ଭୁବନେଶ୍ବର : ସ୍ତ୍ରୀ ରକ୍ତ ରେ ହୋଲି ଖେଳିଲା ସ୍ବାମୀ । ନୃଶଂସ ସ୍ବାମୀର ନାରକୀୟ କାଣ୍ଡ । ରାଜଧାନୀରେ ଘଟିଛି ବିଭତ୍ସ ହତ୍ୟାକାଣ୍ଡ । ବିଚ୍ ରାସ୍ତାରେ ସ୍ତ୍ରୀ କୁ ନିର୍ମମ ହତ୍ୟା କରିଛି ସ୍ୱାମୀ। ଭରତପୁର ଥାନା ଫୁଲେଶ୍ଵରୀ ବସ୍ତିର ଘଟିଛି ହତ୍ୟାକାଣ୍ଡ । ମୃତକ ହେଲେ ସାବିତ୍ରୀ ମଲ୍ଲିକ । ଗତକାଲି ରାତିରେ ଫୁଲେଶ୍ଵରୀ ବସ୍ତିର ସାବିତ୍ରୀ ମଲ୍ଲିକ ଓ ସ୍ବାମୀ ପୂର୍ଣ୍ଣଚନ୍ଦ୍ର ମଲ୍ଲିକ ରୋଷେଇ କରୁଥିବା ବେଳେ ଉଭୟଙ୍କ ଭିତରେ ଯୁକ୍ତିତର୍କ ହେଇଥିଲା । ପୂର୍ଣ୍ଣଚନ୍ଦ୍ର ରାଗିଯାଇ ପିଆଜ କାଟୁଥିବା ଛୁରୀରେ ଆକ୍ରମଣ କରିଥିଲେ । ଛୁରାମାଡ ପରେ ଘଟଣାସ୍ଥଳରେ ସାବିତ୍ରୀ ଙ୍କ ମୃତ୍ୟୁ ହେଇଥିଲା । ଘଟଣାସ୍ଥଳ ରେ ଭରତପୁର ଥାନା ପୋଲିସ ପହଞ୍ଚି ମୃତ ଦେହ ଜବତ କରି ଶବ ବ୍ୟବଚ୍ଛେଦ ପାଇଁ ଏମ୍ସ ପଠେଇଛି । ଅଭିଯୁକ୍ତ ସ୍ବାମୀ ପୂର୍ଣ୍ଣଚନ୍ଦ୍ର ମଲ୍ଲିକ କୁ କାବୁ କରିଛି ପୋଲିସ। ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ ଘଟଣାର ତଦନ୍ତ କରୁଛି ପୋଲିସ ।
ଭାରତ କିଣିବ ଆଉ ୫ଟି S-400 ଏୟାର ଡିଫେନ୍ସ ସିଷ୍ଟମ
ନନ୍ଦିଘୋଷ ବ୍ୟୁରୋ : ପ୍ରାଚ୍ୟ ଯୁଦ୍ଧର ପ୍ରଭାବ। ରୁଷଠାରୁ ଭାରତ କିଣିବ ଆଉ ୫ଟି S-400 ଏୟାର ଡିଫେନ୍ସ ସିଷ୍ଟମ। ଗତବର୍ଷ ହୋଇଥିବା ଅପରେସନ ସିନ୍ଦୂରରେ ବି ହୋଇଥିଲା ୫ଟି S-400 ଏୟାର ଡିଫେନ୍ସ ସିଷ୍ଟମର ସଫଳ ବ୍ୟବହାର। ବର୍ତ୍ତମାନ ଭାରତ ନିକଟରେ ୩ଟି S-400 ଏୟାର ଡିଫେନ୍ସ ସିଷ୍ଟମ ଥିବାବେଳେ ଆଉ ୫ଟି ଲାଗି ଆଶା ରଖିଛି ଭାରତ। ଅପରେସନ ସିନ୍ଦୂର ବେଳେ ପାକିସ୍ତାନର ବହୁ ମିସାଇଲ ଓ ବିମାନକୁ ନଷ୍ଟ କରିଥିଲା S-400 ଏୟାର ଡିଫେନ୍ସ ସିଷ୍ଟମ। ଇରାନ ବିରୋଧରେ ହୋଇଥିବା ଅପରେସନ ଫ୍ୟୁରୀ ବେଳେ ଯେପରି ସୁନିର୍ଦ୍ଦିଷ୍ଟ ଭାରେ ସୁପ୍ରିମ ଲିଡର ଆୟାତୋଲ୍ଲା ଖାମେନେଇଙ୍କୁ ହତ୍ୟା କରାଗଲା ତାହାକୁ ନେଇ ଚର୍ଚ୍ଚା ଲାଗି ଥିବାବେଳେ ଭାରତ ନିଜର ପ୍ରତିରକ୍ଷା ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବା ଲାଗି ଯୋଜନା କରୁଛି। ସୁଦର୍ଶନ ଚକ୍ର ବୋଲି କୁହାଯାଉଥିବା S-400 ଏୟାର ଡିଫେନ୍ସ ସିଷ୍ଟମ ବଳରେ ଭାରତ ଶକ୍ତିଶାଳୀ ହେବ ବୋଲି କୁହାଯାଇଛି।..
ଇରାନ ଉପରେ ହମଲା ପ୍ରସଙ୍ଗରେ ଆମେରିକାର ବଡ଼ ଘୋଷଣା
ନନ୍ଦିଘୋଷ ବ୍ୟୁରୋ : ଇରାନ ଉପରେ ହମଲା ପ୍ରସଙ୍ଗରେ ଆମେରିକାର ବଡ଼ ଘୋଷଣା। ଡୁବାଇଛି ୧୭ ଜାହାଜ। ଇରାନର ୨ ହଜାର ଟାର୍ଗେଟକୁ କରିଛି ହିଟ୍। ଅପରେସନ ଏପିକ ଫ୍ୟୁରୀ ଆରମ୍ଭ ପରଠାରୁ ଏହି କ୍ଷତି କରାଯାଇଛି ବୋଲି କହିଛି ଆମେରିକା। ଇରାନ ଉପରେ ହମଲା ଲାଗି ଆମେରିକା ୫୦ ହଜାର ସୈନ୍ୟ ଓ ୨୦୦ ଜେଟ ମୁତୟନ କରିଛି ବୋଲି କହିଛି ଆମେରିକା। ଇରାନର ବିଭିନ୍ନ ସ୍ଥଳୀ ଉପରେ ଇସ୍ରାଏଲର ହମଲା ଜାରି ରହିଥିବାବେଳେ ଲେବାନନସ୍ଥିତ ହେଜବୁଲ୍ଲା ଉପରେ ବି କରିଛି ଆକ୍ରମଣ। ବେରୁଟ ଆଖପାଖରେ ହେଜବୁଲ୍ଲାର ବିଭିନ୍ନ ସ୍ଥଳୀ ଉପରେ ଇସ୍ରାଏଲ କରିଛି ହମଲା। ତେଣେ ଇରାକସ୍ଥିତ କୁର୍ଦ୍ଦ ଅଧିକୃତ ଅଞ୍ଚଳରେ ହୋଇଛି ଡ୍ରୋନ ହମଲା। ଲେବାନନ ସୀମାକୁ ସିରିଆ ହଜାର ହଜାର ସେନା ପଠାଇଛି। ସେପଟେ ଭୂମଧ୍ୟସାଗରକୁ ଫ୍ରାନ୍ସ ପଠାଇଛି ବିମାନବାହୀ ଯୁଦ୍ଧ ଜାହାଜ ଚାର୍ଲସ ଡି ଗୁଏଲି। ଆଣବିକ ଶକ୍ତି ସମ୍ପନ୍ନ ଯୁଦ୍ଧଜାହାଜ ମୁତୟନ ହେବା ଯୋଗୁ ଯୁଦ୍ଧର ଗତି ବଦଳିପାରେ ବୋଲି ଆଶଙ୍କା ସୃଷ୍ଟି ହୋଇଛି। ଏପରିକି ମିତ୍ର ଶକ୍ତିକୁ ରକ୍ଷା କରିବା ଲାଗି କିଛି ଡ୍ରୋନକୁ ଖସାଇ ଦିଆଯାଇଛି ବୋଲି କହିଛନ୍ତି ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ। ଯୁଦ୍ଧରେ ସାମିଲ ହେବେ ନାହିଁ ବୋଲି ପୂର୍ବରୁ ବ୍ରିଟେନ, ଜର୍ମାନୀ ଓ ଫ୍ରାନ୍ସ ଘୋଷଣା କରିଥିଲେ ବି ବର୍ତ୍ତମାନ ଯୁଦ୍ଧରେ ସାମିଲ ହୋଇଛି ଫ୍ରାନ୍ସ।
ମଦୁଆ ସାବଧାନ ! ହୋଲି ପାଇଁ କଡା ସୁରକ୍ଷା ବଳୟରେ ରହିବ ଭୁବନେଶ୍ୱର
ଭୁବନେଶ୍ବର : ମଦୁଆ ସାବଧାନ । ମଦ ପିଇ ଗାଡି ଚଳାଇଲେ ସିଜ ହେବ ଗାଡି । ହୋଲି ପାଇଁ କଡା ସୁରକ୍ଷା ବଳୟରେ ରହିବ ଭୁବନେଶ୍ୱର । ଡିସିପିଙ୍କ ନେତୃତ୍ୱରେ ୪ ଜଣ ଅତିରିକ୍ତ ଡିସିପି, ୮ ଜଣ ଏସପି ଦାୟିତ୍ୱରେ ରହିବେ । ୧୭ଟି ମୋବାଇଲ ପାର୍ଟି ପଇଁତରା ମାରିବେ । ୮୫ଟି ସ୍ଥାନରେ ଡ୍ରଙ୍କ ଆଣ୍ଡ ଡ୍ରାଇଭ ଚେକିଂ ହେବ । ୧୦ ଟି ଗାଧୁଆ ତୁଠ ଓ ନଦୀ ପଠାରେ ବ୍ୟାପକ ଅଗ୍ନିଶମ ଟିମ ଓ ଓଡ୍ରାଫ ଟିମ ମୁତୟନ ରହିବେ । ୪ ଟି ଷ୍ଟ୍ରାଇକିଙ୍ଗ ଟିମ ସୁରକ୍ଷା ଦାୟିତ୍ୱରେ ରହିବେ ।
ଏହାସହ ରାସାୟନିକ ରଙ୍ଗ ବ୍ୟବହାର ନକରିବାକୁ ସୂଚନା ଦେଇଛି କମିଶନରେଟ ପୋଲିସ । ବିଶୃଙ୍ଖଳାକାରୀଙ୍କ ଉପରେ ପୋଲିସର ନଜର ରହିଛି । ହୋଲିକୁ ନେଇ ଯେଉଁ ଇଭେଣ୍ଟ ହେବ, ତା’ ଉପରେ ମଧ୍ୟ ନଜର ରଖିବ କମିଶନରେଟ ପୋଲିସ ।
ବୁଧବାର ଦୁବାଇ ଫ୍ଲାଇଟ ବାତିଲ ; ସ୍ଥିତି ସ୍ବାଭାବିକ ହେଲେ ଶୁକ୍ରବାର ଦୁବାଇକୁ ଉଡ଼ିପାରେ ବିମାନ
ଭୁବନେଶ୍ବର : ସୋମବାର ବାତିଲ ହୋଇଥିଲା । ଆସନ୍ତାକାଲି ପାଇଁ ବି ବାତିଲ ହେଲା ଦୁବାଇ ଫ୍ଲାଇଟ । ସପ୍ତାହକୁ ତିନି ଦିନ ଭୁବନେଶ୍ବରରୁ ଦୁବାଇ ଯାଏ ଫ୍ଲାଇଟ । ସୋମବାର, ବୁଧବାର, ଶୁକ୍ରବାର ଯାତ୍ରା କରିଥାଏ । ଗତକାଲି ଉଡାଣ ବାତିଲ କରିଥିଲା ଇଣ୍ଡିଗୋ । ଏହାକୁ ଗୋଟେ ଦିନ ପୂର୍ବରୁ ଜଣାଇ ଦିଆଯାଇଥିଲା । କୌଣସି ଯାତ୍ରୀ ହଇରାଣ ହେବାର ଖବର ନାହିଁ । ଆସନ୍ତାକାଲି ପାଇଁ ଫ୍ଲାଇଟ ବି ବାତିଲ ଅଛି ।
ଓଡ଼ିଶାର ଲୋକ ଦୁବାଇରେ କେହି ଫସି ଥିବା ଖବର ବିମାନ ବନ୍ଦର କର୍ତୃପକ୍ଷଙ୍କୁ ଜଣାଇ ଦିଆଯାଇନି । ଯଦି ସ୍ଥିତି ସ୍ୱାଭାବିକ ରହିଲା, ଶୁକ୍ରବାର ଦୁବାଇ ଫ୍ଲାଇଟ ଚାଲି ପାରେ ବୋଲି କହିଛନ୍ତି ଭୁବନେଶ୍ବର ବିମାନ ବନ୍ଦର କର୍ତ୍ତୃପକ୍ଷ ।
ଖାଇବା ତେଲ ଓ ଡାଲି ଆଗାମୀ ୧୫ ଦିନ ପର୍ଯ୍ୟନ୍ତ ଗଚ୍ଛିତ ଅଛି, ଅସାଧୁ ବ୍ୟବସାୟୀଙ୍କ କଥାରେ ପ୍ରଭାବିତ ହୁଅନ୍ତୁ ନାହିଁ
ଭୁବନେଶ୍ବର : ଖାଇବା ତେଲ ଓ ଡାଲି ଆଗାମୀ ୧୫ ଦିନ ପର୍ଯ୍ୟନ୍ତ ଗଚ୍ଛିତ ଅଛି । ଗ୍ରାହକ ଆଦୌ ଆତଙ୍କିତ ହୋଇ ଅତ୍ୟାବଶ୍ୟକ ନାହିଁ । ଅସାଧୁ ବ୍ୟବସାୟୀ, କର୍ପୋରେଟ ମଲ ଅଯଥା ହୋର୍ଡ଼ି କରି ଲୋକଙ୍କୁ ହଇରାଣ ନକରିବାକୁ ଅପିଲ । ମଧ୍ୟପ୍ରାଚ୍ୟରେ ଯୁଦ୍ଧ ସ୍ଥିତି ଲାଗି ରହିଥିବାରୁ ଭାରତକୁ ପଣ୍ଯବାହୀ ଜାହାଜ ଆସିବା ପ୍ରଭାବିତ ହେବା ପରେ ସର୍ବସାଧାରଣରେ ଏଭଳି ଅପିଲ କରିଛି ଓଡ଼ିଶା ରାଜ୍ୟ ବ୍ୟବସାୟୀ ମହାସଂଘ । ମହାସଂଘ କହିଛି, ଭାରତରେ ଚାହିଦା ତୁଳନାରେ ଖାଇବା ତେଲ ଉତ୍ପାଦନ ହୁଏନାହିଁ । ଏଥିପାଇଁ ବିଦେଶ ରାଷ୍ଟ୍ରରୁ ଆମଦାନୀ କରିବାକୁ ପଡ଼ିଥାଏ । ଖାଇବା ତେଲ ଆମଦାନୀ ବିଶେଷଭାବେ ହରମୁଜ ପ୍ରଣାଳୀ ବାଟରେ ହୋଇଥାଏ । କିନ୍ତୁ ଇରାନ ହରମୁଜ ପ୍ରଣାଳୀ ବନ୍ଦ କରିବା ପରେ ଖାଇବା ତେଲ ସଂକଟ ଆଗାମୀ ଦିିନରେ ଦେଇପାରେ । ସେଥିପାଇଁ ଭାରତ ସରକାର ଆମଦାନୀ କରୁଥିବା କମ୍ପାନୀଙ୍କ ଗୋଦାମ ଉପରେ ତୀକ୍ଷ୍ମ ନଜର ରଖିବା ଦରକାର
ଏବେ ଅତ୍ୟାବଶ୍ୟକ ଯୋଗାଣ ଶଙ୍ଖଳା ସ୍ବାଭାବିକ ରହିଛି । କୌଣସି ଗ୍ରାହକ ଅସାଧୁ ବ୍ୟବସାୟୀଙ୍କ କଥାରେ ପ୍ରଭାବିତ ହୁଅନ୍ତୁ ନାହିଁ । ଯଦି କୌଣସି ବ୍ୟବସାୟୀ ଏହାର ସୁଯୋଗ ନେଇ ନିତ୍ୟ ବ୍ୟବହାର୍ଯ୍ୟ ଖାଦ୍ୟ ପଦାର୍ଥ ଉପରେ ଅଧିକ ଅର୍ଥ ଦାବି କରୁଛନ୍ତି ତେବେ ତୁରନ୍ତ ଗ୍ରାହକ ସ୍ଥାନୀୟ ପ୍ରଶାସନର ଦୃଷ୍ଟିକୁ ଆଣନ୍ତୁ । ରାଜ୍ୟ ସରକାରଙ୍କୁ ଅନୁରୋଧ କରି ବ୍ୟବସାୟୀ ମହାସଂଘ କହିଛି, ଆଗାମୀ ଦିନରେ ବଡ଼ସରକାରଙ୍କ ମାର୍କେଟ ଇଣ୍ଟେଲିଜେନସକୁ ଲଗାଇ ବଡ଼ ବଡ଼ ମଲଗୁଡ଼ିକ ହୋର୍ଡ଼ିଂ କରିବା ଆଶଙ୍କା ରହିଛି । ସେଥିପାଇଁ ରାଜ୍ୟ ସରକାରଙ୍କ ମାର୍କେଟ ଇଣ୍ଟେଲିଜେନସ୍ ମଲଗୁଡ଼ିକର ଗୋଦାମ ଘରେ ନିୟମିତ ଚେକିଂ କରନ୍ତୁ । ସେହିଭଳି ଏହି ସମୟରେ ସାଧାରଣ ଗ୍ରାହକ ଅନଲାଇନରେ ଜିନିଷ କିଣିବା ବେଳେ ସତର୍କତା ଅବଲମ୍ବନ କରନ୍ତୁ ।
ନହେଲେ ଠକାମିର ଶିକାର ବି ହୋଇପାରନ୍ତି । ବହୁ ନକଲି ଜିନିଷ, ଓଜନରେ କମ ରଖି ଅନଲାଇନ ସଂସ୍ଥା ବିକ୍ରି କରିବା ସମ୍ଭାବନା ରହିଛି । ବଜାରରେ ଅସ୍ଥିରତା ସୃଷ୍ଟି କରିବା ପାଇଁ ମଧ୍ୟ କିଛି ଗୋଷ୍ଠୀ ସୋସିଆଲ ମିଡିଆ ଜରିଆରେ ଭୁଲ ଖବର ପ୍ରସାରଣ କରିପାରନ୍ତି । ସେଥିପାଇଁ ରାଜ୍ୟ ଓ କେନ୍ଦ୍ର ସରକାର ଦୃଷ୍ଟି ଦେବା ଦରକାର । ଯଦି ମଧ୍ୟପ୍ରାଚ୍ୟରେ ଯୁଦ୍ଧ ଅଧିକ ଦିନ ଧରି ଲାଗି ରହେ ତାହେଲେ ଖାଇବା ତେଲ ଓ ଡାଲି ଆମଦାନୀ ବାଧା ପ୍ରାପ୍ତ ହେବ । ଏହାକୁ ମୁକାବିଲା କରିବା ପାଇଁ କେନ୍ଦ୍ର ସରକାର ଏବେଠାରୁ ଖାଇବା ତେଲ ଅନ୍ୟ ରାଷ୍ଟ୍ରରୁ ଆଣି ମହଜୁଦ ରଖନ୍ତୁ । ଏବେ ଚାହିଦା ତୁଳନାରେ ଦେଶରେ ଡାଲି ଗଚ୍ଛିତ ରହିଛି । କିନ୍ତୁ ଆସନ୍ତା ଏକ ସପ୍ତାହ ଭିତରେ ଯଦି ସ୍ଥିତିରେ ସୁଧାର ନ ଆସେ ତାହେଲେ ବଜାରରେ ଖାଇବା ତେଲର ସଂକଟ ଦେଖାଦେବ ।
ଶ୍ରୀମନ୍ଦିର ପ୍ରଶାସନର ଅପାରଗତା ; ଦୋଳବେଦୀ ନିକଟରେ ସୃଷ୍ଟିହେଲା ଦଳଚକଟା ସ୍ଥିତି
ପୁରୀ : ପୁଣି ପଦାରେ ପଡ଼ିଲା ଶ୍ରୀମନ୍ଦିର ପ୍ରଶାସନର ଅପାରଗତା । ଦୋଳବେଦୀ ନିକଟରେ ସୃଷ୍ଟିହେଲା ଦଳଚକଟା ସ୍ଥିତି । ଦର୍ଶନ ଚାଲିଥିବା ସମୟରେ ସୁରକ୍ଷାକର୍ମୀଙ୍କ ଉପସ୍ଥିତିରେ ଠେଲାପେଲା । ଆଜି ଦୋଳପୂର୍ଣ୍ଣିମା ଥିବାରୁ ପୁରୀରେ ପ୍ରବଳ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା । ଭକ୍ତଙ୍କ ସମାଗମ ରହିଥିବାରୁ ଦୋଳବେଦୀ ଉପରକୁ ଯିବାପାଇଁ ଲାଗିଥିଲା ଠେଲାପେଲା । କିଛି ଅମାନିଆ ଭକ୍ତ ଧାଡ଼ିରେ ନ ଯାଇ ଠେଲାପେଲା କରିଥିବା ଅଭିଯୋଗ । କିଛି ଭକ୍ତ ସାମାନ୍ଯ ଆହତ ହୋଇଥିବା ଅଭିଯୋଗ ହୋଇଛି । ସୋସିଆଲ ମିଡ଼ିଆରେ ଭାଇରାଲ ହେଉଛି ଭିଡିଓ ।
ରାଜଧାନୀ ୟୁଟ୍ୟୁବର ହତ୍ୟାକାଣ୍ଡ ; ରାହୁଲଙ୍କ ପତ୍ନୀ ତ୍ରିଷ୍ଣା ଆଣିଲେ ସାଙ୍ଘାତିକ ଅଭିଯୋଗ
ଭୁବନେଶ୍ବର : ୟୁଟ୍ୟୁବର ରାହୁଲ ମହାରଣା ମର୍ଡର କେସରେ ନୂଆ ଟୁଇଷ୍ଟ । ରାହୁଲଙ୍କ ପତ୍ନୀ ତ୍ରିଷ୍ଣା ଆଣିଲେ ସାଙ୍ଘାତିକ ଅଭିଯୋଗ। ତାଙ୍କ ସ୍ୱାମୀ ରାହୁଲଙ୍କ ହୋଇଛି ପ୍ରି ପ୍ଲାନ ମର୍ଡର । ପୂର୍ଵ ଶତ୍ରୁତାରୁ ମର୍ଡର ହୋଇଥିବା ଅଭିଯୋଗ କଲେ ରାହୁଲଙ୍କ ପତ୍ନୀ । ସେପଟେ ଘଟଣା ଦିନ ରାହୁଲଙ୍କ ସାଙ୍ଗରେ ଥିବା ଶିବା ଆଜି ରାହୁଲଙ୍କ ପରିବାରକୁ ଭେଟିଛନ୍ତି । ହଠାତ ଅଧିକ ରାଗି ଯାଇ ଛୁରୀରେ ଭୁସିଥିଲେ ଅଭିଯୁକ୍ତ । ଭୁବନେଶ୍ଵର ଜିଜିପି କଲୋନିରେ ଘଟିଥିଲା ହତ୍ୟାକାଣ୍ଡ । ୩ ଅଭିଯୁକ୍ତ ସଂଗ୍ରାମ କେଶରୀ ବେହେରା, ସମରେନ୍ଦ୍ର ବେହେରା ଓ କୁନା ବେହେରାକୁ ଗିରଫ କରି କୋର୍ଟ ଚାଲାଣ କରାଯାଇଛି । ଏମାନେ ସମସ୍ତେ ରସୁଲଗଡ଼ ଜିଜିପି କଲୋନୀ ରେ ଭଡାରେ ରହୁଥିଲେ ।
ମୃତକ ଓ ତାଙ୍କ ସାଙ୍ଗମାନେ ପଡ଼ିଆ ବସି ମଦ ପିଉଥିବା ବେଳେ ପାଖରେ ବସିଥିଲେ ୩ ଅଭିଯୁକ୍ତ । ଏମାନେ ବି ମଦ ପିଇଥିଲେ । ମୃତକ ରାହୁଲଙ୍କ ସାଙ୍ଗ ଶିବା ଫୋନରେ ଆଉ କାହା ସହ ଅଶ୍ଳୀଳ ଭାଷାରେ କଥା ହେଉଥିବା ବେଳେ ବିରୋଧ କରିଥିଲେ ଅଭିଯୁକ୍ତ । ଏହାକୁ ନେଇ ଶିବାଙ୍କୁ ଆକ୍ରମଣ କରିଥିଲେ ୩ ଅଭିଯୁକ୍ତ । ସାଙ୍ଗକୁ ବଞ୍ଚାଇବାକୁ ଯାଇ ରାହୁଲ ସେମାନଙ୍କୁ ଅଟକାଇବାକୁ ଚେଷ୍ଟା କରୁଥିବାରୁ ଅତର୍କିତ ଛୁରାମାଡ଼ କରିଥିଲେ ଅଭିଯୁକ୍ତ । ସଂଗ୍ରାମ ସେନାରେ ଚାକିରି କରନ୍ତି ବୋଲି ପୋଲିସ ଜାଣିବାକୁ ପାଇଥିଲା ପୋଲିସ ।
ଗୁରୁ ନାଁରେ କଳଙ୍କ ; ସପ୍ତମ ଶ୍ରେଣୀ ଛାତ୍ରୀଙ୍କୁ ଶିକ୍ଷକଙ୍କ ଦୁଷ୍କର୍ମ !
ଫୁଲବାଣୀ : ସପ୍ତମ ଶ୍ରେଣୀ ଛାତ୍ରୀଙ୍କୁ ଶିକ୍ଷକଙ୍କ ଦୁଷ୍କର୍ମ l ଅଭିଯୁକ୍ତ ଶିକ୍ଷକ ଥାନାରେ ଅଟକ l ବିଜ୍ଞାନ ମେଳାକୁ ନେଇ ରାସ୍ତାରେ ଦୁଷ୍କର୍ମ ଅଭିଯୋଗ l କନ୍ଧମାଳ ଜିଲ୍ଲା ଫୁଲବାଣୀ ବ୍ଲକର ଏକ ସ୍କୁଲରେ ଘଟିଛି ଏଭଳି ଘଟଣା l ସ୍କୁଲର ଶିକ୍ଷକ କୁନୁ ଭୋଇ ଜଣେ ଅଷ୍ଟମ ଶ୍ରେଣୀର ଛାତ୍ରୀଙ୍କୁ ବିଜ୍ଞାନ ମେଳାକୁ ନେଇ ରାସ୍ତା ମଧ୍ୟରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି l
ଥରେ ନୁହେଁ ୬ ଥର ଦୁଷ୍କର୍ମ କରିଥିବା ଅଭିଯୋଗ କରିଛନ୍ତି ପରିବାର l ଗୋଚ୍ଛାପଡା ପୋଲିସ ଶିକ୍ଷକଙ୍କୁ ଉଠାଇ ନେଇ ଥାନାରେ ଅଟକ ରଖି ପଚାର ଉଚରା କରୁଛି l ତେବେ ଶିକ୍ଷକଙ୍କ ନାମରେ ପୂର୍ବରୁ ମଧ୍ୟ ବହୁ ଅଭିଯୋଗ ରହିଛି l ଏନେଇ ସ୍ଥାନୀୟ ସରପଞ୍ଚ ଓ ଅଭିଭାବକ ଥାନାରେ ଲିଖିତ ଅଭିଯୋଗ କରିଛନ୍ତି l
ଛେଳି ଚୋରକୁ ନେଇ କଙ୍ଗାରୁ କୋର୍ଟ ; ଚାଲିଗଲା ନାବାଳକର ଜୀବନ
ମୟୂରଭଞ୍ଜ : ଛେଳି ଚୋରକୁ ନେଇ କଙ୍ଗାରୁ କୋର୍ଟ । ଚାଲିଗଲା ନାବାଳକର ଜୀବନ। ମୟୂରଭଞ୍ଜ ଜିଲ୍ଲା ତିରିଂ ଥାନା ଅଞ୍ଚଳରେ ଅମାନବୀୟ କାଣ୍ଡ । ୧୧ ଜଣକୁ ଗିରଫ କଲା ପୋଲିସ । ଆଗକୁ ବଢ଼ିପାରେ ଗିରଫଦାରୀ ସଂଖ୍ୟା । ମୃତକ ହେଲେ ଭୁଟକାବାଦି ଗ୍ରାମର ନବମ ଶ୍ରେଣୀ ଛାତ୍ର ସମ୍ବିତ ବିନ୍ଧାଣୀ । ନିସ୍ତୁକ ମାଡ଼ ମାରିବା ପରେ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ତିରିଙ୍ଗ ଥାନା ଅନ୍ତର୍ଗତ ଇନ୍ଦଖୋଲି ଗ୍ରାମର ହେରୋଗୋଡା ଗ୍ରାମରେ ଅଘଟଣ ଘଟିଛି ।
ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ଭୁଟକାବାଦି ଗ୍ରାମର ରାଜ କୁମାର ବିନ୍ଧାଣୀଙ୍କ ପୁଅ ସମ୍ବିତ ବହଳଦା ଥାନା ଅନ୍ତର୍ଗତ ବାସିଙ୍ଗି ଗ୍ରାମରେ ନିଜ ମାମୁଁ ଘର ରହି ବାଶିଙ୍ଗି ସରକାରୀ ଉଚ୍ଚ ବିଦ୍ୟାଳୟରେ ନବମ ଶ୍ରେଣୀରେ ପାଠ ପଢ଼ୁଥିଲେ । ସୋମବାର ଅପରାହ୍ନରେ ହେରୋଗୋଡା ଗ୍ରାମରେ ଦୁଇଜଣ ନାବାଳକଙ୍କୁ ଛେଳି ଚୋରି ନେଇ ସ୍ଥାନୀୟ ଗ୍ରାମବାସୀମାନେ ନିସ୍ତୁକ ମାଡ ମାରିଥିଲେ । ଏହାସହିତ ତାଙ୍କ ବାଇକକୁ ଜାଳି ଦେଇଥିଲେ । ଦୁହେଁଙ୍କ ଅବସ୍ଥା ଗୁରୁତର ଥିବା ବେଳେ ପୋଲିସ ଉଭୟଙ୍କୁ ଉଦ୍ଧାର କରି ଝରାଡିହି ହସ୍ପିଟାଲରେ ଭର୍ତ୍ତି କରିଥିଲା । ଏହାପରେ ରାଇରଙ୍ଗପୁର ହସ୍ପିଟାଲକୁ ସ୍ଥାନତ୍ୱର କରାଯାଇଥିଲା । କିନ୍ତୁ ସେଠାରେ ଚିକିତ୍ସିତ ଅବସ୍ଥାରେ ସମ୍ବିତଙ୍କ ମୃତ ହୋଇଛି । ପୁଅକୁ ହତ୍ୟା କରିଥିବା ନେଇ ବାପା ତିରିଂ ଥାନାରେ ଏକ ହତ୍ୟା ଅଭିଯୋଗ କରିଛନ୍ତି । ତିରିଂ ପୋଲିସ ୧୧ ଜଣ ଗ୍ରାମବାସୀଙ୍କୁ ଗିରଫ କରିଛି । ଅନ୍ୟ ଜଣକୁ ଗୁରୁତର ଅବସ୍ଥାରେ ରାଇରଙ୍ଗପୁରରୁ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।