ଭୁବନେଶ୍ବର: ଚାଷୀ ପ୍ରସଙ୍ଗକୁ ନେଇ ଆଜି ବି ସରଗରମ ରହିଲା ଓଡ଼ିଶା ବିଧାନସଭା । ସ୍ୱତନ୍ତ୍ର ଆଲୋଚନା ଜରିଆରେ ଚାଷୀ ସମସ୍ୟାର ଆଲୋଚନା କରିବାକୁ ଦାବି କରିଥିଲା ବିଜେଡି । ହେଲେ ବାଚସ୍ପତି ରାଜି ନହେବାରୁ ବିଜେଡି ସଦସ୍ୟ ବିଧାନସଭାରୁ ପଟୁଆରରେ ବାହାରି ରାଜ୍ୟପାଳଙ୍କୁ ଭେଟିଥିଲେ । କୃଷି ଋଣ ଛାଡ଼ ଓ ଚାଷୀ ପରିବାରର ସୁରକ୍ଷା ପରି ୫ଟି ଦାବି ନେଇ ରାଜ୍ୟପାଳଙ୍କ ହସ୍ତକ୍ଷେପ ଲୋଡିଥିଲେ । କଂଗ୍ରେସ ମଧ୍ୟ ଚାଷୀ ପ୍ରସଙ୍ଗରେ ଆଲୋଚନା ଦାବି କରିବା ସହ ଆଇନ ଶୃଙ୍ଖଳା ଉପରେ ଆଲୋକପାତ କରିବାକୁ ଦାବି କରିଥିଲା । ବାଚସ୍ପତି ସିନା ଆଲୋଚନା ପାଇଁ ରାଜି ହେଲେନି, ହେଲେ କିଛି ବିଜେପି ବିଧାୟକ ବି କଟନି ଛଟନି କଥା ସ୍ୱୀକାର କରି ଗୃହ ବାହାରେ ଆପତ୍ତି ଉଠାଇଛନ୍ତି ।

କାହିଁକି ଚାଷୀ ସମସ୍ୟା ଉପରୁ ଦୃଷ୍ଟି ହଟାଉଛନ୍ତି ରାଜ୍ୟ ସରକାର ? ସ୍ୱତନ୍ତ୍ର ଆଲୋଚନା ପାଇଁ କାହିଁକି ଅନୁମତି ଦେଉ ନାହାନ୍ତି ବାଚସ୍ପତି ? ସେପଟେ ଅଦିନିଆ ବର୍ଷା ଯୋଗୁଁ କ୍ଷତି ସହ ୧୪ ଚାଷୀ ମଲେଣି । ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, କଟକ, ନୟାଗଡରୁ ଆସିଛି ଚାଷୀ ଆତ୍ମହତ୍ୟା ଅଭିଯୋଗ । ହେଲେ ସରକାର ନିରବଦ୍ରଷ୍ଟା ସାଜିଥିବା ଅଭିଯୋଗ କରିଛି ବିଜେଡି । ଗତକାଲିଠାରୁ ପ୍ରଶ୍ନୋତ୍ତରକାଳ ବାତିଲ କରି ଚାଷୀ ସମସ୍ୟା ନେଇ ସ୍ୱତନ୍ତ୍ର ଆଲୋଚନା ପାଇଁ ଦାବି କରି ଆସୁଛି ବିରୋଧୀ ବିଜେଡି ।  ହେଲେ ବାରମ୍ବାର ବାଚସ୍ପତି ଏହାକୁ ଅଗ୍ରାହ୍ୟ କରିବାରୁ ଗୃହ ମଧ୍ୟ ଭାଗରେ ବିଜେଡି ସଦସ୍ୟ ପ୍ରତିବାଦ କରିଥିଲେ । ଏହାସତ୍ତ୍ବେ ବାଚସ୍ପତି ଆଲୋଚନା ପାଇଁ ଅନୁମତି ନ ଦେବାରୁ ରାଜଭବନ ଅଭିମୁଖେ ବାହାରିଥିଲେ ବିଜେଡି ପ୍ରତିନିଧି ଦଳ । ରାଜ୍ୟପାଳଙ୍କୁ ଭେଟି କୃଷି ଋଣ ଛାଡ଼, ଆତ୍ମହତ୍ୟା କରିଥିବା ଚାଷୀଙ୍କ ପରିବାରକୁ ୧୦ ଲକ୍ଷ କ୍ଷତିପୂରଣ ସହ ପରିବାର ସମସ୍ତ ଦାୟିତ୍ୱ, କ୍ଷତି ସହିଥିବା ଚାଷୀ ପରିବାରର ଶିକ୍ଷା ଖର୍ଚ୍ଚ ବହନ, ବିନା ସୁଧରେ ଋଣ ଓ କଟନି ଛଟନି ବନ୍ଦ ପାଇଁ ରାଜ୍ୟପାଳଙ୍କ ହସ୍ତକ୍ଷେପ ପାଇଁ ଦାବିପତ୍ର ଦେଇଛି ବିଜେଡି । ରାଜ୍ୟପାଳ ବି ଏ ଦିଗରେ ଆଲୋଚନା କରିବା ନେଇ ପ୍ରତିଶ୍ରୁତି ଦେଇଥିବା ନେଇ ବିଜେଡି ସୂଚନା ଦେଇଛି ।

ଓଡ଼ିଶା ସବୁବେଳେ ପ୍ରାକୃତିକ ବିପର୍ଯ୍ୟୟ ଦେଇ ଗତି କରୁଛି । ଯେଉଁଥି ପାଇଁ ବିଜେଡି ସରକାର ଥିବା ସମୟରେ ନବୀନ ପଟ୍ଟନାୟକ ବାରମ୍ବାର ସ୍ୱତନ୍ତ୍ର ରାଜ୍ୟ ପାହ୍ୟା ପାଇଁ ଦାବି କରୁଥିଲେ । ମାନ୍ୟତା ମିଳିଥିଲେ, ଆଜି ଚାଷୀଙ୍କ ଅବସ୍ଥା ଏପରି ହୋଇ ନଥାନ୍ତା ବୋଲି ରାଜ୍ୟପାଳଙ୍କୁ ଦିଆଯାଇଥିବା ଦାବିପତ୍ରରେ ଉଲ୍ଲେଖ ରହିଛି ।

ଅଦିନିଆ ବର୍ଷାରେ ଚାଷୀ ହତାଶ ହେଲେ । ଚାଷ ନଷ୍ଟ ହେଲା । ଚାଷୀ ଦୁଃଖରେ ସାମିଲ ହୋଇ ବିରୋଧୀ ଦଳ ନେତା ନବୀନ ପଟ୍ଟନାୟକ ଗଞ୍ଜାମ, କଟକ, ଜଗତସିଂହପୁର, କେନ୍ଦ୍ରାପଡ଼ା ଓ ପୁରୀ ଜିଲ୍ଲା ଗସ୍ତ କରିଥିଲେ । ଚାଷୀଙ୍କ ସୁରକ୍ଷା ପାଇଁ ନବୀନ ସ୍ୱର ଉଠାଇ ଆସୁଛନ୍ତି । କାରଣ ଚାଷୀ ଯେ କେବଳ ବିରୋଧୀଙ୍କ ପାଇଁ ପ୍ରସଙ୍ଗ ନୁହନ୍ତି, ସରକାରଙ୍କ ବି ଉତ୍ତରଦାୟିତ୍ୱ ରହିଛି ଅନ୍ନଦାତାର ସୁରକ୍ଷା ପ୍ରତି ଯତ୍ନବାନ ହେବାକୁ ।

ଗୃହ ଭିତରେ ଓ ବାହାରେ ବି କଂଗ୍ରେସ ଚାଷୀ ସମସ୍ୟା ପ୍ରସଙ୍ଗରେ ଆଲୋଚନା ପାଇଁ ଦାବି କରିଛି । ମଣ୍ଡିରେ କଟନି ଛଟନି ହେଉଛି । ଚାଷୀ ଦୁର୍ଦ୍ଦଶା କିଏ ବୁଝିବ ? ସେମାନେ ଦୁର୍ଦ୍ଦିନରେ ଅଛନ୍ତି । ହେଲେ ବାଚସ୍ପତି ଆଲୋଚନା ପାଇଁ ରାଜି ହେଉ ନାହାନ୍ତି । ଆଇନ ଶୃଙ୍ଖଳା ବି ଭୁଶୁଡି ଯାଇଛି । ସରକାର ନିରବ ରହିବାକୁ ବିରୋଧ କରିଛି କଂଗ୍ରେସ । ଏହାର ଜବାବ ରଖିଛନ୍ତି ବିଜେପି ବିଧାୟକ ପଦ୍ମଲୋଚନ ପଣ୍ଡା । ମଣ୍ଡିରେ କଟନି ଛଟନିକୁ ସ୍ୱୀକର କରିଛନ୍ତି ପଦ୍ମଲୋଚନ । ଏ ନେଇ ମିଲରଙ୍କୁ ତାଗିଦ କରାଯାଉଛି । କାର୍ଯ୍ୟାନୁଷ୍ଠାନ ସରକାର ନେବେ ବୋଲି କହିଛନ୍ତି । ପୂର୍ବରୁ ଯୋଗାଣ ମନ୍ତ୍ରୀ ବି କଟନି ଛଟନି ହେଉଛି ବୋଲି ସ୍ୱୀକାର କରିଛନ୍ତି ।