ମାଲକାନଗିରି: ମେଲକାନଗିରି ସୀମାନ୍ତ ଛତିଶଗଡ଼ରେ ବଡ଼ଧରଣର ଏନକାଉଣ୍ଟର । ସୁରକ୍ଷାକର୍ମୀଙ୍କ ଗୁଳିରେ ୨୨ ମାଓବାଦୀ ନିପାତ । ବିଜାପୁର ଏବଂ କାଙ୍କରେ ଦୁଇଟି ପୃଥକ ପୃଥକ ସ୍ଥାନରେ ଗୁଳି ବିନିମୟ ଘଟି ୨୨ ନକ୍ସଲ ନିହତ ହୋଇଛନ୍ତି । ବିଜାପୁର ଜିଲ୍ଲା ଗଙ୍ଗଲୁରୁ ଜଙ୍ଗଲରେ ଚାଲିଛି ଏନକାଉଣ୍ଟର। ବିଜାପୁରରେ ୧୮ ନକ୍ସଲଙ୍କ ମୃତ୍ଯୁ ଘଟିଛି । କାଙ୍କେରରେ ୪ ନକ୍ସଲ ନିପାତ ହୋଇଛନ୍ତି ।
ଗୁଳିବିନିମୟରେ ଜଣେ ଡିଆରଜି ଯବାନ ସହିଦ ହୋଇଛନ୍ତି । ସର୍ଚ୍ଚ ଅପରେସନରୁ ବିପୁଳ ପରିମାଣର ଗୁଳି ଓ ବିସ୍ଫୋରକ ସାମଗ୍ରୀ ଜବତ ହୋଇଛି । ଏବେ ବି ସୁରକ୍ଷାକର୍ମୀଙ୍କ ପକ୍ଷରୁ ଚାଲିଛି ଜୋରଦାର ସର୍ଚ୍ଚ ଅପରେସନ ।
ନନ୍ଦିଘୋଷ ବ୍ୟୁରୋ : ଆଇସିସି ଚାମ୍ପିଅନ୍ସ ଟ୍ରଫି ବିଜେତା ଭାରତୀୟ ଟିମ୍ ପାଇଁ ପୁରସ୍କାର ରାଶି ଘୋଷଣା କଲା ବିସିସିଆଇ । ଏବେ ଭାରତୀୟ କ୍ରିକେଟ୍ ଦଳ ଉପରେ କୋଟି କୋଟି ଟଙ୍କା ବର୍ଷା ହେବାକୁ ଯାଉଛି। ଭାରତୀୟ କ୍ରିକେଟ ଦଳ ପାଇଁ ବିସିସିଆଇ ମୋଟ୍ ୫୮ କୋଟି ଟଙ୍କାର ପୁରସ୍କାର ରାଶି ଘୋଷଣା କରିଛି। ତେବେ ପ୍ରତ୍ୟେକ ଖେଳାଳିଙ୍କୁ ୩ କୋଟି ଟଙ୍କାର ପୁରସ୍କାର ରାଶି ମିଳିବ । ଏନେଇ BCCI ସଚିବ ଦେବଜିତ୍ ସାଇକିଆ ଘୋଷଣା କରିଛନ୍ତି । ଭାରତ ମାର୍ଚ୍ଚ ୯ ତାରିଖରେ ନ୍ୟୁଜିଲ୍ୟାଣ୍ଡକୁ ପରାସ୍ତ କରି ଚାମ୍ପିଅନ୍ସ ଟ୍ରଫି ଜିତିଥିଲା। ଏହା ଭାରତର ତୃତୀୟ ଚାମ୍ପିଅନ୍ସ ଟ୍ରଫି ଥିଲା। ଗତବର୍ଷ ଜୁନ୍ ୨୯ ତାରିଖରେ ଭାରତ ଟି-୨୦ ବିଶ୍ୱକପ୍ ମଧ୍ୟ ଜିତିଥିଲା।
ତେବେ ଏହି ନଗଦ ୫୮କୋଟି ଟଙ୍କାର ନଗଦ ପୁରସ୍କାରକୁ ମ୍ୟାଚ୍ ଜିତିବା ପଛରେ ଥିବା ସମସ୍ତ ଖେଳାଳି, ପ୍ରଶିକ୍ଷକ, ସହାୟକ ଏବଂ କମିଟିର ଅନ୍ୟନ୍ୟା ସଦସ୍ୟଙ୍କୁ ଦିଆଯିବ । ତେବେ ଦେବଜିତ୍ କହିଛନ୍ତି ଯେ, ପ୍ରତ୍ୟେକ ଖେଳାଳିଙ୍କୁ ୩ କୋଟି ଟଙ୍କା ପ୍ରଦାନ କରାଯିବ । ମୁଖ୍ୟ କୋଚ୍ ଗୌତମ ଗମ୍ଭୀରଙ୍କୁ ୫୦ ଲକ୍ଷ ଏବଂ ଅନ୍ୟନ୍ୟ ପ୍ରଶିକ୍ଷକ ରିଆନ୍ ଟେନ୍ ଡୋସ୍ଟାଟେ, ଅଭିଷେକ ନାୟାର ଏବଂ ବ୍ୟାଟିଂ କୋଚ୍ ସୀତାଂଶୁ କୋଟକ, ବେଲିଂ କୋଚ୍ ମୋର୍ନେ ମୋର୍କେଲଙ୍କୁ ୫୦ ଲକ୍ଷ ଟଙ୍କା ଦିଆଯିବ ।
ନନ୍ଦିଘୋଷ ବ୍ୟୁରୋ : ପରଲୋକଗତ ଅଭିନେତା ସୁଶାନ୍ତ ସିଂ ରାଜପୁତଙ୍କ ପୂର୍ବତନ ମ୍ୟାନେଜର ଦିଶା ସାଲିଆନଙ୍କ ମୃତ୍ୟୁ ମାମଲାର ଟୁଇଷ୍ଟ। ଶିବସେନା ୟୁବିଟି ନେତା ତଥା ବିଧାୟକ ଆଦିତ୍ୟ ଠାକରେ ଓ ଅନ୍ଯମାନଙ୍କ ବିରୋଧରେ ମାମଲା ପଞ୍ଜିକରଣ ଲାଗି ବମ୍ବେ ହାଇକୋର୍ଟଙ୍କ ନିକଟରେ ଆବେଦନ କରିଛନ୍ତି ଦିଶାଙ୍କ ବାପା ସତୀଶ ସାଲିଆନ। ମୃତ୍ୟୁର ୫ ବର୍ଷ ପରେ ଏହି ବିବାଦ ବର୍ତ୍ତମାନ ମୁଣ୍ଡ ଟେକିଛି। ସତୀଶ ସାଲିଆନଙ୍କ ପକ୍ଷରୁ ବମ୍ବେ ହାଇକୋର୍ଟରେ ଏନେଇ ଅନୁମତି ମାଗିଛନ୍ତି ତାଙ୍କ ଓକିଲ ନୀଲେଶ ଓଝା। ଏହା ସହ ଏହି ରହସ୍ଯଜନକ ମୃତ୍ଯୁ ଘଟଣାର ସାନି ତଦନ୍ତ ଲାଗି ଦିଶାଙ୍କ ପରିବାର ପକ୍ଷରୁ ଅନୁମତି ଭିକ୍ଷା କରାଯାଇଛି। ପିଟିସନରେ କୁହାଯାଇଛି, ଦିଶାଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଛି। ଏହି ଘଟଣାରେ ପ୍ରଭାବଶାଳୀ ଲୋକଙ୍କ ହାତ ଥିଲା। ଘଟଣାକୁ ଚପାଇ ଦେବା ଲାଗି ବିଭିନ୍ନ ମହଲରୁ ଉଦ୍ୟମ ହୋଇଥିଲା ଜୁନ ୨୦୨୦ରେ ସନ୍ଦେହଜନକ ଅବସ୍ଥାରେ ଦିଶାଙ୍କ ହୋଇଥିଲା ମୃତ୍ୟୁ।
ନନ୍ଦିଘୋଷ ବ୍ୟୁରୋ : ବେଆଇନ ବେଟିଂ ଆପ୍ ପ୍ରଚାର କରି ଫସିଲେ ୨୫ ସେଲିବ୍ରେଟି । ଏହି ସେଲିବ୍ରେଟିଙ୍କ ନାଁରେ ମାମଲା ରୁଜୁ ହୋଇଛି । ତେଲେଙ୍ଗାନା ପୋଲିସ ଅବୈଧ ବେଟିଂ ଆପ୍କୁ ପ୍ରୋତ୍ସାହିତ କରିବା ଅଭିଯୋଗରେ ରାଣା ଦଗ୍ଗୁବାତି, ପ୍ରକାଶ ରାଜ, ବିଜୟ ଦେବରକୋଣ୍ଡା ଏବଂ ନିଧି ଅଗ୍ରୱାଲଙ୍କ ସମେତ ୨୫ ଜଣ ଅଭିନେତା ଏବଂ ପ୍ରଭାବଶାଳୀଙ୍କ ବିରୁଦ୍ଧରେ FIR ରୁଜୁ କରିଛି। ୩୨ ବର୍ଷୀୟ ବ୍ୟବସାୟୀ ଫଣିନ୍ଦ୍ର ଶର୍ମାଙ୍କ ଦ୍ୱାରା ଦାୟର କରାଯାଇଥିବା ଏକ ଆବେଦନ ଉପରେ ଆଧାର କରି ମାର୍ଚ୍ଚ ୧୯ ତାରିଖରେ ହାଇଦ୍ରାବାଦର ମିୟାପୁର ପୋଲିସ ଷ୍ଟେସନରେ ଏଫଆଇଆର ରୁଜୁ କରାଯାଇଥିଲା। ସେ ଅଭିଯୋଗ କରି କହିଛନ୍ତି ଯେ, ମାର୍ଚ୍ଚ ୧୬ ତାରିଖରେ ତାଙ୍କ ସମ୍ପ୍ରଦାୟର ଯୁବକମାନଙ୍କ ସହିତ ଆଲୋଚନା ସମୟରେ, ସେ ଜାଣିପାରିଲେ ଯେ ଅନେକ ବ୍ୟକ୍ତି ଜୁଆ ଆପ୍ରେ ସେମାନଙ୍କର ଟଙ୍କା ନିବେଶ କରିବାକୁ ପ୍ରଭାବିତ ହୋଇଛନ୍ତି, ଯାହା ସୋସିଆଲ ମିଡିଆ ବ୍ୟକ୍ତିତ୍ୱଙ୍କ ଦ୍ୱାରା ପ୍ରଚୁର ବିଜ୍ଞାପନ କରାଯାଇଥିଲା।
ସେ ଆହୁରି ଉଲ୍ଲେଖ କରିଛନ୍ତି ଯେ ଏହି ସେଲିବ୍ରିଟିମାନେ ବିଭିନ୍ନ ବେଟିଂ ପ୍ଲାଟଫର୍ମକୁ ପ୍ରୋତ୍ସାହିତ କରିବା ପାଇଁ ବହୁ ପରିମାଣର ଟଙ୍କା ଗ୍ରହଣ କରୁଛନ୍ତି ବୋଲି ଅଭିଯୋଗ ହୋଇଛି, ଯାହା ବ୍ୟବହାରକାରୀମାନଙ୍କୁ ସେମାନଙ୍କର କଠିନ ଅର୍ଜିତ ଟଙ୍କାକୁ ଜୁଆ ଖେଳିବାକୁ ଉତ୍ସାହିତ କରେ। ଅଭିଯୋଗରେ ଶର୍ମା ଉଲ୍ଲେଖ କରିଛନ୍ତି ଯେ, ସେ ମଧ୍ୟ ଏହି ପ୍ଲାଟଫର୍ମଗୁଡ଼ିକ ମଧ୍ୟରୁ ଗୋଟିଏରେ ନିବେଶ କରିବାକୁ ଯାଉଥିଲେ କିନ୍ତୁ ତାଙ୍କ ପରିବାର ତାଙ୍କୁ ସମ୍ଭାବ୍ୟ ଆର୍ଥିକ ବିପଦ ବିଷୟରେ ସତର୍କ କରିବା ପରେ ସେ ନିବୃତ୍ତ ରହିଲେ। ଏପରି ଆପ୍ ଏବଂ ପ୍ଲାଟଫର୍ମଗୁଡ଼ିକ ବ୍ୟାପକ ଆର୍ଥିକ କ୍ଷତି ଘଟାଉଛନ୍ତି, ବିଶେଷକରି ନିମ୍ନ ଏବଂ ମଧ୍ୟବିତ୍ତ ପରିବାର ମଧ୍ୟରେ ଯେଉଁମାନେ ସହଜ ଟଙ୍କା ପାଇବାର ମିଥ୍ୟା ପ୍ରତିଶ୍ରୁତିରେ ପ୍ରଲୋଭିତ ହେଉଛନ୍ତି।
ଅଭିଯୋଗ ଆଧାରରେ, ଅଭିନେତା ଏବଂ ପ୍ରଭାବଶାଳୀମାନଙ୍କ ବିରୁଦ୍ଧରେ ସୂଚନା ପ୍ରଯୁକ୍ତିବିଦ୍ୟା ଆଇନର ଧାରା 66(D) ସମେତ ଟିଏସ୍ ଗେମିଂ ଆଇନ ଏବଂ ଆଇଟି ଆଇନର ବହୁବିଧ ଧାରା ଅନୁଯାୟୀ ମାମଲା ରୁଜୁ କରାଯାଇଛି, ଯାହା ଠକେଇ ଏବଂ ପରିଚୟ ଚୋରି ସହିତ ଜଡିତ। ଏଫଆଇଆରରେ ଅବୈଧ ବେଟିଂ କାର୍ଯ୍ୟକଳାପର ପ୍ରୋତ୍ସାହନକୁ ସମ୍ବୋଧିତ କରୁଥିବା ଧାରା ମଧ୍ୟ ଅନ୍ତର୍ଭୁକ୍ତ କରାଯାଇଛି।
ନନ୍ଦିଘୋଷ ବ୍ୟୁରୋ : ମିରଠରେ ଲୋମହର୍ଷକ ହତ୍ୟା ଘଟଣା। ମୃତ ମର୍ଚ୍ଚାଣ୍ଟ ନାଭି ଅଫିସର ସୌରଭ ରାଜପୁତଙ୍କ ୬ ବର୍ଷର ଝିଅର ହୃଦୟ ବିଦାରକ ବୟାନ ଏବେ ଚର୍ଚ୍ଚାର କାରଣ ହୋଇଛି। ପଡୋଶୀଙ୍କୁ ଝିଅ କହିଥିଲା- ଡ୍ରମ ଭିତରେ ବାପା ଅଛନ୍ତି। ଅର୍ଥାତ ଝିଅ ଯେ ବାପାଙ୍କୁ ହତ୍ୟାର ପ୍ରତ୍ୟକ୍ଷଦର୍ଶୀ ଥିଲା ତାହା ପ୍ରତୀୟମାନ ହୋଇଛି। ପତ୍ନୀ ମୁସକାନ ରାସ୍ତୋଗୀଙ୍କ ଜନ୍ମଦିନରେ ଶୁଭେଚ୍ଛା ଜଣାଇବା ଲାଗି ଲଣ୍ଡନରୁ ଆସିଥିବା ସୌରଭଙ୍କୁ ପତ୍ନୀ ଓ ତାଙ୍କ ପ୍ରେମିକ ସାହିଲ ଶୁକ୍ଳା ଛୁରୀ ଭୁସି ହତ୍ୟା କରିବା ପରେ ୧୫ ଖଣ୍ଡ କରି ଡ୍ରମ ଭିତରେ ସିଲ୍ କରିଦେଇଥିଲେ। ତେବେ ଡ୍ରମ ଭିତରେ ବାପା ରହିଛନ୍ତି ବୋଲି ସୌରଭଙ୍କ ଝିଅ କହିଥିଲେ ବୋଲି ସୂଚନା ଦେଇଛନ୍ତି ସୌରଭଙ୍କ ମା ରେଣୁ ଦେବୀ।
ଗତ ମାର୍ଚ୍ଚ ୪ ତାରିଖରେ ଏହି ଲୋମହର୍ଷକ ହତ୍ୟାକାଣ୍ଡ ଘଟିଥିଲା। ସେପଟେ ଅଭିଯୁକ୍ତ ମୁସକାନ ଏହି ସମାଜରେ ରହିବା ଲାଗି ଅନୁପଯୁକ୍ତ ଏବଂ ତାଙ୍କୁ ଉଚିତ ଦଣ୍ଡ ମିଳୁ ବୋଲି କହିଛନ୍ତି ତାଙ୍କ ବାପା। ପୂର୍ବରୁ ମୁସକାନଙ୍କ ମା କବିତା ରାସ୍ତୋଗୀ କହିଥିଲେ- ତାଙ୍କ ଝିଅ ଏହି ହତ୍ୟାକାଣ୍ଡରେ ସାମିଲ ରହିଛି ବୋଲି ସ୍ବୀକାର କରିଥିଲା। ଜେରା ପରେ ସୌରଭଙ୍କୁ ହତ୍ୟା କରିବା ପରେ ତାଙ୍କ ମୃତ ଶରୀରକୁ ୧୫ ଖଣ୍ଡ କରିଥିବା ଦୁଇ ଅଭିଯୁକ୍ତ ସ୍ବୀକାର କରିଥିଲେ। ସୌରଭଙ୍କ ପରିବାରର ଅଭିଯୋଗ କ୍ରମେ ପୋଲିସ ମାମଲା ଦାୟର କରି ତଦନ୍ତ କରୁଛି। ୨୦୧୬ରେ ବ୍ରହ୍ମପୁରୀ ଇନ୍ଦ୍ରନଗରୀ ବାସିନ୍ଦା ସୌରଭଙ୍କ ସହ ଗୁରିପୁରାର ମୁସ୍କାନ ରାସ୍ତୋଗୀଙ୍କ ସହ ପ୍ରେମ ବିବାହ ହୋଇଥିଲା। ପତ୍ନୀଙ୍କ ଜନ୍ମଦିନରେ ଲଣ୍ଡନରୁ ଆସିବା ପରେ ସୌରଭଙ୍କୁ ହତ୍ୟା କରିଥିଲେ ପ୍ରେମୀଯୁଗଳ।
ନନ୍ଦିଘୋଷ ବ୍ୟୁରୋ : ବହୁଚର୍ଚ୍ଚିତ ୨୬/୧୧ ମୁମ୍ବାଇ ଆତଙ୍କବାଦୀ ହମଲା ଅଭିଯୁକ୍ତ ତହବୁର ରାଣା ପ୍ରତ୍ୟର୍ପଣ ପ୍ରସଙ୍ଗ । ରାଣାର ପ୍ରତ୍ୟର୍ପଣ ପ୍ରସଙ୍ଗରେ ପୁନର୍ବିଚାର କରିପାରନ୍ତି ଆମେରିକା ସୁପ୍ରିମକୋର୍ଟ । ଭାରତ ହାତରେ ରାଣାର ପ୍ରତ୍ୟର୍ପଣ ପ୍ରସ୍ତାବ ଉପର ରହିତାଦେଶ ଜାରି କରିବା ଲାଗି ସୁପ୍ରିମକୋର୍ଟରେ ହୋଇଥିବା ଆବେଦନକୁ ପୁନଃଶୁଣାଣି କରିପାରନ୍ତି କୋର୍ଟ । ଆସନ୍ତା ଏପ୍ରିଲ ୪ରେ ହେବ ମାମଲାର ଶୁଣାଣି ।
ପ୍ରତ୍ୟର୍ପଣ ପ୍ରସ୍ତାବ ଉପରେ ସ୍ଥଗିତାଦେଶ ଜାରି ଲାଗି ହୋଇଥିବା ଆବେଦନ କେତେକ ବିଚାରପତିଙ୍କ ହସ୍ତଗତ ହୋଇଥିବା ସୂଚନା ମିଳିଛି । ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ ଜନ୍ ରବର୍ଟସଙ୍କ ନିକଟରେ ଏନେଇ ନୂଆ ଆବେଦନ କରିଥିଲା ରାଣା । କିଛି ଦିନ ତଳେ ପ୍ରତ୍ୟର୍ପଣ ପ୍ରସ୍ତାବ ରଦ୍ଦ କରିବା ଲାଗି ରାଣାର ଆବେଦନକୁ ଖାରଜ କରିଦେଇଥିଲେ ସୁପ୍ରିମକୋର୍ଟ ବିଚାରପତି ଜଷ୍ଟିସ କାଗନ ।
୬୩ ବର୍ଷ ବୟସ୍କ ରାଣା ବର୍ତ୍ତମାନ ଲସ ଏଞ୍ଜେଲସର ଏକ ଜେଲରେ ରହୁଛି । ଲସ୍କର-ଏ-ତୋଏବା ସଂଗଠନର ନେତା ଡାଭିଡ ହେଡଲି ସହ ରାଣାର ସମ୍ପର୍କ ଥିବା ଜଣାଯାଏ । ୨୦୦୮ ମସିହାର ମୁମ୍ବାଇ ଆତଙ୍କୀ ହମଲାରେ ପ୍ରାଣ ହରାଇଥିଲେ ୧୬୬ ଜଣ । ଭାରତ ହାତରେ ରାଣାକୁ ପ୍ରତ୍ୟର୍ପଣ କରିବା ଲାଗି ପୂର୍ବରୁ ମଞ୍ଜୁର ଦେଇଥିଲେ ଟ୍ରମ୍ପ ପ୍ରଶାସନ । ୨୦୧୧ରେ ନଏଆଇଏ ପକ୍ଷରୁ ଦାୟର ଚାର୍ଜସିଟରେ ରାଣା ସମେତ ୮ ଜଣଙ୍କୁ ସ୍ଥାନୀତ କରାଯାଇଥିଲା ।
ବାଲେଶ୍ୱର : ଦୁର୍ଘଟଣାକୁ ନେଇ ଗୋମାଫିଆ ଓ ଗ୍ରାମବାସୀଙ୍କ ମଧ୍ୟରେ ସଂଘର୍ଷ। ୯ ବାଇକ ସହ ଗୋଟିଏ କାର ଭାଙ୍ଗି ଦେଲେ ଗୋମାଫିଆ। ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ଅନ୍ତର୍ଗତ ଶ୍ରୀଜଙ୍ଗରେ ଘଟିଛି ଏ ସଂଘର୍ଷ। ଗୋମାଫିଆଙ୍କ ଗୋରୁ ବୋଝେଇ ଗାଡ଼ି ଏକ ଦୋକାନକୁ ଧକ୍କା ଦେଇ ଉପରକୁ ଚଢିଯାଇଥିଲା। ଏହାକୁ ନେଇ ଗ୍ରାମବାସୀ ଓ ଗୋରୁ ମାଫିଆଙ୍କ ମଧ୍ୟରେ ସଂଘର୍ଷ ଘଟିଥିଲା। ଗୋମାଫିଆ ଆଖପାଖରେ ଥିବା ୯ ବାଇକ ସହ ଗୋଟିଏ କାରକୁ ଭାଙ୍ଗି ଚୁରମାର କରି ଦେଇଥିଲେ। ପ୍ରତିବାଦ କରି ଗ୍ରାମବାସୀ ଶ୍ରୀଜଙ୍ଗରେ ରାସ୍ତାରୋକ କରିଥିବା ଜଣାପଡିଛି। ଘଟଣାସ୍ଥଳରେ ବରିଷ୍ଠ ପୋଲିସ ଅଧିକାରୀ ପହଞ୍ଚି ସ୍ଥିତି ଉପରେ ନଜର ରଖିଛିନ୍ତି। ଏସଡ଼ିପିଓଙ୍କ ସହ ଖନ୍ତାପଡ଼ା, ସଦର, ଟାଉନ ଥାନା ପୋଲିସ ଟିମ ମୁତୟନ ହୋଇଛନ୍ତି।
ନନ୍ଦିଘୋଷ ବ୍ୟୁରୋ : ଅନୁଗୁଳ କରଡ଼ାଗାଡିଆ ଠାରେ ଥିବା ଦେଶୀ ମଦଭାଟିର ମୁଖ୍ୟ ଗୋଦାମରେ ରେଡ୍ । ଆୟକର ବିଭାଗ ପକ୍ଷରୁ ତିନି ଜଣିଆ ଟିମ ଚଳାଇଛନ୍ତି ରେଡ।ଆୟକର ବିଭାଗର ଟିମ ଚଳାଇଛନ୍ତି ଖୋଳତାଡ଼। ଆୟକର ବିଭାଗ ପକ୍ଷରୁ ବଡ ଧରଣର ରେଡ କରାଯାଉଛି। ଢେଙ୍କାନାଳରେ ଥିବା ଶକ୍ତି ମଲ୍ଟ ଏୟାର ଲିମୋନେଡ ପ୍ରାଇଭେଟ୍ ଲିମିଟେଡ ଉପରେ ମଧ ଆୟକର ଚଢ଼ାଉ କରାଯାଉଛି। ଘରେ ମଧ୍ୟ ଗୋଟିଏ ଟିମ ଚଢ଼ାଉ କରୁଛି। ମଦ ବ୍ୟବସାୟୀ ବିକ୍ରମ ସାହୁଙ୍କ ବିଭିନ୍ନ ପ୍ରତିଷ୍ଠାନ ଉପରେ ଚାଲିଛି ଚଢ଼ାଉ। ଆଜି ସକାଳୁ ଚାଲିଛି ଏହି ଚଢ଼ାଉ। ଏକାଧିକ ଟିମ୍ କରୁଛନ୍ତି ଚଢ଼ାଉ।
ନନ୍ଦିଘୋଷ ବ୍ୟୁରୋ : ଝାରସୁଗୁଡ଼ା ସଦର ଥାନା ବିଟିଏମ ଛକ ଠାରେ ଜେସିବି ଲଗାଇ ଏଟିଏମ ତାଡ଼ି ନେବା ଘଟଣା। ଉଦ୍ଧାର ହେଲା ଏଟିଏମ ମେସିନ। ଏହି ଘଟଣାରେ ତିନି ଜଣଙ୍କୁ ପୋଲିସ ଅଟକ ରଖିଥିବା ଜଣାପଡ଼ିଛି। ବ୍ୟାଙ୍କ ଷ୍ଟାଫ ଆସି ମେସିନଟି ଅକ୍ଷୁର୍ଣ୍ଣ ଥିବା ଜଣାଇଥିବା ପୋଲିସ ସୂଚନା ଦେଇଛି। ଗତକାଲି ବିଳମ୍ବିତ ରାତିରେ ବିଟିଏମ ଛକରେ ଥିବା ସେଣ୍ଟ୍ରାଲ ବ୍ୟାଙ୍କ୍ ଅଫ ଇଣ୍ଡିଆର ଏଟିଏମକୁ ଜେସିବି ଲଗାଇ ତାଡ଼ି ନେଇଥିଲେ ଦୁର୍ବୃତ୍ତ। ସୂଚନା ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତନାଘନା ଜାରି ରଖିଛି । ଜେସିବି ମାଲିକଙ୍କ ସମେତ ୩ ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ।
ନନ୍ଦିଘୋଷ ବ୍ୟୁରୋ : ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଜଗନ୍ନାଥପ୍ରସାଦ ପଞ୍ଚାୟତର ଦଧିବାମନପୁର ବନ୍ଧସାହି ଗାଁରେ ଗୋଷ୍ଠୀ ସଂଘର୍ଷ । ଜମିବାଡିକୁ କେନ୍ଦ୍ର କରି ଗୋଷ୍ଠୀ ସଂଘର୍ଷ ଘଟିଛି। ଏଥିରେ ଦୁଇ ଗୋଷ୍ଠୀର ୧୦ ଜଣ ଆହତ ହୋଇଛନ୍ତି । ଆହତଙ୍କ ଚିକିତ୍ସା ପାଇଁ ବାସୁଦେବପୁର ମେଡିକାଲରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରୁ ୪ ଜଣ ଗୁରୁତରଙ୍କୁ ଭଦ୍ରକ ମେଡିକାଲକୁ ରେଫର କରାଯାଇଛି ।
ଗାଁରେ ଉତ୍ତେଜନା ଲାଗି ରହିଥିବାରୁ ଘଟଣାସ୍ଥଳରେ ନାୟକାଣୀଡିହି ପୋଲିସ ପହଞ୍ଚିଛି । ବନ୍ଧସାହିର ମହେଶ୍ବର ମଳିକ ଓ ନିରାକାର ମଳିକଙ୍କ ପରିବାର ମଧ୍ଯରେ ଜମିଜମାକୁ କେନ୍ଦ୍ର କରି ଦୀର୍ଘ ଦିନ ଧରି ବିବାଦ ଲାଗି ରହିଥିଲା । ଗାଁରେ ରାସ୍ତା ନିର୍ମାଣ କାମ ଚାଲିଥିବାବେଳେ ଏହି ରାସ୍ତା କାମକୁ ନେଇ ପାଟିତୁଣ୍ଡ ଆରମ୍ଭ ହୋଇଥିଲା। ଉଭୟଙ୍କ ମଧ୍ଯରେ ମୁହାଁମୁହିଁ ହେବାରୁ କିଛି ମାରଣାସ୍ତ୍ରରେ ଆକ୍ରମଣ କରିଥିଲେ। ଏଥିରେ ମହେଶ୍ବର ମଳିକଙ୍କ ପକ୍ଷରୁ ୭ ଜଣ ଆହତ ହୋଇଛନ୍ତି । ମହେଶ୍ବରଙ୍କ ଘରେ ପସି ଆସବାବପତ୍ର ଭଙ୍ଗାରୁଜା କରିବା ସହିତ ତିନୋଟି ବାଇକ ଭାଙ୍ଗି ଦେଇଛନ୍ତି । ଏହାକୁ ରାଜନୈତିକ ହିଂସାକାଣ୍ଡ ବୋଲି କହିଛନ୍ତି ମହେଶ୍ବର।
