ନନ୍ଦିଘୋଷ ବ୍ୟୁରୋ : ଆଜି ଭାଦ୍ରବ ଶୁକ୍ଲପକ୍ଷ ଚତୁର୍ଦ୍ଦଶୀ ତିଥିରେ ଶ୍ରୀ ଶ୍ରୀ ଅନନ୍ତ ଦେବଙ୍କ ବ୍ରତ ପାଳନ କରାଯାଏ। ଏହି ପବିତ୍ର ଦିନଟି ଭଗବାନ ବିଷ୍ଣୁଙ୍କୁ ସମର୍ପିତ । ବିଷ୍ଣୁଙ୍କ ସମେତ ଗଣେଶଙ୍କ ସମ୍ମୁଖରେ ମଧ୍ୟ ଏହି ପୂଜା କରିବାର ବିଧି ପ୍ରଚଳିତ ଥିବା କୁହାଯାଏ ଗଜାନନ ନିଜେ ଅନନ୍ତ ବ୍ରତ କରିଥାନ୍ତି। ସୁଖ ସୌହାର୍ଦ୍ଦ୍ୟ କାମନା କରି ଅନନ୍ତ ଚତୁର୍ଦ୍ଦଶୀ ତିଥିରେ ଉଭୟ ପୁରୁଷ ଓ ମହିଳାମାନେ ଏହି ଅନନ୍ତବ୍ରତ ପାଳନ କରଥାନ୍ତି। ଆଜି ଶ୍ରୀମନ୍ଦିରରେ ସନ୍ଧ୍ୟା ଧୂପ ନୀତି ସମାପନ ପରେ ମୁକ୍ତି ମଣ୍ଡପ ନିକଟରେ ଥିବା ଅନନ୍ତଙ୍କ ପାଖରେ ପର୍ବ ଯାତ୍ରା ଯୋଗାଣିଆ ପ୍ରଦତ୍ତ ଭୋଗ, ମହାସ୍ନାନ ଜିନିଷ ରଖାଯାଇଥାଏ। ପ୍ରଥମେ ଜଣେ ପାଳିଆ ପୂଜାପଣ୍ଡା ସେବକ ଅନନ୍ତଙ୍କ ପାଖରେ ମହାସ୍ନାନ ନୀତି ଓ ଭୋଗ କରିଥାନ୍ତି। ଏହାପରେ ଅନନ୍ତ ବ୍ରତ କଥା ପାଠ କରିବାପରେ ବନ୍ଦାପନା ନୀତି ହୋଇଥାଏ ।
ବନ୍ୟା କ୍ଷତିପୂରଣକୁ ନେଇ ବିଧାନସଭାରେ ମନ୍ତ୍ରୀ-ବିଧାୟକ କଥା କଟାକଟି
ନନ୍ଦିଘୋଷ ବ୍ୟୁରୋ : ବନ୍ୟା ପରିଚାଳନାରେ ସରକାର ବିଫଳ। ବିଧାନସଭାରେ କ୍ଷତିପୂରଣ ରିପୋର୍ଟ ଦେଖାଇ ରାଜସ୍ବ ମନ୍ତ୍ରୀଙ୍କ ବାହାବା ଉଦ୍ୟମ। ରାଜସ୍ବ ମନ୍ତ୍ରୀଙ୍କ କ୍ରେଡିଟ ଉପରେ ପାଣି ପକାଇ ଦେଲେ ବିଜେପି ବିଧାୟକ ଟଙ୍କଧର ତ୍ରିପାଠୀ। ବିରୋଧୀ ନୁହଁନ୍ତି, ଖୋଦ ଶାସକ ଦଳର ସଦସ୍ୟଙ୍କ ସମାଲୋଚନାର ଶିକାର ହେଲେ ମନ୍ତ୍ରୀ। ଦେଖନ୍ତୁ ଆଜି ଗୃହରେ ପ୍ରଶ୍ନକାଳରେ ଦୁହିଁଙ୍କ ଭିତରେ କିପରି ହୋଇଛି କଥା କଟାକଟି। MMDR ପ୍ରସଙ୍ଗରେ ବିରୋଧୀ ହୋହଲ୍ଲା କରୁଥିଲେ। ହେଲେ ତାକୁ ବଳି ଗଲା ବିଧାୟକ ଟଙ୍କଧର ଓ ମନ୍ତ୍ରୀ ସୁରେଶ ପୂଜାରୀଙ୍କ କଥା କଟାକଟି । ମନ୍ତ୍ରୀ ବିଧାୟକଙ୍କ ପ୍ରଶ୍ନର ଉତ୍ତର ରଖୁ ରଖୁ ଗୃହ ମୂଲତବୀ ଘୋଷଣା କରିଦେଲେ ଉପବାଚସ୍ପତି। ଟଙ୍କଧରଙ୍କ କଥା ଅନୁସାରେ ବନ୍ୟାରେ ଝାରସୁଗୁଡ଼ାରେ ବ୍ୟାପକ ଭାବେ ଭାଙ୍ଗିଛି ଘର । ରହିବା ପାଇଁ ଲୋକଙ୍କ ପାଖରେ ଘର ନାହିଁ। ଝାରସୁଗୁଡ଼ା ସଦର ଏବଂ ବିଭିନ୍ନ ବ୍ଲକରେ ବର୍ଷା ପାଇଁ ମାଟି ଘର ଭାଙ୍ଗିଛି। ବନ୍ୟା ଅଞ୍ଚଳ ପାଇଁ କିଛି କରୁଛନ୍ତି । କିନ୍ତୁ ଯେଉଁଠି ଘର ଭାଙ୍ଗିଛି ସେଠି ସରକାର କିଛି କରୁନାହାନ୍ତି । କୌତୁହଳ ବିଷୟ ଯେ ଉଭୟ ଝାରସୁଗୁଡ଼ା ଜିଲ୍ଲାରୁ ଜନପ୍ରତିନିଧି ଭାବେ ଉଭୟ ମନ୍ତ୍ରୀ ଓ ବିଧାୟକଙ୍କ ଏପରି କଥା କଟାକଟିକୁ ନେଇ ସବୁଆଡ଼େ ଚର୍ଚ୍ଚା ଜୋର ଧରିଛି। ଗୃହ ଭିତରେ ସୀମିତ ରହି ନଥିଲା ଟଙ୍କଧର ଓ ସୁରେଶଙ୍କ କଳି। ସମ୍ଭାବ୍ୟ ବାତ୍ୟା ମୁକାବିଲା ପାଇଁ ହୋଇଥିବା ସମୀକ୍ଷା ବୈଠକ ପରେ ଗଣମାଧ୍ୟମକୁ ସମ୍ବୋଧନ କରିଥିଲେ ରାଜସ୍ୱ ମନ୍ତ୍ରୀ। ସେଠାରେ ଟଙ୍କଧରଙ୍କ ଅଭିଯୋଗ ନେଇ ସୁରେଶ ପୂଜାରୀଙ୍କୁ ପ୍ରଶ୍ନ କରିଥିଲେ ଗଣମାଧ୍ୟମ ପ୍ରତିନିଧି। ଟଙ୍କଧରଙ୍କ ନାଁ ନନେଇ ରାଜସ୍ୱ ମନ୍ତ୍ରୀ କଟାକ୍ଷ କରିଥିଲେ । ଅଭିଯୋଗ ଶୁଣିବି ନା ଲୋକଙ୍କ ସେବାରେ ରହିବି ବୋଲି ରାଜସ୍ୱ ମନ୍ତ୍ରୀ ରୋକଠୋକ ଉତ୍ତର ଦେଲେ। କହିଥିଲେ, ଏମିତି ଅଭିଯୋଗ ଶୁଣିଲେ କାମ ନ କରି ଘରେ ବସିବି।
ପୁରୀ ଶ୍ରୀନହରରେ ଗଜପତିଙ୍କ ସୁନିଆଁ ପର୍ବ, ଆରମ୍ଭ ହେଲା ୭୧ ଅଙ୍କ ଓ ୧୪୩୪ ସାଲ
ନନ୍ଦିଘୋଷ ବ୍ୟୁରୋ : ବୁଧବାର ଶ୍ରୀନହରରେ ଅନୁଷ୍ଠିତ ହୋଇଯାଇଛି ଗଜପତିଙ୍କ ସୁନିଆଁ ପର୍ବ । ସନାତନ ଧର୍ମରେ ପାଞ୍ଜି ଓ ଅଙ୍କ ଗଣନାର ବିଶେଷ ମହତ୍ୱ ରହିଥିବା ବେଳେ ଏହି ପର୍ବ ବେଶ ଗୁରୁତ୍ୱପୂର୍ଣ । ଧାର୍ମିକ ଓ ଆଧ୍ୟାତ୍ମିକ ତଥା ଜ୍ୟୋତିଷ ଶାସ୍ତ୍ର ନିମିତ୍ତ ଏହି ଅଙ୍କ ଓ ସାଲ ବେଶ ମହତ୍ୱ ରଖିଥାଏ । ବିଶେଷ କରି ଅଙ୍କ ପ୍ରଚଳନରେ ଶୂନ୍ୟର ବ୍ୟବହାର କରାଯାଉ ନଥିବାରୁ ଚଳିତ ବର୍ଷ ୭୦ ଅଙ୍କ ପରିବର୍ତ୍ତେ ଏହା ୭୧ ଅଙ୍କ ଭାବେ ପରିଗଣିତ କରାଯାଇଥିଲା । ଅଙ୍କ ପ୍ରଚଳନର ଏହା ଏକ ରହସ୍ୟ ରହିଥିବା ବେଳେ ସୁନିଆଁରେ ଶ୍ରୀନହରରେ ସୁନାମୁଦ୍ରାରେ ସ୍ୱତନ୍ତ୍ର ଭାବେ ଅଙ୍କର କଟା ନିତୀ ସମ୍ପାଦନ କରାଯାଇଥିଲା ।ରାଜଗୁରୁଙ୍କ ଉପସ୍ଥିତିରେ ବରାହ ନୃସିଂହ, ଲକ୍ଷ୍ମୀ ନୃସିଂହ ଆଦି ଦେବା ଦେବୀଙ୍କ ଚିହ୍ନ ଥିବା ମୁଦ୍ରାକୁ ନହର କରଣ ପ୍ରଚଳନ କରାଇବା ସହ ଏହାକୁ ବିଧିବଦ୍ଧ ଭାବେ ଘୋଷଣା କରାଯାଇଥିଲା । ଏହାକୁ ନେଇ ଉତ୍ସବର ମାହୋଲ ପରିଲକ୍ଷିତ ହୋଇଥିଲା। ଉତ୍କଳୀୟ ପରମ୍ପରା ଓ ଶ୍ରୀ ଜଗନ୍ନାଥ ସଂସ୍କୃତିରେ ଗଜପତି ପରମ୍ପରା ବେଶ ପ୍ରାଚୀନ। ଏହି ପ୍ରାଚୀନ ଓ ପୁରାତନ ପରମ୍ପରାର ଝଲକ ବୁଧବାର ପୁରୀ ଶ୍ରୀନହରରେ ଦେଖିବାକୁ ମିଳିଥିଲା। ପବିତ୍ର ସୁନିଆଁ ପର୍ବ ଅବସରରେ ଶ୍ରୀନହର ପ୍ରାଙ୍ଗଣ ମାଆ କନକ ଦୂର୍ଗାଙ୍କ ଠାରେ ବିଶେଷ ପୂଜାର୍ଚ୍ଚନା କରାଯିବା ପରେ ରାଜତନ୍ତ୍ର ପରମ୍ପରା ଅନୁସାରେ ଅଙ୍କ ପ୍ରଚଳନ ବିଧି ଅନୁସାରେ କରାଯାଇଥିଲା । ୭୧ ଅଙ୍କ ଓ ୧୪୩୪ସାଲର ଆରମ୍ଭ ହେବା ସହ ଗଜପତି ମହାରାଜା ଦିବ୍ୟସିଂହ ଦେବଙ୍କ ଆଉ ଏକ ନବବର୍ଷ ଆରମ୍ଭ ହୋଇଥିଲା । ରାଜତନ୍ତ୍ର ଲୋପ ପାଇଥିଲେ ବି ପାରମ୍ପରିକ ରାଜପାଟିରେ ଗଜପତି ସିଂହାସନରେ ଆରୋହଣ ହୋଇ ବିଧି ଅନୁସାରେ ସମସ୍ତ କାର୍ଯ୍ୟ କରିଥିବା ବେଳେ ପ୍ରାଚୀନ ପ୍ରଥା ପରମ୍ପରାକୁ ବଜାୟ ରଖିଥିବା ପରିଲକ୍ଷିତ ହୋଇଥିଲା।
ନୂଆ କୋଠା ଥାଇ ବି ପୁରୁଣା ଭିତ୍ତିଭୂମିରେ କୋରାପୁଟ ମେଡିକାଲ କଲେଜ
ନନ୍ଦିଘୋଷ ବ୍ୟୁରୋ : ଅବ୍ୟବସ୍ଥା ଘେରରେ କୋରାପୁଟ ସହୀଦ ଲକ୍ଷ୍ମଣ ନାଏକ ମେଡିକାଲ କଲେଜ ଓ ହସ୍ପିଟାଲ । ଦିନକୁ ଦିନ ରୋଗୀଙ୍କ ସଂଖ୍ୟା ବଢୁଛି । ହେଲେ ଭିତ୍ତିଭୂମି ବୃଦ୍ଧି ପାଇଁ ନାହିଁ ପ୍ରଶାସନିକ ପଦକ୍ଷେପ । କେତେବେଳେ ଚଟାଣରେ ରୋଗୀ ଚିକିତ୍ସିତ ହେଉଥିବା ଅଭିଯୋଗ, ତ ଆଉ କେତେବେଳେ ହସ୍ପିଟାଲ କୋଠାରୁ ପାଣି ଗଳିବା ଭଳି ସମସ୍ୟା ସାମ୍ନାକୁ ଆସିଛି । ଏହି ସମସ୍ୟାର ସମାଧାନ ପାଇଁ ପୂର୍ବ ସରକାର ସମୟରେ ପ୍ରାୟ ୨୩୦ କୋଟି ଟଙ୍କା ବ୍ୟୟରେ ୧୦ ଏକର ଜମିରେ ନିର୍ମାଣ ହୋଇଥିଲା ୬୫୦ ବେଡ ବିଶିଷ୍ଟ ନୂତନ ହସ୍ପିଟାଲ କୋଠା । ୨୦୨୫ ଅଗଷ୍ଟ ୮ ତାରିଖରେ ଏହାର ତରବରିଆ ଭାବେ ଉଦଘାଟନ କରିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ । କିନ୍ତୁ ଉଦଘାଟନକୁ ବର୍ଷେ ପୂରିବାକୁ ବସିଥିଲେ ମଧ୍ୟ ବିଭିନ୍ନ କାରଣରୁ ନୂତନ କୋଠା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇ ପାରିନାହିଁ । ଫଳରେ ନୂଆ କୋଠା ଥାଇ ବି ପୁରୁଣା ଭିତ୍ତିଭୂମି ଉପରେ ନିର୍ଭର କରୁଛି ସ୍ବାସ୍ଥ୍ୟସେବା । ଖାଲି ସେତିକି ନୁହେଁ ନୂତନ ହସ୍ପିଟାଲ କୋଠାକୁ ଯିବା ପାଇଁ ରାସ୍ତା ନାହିଁ । ଲୋକଙ୍କ ସରକାର କହୁଥିବା ଡବଳ ଇଞ୍ଜିନ ସରକାର କୋରାପୁଟ ଜିଲ୍ଲାର ଏହି ମେଡିକାଲ କଲେଜକୁ ତୁରନ୍ତ କାର୍ଯ୍ୟକ୍ଷମ କରିବାକୁ ଦାବି ଜୋର ଧରିଛି । କୋରାପୁଟ ସହୀଦ ଲକ୍ଷ୍ମଣ ନାଏକ ମେଡିକାଲ କଲେଜ ନୂତନ କୋଠାକୁ ତୁରନ୍ତ ସ୍ଥାନାନ୍ତର କରିବାକୁ ଦାବି କରିଛନ୍ତି ଜୟପୁର ବିଧାୟକ ତାରା ପ୍ରାସଦ ବାହିନିପତି । ନୁତନ କୋଠାର ଅଗ୍ନି ନିର୍ବାପକ ପ୍ରମାଣ ପତ୍ର ବର୍ତ୍ତମାନ ଯାଏଁ କରାଯାଇନାହିଁ । କେଉଁଭଳି ତରବରିଆ ଭାବରେ କୋଠାର ଉଦଘାଟନ କଲେ ମୁଖ୍ୟମନ୍ତ୍ରୀ ବୋଲି ପ୍ରଶ୍ନ କରିଛନ୍ତି ବିଧାୟକ । ସେପଟେ ତୁରନ୍ତ କୋରାପୁଟ ମେଡିକାଲ କଲେଜ ସ୍ଥାନାନ୍ତର କରିବା ସହିତ ଏକ କୋର କମିଟି ଗଠନ କରାଯାଇଛି । ଖୁବଶୀଘ୍ର ଆବଶ୍ୟକୀୟ ଡାକ୍ତର ପଦବୀ ପୂରଣ ଏବଂ ବିଭିନ୍ନ ବିଭାଗ ପାଇଁ ଆଧୁନିକ ମେସିନାରୀ ଯୋଗାଇବା ନେଇ ମନ୍ତ୍ରୀ ଆଶ୍ୱାସନା ଦେଇଛନ୍ତି ।
ଯୌତୁକ ଜନିତ ଓ ଘରୋଇ ହିଂସାରୁ ଗଡୁଛି ମୁଣ୍ଡ
ନନ୍ଦିଘୋଷ ବ୍ୟୁରୋ : ରକ୍ତ ସମ୍ପର୍କରେ ରକ୍ତର ଛିଟା । ମହିଳା ହିଂସାରେ ସାରା ରାଜ୍ୟରେ ଆଗରେ ଭୁବନେଶ୍ୱର। ଯୌତୁକ ଜନିତ ଓ ଘରୋଇ ହିଂସାରୁ ଗଡୁଛି ମୁଣ୍ଡ । ରାଗ ସାଜୁଛି ବ୍ରହ୍ମ ଚଣ୍ଡାଳ, ଭାଙ୍ଗୁଛି ପରିବାର। କିଛି ବର୍ଷର ପ୍ରେମ ଓ ତାପରେ ବାହାଘର । ସଭିଙ୍କ ଭିତରେ ଖୁସି, ଏ ଖୁସି ୬ ମାସ ତଳେ ଦ୍ୟୁଗୁଣିତ ହୋଇଥିଲା । ଦୁହିଁଙ୍କ କୋଳକୁ ଏକ ଛୁଆ ମଧ୍ୟ ଆସିଥିଲା । ଏ ସବୁ ଖୁସି କିଛି କ୍ଷଣରେ ଧୂଳିସାତ ହୋଇଗଲା । ଭାଙ୍ଗିଗଲା ସୁନାର ସଂସାର । ଚରମ ରାଗ ଯେ କେତେ ଭୟଙ୍କର ହୋଇପାରେ , ତାହାର ଜ୍ୱଳନ୍ତ ଉଦାହରଣ ସାମ୍ନାକୁ ଆସିଲା । ଏ ହେଉଛି ନୟାପଲ୍ଲୀ ଥାନା ଅନ୍ତର୍ଗତ ବ୍ରିଟ କଲୋନୀର ବିଭତ୍ସ ଦୃଶ୍ୟ । ଯେଉଁଠାରେ ସ୍ତ୍ରୀକୁ ଲୁହା ତାୱାରେ ପିଟି ଜୀବନ ନେଇଯାଇଛି , ହତ୍ୟାକାରୀ ସ୍ବାମୀ ସର୍ବେଶ୍ବର ପ୍ରଧାନ । ତେବେ ସର୍ବେଶ୍ବର ଗତ ୬ ମାସ ହେବ ମାନସିକ ରୋଗ ଲାଗି ମେଡିସିନ ଖାଉଥିବା ପୋଲିସ ଜାଣିବାକୁ ପାଇଛି । ଦୁଇ ବର୍ଷ ତଳେ ସର୍ବେଶ୍ବର ପ୍ରେମ କରି ବନସ୍ମିତା ସ୍ବାଇଁଙ୍କୁ ବିବାହ କରିଥିବା ବେଳେ ତାଙ୍କର ୬ ମାସର ଏକ ଶିଶୁକନ୍ୟା ରହିଛି। ବିବାହ କାହାପାଇଁ ଅସୁମାରୀ ଖୁସି ତ ଆଉ କାହା ପାଇଁ ବିରହ ବେଦନା। କାହା ପାଇଁ ଆଶୀର୍ବାଦ ତ ଆଉ କାହା ପାଇଁ ଅଭିଶାପ । ବେକ ଓ ହାତ କାଟି ସ୍ତ୍ରୀ ମୋନିକା ଜେନାଙ୍କୁ ହତ୍ୟା କରିଥିଲା ସ୍ୱାମୀ ପ୍ରଦୀପ ଜେନା । ବିବାହର ୯ ବର୍ଷ ପରେ ଛାଡପତ୍ରକୁ କେନ୍ଦ୍ରକରି ଘଟିଥିଲା ଲୋମଟାଙ୍କୁରା ଘଟଣା । ଏପରିକି ନିଜେ ମଧ୍ୟ ଆତ୍ମହତ୍ୟା ଉଦ୍ୟମ କରି ପରେ ପୋଲିସ ଦ୍ୱାରା ଗିରଫ ହୋଇଥିଲା । ଠିକ ସେହିଭଳି ଗତବର୍ଷ ୪ ଅଗଷ୍ଟରେ ମଞ୍ଚେଶ୍ୱର ଥାନା ବରିମୁଣ୍ଡରୁ ଆସିଥିଲା ବଧୁ ହତ୍ୟା ଅଭିଯୋଗ । ଯାଜପୁର ବିଂଝାରପୁର ୨୭ ବର୍ଷୀୟା ରଶ୍ମିତା ସ୍ବାଇଁଙ୍କ ମୃତ୍ୟୁ ପରେ ତଦନ୍ତ ପରିସରଭୁକ୍ତ ହୋଇଥିଲେ ଶାଶୁ ଘର ଲୋକେ ।
ଆସୁଛନ୍ତି ମାଆ, ମାଆ ଦୁର୍ଗାଙ୍କ ଆଗମନର ବାର୍ତ୍ତା ଦେଉଛି କାଶତଣ୍ଡୀ
କୋଣାର୍କ: ଆସୁଛନ୍ତି ମାଆ । ମାଆ ଦୁର୍ଗାଙ୍କ ଆଗମନର ବାର୍ତ୍ତା ଦେଉଛି କାଶତଣ୍ଡୀ । ଧୋବ ଫର ଫର କାଶତଣ୍ଡୀ ଫୁଲରେ ମହି ଦିଶୁଛି ଧବଳ । କେତେବେଳେ ଝୁଲି ଝୁଲି ଧରାକୁ ଛୁଁଉଛି ,ପୁଣି ଆକାଶକୁ ଚାହିଁ ଖିଲି ଖିଲି ହସୁଛି। ପୁରୀ ଜିଲ୍ଲା କାକଟପୁର, କୋଣାର୍କ, ଅସ୍ତରଙ୍ଗ ଅଞ୍ଚଳରେ କାଶତଣ୍ଡୀର ଶ୍ୱେତ ସମ୍ଭାର। ସୁନୀଳ ଆକାଶ ତଳେ ଦିଗବଳୟ ଯାଏ ବିସ୍ତାରିତ ଏହି ଶୁଭ୍ରତାକୁ ଦେଖି କ୍ଷଣିକ ପାଇଁ ଅଟକି ଯାଉଛି ବାଟୋଇ। ଆନମନା ହେଉଛି କବିର ମନ। ବାସ୍ନା ନଥିଲେ ବି ତା ଅପରୂପ ସମସ୍ତଙ୍କୁ ବିମୋହିତ କରୁଛି। ଖିଲି ଖିଲି ହସୁଛି କାଶତଣ୍ଡୀ। ଖେଳୁଛି କୁମୁଦ କମଳ, ପୁରୀ ଜିଲ୍ଲାର ଦେବୀ ନଦୀ କୂଳ, ବିଲ ଓ ରାସ୍ତାକଡ଼ରେ ଧବଳ କାଶତଣ୍ଡୀର ସାମ୍ରାଜ୍ୟ। ପୁଲକିତ ଧରା, ହସୁଛି ଆକାଶ। ଶାରଦୀୟ ଦୁର୍ଗା ପୂଜାର ପ୍ରତୀକ କାଶତଣ୍ଡୀ। ସତେ ଯେମିତି ପାର୍ବଣ ଋତୁର ବନ୍ଦନା ଗାଇବା ପାଇଁ ପ୍ରକୃତି ରାଣୀ ନିଜକୁ ସଜାଇ ଦେଇଛି।
ରାସ୍ତା ନାହିଁ, ସ୍କୁଲ ବନ୍ଦ; ଭବିଷ୍ୟତ ନେଇ ଚିନ୍ତାରେ ପିଲା
ଆସିକା: ଗାଁକୁ ନାହିଁ ପକ୍କା ରାସ୍ତା। ରାସ୍ତା ପାଇଁ ପାଠପଢ଼ା ଠପ୍। ଆବଡ଼ା ଖାବଡ଼ା ପାହାଡ଼ିଆ ରାସ୍ତାରେ ଯାତାୟାତ ମୁସ୍କିଲ। ଗଂଜାମ ଜିଲ୍ଲା ଧରାକୋଟ ବ୍ଲକ ଉପାନ୍ତ ତାନାର୍ଜୀପଲ୍ଲୀ ଗାଁ । ଗଞ୍ଜାମ-ଗଜପତି ସୀମାନ୍ତରେ ଅବସ୍ଥିତ ଏହି ଗାଁରେ ପ୍ରାୟ ୫୦ ପରିବାର ବସବାସ କରନ୍ତି। ବଣ, ପାହାଡ଼ ଆଉ ଦୁର୍ଗମ ରାସ୍ତା ଯୋଗୁଁ ପିଲାଙ୍କ ପାଇଁ ଶିକ୍ଷା ଏଠି ଏକ ବଡ଼ ଚ୍ୟାଲେଞ୍ଜ । ସ୍ୱଳ୍ପ ପିଲା ଥିବା ଦର୍ଶାଇ ଏଠାରେ ଥିବା ସ୍କୁଲକୁ ବନ୍ଦ କରି ଦିଆଯାଇଛି। ଫଳରେ କିଛି ପିଲାଙ୍କ ପାଠପଢ଼ାରେ ଡୋରି ଲାଗିଥିବାବେଳେ ଆଉ କିଛି ପିଲାଙ୍କୁ ପଡ଼ୋଶୀ ଜିଲ୍ଲା ଗଜପତିକୁ ଯିବାକୁ ପଡୁଛି । ପ୍ରାୟ ୬ କିଲୋମିଟର ପାହାଡ଼ିଆ ଓ ବିପଦସଙ୍କୁଳ ରାସ୍ତାରେ ଗଜପତି ବାଲିପଦାର ସ୍କୁଲକୁ ଯାଉଛନ୍ତି ପିଲା। ଗାଁରେ ଥିବା ସ୍କୁଲକୁ ୨୦ କିଲୋମିଟର ଦୂରରେ ଥିବା କାଦଗୁଡା ସ୍କୁଲ ସହ ମିଶ୍ରଣ କରାଯାଇଛି। ଫଳରେ ଏତେ ଦୂର ଯାଇ ପାଠ ପଢିବା ପିଲାଙ୍କ ପକ୍ଷେ ସମ୍ଭବ ହେଉନି। ତେଣୁ ଅନେକ ପିଲା ଅଧାରୁ ପାଠ ଛାଡିଛନ୍ତି। ଏଠାରେ ଥିବା ସ୍କୁଲକୁ ପୁନର୍ବାର ଖୋଲିବା ପାଇଁ ଗ୍ରାମବାସୀ ବାରମ୍ବାର ଦାବି କରିଥିଲେ ସୁଦ୍ଧା କୌଣସି ସୁଫଳ ମିଳିନି। ଏବେ ପିଲାଙ୍କ ଭବିଷ୍ୟତ ନେଇ ଚିନ୍ତାରେ ଅଭିଭାବକ। ତୁରନ୍ତ ସ୍କୁଲ ଖୋଲିବାକୁ ପ୍ରଶାସନ ନିକଟରେ ଦାବି କରିଛନ୍ତି ଗ୍ରାମବାସୀ।
ବାଟ ହୁଡ଼ିଛି ବିକାଶ, ଆଜି ବି ମୌଳିକ ସୁବିଧାରୁ ବଞ୍ଚିତ ତୁଳସୀ ଘାଟିବାସୀ
ନନ୍ଦିଘୋଷ ବ୍ୟୁରୋ : ବାଟ ହୁଡ଼ିଛି ବିକାଶ । ମାଲକାନଗିରି ଜିଲ୍ଲା ମାଥିଲି ଥାନା ତୁଳସୀ ଘାଟି ଅଞ୍ଚଳରେ ପଡିନି ବିକାଶର ପଦଚିହ୍ନ। ଆଜି ବି ଶିକ୍ଷା , ସ୍ବାସ୍ଥ୍ୟ , ଗମନାଗମନ ଏବଂ ବିଦ୍ୟୁତ ଭଳି ମୌଳିକ ସୁବିଧାରୁ ବଞ୍ଚିତ ଘାଟି ବାସିନ୍ଦା । ଗୋଟିଏ ଅଙ୍ଗନବାଡ଼ି ଅଛି ।ହେଲେ ନିଜସ୍ବ ଗୃହ ନାହିଁ। ଦଦରା ମାଟି କୁଡିଆ ଘରେ ସ୍କୁଲ ଓ ଅଙ୍ଗନବାଡି ପିଲା ପାଠ ପଢୁଛନ୍ତି । ବିପଦ ସଙ୍କୁଳ ଅବସ୍ଥାରେ ପିଲାଙ୍କୁ ପାଠ ପଢ଼ାଉଛନ୍ତି ଶିକ୍ଷକ ଓ ଅଙ୍ଗନବାଡ଼ି କର୍ମୀ । ତୁଳସୀ ଘାଟିରେ ରହିଛି କେରମେଟି ଗାଁ। ଯେଉଁଠାରେ ବିଜୁଳି ଆଲୁଅ ସାତସପନ। ଖୋଦ ନବରଙ୍ଗପୁର ସାଂସଦ ବାଇକ ଯୋଗେ ପୂରା ଅଞ୍ଚଳ ବୁଲି ଉନ୍ନୟନ କାର୍ଯ୍ୟ ସମ୍ପର୍କରେ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି । ଉନ୍ନୟନ କାର୍ଯ୍ୟ କୁ ତ୍ବରାନ୍ବିତ କରିବା ସହ ପୂର୍ବରୁ ଲାଲଗଡ ବୋଲାଉଥିବା ଘାଟି ବାସିନ୍ଦାଙ୍କୁ ମୌଳିକ ଅଧିକାରରେ ଯୋଡିବା ପାଇଁ ନିର୍ଦ୍ଦେଶ ଦେଇଛନ୍ତି ।
ଛାତ୍ରର ଛୁରାମାଡରେ ଅନ୍ୟ ଛାତ୍ର ଗୁରୁତର
ନନ୍ଦିଘୋଷ ବ୍ୟୁରୋ : ଛାତ୍ରର ଛୁରାମାଡରେ ଅନ୍ୟ ଛାତ୍ର ଗୁରୁତର । ଛାତ୍ର ଏବଂ ଛାତ୍ର ମଧ୍ୟରେ କୌଣସି କଥାକୁ ନେଇ ଝଗଡ଼ା ହେବାରୁ ଛାତ୍ରର ଛୁରାମାଡରେ ଅନ୍ୟ ଜଣେ ଛାତ୍ର ଗୁରୁତର ହୋଇଥିବା ଅଭିଯୋଗ ହୋଇଛି । ସମ୍ବଲପୁର ଜିଲ୍ଲା କୁଚିଣ୍ଡାର ଏକ ଘରୋଇ କୋଚିଂ ସେଣ୍ଟର ବାହାରେ ଘଟିଛି ଘଟଣା । ଛାତ୍ରଙ୍କୁ ଗୁରୁତର ଅବସ୍ଥାରେ କୁଚିଣ୍ଡା ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରାଯାଇଛି । ଛାତ୍ରର ପିଠିରେ ଗଭୀର ଆଘାତ ଲାଗିଛି । ଛାତ୍ର ଜଣକ ଏକ ଘରୋଇ କୋଚିଂ ସେଣ୍ଟର ହଷ୍ଟେଲରେ ରହି ପାଠ ପଢୁଥିଲେ। କୁଚିଣ୍ଡା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଏହି ସଂକ୍ରାନ୍ତରେ ପୋଲିସ ୨ ଜଣଙ୍କୁ ଅଟକ ରଖି ପଚରାଉଚୁରା କରୁଥିବା ଜଣାପଡ଼ିଛି । ଛାତ୍ରଙ୍କ ପରିବାର ପକ୍ଷରୁ କୁଚିଣ୍ଡା ଥାନାରେ ଲିଖିତ ଅଭିଯୋଗ ମଧ୍ୟ ହୋଇଛି l ତେବେ କେଉଁ କାରଣରୁ ଏହି ଆକ୍ରମଣ ହେଲା, ସେ ନେଇ ପ୍ରକୃତ କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି ।…
ପୁରୀରେ ପର୍ଯ୍ୟଟକଙ୍କୁ ଆକ୍ରମଣ, ପୁରୀ ସ୍ୱର୍ଗଦ୍ୱାର ଅଞ୍ଚଳରେ ଥିବା ଏକ ରେସ୍ତୋରାଁ କର୍ମଚାରୀଙ୍କ ବର୍ବରତା
ନନ୍ଦିଘୋଷ ବ୍ୟୁରୋ : ପୁରୀ ସ୍ୱର୍ଗଦ୍ୱାର ଅଞ୍ଚଳରେ ଥିବା ଏକ ରେସ୍ତୋରାଁ କର୍ମଚାରୀଙ୍କ ବର୍ବରତା ନଜରକୁ ଆସିଛି । ନିମ୍ନ ମାନର ଓ ଅସ୍ୱାସ୍ଥ୍ୟକର ଖାଦ୍ୟ ବିରୋଧରେ ପ୍ରତିବାଦ କରିବାରୁ ଗର୍ଭବତୀ ପର୍ଯ୍ୟଟକଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି । ଏହି ଘଟଣା ପରେ ଜୀବନରେ କେବେ ପୁରୀ ଆସିବେନି ବୋଲି କାନ୍ଦି କାନ୍ଦି କହିଛନ୍ତି ମହିଳା ଜଣକ । ଗର୍ଭବତୀ ଜାଣିବି ରେସ୍ତୋରାଁ ସଟର ବନ୍ଦ କରି ମହିଳା ଓ ତାଙ୍କ ସ୍ୱାମୀଙ୍କୁ ମାଡ ମାରିଥିବା ଅଭିଯୋଗ ହୋଇଛି । ଉଭୟଙ୍କ ଗାଲ, କାନ ଓ ଏକାଧିକ ସ୍ଥାନରେ ହୋଇଛି କ୍ଷତ । ମହୀଶୂରରୁ ଆସିଥିବା ସୁସ୍ମିତା ଓ ତାଙ୍କ ପରିବାର ଓ ସମ୍ପର୍କୀୟ ମିଶି ପ୍ରାୟ ୧୩ ଜଣ ପୁରୀ ସ୍ୱର୍ଗଦ୍ୱାର ଅଞ୍ଚଳର ଏକ ହୋଟେଲକୁ ଖାଇବାକୁ ଯାଇଥିଲେ । ସେଠାରେ ଖାଦ୍ୟରେ ଚୁଟି ବାହାରିବାକୁ ନେଇ ରେସ୍ତୋରାଁ କର୍ମଚାରୀଙ୍କୁ ଅଭିଯୋଗ କରିଥିଲେ । ବଦଳରେ ଖାଇବା ପରଷିବା ଜାଗାରେ ଓଲଟା ଟଙ୍କା ଦେଲେ ଆଉ ଖାଦ୍ୟ ପରସିବେ ବୋଲି ଜିଦି ଧରିଥିଲେ ରେସ୍ତୋରାଁ କର୍ମଚାରୀ । ମହିଳା ଜଣଙ୍କ ଖାଇବା ଦେବା ପରେ ଟଙ୍କା ଦେବାକୁ ହୋଟେଲ କର୍ମଚାରୀଙ୍କୁ ଅନୁରୋଧ କରିଥିଲେ । ହେଲେ ସେଥିପ୍ରତି କର୍ଣ୍ଣପାତ ନକରି ଖାଇବା ଦେବା ପୂର୍ବରୁ ଟଙ୍କା ନେବା ପାଇଁ ହୋଟେଲ କର୍ମଚାରୀ ଜିଦ୍ ଧରିଥିଲେ ବୋଲି ମହିଳା ଜଣଙ୍କ ଅଭିଯୋଗ କରିଛନ୍ତି । ପରେ ପ୍ରତିବାଦରେ ମହିଳା ଜଣଙ୍କ ଭିଡିଓ କରିଥିଲେ । ଏଥିରେ ହୋଟେଲ କର୍ମଚାରୀ ଉତକ୍ଷିପ୍ତ ହୋଇ ହୋଟେଲର ସଟର ବନ୍ଦକରି ମହିଳା ଓ ତାଙ୍କ ସ୍ୱାମୀଙ୍କୁ ମାଡ ମାରିଥିବା ସେ ଅଭିଯୋଗ କରିଛନ୍ତି । ପୁରୀ ସଦର ମୁଖ୍ୟ ଚିକିତ୍ସାଳୟରେ ସେ ଚିକିତ୍ସିତ ହେଉଥିବା ବେଳେ ତାଙ୍କ ଗାଲ,ଓ ଏକାଧିକ ସ୍ଥାନରେ ଆଘାତ ଲାଗିଥିଲା ।…