ନନ୍ଦିଘୋଷ ବ୍ୟୁରୋ : ଇତିହାସ ରଚିଲା ଋଷ । ପ୍ରଥମ ଥର ପାଇଁ AI ଟେକ୍ନୋଲୋଜି ମାଧ୍ୟମରେ ସୁଖୋଇ Su-57M ଯୁଦ୍ଧ ବିମାନ ଉଡ଼ାଇଛି । ଏହି ବିମାନଟି ମେ ୧୫ ତାରିଖରେ AI ସହିତ ପ୍ରଥମ ଉଡ଼ାଣ କରିଥିଲା। Su-57 କୁ ରୁଷିଆର ୟୁନାଇଟେଡ୍ ଏୟାରକ୍ରାଫ୍ଟ କର୍ପୋରେସନ UAC ଏବଂ ସୁଖୋଇ ଡିଜାଇନ୍ ବ୍ୟୁରୋ ମିଳିତ ଭାବରେ ବିକଶିତ କରିଛନ୍ତି । ଏହା ଏକ ପଞ୍ଚମ ପିଢ଼ିର ଗୁପ୍ତ ଯୁଦ୍ଧ ବିମାନ । ଯାହାକୁ ରୁଷ ଆକାଶ ପଥ ଯୁଦ୍ଧ କ୍ଷେତ୍ରରେ ବ୍ୟବହାର କରିବ । ଆକାଶ, ସ୍ଥଳ, ଜଳ ପଥରେ ଆକ୍ରମଣ ପାଇଁ ଏହି ଏଆଇ ଯୁଦ୍ଧ ବିମାନ ଏକ ମାଇଲ୍ ଖୁଣ୍ଟ ପାଲଟିବ ବୋଲି କହିଛନ୍ତି ପରୀକ୍ଷଣ ପାଇଲଟ୍ ସେରଗେଇ ବୋଗଡାନ୍। ଦୂରଗାମୀ ରାଡାରରେ ସଜ୍ଜିତ, Su-57M ଏକ ଆଧୁନିକ ଯୁଦ୍ଧ ବିମାନର ପ୍ରଯୁକ୍ତିବିଦ୍ୟା ମାନଦଣ୍ଡକୁ ଉଚ୍ଚତର କରିବାକୁ ଲକ୍ଷ୍ୟ ରଖିଛି। ଏହା ଋଷକୁ ଆହୁରି ଶକ୍ତିଶାଳୀ କରିବ ବୋଲି ମତ ପ୍ରକାଶ ପାଇଁଛି ।
ଏକା ସାଙ୍ଗରେ ଆସୁଛି ଦୁଇଟି ଲଘୁଚାପ , ଭିଜିବ ପୁରା ଓଡିଶା
ନନ୍ଦିଘୋଷ ବ୍ୟୁରୋ : ଏକା ସାଙ୍ଗରେ ଆସୁଛି ଦୁଇଟି ଲଘୁଚାପ । ମେ’ ଶେଷ ସପ୍ତାହରେ ବଙ୍ଗୋପସାଗର ଏବଂ ଆରବସାଗରରେ ଲଘୁଚାପ ସମ୍ଭାବନା ରହିଛି । କାଲି ବେଳକୁ ଆରବସାଗରର କର୍ଣ୍ଣାଟକ ଉପକୂଳରେ ଘୁର୍ଣ୍ଣିବଳୟ ସମ୍ଭାବନା ରହିଛି । ୨୨ ମେ’ ବେଳକୁ ଏହା ଲଘୁଚାପର ରୂପ ନେବ । ଏହି ଲଘୁଚାପ ଅଧିକ ଘନୀଭୂତ ହେଇ ଉତ୍ତରକୁ ଗତି କରିପାରେ । ୨୭ ମେ’ ବେଳକୁ ପୂର୍ବ କେନ୍ଦ୍ରୀୟ ବଙ୍ଗୋପସାଗର ତଥା ଏହାର ସଂଲଗ୍ନ ଅଞ୍ଚଳରେ ଆଉ ଏକ ଘୁର୍ଣ୍ଣିବଳୟ ସୃଷ୍ଟି ହେଇପାରେ ବୋଲି ଅନୁମାନ କରିଛି ପାଣିପାଗ ବିଭାଗ। ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହେଇ ଲଘୁଚାପର ରୂପ ନେବ । ରାଜ୍ୟରେ ବର୍ତ୍ତମାନ ଗରମ ଗୁଳୁଗୁଳି ଜାରି ରହିଛି । ଉପକୂଳବର୍ତ୍ତି ଜିଲ୍ଲା ବାଲେଶ୍ୱର,ଭଦ୍ରକ,କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, କଟକ, ପୁରୀ, ଖୋର୍ଦ୍ଧା, ନୟାଗଡ଼, କଟକ, ଗଞ୍ଜାମ, ଗଜପତିରେ ଗରମ ଗୁଳୁଗୁଳିକୁ ନେଇ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଆଗାମୀ ୩ ଦିନ ପାଇଁ କାଳବୈଶାଖୀ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଛି । ଅନ୍ୟପଟେ ମେ ୨୩ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ଲାଗିରହିବ କାଳବୈଶାଖୀ ବର୍ଷା ।
ପିଲାଙ୍କ ମଧ୍ୟରେ ମଧୁମେହ ବଢାଇଛି ଚିନ୍ତା
ନନ୍ଦିଘୋଷ ବ୍ୟୁରୋ: ଦିନକୁ ଦିନ ବଢିଚାଲିଛି ମଧୁମେହ ଚିନ୍ତା।ଖାସ କରି ପିଲାମାନଙ୍କ ଭିତରେ ଏହାର ଲକ୍ଷଣ ଦେଖିବାକୁ ମିଳୁଛି। ସଚେତନତା ଅଭାବରୁ ପିଲାମାନେ ଜଙ୍କ ଫୁଡ୍ ଖାଇବା ସହ ଆଉ ଖେଳକୁଦ ପ୍ରତି ଧ୍ୟାନ ଦେଉ ନଥିବାରୁ ଏପରି ପରିସ୍ଥିତି ସୃଷ୍ଟି ହୋଇଛି।ଏଣିକି ସ୍କୁଲସ୍ତରରୁ ପିଲାମାନଙ୍କୁ ସଚେତନ କରିବାକୁ ଯୋଜନା ପ୍ରସ୍ତୁତ କରିଛି ସିବିଏସଇ।ପିଲାଙ୍କ ମଧ୍ୟରେ ମଧୁମେହ ରୋକିବାକୁ ସିବିଏସଇ ପକ୍ଷରୁ ସ୍କୁଲରେ ଗଠନ ହେବ ସୁଗାର ବୋର୍ଡ। ଏହାକୁ କାର୍ଯ୍ୟକାରୀ କରିବା ପାଇଁ ସିବିଏସଇ ପକ୍ଷରୁ ସମସ୍ତ ସ୍କୁଲକୁ ଚିଠି କରାଯାଇଛି।
ଜୀବନଶୈଳୀ ବଦଳିବା ସହ ରୋଗଗ୍ରସ୍ତ ହେଉଛନ୍ତି ଲୋକେ। ପୂର୍ବରୁ କାଁଭାଁ ପିଲାଙ୍କ ଭିତରେ ମଧୁମେହ ଦେଖାଯାଉଥିଲା। ଏବେ ପ୍ରାୟ ୬୦% ପିଲାଙ୍କ ଭିତରେ ଟାଇପ୍-୨ ମଧୁମେହର ଲକ୍ଷଣ ଉଦବେଗଜନକ ସ୍ଥିତି ସୃଷ୍ଟି କରିଛି। ଏଥିପାଇଁ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ CBSE ପକ୍ଷରୁ ପ୍ରତିଟି CBSE ପରିଚାଳିତ ସ୍କୁଲରେ ସୁଗାର ବୋର୍ଡ ଗଠନ ଲାଗି ନିର୍ଦ୍ଦେଶ ଦିଆଯାଇଛି।ଏହି ବୋର୍ଡ ପିଲାଙ୍କ ରକ୍ତ ଶର୍କରା ନିୟନ୍ତ୍ରଣ ଲାଗି ପଦକ୍ଷେପ ନେବା ସହ ନିୟମିତ ଯାଞ୍ଚ କରିବ। ଅଧିକ ଶର୍କରାଯୁକ୍ତ ସ୍ନାକ୍ସ, ମୃଦୁ ପାନୀୟ, ପ୍ରକ୍ରିୟାକୃତ ଖାଦ୍ୟ, ଫାଷ୍ଟଫୁଡ୍ ମାତ୍ରାଧିକ ଖାଇବା ଯୋଗୁ ମଧୁମେହ ହେଉଛି। ଶର୍କରା ଯୁକ୍ତ ଖାଦ୍ୟ ପିଲାଙ୍କ ମଧ୍ୟରେ ମେଦବହୁଳତା ଅନ୍ୟ ଏକ କାରଣ।ଦାନ୍ତ ସମସ୍ୟା, ଖାଦ୍ୟ ହଜମ ନହେବା ଭଳି ଲକ୍ଷଣ ଦେଖାଦେଉଛି। ସମସ୍ୟା ଲାଗି ରହିଲେ ଶିକ୍ଷାରେ ନୈରାଶ୍ୟଜନକ ପ୍ରଦର୍ଶନ ହୋଇପାରେ। ସୁଗାର ବୋର୍ଡରେ ପିଲାଙ୍କୁ ଶର୍କରାଯୁକ୍ତ ଖାଦ୍ୟରୁ ଦୂରେଇ ରହିବା ପାଇଁ ଶିକ୍ଷା ସହ ସଚେତନ କରାଯିବ। କେଉଁ ପ୍ରକାର ଖାଦ୍ୟ ପିଲାଙ୍କ ପାଇଁ ସ୍ବାସ୍ଥ୍ୟକର ଏହାକୁ ନେଇ ସଚେତନ କରାଯିବ। ସ୍କୁଲର ଶିକ୍ଷକ, ଅଭିଭାବକ ଓ ଡାକ୍ତରଙ୍କୁ ନେଇ ସ୍କୁଲରେ ସୁଗାର ବୋର୍ଡ ଗଠନ କରାଯିବ।
ଜଙ୍କ ଫୁଡ୍ ଖାଇବା ସହ ପିଲାମାନଙ୍କ ଭିତରେ ବ୍ୟାୟାମର ଅଭାବ ରହୁଛି। ଖୋଳକୁଦ ବଦଳରେ ମୋବାଇଲ ଫୋନ୍, କମ୍ପ୍ୟୁଟର ଓ ଟିଭି ଆଗରେ ଦିନ କାଟୁଛନ୍ତି। କୋଭିଡ ପରେ ସତେ ଯେପରି ଖେଳକୁଦ ଉଭାନ ହୋଇଯାଇଛି। ଟାଇପ୍ -୨ ମଧୁମେହ ଯୋଗୁ ଶରୀରରେ ଇନସୁଲିନ କମିଯାଇଥାଏ। ଇନସୁଲିନ୍ ଯୋଗୁ ଶରୀରରେ ଗ୍ଲୁକୋଜ ସୃଷ୍ଟି ହୋଇଥାଏ। ଯାହା ରକ୍ତସଂଚାଳନକୁ ନିୟନ୍ତ୍ରଣରେ ରଖେ। ଅଧିକ ଶୋଷ, ପରିସ୍ରା, ଓଜନ ହ୍ରାସ, ଦୃଷ୍ଟି ଶକ୍ତିରେ କ୍ଷୟ, ସଂକ୍ରମଣ ଟାଇପ- ୨ ମଧୁମେହର ଲକ୍ଷଣ। ଏପରି ସ୍ଥିତି ଉପୁଜିଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ ପଡ଼ିବ ।
କାମ ଦେଉନି ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣି, ନିର୍ଦ୍ଦେଶ ପରେ ବି ସମସ୍ୟାର ହେଉନି ସମାଧାନ
ନନ୍ଦିଘୋଷ ବ୍ୟୁରୋ: ଆଉ ଦୁଇ ସପ୍ତାହ ପରେ ରାଜ୍ଯ ସରକାର ବର୍ଷ ପୂର୍ତ୍ତି ଉତ୍ସବ ପାଳିବାକୁ ଯାଉଛନ୍ତି। ବର୍ଷ ପୂର୍ତ୍ତି ଉତ୍ସବରେ ବର୍ଷକ ମଧ୍ଯରେ ସରକାର ଗ୍ରହଣ କରିଥିବା ସବୁ ବିକାଶମୂଳକ କାମର ତାଲିକା ଦେବେ। ଏଥିପାଇଁ ଜୋରସୋରରେ ପ୍ରସ୍ତୁତି ଚାଲିଛି। ହେଲେ ବହୁ ଆଶା ନେଇ ମୁଖ୍ଯମନ୍ତ୍ରୀଙ୍କ ଅଭିଯୋଗ ଶୁଣାଣୀକୁ ଆସୁଥିବା ଲୋକଙ୍କ ମଧ୍ଯରୁ ବହୁ ଲୋକଙ୍କ ସମସ୍ଯାର ସମାଧାନ ହେଉନଥିବା ଅଭିଯୋଗ ହେଉଛି। ବାରମ୍ବାର ଆସୁଛନ୍ତି, ହେଲେ ଫଳ ଶୂନ। ମୁଖ୍ଯମନ୍ତ୍ରୀ ଦେଉଥିବା ନିର୍ଦ୍ଦେଶକୁ ତଳ ସ୍ତରରେ ଅଫିସର ମାନୁନଥିବା ଅଭିଯୋଗ ହେଉଛି।
ମୁଖ୍ଯମନ୍ତ୍ରୀଙ୍କ ନିର୍ଦ୍ଦେଶ ପରେ ବି ଲୋକଙ୍କ ସମସ୍ଯାର ହେଉନି ସମାଧାନ । ଅଭିଯୋଗ ଶୁଣାଣୀକୁ ଆସିଥିବା କିଛି ସଂଗଠନ ଓ ସାଧାରଣ ଲୋକ ଏଭଳି ଅଭିଯୋଗ କରିଛନ୍ତି… ଅଭିଯୋଗ ଶୁଣାଣି କାର୍ଯ୍ୟକ୍ରମକୁ ଯାଇ ଅନେକ ହେଉଛନ୍ତି ନିରାଶ । ରାଜେଶ କୁମାର ବେହେରା। ଅନୁକମ୍ପାମୂଳକ ଥଇଥାନ ଆଶାୟୀ ଭାବେ ରାଜେଶଙ୍କ ସହ ଅନେକ ପିଲା ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ଦୌଡ଼ି ଦୌଡ଼ି ନୟାନ୍ତ ହୋଇଛନ୍ତି । ସମ୍ବଲପୁରରେ ଅଭିଯୋଗ ଶୁଣାଣି ବେଳେ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ । ସମସ୍ତଙ୍କ ପାଇଁ କିଛି କରାଯିବ ବୋଲି କହିଥିଲେ ମୁଖ୍ଯମନ୍ତ୍ରୀ । ହେଲେ ଆଜିର ଶୁଣାଣି ବେଳେ ପ୍ରତିଶ୍ରୁତି ପାଲଟିଛି ପାଣି ଫୋଟକା । ନିରାଶ ହୋଇ ଚରମ ନିଷ୍ପତ୍ତି ନେବାକୁ ଚିନ୍ତା କରୁଛନ୍ତି ସମସ୍ତେ । ସେହିଭଳି କଂହ୍ନେଇପୁରର ସରୋଜିନୀ ମୁଦୁଲି ମୁଖ୍ୟମନ୍ତ୍ରୀଙ୍କୁ ଦୁଇଥର ଭେଟିଲେଣି। ଘର ଭାଙ୍ଗି ଯିବା ନେଇ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ବାରମ୍ବାର ସାକ୍ଷାତ ପରେ ବି ଫଳ ଶୂନ। ଏଥର ସମସ୍ୟା ନଶୁଣିଲେ ଭରସା ତୁଟିଯିବ ବୋଲି ସେ କହିଛନ୍ତି।
ସେପଟେ ମସସ୍ତଙ୍କୁ ଆଶ୍ଚର୍ଯ୍ୟ କରିଛି ଜଣେ ଉଚ୍ଚ ଶିକ୍ଷିତା ମହିଳା ଅର୍ଚ୍ଚନା କାନୁନଗଙ୍କ କଥା । ଅଭିଯୋଗ ପ୍ରକୋଷ୍ଠରେ ସମସ୍ୟାର ସମାଧାନ ନେଇ ତାଙ୍କୁ ମୁଖ୍ୟମନ୍ତ୍ରୀ ପ୍ରତିଶୃତି ଦେଇଥିଲେ । ଅର୍ଚ୍ଚନାଙ୍କ ଆଗରେ ତୁରନ୍ତ ଅଭିଯୋଗର ସମାଧାନ ପାଇଁ ଅଧିକାରୀଙ୍କୁ ନିର୍ଦ୍ଦେଶ ମଧ୍ୟ ଦେଇଥିଲେ । ଏହି ଘଟଣାକୁ ପୁରିଲାଣି ଦୁଇ ମାସ । ହେଲେ ଆଜି ପର୍ଯ୍ୟନ୍ତ ତାଙ୍କ ସମସ୍ଯାର ସମାଧାନ ହୋଇପାରୁନି । ସେହିଭଳି ଜିଆଇଏ ଦାବି ନେଇ ବାରମ୍ବାର ଅଭିଯୋଗ ପ୍ରକୋଷ୍ଠ ଆସିଛନ୍ତି ଶିକ୍ଷକ ଅଧ୍ୟାପକ ସଂଘ। ପୂର୍ବରୁ ହାଇଲେବଲ କମିଟି ଗଠନ କଥା କହିଥିଲେ। ଶହେ ଦିନରେ ଦାବି ପୂରଣ ହେବ ବୋଲି କହିଥିଲେ ସରକାର, ଶହେ ବଦଳରେ ୩୬୫ ଦିନ ହେଲାଣି କିନ୍ତୁ କିଛି ହେଉନି ବୋଲି ଅଭିଯୋଗ ହୋଇଛି। ସେପଟେ ଏବେ ସୁଦ୍ଧା ଅଭିଯୋଗର ୮୫ ପ୍ରତିଶତ ସମସ୍ୟାର ସମାଧାନ ହୋଇ ପାରିଛି ବୋଲି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ଅଭିଯୋଗ ପରେ ଅଭିଯୋଗ ଶୁଣା ଚାଲିଛି କିନ୍ତୁ ଫଳ ଶୁନ। ବାରମ୍ବାର ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଦୌଡ଼ି ଦୌଡ଼ି ଏବେ ନିରାଶ ଜନତା ।
କଲେଜରେ ମୌଳିକ ସୁବିଧା ନଥିବାରୁ ମରଣମୁହଁରେ ଛାତ୍ରଛାତ୍ରୀ
ନନ୍ଦିଘୋଷ ବ୍ୟୁରୋ: ଘରୋଇ କଲେଜରେ ମୌଳିକ ସୁବିଧା ନଥିବାରୁ ମରଣମୁହଁରେ ପଡ଼ୁଛନ୍ତି ଛାତ୍ରଛାତ୍ରୀ । ଯାଇଛି ୨ ଜଣଙ୍କ ଜୀବନ । ଏଭଳି ଅଭିଯୋଗ ଆସିଛି ଢେଙ୍କାନାଳରୁ । ଯାହାକୁ ନେଇ ଅଭିଭାବକ ମହଲରେ ତୀବ୍ର ଅସନ୍ତୋଷ । ସ୍ଥାନୀୟ ଅଞ୍ଚଳରେ ଜନଅସନ୍ତୋଷ ତୀବ୍ର ହେବାରୁ ପ୍ରଶାସନର ନିଦ ଭାଙ୍ଗିଛି । ଏ ନେଇ ଏତଲା ଆଧାରରେ ତଦନ୍ତ କରୁଛି ପୋଲିସ ।
ବୈଷୟିକ କଲେଜ ଖୋଲି ଛାତ୍ରଛାତ୍ରୀଙ୍କଠୁ ମୋଟା ଅଙ୍କ ଟାଣୁଛନ୍ତି । ହେଲେ ଛାତ୍ରଛାତ୍ରୀଙ୍କ ପାଇଁ ଯୋଗାଉନାହନ୍ତି ମୌଳିକ ସୁବିଧା । ହଷ୍ଟେଲ ଅଛି ହେଲେ ସେଥିରେ ପାଣି ଆସୁନି । କଲେଜରେ ପାଣି ଅଭାବରୁ ପିଲାମାନେ ପୋଖରୀକୁ ଗାଧୋଇବାକୁ ଯାଇ ପ୍ରାଣ ହରାଇଛନ୍ତି । ଏଭଳି ଅଭିଯୋଗ ଆସିଛି ଢେଙ୍କାନାଳର ଘରୋଇ ଶିକ୍ଷାନୁଷ୍ଠାନ ବିରୋଧରେ । ଗତ ମାର୍ଚ୍ଚ ୨ ତାରିଖରେ ଏକ ଘରୋଇ ଆଇଟିଆଇ କଲେଜର ଜଣେ ଛାତ୍ର ହଷ୍ଟେଲରେ ପାଣି ନଥିବାରୁ ପୋଖରୀକୁ ଗାଧୋଇବାକୁ ଯାଇ ବୁଡ଼ିଗଲେ । ଘଟଣାସ୍ଥଳରେ ତାଙ୍କର ପ୍ରାଣହାନୀ ଘଟିଥିଲା । ତା’ପୂର୍ବରୁ ଫେବୃଆରୀ ୬ ତାରିଖରେ ଆଉ ଏକ ଘରୋଇ କଲେଜରେ ଜଣେ ଛାତ୍ରୀଙ୍କ ଝୁଲନ୍ତା ମୃତଦେହ ଦେଖିବାକୁ ମିଳିଥିଲା । ଯାହାକୁ ନେଇ ପରିବାର ଲୋକେ ଆତ୍ମହତ୍ୟା ଅଭିଯୋଗ ଆଣିଥିଲେ ।
ଢେଙ୍କାନାଳର ଗଳିକନ୍ଦିରେ ଗଢ଼ି ଉଠୁଛି ଛୋଟବଡ ଘରୋଇ କଲେଜ । ଦଲାଲ ମାଧ୍ୟମରେ ଅଭିଭାବକଙ୍କୁ ପ୍ରଲୋଭିତ କରି ବିଭିନ୍ନ ଜିଲ୍ଲାରୁ ପିଲାଙ୍କୁ ଆଣି ଭର୍ତ୍ତି କରାଯାଉଛି । କିନ୍ତୁ ଛାତ୍ରାବାସଗୁଡ଼ିକରେ କଲେଜ କର୍ତ୍ତୃପକ୍ଷ ମୌଳିକ ସୁବିଧା ଉପଲବ୍ଧ କରୁନଥିବା ଅଭିଯୋଗ ହୋଇଛି। ଖାଲି ସେତିକି ନୁହେଁ ଅଗ୍ନିନିରାପତ୍ତା ବ୍ୟବସ୍ଥା ମଧ୍ୟ ନଥିବା ଅଭିଯୋଗ ହୋଇଛି ।
ପୁନରୁଦ୍ଧାର ହୋଇପାରୁନି ବଲାଙ୍ଗୀର କ୍ଷୁଦ୍ର ଜଳସେଚନ ପ୍ରକଳ୍ପ ଗଡ଼ିଆଜୋର
ନନ୍ଦିଘୋଷ ବ୍ୟୁରୋ: ପୁନରୁଦ୍ଧାର ହୋଇପାରୁନି ବଲାଙ୍ଗୀର କ୍ଷୁଦ୍ର ଜଳସେଚନ ପ୍ରକଳ୍ପ ଗଡ଼ିଆଜୋର । ଦୀର୍ଘ ବର୍ଷ ଧରି ମାଟି, ପଙ୍କ କଢ଼ାନଯିବାରୁ ପାଣି ଦୂଷିତ ହେବା ସହ ବ୍ୟବହାର ଉପଯୋଗୀ ହେଉନି । ସ୍ଥାନୀୟ ଅଞ୍ଚଳର ଲୋକେ ଏହି ପାଣି ବ୍ୟବହାର କରିବା ଯୋଗୁ ବିଭିନ୍ନ ଚର୍ମ ରୋଗରେ ପଡ଼ୁଛନ୍ତି । ଏ ବର୍ଷ ଗ୍ରୀଷ୍ମ ଦିନରେ ଗୋଟିଏ ପରେ ଗୋଟିଏ ଜିଲ୍ଲାରେ ଉତ୍କଟ ଜଳ ସଂକଟ ଦେଖାଦେଲାଣି । ଖୋଦ ମୁଖ୍ୟମନ୍ତ୍ରୀ ଜଳସମ୍ପଦ ବିଭାଗ ଦାୟିତ୍ବରେ ଥାଇ ତ୍ବରିତ ପଦକ୍ଷେପ ନେଇନାହାନ୍ତି । ଜିଲ୍ଲା ପ୍ରଶାସନ ସବୁ ଜାଣି ନୀରବଦ୍ରଷ୍ଟା ସାଜୁଛି ।
କେଉଁଠି ନଈ ପୋଖରୀ ଶୁଖିଲା । ଆଉ କୋଉଠି ନଳକୂଅ ଓ ପାଣି ଟାଙ୍କି ଥିଲେ ବି ପାଣି ଆସୁନି । ପୋଖରୀ, ନଈ, ନାଳ ପୁନରୁଦ୍ଧାର ବି ହେଉନି । ଗ୍ରୀଷ୍ମ ଦାଉରେ ପାଣି ପାଇଁ ଲୋକେ ଡହଳବିକଳ । ସ୍ଥିତି ଏମିତି ଗୋଟିଏ ପରେ ଗୋଟିଏ ଜିଲ୍ଲାରେ ଉତ୍କଟ ଜଳସଂକଟ । ବଲାଙ୍ଗୀର ଗଡ଼ିଆଜୋର କ୍ଷୁଦ୍ର ଜଳସେଚନ ପ୍ରକଳ୍ପ ପୁନରୁଦ୍ଧାର ନ ହେବାରୁ ଲୋକେ ନାହିଁ ନଥିବା ଦଶା ଭୋଗୁଛନ୍ତି । ପଙ୍କ ଓ ମାଟିରେ ପୋତି ହେଲାଣି ଗଡ଼ିଆଜୋର । ଜଳସମ୍ପଦ ବିଭାଗର ଉଦାସୀନତା ଯୋଗୁ ଲୋକେ ଗୋଳିଆ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି । ଫଳରେ ନାନାଦି ଚର୍ମରୋଗରେ ପୀଡ଼ିତ ହୋଇଛନ୍ତି ଏହି ଜୋର ଉପରେ ନିର୍ଭର କରୁଥିବା ୭ରୁ ଅଧିକ ଗାଁ ଲୋକେ । ଖୋଦ ମୁଖ୍ୟମନ୍ତ୍ରୀ ଜଳ ସମ୍ପଦ ବିଭାଗ ଦାୟିତ୍ବରେ । ତଥାପି ତାଙ୍କ ବିଭାଗର ଅଧିକାରୀଙ୍କ ଅବହେଳା ଯେପରି ତାଙ୍କ ଆଖିକୁ ଦେଖାଯାଉନି ।
ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ କନାବିରା ଗାଁରେ ୧୯୯୫ ମସିହାରେ ଜଳ ସମ୍ପଦ ବିଭାଗ ପକ୍ଷରୁ ଆରମ୍ଭ ହୋଇଥିଲା ଗଡିଆଜୋର କ୍ଷୁଦ୍ର ଜଳସେଚନ ପ୍ରକଳ୍ପ । ୪୬୫ ହେକ୍ଟରରେ ବିରାଟକାୟ ଗଡିଆଜୋର ପ୍ରକଳ୍ପ ନିର୍ମାଣ ହୋଇଥିଲା । ୭ରୁ ଅଧିକ ଗାଁ ଲୋକେ ଉପକୃତ ହେବା ସହ ଖରିଫ ଓ ରବି ଋତୁରେ ଚାଷ କରୁଥିଲେ । ହେଲେ ଏବେ ପ୍ରକଳ୍ପଟି କାଦୁଅରେ ପୋତିହୋଇ ନଷ୍ଟ ହେବାକୁ ବସିଲାଣି । ବାରମ୍ବାର ଏ ନେଇ ସ୍ଥାନୀୟ ଲୋକେ ନେତା, ମନ୍ତ୍ରୀ ଓ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ବି କିଛି ଫରକ ପଡ଼ିନି । ନନ୍ଦିଘୋଷ ଟିଭିର ଏ ନେଇ ଅନୁଧ୍ୟାନ କରିବା ପରେ ଖୁବଶୀଘ୍ର ପ୍ରକଳ୍ପର ପୁନରୁଦ୍ଧାର କରାଯିବା ବୋଲି କହିଛନ୍ତି ଜିଲ୍ଲାପାଳ ।
ସମ୍ପତ୍ତି ପାଇଁ ହତ୍ୟା : ବଡ଼ ଭଉଣୀ ସାନ ଭାଇ ମିଶି ମଝିଆଁ ଭଉଣୀକୁ ମାରିଦେଲେ..
ନନ୍ଦିଘୋଷ ବ୍ୟୁରୋ: ସମ୍ବଲପୁର ଜିଲ୍ଲା ବାମରା ବ୍ଲକ ଗୋବିନ୍ଦପୁର ଥାନା ମଝି ପଡ଼ାରେ ରକ୍ତ ସମ୍ପର୍କରେ ରକ୍ତ ଛିଟା । ସମ୍ପତ୍ତି ଓ ଜମି ବାଡ଼ି ଭାଗ ବଣ୍ଟାକୁ କେନ୍ଦ୍ର କରି ନିଜର ମଝିଆ ଭଉଣୀକୁ ହତ୍ୟା । ବଡ଼ ଭଉଣୀ ଓ ସାନ ଭାଇ ମିଶି ହତ୍ୟା କରିଥିବା ଅଭିଯୋଗ । ଗୋବିନ୍ଦପୁର ନିବାସୀ ବିନୋଦ ବିହାରୀ ସାହୁଙ୍କ ମଝିଆ ଝିଅ ଲିନା ସାହୁ ବିବାହ ପରେ ଗତ କିଛି ବର୍ଷ ହେବ ପରିବାର ସହ ନ ରହି ସମ୍ବଲପୁର ଅଞ୍ଚଳରେ ଏକୁଟିଆ ରହି କାମଧନ୍ଦା କରି ଚଳୁଥିଲେ । ଏହା ମଧ୍ୟରେ ପୈତୃକ ସମ୍ପତ୍ତି ଓ ଜମିବାଡ଼ି ଭାଗ ବଣ୍ଟାକୁ ନେଇ ପରିବାର ଭିତରେ ତିକ୍ତତା ବଢ଼ି ଚାଲିଥିଲା ।
ଗତକାଲି ନିଜର ସମ୍ପର୍କୀୟ ବଡ଼ ବାପାଙ୍କ ଅନ୍ତେଷ୍ଟି କ୍ରିୟାରେ ଯୋଗଦେବାକୁ ଆସିଥିଲେ । ସମ୍ପର୍କୀୟ ଭାଇ ଘରେ ବିଶ୍ବାରାମ କରୁଥିବା ବେଳେ ତାଙ୍କ ଅବିବାହିତା ବଡ଼ ଭଉଣୀ ପୁଷ୍ପାଞ୍ଜଳୀ ସାହୁ ଓ ସାନ ଭାଇ ଗୋଲକ ସାହୁ ଲିନାକୁ ଗାଳିଗୁଳଜ କରିଥିଲେ । ବଚସା ପରେ ଛୁରୀରେ ଲିନାକୁ ଅତର୍କିତ ଆକ୍ରମଣ କରିଥିଲେ । ଲିନାଙ୍କୁ ଗୁରୁତର ଅବସ୍ଥାରେ ଗୋବିନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ଗୋବିନ୍ଦପୁର ପୋଲିସଅଭିଯୁକ୍ତ ବଡ଼ ଭଉଣୀ ଓ ସାନ ଭାଇକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ରକ୍ତ ନମୁନା ସଂଗ୍ରହ କରିଛି । ଶବ ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା କହିଛନ୍ତି କୁଚିଣ୍ଡା ଏସଡିପିଓ ପ୍ରଦୀପ କୁମାର ଦାସ ।
କିନ୍ନର ପୂଜକ ଶଙ୍କର ରାନ୍ଧିଙ୍କୁ ଠେଙ୍ଗାରେ ପିଟି ପିଟି ନିର୍ମମ ହତ୍ୟା
ନନ୍ଦିଘୋଷ ବ୍ୟୁରୋ: କିନ୍ନର ପୂଜକଙ୍କୁ ପିଟିପିଟି ହତ୍ୟା । କୋରାପୁଟ ଜିଲ୍ଲା ସୁନାବେଡ଼ା ଥାନା କାକି ଗାଁରେ ହତ୍ୟାକାଣ୍ଡ । ମୃତକ ହେଉଛନ୍ତି ଗାଁର କିନ୍ନର ପୂଜକ ଶଙ୍କର ରାନ୍ଧି । ଠେଙ୍ଗାରେ ପିଟି ପିଟି ନିର୍ମମ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ମୃତକଙ୍କ ଭାଇ ସଞ୍ଜିତ ରାନ୍ଧି। ଏନେଇ ସୁନାବେଡ଼ା ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଅନୁଯାୟୀ ଗତ ରାତିରେ ଦେବ ଗୁଡ଼ିଆ ଓ ଲକ୍ଷ୍ମୀଧର ନାୟକ ତାଙ୍କୁ ମନ୍ଦିର ଭିତରୁ ଟାଣି ନେଇ ହତ୍ୟା କରି ଘର ଦାଣ୍ଡରେ ଫିଙ୍ଗି ଚାଲିଯାଇଥିଲେ । ତାଙ୍କୁ ତୁରନ୍ତ ସୁନାବେଡ଼ା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରକୁ ନିଆଯାଇଥିବାବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି । ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ୨ ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛନ୍ତି । ତେବେ ଏଭଳି ଘଟଣା ସୁନାବେଡ଼ା ଓ ସିମିଳିଗୁଡା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
ଜଳପ୍ରପାତରେ ବୁଡ଼ିଗଲେ ୪ ଡାକ୍ତର, ଚାଲିଗଲା ଜଣଙ୍କର ଜୀବନ
ନନ୍ଦିଘୋଷ ବ୍ୟୁରୋ: ଜଳପ୍ରପାତରେ ମସ୍ତି କରିବା ମହଙ୍ଗା ପଡ଼ିଛି ଇଣ୍ଟର୍ନ ଡାକ୍ତରଙ୍କୁ । ସାଥୀ ହୋଇ ଯାଇଥିବାବେଳେ ୪ ଜଣ ବୁଡ଼ି ଯାଇଥିଲେ ଆଉ ସେମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଛି । ତେବେ ଏଭଳି ଏକ ଦୁଃଖଦ ଖବର ଆସିଛି ଝାଡ଼ଖଣ୍ଡରୁ । ରାଜଧାନୀ ରାଞ୍ଚିର ସବୁଠାରୁ ବଡ଼ ହସ୍ପିଟାଲ ରିମ୍ସର ୨୬ ଜଣ ଇଣ୍ଟର୍ନ ଡାକ୍ତର ପିକନିକ ପାଇଁ ଯାଇଥିଲେ । ରାଞ୍ଚିଠାରୁ ୪୦ କିଲୋମିଟର ଦୂରରେ ଅବସ୍ଥିତ ପୋଓ୍ବାଘା ଓ୍ବାଟରଫଲକୁ ଯାଇଥିଲେ । ଏମାନେ ଏଠାରେ ଗାଧୋଉଥିବାବେଳେ ୪ ଜଣ ବୁଡ଼ି ଯାଇଥିଲେ ।
ସାଥୀ ଇଣ୍ଟର୍ନ ଡାକ୍ତରମାନେ ବୁଡ଼ିଯିବା ପରେ ପାଟି କରିଥିଲେ । ସ୍ଥାନୀୟ ଲୋକେ ସମସ୍ତଙ୍କୁ ଉଦ୍ଧାର କରିଥିଲେ । ଶେଷରେ ଉଦ୍ଧାର ହୋଇଥିଲେ ଅଭିଶେକ । ତାଙ୍କ ଅବସ୍ଥା ଗୁରୁତର ରହିଥିଲା । ପ୍ରଥେମ ସ୍ଥାନୀୟ ହସ୍ପିଟାଲ ଏବଂ ପରେ ରିମ୍ସକୁ ସ୍ଥାନାନ୍ତର କରାଯାଇଥିଲା । ଡାକ୍ତରୀ ଦଳ ତାଙ୍କ ଚିକିତ୍ସା କରିଥିଲେ । ମାତ୍ର ତାଙ୍କୁ ମୃତ ଘୋଷଣା କରିଥିଲେ । ସେପଟେ ଏହି ଖବର ପ୍ରଚାର ହେବା ପରେ ରିମ୍ସରେ ଶୋକର ଛାୟା ଖେଳିଯାଇଛି । ଅଭିଶେକଙ୍କ ପରିବାର ମହାରାଷ୍ଟ୍ରରେ ରହୁଥିବାବେଳେ ଖବର ପାଇଁ ପୁଅ ପାଖକୁ ଆସୁଛନ୍ତି ।
ନିତିଶଙ୍କ ସହ ଚିରାଗଙ୍କ ଭେଟକୁ ନେଇ ଚର୍ଚ୍ଚା, ଜାଣନ୍ତୁ ଏହା ପଛର ବଡ଼ କାରଣ..
ନନ୍ଦିଘୋଷ ବ୍ୟୁରୋ: ବିହାର ନିର୍ବାଚନ ତାରିଖ ଘୋଷଣା ହୋଇନଥିଲେ ସୁଦ୍ଧା ଏବେ ରାଜ୍ୟ ରାଜନୀତି ବେଶ ସରଗରମ ରହିଛି । ସମସ୍ତ ରାଜନୈତିକ ଦଳ ସରକାରକୁ ଆସିବା ପାଇଁ ନିଜର ଯୋଜନା ଚଳାଉଥିବାବେଳେ ଏଲଜେପି ସାଂସଦ ତଥା କେନ୍ଦ୍ରମନ୍ତ୍ରୀ ଚିରାଗ ପାଶଓ୍ବାନ ମୁଖ୍ୟମନ୍ତ୍ରୀଙ୍କ ନୀତିଶ କୁମାରଙ୍କୁ ଭେଟିଛନ୍ତି । ଯାହାକୁ ନେଇ ରାଜନୈତିକ ମହଲରେ ଅନେକ ଚର୍ଚ୍ଚା ଆରମ୍ଭ ହୋଇଛି । ସେପଟେ ଏହି ଚର୍ଚ୍ଚା ଭିତରେ ଚିରାଗଙ୍କ ପ୍ରତିକ୍ରିୟା ଆହୁରି ବଢ଼ାଇ ଦେଇଛି । ସେ କହିଛନ୍ତି କି, ମୋତେ ବିହାର ଡାକିଛି ।
ତେବେ ଚିରାଗ ପାଶଓ୍ବାନ ମୁଖ୍ୟମନ୍ତ୍ରୀ ହୋଇପାରନ୍ତି ବୋଲି ବିହାର ରାଜନୀତିରେ ଚର୍ଚ୍ଚା ଜୋର ଧରିଛି । ଏନଡିଏ ପକ୍ଷରୁ ଚିରାଗ ପାଶଓ୍ବାନଙ୍କୁ ମୁଖ୍ୟମନ୍ତ୍ରୀ ଚେହେରା ଭାବେ ଆସିବେ ବୋଲି କୁହାଯାଉଛି । ଏପରିକି ପାଟନାରେ ମଧ୍ୟ ଅନେକ ପୋଷ୍ଟର ଏଭଳି ମରାଯାଇଛି । ଯାହାକୁ ନେଇ କୁହାଯାଉଛି କି, ଆସନ ଭାଗବଣ୍ଟା ନେଇ ଉଭୟଙ୍କ ମଧ୍ୟରେ ଆଳୋଚନା ହୋଇଥିବ । ଏହାସହ ସିଧାସଳଖ ବିଜେପି ହାତକୁ ମୁଖ୍ୟମନ୍ତ୍ରୀ ନକରାଇବା ପାଇଁ ନୀତିଶ ଚଳାଉଥିବା ଯୋଜନା ମଧ୍ୟ ସଫଳ ହେବ ବୋଲି କୁହାଯାଉଛି ।