୩ କୋଟିର ସୁନା ଲୁଟି ଧରାହେଲେ ୧୦ ଡକାୟତଙ୍କ ସହ ୫ ଗ୍ରାହକ

ବ୍ରହ୍ମପୁର: ବ୍ରହ୍ମପୁରରୁ ସୁନା ଡକାୟତ ଗିରଫ । ବ୍ରହ୍ମପୁର ପୋଲିସକୁ ମିଳିଲା ବଡ଼ ସଫଳତା । ବ୍ରହ୍ମପୁର ପୁରୁଷୋତ୍ତମ ଥାନା ଚାଙ୍ଗୁଡ଼ିଆପଦର ସାହିରୁ ମାଷ୍ଟରମାଇଣ୍ଡ କାଳିଆ ବେହେରାଙ୍କ ସହ ୧୦ ଜଣ ଡକାୟତ ଗିରଫ ହୋଇଛନ୍ତି । ଏମାନଙ୍କ ସହ ୫ ଗ୍ରାହକଙ୍କୁ ମଧ୍ୟ ଗିରଫ କରିଛି ପୋଲିସ । ଚୋରି ହୋଇଥିବା ୬ କେଜି ୫୦୧ ଗ୍ରାମ ସୁନା ଓ ନଗଦ ୪ ଲକ୍ଷ ୪୪ ହଜାର ୫୦୦ ଟଙ୍କା ଜବତ କରିଛି ପୋଲିସ ।

ତେବେ ଜବତ ସୁନାର ଆନୁମାନିକ ମୂଲ୍ୟ ୩ କୋଟିରୁ ଅଧିକ ହେବ । ଦୋକାନ ଓ କିଛି ଲୋକଙ୍କ ସୁନା ସେ ଘରେ ରଖିଥିବା ବେଳେ ଟାର୍ଗେଟ କରିଥିଲେ ଡକାୟତୀ ଦଳ । ଗତମାସ ୧୨ ତାରିଖରେ ଜଣେ ବଣିଆଙ୍କ ଘରୁ ଏହି ସୁନା ଚୋରି ହୋଇଥିଲା । ସେବଠାରୁ ପୋଲିସ ଏକ ଟିମ ଗଠନ କରାଯାଇ ବିଭିନ୍ନସ୍ଥାନ ମିଳିତ ଭାବେ ଚଢାଉ କରାଯାଇଥିଲା ।

ଏହାପରେ ଜଣଙ୍କ ପରେ ଜଣେ ଅଭିଯୁକ୍ତ ଧରିଥିଲା ପୋଲିସ । ଏଥିରେ ୧୦ଜଣ ଡକାୟତଙ୍କ ସହ ୫ଜଣ ଗ୍ରାହକ ଯିଏ କି ଏହି ସୁନାକୁ କିଣିଥିଲେ ସେମାନଙ୍କୁ ମଧ୍ୟ ଗିରଫ କରାଯାଇଛି । ଗିରଫ ସମସ୍ତ ୧୫ ଜଣଙ୍କୁ କୋର୍ଟ ଚାଲଣ କରାଯାଇଥିବା ସୂଚନା । ତେବେ ଚୋରି ହୋଇଥିବା ସୁନା ସହ ଚୋରିରେ ବ୍ୟବହୃତ ହୋଇଥିବା ସମସ୍ତ ସାମଗ୍ରୀକୁ ଜବତ କରାଯାଇଛି ।