ନନ୍ଦିଘୋଷ ବ୍ୟୁରୋ: ଗ୍ଲୋବାଲାଇଜେସନର ଯୁଗ ସରି ଆସୁଛି କି । ନା ଏହାର ଶେଷ ଆରମ୍ଭ ହୋଇ ଗଲାଣି। ୧୯୯୧ ପରେ ବିଶ୍ଵ ବାଣିଜ୍ୟ କ୍ଷେତ୍ରରେ ଯେଉଁ ଉଦାରୀକରଣ ଓ ବିଭିନ୍ନ ରାଷ୍ଟ୍ର ମଧ୍ୟରେ ଯେଉଁ ସହଯୋଗ ଓ ନିର୍ଭରଶୀଳତା ଥିଲା, ତାହା ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଏପରି ଆଶଙ୍କାର କାରଣ ହେଲା ଟ୍ରମ୍ପଙ୍କ ବାଣିଜ୍ୟ ନୀତି ପରେ ସାରା ବିଶ୍ଵରେ ଦେଖାଦେଇଛି ଅନିଶ୍ଚିତତା ଓ ମାନ୍ଦାବସ୍ଥା। ସୂୂଚନା ଅନୁସାରେ ଆଜି ବ୍ରିଟେନ ପ୍ରଧାନମନ୍ତ୍ରୀ କିର୍ ଷ୍ଟାର୍ମର୍ ଘୋଷଣା କରିବେ, ଗ୍ଲୋବାଲାଇଜେସନ ଯୁଗ ଶେଷ ହୋଇଛି। ସେ ସ୍ଵୀକାର କରିଛନ୍ତି ଆମେରିକାର ପଦକ୍ଷେପ ଯୋଗୁଁ ବିଶ୍ୱ ବଜାର ଅନିଶ୍ଚିତତା ଭିତରକୁ ଠେଲି ହୋଇଛି। ଆମେରିକା ଏବେ ଅର୍ଥନୈତିକ ଜାତୀୟତାବାଦକୁ ଧ୍ୟାନ ଦେଉଛି। ଅନ୍ୟ ଦେଶ ବି ଏହାକୁ ଅନୁସରଣ କରିବେ । ଏହା ଦ୍ଵାରା ବିଶ୍ଵରେ ଯେଉଁ ଉଦାରୀକରଣ ଓ ପରସ୍ପର ନିର୍ଭରଶୀଳତା ଥିଲା, ଗ୍ଲୋବାଲାଇଜେସନ ଥିଲା, ତାହା ଶେଷ ହେବାକୁ ଯାଉଛି । ଏହା ଦ୍ଵାରା ପ୍ରତିଯୋଗିତା ବଢିବ ।
ଦେଶର ପ୍ରଥମ ଭର୍ଟିକାଲ୍ ଲିଫ୍ଟ ସମୁଦ୍ର ସେତୁ ପମ୍ବନ ଉଦଘାଟିତ
ନନ୍ଦିଘୋଷ ବ୍ୟୁରୋ: ଉଦଘାଟିତ ହେଲା ଦେଶର ସବୁଠାରୁ ହାଇଟେକ୍ ବ୍ରିଜ୍ ପମ୍ବନ ସେତୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ସୁନ୍ଦର ପମ୍ବନ୍ ରେଳ ସେତୁର ଉଦଘାଟନ କରିଛନ୍ତି, ଯାହା ଭାରତର ପ୍ରଥମ ଭୂଲମ୍ବ ଲିଫ୍ଟ ସମୁଦ୍ର ସେତୁ । ପମ୍ବନ୍ ସମୁଦ୍ର ସେତୁ ମୁଖ୍ୟଭୂମି ଏବଂ ରାମେଶ୍ୱରମ୍ ଦ୍ୱୀପ ମଧ୍ୟରେ ଏକ ରେଳ ସଂଯୋଗ ପ୍ରଦାନ କରିବ। ପମ୍ବନ ସେତୁର ଲକ୍ଷ୍ୟ ହେଉଛି ଆଧ୍ୟାତ୍ମିକ ଉପକୂଳବର୍ତ୍ତୀ ସହର ରାମେଶ୍ୱରମ ସହିତ ଯୋଗାଯୋଗକୁ ଉନ୍ନତ କରିବା, ଯେଉଁଠିକୁ ଦେଶ ଏବଂ ବିଶ୍ୱର ବିଭିନ୍ନ ସ୍ଥାନରୁ ବର୍ଷସାରା ଭକ୍ତମାନେ ଆସିଥାନ୍ତି।
ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ, ପବିତ୍ର ସମୁଦ୍ରକୁ ଦେଖି ପମ୍ବନ ରେଳ ସେତୁରେ ଏକ ପରୀକ୍ଷଣ କରାଯାଇଥିଲା। ଆଧୁନିକ ପ୍ରଯୁକ୍ତିବିଦ୍ୟାରେ ନିର୍ମିତ ଏହି ନୂତନ ପମ୍ବନ ସେତୁ ସମୁଦ୍ର ଉପରକୁ ଉଠିପାରିବ। ଏହା କେବଳ ଏକ ସେତୁ ନୁହେଁ ବରଂ ଭାରତର ଇଞ୍ଜିନିୟରିଂ ଶକ୍ତିର ପ୍ରତୀକ।
ଏସିଆର ପ୍ରଥମ ଭୂଲମ୍ବ ଲିଫ୍ଟ ସମୁଦ୍ର ସେତୁ ମଣ୍ଡପମରୁ ରାମେଶ୍ୱରମ ପର୍ଯ୍ୟନ୍ତ ତିଆରି କରାଯାଇଛି । ଏହାକୁ ନିର୍ମାଣ କରିବାକୁ ୫୩୫ କୋଟି ଟଙ୍କା ଖର୍ଚ୍ଚ ହୋଇଥିଲା । ପ୍ରଧାନମନ୍ତ୍ରୀ ମୋଦୀ ୨୦୧୯ ମସିହାରେ ଏହାର ଶିଳାନ୍ୟାସ କରିଥିଲେ ।
ପମ୍ବନ ସେତୁ ବିଷୟରେ ଅଜଣା ତଥ୍ୟ:
- 550 କୋଟି ଟଙ୍କା ବ୍ୟୟରେ ନିର୍ମିତ, ପମ୍ବନ ସେତୁ ଷ୍ଟେନଲେସ୍ ଷ୍ଟିଲ୍ ଦୃଢ଼ୀକରଣ, ଉଚ୍ଚ-ଗ୍ରେଡ୍ ସୁରକ୍ଷାତ୍ମକ ରଙ୍ଗ ଏବଂ ସମ୍ପୂର୍ଣ୍ଣ ୱେଲ୍ଡିଂ ସନ୍ଧି ସହିତ ନିର୍ମିତ।
- ଏହି ସେତୁର ଲମ୍ବ08 କିଲୋମିଟର, ଏଥିରେ 99ଟି ସ୍ପାନ୍ ଏବଂ 72.5 ମିଟର ଭୂଲମ୍ବ ଲିଫ୍ଟ ସ୍ପାନ୍ ଅଛି ଯାହା 17 ମିଟର ଉଚ୍ଚତା ପର୍ଯ୍ୟନ୍ତ ଉପରକୁ ଉଠିଥାଏ, ଯାହା ବଡ଼ ଜାହାଜଗୁଡ଼ିକର ସୁଗମ ଗତିକୁ ସହଜ କରିବା ସହିତ ସୁଗମ ଟ୍ରେନ୍ ପରିଚାଳନାକୁ ସୁନିଶ୍ଚିତ କରିଥାଏ।
- ଏହି ଭୂଲମ୍ବ ସମୁଦ୍ର ସେତୁର ଏକ ଗଭୀର ସାଂସ୍କୃତିକ ଗୁରୁତ୍ୱ ମଧ୍ୟ ରହିଛି, କାରଣ ରାମାୟଣ ଅନୁସାରେ, ରାମେଶ୍ୱରମ୍ ନିକଟସ୍ଥ ଧନୁଷକୋଡିରୁ ରାମ ସେତୁର ନିର୍ମାଣ ଆରମ୍ଭ ହୋଇଥିଲା।
- ରାମେଶ୍ୱରମକୁ ମୁଖ୍ୟଭୂମି ସହିତ ସଂଯୋଗ କରୁଥିବା ଏହି ସେତୁ ବିଶ୍ୱ ସ୍ତରରେ ଭାରତୀୟ ଇଞ୍ଜିନିୟରିଂର ଏକ ଉଲ୍ଲେଖନୀୟ ସଫଳତା ଭାବରେ ଠିଆ ହୋଇଛି। ପାମ୍ବନ ସେତୁର ସ୍ଥାୟୀତ୍ୱ ବୃଦ୍ଧି ଏବଂ ରକ୍ଷଣାବେକ୍ଷଣ ଆବଶ୍ୟକତା ହ୍ରାସ ପାଇଛି।
- ଏହାକୁ ଭବିଷ୍ୟତର ଚାହିଦା ପୂରଣ କରିବା ପାଇଁ ଦ୍ୱୈତ ରେଳ ଟ୍ରାକ ପାଇଁ ଡିଜାଇନ୍ କରାଯାଇଛି। ଏକ ସ୍ୱତନ୍ତ୍ର ପଲିସିଲୋକ୍ସେନ ଆବରଣ ଏହାକୁ ଜଙ୍କ୍ ଲାଗିବାରୁ ବି ରକ୍ଷା କରିବ, କଠୋର ସାମୁଦ୍ରିକ ପରିବେଶରେ ଦୀର୍ଘସ୍ଥାୟୀ ରଖିବ ।
ଆମେରିକାରେ ବଡ଼ ଧରଣର ବିକ୍ଷୋଭ, ରାଷ୍ଟ୍ରପତି ଟ୍ରମ୍ପଙ୍କ ନୀତିକୁ ଜୋରଦାର ବିରୋଧ
ନନ୍ଦିଘୋଷ ବ୍ୟୁରୋ: ଆମେରିକାରେ ବଡ଼ ଧରଣର ବିକ୍ଷୋଭ। ଏହାର ନାଁ ରଖାଯାଇଛି ହ୍ୟାଣ୍ଡସ୍ ଅଫ୍ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିରୋଧରେ ହଜାର ହଜାର ଲୋକ ରାଜରାସ୍ତାକୁ ଓହ୍ଲାଇଛନ୍ତି। ଆମେରିକାର ସବୁ ରାଜ୍ୟରେ ଏପରି ରାଲି ଓ ଶୋଭାଯାତ୍ରା ହୋଇଛି । ବିକ୍ଷୋଭ କରିଛନ୍ତି ହଜାର ହଜାର ଆମେରିକାବାସୀ। ସରକାରୀ କର୍ମଚାରୀ ସଂଖ୍ୟା ହ୍ରାସ ଠାରୁ ଆରମ୍ଭ କରି ବାଣିଜ୍ୟ ଶୁଳ୍କ, ନାଗରିକଙ୍କ ସ୍ୱାଧୀନତାକୁ କ୍ଷୁର୍ଣ୍ଣ କରିବା ଆଦି ପ୍ରସଙ୍ଗରେ ଟ୍ରମ୍ପଙ୍କ ନୀତିକୁ ବିରୋଧ କରାଯାଇଛି। ୱାଶିଂଟନ, ନ୍ୟୁୟର୍କ, ହ୍ୟୁଷ୍ଟନ, ଫ୍ଲୋରିଡା, କଲୋରାଡୋ ଏବଂ ଲସ୍ ଆଞ୍ଜେଲସରେ ହୋଇଛି ପ୍ରତିବାଦ। ଏପରିକି ହ୍ଵାଇଟ ହାଉସର ଅଳ୍ପ ଦୂରରେ ଏକ ବିରାଟ ସମାବେଶ କରି ଟ୍ରମ୍ପଙ୍କ ବିରୋଧରେ ଗର୍ଜିଛନ୍ତି ଆମେରିକୀୟମାନେ। ବିଶେଷ କରି ଟ୍ରମ୍ପ ଓ ଏଲନ ମସ୍କଙ୍କୁ ସେମାନେ ଟାର୍ଗେଟ କରିଛନ୍ତି। ସେମାନେ ଅଭିଯୋଗ କରିଛନ୍ତି, ଟ୍ରମ୍ପଙ୍କ ନୀତି ଯୋଗୁଁ ବିଶ୍ଵରେ ଆମେରିକାର ଏକଘରିକିଆ ହେବାର ଆଶଙ୍କା ଦେଖାଦେଲାଣି। ବିଶ୍ଵର ସବୁ ସହଯୋଗୀ ଏବେ ଆମେରିକାର ହାତ ଛାଡ଼ି ଦେଲେଣି। ଟ୍ରମ୍ପ ନିଜକୁ ଆମେରିକାର ରାଜା ବୋଲି ଭାବୁଛନ୍ତି। ଏହା ଆମେ କରାଇ ଦେବୁ ନାହିଁ । ସେମାନେ କହିଛନ୍ତି, ଆମେ ଚୁପ୍ ହୋଇ ବସିବୁ ନାହିଁ କି ଏଠାରୁ ଆମେ ଯିବୁ ନାହିଁ । ୟୁରୋପର କିଛି ସହରରେ ମଧ୍ୟ ଏପରି ବିକ୍ଷୋଭ ଶୋଭାଯାତ୍ରା ହୋଇଛି। ଟ୍ରମ୍ପଙ୍କ ନୀତି ବିଶ୍ଵକୁ ଆର୍ଥିକ ମାନ୍ଦାବସ୍ଥା ଆଡ଼କୁ ଠେଲି ଦେଇଛି ବୋଲି ସେମାନେ ଅଭିଯୋଗ କରିଛନ୍ତି।
ଶ୍ବଶୁର ଘରକୁ ବୋମା ପକାଇଲା ଜ୍ୱାଇଁ, ଘଟଣାସ୍ଥଳରେ ପୋଲିସର ତଦନ୍ତ ଜାରି
କଟକ: କଟକ ଜିଲ୍ଲା ନରସିଂହପୁର ଥାନା ଅନ୍ତର୍ଗତ ମୁସଲିମ ବସ୍ତିରେ ଫୁଟିଲା ବୋମା । ଶ୍ବଶୁର ଘରକୁ ବୋମା ପକାଇଲା ଜ୍ୱାଇଁ । ସୁଲତାନ ମହମ୍ମଦଙ୍କ ଜ୍ୱାଇଁ ଅବଦୁଲ ମନସୁରଙ୍କ ସହ ଦୁଇ ସହଯୋଗୀ ତାଙ୍କ ଘର ଉପରକୁ ବୋମା ପକାଇଥିବା ଅଭିଯୋଗ ହୋଇଛି । ଗତକାଲି ରାତିରେ ଅବଦୁଲ ମନସୁର ଓ ତାଙ୍କର ଦୁଇ ସହଯୋଗୀ ବାଇକରେ ଆସି ବୋମା ମାଡ କରିଛନ୍ତି । ବୋମାମାଡରେ ଘରର କବାଟ, ଝରକା ଓ ବିଭିନ୍ନ ଆସବାବପତ୍ର ନଷ୍ଟ ହୋଇଛି । ଏନେଇ ପରିବାର ପକ୍ଷରୁ ପୋଲିସ ନିକଟରେ ଅଭିଯୋଗ କରାଯାଇଛି । ନରସିଂହପୁର ପୋଲିସ୍ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ ଜାରି ରଖିଛି ।
ସଜେଇ ହୋଇଛି ଅଯୋଧ୍ୟା, ରାମନବମୀରେ ପୁରା ବିଶ୍ବ ଦେଖିବ ରାମଲଲ୍ଲାଙ୍କ ସୂର୍ଯ୍ୟ ତିଳକ
ନନ୍ଦିଘୋଷ ବ୍ୟୁରୋ: ଆଜି ପବିତ୍ର ରାମ ନବମୀ। ପ୍ରଭୁ ଶ୍ରୀରାମ ଲଲ୍ଲାଙ୍କ ଜନ୍ମଦିନ । ଏହି ଅବସରରେ ସଜେଇ ହୋଇଛି ଭଗବାନ୍ ରାମଙ୍କ ନଗରୀ ଅଯୋଧ୍ୟା । ପ୍ରଭୁ ଶ୍ରୀରାମଙ୍କ ଜନ୍ମବାର୍ଷିକୀରେ ଆନନ୍ଦରେ ଝୁମୁଛି ରାମନଗରୀ। ରାମ ମନ୍ଦିର ସହିତ, ଅଯୋଧ୍ୟାର ସମସ୍ତ ମନ୍ଦିରକୁ ଫୁଲରେ ସୁସଜ୍ଜିତ କରାଯାଇଛି । ରାମ ନବମୀ ଉପଲକ୍ଷେ ଆଜି ପ୍ରବଳ ଭକ୍ତଙ୍କ ସମାଗମ ହୋଇଛି। ଭକ୍ତମାନେ ଯେପରି ସୁରୁଖୁରୁରେ ରାମଲାଲାଙ୍କ ଦର୍ଶନ କରିପାରିବେ, ସେଥିପାଇଁ ଲାଇନ୍ ବ୍ୟବସ୍ଥା କରାଯାଇଛି। ରାମଲଲ୍ଲାଙ୍କ ଜନ୍ମଦିନ ଉତ୍ସବ ସକାଳ ୯:୩୦ରେ ଆରମ୍ଭ ହୋଇଛି । ସର୍ବପ୍ରଥମେ ରାମ ଲଲ୍ଲାଙ୍କୁ ଅଭିଷେକ କରାଯାଇଛି । ଏହା ରାମ ମନ୍ଦିରର ଦ୍ୱିତୀୟ ଜନ୍ମବାର୍ଷିକୀ। ସକାଳ ୧୦.୩୦ ରୁ ଗୋଟିଏ ଘଣ୍ଟା ପାଇଁ ପ୍ରଭୁ ରାମଙ୍କୁ ସଜାଯିବ। ଏହା ପରେ ପ୍ରସାଦ ଅର୍ପଣ କରାଯିବ। ରାମ ଲଲ୍ଲାଙ୍କ ଜନ୍ମ ଦିନ ୧୨ଟାରେ ହେବ। ମନ୍ଦିରରେ ପୂଜା-ଆରତୀ-ପ୍ରାର୍ଥନା ଏବଂ ସୂର୍ଯ୍ୟ ତିଳକ କରାଯିବ। ଶନିବାର ଭଗବାନ୍ ରାମଙ୍କୁ ସୂର୍ଯ୍ୟ ତିଲକ କରାଯିବା ପାଇଁ ଟ୍ରାଏଲ୍ କରାଯାଇଥିଲା । ଜନ୍ମବାର୍ଷିକୀର ସିଧା ପ୍ରସାରଣ ମଧ୍ୟ କରାଯିବ। ଅଯୋଧ୍ୟାର ସମସ୍ତ ପ୍ରବେଶ ଦ୍ୱାର ଏବଂ ରାମ ମନ୍ଦିର ସମେତ ସମଗ୍ର ରାମ ଜନ୍ମଭୂମି ପରିସରର ଦୃଶ୍ୟ ଖୁବ୍ ମନୋରମ ଦିଶୁଛି । ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ କହିଛନ୍ତି ଯେ ଆଜି ସକାଳେ ପ୍ରଭୁ ରାମଙ୍କର ଅଭିଷେକ କରାଯିବ । ସକାଳ ୯.୩୦ ରୁ ୧୦.୩୦ ପର୍ଯ୍ୟନ୍ତ ପ୍ରଭୁଙ୍କୁ ସଜ୍ଜିତ କରାଯିବ। ଏହା ପରେ, ପ୍ରସାଦ ବିତରଣ କରାଯିବ। ସେତେବେଳକୁ ଦିନ 12ଟା ବାଜିଯିବ। ଚୈତ୍ର ଶୁକ୍ଳ ନବମୀରେ ମଧ୍ୟାହ୍ନ ୧୨ଟାରେ ପ୍ରଭୁଙ୍କ ଜନ୍ମ ଜୟନ୍ତୀ ପାଳନ କରାଯିବ।
ଚମ୍ପତ ରାୟ କହିଥିଲେ ଯେ ସୂର୍ଯ୍ୟକିରଣ ପ୍ରାୟ ୪ ମିନିଟ୍ ପାଇଁ ରାମଲଲାଙ୍କ କପାଳରେ ପଡ଼ିବ। ଏହା ଟିଭି ଚ୍ୟାନେଲ ମାଧ୍ୟମରେ ସିଧା ପ୍ରସାରଣ କରାଯିବ। ସାରା ବିଶ୍ୱର ରାମ ଭକ୍ତମାନେ ମଧ୍ୟାହ୍ନ ୧୨ଟାରେ ସୂର୍ଯ୍ୟ ତିଳକ ଦର୍ଶନ କରିପାରିବେ। ଏହି ସମ୍ପୂର୍ଣ୍ଣ ପରୀକ୍ଷଣ ସମ୍ପୂର୍ଣ୍ଣ ବୈଜ୍ଞାନିକ। ISRO ବୈଜ୍ଞାନିକମାନେ ଏହାକୁ ବିକଶିତ କରିଛନ୍ତି।
ଆଜି ପବିତ୍ର ରାମନବମୀ, ଉତ୍ସବମୁଖର ସାରା ଦେଶ
ନନ୍ଦିଘୋଷ ବ୍ୟୁରୋ: ଆଜି ପବିତ୍ର ରାମନବମୀ । ହିନ୍ଦୁଙ୍କ ଆସ୍ଥା ଓ ବିଶ୍ୱାସର ଆରାଧ୍ୟ ମର୍ଯ୍ୟାଦା ପୁରୁଷ ପୁରୁଷୋତ୍ତମ ରାମଚନ୍ଦ୍ରଙ୍କ ଜନ୍ମୋତ୍ସବ । ରାମନବମୀକୁ ଧୁମଧାମରେ ପାଳନ ପାଇଁ ସାରା ଦେଶ ଓ ରାଜ୍ୟର ବିଭିନ୍ନ ସ୍ଥାନରେ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ପ୍ରଭୁ ରାମଚନ୍ଦ୍ରଙ୍କ ଜନ୍ମସ୍ଥଳୀ ଅଯୋଧ୍ୟରେ ଆଜି ବିରାଟ ମହୋତ୍ସବର ଆୟୋଜନ ହେଉଛି । ଏଥିରେ ଦେଶର ବିଭିନ୍ନ ପ୍ରାନ୍ତରରୁ ଶ୍ରଦ୍ଧାଳୁଙ୍କ ସମାଗମ ହେବ ।ଏହା ସହିତ ଦିଲ୍ଲୀ, ହରିଦ୍ବାରା, ନାଗପୁର, ଅହମ୍ମଦାବାଦରେ ଥିବା ବିଭିନ୍ନ ରାମ ମନ୍ଦିରରେ ମଧ୍ୟ ଧୁମଧାମରେ ପାଳନ କରାଯାଉଛି ରାମଚନ୍ଦ୍ରଙ୍କ ଜନ୍ମୋତ୍ସବ। ସେହିପରି ଓଡ଼ିଶାରେ ରାମନବମୀ ଧୁମଧାମରେ ପାଳନ କରାଯାଉଛି । ବିଶେଷକରି ଭୁବନେଶ୍ବର, ଭଦ୍ରକ, ସମ୍ବଲପୁର ଓ ନୟାଗଡ଼ରେ ରାମନବମୀ ପାଳନ ଉପରେ ରହିଛି ସମସ୍ତଙ୍କ ନଜର। ସମ୍ୱେଦନଶୀଳ ଅଞ୍ଚଳରେ ଶାନ୍ତି ଶୃଙ୍ଖଳାର ସହ ରାମ ନବମୀ ପାଳନ ପାଇଁ ବ୍ୟାପକ ବନ୍ଦୋବସ୍ତ ଗ୍ରହଣ କରାଯାଇଛି।
ଆଇନରେ ପରିଣତ ହେଲା ୱାକଫ ସଂଶୋଧନ ବିଲ୍
ନନ୍ଦିଘୋଷ ବ୍ୟୁରୋ: ଆଇନରେ ପରିଣତ ହେଲା ୱାକଫ ସଂଶୋଧନ ବିଲ୍ ୨୦୨୫ । ଏହି ବିଲ୍ କୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅନୁମୋଦନ କରିଛନ୍ତି । ରାଷ୍ଟ୍ରପତିଙ୍କ ଅନୁମୋଦନ ପୂର୍ବରୁ ୱାକଫ ବିଲ୍ ଉଭୟ ଗୃହରେ ଗୃହୀତ ହୋଇଥିଲା । ସରକାର ଏକ ବିଜ୍ଞପ୍ତିରେ କହିଛନ୍ତି, ‘ସଂସଦ ଦ୍ୱାରା ଗୃହୀତ ୱାକଫ ସଂଶୋଧନ ଆଇନ ୫ ଏପ୍ରିଲ,୨୦୨୫ରେ ରାଷ୍ଟ୍ରପତିଙ୍କ ଅନୁମୋଦନ ପାଇଛି ଏବଂ ସାଧାରଣ ସୂଚନା ପାଇଁ ଏହା ପ୍ରକାଶିତ ହେଉଛି ।
ଶାସକ ଏବଂ ବିରୋଧୀ ଦଳ ମଧ୍ୟରେ ପ୍ରବଳ ହଟ୍ଟଗୋଳ ପରେ ଶୁକ୍ରବାର ସକାଳେ ରାଜ୍ୟସଭାରେ ୱାକଫ୍ (ସଂଶୋଧନ) ବିଲ୍ ଗୃହୀତ ହୋଇଥିଲା। ରାଜ୍ୟସଭାରେ ପ୍ରାୟ ୧୪ ଘଣ୍ଟା ଧରି ବିଲ୍ ଉପରେ ଆଲୋଚନା ହୋଇଥିଲା ଏବଂ ସପକ୍ଷରେ ୧୨୮ ଏବଂ ବିପକ୍ଷରେ 95 ଭୋଟ ପଡ଼ିଥିଲା, ଯାହା ପରେ ଏହା ଗୃହୀତ ହୋଇଥିଲା। ପୂର୍ବରୁ, ଲୋକସଭା ପ୍ରାୟ 12 ଘଣ୍ଟାର ବିତର୍କ ପରେ ଏହାକୁ ଅନୁମୋଦନ କରିଥିଲା, ଯେଉଁଥିରେ 288 ଭୋଟ ସପକ୍ଷରେ ଏବଂ 232 ଭୋଟ ବିପକ୍ଷରେ ପଡ଼ିଥିଲା।
ବିରୋଧୀ ଦଳଗୁଡ଼ିକ ପ୍ରତିବାଦ କରିଥିଲେ
ଉଭୟ ଗୃହରେ ବିଲ୍ ଉପରେ ଆଲୋଚନା ସମୟରେ, ବିରୋଧୀ ଦଳଗୁଡ଼ିକ ଦ୍ୱାରା କଡ଼ା ଆପତ୍ତି ଉଠିଥିଲା, ଯେଉଁମାନେ ବିଲ୍ଟିକୁ ମୁସଲିମ ବିରୋଧୀ ଏବଂ ଅସାମ୍ବିଧାନିକ ବୋଲି କହିଥିଲେ, ଯେତେବେଳେ ସରକାର ପ୍ରତିକ୍ରିୟା ଦେଇଥିଲେ ଯେ ଏହି ଐତିହାସିକ ସଂସ୍କାର ସଂଖ୍ୟାଲଘୁ ସମ୍ପ୍ରଦାୟକୁ ଲାଭ ଦେବ। ୱାକଫ ସମ୍ପତ୍ତିର ପରିଚାଳନାରେ ସ୍ୱଚ୍ଛତା ସୁନିଶ୍ଚିତ କରାଯିବ।
ସୁପ୍ରିମକୋର୍ଟରେ ୪ଟି ଆବେଦନ ଦାଖଲ
ଶନିବାର ଦିନ, ଏହି ଆଇନର ବ୍ୟବସ୍ଥା କାର୍ଯ୍ୟକାରୀ କରିବା କିମ୍ବା କାର୍ଯ୍ୟକାରୀ କରିବା ଉପରେ ରୋକ ଲଗାଇବା ପାଇଁ ସୁପ୍ରିମକୋର୍ଟରେ ଆଉ ଦୁଇଟି ଆବେଦନ ଦାଖଲ କରାଯାଇଥିଲା। ଗୋଟିଏ ଆବେଦନ ଦିଲ୍ଲୀର ଆମ ଆଦମୀ ପାର୍ଟିର ବିଧାୟକ ଏବଂ ୱାକଫରେ ଘୋଟାଲା ଏବଂ ଆତ୍ମସାତ ଅଭିଯୋଗରେ ଅଭିଯୁକ୍ତ ଅମାନତୁଲ୍ଲା ଖାନଙ୍କ ଦ୍ୱାରା ଦାଖଲ କରାଯାଇଛି, ଅନ୍ୟଟି ଆବେଦନ ଆସୋସିଏସନ ଫର୍ ଦି ପ୍ରୋଟେକ୍ସନ ଇନ୍ ଦି ମ୍ୟାଟର୍ସ ଅଫ୍ ସିଭିଲ ରାଇଟ୍ସ ନାମକ ଏକ ସଂଗଠନ ଦ୍ୱାରା ଦାଖଲ କରାଯାଇଛି । ଶୁକ୍ରବାର ପୂର୍ବରୁ କଂଗ୍ରେସ ସାଂସଦ ମହମ୍ମଦ ଜାଭେଦ ଏବଂ ଅଲ୍ ଇଣ୍ଡିଆ ମଜଲିସ୍-ଏ-ଇତ୍ତେହାଦୁଲ୍ ମୁସଲିମିନ୍ (AIMIM) ଅଧ୍ୟକ୍ଷ ଅସଦୁଦ୍ଦିନ୍ ଓୱେସି ସୁପ୍ରିମକୋର୍ଟରେ ୱାକଫ୍ (ସଂଶୋଧନ) ବିଲ୍ର ବୈଧତାକୁ ଚ୍ୟାଲେଞ୍ଜ କରି କହିଥିଲେ ଯେ ଏହା ସାମ୍ବିଧାନିକ ବ୍ୟବସ୍ଥାର ଉଲ୍ଲଂଘନ କରୁଛି।
ଜାଭେଦଙ୍କ ଆବେଦନରେ ଅଭିଯୋଗ ଥିଲା ଯେ ଏହି ବିଲ୍ ୱାକଫ ସମ୍ପତ୍ତି ଏବଂ ସେଗୁଡ଼ିକର ପରିଚାଳନା ଉପରେ ମନଇଚ୍ଛା କଟକଣା ଲାଗୁ କରିଛି, ଯାହା ଦ୍ୱାରା ମୁସଲିମ ସମ୍ପ୍ରଦାୟର ଧାର୍ମିକ ସ୍ୱାୟତ୍ତତାକୁ କ୍ଷୁର୍ଣ୍ଣ କରୁଛି ।
ଅନୁଗୁଳରେ ପୋଲିସର ଏନକାଉଣ୍ଟର,କୁଖ୍ୟାତ ଅପରାଧି କ୍ଷୀରୋଦ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି
ଅନୁଗୁଳ: ଅନୁଗୁଳରେ ପୋଲିସର ଏନକାଉଣ୍ଟର।ଟାଉନ ଥାନା ଅନ୍ତର୍ଗତ କୁରୁଡ଼ୋଲ ହନୁମାନ ବାଟିକା ନିକଟ ଆମ୍ବ ବଗିଚା ଠାରେ ଅପରାଧୀକୁ ପୋଲିସର ଏନକାଉଣ୍ଟର। କୁଖ୍ୟାତ ଅପରାଧି କ୍ଷୀରୋଦ ନାୟକ ଗୁରୁତର ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି ହୋଇଛି। ବିଳମ୍ବିତ ରାତିରେ ଛେଣ୍ଡିପଦା ପୋଲିସ କ୍ଷୀରୋଦ ନାୟକକୁ ଧରିବା ପାଇଁ ଚେଷ୍ଟା କରୁଥିବା ସମୟରେ ଟାଉନ ଥାନା ଅଧୀନରେ ଆସୁଥିବା କୁରୁଡ଼ୋଲ ହନୁମାନ ବାଟିକା ଆମ୍ବ ବଗିଚାକୁ କ୍ଷୀରୋଦ ପଶି ଯାଇଥିଲା। କ୍ଷୀରୋଦ ନାୟକ ଧରିବା ପାଇଁ ଛେଣ୍ଡିପଦା, ଅନୁଗୁଳ ଟାଉନ ପୋଲିସ ସହ ସ୍ପେଶାଲ ସ୍କ୍ୱାଡ୍ ମିଳିତ ଭାବେ ଚଢ଼ାଉ କରିଥିଲେ। ଚଢ଼ାଉ ବେଳେ କ୍ଷୀରୋଦ ପୋଲିସ ଉପରକୁ ୩ ରାଉଣ୍ଡ ଗୁଳି ଚାଳନା କରିଥିଲା। ପୋଲିସର ପାଲଟା ଜବାବରେ କ୍ଷୀରୋଦର ଡାହାଣ ଗୋଡ଼ରେ ବାଜିଛି ଗୁଳି। ପୋଲିସ ଗୁରୁତର ଅବସ୍ଥାରେ କ୍ଷୀରୋଦକୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି। କ୍ଷୀରୋଦର ଘର ଛେଣ୍ଡିପଦା ଅଞ୍ଚଳ ଗୋଲାଗାଡ଼ିଆରେ ବୋଲି ଜଣାପଡିଛି। କ୍ଷୀରୋଦ ନାମରେ ଅନୁଗୁଳ ଜିଲ୍ଲା ସମେତ ଅନ୍ୟାନ୍ୟ ଜିଲ୍ଲାରେ ଅନେକ ମାମଲା ରହିଥିବା ଜଣାପଡିଛି
ଆଜି ଶ୍ରୀକ୍ଷେତ୍ରରେ ଅନୁଷ୍ଠିତ ହେବ ଶ୍ରୀରାମଙ୍କ ଜନ୍ମ ଉତ୍ସବ
ନନ୍ଦିଘୋଷ ବ୍ୟୁରୋ: ଆଜି ଶ୍ରୀମନ୍ଦିରରେ ପାଳନ ହେଉଛି ଶ୍ରୀରାମ ନବମୀ। ଏନେଇ ସ୍ୱତନ୍ତ୍ର ନୀତିକାନ୍ତି ଅନୁଷ୍ଠିତ ହେବ। ଶ୍ରୀରାମ ଜନ୍ମ ନୀତି ପାଇଁ ଅପରାହ୍ନ ୫ଟାରୁ ରାତି ୧୦ଟା ପର୍ଯ୍ୟନ୍ତ ସର୍ବସାଧାରଣଙ୍କ ଦର୍ଶନ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ ତରଫରୁ ସୂଚନା ମିଳିଛି। ସ୍ୱୟଂ ପ୍ରଭୁ ଶ୍ରୀଜଗନ୍ନାଥ ମାତା ରୂପ ଧାରଣ କରି ଶ୍ରୀରାମଙ୍କୁ ଜନ୍ମଦେବାର ବିଧି ରହିଛି। ତେଣୁ ପ୍ରସବ ବେଦନାକୁ ଲାଘବ କରିବା ନିମନ୍ତେ ଅଷ୍ଟମୀ ଦିନ ତଥା ଗତକାଲି ସନ୍ଧ୍ୟାଧୂପ ପରେ ମହାପ୍ରଭୁଙ୍କୁ ଯେଉଡ଼ ଭୋଗ କରାଯିବା ସଙ୍ଗେ ସଙ୍ଗେ ଗର୍ଭଉଦକ ଦିଆଯାଇଥିଲା। ଆଜି ନବମୀରେ ଠାକୁର ମାନଙ୍କର ମଧ୍ୟାହ୍ନଧୂପ ନୀତି ଶେଷ ହେବାପରେ ଜନ୍ମନୀତି ଅନୁଷ୍ଠିତ ହେବ। ଦୁଇଜଣ ମହାଜନ ସେବକ ଦଶରଥ ଓ କୌଶଲ୍ୟା ହୋଇ ଜନ୍ମବିଧି ପାଳନ କରିବେ। ଏହି ଗୁପ୍ତନୀତିକୁ କେହି ଯେପରି ଦେଖି ନପାରିବେ ସେଥିଲାଗି ଗର୍ଭଗୃହରେ ଥିବା ଜୟବିଜୟ ଦ୍ୱାରକୁ ବନ୍ଦ କରାଯିବ। ଅନ୍ୟପଟରେ ପବିତ୍ର ରାମନବମୀ ଅବସରରେ ରଥକାଠ ଚିରଟର ଶୁଭ ଅନୁକୂଳ ହେବାର ପରମ୍ପରା ରହିଛି | ଏଥିପାଇଁ ଶ୍ରୀମନ୍ଦିରରୁ ଲାଗି ହୋଇଥିବା ମାଳ ମହାପ୍ରସାଦ ନେଇ ଏକ ପ୍ରତିନିଧି ଦଳ କଟକ ଅଭିମୁଖେ ଯାତ୍ରା କରିବେ| କଟକ ଖପୁରିଆ ସ୍ଥିତ କରତକଳରେ ପବିତ୍ର ରାମନବମୀ ତିଥିରେ ମାଳ ମହାପ୍ରସାଦ ଲାଗି ପରେ ରଥକାଠ ଚିରଟ କାର୍ଯ୍ୟ ଆରମ୍ଭ ହେବ। ତିନଟି ଧଉରା କାଠକୁ ମାଳ ମହାପ୍ରସାଦ ଲାଗି କରାଯାଇ ଚିରଟ କାର୍ଯ୍ୟ ଆରମ୍ଭ ହେବାର ବିଧି ରହିଛି। ଗତ ସରସ୍ବତୀ ପୂଜାରେ ରଥକାଠ ପୂଜାର୍ଚନା କରାଯାଇଥିବା ବେଳେ ଆସନ୍ତା ଅକ୍ଷୟ ତୃତୀୟା ଅବସରରେ ରଥ ନିର୍ମାଣ ଅନୁକୂଳ ହେବାର ପରମ୍ପରା ରହିଛି।
ଭୁବନେଶ୍ବର ଉତ୍ତରା ଛକରେ ଓଲଟିଲା ଟୁରିଷ୍ଟ ବସ୍, ୧୫ରୁ ଅଧିକ ଯାତ୍ରୀ ଆହତ
ଭୁବନେଶ୍ବର: ଭୁବନେଶ୍ବର ଉତ୍ତରା ଛକରେ ବଡ଼ ଧରଣର ଦୁର୍ଘଟଣା ଘଟିଛି । ଟୁରିଷ୍ଟ ବସ ଓଲଟିବାରୁ ଜଣଙ୍କ ମୃତ ହୋଇଥିବା ବେଳେ ୨୦ରୁ ଅଧିକ ଯାତ୍ରୀ ଆହତ ହୋଇଛନ୍ତି । ସମସ୍ତ ଆହତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ମୃତାହତମାନେ ବାଂଲାଦେଶ ନାଗରିକ ହୋଇଥିବା ବେଳେ ବସରେ ପ୍ରାୟ ୭୦ ଜଣ ଯାତ୍ରୀ ରହିଥିଲେ । ସମସ୍ତ ଯାତ୍ରୀ କାଶୀ ବିଶ୍ବନାଥ ଦର୍ଶନ ସାରି ପୁରୀ ଅଭିମୁଖେ ଯାଉଥିବା ବେଳେ ଦୁର୍ଘଟଣା ଘଟିଛି । ଘଟଣାସ୍ଥଳରେ ଅଗ୍ନିଶମ ବାହିନୀ ଓ ପୋଲିସ ଉଦ୍ଧାର କାର୍ଯ୍ୟ ଜାରି ରଖିଛି ।