସାହିକୁ ଯିବେ ଠାକୁରାଣୀ । ଅସ୍ଥାୟୀ ମନ୍ଦିରରେ ପୂଜା ପାଇବେ ମାଆ । ଏଥିପାଇଁ ସହରବାସୀଙ୍କ ଧେଣ୍ଡୁରା ଦେଇ ନିମନ୍ତ୍ରଣ କଲେ ଦେଶୀ ବେହେରା । ମାଆଙ୍କ ଅସ୍ଥାୟୀ ମନ୍ଦିର ପାଇଁ ରାଜମହେନ୍ଦ୍ରିରୁ ଆସିଛି ଫୁଲ । ଆଜିଠାରୁ ୨୮ ତାରିଖ ଯାଏଁ ଚାଲିବ ଯାତ୍ରା ।

ବାଜିଲା ଧେଣ୍ଡୁରା । ବାପା ଘରକୁ ଆସୁଛନ୍ତି ମାଆ ବୁଢ଼ୀ ଠାକୁରାଣୀ । ଚୈତ୍ର ଶୁକ୍ଳ ପକ୍ଷରେ ମୁଖ୍ୟ ମନ୍ଦିର ଛାଡ଼ି ବାପା ଘର ଦେଶୀ ବେହେରା ସାହିକୁ ଆସୁଛନ୍ତି ମାଆ । ସହରବାସୀଙ୍କୁ ନିମନ୍ତ୍ରଣ କଲେ ବାପା ଦେଶୀ ବେହେରା । ଅସ୍ଥାୟୀ ମନ୍ଦିରରେ ୨୮ ତାରିଖ ଯାଏଁ ପୂଜା ପାଇବେ ମାଆ । ଏଥିପାଇଁ ସଜେଇ ହେଲାଣି ପୂରା ସହର । ଅସ୍ଥାୟୀ ମନ୍ଦିର ବି ପ୍ରସ୍ତୁତ । ମାଆଙ୍କ ପାଇଁ ରାଜମହେନ୍ଦ୍ରିରୁ ଫୁଲ ମଗାଇଛନ୍ତି ବାପା । ସନ୍ଧ୍ୟାରେ ଚାଙ୍ଗୁଡ଼ି ପୂଜା ପରେ ରାତ୍ରି ୧୧ଟାରେ ଦେଶୀ ବେହେରା ସାହିରୁ ମାଆଙ୍କୁ ପାଛୋଟି ଆଣିବାକୁ ଯିବ ବିଶାଳ ପଟୁଆର । ପୂଜାର୍ଚ୍ଚନା ପରେ ମାଆଙ୍କ ଆଜ୍ଞାମାଳ ଆଣି ସ୍ଥାପନ ପରେ ଆରମ୍ଭ ହେବ ଯାତ୍ରା । ଏଥିପାଇଁ ଉତ୍ସାହିତ ବାପାଘର ଲୋକେ ଏବଂ ସହରବାସୀ ।

ଯାତ୍ରା ପାଇଁ ପୋଲିସ ଓ ଜିଲ୍ଲା ପ୍ରଶାସନ ପକ୍ଷରୁ କରାଯାଇଛି ସମସ୍ତ ପ୍ରସ୍ତୁତି । ରାତିରେ ମାଆଙ୍କ ଘଟ ପରିକ୍ରମା ବେଳେ ହଜାର ହଜାର ଲୋକଙ୍କ ଭିଡ ଜମିବ । ଟ୍ରାଫିକ ନିୟନ୍ତ୍ରଣ ସହ ଯାତ୍ରା ସମୟରେ ଅପରାଧିକ କାର୍ଯ୍ୟକଳାପ ରୋକିବାକୁ ପୋଲିସ ପକ୍ଷରୁ ରୋଡମ୍ୟାପ ପ୍ରସ୍ତୁତ ହୋଇଛି । ବ୍ରହ୍ମପୁର ଏସପିଙ୍କ ତତ୍ତ୍ୱାବଧାନରେ ବଡବଜାର ଥାନାରେ ଏକ ମିଳିତ ବୈଠକ ଅନୁଷ୍ଠିତ ହୋଇଥିଲା । ଯାତ୍ରା ସମୟରେ ବଡବଜାର ଅଞ୍ଚଳରେ ୬ ପ୍ଲାଟୁନ ପୋଲିସ ଫୋର୍ସ ସହିତ ୩୫ ଜଣ ପୋଲିସ ଅଧିକାରୀ ନିଯୋଜିତ ହେବେ । ଯାତ୍ରା ସ୍ଥଳରେ ୨୪ ଘଣ୍ଟିଆ କଣ୍ଟ୍ରୋଲ ରୁମ ଖୋଲାଯିବ । ଏପ୍ରିଲ ୩ ତାରିଖରୁ ୨୮ ତାରିଖ ଯାଏଁ ଦେଶୀ ବେହେରା ସାହି ତଥା ବଡବଜାରକୁ  ଗାଡିମଟର ପ୍ରବେଶ ଉପରେ କଟକଣା ଲାଗିଛି । ରାତି ୧୨ଟାରୁ ଭୋର ୪ଟା ମଧ୍ୟରେ ମାଲ ପରିବହନ କରିବାକୁ ବ୍ୟବସାୟୀଙ୍କୁ ପରାମର୍ଶ ଦିଆଯାଇଛି ।

ସରକାରଙ୍କୁ ଚେତାବନୀ ! ୬୦ ବର୍ଷରୁ ଊର୍ଦ୍ଧ୍ବ ହିତାଧିକାରୀଙ୍କୁ ୧୫ ତାରିଖ ସୁଦ୍ଧା ୩ ହଜାର ଭତ୍ତା ପ୍ରଦାନ କରାନଗଲେ…

କଟକ: ଭତ୍ତା ବୃଦ୍ଧି ଅଭିଯାନ ଓଡ଼ିଶା ପକ୍ଷରୁ କଟକରେ ଜିଲ୍ଲାପାଳଙ୍କ ଅଫିସ ଆଗରେ ଜୋରଦାର ଆନ୍ଦୋଳନ । ଶହ ଶହ ହିତାଧିକାରୀ ପ୍ରଚଣ୍ଡ ଖରାରେ ହାତରେ ଭତ୍ତା କାଗଜ ଓ ପରିଚୟପତ୍ର ଧରି ୬୦ବର୍ଷରୁ ଅଧିକ ହିତାଧିକାରୀଙ୍କୁ କାହିଁକି ୩ ହଜାର ଟଙ୍କା ଭତ୍ତା ଦିଆଯିବ ନାହିଁ ବୋଲି ପ୍ରଶ୍ନ କରିଛନ୍ତି । ଏହାସହ ମିଥ୍ୟା ପ୍ରତିଶ୍ରୁତି ଦେଇ ଭୋଟ ହାତେଇବା ଓ ପରେ ହିତାଧିକାରୀଙ୍କ ସହ ପ୍ରତାରଣା କରିଥିବାରୁ ସରକାରଙ୍କୁ ସମାଲୋଚନା କରିଛନ୍ତି । ୧୫ ତାରିଖ ସୁଦ୍ଧା ଭତ୍ତା ନ ମିଳିଲେ ଆନ୍ଦୋଳକୁ ଜୋରଦାର କରିବାକୁ ଚେତାବନୀ ଦେଇଛି ଭତ୍ତା ବୃଦ୍ଧି ଅଭିଯାନ ଓଡ଼ିଶା ।

ସୁନେଲି ସ୍ବପ୍ନ ଦେଖାଇ ନିର୍ବାଚନ ଜିତିଲେ । ହେଲେ କ୍ଷମତାକୁ ଆସିବା ପରେ ପ୍ରତିଶ୍ରୁତି ଭୁଲିଗଲେ । ପ୍ରଚଣ୍ଡ ଖରାରେ ହିତାଧିକାରୀଙ୍କ ଆନ୍ଦୋଳନ । ହକ୍ ପାଇଁ କଟକରେ ଏକାଠି ହେଲେ ଶହ ଶହ ଭତ୍ତା ହିତାଧିକାରୀ । ହାତରେ ଭତ୍ତା କାଗଜ ଓ ପରିଚୟ ପତ୍ର ଧରି ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ପ୍ରତିବାଦ । ଏସପି ଅଫିସ ସମ୍ମୁଖରେ ଏକାଠି ହୋଇ ଶୋଭାଯାତ୍ରାରେ ଆସି କରିଛନ୍ତି ଆନ୍ଦୋଳନ । ନିର୍ବାଚନ ପୂର୍ବରୁ ୬୦ ବର୍ଷରୁ ଅଧିକ ସବୁ ବର୍ଗର ହିତାଧିକାରୀଙ୍କୁ ୩ ହଜାର ଟଙ୍କା ଭତ୍ତା ଦେବାକୁ ପ୍ରତିଶ୍ରୁତି ଦେଇଥିଲା ବିଜେପି । ହେଲେ କ୍ଷମତାକୁ ଆସିବା ପରେ ରାଜ୍ୟର ପ୍ରାୟ ୫୪ ଲକ୍ଷ ହିତାଧିକାରୀଙ୍କୁ ପ୍ରତାରିତ କରିଥିବା ଭତ୍ତା ବୃଦ୍ଧି ଅଭିଯାନ ଓଡ଼ିଶା ପକ୍ଷରୁ ଅଭିଯୋଗ କରାଯାଇଛି । ଡବଲ ଇଞ୍ଜିନ ସରକାର ଡବଲ ଧୋକା ଦେଇଥିବା ହିତାଧିକାରୀ କହିଛନ୍ତି ।

ପଡୋଶୀ ଆନ୍ଧ୍ରପ୍ରଦେଶ ଓ ତେଲେଙ୍ଗାନାରେ ୬୦ ବର୍ଷରୁ ଅଧିକ ବୃଦ୍ଧ, ବିଧବା ଓ ଭିନ୍ନକ୍ଷମଙ୍କୁ ୪ରୁ ୫ ହଜାର ଟଙ୍କାର ଭତ୍ତା ଦିଆଯାଉଛି । ତେବେ ଆମ ରାଜ୍ୟରେ ୮୦ ବର୍ଷରୁ ଅଧିକ ଲୋକଙ୍କୁ ବାର୍ଦ୍ଧକ୍ୟ ଓ ଭିନ୍ନକ୍ଷମ ଭତ୍ତା ଦିଆଯାଉଛି । ହେଲେ ପ୍ରତିମାସ ୧୫ ତାରିଖରେ ଭତ୍ତା ମଧ୍ୟ ମିଳୁ ନଥିବା ଅଭିଯୋଗ କରିଛନ୍ତି ହିତାଧିକାରୀ । ତେଣୁ ତୁରନ୍ତ ସରକାର ପାତର ଅନ୍ତର ନକରି ୬୦ ବର୍ଷରୁ ଊର୍ଦ୍ଧ୍ବ ସବୁ ହିତାଧିକାରୀଙ୍କୁ ତୁରନ୍ତ ୩ ହଜାର ଟଙ୍କାର ଭତ୍ତା ଦେବାକୁ ଦାବି କରାଯାଇଛି । ନଚେଦ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରିବାକୁ ଚେତାବନୀ ଦିଆଯାଇଛି ।

କେବଳ ସେତିକି ନୁହେଁ ଭତ୍ତା ପ୍ରଦାନ କଲା ବେଳେ ଭିନ୍ନ ଭିନ୍ନ ଜିଲ୍ଲାରେ ହିତାଧିକାରୀଙ୍କୁ ଭିନ୍ନ ଭିନ୍ନ ପରିଚୟପତ୍ର ମାଗି ହଇରାଣ କରାଯାଉଥିବା ଅଭିଯୋଗ ମଧ୍ୟ ହୋଇଛି ।

ଶ୍ରୀମନ୍ଦିର ମେଘନାଦ ପାଚେରୀ ଐତିହ୍ୟ କୀର୍ତ୍ତି ଭାଙ୍ଗିବା ପ୍ରସଙ୍ଗକୁ ନେଇ ଏଏସଆଇର କଡ଼ା ଚେତାବନୀ

ପୁରୀ: ଶ୍ରୀମନ୍ଦିର ଦକ୍ଷିଣ ଦ୍ୱାର ନିକଟ ମେଘନାଦ ପାଚେରୀରେ ଥିବା ଐତିହ୍ୟ କୀର୍ତ୍ତିରାଜି ମଗର ମୁଣ୍ଡ ଭଙ୍ଗା ଯିବାକୁ ନେଇ ସୃଷ୍ଟି ହୋଇଛି ବିବାଦ । ପ୍ରାଚୀରର ବହୁ ପୁରାତନ କୀର୍ତ୍ତିରାଜିକୁ ଭାଙ୍ଗି ସେଠାରେ ଏକ ବଡ଼ ପାଇପ ସଂଯୋଗ କରାଯାଇଥିବା ଘଟଣାରୁ ନେଇ ସେବାୟତଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି । ସେପଟେ ଘଟଣାକୁ ନେଇ ବର୍ଷିଛି ଏଏସଆଇ । ଏହା ବହୁତ ବଡ଼ ଭୁଲ ଓ ଏହାଦ୍ବାରା ମନ୍ଦିର ପ୍ରତି ବିପଦ ସୃଷ୍ଟି ହୋଇପାରେ । ତେଣୁ ଯିଏ ଏହା କରିଛି ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଏଏସଆଇ ସୁପରିଣ୍ଟେଣ୍ଡେଣ୍ଟ ।

ଶ୍ରୀମନ୍ଦିର ଦକ୍ଷିଣ ଦ୍ୱାର ମେଘନାଦ ପାଚେରୀର ରହିଥିବା ଏକ ମଗର ମୁଖକୁ ଭଙ୍ଗାଯାଇଥିବା ନଜରକୁ ଆସିଛି l ଏହି ମଗର ମୁଖ ଦେଇ ପୂର୍ବରୁ ଶ୍ରୀମନ୍ଦିର ଭିତରୁ ବର୍ଯ୍ୟ ଜଳ ନିଷ୍କାସନ ହେଉଥିଲା । ହେଲେ ଏହାକୁ ଭାଙ୍ଗି ଏଠାରେ ପାଇପ ସଂଯୋଗ କରାଯାଇଛି । ଯାହାକୁ ନେଇ ସେବାୟତ ମହଲରେ ତୀବ୍ର ଅସନ୍ତୋଷ ଦେଖାଦେଇଛି l ଘଟଣାକୁ ସହଜରେ ହଜମ କରି ପାରୁ ନାହାନ୍ତି ବୁଦ୍ଧିଜୀବୀ ।

ସେପଟେ ଘଟଣାକୁ ନେଇ ବର୍ଷିଛି ଏଏସଆଇ । ଏହା ବହୁତ ବଡ଼ ଭୁଲ ଓ ଯିଏ ଏହା କରିଛି ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାଇ ଦେଇଛନ୍ତି ASI ସୁପରିଣ୍ଟେଣ୍ଡେଣ୍ଟ ଡି.ବି. ଗଡ଼ନାୟକ । ଏହା ଭାଙ୍ଗିବା ପୂର୍ବରୁ ଏଏସଆଇକୁ ଜଣାଯାଇ ନାହିଁ କିମ୍ୱା ଖବର ମଧ୍ୟ ଦିଆଯାଇ ନାହିଁ । ସାଇଟ ଇନଚାର୍ଜ ଏସବୁ ଦେଖିବା ପରେ ଅବଗତ କରାଇଛନ୍ତି ଓ ଭାଙ୍ଗିବାର ଫଟୋ ଦେଇଛନ୍ତି । ତଦନ୍ତ କରି ରିପୋର୍ଟ ଦେବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ସୂଚନା ଦେଇଛନ୍ତି । ମନ୍ଦିରର କେଉଁଠି ପାଇପ ଲାଇନ ନେଲେଣି ତ କେଉଁଠି ଘର କରିଦେଲେଣି । ଷ୍ଟ୍ରକ୍ଚରକୁ ବାଧା ଦେବା କଥା ନୁହେଁ । ଏହା ଅତ୍ୟନ୍ତ ଦୁଃଖଦାୟକ ବୋଲି କହିଛନ୍ତି ଏଏସଆଇ ସୁପରିଣ୍ଟେଣ୍ଡେଣ୍ଟ ।

ଶ୍ରୀମନ୍ଦିର ଭିତରରେ ଥିବା ବର୍ଜ୍ୟ ଜଳ ନିଷ୍କାସନ ସୁଧାରିବା ଲକ୍ଷ୍ୟରେ କୀର୍ତ୍ତିରାଜି ନଷ୍ଟ କରିବା ଦ୍ବାରା ମନ୍ଦିର ପ୍ରତି ବିପଦ ଥିବା ଅଭିଯୋଗ ହୋଇଛି ।

ନାହିଁ ନାହିଁରେ ଚାଲିଛି କେନ୍ଦ୍ରାପଡା ଜିଲ୍ଲା ପର୍ଯ୍ୟଟନ ବିଭାଗ: ଭୂତକୋଠି ପାଲଟିଛି ୩ଟି କାର୍ଯ୍ୟାଳୟ

କେନ୍ଦ୍ରାପଡ଼ା: ନାହିଁ ନାହିଁରେ ଚାଲିଛି କେନ୍ଦ୍ରାପଡା ଜିଲ୍ଲା ପର୍ଯ୍ୟଟନ ବିଭାଗ । ଅଧିକାରୀଙ୍କ ଦାୟିତ୍ଵହୀନତା ଯୋଗୁଁ ଭୂତକୋଠି ପାଲଟିଛି ପର୍ଯ୍ୟଟନ ବିଭାଗର ୩ଟି କାର୍ଯ୍ୟାଳୟ । ଜିଲ୍ଲା ପର୍ଯ୍ୟଟନ ଅଧିକାରୀ ଉଭୟ କେନ୍ଦ୍ରାପଡ଼ା ଓ ଯାଜପୁର ଜିଲ୍ଲା କଥା ବୁଝୁଥିବାରୁ ଏପରି ସ୍ଥିତି ଉପୁଜୁଥିବା ଅଭିଯୋଗ ହୋଇଛି ।

କେନ୍ଦ୍ରାପଡାରେ ସ୍ଥାଣୁ ପାଲଟିଛି ଜିଲ୍ଲା ପର୍ଯ୍ୟଟନ ବିଭାଗ । ସ୍ଥିତି ଏଭଳି ହୋଇଛି କି ଗୋପଠାରେ ଥିବା ଜିଲ୍ଲା କାର୍ଯ୍ୟାଳୟର ତଦାରଖ କରୁଛନ୍ତି ଜଣେ ଚତୁର୍ଥ ଶ୍ରେଣୀ କର୍ମଚାରୀ । ବିଭିନ୍ନ ସମୟରେ ଅଫିସ ଫାଙ୍କା ପଡୁଥିବାରୁ ସେଠାରେ ଅନ୍ୟ କିଛି ବିଭାଗର କାର୍ଯ୍ୟାଳୟ ଖୋଲି ଦିଆଗଲାଣି । ସେହିଭଳି ଶ୍ୟାମସୁନ୍ଦରପୁରଠାରେ ନିର୍ମାଣ ହୋଇଥିବା କୋଠାର ରକ୍ଷଣାବେକ୍ଷଣ ଅଭାବରୁ ତାହା ଭୂତକୋଠି ପାଲଟିଛି । ନୂଆ ବସଷ୍ଟାଣ୍ଡଠାରେ ଥିବା ଘର ଅବସ୍ଥା ମଧ୍ୟ ଶୋଚନୀୟ ହୋଇପଡିଛି । ଯାହାକୁ ନେଇ ବୁଦ୍ଧିଜୀବୀ ମହଲରେ ତାବ୍ର ଅସନ୍ତୋଷ ପ୍ରକାଶ ପାଇଛି ।

ଜିଲ୍ଲା ପର୍ଯ୍ୟଟନ ବିଭାଗ ପକ୍ଷରୁ ପର୍ଯ୍ୟଟକଙ୍କ ସୁବିଧା ପାଇଁ ସଦର ମହକୁମାରେ ୨ଟି ପାନ୍ଥ ନିବାସ ମଧ୍ୟ ନିର୍ମାଣ କରାଯାଇଥିଲା । ସେଥିମଧ୍ୟରୁ ଗୋଟିଏ ଜରାଜୀର୍ଣ୍ଣ ଅବସ୍ଥାରେ ଶ୍ୟାମଗୁଡିଆଠାରେ ରହିଛି । ଯାହାର ଚତୁପାର୍ଶ୍ଵରେ ପାଣି ଜମି ରହିଥିବା ବେଳେ କୋଠାଟି ଗଛଲତାରେ ଲୁଚି ଗଲାଣି । ସେହିପରି ଅନ୍ୟ ଏକ ଅତିଥି ଭବନ ପୌରାଞ୍ଚଳ ଅନ୍ତର୍ଗତ ଚାଟରାପାଟଣାରେ ରହିଛି । ନିର୍ମାଣ ହେଲା ପରଠାରୁ କୋଠାଟିରେ ତାଲା ପଡିଛି । ଏମିତି ସ୍ଥିତିରେ ଜିଲ୍ଲା ପର୍ଯ୍ୟଟନ ବିଭାଗର ଦୁରାବସ୍ଥା ପ୍ରତି ସରକାର ଦୃଷ୍ଟି ଦେବାକୁ ଦାବି ହୋଇଛି ।

ମୃତ ସ୍ବାମୀଙ୍କ ସିଲିକନ ପ୍ରତିମୂର୍ତ୍ତି ସ୍ଥାପନ କରି ମହିଳା ପୁଣି ପିନ୍ଧିଲେ ଶଙ୍ଖା, ସିନ୍ଦୁର

ରାୟଗଡା: ମୁନିଗୁଡା ସଦରରେ ଦେଖିବାକୁ ମିଳିଛି ଜଣେ ସ୍ତ୍ରୀଙ୍କ ସ୍ୱାମୀ ପ୍ରତି ଥିବା ଅନାବିଳ ଶାଶ୍ଵତ ଓ ଚିରନ୍ତନ ପ୍ରେମର ଉଦାହରଣ । କୋଲକାତାରେ ମୃତ ସ୍ବାମୀଙ୍କ ସିଲିକନ୍ ପ୍ରତିମୂର୍ତ୍ତି ତିଆରି କରି ନିଜ ଘରେ କଲେ ସ୍ଥାପନା । ପୁନର୍ବାର ହିନ୍ଦୁ ରୀତିନୀତି ଅନୁଯାୟୀ ପିନ୍ଧିଲେ ଶଙ୍ଖା ସିନ୍ଦୁର ।

୨୦୦୧ରେ କୋଲକାତାରେ ସାଗରୀକା ରାୟ ଓ ସମୀର ରାୟଙ୍କ ବୈଦିକ ରୀତିନୀତି ଅନୁଯାୟୀ  ବାହାଘର ହୋଇଥିଲା । ଦୀର୍ଘ ୨୨ ବର୍ଷ ପରେ ବି ସ୍ବାମୀ ସ୍ତ୍ରୀଙ୍କ ପ୍ରେମ ଟିକେ ବି ମଳିନ ପଡ଼ି ନଥିଲା।  ପରିବାରର  ଦୁଇ ପିଲାଙ୍କ ଦାୟିତ୍ୱ ସହ ଖୁସିରେ ସଂସାର ରଥ ଗଡି ଚଳିଥିଲା । ଗତ ଦୁଇ ବର୍ଷ ହେବ ଏକ ସାଧାରଣ ରୋଗରେ ପଡି ସ୍ୱାମୀ ସମୀର ରାୟଙ୍କ ମୃତ୍ୟୁ ଘଟିଥିଲା । ଏହାପରେ ଭାଙ୍ଗି ପଡିଥିଲେ ସାଗରୀକା । ସ୍ବାମୀଙ୍କ ମୃତ୍ୟୁକୁ ସେ ଗ୍ରହଣ କରିପାରି ନଥିଲେ । ହେଲେ ଜଣେ ପୁଅ ଆଉ ଜଣେ ଝିଅ ର ମାଆ ହିସାବରେ ତାଙ୍କ ଉପରେ ଥିଲା ଅନେକ ଦାୟିତ୍ୱର ବୋଝ । ହାତରୁ ଭାଙ୍ଗିଯାଇଥିବା ଶଙ୍ଖା ଓ ସିନ୍ଦୁର ଧାରଣ କରି ଜଣେ ସଧବା ମାତୃଶକ୍ତି ବନିଥିଲେ ସାଗରିକା । କଲିକତାରେ ସ୍ବାମୀଙ୍କ ସିଲିକନ୍ ପ୍ରତିମୂର୍ତ୍ତି ତିଆରି କରି ମୁନିଗୁଡା ବାସଭବନରେ ସ୍ଥାପନା କରି, ପୁରୋହିତଙ୍କ ଉପସ୍ଥିତିରେ ହୋମ ଯଜ୍ଞ ସହ ମୂର୍ତ୍ତିର ପ୍ରାଣ ପ୍ରତିଷ୍ଠା କରି ପୁନର୍ବାର ହିନ୍ଦୁ ରୀତିନୀତି ଅନୁଯାୟୀ ଶଙ୍ଖା ସିନ୍ଦୁର ଧାରଣ କରିଛନ୍ତି ।

ପିଲାମାନେ ବି ବାପାଙ୍କ ମୂର୍ତ୍ତି ଉପସ୍ଥିତିରେ ବେଶ ଖୁସି । ସତାଜନ୍ମର ସାଥିଙ୍କୁ ଗୋଟେ ଜନ୍ମରୁ ଅଧାରୁ ଛାଡନ୍ତେ ବା କେମିତି ସ୍ତ୍ରୀ ଜଣଙ୍କ । ଏହା ବୋଧେ ସ୍ବାମୀ ସ୍ତ୍ରୀଙ୍କର ପ୍ରକୃତ ଶାଶ୍ଵତ ଚିରନ୍ତନ ସମ୍ପର୍କ ।

ଦୁର୍ଦ୍ଦିନରେ ଜୀବନ ବିତାଉଛନ୍ତି ଡୋକ୍ରା କାରିଗରଙ୍କ ପରିବାର

ଢେଙ୍କାନାଳ: କାରିଗରଙ୍କ ଚିତ୍ରରେ ବଦଳୁଛି ଶୈଳୀ, କିନ୍ତୁ ବଦଳୁନାହିଁ କାରିଗରଙ୍କ ସ୍ଥିତି । ଢେଙ୍କାନାଳକୁ ସାରା ଦେଶ ବିଦେଶରେ ଗର୍ବିତ କରିଥିବା ଡୋକ୍ରା ଶିଳ୍ପ ଆଗକୁ ଯାଉଛି । ହେଲେ ଦୁର୍ଦ୍ଦିନରେ ଜୀବନ ବିତାଉଛନ୍ତି କାରିଗର । ଏବେବି ଜରିପକା ଚାଳ ଘର ତଳେ ନିଜର କୂଳ ବବ୍ୟବସାୟକୁ ବଞ୍ଚାଇ ରଖିବା ପାଇଁ କରୁଛନ୍ତି ସଂଘର୍ଷ ।

ଚାରିଆଡେ କେବଳ ଜରିପକା ଚାଳ ଛପର ଘର । ଏ କୌଣସି ଆଦିବାସୀ ଅଧ୍ୟୁଷିତ ଅଞ୍ଚଳ ନୁହେଁ । ଏ ହେଉଛି ଢେଙ୍କାନାଳ ସଦର ବ୍ଲକ ଅନ୍ତର୍ଗତ ସପ୍ତଶଯ୍ୟା ପାଦ ଦେଶରେ ଥିବା ଡୋକ୍ରା କାରିଗରଙ୍କ ଗାଁ ନୂଆଗାଁ । ଏଠାରେ ପାଖାପାଖି ୧୦୦ରୁ ଅଧିକ ଡୋକ୍ରା ପରିବାର ରହୁଛନ୍ତି । ହେଲେ ଆବାସ ଯୋଜନାରେ ଘର ଖଣ୍ଡେ ନଥିବାରୁ ଜରି ପକା ଘର ତଳେ ଅତ୍ୟନ୍ତ ଦୁର୍ଦ୍ଦିନରେ ଜୀବନ ବିତାଉଛନ୍ତି । କେତେବେଳେ ଭାଟିରେ ପାଣି ପଶି ଯାଉଛି ତ କେତେବେଳେ ବର୍ଷାରେ ମାଟି କାନ୍ଥ ଭୁଶୁଡ଼ି ପଡ଼ୁଛି । ଆଉ ସନ୍ଧ୍ୟା ହେଲେ ଘାରୁଛି ହାତୀ ସାଙ୍ଗକୁ ସାପ ଭୟ । ଖରା ଦିନେ ପାଣି ସମସ୍ୟା କହିଲେ ନସରେ । ଆଉ ଏହାରି ଭିତରେ ନିଜର କୂଳ ବ୍ୟବସାୟକୁ ବଞ୍ଚାଇ ରଖିବା ପାଇଁ ପ୍ରକୃତି ସହ ସଂଘର୍ଷ କରୁଛନ୍ତି ଏହି କାରିଗର ପରିବାର ।

ଦିନ ବଦଳିବା ସହିତ ଡୋକ୍ରା କାରିଗରଙ୍କ କାରିଗରୀ ଶୈଳୀ ବଦଳିଛି । ପୂର୍ବ ସରକାରଙ୍କ ସମୟରେ ନୂତନ ଡିଜାଇନ୍ ପ୍ରସ୍ତୁତ ପାଇଁ କାରିଗରମାନଙ୍କୁ ଟ୍ରେନିଂ ଦିଆ ଯାଇଥିଲା । ଯାହା ଫଳରେ କାରିଗର ଏବେ ନୂତନ ଡିଜାଇନ୍ ଓ ଗ୍ରାହକଙ୍କ ଚାହିଦା ଅନୁଯାୟୀ ସାମଗ୍ରୀ ପ୍ରସ୍ତୁତ କରୁଛନ୍ତି । ଯାହାର ବଜାରରେ ଭଲ ଚାହିଦା ଥିବା ବେଳେ ବେଶ ଦୁଇ ପଇସା କମାଉଛନ୍ତି କାରିଗର । ଏହାସହ ପୂର୍ବ ସରକାର ଜାଗା ଦେବା ସହ ପଟ୍ଟା ଦେଇଛନ୍ତି । ଏବେ ରହିବା ପାଇଁ ନୂଆ ସରକାର ଘର ଖଣ୍ଡେ ଯୋଗାଇଦେଲେ ଏହି ଶିଳ୍ପକୁ ଆହୁରି ସୁନ୍ଦର ଭାବରେ ସାରା ବିଶ୍ଵରେ ପହଞ୍ଚା ଯାଇପାରିବ ବୋଲି କହିଛନ୍ତି ଶିଳ୍ପୀ ।

ହଷ୍ଟେଲରେ ମଦ ପିଇବା କଥା ହେଡ ସାରଙ୍କୁ କହି ଦେବାରୁ ୬ଷ୍ଠ ଶ୍ରେଣୀ ଛାତ୍ରଙ୍କୁ ୯ମ ଶ୍ରେଣୀ ଛାତ୍ରଙ୍କ ରାଗିଂ

ଉଦଳା: ସ୍କୁଲ ହଷ୍ଟେଲରେ ୯ମ ଶ୍ରେଣୀ ଛାତ୍ର ପିଉଥିଲେ ମଦ । ଷଷ୍ଠ ଶ୍ରେଣୀର ଜଣେ ଛାତ୍ର ଏହା ଦେଖି ପ୍ରଧାନ ଶିକ୍ଷକଙ୍କୁ କହିବାରୁ ହୋଇଛନ୍ତି ରାଗିଂର ଶିକାର । ମଦ ପିଉଥିବା ଛାତ୍ରମାନେ ଷଷ୍ଠ ଶ୍ରେଣୀ ଛାତ୍ରଙ୍କୁ ଲୁହା ରଡ଼, ବେଲ୍ଟରେ ନିର୍ମାମ ଭାବେ ମାଡ଼ ମାରିବା ସହ ହାତ କାଟି ଦେଇଥିବା ଅଭିଯୋଗ ହୋଇଛି । ଏମିତି ଅଭିଯୋଗ ଆସିଛି ବାସିପିଠା ଏସଏସଡି ହାଇସ୍କୁଲ ହଷ୍ଟେଲରୁ ।

ଅଭିଯୋଗ ଅନୁସାରେ, ନବମ ଶ୍ରେଣୀ ଛାତ୍ରମାନେ ଲୁହା ରଡ଼ରେ ମାଡ଼ ମାରି ହାତରେ ଲୁହା ରଡ଼ ଭର୍ତ୍ତି କରି ଦେଇଥିଲେ । ବିଧା, ଗୋଇଠା ମାରିବା ସହିତ ବ୍ଲେଡରେ ହାତ କାଟିଥିଲେ । ଏପରିକି କଟା ଯାଇଥିବା ସ୍ଥାନରେ ଲୁଣ ମାରିଥିଲେ । ଛାତ୍ରମାନେ ଛୁରୀ ଦେଖାଇ ତାଙ୍କୁ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲେ । ଯାହାକୁ ନେଇ ଷଷ୍ଠ ଶ୍ରେଣୀ ଛାତ୍ର ଜଣକ ତାଙ୍କ ପରିବାର ଲୋକଙ୍କୁ ଜଣାଇବା ପରେ ଏ ନେଇ ଖୁଣ୍ଟା ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗକୁ ଆଧାର କରି ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।

ଡରିଗଲେ ସରକାର, ୩ ଦିନ ଆଗରୁ ବନ୍ଦ କରି ଦେଲେ ବିଧାନସଭା: କଂଗ୍ରେସ

ଭୁବନେଶ୍ବର: ତିନି ଦିନ ଆଗରୁ ବିଧାନସଭା ବନ୍ଦ କରାଯିବାକୁ ନେଇ ରାଜ୍ୟ ସରକାରଙ୍କ ଊପରେ ବର୍ଷିଲା କଂଗ୍ରେସ । କହିଲା, ୯ ମାସର ବିଜେପି ସରକାର ସମୟରେ ନାରୀ ନିର୍ଯାତନା ବଢିଛି । ନାବାଳିକା ଗର୍ଭବତୀ ହୋଇଛନ୍ତି । କଂଗ୍ରେସ ହାଉସ କମିଟି ଦାବି କରିବାକୁ ଦଳର ସମସ୍ତ ୧୪ ବିଧାୟକଙ୍କୁ ନିଲମ୍ବନ କଲେ । ସରକାର ଆଲୋଚନା କଲେ ନାହିଁ, କି ମୁଖ୍ୟମନ୍ତ୍ରୀ ଶୁଣିଲେ ନାହିଁ । ପବିତ୍ର ଗୃହରେ ବିଜେପି ବିଧାୟକ ଓ ସଂସଦୀୟ ମନ୍ତ୍ରୀ ଅସଭ୍ୟ ଭାଷାରେ ଗାଳିଗୁଲଜ କଲେ । ସମସ୍ତ ବିଧାୟକଙ୍କୁ ନିଲମ୍ବନ କରି କଳା ଅଧାୟ ସୃଷ୍ଟି କଲେ । ସରକାର କଂଗ୍ରେସକୁ ଡରି ୩ ଦିନ ପୂର୍ବରୁ ବିଧାନସଭା ବନ୍ଦ କରିଦେଲେ ।

ପୋଲିସ ଲଗାଇ କଂଗ୍ରେସ ବିଧାୟକଙ୍କୁ ମାଡ ମାରିବା ସହ ଅସମ୍ମାନ କଲେ । ସରକାର ପଳାୟନ ପନ୍ଥୀ ନୀତି ଆପଣାଇଲେ l ହେଲେ କଂଗ୍ରେସ ଲଢ଼େଇ ଜାରି ରଖିବ ବୋଲି ପ୍ରେସମିଟ କରି କହିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ।

ସେପଟେ ଏହାକୁ ନେଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ବି ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି । ତାରା କହିଛନ୍ତି, ଆମେ ଚୁପ ବସିବୁନି । ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରି ସେ କହିଛନ୍ତି, ମୁଖ୍ୟମନ୍ତ୍ରୀ କଂଗ୍ରେସ ସଦସ୍ୟଙ୍କୁ ଗୃହରେ ପ୍ରଶ୍ନ କରିବାକୁ ଦେଲେ ନାହିଁ । କଂଗ୍ରେସ ପୋଲିସ ସହ ନୁହେଁ, ସରକାର ବିରୋଧରେ ଲଢ଼େଇ କରିବ । ପୋଲିସ ଆକ୍ରୋଶମୂଳକ କାର୍ଯାନୁଷ୍ଠାନ ନେଲେ ଦଳ ଚୁପ୍ ବସିବନି ।

ସେହିପରି ପିସିସି ସଭାପତି ଭକ୍ତ ଚରଣ ଦାସ ସରକାରଙ୍କୁ ଟାର୍ଗେଟ କରି କହିଛନ୍ତି, ସରକାର ନାରୀଙ୍କୁ ନ୍ୟାୟ ଦେବା ତ ଦୂରର କଥା ଗୋଟେ ହାଉସ କମିଟି ଗଠନ କରିପାରିଲେନି । ନାରୀ ସୁରକ୍ଷା ପାଇଁ ୫ ଜଣିଆ ମନ୍ତ୍ରୀ ଟିମ୍ ଗଠନ କରିପାରିଥାନ୍ତେ । ହେଲେ ସରକାର ତାହା କଲେ ନାହିଁ । ରାଜ୍ୟରେ କେତେ ନାବାଳିକା ଗର୍ଭବତୀ ହୋଇଛନ୍ତି କଂଗ୍ରେସ ସେହି ଗୋଟିଏ ପ୍ରଶ୍ନର ଉତ୍ତର ଜାଣିବାକୁ ଚାହୁଁଛି । ରାଜ୍ୟରେ କାହିଁକି ଛୋଟ ଛୋଟ ଝିଅଙ୍କୁ ସୁରକ୍ଷା ଦିଆଯାଇ ପାରୁନି ବୋଲି ଉଦବେଗର ସହ ପ୍ରଶ୍ନ କରିଛନ୍ତି ଭକ୍ତ ।

ସୁଭଦ୍ରା ନାଁରେ ଭେଳିକି ଚାଲିଛି । ଏହି ଯୋଜନାରେ ରାଜ୍ୟ ସରକାର ଯେତେ ଟଙ୍କା ଦେଉଛନ୍ତି ଗୋଟେ ଦିନର ମିଲ ହୋଇପାରିବନି । ରାଜ୍ୟରେ ୫୦ ପ୍ରତିଶତ ମହିଳାଙ୍କ ପାଇଁ କଂଗ୍ରେସ ଲଢ଼ିଛି । ଭୋଟ ସମୟରେ ମହିଳା କଥା କହି କ୍ଷମତାକୁ ଆସିଛି ବିଜେପି । ରାଜ୍ୟକୁ ଆଉ ବିଜେପି କଳଙ୍କିତ ନକରୁ ବୋଲି ପରାମର୍ଶ ଦେଇଛନ୍ତି ଭକ୍ତ । ୧୫ ତାରିଖରେ କଂଗ୍ରେସ ସବୁ ବ୍ଲକରେ ମଶାଲ ପ୍ରଦର୍ଶନ କରିବ । କଂଗ୍ରେସର ବରିଷ୍ଠ ନେତା ଜିଲ୍ଲା ଗସ୍ତ କରିବେ । ପର୍ଯ୍ୟବେକ୍ଷକମାନେ ୫ ଦିନ ଜିଲ୍ଲାରେ ରହି ୨୧ ତାରିଖ ଦିନ ସମସ୍ତ ଜିଲ୍ଲାରେ ବିଶାଳ ଶୋଭାଯାତ୍ରା କରିବେ । ବିଜେପି ମନ୍ତ୍ରୀ ଓ ବିଧାୟକଙ୍କ ପାଇଁ ମହିଳା ଝାଡୁ ଧରିବେ । ମହିଳାଙ୍କୁ ରାଜ୍ୟ ସରକାର ସୁରକ୍ଷା ଦେଉନାହାନ୍ତି । ମନ୍ତ୍ରୀ କି ବିଧାୟକ ରାଜ୍ୟରେ ଯେଉଁଠି ସଭା ସମିତି କରିବେ ସେଠି ଝାଡୁ ଧରି ପ୍ରତିବାଦ କରିବାକୁ ଭକ୍ତ ଆହ୍ବାନ ଦେଇଛନ୍ତି । ଝାଡୁ ଦ୍ଵାରା ବିଜେପି ନେତାଙ୍କୁ କ୍ଲିନ୍ କରନ୍ତୁ । ତା’ପରେ ସେମାନେ ସଭା କରନ୍ତୁ । ଏହାସହ ହାତ ଯୋଡ଼ି ପିସିସି ସଭାପତି ଓଡ଼ିଶାର ମହିଳାମାନଙ୍କୁ ନିବେଦନ କରି କହିଛନ୍ତି, ନିଖୋଜ ମହିଳାଙ୍କୁ କ୍ୟାଣ୍ଡେଲ ଧରି ଖୋଜନ୍ତୁ । ସବୁ ଜିଲ୍ଲାରେ ମହିଳା ସୁରକ୍ଷା ପାଇଁ ପଦଯାତ୍ରା କରିବ କଂଗ୍ରେସ । ଜିଲ୍ଲା କଂଗ୍ରେସ କର୍ମୀ ସମ୍ମିଳନୀ ହେବ । ଏ ସବୁ ପରେ ଖସଡ଼ା ପ୍ରସ୍ତୁତ କରିବ କଂଗ୍ରେସ । ତା’ପରେ ଜିଲ୍ଲା କମିଟି ଗଠନ କରାଯିବ ବୋଲି ଭକ୍ତ କହିଛନ୍ତି ।

ସେପଟେ ଜାତୀୟ ଶିକ୍ଷା ନୀତିକୁ ନେଇ ସୋନିଆ ଗାନ୍ଧୀଙ୍କ ବୟାନକୁ ନେଇ ବିଜେପି ନେତାମାନେ ଯେଉଁ ଅସଭ୍ୟ ଭାଷା କହୁଛନ୍ତି ଭକ୍ତ ଦାସ ତାର ବିରୋଧ କରିଛନ୍ତି । ତେବେ ସୋନିଆ ଗାନ୍ଧୀଙ୍କୁ ଯିଏ ଅସଭ୍ୟ ଭାଷା କହିବେ ଓ ଅସମ୍ମାନ କରିବେ ତାଙ୍କୁ ଓଡ଼ିଶାରେ ବିରୋଧ କରାଯିବ ବୋଲି କହିଛନ୍ତି ଭକ୍ତ ।

ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣା: ପରିତ୍ରାଣ ସାକ୍ଷ୍ୟ ପାଇଁ କୋର୍ଟରେ ପୁଞ୍ଜିଲାଲ

ପାଟଣାଗଡ଼: ବଲାଙ୍ଗୀରର ବହୁଚର୍ଚ୍ଚିତ ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣା।  ପରିତ୍ରାଣ ସାକ୍ଷ୍ୟ ପ୍ରଦାନ ପାଇଁ ପାଟଣାଗଡ଼ କୋର୍ଟରେ ହାଜର ହେଲେ ଅଭିଯୁକ୍ତ ପୁଞ୍ଜିଲାଲ ମେହେର । ମାମାଲା ସାକ୍ଷ୍ୟ ଶେଷ ହୋଇଥିବା ବେଳେ ନିଜ ପକ୍ଷରୁ ପରିତ୍ରାଣ ସାକ୍ଷ୍ୟ ଦେବା ପାଇଁ କୋର୍ଟକୁ ନିବେଦନ କରିଥିଲେ ପୁଞ୍ଜିଲାଲ । ଏନେଇ ଆଜି ସାକ୍ଷ୍ୟ ପ୍ରଦାନ ପାଇଁ ପୁଞ୍ଜିଲାଲଙ୍କୁ ବଲାଙ୍ଗୀର ଜିଲ୍ଲା କାରାଗାରରୁ ପାଟଣାଗଡ଼ କୋର୍ଟକୁ କଡା ସୁରକ୍ଷା ମଧ୍ୟରେ ନିଆଯାଇଛି । ପରିତ୍ରାଣ ସାକ୍ଷ୍ୟ ପରେ ମାମାଲାର ରାୟ ପ୍ରକାଶ ପାଇବାର ସମ୍ଭାବନା ରହିଛି ।

ମାମଲାରେ ମୋଟ ୬୩ ଜଣଙ୍କ ସାକ୍ଷଗ୍ରହଣ ଶେଷ ହୋଇଛି । ୨୦୧୮ ଫେବୃଆରୀ ୨୩ ତାରିଖରେ ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣା ଘଟିଥିଲା । ବିସ୍ଫୋରଣରେ ସୌମ୍ୟଶେଖର ସାହୁ ଏବଂ ତାଙ୍କ ଜେଜେମା ଜେମାମଣି ସାହୁଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ବୃତ୍ତିଗତ ଶତ୍ରୁତାକୁ କେନ୍ଦ୍ର କରି ଅଧ୍ୟାପକ ପୁଞ୍ଜିଲାଲ ଭଇଁଷା କଲେଜ ଅଧ୍ୟକ୍ଷା ସଂଯୁକ୍ତା ସାହୁଙ୍କ ଘରକୁ ପାର୍ସଲ ବୋମା ପଠାଇଥିଲା । ଘଟଣାର ତଦନ୍ତ କରି କ୍ରାଇମ୍‌ବ୍ରାଞ୍ଚ ପୁଞ୍ଜିଲାଲକୁ ୨୦୧୮ ଏପ୍ରିଲ ୨୫ ତାରିଖରେ ଗିରଫ କରିଥିଲା । ସେବେଠାରୁ ପୁଞ୍ଜିଲାଲ ବଲାଙ୍ଗୀର ଜିଲ୍ଲା କାରାଗାରରେ ବନ୍ଦୀ ଭାବେ ରହିଛି ।