‘୨୦୩୬ରେ ସାରା ବିଶ୍ବ ପାଇଁ ଓଡ଼ିଶା ସାଜିବ ଉଦାହରଣ’

ଆସନ୍ତା ୨୦୩୬ରେ ସାରା ବିଶ୍ବ ପାଇଁ ଓଡ଼ିଶା ସାଜିବ ଉଦାହରଣ । ମହାନ ଭାବଧାରା ସହ ଏକ ମନ, ଏକ ପ୍ରାଣରେ ଆଗକୁ ବଢ଼ିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଛନ୍ତି ଆହ୍ବାନ । ପବିତ୍ର ଉତ୍କଳ ଦିବସ ଅବସରରେ ରାଜ୍ୟବାସୀଙ୍କୁ ଉଦବୋଧନ ଦେଇ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇବା ସହ ଓଡିଆ ଭାଷା, ସାହିତ୍ୟ, ସଂଗୀତ ଲାଗି ତ୍ୟାଗ ଦେଇଥିବା ବରପୁତ୍ରମାନଙ୍କୁ ମୁଖ୍ୟମନ୍ତ୍ରୀ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ପ୍ରାକୃତିକ ବିପର୍ଯ୍ୟୟଠାରୁ ଆରମ୍ଭ କରି ମହାମାରୀ କରୋନା ପରିଚାଳନା ଯାଏ ସାରା ଦେଶରେ ଓଡ଼ିଶା ସାଜିଛି ଉଦାହରଣ ।

ଲୋକଙ୍କ ଜୀବନର ସୁରକ୍ଷା ରାଜ୍ୟ ସରକାରଙ୍କ ହୋଇଛି ପ୍ରମୁଖ ପ୍ରାଥମିକତା । ରାଜ୍ୟର ପ୍ରଗତି ଯାତ୍ରାରେ କମିଛି ବେକାରୀ ହାର । ଗରିବ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇବାରେ BSKYକୁ ମିଳିଛି ଅଦ୍ଭୁତ ସଫଳତା । ମାଆ, ମାଟି ଓ ଗରିବଙ୍କ ପାଇଁ ସବୁ ଯୋଜନା କରିଛନ୍ତି ରାଜ୍ୟ ସରକାର । ମୋ ସରକାର ଓ 5T ଓଡ଼ିଶାରେ ବ୍ୟାପକ ପରିବର୍ତ୍ତନ ଆଣିଛି । ସମସ୍ତଙ୍କୁ ଘର ଓ ପିଇବା ପାଣି ଯୋଗାଇବା କାମ ଜୋରଦାର ଚାଲିଛି । ଶିକ୍ଷା, ସ୍ବାସ୍ଥ୍ୟ, ଖେଳ, ବିଜ୍ଞାନ ଓ ପ୍ରଯୁକ୍ତିବିଦ୍ୟା କ୍ଷେତ୍ରରେ ଓଡ଼ିଆମାନେ ଯଥେଷ୍ଟ ସୁନାମ ଅର୍ଜନ କରିଛନ୍ତି ।

ଓଡ଼ିଶା ଏବେ ଏକ ଆଗୁଆ ରାଜ୍ୟ ହୋଇପାରିବା ସହ ଓଡ଼ିଆ ପୁଅ, ଝିଅଙ୍କ ମଧ୍ୟରେ ଗଭୀର ଆତ୍ମବିଶ୍ବାସ ସୃଷ୍ଟି ହୋଇଛି । ଓଡ଼ିଶା ଓ ଓଡ଼ିଆ ଜାତିର ଉନ୍ନତି ପାଇଁ ଆମେ ସମସ୍ତେ ମିଳିମିଶି ଉଦ୍ୟମ କରିବାକୁ ଆହ୍ବାନ ଦେଇଛନ୍ତି ମୁଖ୍ୟମନ୍ତ୍ରୀ । ଉତ୍କଳ ଦିବସ ଅବସରରେ ଆଜି ସନ୍ଧ୍ୟା ୬ଟାରେ ସାରା ରାଜ୍ୟରେ ପ୍ରକମ୍ପିତ ହୋଇଥିଲା ବନ୍ଦେ ଉତ୍କଳ ଜନନୀର ଝଙ୍କାର ।