ଭୁବନେଶ୍ବର: ଭୁବନେଶ୍ବର ଉତ୍ତରା ଛକରେ ବଡ଼ ଧରଣର ଦୁର୍ଘଟଣା ଘଟିଛି । ଟୁରିଷ୍ଟ ବସ ଓଲଟିବାରୁ ଜଣଙ୍କ ମୃତ ହୋଇଥିବା ବେଳେ ୨୦ରୁ ଅଧିକ ଯାତ୍ରୀ ଆହତ ହୋଇଛନ୍ତି । ସମସ୍ତ ଆହତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ମୃତାହତମାନେ ବାଂଲାଦେଶ ନାଗରିକ ହୋଇଥିବା ବେଳେ ବସରେ ପ୍ରାୟ ୭୦ ଜଣ ଯାତ୍ରୀ ରହିଥିଲେ । ସମସ୍ତ ଯାତ୍ରୀ କାଶୀ ବିଶ୍ବନାଥ ଦର୍ଶନ ସାରି ପୁରୀ ଅଭିମୁଖେ ଯାଉଥିବା ବେଳେ ଦୁର୍ଘଟଣା ଘଟିଛି । ଘଟଣାସ୍ଥଳରେ ଅଗ୍ନିଶମ ବାହିନୀ ଓ ପୋଲିସ ଉଦ୍ଧାର କାର୍ଯ୍ୟ ଜାରି ରଖିଛି ।
ରାଜଧାନୀରୁ ASO ନିଖୋଜ: ଲୋକସେବା ଭବନରୁ ଡ୍ୟୁଟି ସାରି ଫେରି ନଥିବା ଅଭିଯୋଗ
ଭୁବନେଶ୍ବର: ରାଜଧାନୀରୁ ASO ନିଖୋଜ । ASO ପ୍ରକାଶ କୁମାର ସାହୁ ନିଖୋଜ । ଲୋକସେବା ଭବନରୁ ଡ୍ୟୁଟି ସାରି ଫେରି ନଥିବା ଅଭିଯୋଗ । ଗତକାଲି ଡ୍ୟୁଟି ସାରିବା ପରେ ଆଉ ଘରକୁ ଫେରିନଥିବା ନେଇ ଭରତପୁର ଥାନାରେ ଏତଲା ଦେଲେ ସମ୍ପର୍କୀୟ ଭାଇ । ମୋବାଇଲ ନମ୍ବର ସ୍ଵିଚଅଫ ରହିଥିବା ଜଣାଇଲେ ପରିବାର । ପ୍ରକାଶ ପୂର୍ତ୍ତ ବିଭାଗର କର୍ମଚାରୀ ।
ରାମନବମୀ ଓ ହନୁମାନ ଜୟନ୍ତୀ ପାଇଁ ସମ୍ବଲପୁରରେ ପ୍ରସ୍ତୁତି ଆରମ୍ଭ
ସମ୍ବଲପୁର: ଶ୍ରୀରାମ ନବମୀ ଓ ହନୁମାନ ଜୟନ୍ତୀ ପାଇଁ ସମ୍ବଲପୁରରେ ଆରମ୍ଭ ହୋଇଛି ପ୍ରସ୍ତୁତି । ଚଳତବର୍ଷ ହନୁମାନ ଜୟନ୍ତୀ ବାଇକ ଶୋଭାଯାତ୍ରା ଓ ରାମ ନବମୀ ଶୋଭାଯାତ୍ରା ଗୋଟିଏ ଦିନରେ ପଡୁଥିବାରୁ ସୁରକ୍ଷା ନେଇ ପୋଲିସକୁ ବ୍ୟାପକ କସରତ କରିବାକୁ ପଡ଼ିଛି । ଲଗାତର ଫ୍ଲାକମାର୍ଚ୍ଚ କରାଯାଇ ସଚେତନ କରାଯାଇଥିବାବେଳେ ଯେଉଁ ରାସ୍ତା ଦେଇ ଶୋଭଯାତ୍ରା ଯିବ, ସେସବୁ ରାସ୍ତାକୁ ତନ୍ନ ତନ୍ନ କରି ଚେକିଂ କରାଯାଉଛି ।
ଉପରେ ଡ୍ରୋନ ଓ ତଳେ ମେଟାଲ ଡିଟେକ୍ଟର । ତନ୍ନ ତନ୍ନ କରି ଯାଞ୍ଚ କରୁଛି ପୋଲିସ୍ । ଶ୍ରୀରାମ ନବମୀ ଓ ହନୁମାନ ଜୟନ୍ତୀ ପାଇଁ ସଜାଗ ଟିମ୍ । ସମ୍ବଲପୁର ଶୋଭାଯାତ୍ରା ରାସ୍ତାରେ ତନଖି କଡ଼ାକଡ଼ି । ଚଳିତବର୍ଷ ପ୍ରଥମ ଥର ପାଇଁ ଉଭୟ ହନୁମାନ ଜୟନ୍ତୀ ଓ ଶ୍ରୀରାମ ନବମୀ ଶୋଭାଯାତ୍ରା ଗୋଟିଏ ଦିନରେ କରିବାକୁ ନିଷ୍ପତ୍ତି ନିଆଯାଇଛି । ତେଣୁ ଶାନ୍ତିଶୃଙ୍ଖଳା ରକ୍ଷା କରିବା ପୋଲିସ ପାଇଁ ହେବ ବଡ଼ ଚ୍ୟାଲେଞ୍ଜ । ସହର ସାରା ଫୋର୍ସ ମୁତୟନ କରାଯାଇଥିବା ବେଳେ ସମ୍ବଲପୁର ଜିଲ୍ଲାପାଳ, ଏସପି, ମହାନଗର ନିଗମର କମିଶନର ରାତି ତମାମ ବୁଲି ସ୍ଥିତି ଯାଞ୍ଚ କରୁଛନ୍ତି l ସହରର ବିଭିନ୍ନ ସ୍ଥାନରେ ଡଗ୍ ସ୍କ୍ବାଡ ଓ ବମ୍ ସ୍କ୍ବାଡ ନିୟୋଜିତ ରହି ଟିକିନିଖି ଯାଞ୍ଚ କରୁଛନ୍ତି ।
ସମୟ କମ ଥିବାରୁ ସଭିଏଁ ନିଜ ନିଜ ପ୍ରସ୍ତୁତିରେ ଲାଗି ପଡ଼ିଛନ୍ତି । ହନୁମାନ ଜୟନ୍ତୀ ବାଇକ୍ ରାଲି ଶୋଭାଯାତ୍ରା ଧନୁପାଲିରୁ ବାହାରିବାକୁ ନିଷ୍ପତ୍ତି ନିଆ ଯାଇଥିବା ବେଳେ ଶ୍ରୀରାମ ନବମୀ ଶୋଭାଯାତ୍ରା କ୍ଷେତରାଜପୁର ରେଳ ଷ୍ଟେସନ ନିକଟରୁ ବାହାରିବ । ତେଣୁ ଯେଉଁ ମାର୍ଗ ଦେଇ ଶୋଭାଯାତ୍ରା ଯିବ, ସେହି ରାସ୍ତାରେ କଡା ନଜର ରଖିଛି ପୋଲିସ ଓ ଜିଲ୍ଲା ପ୍ରଶାସନ । ଦୁଇବର୍ଷ ଆଗରୁ ହୋଇଥିବା ବିଶୃଙ୍ଖଳା କିଭଳି ଚଳିତବର୍ଷ ପୁନରାବୃତ୍ତି ନହେବ ସେନେଇ ଚାଲିଛି ଘନଘନ ବୈଠକ ।
ପାରଦର୍ଶୀ ପୋର୍ଟାଲରେ ପଞ୍ଜିକୃତ ହେଲେ ନାହିଁ ଅଧା ସ୍କୁଲ, ଗରିବ ପିଲାଙ୍କୁ ଭଣ୍ଡାଇ ଦେଲେ
ଭୁବନେଶ୍ବର: ପ୍ରତିଶ୍ରୁତି ଦେଇ ଗରିବ ପିଲାଙ୍କୁ ଭଣ୍ଡାଇ ଦେଲେ । ସମୟ ସରିଗଲା କିନ୍ତୁ ଅଧା ସ୍କୁଲ ପାରଦର୍ଶୀ ପୋର୍ଟାଲରେ ପଞ୍ଜିକୃତ ହେଲେ ନାହିଁ । ସବୁ ନିୟମକୁ ଫୁ’ କରି ଉଡାଇ ଦେଲେ ଘରୋଇ ସ୍କୁଲ । ମୁଣ୍ଡପାତି ସମର୍ଥନ ଦେଇ ଦେଲେ ସରକାର, ଯାହାକୁ ନେଇ ଅଭିଭାବକ ଓ ରାଜ୍ୟବାସୀଙ୍କ ମନରେ ଅସନ୍ତୋଷର ନିଆଁ ଜଳିବା ଆରମ୍ଭ କରିଛି । ଶିକ୍ଷା ଅଧିକାର ଆଇନ ବଳରେ ଘରୋଇ ସ୍କୁଲରେ ୨୫ ପ୍ରତିଶତ ସିଟରେ ଗରିବ ପିଲାଙ୍କୁ ମାଗଣା ଶିକ୍ଷା ଦେବାର ବ୍ୟବସ୍ଥା ରହିଛି । ହେଲେ ଏହାକୁ କିଭଳି ଖୋଲାଖୋଲି ଉଲ୍ଲଂଘନ କରାଗଲା ବୋଲି ପ୍ରଶ୍ନ କରିଛି ଅଭିଭାବକ ସଂଘ ।
ମିଛ କହି ସାଧାରଣ ଲୋକଙ୍କୁ ଭୂତାଉଥିଲେ । ଏବେ ଗରିବ ଛାତ୍ରଛାତ୍ରୀଙ୍କୁ ବି ଭଣ୍ଡାଇ ଦେଲେ ସରକାର । ପ୍ରତିଶ୍ରୁତି ଦେଇ ପାଠପଢ଼ାରୁ ବଞ୍ଚିତ କଲେ । ଆରଟିଇ ଅଧୀନରେ ଘରୋଇ ସ୍କୁଲରେ ଆଡ଼ମିଶନ ପାଇଁ କରାଯାଇଥିବା ପାରଦର୍ଶୀ ପୋର୍ଟାଲରେ ଏଭଳି ସ୍ଥିତି ଦେଖିବାକୁ ମିଳିଛି । ଓଡ଼ିଶାରେ ୭ ହଜାରରୁ ଅଧିକ ଘରୋଇ ସ୍କୁଲ ରହିଛି । ଗତ ସରକାରଙ୍କ ଇଛାଶକ୍ତି ବଳରେ ୬ ହଜାରରୁ ଅଧିକ ସ୍କୁଲ ପାରଦର୍ଶୀ ପୋର୍ଟାଲରେ ପଞ୍ଜିକୃତ ହୋଇଥିବା ବେଳେ ୪୦ ହଜାରରୁ ଅଧିକ ପିଲା ପାଠ ପଢିଥିଲେ । ଏ ସରକାରରେ କିନ୍ତୁ ଦାବି ସତ୍ତ୍ୱେ ମଧ୍ୟ ମାତ୍ର ୩୬୦୦ ସ୍କୁଲ ପୋର୍ଟାଲରେ ପଞ୍ଜିକୃତ ହୋଇଛନ୍ତି । ଯେଉଁ ସ୍କୁଲଗୁଡିକ ୩/୪ ବର୍ଷ ଧରି ପୋର୍ଟାଲରେ ପଢ଼ାଉଛନ୍ତି ସେମାନଙ୍କୁ ଅଟୋରେଜିଷ୍ଟ୍ରେସନ କରିବା ପାଇଁ ଦାବି କରିଥିଲା ଅଭିଭାବକ ମହାସଂଘ । କିନ୍ତୁ ସରକାର ଏହା କଲେ ନାହିଁ । ତେଣୁ ଗରିବ ପିଲାଙ୍କୁ ଘରୋଇ ସ୍କୁଲରେ ପାଠ ପଢ଼ାଇବାକୁ ସରକାରଙ୍କ ଆନ୍ତରିକତା ନାହିଁ ବୋଲି ଅଭିଯୋଗ ହୋଇଛି । ପୋର୍ଟାଲରେ ସ୍କୁଲଗୁଡିକର ପଞ୍ଜିକରଣର ଶେଷ ତାରିଖ ଥିଲା ମାର୍ଚ୍ଚ ୩୧ । କିନ୍ତୁ ଏ ଯାଏଁ ପ୍ରମୁଖ ସ୍କୁଲ ପଞ୍ଜିକୃତ ହେଲେ ନାହିଁ । ଏପରିକି ଏଯାଏଁ ୨୩ ହଜାର ୭୦୦ ପିଲା ପାରଦର୍ଶୀ ପୋର୍ଟାଲରେ ଆବେଦନ କରିଛନ୍ତି । ସେଥିରୁ ବହୁତ ପିଲା ଆଡମିଶନରୁ କଟିଯିବେ । ଏହା ଏକ ବଡ଼ ଷଡ଼ଯନ୍ତ୍ର ବୋଲି ଅଭିଯୋଗ କରିଛି ଅଭିଭାବକ ମହାସଂଘ । ତିନି ଚାରିଦିନ ଭିତରେ ସରକାର ନ ଚେତିଲେ ଜୋରଦାର ଆନ୍ଦୋଳନ ହେବ ବୋଲି ଚେତାଇ ଦେଇଛି ଅଭିଭାବକ ମହାସଂଘ ।
ସେପଟେ ଶିକ୍ଷା ଅଧିକାର ଦିଗରେ କାର୍ଯ୍ୟ କରୁଥିବା ସଂଗଠନ ଓ ଓଡ଼ିଶା ସିଟିଜେନସ ଫୋରମ ମଧ୍ୟ ସରକାରଙ୍କ ଏହି କାର୍ଯ୍ୟକୁ ଅନ୍ୟାୟ ବୋଲି କହିଛନ୍ତି । ନିୟମ ଅନୁଯାୟୀ ସବୁ ପିଲା କିଭଳି ଆଡମିସନ ପାଇବେ ସେ ଦାୟିତ୍ୱ ସରକାରଙ୍କର । କିନ୍ତୁ ଘରୋଇ ସ୍କୁଲଗୁଡିକ ନିୟମକୁ ଭାଙ୍ଗୁଥିବା ବେଳେ ସରକାର କାହିଁକି ନିରବଦ୍ରଷ୍ଟା ବୋଲି ପ୍ରଶ୍ନ ଉଠିଛି । ଏପରିକି ରାଜ୍ୟର ବିଜେପି ସରକାର ସବୁ ପ୍ରସଙ୍ଗରେ କାହିଁକି ସ୍ଥାଣୁ ପାଲଟିଛନ୍ତି ବୋଲି ପ୍ରଶ୍ନ କରିଛି ସିଟିଜେନସ ଫୋରମ ।
ଆରଟିଇ ଅଧୀନରେ ସବୁ ପିଲାଙ୍କୁ ସମାନ ଗୁଣାତ୍ମକ ଶିକ୍ଷା ପ୍ରଦାନ ପାଇଁ ଆଇନ ରହିଥିବା ବେଳେ ଆର୍ଥିକ ବ୍ୟବସ୍ଥା ମଧ୍ୟ ରହିଛି । ଏପରିକି ଏହା ଅଧୀନରେ ପିଲାଙ୍କୁ ଡ୍ରେସ, ଜୋତା ଓ ବହିପତ୍ର ଦେବାର ବ୍ୟବସ୍ଥା ରହିଛି । କିନ୍ତୁ ଗୋଟିଏ ପଟେ ଆଡମିଶନ ନ ଦେବାର ଚକ୍ରାନ୍ତ ସହ ଆରପଟେ ଆଡମିଶନ ନେଉଥିବା ପିଲାଙ୍କୁ ମଧ୍ୟ ନ୍ୟାୟ ମିଳୁନାହିଁ । ଯାହାକୁ ନେଇ ଅସନ୍ତୋଷ ତୀବ୍ର ହୋଇଛି ।
କଂଗ୍ରେସର ହେବ ନବକଳେବର: ଶୀଘ୍ର ନୂଆ ଟିମ୍ ଗଢ଼ିବେ ଭକ୍ତ
ଭୁବନେଶ୍ବର: ପିସିସି ସଭାପତି ଭକ୍ତ ଦାସ ଗଢ଼ିବେ ନୂଆ ଟିମ । ଅହମ୍ମଦାବାଦରେ ଏଆଇସିସି ବୈଠକ ପରେ ଏହି ନୂଆ ଟିମ୍ ଘୋଷଣା କରାଯିବ। ଜିଲ୍ଲାସ୍ତରରୁ ପିସିସି ଯାଏଁ ହେବ ନବକଳେବର` ଭକ୍ତ ଦାସଙ୍କ ନୂଆ ଟିମରେ କିଏ କିଏ ସ୍ଥାନ ପାଇବେ ? କିଏ ବାଦ୍ ପଡ଼ିବ ? କାହାକୁ ମିଳିବ ଗୁରୁତ୍ଵ ଦାୟିତ୍ଵ, ତାକୁ ନେଇ ଜୋରଦାର ଚର୍ଚ୍ଚା ଆରମ୍ଭ ହେଲାଣି । ଆଉ ଏହାକୁ ନେଇ କଂଗ୍ରେସ ଶିବିର ମଧ୍ୟ ଚଳଚଞ୍ଚଳ ହୋଇ ଉଠିଛି ।
ଭକ୍ତ ଦାସ ପିସିସି ସଭାପତି ହେବା ପରଠୁ ଜୋସରେ ଓଡ଼ିଶା କଂଗ୍ରେସ । ସଂଗଠନ ଚଳଚଞ୍ଚଳ, ନେତା ଓ କର୍ମୀ ଉତ୍ସାହିତ । ସମସ୍ତଙ୍କୁ ସାଙ୍ଗରେ ନେଇ ଭକ୍ତ ଦଳକୁ ନୂଆ ଦିଶା ଦେବାକୁ ଚେଷ୍ଟା କରୁଛନ୍ତି । ଯେମିତି ଦଳ ପୁଣି ଥରେ କ୍ଷମତାକୁ ଫେରିବ, ସେଥିପାଇଁ ଚାଲିଛି ଜୋରଦାର କସରତ। ଏହି କ୍ରମରେ ତୃଣମୂଳ ସ୍ତରରୁ ସଂଗଠନକୁ ମଜଭୁତ କରିବାକୁ ପିସିସି ସଭାପତି ଅଣ୍ଟା ଭିଡ଼ିଛନ୍ତି । ଆଗକୁ ପଞ୍ଚାୟତ ଓ ପୌର ନିର୍ବାଚନ ବି ଆସୁଛି । ବଡ଼ ମ୍ୟାଚ ପୂର୍ବରୁ ଦଳର ଶକ୍ତି ପରୀକ୍ଷା କରିବା ପାଇଁ ଏହି ଦୁଇ ନିର୍ବାଚନ ଉପଯୁକ୍ତ ମଞ୍ଚ । ତା’ ଆଗରୁ ଦଳକୁ ପ୍ରସ୍ତୁତ କରିବାକୁ ପଡ଼ିବ । ସେଥିପାଇଁ ନୂଆ ଟିମ୍ ଗଠନ କରିବାକୁ ଯାଉଛନ୍ତି ଭକ୍ତ । ଆସନ୍ତା ୧୧ ତାରିଖରେ ଅହମ୍ମଦାବାଦରେ ଏଆଇସିସି ବୈଠକ ହେବ । ଏହି ବୈଠକରେ କଂଗ୍ରେସର ଶୀର୍ଷ ନେତୃତ୍ଵ ସହିତ ଆଲୋଚନା କରି ଭକ୍ତ ଦାସ ନୂଆ ଟିମ୍ ଗଠନ କରିବେ ।
ଏଣେ ନୂଆ ଟିମର ରୂପରେଖ କେମିତି ହେବ ତାହାକୁ ନେଇ କଂଗ୍ରେସରେ ଆରମ୍ଭ ହୋଇଛି ଚର୍ଚ୍ଚା । ପୂର୍ବତନ ପିସିସି ସଭାପତି ଜୟଦେବ ଜେନା ଓ ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ କହିଛନ୍ତି, ପିସିସି ସଭାପତିଙ୍କ ନୂଆ ଟିମରେ ସ୍ଥାନ ପାଇବେ ଅଧିକ ଯୁବକ । ବରିଷ୍ଠ ନେତାଙ୍କ ମାର୍ଗଦର୍ଶନରେ ସେମାନେ କାମ କରି ସଂଗଠନକୁ ଅଧିକ ଚଳଚଞ୍ଚଳ କରିବେ ।
ଭକ୍ତଙ୍କ ନୂଆ ଟିମରେ କାହାକୁ ସ୍ଥାନ ମିଳିବ, କାହାର ଦବଦବା ରହିବ, ତାକୁ ନେଇ ବି ଚର୍ଚ୍ଚା ଆରମ୍ଭ ହେଲାଣି । ୧୪ ବିଧାୟକ ଓ ଜଣେ ସାଂସଦଙ୍କୁ କେମିତି ଉପଯୋଗ କରିବେ ପିସିସି ସଭାପତି ? ମହମ୍ମଦ ମୋକିମ, ପ୍ରସାଦ ହରିଚନ୍ଦନ, ଜୟଦେବ ଜେନା, ଶ୍ରୀକାନ୍ତ ଜେନା, ନିରଂଜନ ପଟ୍ଟନାୟକ, ଅମର ପ୍ରଧାନଙ୍କ ପରି ପୁରୁଖା ନେତାଙ୍କ ଅଭିଜ୍ଞତାକୁ କେମିତି ବ୍ୟବହାର କରାଯିବ ? ମାନସ ଚୌଧୁରୀ, ଦେବାଶିଷ ପଟ୍ଟନାୟକ, ନବଜ୍ୟୋତି ପଟ୍ଟନାୟକଙ୍କ ପରି ଯୁବ ନେତାଙ୍କୁ କେଉଁ ଗୁରୁ ଦାୟିତ୍ଵ ଦିଆଯିବ ତାକୁ ବି ଅପେକ୍ଷା କରାଯାଇଛଛି । ବିଧାୟକ ତାରା ପ୍ରସାଦ ବାହିନୀପତିଙ୍କ ଯୁକ୍ତି, ଲବି ନୁହେଁ ଲଢୁଆ ନେତାଙ୍କୁ ନିଜ ଟିମରେ ସାମିଲ କରିବେ ପିସିସି ସଭାପତି । ଜିଲ୍ଲାସ୍ତରରୁ ସମ୍ମିଳନୀ କରାଯାଇ ଜିଲ୍ଲା ସଭାପତି ବଛାଯିବ ବୋଲି ପିସିସି ସଭାପତି କହିଛନ୍ତି ।
୨୫ ବର୍ଷ ହେଲା ରାଜ୍ୟରେ ଶାସନ ଗାଦିରୁ ଦୂରରେ ରହିଛି କଂଗ୍ରେସ । ୨୦୧୪ ପରେ ତ ଦଳ ତୃତୀୟ ସ୍ଥାନକୁ ଖସି ଆସିଛି । ୧୩ ପ୍ରତିଶତକୁ ଖସି ଆସିଲାଣି ଦଳର ଭୋଟ ହାର । ଭକ୍ତ ଦାସଙ୍କ ଉପରେ ଭରସା ରଖି ହାଇକମାଣ୍ଡ ଦେଇଛନ୍ତି ଗୁରୁ ଦାୟିତ୍ଵ । ଫେବ୍ରୁଆରୀ ୧୧ରେ ତାଙ୍କୁ ପିସିସି ସଭାପତି କରାଯାଇଥିଲା । ୨ ମାସ ଭିତରେ କଂଗ୍ରେସ ଚଳଚଞ୍ଚଳ ହୋଇଛି, ଏକଥା ମାନିବାକୁ ପଡ଼ିବ । ଆଗକୁ ବିରାଟ ଲଲେଇ ଲଢିବାକୁ କାହାକୁ ସେ ନିଜ ଟିମରେ ରଖିବେ, କାହାକୁ କେଉଁ ଦାୟିତ୍ଵ ଦେବେ, ତାକୁ ନେଇ କଂଗ୍ରେସ ଶିବିରରେ ବେଶ୍ ଉତ୍କଣ୍ଠା ।
ଓଡ଼ିଆ ନବବର୍ଷ ପୂର୍ବରୁ ସରିବ ବିଜେଡିର ସାଙ୍ଗଠନିକ ନିର୍ବାଚନ
ଭୁବନେଶ୍ବର: ଓଡ଼ିଆ ନବବର୍ଷ ପୂର୍ବରୁ ବିଜୁ ଜନତା ଦଳର ସାଂଗଠନିକ ନିର୍ବାଚନ ସରିବ । ନୂଆ କମିଟି ସହ ଜିଲ୍ଲା ଦାୟିତ୍ବ ନେବେ ବିଜେଡି ନେତା । ନିର୍ବାଚନ ପ୍ରକ୍ରିୟା ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ଏନେଇ ଆସନ୍ତା ଏପ୍ରିଲ ୭ ତାରିଖରେ ଶଙ୍ଖ ଭବନରେ ଜିଲ୍ଲା ନିର୍ବାଚନ ଅଧିକାରୀଙ୍କ ସମେତ ଏଆରଓମାନଙ୍କ ବୈଠକ ବସିବାକୁ ଯାଉଛି । ବିଜେଡି ନେତାମାନେ ପୁଣି ଥରେ ନବୀନ ପଟ୍ଟନାୟକଙ୍କୁ ସଭାପତି ଭାବେ ପାଇବାକୁ ଇଚ୍ଛା ପ୍ରକାଶ କରି ତାଙ୍କ ନେତୃତ୍ବରେ ସଂଗଠନକୁ ଆଗେଇବାକୁ ରଣନୀତି ପ୍ରସ୍ତୁତ କରିଛନ୍ତି ।
ଏନେଇ ଆସନ୍ତା ୭ ତାରିଖ ଅପରାହ୍ନ ସାଢ଼େ ୪ଟାରେ ବିଜେଡି ଡାକିଛି ଗୁରୁତ୍ବପୂର୍ଣ୍ଣ ବୈଠକ । ଜିଲ୍ଲା ନିର୍ବାଚନ ଅଧିକାରୀମାନଙ୍କୁ ଚିଠି କରି ସେହିଦିନ ଉପସ୍ଥିତି ରହିବାକୁ ବିଜେଡିର ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବ ଅବଗତ କରିଛନ୍ତି । ବୈଠକରେ ସମସ୍ତ ଜିଲ୍ଲା ନିର୍ବାଚନ ଅଧିକାରୀମାନେ ଆସେମ୍ବଲି ନିର୍ବାଚନ ଅଧିକାରୀ ବା ଏଆରଓ ତାଲିକା ସହ ପୌର ଓ ପଞ୍ଚାୟତ ୱାର୍ଡ ସଭାପତି, ବ୍ଲକ ସଭାପତିମାନଙ୍କ ଫୋନ ନମ୍ବର ଏବଂ ଠିକଣା ଦାଖଲ କରିବେ । ଫେବୃଆରୀ ପ୍ରଥମ ସପ୍ତାହରେ ଡିଆରଓ ବା ଜିଲ୍ଲା ନିର୍ବାଚନ ଅଧିକାରୀ ନିଯୁକ୍ତି ହୋଇଥିଲେ । ସେମାନେ ଜିଲ୍ଲା ସଭାପତି ନିର୍ବାଚିନ ପ୍ରକ୍ରିୟା ଆଗେଇଛନ୍ତି । ଡିଆରଓ ନିଯୁକ୍ତିର ୧୦ ଦିନ ପରେ ଏଆରଓ ନିଯୁକ୍ତି ପାଇଁ ପଞ୍ଚାୟତ ଓ ପୌର ସଭାପତି ନିର୍ବାଚନ ପ୍ରକ୍ରିୟାକୁ ଆଗେଇ ନିଆଯାଇଛି । ବରିଷ୍ଠ ଓ ଯୁବ ବର୍ଗଙ୍କ ସମନ୍ବୟରେ ଏହି କାର୍ଯ୍ୟକ୍ରମ ସମାପନ ହେବ ।
ନବୀନ ପଟ୍ଟନାୟକଙ୍କ ନେତୃତ୍ବକୁ ପୁଣି ଥରେ ବାଛିଛନ୍ତି ବିଜେଡି ନେତା ଓ କର୍ମୀ । ତାଙ୍କୁ ପୁଣି ଥରେ ବିଜେଡି ସଭାପତି ଭାବେ ନିର୍ବାଚିତ କରିବାକୁ ଦଳ ଅଣ୍ଟା ଭିଡ଼ିଛି । ସଂଗଠନକୁ ମଜବୁତ କରିବା ପାଇଁ ସବୁଦିନ ସମୀକ୍ଷା କରାଯାଉଛି । ଜିଲ୍ଲା ସଙ୍ଗଠନ ସହ ଆଲୋଚନା କରାଯାଇ ଦକ୍ଷ ନେତାଙ୍କୁ ଜିଲ୍ଲା ସଭାପତି କରାଯିବ ।
ଗଣତାନ୍ତ୍ରିକ ପଦ୍ଧତିରେ ଦୁଇ ଦଶନ୍ଧିରୁ ଅଧିକ ସମୟ ଧରି ବିଜେଡିର କାର୍ଯ୍ୟକ୍ରମ ଚାଲିଛି । ନୂଆ ଟମକୁ ବି ଗଣତାନ୍ତ୍ରିକ ପଦ୍ଧତିରେ ଚୟନ କରି ଦଳର ସମ୍ବିଧାନ ଅନୁସାରେ କାମ କରିବାକୁ ପ୍ରସ୍ତୁତ ହୋଇଛି ରୋଡମ୍ୟାପ ।
ରୁକୁଣା ରଥଯାତ୍ରାରେ ବଡ଼ ବିଭ୍ରାଟ: ଦୁଇ ଘଣ୍ଟା ବିଳମ୍ବରେ ହେଲା ରଥଟଣା
ଭୁବନେଶ୍ବର: ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥଯାତ୍ରାରେ ବଡ଼ ବିଭ୍ରାଟ । ରଥଟଣା ପାଇଁ ସାଢ଼େ ୩ଟା ସମୟ ସ୍ଥିର ହୋଇଥିଲେ ମଧ୍ୟ ପ୍ରାୟ ଦୁଇ ଘଣ୍ଟା ବିଳମ୍ବରେ ୫ଟା ୨୨ ମିନିଟରେ ରଥଟଣା ଆରମ୍ଭ ହୋଇଥିଲା ।
ସେହିପରି ରଥ ଉପରେ ମାତ୍ରାଧିକ ସେବାୟତ ଚଢ଼ି ଥିବାରୁ ରଥଟଣାରେ ବି ସମସ୍ୟା ଉପୁଜିଥିଲା । ଭକ୍ତ ଓ ଶ୍ରଦ୍ଧାଳୁମାନେ ଶ୍ରୀଲିଙ୍ଗରାଜଙ୍କୁ ଦର୍ଶନ ପାଇଁ ଆସିଥିବା ବେଳେ ରଥ ଉପରେ କେବଳ ସେବାୟତଙ୍କୁ ଦେଖିବାକୁ ମିଳିଥିଲା ବୋଲି ଅଭିଯୋଗ ହୋଇଛି । ଏନେଇ ଶ୍ରଦ୍ଧାଳୁମାନେ ଅସନ୍ତୋଷ ପ୍ରକାଶ କରିଛନ୍ତି । ତେଣୁ ବଢେଇବାଙ୍କ ଛକରେ ପହଞ୍ଚି ପାରିଲା ନାହିଁ ରଥ । ସୂର୍ଯ୍ୟାସ୍ତ ପରେ ରଥ ଟଣା ପାଇଁ ନୀତି ଥିବା ସତ୍ତ୍ବେ ସନ୍ଧ୍ୟା ହେବା ପରେ କିପରି ରଥ ଟଣା ହେଉଛି ବୋଲି ପ୍ରଶ୍ନ କରିଥିଲେ ଭକ୍ତ ଓ ଶ୍ରଦ୍ଧାଳୁ । ରଥଟଣାରେ ବିଳମ୍ବ ଓ ରଥ ଉପରେ ମାତ୍ରାଧିକ ସେବାୟତ ଚଢ଼ିବା ଘଟଣା ପାଇଁ ମନ୍ଦିର ପ୍ରଶାସନକୁ ଦାୟୀ କରିଛନ୍ତି ଶ୍ରଦ୍ଧାଳୁ ।
ଜୟ ନାରାୟଣଙ୍କୁ କାହିଁକି ଡରୁଛି ବିଜେପି ? ପୋଲିସ ଅଧିକାରୀଙ୍କୁ ଜାଳି ମାରିଦେବାକୁ ଧମକ ପରେ ବି କାର୍ଯ୍ୟାନୁଷ୍ଠାନ ଶୂନ
ଭୁବନେଶ୍ବର: ପୁଣି ଅଡୁଆରେ ବିଜେପି ବିଧାୟକ ଜୟନାରାୟଣ ମିଶ୍ର । ଆଇଆଇସିଙ୍କୁ ହତ୍ୟା ସହ ଥାନା ଜାଳି ଦେବାକୁ ଧମକ । ଜୟନାରାୟଣଙ୍କ ବିରୋଧରେ ଏପରି ସାଂଘାତିକ ଅଭିଯୋଗ କରିଛନ୍ତି ଖୋଦ ସମ୍ବଲପୁର ଟାଉନ ଥାନା ଆଇଆଇସି ସୁବ୍ରତ କୁମାର ମେହେର । ବିନା ଅନୁମତିରେ ଗତ ୨ ତାରିଖରେ ହୋଇଥିବା ଝଣ୍ଡା ଯାତ୍ରା ସମୟରେ ଗିରଫଦାରୀକୁ ନେଇ ଜୟନାରାୟଣ କ୍ଷୁବ୍ଧ ହୋଇ ଥାନା ଅଧିକାରୀଙ୍କୁ ଏପରି ଧମକ ଦେଇଛନ୍ତି । ବିରୋଧୀଙ୍କ ପ୍ରଶ୍ନ, ନିୟମିତ ଆଇନ ଉଲ୍ଲଂଘନକାରୀ ଜୟନାରାୟଣଙ୍କ ବିରୋଧରେ କାର୍ଯ୍ୟାନୁଷ୍ଠାନ କେବେ ? ହେଲେ ଆଇନ ମନ୍ତ୍ରୀ ଏ ସମ୍ପର୍କୀତ ପ୍ରଶ୍ନକୁ ଏଡାଇଯାଇ କହିଛନ୍ତି, ଦଳ ଏ ବାବଦରେ ନିଷ୍ପତ୍ତି ନେବ ।
ଥାନା ପୋଡି ଦେବି । ବନ୍ଧୁକ ଧରିକି ବାହାରିବି ଆଉ ସମସ୍ତଙ୍କୁ ମାରି ଦେବି । ଥାନା ଅଧିକାରୀଙ୍କୁ ଏଭଳି ଧମକ ଦେଇଛନ୍ତି ସମ୍ବଲପୁର ବିଜେପି ବିଧାୟକ ଜୟନାରାୟଣ ମିଶ୍ର । ଆଇନ ଶୃଙ୍ଖଳା ସୁରକ୍ଷାର ଦ୍ବାହି ଦେଉଥିବା ବିଜେପି ସରକାରର ଜଣେ ବରିଷ୍ଠ ବିଧାୟକ ଥାନା ଅଧିକାରୀଙ୍କୁ ଅଶ୍ରାବ୍ୟ ଭାଷାରେ ଏଭଳି ଧମକ ଦେଉଛନ୍ତି । ଗତକାଲିଠାରୁ ଖୋଦ ସମ୍ବଲପୁର ଟାଉନ ଥାନା ଆଇଆଇସି ଏନେଇ ଅଭିଯୋଗ କରିଥିଲେ ବି ସରକାର ନୀରବ । କେତେବେଳେ ରାଜ୍ୟ ସଙ୍ଗୀତ ବନ୍ଦେ ଉତ୍କଳ ଜନନୀକୁ ଅବମାନନା ତ କେତେବେଳେ ବିଧାନସଭା ଭିତରେ କଂଗ୍ରେସ ବିଧାୟକଙ୍କୁ ଆକ୍ରମଣ ଅଭିଯୋଗ । ଏବେ ପୁଣି ଆଇଆଇସିଙ୍କୁ ଜୀବନରୁ ମାରିଦେବାକୁ ଧମକ । ବାରମ୍ବାର ଜୟନାରାୟଣଙ୍କ ବିରୋଧରେ ସଙ୍ଗୀନ ଅଭିଯୋଗ ଆସୁଥିଲେ ବି ସରକାର କାହିଁକି କାର୍ଯ୍ୟାନୁଷ୍ଠାନ ନେଉନାହାଁନ୍ତି ବୋଲି ପ୍ରଶ୍ନ କରିଛନ୍ତି ।
କଂଗ୍ରେସ ଆନ୍ଦୋଳନ ବେଳେ ନାଲି ଆଖି ଦେଖାଇଥିବା ପୋଲିସ ଡିଜି ବିଜେପି ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବେ କି ବୋଲି ପ୍ରଶ୍ନ କରିଛନ୍ତି ବରିଷ୍ଠ କଂଗ୍ରେସ ନେତା ଜୟଦେବ ଜେନା । ବିଜେଡି ମଧ୍ୟ ଜୟନାରାୟଣଙ୍କ ଆଚରଣକୁ ନେଇ କଡା ସମାଲୋଚନା କରିଛି ।
ଗତ ୨ ତାରିଖରେ ଦଳେଇପଡାରୁ ବାହାରିଥିଲା ଝଣ୍ଡା ଯାତ୍ରା । ଏହି ଯାତ୍ରା କୁଞ୍ଜେଲପଡା ଦେଇ ପୀରବାବା ଛକ ପର୍ଯ୍ୟନ୍ତ ଯାଇଥିଲା । କିନ୍ତୁ ଏନେଇ ପୂର୍ବରୁ କୌଣସି ଅନୁମତି ନିଆଯାଇ ନଥିଲା । ଯାତ୍ରାରେ ଖୋଲାଖୋଲି ଖଣ୍ଡା ବୁଲାଇଥିଲେ କିଛି ଲୋକ । ସଂସ୍କୃତି ଓ ପରମ୍ପରା ନାଁରେ ବେଆଇନ ଭାବେ ଖଣ୍ଡା ବୁଲାଉଥିବାରୁ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଥିଲା । ଆଶିଷ ବାବୁ, ଅନୁପ ଲତା, ପ୍ରମୋଦ ଚାନ୍ଦ ଓ ଅନ୍ୟମାନେ ଏହି ଯାତ୍ରାର ଆୟୋଜନ କରିଥିଲେ । ଏନେଇ ସବଇନ୍ସପେକ୍ଟର ଆଶିଷ କୁମାର ପ୍ରଧାନଙ୍କ ରିପୋର୍ଟ ଆଧାରରେ ଏକ ମାମଲା ରୁଜୁ ହେବା ସହ ଦୁଇଟି ଖଣ୍ଡା ଜବତ ହୋଇଥିଲା । ଏହି ମାମଲାକୁ ନେଇ ବିଧାୟକ ଜୟନାରାୟଣ ମିଶ୍ର କ୍ଷୁବ୍ଧ ହୋଇ ତାଙ୍କୁ ଜୀବନରୁ ମାରି ଦେବାକୁ ଧମକ ଦେଇଥିବା ଅଭିଯୋଗ କରିଛନ୍ତି ଟାଉନ ଥାନା ଆଇଆଇସି । ସେପଟେ ସରକାର ଓ ଦଳ କିନ୍ତୁ ଜୟନାରାୟଣଙ୍କ ବିରୋଧରେ ଆକ୍ସନ ନେଉନାହାଁନ୍ତି ।
ଗତକାଲି ଖୋଦ ପୋଲିସ ଡିଜି କାର୍ଯ୍ୟାନୁଷ୍ଠାନ ହେବ ବୋଲି କହିଥିଲେ । କିନ୍ତୁ ୪୮ ଘଣ୍ଟା ପରେ ବି ହାତବାନ୍ଧି ବସିଛି ପୋଲିସ । ରାଜ୍ୟ ସଙ୍ଗୀତକୁ ଅବମାନନା ପ୍ରସଙ୍ଗରେ ବି ବିଜେପି ସରକାର ନୀରବ ଥିଲେ । ଏବେ ବି ଆଇନ ଶୃଙ୍ଖଳାର ଉତ୍ତର ଦାୟିତ୍ବ ନେଉଥିବା ସରକାର ଜୟନାରୟଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉନାହାଁନ୍ତି । ବରଂ ଆଇନଗତ କାର୍ଯ୍ୟାନୁଷ୍ଠାନ ବଦଳରେ ଆଇନ ମନ୍ତ୍ରୀ କହୁଛନ୍ତି ଦଳ ନିଷ୍ପତ୍ତି ନେବ ।
ଆଇଆଇସିଙ୍କୁ ମାରି ଦେବାକୁ ଧମକ ଦେବା ଓ ତାଙ୍କ ନାଁରେ ମାମଲା ହେବା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେପି ବିଧାୟକ ଜୟନାରାୟଣ ମିଶ୍ର । ପୋଲିସ ତାଙ୍କୁ ଏନେଇ ଏପର୍ଯ୍ୟନ୍ତ ଯୋଗାଯୋଗ କରିନାହିଁ ବୋଲି ସେ କହିଛନ୍ତି । ତେବେ ଝଣ୍ଡା ଯାତ୍ରାରେ ଖଣ୍ଡା ବୁଲାଇବା ଆମ ପରମ୍ପରା ବୋଲି ସେ ଯୁକ୍ତି ବାଢିଛନ୍ତି । ଦଶହରାରେ ଆମର ଅସ୍ତ୍ର ପୂଜା ହୋଇଥାଏ ବୋଲି ସେ କହିଛନ୍ତି ।
୬୫ ଡଲାରକୁ ଖସିଲାଣି ଅଶୌଧିତ ତେଲ ଦର: କେତେଦିନ ଲୋକଙ୍କ ପକେଟ କାଟି ଟ୍ରେଜେରୀ ଭରିବ ?
ନନ୍ଦିଘୋଷ ବ୍ୟୁରୋ: ଅଶୋଧିତ ତୈଳ ବ୍ୟାରେଲ ପିଛା କମି ହେଲାଣି ୬୫ ଆମେରିକୀୟ ଡଲାର । ହେଲେ କମିବାର ନାଁ ନେଉନି ଖୁଚୁରା ପେଟ୍ରୋଲ ଓ ଡିଜେଲ ଦର । ଦେଶର ଖାଉଟି କେତେ ଦିନ ମହଙ୍ଗା ଦରରେ କିଣିବେ ଇନ୍ଧନ ? କାହାକୁ ଅପେକ୍ଷା କରିଛନ୍ତି କେନ୍ଦ୍ର ସରକାର ? କାହିଁକି ପୁନଃପ୍ରଚଳନ ହେଉନି ଡାଇନାମିକ ପ୍ରାଇସ ମେକାନିଜିମ୍ । ସାଧାରଣ ଗ୍ରାହକ ମନରେ ବାରମ୍ବାର ଉଙ୍କି ମାରୁଛି ଏସବୁ ପ୍ରଶ୍ନ । ସେପଟେ ଖୋଦ ପେଟ୍ରୋଲିୟମ୍ ଡିଲର୍ସ ଆସୋସିଏସନ ବି କହିଛି ରାଷ୍ଟ୍ରାୟତ୍ତ ତୈଳ କମ୍ପାନୀ ଲକ୍ଷାଧିକ କୋଟି ଲାଭ କଲେଣି । ଏବେ ସମୟ ଆସିଛି ୨୦୨୨ରୁ ବନ୍ଦ ଥିବା ଡାଇନାମିକ ପ୍ରାଇସ ମେକାନିଜିମ ପୁନଃ ଚାଲୁ କରିବାକୁ । ସେପଟେ ଯଦି ରାଜ୍ୟ ସରକାର ଭାଟ ହ୍ରାସ କରନ୍ତେ ଓଡ଼ିଶାରେ ପେଟ୍ରୋଲ ଡିଜେଲ ଦର ଟିକେ କମନ୍ତା ।
୭୦ ଡଲାରରୁ ଖସି ଅଶୋଧିତ ବ୍ୟାରେଲ ଏବେ ୬୫ ଡଲାର ହେଲାଣି । ତଥାପି ଲୋକଙ୍କୁ ଟିକେ ଆଶ୍ବସ୍ତ କରିବାକୁ କେନ୍ଦ୍ର ସରକାର ଚାହୁଁନାହାନ୍ତି । ଆଚ୍ଛେଦିନ କେବେ ଆସିବ ? ଏ ପ୍ରଶ୍ନ ଏବେ ସାଧାରଣ ଲୋକଙ୍କ ମନରେ ଉଠିବାରେ ଲାଗିଛଇ । ଅଶୋଧିତ ତୈଳ ଦର କମିଲେ ଖୁଚୁରା ଦର କମିବ । ବଢିଲେ ଖୁଚୁରା ଦର ବଢିବ । ଏ ନେଇ ୨୦୧୭ରେ କେନ୍ଦ୍ର ସରକାର ପ୍ରଣୟନ କରିଥିଲେ ଡାଇନାମିକ ପ୍ରାଇସ ମେକାନିଜିମ୍ । କୋଭିଡ ଆଳରେ ଏପ୍ରିଲ ୨୦୨୨ରେ ଏହି ବ୍ୟବସ୍ଥାକୁ ଅକାମୀ କରି ଦେଲେ କେନ୍ଦ୍ର ସରକାର । ଲଗାତାର ଅଶୋଧିତ ତୈଳ ଦର ଅନ୍ତରାଷ୍ଟ୍ରୀୟ ବଜାରରେ ଖସିବା ଫଳରେ ରାଷ୍ଟ୍ରାୟତ୍ତ ତୈଳ କମ୍ପାନୀ ଓ କେନ୍ଦ୍ର ସରକାର ଲକ୍ଷାଧିକ କୋଟି ଲାଭ କଲେଣି । କାହିଁକି ଡାଇନାମିକ ପ୍ରାଇସ ମେକାନିଜିମ ବ୍ୟବସ୍ଥା ପୁଣି ଥରେ ଚାଲୁ କରୁନାହନ୍ତି ? ଅନ୍ତତଃ ଲୋକେ ସଙ୍ଗେ ସଙ୍ଗେ ଅନ୍ତରାଷ୍ଟ୍ରୀୟ ବଜାରର ଲାଭ ତ ପାଇପାରନ୍ତେ ।
ରାଜ୍ୟରେ ଏବେ ବିଜେପି ସରକାର । ଏବର ମୁଖ୍ୟମନ୍ତ୍ରୀ ମୋହନ ମାଝୀ ବିରୋଧୀ ଭୂମିକାରେ ଥିବାବେଳେ ତତ୍କାଳୀନ ନବୀନ ସରକାରଙ୍କୁ ଭାଟ୍ ହ୍ରାସ ନେଇ ବିଧାନସଭା ଭିତରେ ଓ ବାହାରେ ରଡ଼ି ଛାଡ଼ୁଥିଲେ । ଏବେ କ’ଣ ହୋଇଛି ନିଜେ ଶାସନର ମୁଖ୍ୟ ହୋଇ କାହିଁକି ଭାଟ୍ ହ୍ରାସ କରୁନାହାନ୍ତି ବୋଲି ପ୍ରଶ୍ନ କରିଛନ୍ତି ଗ୍ରାହକ ।
ଖୋଦ ପେଟ୍ରୋଲିୟମ ଡିଲର୍ସ ଆସୋସିଏସନ୍ ବି ଲୋକଙ୍କୁ ମହଙ୍ଗା ଦରରୁ ଆଶ୍ବସ୍ତ କରିବା ସପକ୍ଷରେ ଯୁକ୍ତି ବାଢିଛି । କହିଛି, ଏବେ ସମୟ ଆସିଛି ପୁଣି ଥରେ ଡାଇନାମିକ ପ୍ରାଇସ ମେକାନିଜିମ୍ ଚାଲୁ କଲେ ଲୋକେ ଶସ୍ତାରେ ପେଟ୍ରୋଲ ଡିଜେଲ ପାଇପାରନ୍ତେ । କିନ୍ତୁ ଯାହା ଜଣାପଡ଼ୁଛି ଏବେ ହଠାତ କେନ୍ଦ୍ର ସରକାର ଦର କମାଇବେନି । ମୁଖ୍ୟତଃ ତିନୋଟି କାରଣ ପାଇଁ ଅଶୋଧିତ ତୈଳ ଦର ଏତେ ତଳକୁ କମିଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ ଘୋଷଣା ପରଠୁ ଅନ୍ତରାଷ୍ଟ୍ରୀୟ ତୈଳ ବଜାରରେ ଅସ୍ଥିରତା ସୃଷ୍ଟି ହୋଇଛି । ଗତ ୩ ତାରିଖରେ ତୈଳ ଉତ୍ପାଦନକାରୀ ରାଷ୍ଟ୍ର ସମୂହ ଓପେକ୍ ସ୍ଥିର କରିଛି ଆସନ୍ତା ମେ’ ମାସରୁ ଦୈନିକ ଅତିରିକ୍ତ ୪ ଲକ୍ଷ ୧୧ ହଜାର ବ୍ୟାରେଲ ଅଶୋଧିତ ତୈଳ ଉତ୍ପାଦନ କରିବ । ଏଥିପାଇଁ ବଜାର ଆବଶ୍ୟକ । ଆମେରିକା ବି ଅଶୋଧିତ ତୈଳ ରପ୍ତାନୀ କରୁଛି । କିନ୍ତୁ ଆମେରିକାର ଟାରିଫର ଜବାବ ଅନ୍ୟ ରାଷ୍ଟ୍ର ଦେବାକୁ ନିଷ୍ପତ୍ତି ନେଇଥିବାରୁ ଆମେରିକା ତୈଳ କେହି କିଣି ନପାରନ୍ତି । ଏଭଳି ସ୍ଥିତିରେ ଭାରତ ସମେତ ଅନ୍ୟରାଷ୍ଟ୍ର ଓପେକ୍ ରାଷ୍ଟ୍ର ସମୂହ ଯଦି ବିକଳ୍ପ ଭାବେ ବାଛନ୍ତି, ତା’ହେଲେ ବେଶୀ ଲାଭବାନ ହେବେ ।
ଏମିତି ବି ଅନ୍ୟ ରାଜ୍ୟ ତୁଳନାରେ ଓଡ଼ିଶାରେ ସବୁ ଦର ମହଙ୍ଗା । ରାଜ୍ୟ ସରକାର ପେଟ୍ରୋଲ ଲିଟର ପିଛା ଭାଟ ୨୧ ଟଙ୍କା ୩୮ ପଇସା ଓ ଡିଜେଲ ଲିଟର ପିଛା ୧୭ ଟଙ୍କା ୫୧ ପଇସା ନେଉଛନ୍ତି । ଯଦି ଲୋକଙ୍କ ମଙ୍ଗଳ ପାଇଁ ମୁଖ୍ୟମନ୍ତ୍ରୀ ମୋହନ ମାଝୀ ଭାଟ ଟିକସକୁ ହ୍ରାସ କରନ୍ତେ ତା’ହେଲେ ରାଜ୍ୟର ଲୋକଙ୍କ ପାଇଁ ପେଟ୍ରୋଲ ଡିଜେଲ ଖୁଚୁରା ଦର ଟିକେ କମିଯାଆନ୍ତା । ହେଲେ ଉଭୟ କେନ୍ଦ୍ର ଓ ରାଜ୍ୟ ସରକାର ନିଜ ଟ୍ରେଜେରୀ ଭରିବା ଲୋଭ ଛାଡ଼ିଲେ ତ ?
ସରକାର ଶୁଣିଲେଣି: ନିଜ ଉଦ୍ୟମରେ ଗାଁକୁ ଝରଣା ପାଣି ନେଇ ଆସିଲେ ଗାଁ ଲୋକେ
ଗଞ୍ଜାମ: ସରକାର ଶୁଣିଲେନି, ଲୋକେ ନିଜେ ଗାଁକୁ ଆଣିଲେ ଝରଣା ପାଣି । ଶେଷରେ ନିଜସ୍ଵ ଉଦ୍ୟମରେ ଗାଁରେ ଲାଗି ରହିଥିବା ପାନୀୟ ଜଳ ସମସ୍ୟାର କଲେ ସାମାଧାନ । ଗଞ୍ଜାମ ଜିଲ୍ଲା ଧରାକୋଟ ବ୍ଳକ ସାଆବା ପଞ୍ଚାୟତର ଉପାନ୍ତ ଶାଗ କିଆରୀ ଗାଁ ଲୋକେ ଚାନ୍ଦା ଦେବା ସହ ପାଳି କରି ଶ୍ରମଦାନ କରି ଗାଁକୁ ପାଣି ଆଣିଛନ୍ତି । ଗାଁଠାରୁ ପ୍ରାୟ ତିନି କିମି ଦୂରରେ ଥିବା ପାହାଡ଼ି ଝରଣାରୁ ପାଇପ ପକାଇ ଗାଁକୁ ଆଣିଛନ୍ତି ପିଇବା ପାଣି ।
ଗଞ୍ଜାମ ଜିଲ୍ଲା ଧରାକୋଟ ବ୍ଲକ ସାଆବା ପଞ୍ଚାୟତର ଉପାନ୍ତ ଶାଗ କିଆରୀ ଗାଁରେ ୨୫ରୁ ଅଧିକ ପରିବାର ବସବାସ କରନ୍ତି । ମୌଳିକ ସୁବିଧାରୁ ବଞ୍ଚିତ ଏହି ଗାଁର ଲୋକେ ଦୀର୍ଘ ଦିନ ହେବ ପାନୀୟ ଜଳ ସମସ୍ୟା ଭୋଗୁଥିଲେ । ଖରାଦିନ ଆସିଲେ ଗାଁର ଏକମାତ୍ର ନଳକୂପରୁ ପାଣି ବାହାରିବା ବନ୍ଦ ହୋଇଯାଏ । ଲୋକେ ବାଧ୍ୟହୋଇ ୩ କିମି ପାହାଡ଼ିଆ ରାସ୍ତାରେ ଚାଲିଚାଲି ଯାଇ ଝରଣାରୁ ଗରା ମାଠିଆରେ ପାଣି ମୁଣ୍ଡେଇ ଆଣନ୍ତି । ପାନୀୟ ଜଳ ସମସ୍ୟାର ସମାଧାନ ପାଇଁ ପଞ୍ଚାୟତଠୁ ଆରମ୍ଭ କରି ବିଡିଓଙ୍କୁ ଗୁହାରୀ ଜଣାଇଥିଲେ ମଧ୍ୟ କୌଣସି ସମାଧାନ ହୋଇପାରିଲାନାହିଁ । ବାଧ୍ୟ ହୋଇ ଲୋକେ ଚାନ୍ଦା ଦେବା ସହିତ ଶ୍ରମଦାନ କରି ଗାଁଠାରୁ ପ୍ରାୟ ତିନି କିମି ଦୂର ପାହାଡ଼ି ଝରଣାରୁ ପାଇପ ପକାଇ ଗାଁକୁ ପାଣି ଆଣିଛନ୍ତି ।
ଏତେ ଉଦ୍ୟମ ପରେ ମଧ୍ୟ ଅଧିକ ଖରା ହେଲେ ଝରଣା ପାଣି ଶୁଖି ଯାଉଥିବାରୁ ବିଛା ଯାଇଥିବା ପାଇପ ମଧ୍ୟରୁ ଗୋଟିଏ ପାଇପରେ ପାଣି ଆସିବା ବନ୍ଦ ହୋଇଯାଇଛି । ଯେଉଁ ଗୋଟିଏ ପାଇପରେ ପାଣି ବାହାରୁଛି ତାହା ମଧ୍ୟ ଅଭାବ ପଡୁଛି । ପାନୀୟ ଜଳକୁ ପିଇବା ଓ ରୋଷେଇରେ ବ୍ୟବହାର କରୁଥିବା ବେଳେ ଲୋକେ ନଗାଧୋଇ ଅନେକ ଦିନ ରହିଯାଉଛନ୍ତି । ଶାଗକିଆରୀ ଗାଁକୁ ରାସ୍ତା ନିର୍ମାଣ ହୋଇଥିବା ବେଳେ ସୋଲାର ମାଧ୍ୟମରେ ପାନୀୟ ଜଳ ଯୋଗାଇ ଦେବାକୁ ବ୍ୟବସ୍ଥା କରାଯିବ ବୋଲି କହିଛନ୍ତି ବିଡିଓ ।
ନିଜସ୍ଵ ଉଦ୍ୟମରେ ପାନୀୟ ଜଳ ବ୍ୟବସ୍ଥା କରିଥିବା ଗ୍ରାମବାସୀଙ୍କ କିଛି ମାତ୍ରାରେ ପାନୀୟ ଜଳ ସମସ୍ୟା ଦୂର ହୋଇଛି । ତେବେ କେବେ ପ୍ରଶାସନ ପଦକ୍ଷେପ ନେଇ ଧରାକୋଟ ବ୍ଳକର ଉପାନ୍ତ ଶାଗକିଆରୀ ଗାଁର ପାନୀୟ ଜଳ ସମସ୍ୟାର ସମାଧାନ କରୁଛି ତାହା ଉପରେ ରହିଛି ନଜର ।