spot_img
Home Blog Page 1146

ରିଲ୍ସ କରି ଭାଇରାଲ ହେବା ନିଶାରେ କଇଁଛକୁ ନିର୍ଯାତନା

ଭୁବନେଶ୍ବର: ଯୁବପୀଢ଼ିଙ୍କୁ ରିଲ୍ସ ନିଶା କରିଛି ବାୟା । ଭୁଲି ଯାଉଛନ୍ତି ହିତାହିତ ଜ୍ଞାନ । ଭାଇରାଲ ହେବା ନିଶାରେ ବନ୍ୟଜନ୍ତୁଙ୍କୁ ବି ଦେଉଛନ୍ତି ନିର୍ଯାତନା । ରାତାରାତି ଲୋକପ୍ରିୟତା ହାସଲ କରିବାକୁ ନିରୀହ କଇଁଛକୁ ବି ଛାଡିନାହାନ୍ତି । ଭିଡିଓ ଭାଇରାଲ ପରେ ସ୍ଵର ଉଠାଇଛନ୍ତି ପଶୁପ୍ରେମୀ । କିଛି ଲାଇକ୍ସ ଓ କମେଣ୍ଟେସ ପାଇଁ ଭୁଲି ଯାଉଛନ୍ତି ମାନବିକତା । ଯାଜପୁର ଅଞ୍ଚଳର ଦୁଇ ପୁଅ ଝିଅ ଗୋଟେ କଇଁଛଟିକୁ ଧରି ଦୀର୍ଘ ସମୟ ଧରି ମାଡିବସି ତା ପିଠିରେ ଜଗନ୍ନାଥଙ୍କ ଚିତ୍ର ଆଙ୍କି ଭିଡିଓକୁ ସୋସିଆଲ ମିଡିଆରେ ଭାଇରାଲ କରିଛନ୍ତି ।

ଏହାକୁ ନେଇ ଆପତ୍ତି ଉଠାଇଛନ୍ତି ଖୋର୍ଦ୍ଧା ଜିଲ୍ଲା ଅବୈତନିକ ବନ୍ୟପ୍ରାଣୀ ତତ୍ତ୍ଵାବଧାରକ ଶୁଭେନ୍ଦୁ ମଲ୍ଲିକ । ବନ୍ୟପ୍ରାଣୀ ଆଇନ ସିଡୁଲ-1ରେ କଇଁଛ ରହିଛି । ଆଇନ ଅନୁସାରେ କଇଁଛକୁ ମନୋରଞ୍ଜନ ପାଇଁ ବ୍ୟବହାର କରାଯାଇପାରିବ ନାହିଁ । ହେଲେ ବିଶ୍ୱଜିତ ଜେନା ନାମକ ଯୁବକ ଓ ତାଙ୍କ ସହିତ ଆଉ ଜଣେ ମହିଳା ଏହି ଭିଡିଓରେ ରହିଛନ୍ତି । ଆଇନର ସବୁ ନିୟମକୁ ଫୁ କରି କେବଳ ଭାଇରାଲ ହେବା ପାଇଁ ଏମିତି କରୁଛନ୍ତି ବୋଲି କହିଛନ୍ତି ଶୁଭେନ୍ଦୁ । ଭିଡିଓରେ କଇଁଛଟିକୁ ବଳପୂର୍ବକ ମାଡି ବସି ଧରି ତା ପିଠିରେ କେମିକାଲ ଯୁକ୍ତ କଲର ଲଗାଇ ରିଲ୍ସ କରୁଛନ୍ତି । ବନ୍ୟପ୍ରାଣୀ ଆଇନ୍ ଅନୁସାରେ ଏହା ଗୁରୁତର ଅପରାଧ । ଯେଉଁଥିପାଇଁ ୩ ବର୍ଷରୁ ଅଧିକ ଦଣ୍ଡ ବିଧାନ ରହିଛି । ଘଟଣା ନେଇ ବନ ବିଭାଗରେ ଅଭିଯୋଗ କରିଛନ୍ତି ଶୁଭେନ୍ଦୁ ।

ଭାରତ ମହାସାଗରରେ ଚୀନକୁ କାଉଣ୍ଟର କରିବାକୁ ଭାରତ ଓ ଶ୍ରୀଲଙ୍କା ମଧ୍ୟରେ ଚୁକ୍ତି

ନନ୍ଦିଘୋଷ ବ୍ୟୁରୋ: ଭାରତ ମହାସାଗର ଅଞ୍ଚଳରେ ଚୀନର ପ୍ରଭାବକୁ କରାଯିବ କାଉଣ୍ଟର । ଭାରତ ଓ ଶ୍ରୀଲଙ୍କା ମଧ୍ୟରେ ପ୍ରତିରକ୍ଷା ଚୁକ୍ତି ସ୍ବାକ୍ଷରିତ । ଏହାସହ ଶକ୍ତି, ଡିଜିଟାଲ ଭିତ୍ତିଭୂମି, ସ୍ବାସ୍ଥ୍ୟ, ବାଣିଜ୍ୟ କ୍ଷେତ୍ରରେ ବି ଚୁକ୍ତି ସମ୍ପାଦିତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶ୍ରୀଲଙ୍କା ଗସ୍ତ ଅବସରରେ ଏହି ଚୁକ୍ତି ସ୍ବାକ୍ଷରିତ ହୋଇଛି ।

ଶ୍ରୀଲଙ୍କା ପକ୍ଷରୁ ଚୁକ୍ତିରେ ସ୍ବାକ୍ଷର କରିଛନ୍ତି ରାଷ୍ଟ୍ରପତି ଅନୁରା କୁମାରା ଦିଶାନାଏକେ । ୨୦୨୨ରେ ଶ୍ରୀଲଙ୍କା ଆର୍ଥିକ ଦୁଃସ୍ଥିତିରେ ଗତି କରୁଥିବାବେଳେ ଭାରତ ସହାୟତାର ହାତ ବଢ଼ାଇଥିଲା । ଶ୍ରୀଲଙ୍କାକୁ ଭାରତ ଦେଇଥିଲା ୪ ନିୟୁତ ଡଲାର । ଏହାସହ ଶ୍ରୀଲଙ୍କାର ବିକାଶ ଓ ପୁନର୍ଗଠନ ଲାଗି ସହାୟତା ଜାରି ରହିବ ବୋଲି ଭାରତ ଘୋଷଣା କରିଥିଲା । ଦୁଇ ଦେଶ ମଧ୍ୟରେ ପାରସ୍ପରିକ ସହଯୋଗ ଲାଗି ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଛି । ଶ୍ରୀଲଙ୍କାକୁ କମ ସୁଧହାରରେ ସହୟତା ଦେବା ଲାଗି ଭାରତ ନିଷ୍ପତ୍ତି ନେଇଛି । ଭାରତର ନ୍ୟାସନାଲ ଥର୍ମାଲ ପାୱାର କର୍ପୋରେସନ ଓ ଶ୍ରୀଲଙ୍କାର ସିଲନ ଇଲେକ୍ଟ୍ରିସିଟି ବୋର୍ଡ ମଧ୍ୟରେ ୧୨୦ ମେଗାୱାଟ ସୋଲାର ପାୱାର ପ୍ଲାଣ୍ଟ ପ୍ରସଙ୍ଗରେ ଚୁକ୍ତିନାମା ସ୍ବାକ୍ଷରିତ ହୋଇଛି ।

ଗ୍ରୀନଲାଣ୍ଡ କାହାର ? ଡେନମାର୍କର ନା ଆମେରିକାର

ନନ୍ଦିଘୋଷ ବ୍ୟୁରୋ: ଗ୍ରୀନଲାଣ୍ଡକୁ ନେଇ ତେଜିଲା ବିବାଦ । ଗ୍ରୀନଲାଣ୍ଡ ଡେନମାର୍କ ଅଧୀନରେ ରହିବ ନା ଆମେରିକା ଅଧୀନକଚ ଯିବ ତାକୁ ନେଇ ବଢିବାରେ ଲାଗିଛି ବିତର୍କ । ଡେନମାର୍କ ଅଧୀନରେ ରହିବାକୁ ଗ୍ରୀନଲାଣ୍ଡବାସୀ ଚାହୁଁନାହାନ୍ତି ବୋଲି କହିଛନ୍ତି ଆମେରିକା ବୈଦେଶିକ ମନ୍ତ୍ରୀ ମାର୍କୋ ରୁବିଓ । ସେପଟେ ଏହି ଦାବିକୁ ଅଗ୍ରାହ୍ୟ କରିଛନ୍ତି ଡେନମାର୍କ ପ୍ରଧାନମନ୍ତ୍ରୀ ମେଟ୍ଟେ ଫ୍ରେଡରିକସେନ । ବ୍ରସେଲସସ୍ଥିତ ନାଟୋ ମୁଖ୍ୟାଳୟରେ ରୁବିଓଙ୍କ ବିବୃତିକୁ ବିରୋଧ କରିଛନ୍ତି ଡେନମାର୍କ ପ୍ରଧାନମନ୍ତ୍ରୀ ।

ସେପଟେ ରୁବିଓଙ୍କ ମନ୍ତବ୍ୟକୁ ବିରୋଧ କରିଛନ୍ତି ଗ୍ରୀନଲାଣ୍ଡ ପ୍ରଧାନମନ୍ତ୍ରୀ ଜେନ୍ସ ଫ୍ରେଡରିକ ନେଲସନ । ସେ କହିଛନ୍ତି, ଗ୍ରୀନଲାଣ୍ଡ କି ଡେନମାର୍କ ଆମେରିକାରେ ରହିବାକୁ ଚାହାଁନ୍ତି ନାହିଁ । କୌଶଳଗତ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ଗ୍ରୀନଲାଣ୍ଡକୁ ନେବା ଲାଗି ବର୍ତ୍ତମାନ ଆମେରିକା ପ୍ରାଥମିକତା ଦେଉଛି । ଉଭୟ ଗ୍ରୀନଲାଣ୍ଡ ଓ ଡେନମାର୍କ ଦୀର୍ଘ ଦିନ ଧରି ଆମେରିକାର ସହଯୋଗୀ ଭାବେ ରହି ଆସିଛନ୍ତି । ଗ୍ରୀନଲାଣ୍ଡରେ ବି ଆମେରିକାର ସାମରିକ ଓ ଆଣବିକ କ୍ଷେପଣାସ୍ତ୍ର ଘାଟି ରହିଛି । ଏହି ଭୂଖଣ୍ଡରେ ଥିବା ଦାମୀ ପ୍ରାକୃତିକ ସମ୍ପଦ ଉପରେ ଆମେରିକାର ଆଖି ରହିଛି । ଗତ ମାସରେ ଆମେରିକା ବିରୋଧରେ ଗ୍ରୀନଲାଣ୍ଡରେ ବିକ୍ଷୋଭ ହୋଇଥିଲା । ଗ୍ରୀନଲାଣ୍ଡରେ ଚାରିଟି ରାଜନୈତିକ ଦଳ ଆମେରିକାର ଏହି ପ୍ରସ୍ତାବକୁ ବିରୋଧ କରିଛନ୍ତି । ଗତ ମାର୍ଚ୍ଚରେ ଆମେରିକା ଉପରାଷ୍ଟ୍ରପତି ଜେ.ଡି. ଭାନ୍ସଙ୍କ ଗ୍ରୀନଲାଣ୍ଡ ଗସ୍ତ ପରେ ସେଠାରେ ଜୋରଦାର ପ୍ରତିବାଦ ଆନ୍ଦୋଳନ ହୋଇଛି ।

କାହିଁକି ଗ୍ରୀନଲାଣ୍ଡ ଚାହୁଁଛନ୍ତି ଟ୍ରମ୍ପ ?

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାହିଁକି ଗ୍ରୀନଲାଣ୍ଡକୁ ଆମେରିକାରେ ମିଶାଇବାକୁ ଚାହୁଁଛନ୍ତି, ଆସନ୍ତୁ ଜାଣିବା । ବର୍ତ୍ତମାନ ଡେନମାର୍କ ଅଧୀନରେ ଏକ ସ୍ବାଧୀନ ଭୂଖଣ୍ଡ ଭାବେ ରହିଛି ଗ୍ରୀନଲାଣ୍ଡ । ବିଶ୍ବର ସର୍ବହୃହତ ଦ୍ବୀପ ହେଉଛି ଗ୍ରୀନଲାଣ୍ଡ । ଏହାର ଜନସଂଖ୍ୟା ମାତ୍ର ୫୬ ହଜାର । ପ୍ରାୟ ୮୦ ପ୍ରତିଶତ ଅଞ୍ଚଳ ରହିଛି ବରଫାବୃତ୍ତ । ଗ୍ରୀନଲାଣ୍ଡ ରାଜଧାନୀ ନୁକ ଚାରିପଟେ ଲୋକେ ବସବାସ କରନ୍ତି । ଗ୍ରୀନଲାଣ୍ଡରେ ଡେନମାର୍କ ଓ ଆମେରିକାର ସାମରିକ ଘାଟିମାନ ରହିଛି । ଏଠାରେ ବିରଳ ମୃତ୍ତିକା ସମେତ ଅନେକ ପ୍ରାକୃତିକ ସମ୍ବଳ ରହିଛି । ବଡ଼କଥା ହେଉଛି ବିଶ୍ବ ତାପାୟନ ଯୋଗୁଁ ବରଫ ତରଳିବା ସହ ଖଣିଜ ପଦାର୍ଥ ମିଳିବା ସମ୍ଭବ ହେବ ।

ପ୍ରାୟ ୩୦୦ ବର୍ଷ ଧରି ୩ ହଜାର କିଲୋମିଟର ଦୂରରେ ଥିବା ଗ୍ରାନଲାଣ୍ଡ ରହିଛି ଡେନମାର୍କ ଅଧୀନରେ । ଦ୍ବିତୀୟ ବିଶ୍ବଯୁଦ୍ଧ ବେଳେ ଡେନମାର୍କକୁ ନାଜି ଜର୍ମାନୀ କବଳିତ କରିବା ପରେ ଗ୍ରୀନଲାଣ୍ଡ ଉପରେ ଆକ୍ରମଣ କରିଥିଲା ଆମେରିକା । ସେଠାରେ ପ୍ରତିଷ୍ଠା କରିଥିଲା ରେଡିଓ ଷ୍ଟେସନ । ଚୀନ ଓ ରୁଷକୁ ଟକ୍କର ଦେବା ଲାଗି ବି ଗ୍ରୀନଲାଣ୍ଡ ଭୌଗଳିକ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ।

କିମ୍ବଦନ୍ତୀ କଳାକାର ମନୋଜ କୁମାରଙ୍କ ଶେଷକୃତ୍ୟ ସମ୍ପନ୍ନ

ନନ୍ଦିଘୋଷ ବ୍ୟୁରୋ: କିମ୍ବଦନ୍ତୀ କଳାକାର ମନୋଜ କୁମାରଙ୍କ ଶେଷକୃତ୍ୟ ସମ୍ପନ୍ନ। ମୁମ୍ଵାଇ ଭିଲେ ପାର୍ଲେରେ ଥିବା ରାଜହଂସ ଶ୍ମଶାନରେ ହୋଇଛି ଅନ୍ତିମ ସଂସ୍କାର । ଶେଷକୃତ୍ୟ ବେଳେ ସାମିଲ ହୋଇଥିଲେ ବଲିଉଡର ଅନେକ କଳାକାର। ଶୋକାକୁଳ ପରିବେଶରେ ତାଙ୍କର ଅନ୍ତିମ ସଂସ୍କାର କରାଯାଇଛି। ୮୭ ବର୍ଷ ବୟସରେ ମୁମ୍ବାଇର କୋକିଳାବେନ୍ ହସ୍ପିଟାଲରେ ଆଖି ବୁଜିିଥିଲେ ବର୍ଷିଆନ ଅଭିନେତା ମନୋଜ କୁମାର। ସମଗ୍ର ଦେଶରେ ଦେଶାତ୍ମବୋଧକ ଫିଲ୍ମ ପାଇଁ ଭାରତ କୁମାର ନାଁରେ ତାଙ୍କର ଅଧିକ ପରିଚିତି ରହିଥିଲା। ୧୯୫୭ ମସିହାରେ ଫ୍ୟାସନ୍ ଫିଲ୍ମରୁ ଡେବ୍ୟୁ କରିଥିଲେ ମନୋଜ। ପରେ ପରେ ଷାଠିଏ ଓ ୭୦ ଦଶକରେ ଦେଇଥିଲେ ବହୁ ସୁପରହିଟ୍ ଫିଲ୍ମ।ଉପକାର ଫିଲ୍ମ ପାଇଁ ୧୯୬୭ ମସିହାରେ ତାଙ୍କୁ ଜାତୀୟ ଚଳଚିତ୍ର ପୁରସ୍କାର ମିଳିଥିଲା।

୧୯୬୪ରୁ ୧୯୮୦ ଥିଲା ମନୋଜ କୁମାରଙ୍କ ଏରା। ୧୯୮୧ର କ୍ରାନ୍ତି ଥିଲା ଭାରତୀୟ ସିନେମା ଜଗତର ଅନ୍ୟଏକ ମାଇଲଖୁଣ୍ଟ। ସହିଦ, ସୋର, ରୋଟି କପଡା ଔର ମକାନ, ପୂରବ ଔର ପଶ୍ଚିମ, ମେରା ନାମ ଜୋକର, ଦଶ ନମ୍ବରୀ ସହିତ ଶହେରୁ ଅଧିକ ଫିଲ୍ମରେ ତାଙ୍କର ସୁନ୍ଦର ଅଭିନୟ ଦେଖିବାକୁ ମିଳିଥିଲା। ୧୯୯୨ରେ ଭାରତ ସରକାରଙ୍କ ପକ୍ଷରୁ ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଥିଲା। ୧୯୯୯ରେ ଜୀବନ ବ୍ୟାପୀ ସାଧନା ପାଇଁ ଲାଇଫ୍ ଟାଇମ୍ ସମ୍ମାନ ହାସଲ କରିଥିଲେ।୨୦୧୫ରେ ଫିଲ୍ମ ଜଗତର ଶ୍ରେଷ୍ଠ ସମ୍ମାନ, ଦାଦା ସାହେବ ଫାଲକେରେ ସମ୍ମାନିତ ହୋଇଥିଲେ ମନୋଜ କୁମାର। ସେ ମୋଟ୍ ୭ ଥର ଫିଲ୍ମ ଫେୟାର ଆୱାର୍ଡରେ ସମ୍ମାନିତ ହୋଇଛନ୍ତି।

ପୁରୀରେ ଏୟାରପୋର୍ଟ ଅଥରିଟିର ସ୍ୱତନ୍ତ୍ର ଟିମ

ନନ୍ଦିଘୋଷ ବ୍ୟୁରୋ: ପୁରୀରେ ଏୟାରପୋର୍ଟ ଅଥରିଟିର ସ୍ୱତନ୍ତ୍ର ଟିମ। ପ୍ରସ୍ତାବିତ ଶ୍ରୀଜଗନ୍ନାଥ ଗ୍ରୀନଫିଲଡ ବିମାନ ବନ୍ଦର ଅଂଚଳ ବୁଲି ସମୀକ୍ଷା କରିଛି ଟିମ । ଦୀର୍ଘ ଦିନର ବ୍ୟବଧାନ ପରେ ବିମାନ ବନ୍ଦର ପ୍ରାଧିକରଣ ଟିମ ପରିଦର୍ଶନରେ ଆସିବା ପରେ ଗ୍ରୀନଫିଲଡ ବିମାନ ବନ୍ଦର ନିର୍ମାଣ ନେଇ ଆଶା ବଢିଛି । ବିଜେଡି ସରକାର ଅମଳରେ ପୁରୀରେ ଏକ ବିମାନ ବନ୍ଦର ନିର୍ମାଣ ନେଇ ପୂର୍ବତନ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରକୁ ଚିଠି ଲେଖି ଦାବି ଜଣାଇଥିଲେ । ଏହାପରେ କେନ୍ଦ୍ର ପ୍ରକ୍ରିୟା ଚାଲୁରଖିଛି ।

ବିଜେପି ବିଧାୟକ ଜୟ ନାରାୟଣ ମିଶ୍ରଙ୍କୁ ବିଜେଡିର କଡା ସମାଲୋଚନା

ନନ୍ଦିଘୋଷ ବ୍ୟୁରୋ: ବିଜେପି ବିଧାୟକ ଜୟ ନାରାୟଣ ମିଶ୍ରଙ୍କୁ ବିଜେଡିର କଡା ସମାଲୋଚନା। ବିଜେଡି ବିଧାୟକ ଶାରଦା ଜେନା କହିଛନ୍ତି- ଯିଏ ବିଶୃଙ୍ଖଳିତ ଆଚରଣ କରିବ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ହେବାର ଆବଶ୍ୟକତା ଅଛି। କିଛି କାର୍ଯ୍ୟାନୁଷ୍ଠାନ ଲୋକ ଦେଖାଣିଆ ହୁଏ ତେ କେତେକ ଯଥାର୍ଥରେ ହୁଏ। ଜୟ ନାରାୟଣ ଯେଉଁ ଆଚରଣ କରିଛନ୍ତି, ତାକୁ ନେଇ ସରକାର କି କାର୍ଯ୍ୟାନୁଷ୍ଠାନ ନେଉଛନ୍ତି ତାହା ଦେଖିବାକୁ ବାକି ରହିଛି। ଜଣେ ଜନପ୍ରତିନିଧି ହୋଇ ଏହି ବିଶୃଙ୍ଖଳିତ ଆଚରଣ ଯଥାର୍ଥ ନୁହେଁ ବୋଲି କହିଛନ୍ତି ଶାରଦା। ସେପଟେ ଆଇନ ଶୃଙ୍ଖଳା ଭୁଶୁଡିଥିବା ନେଇ ବିରୋଧୀଙ୍କ ଅଭିଯୋଗକୁ ସବୁବେଳେ ଖଣ୍ଡନ କରି ଚାଲିଛନ୍ତି ସରକାର। ରାଜ୍ୟରେ ଆଇନଶୃଙ୍ଖଳା ଠିକ୍ ଅଛି ବୋଲି କହୁଛନ୍ତି ସରକାର। ମାତ୍ର ଜୟନାରାୟଣଙ୍କ କ୍ଷେତ୍ରରେ ରାଜ୍ୟ ସରକାରଙ୍କ ଆଭିମୁଖ୍ୟ ଜଣାପଡିଯାଇଛି ବୋଲି କହିଛନ୍ତି- ବିଧାୟକ ଗଣେଶ୍ବର ବେହେରା। ସେପଟେ ଜୟନାରାୟଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି କଂଗ୍ରେସ ବିଧାୟକ ତାରା ବାହିନୀପତି।

ଆଇନରେ ପରିଣତ ହେଲା ଅପ୍ରବାସୀ ଓ ବିଦେଶୀ ବିଲ୍-୨୦୨୫

ନନ୍ଦିଘୋଷ ବ୍ୟୁରୋ: ଆଇନରେ ପରିଣତ ହେଲା ଅପ୍ରବାସୀ ଓ ବିଦେଶୀ ବିଲ୍-୨୦୨୫ । ବିଲ୍ ଉପରେ ଶୁକ୍ରବାର ମୋହର ମାରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଫଳରେ ଜାଲ୍ ପାସପୋର୍ଟ ବା ଭିସା ହାସଲ କରି ଭାରତରେ ରହୁଥିବା ଲୋକମାନେ କଠୋର ଦଣ୍ଡର ସମ୍ମୁଖୀନ ହେବେ । ଯେଉଁମାନେ ଶିକ୍ଷା, ପର୍ଯ୍ୟଟନ, ସ୍ବାସ୍ଥ୍ୟସେବା, ବ୍ୟବସାୟ ଆଦି ଲାଗି ଭାରତ ଆସିବେ ସେମାନଙ୍କୁ ସ୍ବାଗତ କରାଯିବ । ମାତ୍ର ଯେଉଁମାନେ ଦେଶ ଲାଗି ବିପଦ ସେମାନଙ୍କ କ୍ଷେତ୍ରରେ କଠୋର ଆଭିମୁଖ୍ୟ ଗ୍ରହଣ କରାଯିବ । ଯେଉଁମାନେ ଦେଶର ନିରାପତ୍ତା ଲାଗି ବିପଦ ସେମାନଙ୍କୁ ଭାରତରେ ପ୍ରବେଶ ଲାଗି ଅନୁମତି ଦିଆଯିବ ନାହିଁ । ଦେଶର ନିରାପତ୍ତା, ଅର୍ଥନୀତି, ବ୍ୟବସାୟର ବିକାଶ ଲାଗି ଏହି ଆଇନ ଉଦ୍ଦିଷ୍ଟ । ନୂଆ ଆଇନ ଯୋଗୁ ମ୍ୟାମାର ଓ ବାଂଲାଦେଶୀ ରୋହିଁଗ୍ୟାମାନଙ୍କ ଅନୁପ୍ରବେଶ ଉପରେ ରୋକ୍ ଲାଗିବ ।  ଭାରତରେ ପ୍ରବେଶ ଲାଗି ବା ରହିବା ଲାଗି ଯେଉଁମାନେ ଜାଲ୍ ପାସପୋର୍ଟ ବା ଭିସା ବ୍ୟବହାର କରୁଛନ୍ତି ସେମାନଙ୍କ ବିରୋଧରେ କଡା ଦଣ୍ଡ ବ୍ୟବସ୍ଥା ରହିଛି । ପ୍ରାୟ ୭ ବର୍ଷ ଜେଲଦଣ୍ଡ ଓ ପ୍ରାୟ ୧୦ ଲକ୍ଷ ଟଙ୍କାର ଜରିମାନା ବ୍ୟବସ୍ଥା ରହିଛି । ହୋଟେଲ, ବିଶ୍ବବିଦ୍ୟାଳୟ, ଶିକ୍ଷା ପ୍ରତିଷ୍ଠାନ, ହସ୍ପିଟାଲ, ନର୍ସିଂହୋମ ବିଦେଶୀଙ୍କ ସମ୍ପର୍କରେ ତଥ୍ଯ ଦେବାକୁ ବାଧ୍ୟତାମୂଳକ କରାଯାଇଛି । ଯଦି କୌଣସି ବ୍ୟକ୍ତି ବିନା ବୈଧ ପାସପୋର୍ଟ ଓ ଟ୍ରାଭେଲ ଡକୁମେଣ୍ଟ ବିନା ଭାରତର ଯେ କୌଣସି ସ୍ଥାନରେ ପ୍ରବେଶ କରନ୍ତି ତେବେ ତାହା ଦେଶର ଆଇନର ଉଲ୍ଲଂଘନ ବୋଲି ବିଚାର କରିବାକୁ ହେବ । ଏକ୍ଷେତ୍ରରେ ୫ ବର୍ଷ ଯାଏ ଜେଲଦଣ୍ଡ ବା ପ୍ରାୟ ୫ ଲକ୍ଷ ଯାଏ ଜରିମାନା କିମ୍ବା ଉଭୟ ଦଣ୍ଡ ମିଳିବ । ବର୍ତ୍ତମାନ ବିଦେଶୀ ଓ ପ୍ରବାସୀଙ୍କ ଲାଗି ଚାରିଟି ଆଇନ ଲାଗୁ ରହିଛି । ନୂଆ ଆଇନ ଆସିବା ପରେ ପାସପୋର୍ଟ ଆଇନ ୧୯୨୦, ବିଦେଶୀଙ୍କ ପଞ୍ଜିକରଣ ଆଇନ ୧୯୩୯, ବିଦେଶୀଙ୍କ ଲାଗି ଉଦ୍ଦିଷ୍ଟ ଆଇନ ୧୯୪୬, ଅପ୍ରବାସୀ ଆଇନ ୨୦୦୦ ହଟିଛି ।

ଝିଅ-ଝିଅ ହାତାହାତି, ସୋସିଆଲ ମିଡିଆରେ ଭିଡିଓ ଭାଇରାଲ

ନନ୍ଦିଘୋଷ ବ୍ୟୁରୋ: ସୋସିଆଲ ମିଡିଆରେ ଏକ ଭିଡିଓ ଏବେ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ଦୁଇ ଝିଅ ଗୋଷ୍ଠୀଙ୍କ ମଧ୍ୟରେ ହାତାହାତି ପରିସ୍ଥିତି ହୋଇଛି । ଏକ ବଡ଼ ମଲରେ ଭିତରେ ଘଟିଛି ଏଭଳି ଘଟଣା । ତେବେ ଏହି ଭିଡିଓଟି ଉତ୍ତରପ୍ରଦେଶର ବୁଲନ୍ଦ ସହରର । ଇଦ୍ ଦିନ ଏହି ଘଟଣା ଘଟିଛି । ଘଟଣାରୁ ଜଣା ପଡ଼ିଛି କି, ଫିଲ୍ମ ’ସିକନ୍ଦର’ ଦେଖିବାକୁ ଯାଇଥିବାବେଳେ ଏଭଳି ଘଟଣା ଘଟିଛି । ଏହାକୁ କେହି ଜଣେ ମୋବାଇଲରେ କଏଦ କରି ଅପଲୋଡ କରିଥିଲେ । ମାତ୍ର ଦୁଇ ଝିଅଙ୍କ ମଧ୍ୟରେ ଯେଭଳି ଟୁଟି ଟଣାଟଣି ଏବଂ ହାତାହାତି ପରିସ୍ଥିତି ସୃଷ୍ଟି ହୋଇଛି । ଏହାକୁ ୟୁଜର୍ସମାନେ ବହୁଳ ମାତ୍ରାରେ ସେୟାର କରିବା ସହ ଲାଇକ ଏବଂ କମେଣ୍ଟ କରୁଥିବା ଦେଖିବାକୁ ମିଳିଛି ।

ବୁଲନ୍ଦ ସହରର ଏମଏମଏଲ ମଲରେ ଏହି ଘଟଣାଟି ଘଟିଛି । ପ୍ରଥମେ ଦୁଇ ଯୁବତୀଙ୍କ ମଧ୍ୟରେ କୌଣସି ଏକ କଥାକୁ ନେଇ ଯୁକ୍ତି ତର୍କ ହୋଇଥିବା ପରେ ଟୁଟି ଟଣାଟଣି ଏବଂ ମାରାମାରି ପରିସ୍ଥିତି ଉପୁଜିଥିଲା । ତେବେ ସେଠାରେ ଥିବା କିଛି ଲୋକ ସେମାନଙ୍କ ଛଡ଼ାଇଥିଲେ । ସେପଟେ ଏହି ଭିଡିଓଟି ଭାଇରାଲ ହେବା ପରେ ପୋଲିସ ପକ୍ଷରୁ ପ୍ରତିକ୍ରିୟା ପ୍ରକାଶ ପାଇଛି । କୁହାଯାଇଛି କି, ଯେଉଁମାନେ ଭୁଲ୍ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଥାନା ପୋଡି ଦେବାକୁ ଜୟନାରାୟଣଙ୍କ ଧମକ !

ନନ୍ଦିଘୋଷ ବ୍ୟୁରୋ: ପୁଣି ବିଜେପି ବିଧାୟକ ଜୟନାରାୟଣ ମିଶ୍ରଙ୍କ ଧମକ। ଏଥର ଥାନା ପୋଡି ଦେବାକୁ ଜୟନାରାୟଣ ଦେଇଛନ୍ତି ଧମକ। ଏନେଇ ସାଂଘାତିକ ଅଭିଯୋଗ ଆଣିଛନ୍ତି ସମ୍ବଲପୁର ଟାଉନ ଥାନା ଅଧିକାରୀ। ସେ ଅଭିଯୋଗ କରିଛନ୍ତି ଜୟନାରାୟଣ ଅସଭ୍ୟ ଭାଷାରେ ଗାଳି ଗୁଲଜ କରିଛନ୍ତି । ଗତକାଲି ଝଣ୍ଡା ଯାତ୍ରା ସମୟର ହୋଇଥିବା ଗଣ୍ଡଗୋଳକୁ ନେଇ  ଜୟ ନାରାୟଣ ମିଶ୍ର ଧମକ  ଦେଇଛନ୍ତି। ବନ୍ଧୁକ ସହ ବାହାରିବି ଏବଂ ସମସ୍ତଙ୍କୁ ମାରିବି ବୋଲି ଜୟ ଧମକ ଦେଇଥିବା ଅଭିଯୋଗ ହୋଇଛି।

ଆସନ୍ତା ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯିବେ ଭାରତୀୟ ମହାକାଶଚାରୀ ଶୁଭ୍ରାଂଶୁ ଶୁକ୍ଲା

ନନ୍ଦିଘୋଷ ବ୍ୟୁରୋ: ଆସନ୍ତା ମାସରେ ଅନ୍ତର୍ଜାତୀୟ ମହାକାଶ ଷ୍ଟେସନ ବା ଆଇଏସଏସକୁ ଯିବେ ଭାରତୀୟ ମହାକାଶଚାରୀ ଶୁଭ୍ରାଂଶୁ ଶୁକ୍ଲା। ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ପକ୍ଷରୁ ଏହି ବିଷୟ ଘୋଷଣା କରାଯାଇଛି। ଆସନ୍ତା ମାସରେ ହେବାକୁ ଥିବା ନାସାର ଆକ୍ସିଅମ ମିସନ-4 (Ax-4)ରେ ମହାକାଶ ଯିବେ ଶୁଭ୍ରାଂଶୁ। ନାସାର ଏହି ବଡ଼ ନିଷ୍ପତ୍ତି ଭାରତର ମହାକାଶ ମିସନ ଲାଗି ଗୁରୁତ୍ବପୂର୍ଣ୍ଣ ସାବ୍ୟସ୍ତ ହୋଇଛି। ମହାକାଶ ଯାତ୍ରା କ୍ଷେତ୍ରରେ ୧୯୮୪ରେ ୱିଙ୍ଗ କମାଣ୍ଡର ରାକେଶ ଶର୍ମାଙ୍କ ପରେ ଦ୍ବିତୀୟ ଭାରତୀୟ ହେବେ ଶୁଭ୍ରାଂଶୁ।  ଶୁଭ୍ରାଂଶୁ ବର୍ତ୍ତମାନ ଭାରତୀୟ ବାୟୁସେନାର ଗ୍ରୁପ କ୍ୟାପଟେନ ଅଛନ୍ତି। ମହାକାଶ ଯାତ୍ରା କ୍ଷେତ୍ରରେ ବିଶ୍ବର ଆଗଧାଡିରେ ରାଷ୍ଟ୍ରଙ୍କ ସହ ଭାରତର ପ୍ରତିଯୋଗିତା ଚାଲିଥିବାବେଳେ ଶୁଭ୍ରାଂଶୁ ଆଉ ଏକ ନୂଆ ଇତିହାସ ଯୋଡିବେ। ଶୁଭ୍ରାଂଶୁଙ୍କ ସହ ଅନ୍ୟ ଯେଉଁମାନେ ମହାକାଶ ଯିବେ ସେମାନେ ହେଲେ ନାସାର ପୂର୍ବତନ ଆଷ୍ଟ୍ରୋନଟ ପେଗି ହୁଇଟସନ, ପୋଲାଣ୍ଡର ସ୍ଲାଓଜ ଉଜନାନସ୍କି ଓ ହଙ୍ଗେରୀର ତିବୋର କାପୁ।