ନନ୍ଦିଘୋଷ ବ୍ୟୁରୋ : ପୁରୀ ସ୍ୱର୍ଗଦ୍ୱାର ଅଞ୍ଚଳରେ ଥିବା ଏକ ରେସ୍ତୋରାଁ କର୍ମଚାରୀଙ୍କ ବର୍ବରତା ନଜରକୁ ଆସିଛି । ନିମ୍ନ ମାନର ଓ ଅସ୍ୱାସ୍ଥ୍ୟକର ଖାଦ୍ୟ ବିରୋଧରେ ପ୍ରତିବାଦ କରିବାରୁ ଗର୍ଭବତୀ ପର୍ଯ୍ୟଟକଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି । ଏହି ଘଟଣା ପରେ ଜୀବନରେ କେବେ ପୁରୀ ଆସିବେନି ବୋଲି କାନ୍ଦି କାନ୍ଦି କହିଛନ୍ତି ମହିଳା ଜଣକ । ଗର୍ଭବତୀ ଜାଣିବି ରେସ୍ତୋରାଁ ସଟର ବନ୍ଦ କରି ମହିଳା ଓ ତାଙ୍କ ସ୍ୱାମୀଙ୍କୁ ମାଡ ମାରିଥିବା ଅଭିଯୋଗ ହୋଇଛି । ଉଭୟଙ୍କ ଗାଲ, କାନ ଓ ଏକାଧିକ ସ୍ଥାନରେ ହୋଇଛି କ୍ଷତ । ମହୀଶୂରରୁ ଆସିଥିବା ସୁସ୍ମିତା ଓ ତାଙ୍କ ପରିବାର ଓ ସମ୍ପର୍କୀୟ ମିଶି ପ୍ରାୟ ୧୩ ଜଣ ପୁରୀ ସ୍ୱର୍ଗଦ୍ୱାର ଅଞ୍ଚଳର ଏକ ହୋଟେଲକୁ ଖାଇବାକୁ ଯାଇଥିଲେ । ସେଠାରେ ଖାଦ୍ୟରେ ଚୁଟି ବାହାରିବାକୁ ନେଇ ରେସ୍ତୋରାଁ କର୍ମଚାରୀଙ୍କୁ ଅଭିଯୋଗ କରିଥିଲେ । ବଦଳରେ ଖାଇବା ପରଷିବା ଜାଗାରେ ଓଲଟା ଟଙ୍କା ଦେଲେ ଆଉ ଖାଦ୍ୟ ପରସିବେ ବୋଲି ଜିଦି ଧରିଥିଲେ ରେସ୍ତୋରାଁ କର୍ମଚାରୀ । ମହିଳା ଜଣଙ୍କ ଖାଇବା ଦେବା ପରେ ଟଙ୍କା ଦେବାକୁ ହୋଟେଲ କର୍ମଚାରୀଙ୍କୁ ଅନୁରୋଧ କରିଥିଲେ । ହେଲେ ସେଥିପ୍ରତି କର୍ଣ୍ଣପାତ ନକରି ଖାଇବା ଦେବା ପୂର୍ବରୁ ଟଙ୍କା ନେବା ପାଇଁ ହୋଟେଲ କର୍ମଚାରୀ ଜିଦ୍ ଧରିଥିଲେ ବୋଲି ମହିଳା ଜଣଙ୍କ ଅଭିଯୋଗ କରିଛନ୍ତି । ପରେ ପ୍ରତିବାଦରେ ମହିଳା ଜଣଙ୍କ ଭିଡିଓ କରିଥିଲେ । ଏଥିରେ ହୋଟେଲ କର୍ମଚାରୀ ଉତକ୍ଷିପ୍ତ ହୋଇ ହୋଟେଲର ସଟର ବନ୍ଦକରି ମହିଳା ଓ ତାଙ୍କ ସ୍ୱାମୀଙ୍କୁ ମାଡ ମାରିଥିବା ସେ ଅଭିଯୋଗ କରିଛନ୍ତି । ପୁରୀ ସଦର ମୁଖ୍ୟ ଚିକିତ୍ସାଳୟରେ ସେ ଚିକିତ୍ସିତ ହେଉଥିବା ବେଳେ ତାଙ୍କ ଗାଲ,ଓ ଏକାଧିକ ସ୍ଥାନରେ ଆଘାତ ଲାଗିଥିଲା ।…
ଅନଲାଇନ ସାଇଟରେ ମିଳୁଛି ଜାଲ ନୋଟ । ଫଟୋ ସପ୍ ସଫ୍ଟୱେରରେ ଅବିକଳ ଜାଲ ନୋଟ
ନନ୍ଦିଘୋଷ ବ୍ୟୁରୋ : ଅନଲାଇନ ସାଇଟରେ ମିଳୁଛି ଜାଲ ନୋଟ । ଫଟୋ ସପ୍ ସଫ୍ଟୱେରରେ ଅବିକଳ ଜାଲ ନୋଟ । ସୋନପୁର, ବଲାଙ୍ଗୀର ପରେ ଏବେ ବରଗଡ଼ରେ ଚାଲାଣ । ଖିଅ ଖୋଜିବାକୁ ଅଣ୍ଟା ଭିଡୁଛି ଓଡ଼ିଶାର ସ୍ପେଶାଲ ଟିମ । ….ଚକ୍ ଚକ୍ କରୁଥିବା ଏ ନୋଟ ବଣ୍ଡଲ୍ ଉପରେ ନଜର ପକାନ୍ତୁ । ୫ ଶହ ଟଙ୍କିଆ ସାଙ୍ଗକୁ ୨ ଶହ ଓ ଶହେ ଟଙ୍କିଆ । ଦେଖିବାକୁ ଅସଲି ଲାଗୁଥିଲେ ମଧ୍ୟ ଏସବୁ ପୁରା ନକଲି । ଅନଲାଇନ ସାଇଟରେ ଗାଡି ବିକ୍ରି କରିବାକୁ ଯାଇ ଠକେଇରୁ ଅଳ୍ପକେ ବର୍ତ୍ତିଛନ୍ତି ଗାଡି ମାଲିକ । ଘଟଣା ଟି ଘଟିଛି ବରଗଡ଼ ଜିଲ୍ଲାରେ । ପୋଲିସ ତଦନ୍ତ କରିବା ବେଳେ ୪୫ ହଜାର ଟଙ୍କାର ନକଲି ନୋଟ ଜବତ ସହ ଜଣେ ନାବାଳକଙ୍କୁ କାବୁ କରିଛି । ପଚରାଉଚରା ବେଳେ ସେ ଅନଲାଇନ ସପିଂ ସାଇଟରୁ ଏହି ନକଲି ନୋଟ ମଗେଇଥିବା ସଫେଇ ଦେଇଛି । ଯେଉଁ କଥା ପୋଲିସ ପାଇଁ ମୁଣ୍ଡବିନ୍ଧାର କାରଣ ପାଲଟିଛି । ସେପଟେ କିଂଗପିନ ପଶ୍ଚିମବଙ୍ଗ ରେ ରହିବା ସହ ଏସବୁର କାରବାର କରୁଥିବା ନେଇ ବିଶ୍ୱସ୍ତ ସୂତ୍ରରୁ ଜାଣିବାକୁ ମିଳିଛି ।
ଆଗକୁ ଦଶହରା । ପାର୍ବଣ ଋତୁରେ ଏହି ଜାଲ ନୋଟର କାରବାର ବଢିବାର ସମ୍ଭାବନା ରହିଛି ।କେବଳ ରାଜ୍ୟ ନୁହେଁ, ଜାତୀୟ ସ୍ତରରେ ମଧ୍ୟ ନକଲି ନୋଟ କାରବାର ଅଧିକ ଉଦ୍ବେଗଜନକ ରହିଛି । ବର୍ଷକରେ ଜାଲ ନୋଟ କାରବାର ୨ ଶହ ପ୍ରତିଶତ ବଢିଥିବା ବେଳେ ୫ଶହ ଟଙ୍କିଆ ନୋଟକୁ ବିଶେଷ ଭାବେ ନକଲ କରାଯାଇପାରୁଛି । ୨୦୧୬ ନୋଟବନ୍ଦୀ ପରେ ଏହି କାରବାର ବିଶେଷ ଭାବେ ବଢୁଥିବା ଦେଖାଆଯାଇଛି । ଏନସିଆରବି ରେ ପ୍ରକାଶିତ ରେକର୍ଡ ଆରବିଆଇର ଚିନ୍ତା ବଢ଼ାଇଥିବା ବେଳେ ଦେଶର ସୁରକ୍ଷା ପ୍ରତି ସୃଷ୍ଟି କରିଛି ବଡ଼ ପ୍ରଶ୍ନବାଚୀ । ଏଣୁ ଏଭଳି ବିପଦକୁ ରୋକିବା ପାଇଁ ସ୍ଥଳ ଓ ଜଳପଥ ମାନଙ୍କରେ ଆଗାମୀ ଦିନରେ କଡା ଚେକିଂ କରାଯିବାର ଆବଶ୍ୟକତା ରହିଛି। …
ନକଲି ନୋଟ କେସରେ ଅଭିଯୁକ୍ତଙ୍କ ବିରୋଧରେ ଦେଶଦ୍ରୋହ ଭଳି ଦଫା ଲାଗୁଛି । କେତେକ କେସରେ ପୂର୍ବରୁ NIA ର ସହଯୋଗ ମଧ୍ୟ ନିଆଯାଇଛି । ତଥାପି ମାଷ୍ଟରମାଇଣ୍ଡ ପାଖରେ ନପହଞ୍ଚିବାରୁ ବଢୁଛି ମୁଣ୍ଡବିନ୍ଧା।
ଅସୁରକ୍ଷିତ ସ୍କୁଲ କୋଠା ବନ୍ଦ, ଅଙ୍ଗନବାଡ଼ିର୨ ରୁମରେ ପିଲାଙ୍କ ପାଠପଢ଼ା
ନନ୍ଦିଘୋଷ ବ୍ୟୁରୋ : ଅସୁରକ୍ଷିତ ବିଦ୍ୟାଳୟ କୋଠା ଘୋଷଣା କଲେ । ନୂଆ କୋଠା ନିର୍ମାଣ ପାଇଁ ପ୍ରତିଶୃତି ଦେଲେ । ପୂରାତନ ବିଲଡିଂରୁ ଛାତ୍ରଛାତ୍ରୀଙ୍କୁ ଉଠାଇ ଆଣି ଅନ୍ୟଠି ଶିକ୍ଷାଦାନ ପାଇ ବ୍ୟବସ୍ଥା କଲା ପ୍ରଶାସନ । ହେଲେ ଶତାଧିକ ପିଲାଙ୍କ ପାଇଁ ମାତ୍ର ଦୁଇଠି କୋଠରୀ । ଯାହା ଶିକ୍ଷା ଦାନରେ ବି ଶିକ୍ଷାଗ୍ରହଣରେ ବି ସମସ୍ୟା ସୃଷ୍ଟି କରିଛି । ଏଭଳି ସମସ୍ୟା ସମ୍ମୁଖୀନ ହେଉଛନ୍ତି କଟକ ଉତ୍କଳମଣୀ ସ୍ମାରକୀ ବିଦ୍ୟାପୀଠ, ଖାନନଗର ସରକାରୀ ଉପ୍ରା ବିଦ୍ୟାଳୟର ଛାତ୍ରଛାତ୍ରୀ । କଟକ ଖାନନଗରରେ 1962 ମସିହାର ସ୍ଥାପିତ ହୋଇଥିଲା ଏହି ଦୁଇଟି ସ୍କୁଲ । ଏଠାରେ ପ୍ରଥମରୁ ସପ୍ତମ ପର୍ଯ୍ୟନ୍ତ ଶତାଧିକ ଛାତ୍ରଛାତ୍ରୀ ପଢିଥାନ୍ତି । ତେବେ ସାତ ମାସ ତଳେ ମୂଳ ବିଲଡିଂର ଛାତରୁ କଂକ୍ରିଟ ଖସିବା ଓ କାନ୍ଥ ଖରାପ ହୋଇ ଯିବା କାରଣରୁ ସ୍କୁଲ ବିଲଡିଂକୁ ବିପଦସଂକୁଳ ଘୋଷଣା କରାଯାଇ ବନ୍ଦ କରି ଦିଆଯାଇଥିଲା। ପରେ ବିକଳ୍ପ ଭାବେ ସାମନାରେ ଥିବା ଅଙ୍ଗନବାଡି କେନ୍ଦ୍ର ଉପର ମହଲାର ୱାର୍ଡ ଅଫିସରେ ସ୍କୁଲ ଚାଲିଛି । ହେଲେ ସାତ ମାସ ହେଲା ସାତଟି ଶ୍ରେଣୀର ଶହେରୁ ଅଧିକ ଛାତ୍ରଛାତ୍ରୀ ଦୁଇଟି ଘରେ ବସି ପଢୁଛନ୍ତି । କୌଣସି ମୌଳିକ ସୁବିଧା ନଥିବାରୁ ସମସ୍ୟାର ସମ୍ମୁଖୀନ ହେଉଛନ୍ତି ଛାତ୍ରଛାତ୍ରୀ । …
ଏ ନେଇ ବାରମ୍ବାର ଜିଲ୍ଲା ପ୍ରଶାସନ, ଗଣ ଶିକ୍ଷାବିଭାଗ ପାଖରେ ଗୁହାରି ହେବା ପରେ କିଛି ସୁଫଳ ମିଳି ନଥିଲା। ଏବେ ଧୀରେ ଧୀରେ ଅସନ୍ତୋଷ ଦାନା ବାନ୍ଧିବା ପରେ ସ୍କୁଲ ଖାଲି କରିବାକୁ ଏକ ଚିଠି ଆସିଛି । ତେବେ ନୂଆ ବିଲଡିଂ କାମ ଆରମ୍ଭ ହୋଇ କେବେ ସରିବ ବୋଲି ପ୍ରଶ୍ନ ଉଠିଛି । …
ପୂର୍ବ ସରକାର ପ୍ରାଥମିକ ଶିକ୍ଷାଠାରୁ କଲେଜ ପର୍ଯ୍ୟନ୍ତ ସବୁ ବର୍ଗର ଶିକ୍ଷାନୁଷ୍ଠାନ ଓ ଛାତ୍ରଛାତ୍ରୀଙ୍କ ପାଇଁ ଉନ୍ନତ୍ତମାନର ଶିକ୍ଷା ବ୍ୟବସ୍ଥା କରିଥିଲେ । ହେଲେ ସରକାର ବଦଳିବା ପରେ ସବୁ ବ୍ୟବସ୍ଥା ଶିଥିଳ ପଡିଯାଇଥିବା ପରି ମନେ ହେଉଛି । …
ଅବହେଳିତ ଅବସ୍ଥାରେ ରାଉରକେଲା ସରକାରୀ ଡାକ୍ତରଖାନା। ନାହାନ୍ତି ଆବଶ୍ୟକ ପରିମାଣର ଡାକ୍ତର
ନନ୍ଦିଘୋଷ ବ୍ୟୁରୋ : ନାହିଁ ନାହିଁରେ ଚାଲିଛି ରାଉରକେଲା ସରକାରୀ ଡାକ୍ତରଖାନା । ନା ଅଛନ୍ତି ଆବଶ୍ୟକ ଡାକ୍ତର, ନା ଅଛନ୍ତି ନର୍ସ ଓ କର୍ମଚାରୀ। ଏବେ ଆବଶ୍ୟକ ଥିବା ଜରୁରୀ ଔଷଧ ମିଳୁନଥିବାରୁ ସମସ୍ୟାରେ ରୋଗୀ ଓ ରୋଗୀଙ୍କ ସମ୍ପର୍କୀୟ । ରାଉରକେଲା ସରକାରୀ ଡାକ୍ତରଖାନାକୁ ଚିକିତ୍ସିତ ହେବା ପାଇଁ ଦୈନିକ ସୁନ୍ଦରଗଡ଼ ଓ ଆଖପାଖ ଜିଲ୍ଲା ସମେତ ଝାଡ଼ଖଣ୍ଡ ରାଜ୍ୟର ରୋଗୀମାନେ ଆସି ବିଭିନ୍ନ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଆଣ୍ଟିବାୟୋଟିକ ଓ ପେନ କିଲର ମେଡିସିନ କାଉଣ୍ଟରରେ ମିଳୁନଥିବା ଅଭିଯୋଗ ହୋଇଛି । …
ରାଉରକେଲା ସରକାରୀ ଡାକ୍ତରଖାନାରେ ୧୩୮ଟି ଡାକ୍ତରୀ ପଦବୀ ଆବଶ୍ୟକ ରହିଥିବା ବେଳେ ୬୦ ଟି ଡାକ୍ତର ପଦବୀ ଖାଲି ରହିଥିବା ଅଭିଯୋଗ ହେଉଛି । ଡାକ୍ତର ଓ ଔଷଧ ଅଭାବ ଯୋଗୁ ରୋଗୀମାନେ ଅସୁବିଧାର ସମ୍ମୁଖୀନ ହେଉଥିବା ବେଳେ ବିଭିନ୍ନ ପରୀକ୍ଷା କରିବା ପାଇଁ ଘଣ୍ଟା ଘଣ୍ଟା ଅପେକ୍ଷା କରି ରହିବାକୁ ପଡୁଛି । ରୋଗୀଙ୍କ ଆବଶ୍ୟକତା ଥିବା ସମସ୍ତ ଔଷଧ ଯୋଗାଇ ଦେବାର ବ୍ୟବସ୍ଥା କରିବା ପାଇଁ ରୋଗୀମାନେ ଦାବି କରିଛନ୍ତି।…
ରାଉରକେଲା ସରକାରୀ ଡାକ୍ତରଖାନାରେ ଡାକ୍ତର ଲେଖୁଥିବା କିଛି ଔଷଧ ନଥିଲେ ମଧ୍ୟ ସେହିପରି ଅନ୍ୟ ଔଷଧ ଦେବାର ବ୍ୟବସ୍ଥା କରାଯାଇଥିବା ଡାକ୍ତରଖାନାର ଉପ ଅଧିକ୍ଷକ କହିଛନ୍ତି।….
ଦାଦନ ଦୁଇ ଭାଇଙ୍କ ୫ ପୁଅ ଝିଅ ବନିବେ ଡାକ୍ତର
ନନ୍ଦିଘୋଷ ବ୍ୟୁରୋ : ଦାଦନ ଦୁଇ ଭାଇଙ୍କ ୫ ପୁଅ ଝିଅ ବନିବେ ଡାକ୍ତର । କରିବେ ରୋଗୀ ସେବା । କନ୍ଧମାଳ ଦାରିଙ୍ଗବାଡ଼ି ବ୍ଲକ ଶିକବାଡ଼ି ଗାଁରୁ ଆସିଛି ପ୍ରେରଣାଦାୟୀ ଖବର । ଦୁଇ ଭାଇ ବୁର୍ସି ପ୍ରଧାନ ଏବଂ ଜିସାୟ ପ୍ରଧାନ କେରଳରେ ଦାଦନ ଖଟି ପୁଅ ଝିଅଙ୍କୁ ପାଠ ପଢାଉଥିଲେ । ପ୍ରଥମେ ବୁର୍ସି ପ୍ରଧାନଙ୍କ ପୁଅ ବିଭୀଷଣ ପ୍ରଧାନ ୨୦୦୧ରେ ନିଟ୍ ପରୀକ୍ଷାରେ ସଫଳତା ହାସଲ କରିଥିଲେ । ସେ କୋରାପୁଟ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜରେ MBBS ପଢ଼ି ଇଣ୍ଟର୍ଣ୍ଣସିପ୍ କରୁଛନ୍ତି । ୨୦୦୫ରେ ସାନ ଭଉଣୀ ମୋନାଲିସା ନିଟ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ MBBS ପଢୁଛନ୍ତି । ଚଳିତ ବର୍ଷ ପୁଣି ସୁନେମି ପ୍ରଧାନ, ଅସରୀୟ ପ୍ରଧାନ ନିଟ ଏଗଜାମରେ ଉତୀର୍ଣ୍ଣ ହୋଇଛନ୍ତି । ଏହା ସହ ବୁର୍ସିଙ୍କ ସାନ ଭାଇ ଜିସାୟ ପ୍ରଧାନଙ୍କ ଝିଅ ମିନାକ୍ଷୀ ପ୍ରଧାନ ମଧ୍ୟ ନିଟ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି ।…
ବାପା ମାଆ ଦିନ ମଜୁରିଆ ହୋଇଥିବାରୁ ଘର ଖଣ୍ଡେ କରି ପାରୁନାହାନ୍ତି । ଝାଟି ମାଟି ଘରେ ରହି ଯାହା ଯେତିକି ରୋଜଗାର ହୁଏ ତାହା ପିଲାଙ୍କ ପାଠ ପଢ଼ାରେ ଲଗାନ୍ତି । ଅଭାବ ଅନଟରେ ପାଠ ପଢନ୍ତି ପିଲା । ଦୁଇ ଭାଇଙ୍କ ୫ ପୁଅ ଝିଅ ନିଟ ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ପାଠପଢାରେ ଏବେ ଅର୍ଥ ସାଜିଛି ବାଧକ । ଗାଈଗୋରୁ, ଛେଳି, ମେଣ୍ଢା ଯାହା ଘରେ ଥିଲା ତାହା ବିକି ସାରିଲେଣି । ଆଉ ଉପାୟ ନାହିଁ । କିପରି ପିଲା ମାନେ MBBS ପଢିବେ ? ତାକୁ ନେଇ ଘାରିଛି ଚିନ୍ତା । ସରକାରଙ୍କ ନିକଟରେ ଆର୍ଥିକ ସହାୟତା ଲୋଡିଛନ୍ତି ପୂରା ପରିବାର ।…
ମେଧାବୀ ପିଲାଙ୍କ ପାଠପଢା ନିମନ୍ତେ ସରକାର ସହାୟତା ଯୋଗାଇ ଦେବା ଜରୁରୀ ହୋଇ ପଡ଼ିଛି ।
ରାସ୍ତା ସାରା ମୃତ୍ୟୁର ଶିଡ଼ି । ପାଦେ ପାଦେ ବିପଦ
ନନ୍ଦିଘୋଷ ବ୍ୟୁରୋ : ରାସ୍ତା ସାରା ମୃତ୍ୟୁର ଶିଡ଼ି । ପାଦେ ପାଦେ ବିପଦ । ମରଣଯନ୍ତା ପାଲଟିଛି ନୂଆ ଜଗନ୍ନାଥ ସଡ଼କ । ନିଘୋଡ଼ ନିଦରେ ପ୍ରଶାସନ ।… ପୁରୀ ଜିଲ୍ଲା କଣାସ ବ୍ଲକ ଅଧୀନ ନୂଆ ଜଗନ୍ନାଥ ସଡ଼କ ଏକ ବ୍ୟସ୍ତବହୁଳ ରାସ୍ତା । ଏହି ରାସ୍ତା ଦେଇ ପ୍ରତିଦିନ ହଜାର ହଜାର ଗାଡ଼ି ପୁରୀକୁ ଯାଆସ କରୁଛି । ହେଲେ ପାଟ୍ଟଯୋଷୀପୁର, ବକୁ ଠାରୁ ରୋଷଣା ଗାଁ ପର୍ଯ୍ୟନ୍ତ ରାସ୍ତାର ଅବସ୍ଥା କହିଲେ ନସରେ । ରାସ୍ତାର ଦୁରାବସ୍ଥା ପାଇଁ ଅନେକ ସମୟରେ ଘଟୁଛି ଛୋଟବଡ଼ ଦୁର୍ଘଟଣା । ଗାଁ ଦାଣ୍ଡରେ ଜମି ରହୁଛି ପାଣି । ଫଳରେ ହୀନସ୍ତା ଭୋଗୁଛନ୍ତି ଲୋକେ ।…
କେଶରପୁର ଛକ ଠାରୁ ସିଦ୍ଧେଶ୍ୱର ପର୍ଯ୍ୟନ୍ତ ବାଇପାସ ରାସ୍ତା ନିର୍ମାଣ ପାଇଁ ବାରମ୍ବାର ଦାବି ହେଉଥିଲେ ସୁଦ୍ଧା ତାହା କାର୍ଯ୍ୟକାରୀ ହୋଇପାରୁନି । ଫଳରେ ଗାଁ ଦାଣ୍ଡ ଦେଇ ଗାଡ଼ି ଯାଆସ କରୁଛି । ଗାଁ ଦାଣ୍ଡ ଟର୍ଣ୍ଣିଂ ପଏଣ୍ଟରେ ବଡ଼ ଗାଡ଼ି ପଶିଲେ ବୁଲିନପାରି ବହୁ ସମୟ ଧରି ଅଟକି ରହୁଛି । ରାସ୍ତାରେ ଫାଟ ସୃଷ୍ଟି ହେଉଛି । ରାସ୍ତା ମରାମତି ପାଇଁ ସ୍ଥାନୀୟ ଲୋକେ ବାରମ୍ବାର ଅଭିଯୋଗ କରୁଥିଲେ ବି ଫଳ ଶୂନ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି । …
ବାଟବଣା ଆବାସ ଯୋଜନା । ଗରିବର ମୁଣ୍ଡକୁ ମିଳୁନି ଛାତ
ନନ୍ଦିଘୋଷ ବ୍ୟୁରୋ : ବିକଶିତ ଓଡ଼ିଶାର ବିକଳ ଚିତ୍ର । ଗରିବ ମୁଣ୍ଡକୁ ମିଳୁନି ଛାତ । ଛେଳି ଗୁହାଳ ତଳେ ବିତୁଛି ବୃଦ୍ଧ ଦମ୍ପତିଙ୍କ ଜୀବନ । … ଦେଖନ୍ତୁ ଏହି ଦୃଶ୍ୟ । ଝାଟିବୁଜା ଘର ଉପରେ ପଡ଼ିଛି ଜରି ପାଲ । ତାହାରି ଭିତରେ ଗୋଟିଏ ପଟେ ଛେଳି, ଆଉ ଗୋଟିଏ ପଟେ ରହୁଛନ୍ତି ଦୁଇ ବୃଦ୍ଧବୃଦ୍ଧା । ସେଇଠି ଖାଇବା, ସେଇଠି ଶୋଇବା ସବୁ କିଛି । ଏ କୌଣସି ଉପାନ୍ତ ଅଞ୍ଚଳର ଦୃଶ୍ୟ ନୁହେଁ । ଖୋଦ ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ କଡବ ପଞ୍ଚାୟତ ଆଦିବାସୀ ସାହିର । ଘରଦ୍ଵାର ଭାଙ୍ଗିଯିବା ପରେ କୁଡ଼ିଆ ତଳେ କାଳ କାଟୁଛନ୍ତି ଧୂଳି ନାୟକ ଓ ତାଙ୍କ ପତ୍ନୀ ପ୍ରଭାତୀ ନାୟକ । …
ପ୍ରଭାତୀ ଦୀର୍ଘ ଦିନ ଧରି କିଡୀନ ରୋଗରେ ଆକ୍ରାନ୍ତ ଅଛନ୍ତି । ରୋଗ ବଢ଼ୁଛି ହେଲେ ଔଷଧ କିଣିବାକୁ ଟଙ୍କା ନାହିଁ । ନିଜ ନାଁରେ ଜମି ବି ନାହିଁ । ସରକାରୀ ସହାୟତା ଭାବେ ଦୁହିଁଙ୍କୁ କେବଳ ସରକାରୀ ଭତ୍ତା ଓ ରାସନ ମିଳୁଛି । ୧୦ କିଲୋ ଚାଉଳ ସମୁଦ୍ରକୁ ଶଙ୍ଖେ ସଦୃଶ । ବାଧ୍ୟ ହୋଇ ମାଗିଯାଚି ଚଳୁଛନ୍ତି । ତେବେ ଲୋକଙ୍କ ସହାୟତାରେ କେତେ ଦିନ ଚଳିବେ ଦୁହେଁ ? ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପଟେ ବୃଦ୍ଧଙ୍କୁ ବସୁନ୍ଧରା ଯୋଜନାରେ ଜମି ଯୋଗାଇ ଦେବାକୁ ପ୍ରକ୍ରିୟା ଆରମ୍ଭ ହୋଇଛି ବୋଲି କହିଛନ୍ତି ସ୍ଥାନୀୟ ସରପଞ୍ଚ ।…
ଗରିବ ଓ ଭୂମିହୀନଙ୍କ ପାଇଁ ସରକାରଙ୍କ ଅନେକ ଯୋଜନା ରହିଛି । ହେଲେ ଧୂଳି ନାୟକ ଓ ତାଙ୍କ ସ୍ତ୍ରୀ ଛେଳି ଗୁହାଳରେ କାଳ କାଟିବା ସମସ୍ତ ଯୋଜନା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଦମ୍ପତିଙ୍କୁ କେବେ ମିଳୁଛି ଜମି ଓ ଘର ? କେବେ ସେମାନେ ନିରାପଦ ଜୀବନ ବିତାଉଛନ୍ତି ? ତାହା ଦେଖିବାକୁ ବାକି ରହିଲା । …
ଲୋୟର ପିଏମଜିରେ ଗର୍ଜିଲା ଯୁବ-ଛାତ୍ର ବିଜେଡି
ନନ୍ଦିଘୋଷ ବ୍ୟୁରୋ : ରାଜଧାନୀରେ ଗର୍ଜିଲା ବିଜେଡି। ଲୋୟର ପିଏମଜିରେ ବିରାଟ ପ୍ରତିବାଦ । ବହି ତ୍ରୁଟି ପ୍ରସଙ୍ଗରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଇସ୍ତଫା ଦାବିରେ ଗର୍ଜିଛି ଯୁବ ଓ ଛାତ୍ର ବିଜେଡି। ପଦ ଛାଡ଼ିବାକୁ ତାଙ୍କୁ ଡେଡଲାଇନ ଦିଆଯାଇଥିଲା। ତଥାପି ଇସ୍ତଫା ନ ଦେବାରୁ ଆଜି ବିରାଟ ଆନ୍ଦୋଳନ କରାଯାଇଛି। ବିଧାନସଭା ଘେରାଉ ଉଦ୍ୟମ ବେଳେ ବାଟରେ ବିଜେଡି କର୍ମୀଙ୍କୁ ପୋଲିସ ଅଟକାଇଥିଲ। କିଛି ସମୟ ଧସ୍ତଧସ୍ତି ଭଳି ପରିସ୍ଥିତି ସୃଷ୍ଟି ହୋଇଥିଲା। ଆନ୍ଦୋଳନକୁ ଭଣ୍ଡୁର କରିବାକୁ ପୋଲିସ ବିଜେଡି କର୍ମୀଙ୍କୁ ବଳପୂର୍ବକ ଉଠାଇ ନେଇଛି।
ଆହୁରି ବର୍ଷିବ : କଳିଙ୍ଗପଟ୍ଟନମରେ ସ୍ଥଳଭାଗ ଛୁଇଁବ ଅବପାତ ୧୦ ଜିଲ୍ଲାକୁ ଆଲର୍ଟ ଜାରି
ନନ୍ଦିଘୋଷ ବ୍ୟୁରୋ : ବଙ୍ଗୋପସାଗରରେ ସୃଷ୍ଟ ଲଘୁଚାପ ଗଭୀର ଅବପାତରେ ପରିଣତ ହୋଇଛି। ଏହା ଘଣ୍ଟାପ୍ରତି ୧୨ କିଲୋମିଟର ବେଗରେ ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି କରୁଛି। ବର୍ତ୍ତମାନ ଏହା ଆନ୍ଧ୍ରପ୍ରଦେଶର କଳିଙ୍ଗପଟ୍ଟନମଠାରୁ ପୂର୍ବ-ଦକ୍ଷିଣ-ପୂର୍ବ ଦିଗରେ ପ୍ରାୟ ୧୪୦ କିଲୋମିଟର, ଗୋପାଳପୁରଠାରୁ ଦକ୍ଷିଣ-ଦକ୍ଷିଣ-ପୂର୍ବ ଦିଗରେ ୧୫୦ କିଲୋମିଟର ଏବଂ ପୁରୀଠାରୁ ଦକ୍ଷିଣ-ଦକ୍ଷିଣ-ପଶ୍ଚିମ ଦିଗରେ ପ୍ରାୟ ୨୧୦ କିଲୋମିଟର ଦୂରରେ ରହିଛି। ଏହା ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି ଜାରି ରଖିଛି। ଆଜି ରାତିରେ ବିଶାଖାପାଟଣା ଓ ଗୋପାଳପୁର ମଧ୍ୟରେ ଉପକୂଳ ଅତିକ୍ରମ କରିବା ସମ୍ଭାବନା ରହିଛି। କଳିଙ୍ଗପଟ୍ଟନମ ନିକଟରେ ଏହା ସ୍ଥଳଭାଗ ଛୁଇଁପାରେ। ଏହି ସମୟରେ ପବନର ବେଗ ଘଣ୍ଟାପ୍ରତି ୫୫ରୁ ୬୫ କିଲୋମିଟର ରହିପାରେ। ବେଳେବେଳେ ଏହା ୭୫ କିଲୋମିଟର ପର୍ଯ୍ୟନ୍ତ ବଢ଼ିପାରେ।
ଗଭୀର ଅବପାତ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ଜୋରଦାର ବର୍ଷା ହେଉଛି। ଆଗାମୀ ୨୪ ଘଣ୍ଟାରେ କଳାହାଣ୍ଡି, ନବରଙ୍ଗପୁର, କୋରାପୁଟ ଓ ମାଲକାନଗିରି ଜିଲ୍ଲାର କିଛି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ଆକଳନ କରାଯାଇଛି। ଏହି ୪ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରିଛି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର। ସେହିପରି ନୂଆପଡ଼ା, ବଲାଙ୍ଗୀର, କନ୍ଧମାଳ, ରାୟଗଡ଼ା, ଗଜପତି ଓ ଗଞ୍ଜାମ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। ଏହି ୬ ଜିଲ୍ଲାକୁ ଅରେଞ୍ଜ୍ ୱାର୍ଣ୍ଣିଂ ଜାରି କରାଯାଇଛି। ସମୁଦ୍ର ଭିତରକୁ ନ ଯିବା ପାଇଁ ମତ୍ସ୍ୟଜୀବୀମାନଙ୍କୁ ସତର୍କ କରାଯାଇଛି। ଏହାସହ ଓଡ଼ିଶାର ସମସ୍ତ ବନ୍ଦରରେ ୩ ନମ୍ବର ସତର୍କ ସୂଚନା ଜାରି କରାଯାଇଛି।
ମହାନଦୀ ଫେରିଘାଟ ନିକଟରୁ ଦୁଇ ଅଜଣା ଯୁବକଙ୍କ ମୃତଦେହ ଉଦ୍ଧାର
ସୁବର୍ଣ୍ଣପୁର : ସୁବର୍ଣ୍ଣପୁର ଜିଲ୍ଲା ସୁବଳୟା ଥାନା ମହାନଦୀ ଫେରିଘାଟ ନିକଟରୁ ଦୁଇ ଅଜଣା ଯୁବକଙ୍କ ମୃତଦେହ ଉଦ୍ଧାର । ଅଗ୍ନିଶମ ବାହିନୀ ଦ୍ୱାରା ଉଦ୍ଧାର କରି ସୁବଳୟା ପୋଲିସକୁ ହସ୍ତାନ୍ତର କରାଯାଇଛି । ଦୁଇ ମୃତକ ଗଞ୍ଜେଇ ମାଫିଆ ହୋଇଥିବା ସନ୍ଦେହ କରାଯାଉଛି । ଗତକାଲି ପୋଲିସ ଚଢ଼ାଉ କରି ୩ଟି ଗଞ୍ଜେଇ ଗାଡ଼ି ସହ ଦୁଇଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ଆଉ ଦୁଇଜଣ ଚମ୍ପଟ ମାରିଥିଲେ । ଅଭିଯୁକ୍ତ ଦ୍ୱୟ ନଦୀକୁ ଡେଇଁଥିବା ପଡ଼ିଥିବା ଚର୍ଚ୍ଚା ହୋଇଥିଲା । ମୃତଦେହ ଉଦ୍ଧାର କରି ଶବ ସଂରକ୍ଷଣ ଗୃହରେ ରଖି ତଦନ୍ତ କରୁଛି ପୋଲିସ ।