ନନ୍ଦିଘୋଷ ବ୍ୟୁରୋ: ଅଧ୍ୟାପକଙ୍କ ଅସଦାଚରଣରୁ ଛାତ୍ରୀଙ୍କ ଆତ୍ମହତ୍ୟା ଅଭିଯୋଗ। କେନ୍ଦ୍ରାପଡ଼ା ପଟ୍ଟାମୁଣ୍ଡାଇ କଲେଜର ଯୁକ୍ତ ୨ ବାଣିଜ୍ୟ ଛାତ୍ରୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ଛାତ୍ରୀଙ୍କ ମାଆ ଆଣିଛନ୍ତି ଏଭଳି ସାଂଘାତିକ ଅଭିଯୋଗ। ଯୁକ୍ତ ଦୁଇ ପରୀକ୍ଷାରେ ନିରୀକ୍ଷକ ସ୍କ୍ଵାଡର ନିୟୋଜିତ ଜଣେ ଅଧ୍ୟାପକଙ୍କ ଅସଦାଚରଣରୁ ଛାତ୍ରୀ ଜଣକ ଆତ୍ମହତ୍ୟା କରିଥିବା କହିଛନ୍ତି ତାଙ୍କ ମାଆ। ଏ ନେଇ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନାରେ ଅଭିଯୋଗ କରିଛନ୍ତି ମୃତ ଛାତ୍ରୀଙ୍କ ମାଆl ପଟ୍ଟାମୁଣ୍ଡାଇ କଲେଜରେ +୨ ବାଣିଜ୍ୟ ପରୀକ୍ଷା ଦେବାକୁ ଯାଇଥିଲେ ସମ୍ପୃକ୍ତ ଛାତ୍ରୀl ପରୀକ୍ଷାରୁ ଫେରିବା ପରେ ଅଧ୍ୟାପକ ଜଣକ ଛାତ୍ରୀଙ୍କୁ ଅସଦାଚରଣ କରିଥିବା ମାଆଙ୍କୁ ଅଭିଯୋଗ କରିଥିଲେ। କମନ୍ ରୁମକୁ ଡାକି ଶାରିରୀକ ନିର୍ଯାତନା ଦେଇଥିବା କହିଥିଲେ। ଛାତ୍ରୀ ଜଣଙ୍କ ଗତ ୨୪ ତାରିଖରେ ଆତ୍ମହତ୍ୟା କରିଥିଲେ। ପରିବାର ଲୋକେ ଗତକାଲି ଏ ନେଇ ଅଭିଯୋଗ କରିଛନ୍ତି। ଅଭିଯୋଗକୁ ନେଇ ପୋଲିସ ତଦନ୍ତ ଆରମ୍ଭ କରିଛି।
ପଶ୍ଚିମବଙ୍ଗରେ ତାତିଲା ଏସଏଫଆଇ: ଶିକ୍ଷାମନ୍ତ୍ରୀଙ୍କ କାର ଉପରେ ଆକ୍ରମଣ
ନନ୍ଦିଘୋଷ ବ୍ୟୁରୋ: ପଶ୍ଚିମବଙ୍ଗ ଶିକ୍ଷାମନ୍ତ୍ରୀ ବ୍ରତ୍ୟ ବସୁଙ୍କ କାର ଉପରେ ଆକ୍ରମଣ। ଯାଦବପୁର ବିଶ୍ବବିଦ୍ୟାଳୟରେ ପରିସରରେ ତାଙ୍କ କାର୍ ଉପରେ ଆକ୍ରମଣ କରିଛନ୍ତି ଏସଏଫଆଇର ଛାତ୍ର। ତୃଣମୂଳ କଂଗ୍ରେସର ଶିକ୍ଷକ ଶାଖା ପଶ୍ଚିମବଙ୍ଗ କଲେଜ ଓ ବିଶ୍ବବିଦ୍ୟାଳୟ ପ୍ରଫେସର ସଂଘର ବାର୍ଷିକ ଅଧିବେଶନରେ ଯୋଗ ଦେବାକୁ ସେ ଯାଇଥିବାବେଳେ ଏହି ଆକ୍ରମଣ ଘଟିଥିଲା। ବିଶ୍ବବିଦ୍ୟାଳୟ କ୍ୟାମ୍ପସରେ ଏକ ପୋଲିସ ଗାଡି ଭଙ୍ଗାରୁଜା ହୋଇଥିବାବେଳେ ସିକ୍ଯୁରିଟି ଗାର୍ଡ ଓ ଜଣେ ଶିକ୍ଷାବନ୍ଧୁ ଅଫିସରଙ୍କୁ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। କ୍ୟାମ୍ପସ ଭିତରେ ଭଙ୍ଗାରୁଜା ବି ହୋଇଛି। ଛାତ୍ରସଂଘ ନିର୍ବାଚନ କରିବା ଦାବିରେ ସିପିଏମର ଛାତ୍ର ସଂଗଠନ ଏସଏଫଆଇ ପକ୍ଷରୁ ଏହି ଆକ୍ରମଣ ହୋଇଛି। ଆକ୍ରମଣ ପରେ ମନ୍ତ୍ରୀଙ୍କୁ ଏସଏସକେଏମ ହସ୍ପିଟାଲରେ ଭର୍ତ୍ତି କରାଯାଇଛି। ଏସଏଫଆଇର କିଛି ଛାତ୍ର ତାଙ୍କୁ ଦାବିପତ୍ର ଦେଉଥିବାବେଳେ କିଛି ଛାତ୍ର ଆକ୍ରମଣ କରିଥିଲେ ବୋଲି ସେ କହିଛନ୍ତି। ପଶ୍ଚିମବଙ୍ଗ କଲେଜ ଓ ବିଶ୍ବବିଦ୍ୟାଳୟ ପ୍ରଫେସର ସଂଘର ସଭାପତି ଅଛନ୍ତି ବସୁ। ଏହି ବୈଠକରେ ରାଜ୍ଯର ପ୍ରାୟ ୩ ହଜାର ପ୍ରଫେସର ଯୋଗ ଦେଇଥିଲେ। ଆକ୍ରମଣ ପରେ ଯାଦବପୁର ପୋଲିସ ଷ୍ଟେସନରେ ଏଫଆଇଆର ଦାୟର କରିଛି ପଶ୍ଚିମବଙ୍ଗ କଲେଜ ଓ ବିଶ୍ବବିଦ୍ୟାଳୟ ପ୍ରଫେସର ସଂଘ। ରାଜ୍ଯର ବିଶ୍ବବିଦ୍ୟାଳୟ ଓ କଲେଜଗୁଡିକରେ ନିର୍ବାଚନ କରାଯାଉ ନଥିବା ପ୍ରତିବାଦରେ ଏହି ଆକ୍ରମଣ ହୋଇଛି।
ବ୍ରିଟେନ ସହ ବଢିଲା ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କ ସମ୍ପର୍କ
ନନ୍ଦିଘୋଷ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲଡ୍ ଟ୍ରମ୍ପଙ୍କ ସହ କଥା କଟାକଟି ପରେ ବ୍ରିଟେନ ସହ ବଢିଛି ୟୁକ୍ରେନ ରାଷ୍ଟ୍ରପତି ଭୋଲୋଦମିର ଜେଲେନସ୍କିଙ୍କ ସମ୍ପର୍କ । ୟୁକ୍ରେନ ସହ ବ୍ରିଟେନ ସ୍ବାକ୍ଷର କରିଛି ୨ ଦଶମିକ ୨୬ ବିଲିୟନ ପାଉଣ୍ଡର ଋଣ ରାଜିନାମା । ଏହା ଜରିଆରେ ବଢିବ ୟୁକ୍ରେନର ସାମରିକ ସାମର୍ଥ୍ୟ । ବଡ଼କଥା ହେଉଛି ରୁଷର ବିଭିନ୍ନ ସଂସ୍ଥା ଉପରେ ଜାରି ହୋଇଥିବା କଟକଣାରୁ ମିଳୁଥିବା ଲାଭାଂଶକୁ ଏହି ଋଣ ଲାଗି ଦେୟ କରାଯିବ । ୟୁକ୍ରେନର ଅର୍ଥମନ୍ତ୍ରୀ ସେର୍ଜେଇ ମାରସାଙ୍କୋ ଓ ବ୍ରିଟେନର ଚାନସେଲର ରାଚେଲ ରିଭିସଙ୍କ ମଧ୍ଯରେ ଏହି ରାଜିନାମା ସ୍ବାକ୍ଷରିତ ହୋଇଛି । ଆସନ୍ତା ସପ୍ତାହରେ ଏହି ଅର୍ଥ ୟୁକ୍ରେନ ପାଇବ । ଲଣ୍ଡନ ଗସ୍ତରେ ଯାଇଥିବା ଜେଲେନସ୍କିଙ୍କୁ ଭରପୂର ସ୍ବାଗତ କରିଥିଲେ ପ୍ରଧାନମନ୍ତ୍ରୀ କେର୍ ଷ୍ଟାର୍ମର । ଲଣ୍ଡନର ୧୦-ଡାଉନିଂ ଷ୍ଟ୍ରିଟରେ ଦୁଇ ନେତାଙ୍କ ମଧ୍ଯରେ ହୋଇଥିଲା ଭେଟଘାଟ ।
ୟୁକ୍ରେନକୁ ପୂର୍ବପରି ସମର୍ଥନ ଜାରି ରହିବ ବୋଲି କହିଥିଲେ ଷ୍ଟାର୍ମର । ଟ୍ରମ୍ପଙ୍କ ସହ ଜେଲେନସ୍କିଙ୍କ କଥା କଟାକଟି ପରେ ଫ୍ରାନ୍ସ ସମେତ ୟୁରୋପୀୟ ୟୁନିଅନ ୟୁକ୍ରେନକୁ ସମର୍ଥନ ଜଣାଇଥିଲେ । ଏହାକୁ ନେଇ ବିଶ୍ବରେ ନୂଆ ସମୀକରଣ ସୃଷ୍ଟି ହୋଇଥିଲା । ଏହି ରାଜିନାମା ପରେ ବ୍ରିଟେନବାସୀଙ୍କୁ ଧନ୍ୟବାଦ ଜଣାଇଥିଲେ ଜେଲେନସ୍କି । ୟୁକ୍ରେନକୁ ପ୍ରଥମରୁ ହିଁ ବ୍ରିଟେନ ସମର୍ଥନ କରିଆସୁଥିବାବେଳେ ୟୁକ୍ରେନ ଉପରେ ରୁଷର ଆକ୍ରମଣକୁ ବିରୋଧ କରିଆସୁଛି । ଟ୍ରମ୍ପ ଓ ଜେଲେନସ୍କିଙ୍କ ମଧ୍ୟରେ କଥା କଟାକଟି ପରେ ଆମେରିକା ଓ ୟୁକ୍ରେନ ମଧ୍ୟରେ ହେବାକୁ ଥିବା ଖଣିଜ ପଦାର୍ଥ ସଂକ୍ରାନ୍ତ ରାଜିନାମା ବାତିଲ ହୋଇଥିଲା । ଏହି ପ୍ରସଙ୍ଗକୁ ନେଇ ୟୁରୋପୀୟ ରାଷ୍ଟ୍ରସଂଘ ଓ ଆମେରିକା ମଧ୍ଯରେ ତିକ୍ତତା ବୃଦ୍ଧି ପାଇବାରେ ଲାଗିଛି । ଟ୍ରମ୍ପଙ୍କ ଆଚରଣକୁ ବି ସମାଲୋଚନା କରିଥିଲେ ପ୍ରତିରକ୍ଷା ଓ ମହାକାଶ ସଂକ୍ରାନ୍ତ ୟୁରୋପୀୟ କମିଶନର ଆଣ୍ଡ୍ରିଉସ କୁବିଲସ ।
ୟୁକ୍ରେନକୁ ଆମେରିକା ୧୦୦ ବିଲିୟନ ଡଲାର ସହାୟତା ଦେଇଥିବାବେଳେ ୟୁରୋପୀୟ ୟୁନିଅନ ୧୩୦ ବିଲିୟନ ଡଲାର ଦେଇଛି ବୋଲି କହିଛନ୍ତି କୁବିଲସ । ୟୁକ୍ରେନକୁ ୟୁନିଅନର ସହାୟତା ପରିମାଣ ବଢିବ ବୋଲି ସେ କହିଛନ୍ତି । ଯଦି ୟୁକ୍ରେନକୁ ଚୀନ ସମର୍ଥନ ନ କରେ ତେବେ ଏହାକୁ ଭିନ୍ନ ଅର୍ଥରେ ଗ୍ରହଣ କରାଯିବ ବୋଲି ସେ କହିଛନ୍ତି । ତେଣେ ଟ୍ରମ୍ପଙ୍କ ସହ ସମ୍ପର୍କ ରକ୍ଷା ସେପରି ଜରୁରୀ ନୁହେଁ ବୋଲି କହିଛନ୍ତି ଜେଲେନସ୍କ । ଶାନ୍ତିର ଆବଶ୍ଯକତା ଥିବାରୁ ସେ ଆମେରିକା ଯାଇଥିଲେ । ଖଣିଜ ପଦାର୍ଥ ଚୁକ୍ତି ଏକ ପ୍ରଥମ ପଦକ୍ଷେପ ଥିଲା । ଏହି ଚୁକ୍ତି ପରେ ନିରାପତ୍ତା ଗ୍ଯାରେଣ୍ଟି ବିଷୟ ଉପରେ ଗୁରୁତ୍ବ ଦିଆଯାଇଥାନ୍ତା । ମାତ୍ର ସବୁକିଛି ବିଗିଡ଼ିଗଲା ବୋଲି କହିଛନ୍ତି ଜେଲେନସ୍କି । ରୁଷ ହେଉଛି ୟୁକ୍ରେନର ଶତ୍ରୁ ଏବଂ ଆଲୋଚନା ବେଳେ ୟୁକ୍ରେନର ସ୍ବାର୍ଥକୁ ସର୍ବାଦୌ ଗୁରୁତ୍ବ ଦିଆଯିବା ଉଚିତ ବୋଲି ଜେଲେନସ୍କି କହିଛନ୍ତି ।
ମାର୍ଚ୍ଚ ୩୧ ସୁଭଦ୍ରା ଆବେଦନର ଶେଷ ତାରିଖ
ନନ୍ଦିଘୋଷ ବ୍ୟୁରୋ: ମାର୍ଚ୍ଚ ୩୧ ସୁଭଦ୍ରା ଆବେଦନର ଶେଷ ତାରିଖ। ୩୧ ଭିତରେ ଯେଉଁମାନେ ଆବେଦନ କରିଥିବେ ସେମାନେ ଏକକାଳୀନ ୩ଟି କିସ୍ତିର ଟଙ୍କା ପାଇବେ । ରାକ୍ଷୀ ପୂର୍ଣ୍ଣିମାରେ ଏକକାଳୀନ ୩ଟି କିସ୍ତିରେ ଟଙ୍କା ପାଇବେ ବୋଲି ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ମାର୍ଚ୍ଚ ୬ରେ ପ୍ରଥମ କିସ୍ତିର ପଞ୍ଚମ ପର୍ଯ୍ୟାୟ ଟଙ୍କା ପାଇବେ ମହିଳା । ୧ ଲକ୍ଷ ୭୦ ହଜାର ମହିଳାଙ୍କୁ ମିଳିବ ପ୍ରଥମ କିସ୍ତି ଟଙ୍କା । ସେହିପରି ମାର୍ଚ୍ଚ ୮ରେ ମିଳିବ ଦ୍ବିତୀୟ କିସ୍ତି ସୁଭଦ୍ରା ଟଙ୍କା । ମହିଳାଙ୍କ ବ୍ୟାଙ୍କ ଖାତାକୁ ୫ ହଜାର ଲେଖାଏଁ ଟଙ୍କା ଯିବ । ୧ କୋଟିରୁ ଅଧିକ ମହିଳା ଏକା ସାଙ୍ଗରେ ପାଇବେ ଦ୍ବିତୀୟ କିସ୍ତି ଅର୍ଥ ।
ବିରାଟ କୋହଲିଙ୍କୁ ଭୁରି ଭୁରି ପ୍ରଶଂସା କଲେ ବିରୁ, କହିଲେ…
ନନ୍ଦିଘୋଷ ବ୍ୟୁରୋ: ଭାରତୀୟ କ୍ରିକେଟ ଦଳର ପୂର୍ବତନ ବିସ୍ଫୋରକ ଓପନର ବ୍ୟାଟ୍ସମ୍ୟାନ ବିରେନ୍ଦ୍ର ସେହଓ୍ବାଗ କିଙ୍ଗ କୋହଲିଙ୍କୁ କରିଛନ୍ତି ପ୍ରଶଂସା । ନ୍ୟୁଜିଲାଣ୍ଡ ବିପକ୍ଷ ମ୍ୟାଚ ପୂର୍ବରୁ ସେ କୋହଲିଙ୍କୁ ପ୍ରଶଂସା କରିବା ସହ କହିଛନ୍ତି କି, ଦିନିକିଆରେ ଆଉ ତାଙ୍କ ଭଳି ଖେଳାଳି ଦେଖିବାକୁ ମିଳିବେନି । ଏକ ସ୍ପୋର୍ଟ ଚ୍ୟାନେଲରେ ଇଣ୍ଟରଭିୟୁ ସମୟରେ ସେ କୋହଲିଙ୍କୁ ପ୍ରଶଂସା କରିଛନ୍ତି । ଦୀର୍ଘଦିନ ଧରି ଫର୍ମରେ ନଥିବା କୋହଲି ପାକିସ୍ତାନ ବିପକ୍ଷରେ ଶତକୀୟ ପାଳି ଖେଳିଥିବାବେଳେ ତାଙ୍କୁ ସମସ୍ତେ ବେଶ ପ୍ରଶଂସା କରିଛନ୍ତି । କେବଳ ଭାରତୀୟ ନୁହେଁ ପାକିସ୍ତାନୀ ପ୍ରଶଂସକମାନେ ମଧ୍ୟ ବିଭିନ୍ନ ଭଲ ଭଲ କମେଣ୍ଟମାନ ଦେଉଥିବା ଦେଖିବାକୁ ମିଳିଛି ।
କହି ରଖୁଛୁ କି, ନ୍ୟୁଜିଲାଣ୍ଡ ବିପକ୍ଷ ମ୍ୟାଚରେ କୋହଲି ୩୦୦ତମ ଦିନିକିଆ ମ୍ୟାଚ ହେବ । ସପ୍ତମ ଭାରତୀୟ ଖେଳାଳିଭାବେ ସେ ଏହି ରେକର୍ଡ କରିବାକୁ ଯାଉଛନ୍ତି । ତେବେ ଏହି ମ୍ୟାଚରେ ବଡ଼ ସ୍କୋର କରି ଇତିହାସ ରଚିବେ ବୋଲି ଆଶା ରଖିଛନ୍ତି କ୍ରିକେଟପ୍ରେମୀ । ସବୁଠାରୁ ବଡ଼ କଥା ହେଉଛି କି, ନ୍ୟୁଜିଲାଣ୍ଡ ବିପକ୍ଷରେ କୋହଲିଙ୍କ ରେକର୍ଡ ମଧ୍ୟ ଭଲ ରହିଛି । ୩୧ ପାଳିରେ ୧୬୪୫ ରନ ସଗ୍ରହ କରିଛନ୍ତି । ଯେଉଁଥିରେ ୯ଟି ଅର୍ଦ୍ଧଶତକ ରହିଥିବାବେଳେ ୬ଟି ଶତକ ରହିଛି ।
ବାପା କରିଥିଲେ ଆତ୍ମହତ୍ୟା, ଭାଇଙ୍କୁ କରାଯାଇଥିଲା ହତ୍ୟା : ଜାଣନ୍ତୁ ମୃତ କଂଗ୍ରେସ ନେତ୍ରୀ ହିମାନୀଙ୍କ କାହାଣୀ
ନନ୍ଦିଘୋଷ ବ୍ୟୁରୋ: ହରିୟାଣାର ଜଣାଶୁଣା କଂଗ୍ରେସ ନେତ୍ରୀ ହିମାନୀ ନରଓ୍ବେଲଙ୍କ ମୃତଦେହ ସୁଟକେଶରୁ ଉଦ୍ଧାର ହେବା ପରେ ରାଜନୈତିକ ଚର୍ଚ୍ଚାର ଜୋର ଧରିଛି । କିଏ ଏବଂ କାହିଁକି ଏମିତି କଲା ଏହାକୁ ନେଇ ବେଶ ଚର୍ଚ୍ଚା ହେଉଛି । ତେବେ ହିମାନୀଙ୍କ ଜୀବନ କାହାଣୀ ସମ୍ପର୍କରେ ଆପଣ ଜାଣିଲେ ଆଖିରେ ଲୁହ ଆସିଯିବ । ପାରିବାରିକ କଳହ ଯୋଗୁଁ ତାଙ୍କ ବାପା ଆତ୍ମହତ୍ୟା କରିଛନ୍ତି । ନିଜ ମା ଏବଂ ୨ ଭାଇଙ୍କ ସହ ରହୁଥିଲେ ହିମାନୀ । ତେବେ ତାଙ୍କର ଜଣେ ଭାଇଙ୍କୁ ମଧ୍ୟ ହତ୍ୟା କରାଯାଇଛି । ଆଉ ଏବେ ହିମାନୀଙ୍କ କିଏ ଏବଂ କାହିଁକି ହତ୍ୟା କଲା ଏହା ଚର୍ଚ୍ଚାର ବିଷୟ ପାଲଟିଛି ।
କହି ରଖୁଛୁ କି, ୨୦୧୬ ମସିହାରୁ ରାଜନୀତି ସହ ଜଡ଼ିତ ରହିଥିବା ହିମାନୀ ଏବେ ଆଇନ ପାଠ ପଢ଼ୁଛନ୍ତି । ସବୁବେଳେ କଂଗ୍ରେସର ସମସ୍ତ କାର୍ଯ୍ୟକ୍ରମରେ ଆଗରେ ନଜର ଆସିଥାନ୍ତି । ଏପରିକି ଭାରତ ଯୋଡ଼ୋ ଯାତ୍ରା ସମୟରେ ସେ ରାହୁଲଙ୍କ ସହ ରାଲିରେ ସାମିଲ ହୋଇଥିଲେ । କେବଳ ଏତିକି ନୁହେଁ କଂଗ୍ରେସର ବହୁ ବଡ଼ ବଡ଼ ନେତାଙ୍କ ଫଟୋ ଉଠାଇଛନ୍ତି ଏବଂ କାର୍ଯ୍ୟକ୍ରମରେ ସାମିଲ ହୋଇଛନ୍ତି । ସେପଟେ ତାଙ୍କୁ ହତ୍ୟା କରାଯାଇଥିବା ପୋଲିସର ପ୍ରଥମିକ ତଦନ୍ତରୁ ଜଣା ପଡ଼ିଥିବାବେଳେ ରାଜନୈତିକ ଉଦ୍ଦେଶ୍ୟ କି ବ୍ୟକ୍ତିଗତ ଶତ୍ରୁତା ତାହା ସ୍ପଷ୍ଠ ହୋଇନାହିଁ । ପୋଲିସ ଏହି ଘଟଣାର ତଦନ୍ତ ଜୋରଦାର ଚଲାଇଛି ।
କଂଗ୍ରେସ କର୍ମୀଙ୍କ ମୃତଦେହ ଉଦ୍ଧାର ଘଟଣା : ହତ୍ୟା ପଛରେ ରହିଛି କି ଷଡ଼ଯନ୍ତ୍ର ?
ନନ୍ଦିଘୋଷ ବ୍ୟୁରୋ: ହରିୟାଣା ରୋହତକରେ ମହିଳାଙ୍କୁ ବୀଭତ୍ସ ହତ୍ଯା। ଜଣେ ମହିଳାଙ୍କ ମୃତଦେହକୁ ସୁଟକେଶରୁ ଠାବ କରାଯାଇଛି। ବଡ଼କଥା ହେଉଛି ମୃତକ ହେଉଛନ୍ତି ଜଣେ କଂଗ୍ରେସ କର୍ମୀ ଏବଂ ଭାରତ ଯୋଡ ଯାତ୍ରା ସମୟରେ ସେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସହ ସାଥୀରେ ଥିଲେ। ରୋହତକର ସାମ୍ପଲା ବସଷ୍ଟାଣ୍ଡ ନିକଟରେ ଏକ ନୀଳ ରଙ୍ଗର ସୁଟକେଶରୁ ତାଙ୍କ ମୃତଦେହ ଉଦ୍ଧାର କରାଯାଇଥିଲା। ମୃତକଙ୍କ ବୟସ ୨୨ରୁ ୨୩ ବର୍ଷ ହେବ। ତାଙ୍କ ହାତରେ ମେହେନ୍ଦୀ ଲାଗିଥିବାବେଳେ ବେକରେ ଏକ ଲୁଗା ବନ୍ଧାଯାଇଥିବା ଦେଖିବାକୁ ମିଳିଥିଲା। ସାମ୍ପଲା ଥାନାଅଧିକାରୀ ବିଜେନ୍ଦ୍ର ସିଂ କହିଛନ୍ତି- ମହିଳାଙ୍କୁ ହତ୍ୟା କରାଯାଇଛି ଏବଂ ତାଙ୍କୁ ସୁଟକେଶରେ ପ୍ଯାକ କରି ଫୋପାଡ଼ି ଦିଆଯାଇଛି। ମୃତକଙ୍କ ନାମ ହିମାନି ନରୱଲ ବୋଲି ସୂଚନା ମିଳିଛି। କଂଗ୍ରେସ ବିଧାୟକ ଭାରତ ଭୂଷଣ ବାତ୍ରା କହିଛନ୍ତି- ଭାରତ ଯୋଡ ଯାତ୍ରା ସମୟରେ ହିମାନି ବେଶ୍ ସକ୍ରିୟ ଥିଲେ ଏବଂ ରାହୁଲଙ୍କ ସହ ସାଥ୍ ଦେଇଥିଲେ। ସେହିପରି ଲୋକସଭା ନିର୍ବାଚନରେ କଂଗ୍ରେସ ନେତା ଭୂପିନ୍ଦର ସିଂ ହୁଡା ଓ ଦୀପେନ୍ଦର ହୁଡାଙ୍କ ସହ ବି ବେଶ୍ ସକ୍ରିୟ ଥିଲେ। ଏହି ହତ୍ଯା ଘଟଣାର ନିରପେକ୍ଷ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ଭୂପିନ୍ଦର।
ତେବେ ପୋଲିସର ପ୍ରାଥମିକ ତଦନ୍ତରୁ ଜଣା ପଡ଼ିଛି କି ତାଙ୍କ ଗଳାକାଟି ହତ୍ୟା କରାଯାଇଛି । ଏବେ ପ୍ରଶ୍ନ ଉଠିଛି କି, କିଏ ଏବଂ କାହିଁକି ହତ୍ୟା କରିଛି । ତେବେ ଏହା ପଛରେ ରାଜନୈତିକ ଉଦ୍ଦେଶ୍ୟ ରହିଛି ନାଁ ଷଡ଼ଯନ୍ତ୍ର । ଏମିତି ପ୍ରଶ୍ନମାନ ଉଠିଥିବାବେଳେ ଏହାକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି । ସେପଟେ ଘଟଣାର ସତ୍ୟାସତ୍ୟ ଜାଣିବା ପାଇଁ ପୋଲିସ ୫ଟି ଟିମ ଗଠନ କରିଥିବା ଜଣାପଡ଼ିଛି । ତାଙ୍କ ଘର ଆଖପାଖରେ ଲାଗିଥିବା ସିସିଟିଭିକୁ ମଧ୍ୟ ଯାଞ୍ଚ କରୁଛି ପୋଲିସ । ଏହାସହ ସୋସିଆଲ ମିଡିଆକୁ ନେଇ ମଧ୍ୟ ତଦନ୍ତ କରାଯାଉଛି । ଚର୍ଚ୍ଚା ହେଉଛି କି, କେହି ତାଙ୍କୁ ଡାକି ଦେଖା କରିବା ବାହାନାରେ ହତ୍ୟା କରିନାହିଁ ତ? ତେବେ କଂଗ୍ରେସ ଦଳର ଜଣେ ସକ୍ରିୟ କର୍ମୀ ରହିଥିବାବେଳେ ତାଙ୍କୁ କାହିଁକି ଏମିତି ହତ୍ୟା କରାଯାଇଛି ।
ବିରାଟ କୋହଲିଙ୍କୁ ନେଇ କାହିଁକି ଏମିତି କହିଲେ ଉଥପ୍ପା
ନନ୍ଦିଘୋଷ ବ୍ୟୁରୋ: ଶେଷ ଲିଗ ମ୍ୟାଚରେ ନ୍ୟୁଜଲାଣ୍ଡକୁ ଭେଟିବ ଭାରତ । ତେବେ ଏହି ମ୍ୟାଚ ପୂର୍ବରୁ ବିରାଟ କୋହଲିଙ୍କୁ ଏକ ବଡ଼ ବୟାନ ଦେଇଛନ୍ତି ରବିନ ଉଥପ୍ପା । ସେ କହିଛନ୍ତି କି, ବିରାଟଙ୍କ ଆତ୍ମବିଶ୍ବାସ ହେଉଛି ବଡ଼ ମନ୍ତ୍ର । ଉଥାପ୍ପା ବିରାଟ କୋହଲିଙ୍କ ସଫଳତାର ରହସ୍ୟ ପ୍ରକାଶ କରି କହିଛନ୍ତି ଯେ ଏହାର କାରଣ ହେଉଛି ତାଙ୍କ ନିଜ ଉପରେ ଥିବା ବିଶ୍ୱାସ ଏବଂ ଆତ୍ମବିଶ୍ୱାସ। ସେ କହିଥିଲେ ଯେ ତାଙ୍କର ଆତ୍ମବିଶ୍ୱାସ ହିଁ ତାଙ୍କର ଗୁପ୍ତ ରହସ୍ୟ। ସେ ଯାହା କରନ୍ତି, ବହୁତ କମ୍ ଲୋକ ତାହା କରିପାରିବେ। ରବିନ ଉଥାପ୍ପା ୨୦୧୦ ମସିହାର ଘଟଣା କହିଥିଲେ, ଯେତେବେଳେ ସେ ଆରସିବିରେ ଦଳ ସହିତ ଥିଲେ। ତା’ପରେ ସେ ୪ କିମ୍ବା ୫ ନମ୍ବରରେ ଖେଳୁଥିଲେ। ଉତ୍ଥାପ୍ପା କହିଲେ ଯେ ସେମାନେ ସମସ୍ତେ ଖାଇବାକୁ ବାହାରକୁ ଯାଇଥିଲେ। ଯେତେବେଳେ ବ୍ୟାଟିଂ କ୍ରମ ବିଷୟରେ ଆଲୋଚନା ହେଉଥିଲା, ବିରାଟ କହିଥିଲେ ଯେ ସେ ଦଳର ସର୍ବୋତ୍ତମ ବ୍ୟାଟସମ୍ୟାନ ଏବଂ ତାଙ୍କୁ ନମ୍ବର ୩ ରେ ଖେଳିବା ଉଚିତ। ଉଥାପ୍ପାଙ୍କ ଅନୁସାରେ, ବିରାଟ ସେତେବେଳେ ୨୦ ବର୍ଷ ବୟସର ଥିଲେ ଏବଂ ତାଙ୍କ ଆତ୍ମବିଶ୍ୱାସ ସେତେବେଳେ ଆଶ୍ଚର୍ଯ୍ୟଜନକ ଥିଲା।
ସେପଟେ ଆଜି ୩୦୦ ତମ ଦିନିକିଆ ମ୍ୟାଚ ଖେଳିବାକୁ ଯାଉଛନ୍ତି ବିରାଟ କୋହଲି । ସପ୍ତମ ଭାରତୀୟ ଖେଳାଳି ଭାବେ ସେ ୩୦୦ତମ ମ୍ୟାଚ ଖେଳିବାକୁ ଯାଉଛନ୍ତି । ଏହା ପୂର୍ବରୁ ସଚିନ ତେନ୍ଦୁଲକର, ଏମଏସ ଧୋନୀ, ସୌରଭ ଗାଙ୍ଗୁଲି, ମହମ୍ମଦ ଆଦ୍ଧାରୁଦ୍ଦିନ, ଯୁବରାଜ ସିଂହ ଏବଂ ରାହୁଲ ଦ୍ରାବିଡ ଏହି କ୍ଲବରେ ସାମିଲ ହୋଇଛନ୍ତି । ଏବେ ବିରାଟ ଏହି କ୍ଲବରେ ସାମିଲ ହୋଇଥିବାବେଳେ ଆଜିର ମ୍ୟାଚରୋ ବଡ଼ ସ୍କୋର କରି ଦଳକୁ ଅପରାଜେୟ ରଖିବେ ବୋଲି ଆଶା ରଖିଛନ୍ତି କ୍ରିକେଟପ୍ରେମୀ ।
ସଲମାନଙ୍କ ପାଇଁ ଝିଅ ଖୋଜିଦେଲେ ରାକ୍ଷୀ ସାଓ୍ବନ୍ତ, ପାକିସ୍ତାନୀ ଅଭିନେତ୍ରୀଙ୍କ ସହ ଯୋଡ଼ିଲେ..
ନନ୍ଦିଘୋଷ ବ୍ୟୁରୋ: ବଲିଉଡ ଅଭିନେତ୍ରୀ ରାକ୍ଷୀ ସାଓ୍ବନ୍ତ ନିଜର ଇନଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରିଛନ୍ତି । ଯାହାକି ବେଶ ଭାଇରାଲ ହେବାରେ ଲାଗିଛି । ତେବେ ଏହି ଭିଡିଓରେ ସେ ପାକିସ୍ତାନୀ ହିରୋଇନଙ୍କ ସହ ସଲମାନଙ୍କ ନାଁକୁ ଯୋଡ଼ିଛନ୍ତି । ପାକିସ୍ତାନୀ ହିରୋଇନ ହାନିଆଙ୍କୁ ସଲମାନ ବାହାହେବେ ଆଉ ଆମର ଭାଉଜ ହେବେ ବୋଲି ରାକ୍ଷୀ ଭିଡିଓରେ କହୁଥିବା ଦେଖିବାକୁ ମିଳିଛି । ଏହାସହ ସେ କହିଛନ୍ତି ହାନିଆ ବଲିଉଡକୁ ଆସି ସଲମାନଙ୍କ ସହ କାମ କରିବା ଉଚିତ୍ । ରାଖୀ କହିଥିଲେ ଯେ ଯେପରି ବଜରଙ୍ଗୀ ଭାଇଜାନ ଭାରତ-ପାକିସ୍ତାନ ଉପରେ ଥିଲା, ସେହିପରି ପାକିସ୍ତାନ ଏବଂ ଭାରତ ମଧ୍ୟରେ ମଧ୍ୟ ଏକ ସୁନ୍ଦର ପ୍ରେମ କାହାଣୀ ନିର୍ମାଣ ହେବା ଉଚିତ। ଏଠାରୁ ସଲମାନ ଖାନ ଏବଂ ସେଠାରୁ ମୋ ଭାଉଜ ହାନିଆ ରହିବା ଉଚିତ୍। ରାଖୀ ସାୱନ୍ତ ଗତ କିଛି ଦିନ ମଧ୍ୟରେ ହାନିଆ ଆମିରଙ୍କ ବିଷୟରେ ଅନେକ ବୟାନ ଦେଇଛନ୍ତି। କିଛି ଦିନ ପୂର୍ବରୁ ସେ ପାକିସ୍ତାନରେ ବିବାହ କରିଥିବା ମଧ୍ୟ ଦାବି କରୁଥିଲେ। ଏବେ ସେ ସଲମାନ ଏବଂ ହାନିଆଙ୍କୁ ଯୋଡ଼ିବା ବିଷୟରେ କଥା ହୋଇଛନ୍ତି।
ଗାଧୋଇବାକୁ ଯାଇଥିବାବେଳେ ହାତୀ ଆକ୍ରମଣରେ ବୃଦ୍ଧ ମୃତ
ନନ୍ଦିଘୋଷ ବ୍ୟୁରୋ: ଢେଙ୍କାନାଳ ଜିଲ୍ଲା କାମାକ୍ଷାନଗର ପୂର୍ବାଞ୍ଚଳ ରେଞ୍ଜ କୋରିଆପାଳ ଗାଁରେ ହାତୀ ଆକ୍ରମଣରେ ବୃଦ୍ଧ ମୃତ । ମୃତକ ଜଣକ ହେଲେ ସେହି ଗାଁର ବିଦ୍ୟାଧର ଦେହୁରୀ । ବିଦ୍ୟାଧର ଗାଁରେ ପୂଜକ ଭାବେ କାମ କରୁଥିବା ବେଳେ ସକାଳୁ ଗାଧୋଇବା ପାଇଁ ଗାଁ ନିକଟ ଜୋରକୁ ଯାଉଥିଲେ । ଯିବା ସମୟରେ ଦନ୍ତା ସାମ୍ନାରେ ପଡ଼ିଯାଇଥିଲେ । ହାତୀଟି ବିଦ୍ୟାଧରଙ୍କୁ ଶୁଣ୍ଢରେ କଚାଡ଼ି ଦେଇଥିଲା । ବନବିଭାଗ କର୍ମଚାରୀମାନେ ତୁରନ୍ତ ବିଦ୍ୟାଧରଙ୍କୁ ଉଦ୍ଧାର କରି କାମାକ୍ଷାନଗର ମେଡିକାଲରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ସରକାରଙ୍କ ତରଫରୁ ଆର୍ଥିକ ସହାୟତା ଯୋଗାଇ ଦେବା ପାଇଁ ବନବିଭାଗ ତରଫରୁ କୁହାଯାଇଛି ।