ଭୁବନେଶ୍ବର: ଓଡ଼ିଆ ଅସ୍ମିତା କଥା କହି ବିଜେପି ସରକାରକୁ ଆସିଥିଲା । ମାତ୍ର ଏବେ ସେହି ଓଡ଼ିଆ ଅସ୍ମିତା କୁଆଡ଼େ ଗଲା ବୋଲି ପ୍ରଶ୍ନ କରିଛି ବିଜେଡି । ଓଡ଼ିଆ ଅସ୍ମିତାର ସମ୍ମାନ ବୃଦ୍ଧି କରିଥିଲେ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ପ୍ରବାଦପୁରୁଷ ବିଜୁ ପଟ୍ଟନାୟକ । ମାର୍ଚ୍ଚ ୫ ତାରିଖରେ ବିଜୁ ଜୟନ୍ତୀ ପାଳନ ନ କରିବା କ୍ଷୋଭର ବିଷୟ । ବିଜୁଙ୍କୁ ଅପମାନ କରିବା ଅନୁଚିତ ବୋଲି କହିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ । ବିଜୁବାବୁ ଅନ୍ତର୍ଜାତୀୟ ସ୍ତରରେ ଓଡ଼ିଶା ପାଇଁ ସୁନାମ ଆଣିଥିଲେ। ସେ ଅନୁଭବ କରିଥିଲେ ମହିଳା ରାଜନୀତିକୁ ଆସିବା ଦରକାର। ସେଥିପାଇଁ ୧୯୯୩ ମସିହାରେ ୩୩ ପ୍ରତିଶତ ସଂରକ୍ଷଣ ବ୍ୟବସ୍ଥା ଲାଗୁ କରିଥିଲେ । ସେବେଠାରୁ ପଂଚାୟତିରାଜ ସୁଦୃଢ ହୋଇଛି। ତେଣୁ ବିଜୁ ବାବୁଙ୍କ ଜନ୍ମଦିନକୁ ପଂଚାୟତିରାଜ ଦିବସ ଭାବେ ପାଳନ କରାଯାଉଛି। ତାଙ୍କୁ ଅପମାନ କରିବା ଅନୁଚିତ ବୋଲି କହିଛନ୍ତି ଶ୍ରୀମତୀ ମଲ୍ଲିକ।
ବିଜେଡି ଆସନ୍ତାକାଲି ଶଙ୍ଖ ଭବନରେ ବିଜୁ ଜୟନ୍ତୀ ପାଳନ କରିବ। ସବୁ ନିର୍ବାଚନ ମଣ୍ଡଳୀରେ ବି ଏହି ଦିବସ ପାଳନ ହେବ ବୋଲି ସେ କହିଛନ୍ତି।
ଓଡ଼ିଆ ଅସ୍ମିତା କଥା କହି ସରକାରକୁ ଆସିଥିଲା ବିଜେପି: ଏବେ ଓଡ଼ିଆ ଅସ୍ମିତା କୁଆଡ଼େ ଗଲା ବୋଲି ପ୍ରଶ୍ନ କଲା ବିଜେଡି
କାହାକୁ ‘ମିଆଁ-ତିଆଁ’ କିମ୍ବା ‘ପାକିସ୍ତାନୀ’ ବୋଲି କହିବା ଅପରାଧ ନୁହେଁ : ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : କାହାକୁ ‘ମିଆଁ-ତିଆଁ’ କିମ୍ବା ‘ପାକିସ୍ତାନୀ’ ବୋଲି କହିବା ଖରାପ ହୋଇପାରେ କିନ୍ତୁ ଅପରାଧ ନୁହେଁ ବୋଲି ରାୟ ଦେଇଛନ୍ତି ସୁପ୍ରିମକୋର୍ଟ । ଏପରି କହିଲେ ଧାର୍ମିକ ଭାବନାକୁ ଆଘାତ କରାଯାଇଛି କହି ମାମଲା ରୁଜୁ କରାଯାଇପାରିବ ନାହିଁ । ଆଜି ଏନେଇ ସୁପ୍ରିମକୋର୍ଟ ବଡ଼ ରାୟ ଦେଇଛନ୍ତି । ମଙ୍ଗଳବାର ବିଚାରପତି ବିଭି ନାଗାରଥନା ଏବଂ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ଜଣେ ସରକାରୀ କର୍ମଚାରୀଙ୍କୁ ‘ପାକିସ୍ତାନୀ’ ବୋଲି କହିବା ଅଭିଯୋଗରେ ଅଭିଯୁକ୍ତଙ୍କ ବିରୋଧରେ ଏକ ମାମଲା ବନ୍ଦ କରିବା ସମୟରେ ସୁପ୍ରିମକୋର୍ଟ ଏହି ମନ୍ତବ୍ୟ ଦେଇଛନ୍ତି।
ଝାଡ଼ଖଣ୍ଡର ଜଣେ ଉର୍ଦ୍ଦୁ ଅନୁବାଦକ ଏବଂ ଜଣେ କାର୍ଯ୍ୟକାରୀ କ୍ଲର୍କଙ୍କ ଦ୍ୱାରା ଏପରି ଅଭିଯୋଗ ଦାଖଲ କରାଯାଇଥିଲା। ଅଭିଯୋଗକାରୀଙ୍କ ଅନୁଯାୟୀ, ଯେତେବେଳେ ସେ ଆରଟିଆଇକୁ ଆବେଦନ ବିଷୟରେ ସୂଚନା ପ୍ରଦାନ କରିବାକୁ ଅଭିଯୁକ୍ତଙ୍କ ପାଖକୁ ଯାଇଥିଲେ, ସେତେବେଳେ ଅଭିଯୁକ୍ତ ତାଙ୍କ ଧର୍ମକୁ ଉଲ୍ଲେଖ କରି ତାଙ୍କୁ ଦୁର୍ବ୍ୟବହାର କରିଥିଲେ ଏବଂ ସେ ଏନେଇ କ୍ଳର୍କଙ୍କ ବିରୋଧରେ ମାମଲା ରୁଜୁ କରିଥିଲେ । ଏହା ଫଳରେ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୨୯୮ (ଧାର୍ମିକ ଭାବନାକୁ ଆଘାତ ଦେବା), ୫୦୪ (ଶାନ୍ତି ଭଙ୍ଗ କରିବା ଉଦ୍ଦେଶ୍ୟରେ ଅପମାନ) ଏବଂ ୩୫୩ (ସରକାରୀ କର୍ମଚାରୀଙ୍କୁ କର୍ତ୍ତବ୍ୟ ପାଳନରୁ ନିବୃତ୍ତ କରିବା ପାଇଁ ଆକ୍ରମଣ ) ଅନୁଯାୟୀ ଅପରାଧ ପାଇଁ ବ୍ୟକ୍ତିଙ୍କ ବିରୁଦ୍ଧରେ ମାମଲା ରୁଜୁ ହୋଇଥିଲା।
ଝାଡ଼ଖଣ୍ଡ ହାଇକୋର୍ଟଙ୍କ ଏକ ଆଦେଶକୁ ଖାରଜ କରି ସର୍ବୋଚ୍ଚ ନ୍ୟାୟାଳୟ କହିଛନ୍ତି, “ଆବେଦକ ସୂଚନାଦାତାଙ୍କୁ ‘ମିଆଁ-ତିଆଁ’ ଏବଂ ‘ପାକିସ୍ତାନୀ’ ବୋଲି କହି ତାଙ୍କ ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗ ହୋଇଛି। ନିସନ୍ଦେହରେ, ଦିଆଯାଇଥିବା ବୟାନଗୁଡ଼ିକ ଖରାପ ହୋଇପାରେ। ତଥାପି, ଏହା ସୂଚନାଦାତାଙ୍କ ଧାର୍ମିକ ଭାବନାକୁ ଆଘାତ ଦେବା ଭଳି ନୁହେଁ,” ବୋଲି ଖଣ୍ଡପୀଠ କହିଛନ୍ତି। ନ୍ୟାୟାଳୟଙ୍କ ଅନୁଯାୟୀ, ଅଭିଯୁକ୍ତଙ୍କ ପକ୍ଷରୁ ଏପରି କୌଣସି କାର୍ଯ୍ୟ କରାଯାଇ ନାହିଁ ଯାହା ଶାନ୍ତି ଭଙ୍ଗ କରିଥାନ୍ତା । ଅନ୍ୟପକ୍ଷେ, ଧାରା ୩୫୩ ଆଇପିସି(ସରକାରୀ କର୍ମଚାରୀଙ୍କୁ କର୍ତ୍ତବ୍ୟ ପାଳନରୁ ନିବୃତ୍ତ କରିବା ପାଇଁ ଆକ୍ରମଣ କିମ୍ବା ଅପରାଧିକ ବଳ) କରିବା ପାଇଁ ଆବେଦନକାରୀଙ୍କ ଦ୍ୱାରା କୌଣସି ଆକ୍ରମଣ କିମ୍ବା ବଳ ପ୍ରୟୋଗ କରାଯାଇ ନଥିଲା, ବୋଲି କୁହାଯାଇଛି।
ଚାମ୍ପିୟନ୍ସ ଟ୍ରଫି ସେମିଫାଇନାଲ: ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଲା ଅଷ୍ଟ୍ରେଲିଆ
ଦୁବାଇ: ଚାମ୍ପିୟନ୍ସ ଟ୍ରଫି ୨୦୨୫ରେ ଆଜି ପ୍ରଥମ ସେମିଫାଇନାଲରେ ଭାରତ-ଅଷ୍ଟ୍ରେଲିଆା ମଧ୍ୟରେ କଡ଼ା ଟକ୍କର ହେବ । ଟସ୍ ଜିତି ଅଷ୍ଟ୍ରେଲିଆ ବ୍ୟାଟିଂ ନିଷ୍ପତ୍ତି ନେଇଛି । ଫଳରେ ଆଜି ଭାରତ ପ୍ରଥମେ ବୋଲିଂ କରିବ । ଆଜି ଟସ୍ ହାରିବା ପରେ କ୍ରମାଗତ ୧୪ ଥର ପାଇଁ ରୋହିତ ଶର୍ମା ଟସ୍ ହାରିଛନ୍ତି । ଆଜି ଅଷ୍ଟ୍ରେଲିଆ ଦଳରେ ଦୁଇଟି ପରିବର୍ତ୍ତନ କରାଯାଇଥିବା ବେଳେ ଟିମ୍ ଇଣ୍ଡିଆର ପ୍ଲେଇଂ-୧୧ରେ କୌଣସି ପରିବର୍ତ୍ତନ କରାଯାଇ ନାହିଁ । ଅଷ୍ଟ୍ରେଲିଆା ଟିମରେ ମାଥ୍ୟୁ ଶର୍ଟଙ୍କ ସ୍ଥାନରେ କୂପର କୋନୋଲି, ସ୍ପେନସର ଜନସନଙ୍କ ସ୍ଥାନରେ ଲେଗ ସ୍ପିନର ତନବୀର ସଂଘାଙ୍କୁ ନିଆଯାଇଛି । ଆସନ୍ତାକାଲି ଲାହୋରର ଗଦ୍ଦାଫି ଷ୍ଟାଡିମୟରେ ଦକ୍ଷିଣ ଆଫ୍ରିକା ଓ ନ୍ୟୁଜିଲାଣ୍ଡ ମଧ୍ୟରେ ଦ୍ବିତୀୟ ସେମି ଲଢ଼େଇ ହେବ । ଗ୍ରୁପ-ଏ’ର ଭାରତ ଓ ନ୍ୟୁଜିଲାଣ୍ଡ ସେମିକୁ ଉନ୍ନୀତ ହୋଇଥିବା ବେଳେ ଗ୍ରୁପ-ବି’ରୁ ଦକ୍ଷିଣ ଆଫ୍ରିକା ଓ ଅଷ୍ଟ୍ରେଲିଆ କ୍ବାଲିଫାଏ କରିଥିଲେ । ଆସନ୍ତା ୯ ତାରିଖରେ ଫାଇନାଲ ମ୍ୟାଚ ଖେଳାଯିବ ।
ହାସ୍ୟ ଅଭିନେତା ସମୟ ରୈନାଙ୍କୁ ସୁପ୍ରିମକୋର୍ଟଙ୍କ କଡ଼ା ଚେତାବନୀ
ନନ୍ଦିଘୋଷ ବ୍ୟୁରୋ : ଭଦ୍ର ବ୍ୟବହାର କର ନଚେତ୍ ତୁମପରି ଲୋକଙ୍କ ସହ କିପରି ବ୍ୟବହାର କରିବା ଦରକାର ଆମକୁ ଜଣାଅଛି । ହାସ୍ୟ ଅଭିନେତା ତଥା ୟୁଟ୍ୟୁବର ସମୟ ରୈନାଙ୍କୁ ଏପରି ଜବାବ ଦେଇଛନ୍ତି ସୁପ୍ରିମକୋର୍ଟ । ସୋମବାର ସୁପ୍ରିମକୋର୍ଟ ସମୟ ରୈନାଙ୍କୁ କଡ଼ା ଭର୍ତ୍ସନା କରିଛନ୍ତି। କାନାଡାରେ ସମୟଙ୍କ ଶୋ’ ‘ଇଣ୍ଡିଆଜ୍ ଗଟ୍ ଲାଟେଣ୍ଟ୍’କୁ ନେଇ ସୃଷ୍ଟି ହୋଇଥିବା ବିବାଦ ଉପରେ ସେ ନିଜ ପକ୍ଷ ରଖିଥିଲେ। ଯେଉଁଥିରେ କୋର୍ଟ କହିଛନ୍ତି, ଯେ ଆଜିକାଲିର ଯୁବପୀଢ଼ି ନିଜକୁ ବହୁତ ବୁଦ୍ଧିମାନ ବୋଲି ଭାବନ୍ତି।
ସୁପ୍ରିମକୋର୍ଟଙ୍କ କଡ଼ା ଚେତାବନୀ
ଗତମାସରେ ସମୟଙ୍କ ଶୋ’ରେ ଅଶ୍ଲୀଳ ମନ୍ତବ୍ୟ ଦେଇ ଚର୍ଚ୍ଚାକୁ ଆସିଥିବା ୟୁଟ୍ୟୁବର ରଣୀବୀର ଆଲ୍ଲହାବାଦିଆଙ୍କ ଶୁଣାଣି ହୋଇଥିଲା । ସୋମବାର ଶୁଣାଣି ସମୟରେ ଜଷ୍ଟିସ୍ ସୂର୍ଯ୍ୟକାନ୍ତ କହିଥିଲେ କି, ଆଜିର ଯୁବପୀଢି ଏବଂ ଅତିଚାଲାକିଆ ଲୋକ ଭାବୁଛନ୍ତି ଯେ ଆମ ଠାରୁ ସେମାନେ ବେଶୀ ଜାଣନ୍ତି । ଏମାନଙ୍କୁ ଜଣାନାହିଁ ଯେ ଏହି ଅଦାଲତ ପାଖରେ କେତେ କ୍ଷମତା ଅଛି । ଏମିତି କହି ୟୁଟ୍ୟୁବର ସମୟ ରୈନାଙ୍କୁ ଚେତାବନୀ ଦେଲେ ଯେ, ଭଦ୍ରଭାବେ ବ୍ୟବହାର କର ନଚେତ ତୁମ ସହ କିପରି ବ୍ୟବହାର କରିବା କଥା ଆମକୁ ଜଣା ।
ସୁପ୍ରିମକୋର୍ଟଙ୍କ ଶୁଣାଣିକୁ ନେଇ କରିଥିଲେ କଟାକ୍ଷ
ରୈନା ଗତ ମାସରେ କାନାଡାରେ ‘ସମୟ ରୈନା ଅନଫିଲ୍ଟରଡ୍’ ଶୋ’ କରିଥିଲେ । ସେ ଏହି ବିବାଦ ଉପରେ ହାସ୍ୟପୂର୍ଣ୍ଣ ଢଙ୍ଗରେ ମନ୍ତବ୍ୟ ଦେଇଥିଲେ । ଷ୍ଟେଜ୍ ଉପରେ ନିଜ ପ୍ରଥମ ମନ୍ତବ୍ୟରେ ଦର୍ଶକଙ୍କ ସହିତ ମଜା କରି କହିଥିଲେ କି, ମୋ ଓକିଲଙ୍କ ଫିସ୍ ଦେବା ପାଇଁ ଧନ୍ୟବାଦ । ଏହି ମନ୍ତବ୍ୟକୁ ନେଇ ପୁଣି ବ୍ୟାପକ ଅସନ୍ତୋଷ ଦେଖାଦେଇଥିଲା ଏବଂ ସଂସଦରେ ମଧ୍ୟ ଏହାକୁ ନେଇ ବିତର୍କ ସୃଷ୍ଟି ହୋଇଥିଲା । ଯାହା ପରେ ସମୟଙ୍କ ବିରୋଧରେ ଅନେକ ଅଭିଯୋଗ ଦାଖଲ ହୋଇଥିଲା ।
୯ ମାସର ସବୁଠାରୁ ଖରାପ ସ୍ତରରେ ଶେୟାର ବଜାର: ୩ ମିନିଟରେ ବୁଡ଼ିଲା ୧.୩୩ ଲକ୍ଷ କୋଟି ଟଙ୍କା
ସେନସେକ୍ସ ଓ ନିଫ୍ଟୀ ମଙ୍ଗଳବାର ଦିନ ୯ ମାସର ସବୁଠାରୁ ଖରାପ ସ୍ତରରେ ପହଞ୍ଚିଛି । ଏହି କାରଣ ପାଇଁ ଶେୟାର ବଜାର ନିବେଶକଙ୍କୁ ୧.୩୩ ଲକ୍ଷ କୋଟି ଟଙ୍କାର କ୍ଷତି ସହିବାକୁ ପଡ଼ିଛି । ମାର୍ଚ୍ଚ ମାସର ଦ୍ବିତୀୟ କାରବାର ଦିନରେ ଶେୟାର ବଜାରରେ ହ୍ରାସ ଦେଖିବାକୁ ମିଳିଛି । ବଜାର ଖୋଲିବାର ମାତ୍ର ୩ ମିନିଟ ଭିତରେ ସେନସେକ୍ସରେ ୪୫୦ରୁ ଅଧିକ ଅଙ୍କ କମିଯାଇଥିଲା ଓ ୯ ମାସର ସବୁଠାରୁ ଖରାପ ସ୍ତରରେ ପହଞ୍ଚି ଯାଇଥିଲା । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ତରଫରୁ ଲାଗୁ କରାଯାଇଥିବା ଟାରିଫ, ୟୁକ୍ରେନ-ଋଷ ମଧ୍ୟରେ ଚାଲିଥିବା ଓ୍ବାର ଦ୍ବାରା ସୃଷ୍ଟି ହୋଇଥିବା ଜିଓପଲିଟିକାଲ ଟେନସନ ଶେୟାର ବଜାର ହ୍ରାସର ପ୍ରମୁଖ କାରଣ ।
ତେବେ ମାର୍ଚ୍ଚରେ ଶେୟାର ବଜାରରେ ଏପରି ନିମ୍ନମୁଖୀ ସ୍ଥିତି ଜାରି ରହିବ ବୋଲି କୁହାଯାଉଛି । ତେବେ ଫେବୃଆରୀ ପରି ଏହି ହ୍ରାସ ହେବ ନାହିଁ । ଯଦି ଏପରି ହୁଏ, ତେବେ ସେନସେକ୍ସ ଓ ନିଫ୍ଟୀ ଉଭୟ ଲାଲ ପ୍ରତୀକରେ ବନ୍ଦ ହେବେ । ବମ୍ବେ ଷ୍ଟକ ଏକ୍ସଚେଞ୍ଜର ପ୍ରମୁଖ ସୂଚକାଙ୍କ ସେନସେକ୍ସ ସକାଳ ୧୦ଟା ସମୟରେ ୧୯୦ ଅଙ୍କ ତଳକୁ ଖସିବା ସହ ୭୨,୮୯୭.୭୦ ଅଙ୍କରେ କାରବାର କରିଥିଲା । ବଜାର ଖୋଲିବାର ୩ ମିନିଟ୍ ଭିତରେ ୪୫୨.୪ ଅଙ୍କ ହ୍ରାସ ଘଟିବା ସହ ୭୨,୬୩୩.୫୪ ଅଙ୍କକୁ ଚାଲିଆସିଥିଲା । ଅନ୍ୟପକ୍ଷରେ ନ୍ୟାସନାଲ ଷ୍ଟକ ଏକ୍ସଚେଞ୍ଜର ପ୍ରମୁଖ ସୂଚକାଙ୍କ ନିଫ୍ଟୀ ୫୦ ଅଙ୍କ ହ୍ରାସ ସହ କାରବାର କରିଥିଲା । ସକାଳ ୧୦ଟାରେ ନିଫ୍ଟୀ ୬୪.୭୫ ଅଙ୍କ ଖସିବା ସହ ୨୨,୦୫୪.୫୫ ଅଙ୍କରେ କାରବାର କରୁଥିଲା । କାରବାର ସେସନ ସମୟରେ ନିଫ୍ଟୀ ୨୧,୯୬୪.୦୦ ଅଙ୍କ ଦେଖିବାକୁ ମିଳିଥିଲା । ସୋମବାର ଦିନ ମଧ୍ୟ ଶେୟାର ବଜାରରେ ୧୦୦ରୁ ଅଧିକ ହ୍ରାସ ଦେଖିବାକୁ ମିଳିଥିଲା ।
ବିଜେପି କ୍ଷମତାକୁ ଆସିବା ପରେ ବଦଳିଛି ପରମ୍ପରା: ରାଜ୍ୟ ସରକାରଙ୍କୁ ସମାଲୋଚନା କଲା ବିଜେଡି
ଭୁବନେଶ୍ବର: ମାର୍ଚ୍ଚ ୫ ତାରିଖରେ ବିଜୁ ଜୟନ୍ତୀରେ ରାଜ୍ୟ ସରକାର ପଞ୍ଚାୟତିରାଜ ଦିବସ ପାଳନ ନ କରିବା ଦୁର୍ଭାଗ୍ୟଜନକ ବୋଲି କହିଛି କହିଛି ବିଜେଡି। ଏହା ରାଜ୍ୟ ସରକାରଙ୍କ ସଂକୀର୍ଣ୍ଣ ମନୋଭାବର ପଚିଚୟ ବୋଲି କହିଛନ୍ତି ବିଜେଡି ସମନ୍ଵୟ କମିଟିର ଅଧ୍ୟକ୍ଷ ଦେବୀପ୍ରସାଦ ମିଶ୍ର। ସେ କହିଛନ୍ତି, ଦେଶରେ ପଞ୍ଚାୟତିରାଜ ବ୍ୟବସ୍ଥାକୁ ଲାଗୁ କରିବାରେ ଓଡ଼ିଶା ଅଗ୍ରଣୀ ରାଜ୍ୟର ମାନ୍ୟତା ପାଇଛି। ପୂର୍ବତନ ମୁଖ୍ୟମନ୍ତ୍ରୀ ତଥା ପ୍ରବାଦ ପୁରୁଷ ବିଜୁ ବାବୁଙ୍କ ମୁଖ୍ୟମନ୍ତ୍ରୀତ୍ବ ସମୟରେ ଏହା ହୋଇପାରିଥିଲା। ପଞ୍ଚାୟତିରାଜ ବ୍ୟବସ୍ଥାକୁ ସୁଦୃଢ଼ କରିବାରେ ବିଜୁ ବାବୁଙ୍କ ଅନେକ ଅବଦାନ ରହିଛି। ପଞ୍ଚାୟତିରାଜରେ ମହିଳାଙ୍କ ପାଇଁ ସଂରକ୍ଷଣ ବ୍ୟବସ୍ଥା ମଧ୍ୟ ସେ କରିଥିଲେ। ସେଥିପାଇଁ ତାଙ୍କ ଜନ୍ମ ଦିନ ମାର୍ଚ୍ଚ ୫କୁ ପଞ୍ଚାୟତିରାଜ ଦିବସ ରୂପେ ପାଳନ କରାଯାଉଥିଲା ।
ମାତ୍ର ବିଜେପି ସରକାରକୁ ଆସିବା ପରେ ଏଥିରେ ପରିବର୍ତ୍ତନ କରିଛନ୍ତି। ଆସନ୍ତାକାଲି ବିଜୁ ବାବୁଙ୍କ ଜୟନ୍ତୀ ପାଳନ କରିବାକୁ ନିଷ୍ପତ୍ତି ନେଇଥିଲେ ମଧ୍ୟ ବିଜୁ ଜୟନ୍ତୀକୁ ପଞ୍ଚାୟତିରାଜ ଦିବସ ରୂପେ ପାଳନ ନ କରିବାକୁ ସ୍ଥିର କରିଛନ୍ତି। ତା ବଦଳରେ ଏପ୍ରିଲ ୨୪କୁ ପଞ୍ଚାୟତିରାଜ ଦିବସ ରୂପେ ପାଳନ କରିବାକୁ ରାଜ୍ୟର ବିଜେପି ସରକାର ନିଷ୍ପତ୍ତି ନେଇଛନ୍ତି। ଏହି ଅବିଚାର ପ୍ରତି ଓଡ଼ିଶାର ଜନ ସାଧାରଣ ବିଚାର କରିବେ ବୋଲି ଦେବୀ ମିଶ୍ର କହିଛନ୍ତି। ସେହିପରି ପଞ୍ଚାୟତିରାଜ ବିଭାଗ ତରଫରୁ ଯାହା କୁହାଯାଇଛି, ୨୦୨୦ରୁ ଓଡି଼ଶାରେ ପଞ୍ଚାୟତିରାଜ ଦିବସ ପାଳନ କରାଯାଉଛି, ତାହା ଭୁଲ୍। ୩ ଦଶନ୍ଧି ହେଲାଣି ଓଡ଼ିଶା ସରକାର ବିଜୁ ବାବୁ ଜୟନ୍ତୀକୁ ପଞ୍ଚାୟତିରାଜ ଦିବସ ଭାବେ ପାଳନ କରୁଥିବା ସୋସିଆଲ ମିଡିଆ ଏକ୍ସ ରେ କହିଛନ୍ତି ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ ।
ସରପଞ୍ଚଙ୍କ ହତ୍ୟାରେ ନାମ ଆସିବା ପରେ ମନ୍ତ୍ରୀଙ୍କୁ ଦେବାକୁ ପଡ଼ିଲା ଇସ୍ତଫା
ନନ୍ଦିଘୋଷ ବ୍ୟୁରୋ : ଥମିବାର ନାଁ ନେଉନି ମହାରାଷ୍ଟ୍ର ରାଜନୀତି । କୌଣସି ନା କୌଣସି କାରଣରୁ ଏଠାକାର ରାଜନୀତି ସବୁବେଳେ ଆଲୋଚନାର କେନ୍ଦ୍ରବିନ୍ଦୁ ସାଜେ । ଏହାରି ମଧ୍ୟରେ ମଙ୍ଗଳବାର ସକାଳେ ଇସ୍ତଫା ଦେଇଛନ୍ତି ମହାରାଷ୍ଟ୍ରର ମନ୍ତ୍ରୀ ଧନଞ୍ଜୟ ମୁଣ୍ଡେ । ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ତାଙ୍କ ଇସ୍ତଫାପତ୍ର ଗ୍ରହଣ କରିଛନ୍ତି। ମୁଣ୍ଡେଙ୍କ ଠାରୁ ଅଲଗା ରହୁଥିବା ପ୍ରଥମ ପତ୍ନୀ କରୁଣା ମୁଣ୍ଡେ, ପୂର୍ବରୁ ଦାବି କରିଥିଲେ ଯେ, ସେ ସୋମବାର ବଜେଟ ଅଧିବେଶନ ଆରମ୍ଭ ହେବା ପୂର୍ବରୁ ଇସ୍ତଫା ଦେବେ। କାରଣ ମୁଖ୍ୟମନ୍ତ୍ରୀ ଫଡନାଭିସ ମୁଣ୍ଡେଙ୍କୁ ପୂର୍ବରୁ ହିଁ ଇସ୍ତଫା ମାଗିଥିଲେ ।ବୀଡରେ ସରପଞ୍ଚ ସନ୍ତୋଷ ଦେଶମୁଖ ହତ୍ୟା ମାମଲା ସହିତ ତାଙ୍କ ନାମ ଜଡିତ ଥିବାରୁ, ତାଙ୍କୁ ଇସ୍ତଫା ଦେବା ପାଇଁ କ୍ରମାଗତ ଚାପ ପକାଯାଉଥିଲା। ଧନଞ୍ଜୟ ମୁଣ୍ଡେଙ୍କ ଅସୁସ୍ଥତା ଯୋଗୁଁ, ତାଙ୍କ ପିଏ ପ୍ରଶାନ୍ତ ଯୋଶୀ ମୁଖ୍ୟମନ୍ତ୍ରୀଙ୍କୁ ଇସ୍ତଫାପତ୍ର ଦେଇଥିଲେ ।
ଫଟୋ ଭାଇରାଲ ହେବା ପରେ ହୋଇଥିଲା ହଙ୍ଗାମା
ଯେତେବେଳେ ସରପଞ୍ଚ ସନ୍ତୋଷ ଦେଶମୁଖ ହତ୍ୟା ମାମଲାର ଫଟୋ ସୋସିଆଲ ମିଡିଆରେ ଭାଇରାଲ ହେବା ଆରମ୍ଭ ହୋଇଥିଲା, ସେହି ସମୟରେ ଏହି ମାମଲାକୁ ନେଇ ଡେପୁଟି ସିଏମ୍ ଅଜିତ ପାୱାରଙ୍କ ବାସଭବନ ଦେବଗିରିରେ ବିଳମ୍ବିତ ରାତିରେ ବରିଷ୍ଠ ଏନସିପି ନେତାମାନଙ୍କର ଏକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଧନଞ୍ଜୟ ମୁଣ୍ଡେ ମଧ୍ୟ ଉପସ୍ଥିତ ଥିଲେ। ଏଥିରେ ମୁଣ୍ଡେ ମନ୍ତ୍ରୀ ପଦରୁ ଇସ୍ତଫା ଦେବା ନେଇ ନିଷ୍ପତ୍ତି ନିଆଯାଇଥିଲା । କାରଣ ସନ୍ତୋଷ ଦେଶମୁଖ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ବାଲ୍ମୀକି କରାଡ ମନ୍ତ୍ରୀ ଧନଞ୍ଜୟ ମୁଣ୍ଡେଙ୍କ ନିକଟତର ଥିଲେ।
ପତ୍ନୀ କରିଥିଲେ ଇସ୍ତଫା ଦାବି
ବଜେଟ ଅଧିବେଶନ ପୂର୍ବରୁ ଧନଞ୍ଜୟ ମୁଣ୍ଡେ ଇସ୍ତଫା ଦେବା ନେଇ ରବିବାର ଦିନ ତାଙ୍କ ପତ୍ନୀ ପତ୍ନୀ କରୁଣା ମୁଣ୍ଡେ ଦାବି କରିଥିଲେ । ଏପରିକି କରୁଣା ମୁଣ୍ଡେ ମଧ୍ୟ କହିଥିଲେ ଯେ ଅଜିତ ପାୱାର ଦୁଇ ଦିନ ପୂର୍ବରୁ ତାଙ୍କ ଇସ୍ତଫା ଗ୍ରହଣ କରିଛନ୍ତି। ସେ ଏହା ମଧ୍ୟ କହିଥିଲେ ଯେ ଧନଞ୍ଜୟ ମୁଣ୍ଡେ ଇସ୍ତଫା ଦେବାକୁ ପ୍ରସ୍ତୁତ ନଥିଲେ, କିନ୍ତୁ ଅଜିତ ପାୱାର ତାଙ୍କୁ ଜୋରଜବରଦସ୍ତ ଇସ୍ତଫାପତ୍ର ଲେଖିବାକୁ ବାଧ୍ୟ କରିଥିଲେ।
ଟିମ୍ ଇଣ୍ଡିଆ ଏଥର ସାବଧାନ: ଟ୍ରେଭିସ ହେଡଙ୍କ ପାଇଁ ଭାରତ ଦୁଇଥର ବିଶ୍ବକପ ଫାଇନାଲରେ ହାରିଥିଲା
ଦୁବାଇ: ଆଜି ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାମ୍ପିୟନ୍ସ ଟ୍ରଫି ସେମିଫାଇନାଲ ମୁକାବିଲା ହେବ । ବିଶ୍ବର ଦୁଇ ଅନ୍ୟତମ ଶକ୍ତିଶାଳୀ ଟିମ୍ ମଧ୍ୟରେ ହେବାକୁ ଥିବା ଏହି ମହାମୁକାବିଲାକୁ ସାରା ବିଶ୍ବ ଚାହିଁ ରହିଛି । ତେବେ ଏହି ମ୍ୟାଚରେ ଟିମ୍ ଇଣ୍ଡିଆକୁ ଅଷ୍ଟ୍ରେଲିଆର ଜଣେ ଘାତକ ଖେଳାଳିଙ୍କ ପ୍ରତି ସତର୍କ ରହିବାକୁ ପଡ଼ିବ । ଏହି ଖେଳାଳିଙ୍କ ପାଇଁ ଭାରତ ଦୁଇଥର ବିଶ୍ବ ଚାମ୍ପିୟନରୁ ବଞ୍ଚିତ ହୋଇଥିଲା । ଅଷ୍ଟ୍ରେଲିଆର ଦୁର୍ଦ୍ଦଷ ବ୍ୟାଟ୍ସମ୍ୟାନ ଟ୍ରେଭିସ ହେଡଙ୍କ ପାଇଁ ଭାରତ ଦୁଇଥର ଫାଇନାଲରେ ପରାସ୍ତ ହୋଇଥିଲା । ତେଣୁ ଏଥର ସେହି ଘଟଣାର ପୁନରାବୃତ୍ତି ଯେପରି ନ ଘଟିବ, ତାହା ଟିମ୍ ଇଣ୍ଡିଆ ଧ୍ୟାନ ଦେବା ଆବଶ୍ୟକ ।
୨୦୨୩ ଦିନିକିଆା ବିଶ୍ବକପର ଫାଇନାଲରେ ହେଡ ଭାରତ ବିପକ୍ଷରେ ୧୨୦ଟି ବଲରୁ ୧୩୭ ରନ୍ ସଂଗ୍ରହ କରିଥିଲେ । ଫଳରେ କଙ୍ଗାରୁ ଟିମ୍ ୬ଷ୍ଠ ଥର ପାଇଁ ବିଶ୍ବ ଚାମ୍ପିୟନ ହୋଇପାରିଥିଲା । ତା’ ପୂର୍ବରୁ ୨୦୨୩ ଜୁନ ୭-୧୧ରେ ଇଂଲଣ୍ଡର ଓଭାଲରେ ଖେଳାଯାଇଥିବା WTC ଫାଇନାଲରେ ଭାରତର ଅବସ୍ଥା ଶୋଚନୀୟ କରିଦେଇଥିଲେ ହେଡ । ହେଡ ୧୬୩ ରନର ଶାନଦାର ପାଳି ଖେଳି ଭାରତ ପାଖରୁ ମ୍ୟାଚ ଛଡ଼ାଇ ନେଇଥିଲେ । ଫାଇନାଲରେ ଭାରତ ୨୦୯ ରନରେ ପରାସ୍ତ ହୋଇଥିଲା । ସବୁଠାରୁ ଖାସ୍ କଥା ହେଉଛି, ହେଡ୍ ICC ଟୁର୍ଣ୍ଣାମେଣ୍ଟରେ ଭାରତ ବିପକ୍ଷରେ ଏକ ’ଓ୍ବାଲ’ ଭଳି ଠିଆ ହେଉଛନ୍ତି । ଯାହାକି ଭାରତର ପରାଜୟର କାରଣ ସାଜୁଛି । ତେଣୁ ଏଥର ହେଡଙ୍କୁ ରୋକିବାକୁ ରୋହିତ ବାହିନୀ ପ୍ରାଣପଣେ ପ୍ରୟାସ କରିବା ଦରକାର ।
ଚାମ୍ପିୟନସିପ୍ ଟ୍ରଫି ସେମିଫାଇନାଲରେ ହାରିବା ଟିମକୁ କେତେ ଟଙ୍କା ମିଳିବ ?
ନନ୍ଦିଘୋଷ ବ୍ୟୁରୋ : ଆଇସିସି ଚାମ୍ପିୟନସିପ୍ ଟ୍ରଫିର ରୋମାଞ୍ଚ ଏବେ ଶେଷ ପର୍ଯ୍ୟାୟରେ ପହଞ୍ଚିସାରିଛି । ୮ଟିରୁ ୪ଟି ଟିମ୍ ସେମିଫାଇନାଲରେ ନିଜ ସ୍ଥାନ ବନାଇଛନ୍ତି । ପ୍ରଥମ ସେମିଫାଇନାଲ ମ୍ୟାଚରେ ଭାରତ ଅଷ୍ଟ୍ରେଲିଆ ସହ ମୁହାଁମୁହିଁ ହେବ । ଅନ୍ୟପକ୍ଷେ ଦ୍ୱିତୀୟ ମ୍ୟାଚରେ ଦକ୍ଷିଣ ଆଫ୍ରିକା ସହ ମୁହାଁମୁହିଁ ହେବ ନ୍ୟୁଜିଲ୍ୟାଣ୍ଡ । ତେବେ ସେମିଫାଇନାଲରେ ହାରୁଥିବା ଦଳକୁ ଆଇସିସି ପକ୍ଷରୁ କେତେ ଟଙ୍କା ମିଳେ ଜାଣନ୍ତି କି ?
ସେମିଫାଇନାଲରେ ହାରିଥିବା ଦଳକୁ କେତେ ପୁରସ୍କାର ମିଳିବ?
ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ପାଇଁ ମୋଟ ୬.୯ ମିଲିୟନ ଡଲାର ପୁରସ୍କାର ରାଶି ସ୍ଥିର କରାଯାଇଛି । ଯାହା ୨୦୧୭ ସଂସ୍କରଣ ଅପେକ୍ଷା ୫୩ ପ୍ରତିଶତ ଅଧିକ ।ଏହି ଟୁର୍ଣ୍ଣାମେଣ୍ଟରେ ବିଜୟ ଦଳକୁ ୨.୨୪ ମିଲିୟନ ଡଲାର (ପ୍ରାୟ ୧୯.୫ କୋଟି ଟଙ୍କା) ଏବଂ ରନର୍ସଅପ୍ ଦଳକୁ ୧.୧୨ ମିଲିୟନ ଡଲାର (ପ୍ରାୟ ୯.୭୮ କୋଟି ଟଙ୍କା) ପ୍ରଦାନ କରାଯିବ । ଅନ୍ୟପକ୍ଷେ ସେମିଫାଇନାଲରେ ହାରିଥିବା ଦଳକୁ ୫୬୦,୦୦୦ ଡଲାର ବା ପ୍ରାୟ ୪.୮୯ କୋଟି ଟଙ୍କା ପୁରସ୍କାର ରାଶି ମିଳିବ, ଯାହା ICC ତରଫରୁ ଦିଆଯିବ ।
୮ବର୍ଷ ପରେ ଟୁର୍ଣ୍ଣାମେଣ୍ଟ ଆୟୋଜିତ
ଦୀର୍ଘ ୮ ବର୍ଷ ପରେ ଆଇସିସି ଚାମ୍ପିଅନ୍ସ ଟ୍ରଫି ଆୟୋଜନ ହେଉଛି। ଏହା ଶେଷ ଥର ପାଇଁ ୨୦୧୭ରେ ଆୟୋଜିତ ହୋଇଥିଲା। ଯେଉଁଥିରେ ପାକିସ୍ତାନ ଫାଇନାଲରେ ଭାରତକୁ ପରାସ୍ତ କରି ଟୁର୍ଣ୍ଣାମେଣ୍ଟ ଜିତିଥିଲା। ଏଥର, ଆୟୋଜକ ଭାବରେ ଖେଳୁଥିବା ପାକିସ୍ତାନକୁ ପ୍ରଥମ ରାଉଣ୍ଡରେ ହିଁ ବିଦା ହେବାକୁ ପଡିଲା। ଭାରତ, ପାକିସ୍ତାନ, ବାଂଲାଦେଶ ଏବଂ ନ୍ୟୁଜିଲାଣ୍ଡକୁ ଗ୍ରୁପ୍ A ରେ ସ୍ଥାନିତ କରାଯାଇଥିଲା। ଗ୍ରୁପ୍ B ରେ ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ଇଂଲଣ୍ଡ ଏବଂ ଆଫଗାନିସ୍ତାନ ସାମିଲ ଥିଲେ। ଏଥର ଗ୍ରୁପ୍ A ରୁ ଭାରତ ଏବଂ ନ୍ୟୁଜିଲ୍ୟାଣ୍ଡ ଏବଂ ଗ୍ରୁପ୍ Bରୁ ଦକ୍ଷିଣ ଆଫ୍ରିକା ଏବଂ ଅଷ୍ଟ୍ରେଲିଆ ସେମିଫାଇନାଲରେ ପ୍ରବେଶ କରିଛନ୍ତି।
ଲିଙ୍ଗରାଜଙ୍କ ବେଢ଼ାରେ ଫଟୋ ଉଠାଇ ଅଡୁଆରେ ପିସିସି ସଭାପତି ଭକ୍ତ ଦାସ
ଭୁବନେଶ୍ବର: ଲିଙ୍ଗରାଜଙ୍କ ବେଢ଼ାରେ ଫଟୋ ଉଠାଇ ଅଡୁଆ ପିସିସି ସଭାପତି ଭକ୍ତ ଦାସ। ଗତକାଲି ଭକ୍ତ ଦାସ ଶ୍ରୀ ଲିଙ୍ଗରାଜଙ୍କୁ ଦର୍ଶନ କରିବାକୁ ଯାଇଥିଲେ। ଦର୍ଶନ ସାରି ଫେରିବା ସମୟରେ ମନ୍ଦିର ବେଢ଼ାରେ କିଛି ସମର୍ଥକଙ୍କ ଗହଣରେ ଫଟୋ ଉଠାଇଥିଲେ । ଉକ୍ତ ଫଟୋ ସାମାଜିକ ଗଣମାଧ୍ୟମରେ ପୋଷ୍ଟ ହେବା ପରେ ଏହାକୁ ନେଇ ଅଡୁଆରେ ପଡ଼ିଛନ୍ତି ଭକ୍ତ ଦାସ। ମନ୍ଦିର ଓ ପୋଲିସ ପ୍ରଶାସନର କୋହଳ ନୀତି ଯୋଗୁଁ ମନ୍ଦିରକୁ ମୋବାଇଲ, କ୍ୟାମେରା ଅବାଧରେ ଯାଉଥିବାର ଅଭିଯୋଗ ହୋଇଛି। ମନ୍ଦିରରେ ଫଟୋ ଉଠାଇବା ସମୟରେ ପୁଲିସ କିମ୍ବା ମନ୍ଦିର କର୍ମଚାରୀ କେହି ବାରଣ କରୁ ନାହାନ୍ତି। ଅତୀତରେ ବଲିଉଡ଼ ଅଭିନେତ୍ରୀ ଶିଳ୍ପା ସେଠୀ ମନ୍ଦିର ବେଢ଼ାରେ ସେବାୟତଙ୍କ ସହ ଫଟୋ ଉଠାଇବାକୁ ନେଇ ମନ୍ଦିର ପ୍ରଶାସନ ସେବାୟତଙ୍କୁ କାରଣ ଦର୍ଶାଅ ନୋଟିସ କରିଥିଲା । ଏବେ ପୁଣି ଲିଙ୍ଗରାଜଙ୍କ ବେଢ଼ାରେ ଫଠୋ ଉଠାଇଛନ୍ତି ପିସିସି ସଭାପତି।