ରାଜ୍ୟରେ ରହିଛି ୭୫୯ଟି ବହୁମୁଖୀ ଆଶ୍ରୟସ୍ଥଳୀ, ପଞ୍ଚାୟତ ଭିତ୍ତିରେ ଭାଙ୍ଗିଯାଇଥିବା ଆଶ୍ରୟସ୍ଥଳୀ ଗୁଡିକର ଚାଲିଛି ମରାମତି

1 min read

ଭୁବନେଶ୍ୱର : ଆଜି ବିଧାନସଭାରେ ରାଜ୍ୟରେ ବାତ୍ୟା ଆଶ୍ରୟସ୍ଥଳୀ ଓ ଏହାର ସ୍ଥିତି ଏବଂ ନୂଆ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପ୍ରସଙ୍ଗରେ ଆଲୋଚନା ହୋଇଛି । ବର୍ତ୍ତମାନ ଅଧିକ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପାଇଁ ପ୍ରସ୍ତାବ ନଥିବା ଗୃହରେ ବିବୃତି ରଖିଛନ୍ତି ରାଜସ୍ୱ ମନ୍ତ୍ରୀ ସୁଦାମ ମାର୍ଣ୍ଡି। ଓଡ଼ିଶାର ୬ଟି ଉପକୂଳ ଜିଲ୍ଲା ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଖୋର୍ଦ୍ଧା, ନୟାଗଡ଼ ଓ ଗଞ୍ଜାମରେ ୬୯୪ଟି ବହୁମୁଖୀ ଆଶ୍ରୟସ୍ଥଳୀ OSDMA ପକ୍ଷରୁ ନିର୍ମାଣ କରିଛନ୍ତି ରାଜ୍ୟ ସରକାର।

ସମୁଦାୟ ୭୫୯ଟି ବହୁମୁଖୀ ଆଶ୍ରୟସ୍ଥଳୀ ଓଡ଼ିଶାରେ ରହିଛି। ପଞ୍ଚାୟତ ଭିତ୍ତିରେ ଭାଙ୍ଗିଯାଇଥିବା ଆଶ୍ରୟସ୍ଥଳୀ ଗୁଡିକର ମରାମତି କରାଯାଉଛି। ବାକିସବୁର ଯାଞ୍ଚ ଚାଲିଛି। ରିପୋର୍ଟ ଆସିଲେ ମରାମତି କରାଯିବ ବୋଲି ବିଧାନସଭାରେ ଉତ୍ତର ରଖିଛନ୍ତି ମନ୍ତ୍ରୀ ।ବିଧାୟକ ପ୍ରଦୀପ ମହାରଥି ପ୍ରଶ୍ନ କରିଥିଲେ ଯେ, ଆଶ୍ରୟସ୍ଥଳୀରେ ଲୋକେ ରହିଵା ପାଇଁ ସରକାର ହାଣ୍ଡି, ଡେକଚି,ଜେନେରେଟର ଓ ଲାଇଟ ଯୋଗାଇଥିଲେ। ହେଲେ ଏବେ ୮୦ ପ୍ରତିଶତ ଆଶ୍ରୟସ୍ଥଳୀରେ ଏସବୁ କିଛି ନାହିଁ। କମିଟି କରାଯାଇଥିଲା ଏହାର ତଦାରଖ କରି ରିପୋର୍ଟ ଦେବାକୁ। ତଦାରଖ ହୋଇଛି କି? ରାସ୍ତା ନଥିବାରୁ ବିଲ ଭିତରେ ଲୋକେ ଆଶ୍ରୟସ୍ଥଳୀକୁ ଯାଉଛନ୍ତି। ଏହାର ଉତ୍ତରରେ ମନ୍ତ୍ରୀ ଏସବୁ ପ୍ରତିକ୍ରିୟା ପ୍ରକାଶ କରିଛନ୍ତି ।

ଏହାସହିତ ଅନୁସୂଚିତ ଜାତି ଓ ଜନଜାତିର ଛାତ୍ରଛାତ୍ରୀଙ୍କ ଶିକ୍ଷାଗ୍ରହଣ ପ୍ରସଙ୍ଗ ମଧ୍ୟ ସ୍ଥାନ ପାଇଥିଲା ଆଜିର ପ୍ରଶ୍ନକାଳରେ । ରାଜ୍ୟରେ ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ପାଇଁ ୭୦୦ଟି ଆଶ୍ରମ ସ୍କୁଲ, ୫୦୧ଟି ସେବାଶ୍ରମ, ୨୭ଟି ଏକଲବ୍ୟ ମଡେଲ ସ୍କୁଲ, ୧୦ଟି କଳିଙ୍ଗ ଆବାସିକ ସ୍କୁଲ ଥିବା ବିଧାନସଭାରେ ଉତ୍ତର ରଖିଛନ୍ତି SC ST ବିକାଶ ମନ୍ତ୍ରୀ ଜଗନ୍ନାଥ ସାରକା । ୪୨୨ ଉଚ୍ଚ ବିଦ୍ୟାଳୟରୁ ୬୨କୁ ଉଚ୍ଚ ମାଧ୍ୟମିକ ସ୍କୁଲରେ ପରିଣତ କରାଯାଇଛି ବୋଲି ମନ୍ତ୍ରୀ କହିଛନ୍ତି ।

୭.୫୦ ପ୍ରତିଶତ ପିଲାଙ୍କୁ ବୃତ୍ତି ଦିଆଯାଉଛି। ୧୯ଟି ଜିଲ୍ଲାରେ ସ୍ୱାକ୍ଷରତା କମ୍ ଥିବାରୁ ସଂଯୋଜକ ଓ ପ୍ରେରକ ନିଯୁକ୍ତି ଦିଆଯାଇଛି । ‘ଆମ କଥା ଓ ଭାରତ’ ସ୍ୱାକ୍ଷରତା କାର୍ଯ୍ୟକ୍ରମ ଜରିଆରେ SC ST ଛାତ୍ରଛାତ୍ରୀଙ୍କୁ ସ୍ୱାକ୍ଷର କରାଯାଉଛି ବୋଲି ମନ୍ତ୍ରୀ ଗୃହରେ ସୂଚନା ଦେଇଥିଲେ ।

Leave a Reply