ଭୁବନେଶ୍ୱର: ଆଜିଠୁ ଯୁକ୍ତ ଦୁଇ ନାମଲେଖା ଆରମ୍ଭ। ଚଳିତ ଶିକ୍ଷାବର୍ଷ ପାଇଁ ଯୁକ୍ତ ଦୁଇ ନାମଲେଖା ଆବେଦନ ଆରମ୍ଭ ହୋଇଛି। ଏହି ନାମଲେଖା ଆବେଦନ ଜୁନ ୩୦ ପର୍ଯ୍ୟନ୍ତ ଚାଲିବ।
ସାମ୍ସ ପୋର୍ଟାଲ ଜରିଆରେ ଛାତ୍ରଛାତ୍ରୀମାନେ ଆବେଦନ କରିପାରିବେ। www.samsodisha.gov.in ରେ ଆବେଦନ କରିପାରିବେ ଛାତ୍ରଛାତ୍ରୀ। ଜୁଲାଇ ୭ରେ ବାହାରିବ ପ୍ରଥମ ମେରିଟ୍ ଲିଷ୍ଟ। ଜୁଲାଇ ୮ରୁ ୧୪ ତାରିଖ ଯାଏଁ ହେବ ଆଡମିଶନ୍ । ଏହାପରେ ଜୁଲାଇ ୨୪ ତାରିଖରୁ ଆରମ୍ଭ ହେବ ପାଠପଢ଼ା।
ସୁନ୍ଦରଗଡ଼: କୋଇଲା ପାଇଁ ସାରା ରାତି ଧାରଣାରେ ବସିଲେ ବିଧାୟକ। ରେଳ ସାଇଡିଂ ଠାରେ ସ୍ଥାନୀୟ ଲୋକଙ୍କ ସହିତ ଧାରଣାରେ ବସିଛନ୍ତି ସୁନ୍ଦରଗଡ଼ ବିଧାୟକ। ହେମଗିରି ବରପାଲି ରେଳ ସାଇଡିଂରୁ କୋଇଲା ପରିବହନକୁ ବିରୋଧ କରି ଦୀର୍ଘ ଚାରି ମାସ ହେବ ଧାରଣାରେ ବସିଛନ୍ତି। ଗତ କାଲି ପୁଣି ରାତିରେ କୋଇଲା ବେଆଇନ ଭାବରେ ରେଳ ଯୋଗେ ପରିବହନ କରାଯିବା ପାଇଁ ମସୁଧା ହେଉଥିବା ବେଳେ ରାତି ସାରା ବିଧାୟକ ସ୍ଥାନୀୟ ବାସିନ୍ଦାଙ୍କ ସହ ଧାରଣା ଦେଇଥିଲେ ।
ନନ୍ଦିଘୋଷ ବ୍ୟୁରୋ: ଛତିଶଗଡ ବିଜାପୁରରେ ଆତ୍ମସମର୍ପଣ କଲେ ୨୪ ଜଣ ମାଓବାଦୀ । CRPF ଡିଆଇଜି ରାକେଶ କୁମାର, ବିଜାପୁର ଏସପି ଜିତେନ୍ଦ୍ର ୟାଦବଙ୍କ ନିକଟରେ ଆତ୍ମସମର୍ପଣ କରିଛନ୍ତି। ୨୪ ଜଣ ମାଓବାଦୀଙ୍କ ମୁଣ୍ଡ ଉପରେ ମୋଟ ୮୭ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ ଛତିଶଗଡ ସରକାର। ଆତ୍ମସମର୍ପଣ କରିଥିବା ମାଓବାଦୀମାନଙ୍କୁ ପୁନର୍ବାସ, ନିଯୁକ୍ତି ଏବଂ ଶିକ୍ଷା ଭଳି ବିଭିନ୍ନ ସୁବିଧା ଯୋଗାଇ ଦିଆଯିବ ବୋଲି ବିଜାପୁର ଏସପି କହିଛନ୍ତି।
ଆତ୍ମସମର୍ପଣ କରିବା ପରେ ସେମାନଙ୍କୁ ଉତ୍ସାହିତ କରିବା ପାଇଁ ସରକାରଙ୍କ ଆତ୍ମସମର୍ପଣ ଏବଂ ପୁନର୍ବାସ ନୀତି ଅନୁଯାୟୀ ସମସ୍ତଙ୍କୁ ପ୍ରୋତ୍ସାହନ ସ୍ୱରୂପ ୫୦ ହଜାର ଟଙ୍କାର ଚେକ୍ ପ୍ରଦାନ କରାଯାଇଛି। ଆତ୍ମସମର୍ପଣ କରିଥିବା ମାଓବାଦୀଙ୍କ ମଧ୍ୟରେ PLGAର ଟପ୍ ମାଓନେତା ରାକେଶ, PLGA ବାଟାଲିୟନ ନମ୍ବର 01 ମାଓ ଡିଭିଜନର ସଦସ୍ୟ, CNM ସଭାପତି, KMS ସଭାପତି, କଳାହାଣ୍ଡି-କେନ୍ଦୁଝର-ବଲାଙ୍ଗୀର-ନୂଆପଡ଼ା KKBN ଡିଭିଜନ ପାର୍ଟି ସଦସ୍ୟ, LOS କମାଣ୍ଡର, CNM ସଦସ୍ୟ ରହିଛନ୍ତି।
ଯାଜପୁର: ୧୦୮ ଆମ୍ବୁଲାନ୍ସ ଗାଡି ଦୁର୍ଘଟଣାଗସ୍ତ। ଦୁର୍ଘଟଣାରେ ଆଟେଣ୍ଡାଣ୍ଟ ମୃତ, ଦୁଇ ଆହତ। ଯାଜପୁର ଧର୍ମଶାଳା ଥାନା ୧୬ ନଂ ଜାତୀୟ ରାଜପଥର ରଥିଆ ନିକଟରେ ଦୁର୍ଘଟଣା ଘଟିଛି। ଦୁର୍ଘଟଣାରେ ଆଟେଣ୍ଡାଟଙ୍କର ମୃତ୍ୟୁ ହୋଇଛି। ମୃତକ ହେଉଛନ୍ତି ବଉଲାଙ୍ଗ ମଧୁପୁର ଅଞ୍ଚଳର ଅଚ୍ୟୁତାନନ୍ଦ ବାରିକ। ଶ୍ରମ ନିୟମକୁ ଉଲ୍ଲଘଂନ କରି ଦଶରଥପୁରର ଏହି ୧୦୮ଆମ୍ବୁଲାନ୍ସ ଗାଡି ଦିନରେ ୬ଟି ରୋଗୀ ସେବା ଦେବା ପରେ ସଂଧ୍ୟାରେ ରୋଗୀକୁ କଟକରେ ଛାଡି ଫେରିଲା ବେଳେ ଦୁର୍ଘଟଣା ଘଟିଛି।
ଖବର ପାଇ ଘଟଣାସ୍ଥଳରେ ଧର୍ମଶାଳା ପୋଲାିସ ପହଞ୍ଚି ତଦନ୍ତ ଆରମ୍ଭ କରିଛି।
ଖୋର୍ଦ୍ଧା: ଭିଜିଲାନ୍ସ ଜାଲରେ ପୋଲିସ ବାବୁ। ଖୋର୍ଦ୍ଧା ଭିଜିଲାନ୍ସ ଜାଲରେ ବାଂକୋଇ ଫାଣ୍ଡି ଏଏସଆଇ ଓ ହୋମଗାର୍ଡ । ଲାଞ୍ଚ ନେଇ ଧରାପଡିଲେ ଏଏସଆଇ ତୁଷାର ନାୟକ ଓ ହୋମଗାର୍ଡ ପିକେ ସୁନ୍ଦରାୟ। ଏକ ମାମଲାରେ କେସ ଡାଏରୀରୁ ନାଁ ହଟାଇବା ପାଇଁ ୧୦ ହଜାର ଟଙ୍କା ଲାଞ୍ଚ ନେଉଥିଲେ। ଲାଞ୍ଚ ନେବାବେଳେ ଧରିଲା ଭିଜିଲାନ୍ସ ଟିମ। ତୁଷାରଙ୍କ ବାଂକୋଇ ଠାରେ ରହୁଥିବା ଘରେ ଭିଜିଲାନ୍ସ ଟିମ ଯାଞ୍ଚ କରୁଛି। ଉଭୟଙ୍କୁ ଭିଜିଲାନ୍ସ ଟିମ ଖୋର୍ଦ୍ଧାରୁ ଭୁବନେଶ୍ବରକୁ ନେଇଯାଇଛି। ଭିଜିଲାନ୍ସ ଡିଏସପି ଏହି ସୂଚନା ଦେଇଛନ୍ତି।
ଶୁକ୍ରବାର ରାତି ପ୍ରାୟ ସାଢେ ୧୧ଟା ସମୟରେ ଥାନାରେ ଲାଞ୍ଚ ନେଉଥିବା ବେଳେ ପୂର୍ବରୁ ଛକି ରହିଥିବା ଟିମ ତାଙ୍କୁ କାବୁ କରିଥିଲା। ତୁଷାର ନିକଟରେ ଉଲ୍ଲେଖନୀୟ ସେବା ପାଇଁ ଜିଲା ପୋଲିସ ପକ୍ଷରୁ ସମ୍ବର୍ଦ୍ଧିତ ହୋଇଥିଲେ।
ଢେଙ୍କାନାଳ: ଶିକାରୀ ଗୁଳିରେ ଫରେଷ୍ଟ ଗାର୍ଡ ମୃତ। ଢେଙ୍କାନାଳ ହିନ୍ଦୋଳ ରେଞ୍ଜରେ ଘଟିଛି ଏ ଅଘଟଣ। ବିଳମ୍ବିତ ରାତିରେ ଏଭଳି ଘଟିଥିବା ସୂଚନା ମିଳିଛି। ମୃତକ ହେଲେ ହିନ୍ଦୋଳ ରେଞ୍ଜରେ କାର୍ଯ୍ୟରତ ଫରେଷ୍ଟ ଗାର୍ଡ ପ୍ରହଲ୍ଲାଦ ପ୍ରଧାନ।
ସୂଚନା ଅନୁଯାୟୀ, ହିନ୍ଦୋଳ ରେଞ୍ଜ ରାଜମୋହନପୁର ଜଙ୍ଗଲରେ ପାଟ୍ରୋଲିଂ କରୁଥିବା ସମୟରେ ଶିକାରୀ ଗୁଳିମାଡ଼ କରିଥିଲେ। ମୋଟ ୧୩ ଜଣ ବନବିଭାଗର କର୍ମୀ ପାଟ୍ରୋଲିଂ କରୁଥିଲେ। ଗୁଳି ପ୍ରହ୍ଲାଦଙ୍କ ପେଟରେ ବାଜିଥିଲା। ଫଳରେ ଗୁରୁତର ଅବସ୍ଥାରେ ତୁରନ୍ତ ତାଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଫରେଷ୍ଟ ଗାର୍ଡଙ୍କୁ ଗୁଳିମାଡ଼ ପରେ ପାଟ୍ରୋଲିଂ କରୁଥିବା ଅନ୍ୟ କର୍ମଚାରୀମାନେ ତୁରନ୍ତ ୪ ଶିକାରୀଙ୍କୁ କାବୁ କରିଥିଲେ। ସୂଚନା ଅନୁଯାୟୀ, ଅନ୍ୟ କିଛି ଶିକାରୀ ଘଟଣାସ୍ଥଳରୁ ଫେରାର ହୋଇଯାଇଥିଲେ ।ଶିକାରୀଙ୍କ ପାଖରୁ କିଛି ବନ୍ଧୁକ ଜବତ କରାଯିବା ସହ ସେମାନଙ୍କୁ ଅଧିକ ଜେରା କରାଯାଉଛି।
ନୂଆଦିଲ୍ଲୀ: କେନ୍ଦ୍ର ସରକାରଙ୍କୁ ଡିଭିଡେଣ୍ଟ ବାବଦରେ ଭାରତୀୟ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ପ୍ରଦାନ କରିବାକୁ ଯାଉଛି ୨ ଲକ୍ଷ ୭୦ ହଜାର କୋଟି ଟଙ୍କା। ଯାହା କି ସର୍ବକାଳୀନ ରେକର୍ଡ। ଏତେ ପରିମାଣର ଟଙ୍କା ପୂର୍ବରୁ ଆରବିଆଇ କେବେ ବି ପ୍ରଦାନ କରିନଥିଲା। ୨୦୨୩-୨୪ ଅର୍ଥିକ ବର୍ଷରେ ଆରବିଆଇ କେନ୍ଦ୍ର ସରକାରଙ୍କୁ ପ୍ରଦାନ କରିଥିଲା ୨ ଲକ୍ଷ ୧୦ ହଜାର କୋଟି।
୨୦୨୪-୨୫ ଆର୍ଥିକ ବର୍ଷରେ ଅରବିଆଇ ବଳକା ଲାଭାଶଂରୁ ପ୍ରଦାନ କରୁଥିବା ଟଙ୍କା ଗତବର୍ଷ ଅପେକ୍ଷା ୨୭.୪ ପ୍ରତିଶତ ଅଧିକ। ଲଗାତାର ଭାବେ ଆରବିଆଇ ଠାରୁ ଏବର କେନ୍ଦ୍ର ସରକାର ବର୍ଷକୁ ଲକ୍ଷାଧିକ କୋଟି ଟଙ୍କାର ଡିଭିଡେଣ୍ଟ ନେଉଛନ୍ତି। କେନ୍ଦ୍ର ସରକାରଙ୍କ ବିତ୍ତୀୟ ନିଅଣ୍ଟ ଭରଣା ପାଇଁ ଏହି ଅର୍ଥ ସହାୟକ ହେବ ବୋଲି କୁହାଯାଉଥିବା ବେଳେ ଅର୍ଥନୀତି ବିଶେଷଜ୍ଞ ମାନେ ଏହାକୁ ନେଇ ପ୍ରଶ୍ନ ଉଠାଇଛନ୍ତି।
ନୂଆଦିଲ୍ଲୀ: ଫେରିଲା କରୋନା । ଆଣିଲା କଟକଣା । ପୁଣି ସବୁଠି ମାସ୍କ ବ୍ୟବହାର କରିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ଦିଆଗଲା ପରାମର୍ଶ । କିଛି ଦିନର ବିରତି ପରେ ଏବେ ପୁଣି ଦେଶରେ କୋଭିଡ୍-୧୯ ସଂକ୍ରମଣ ଦେଖିବାକୁ ମିଳିଛି । ଏନେଇ ସଜାଗ ହୋଇଛନ୍ତି ଦିଲ୍ଲୀ ସରକାର। ଏନେଇ ଏକ ଗୁରୁତ୍ୱପୂର୍ଣ୍ଣ ପରାମର୍ଶ ଜାରି କରାଯାଇଛି ।
ସ୍ୱାସ୍ଥ୍ୟ ବିଭାଗ ଦ୍ୱାରା ଜାରି କରାଯାଇଥିବା ଏହି ବିଜ୍ଞପ୍ତିରେ ସମସ୍ତ ହସ୍ପିଟାଲକୁ ସତର୍କ ରହିବାକୁ ଏବଂ କୋଭିଡ୍ ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି। ହସ୍ପିଟାଲଗୁଡ଼ିକୁ ଶଯ୍ୟା, ଅକ୍ସିଜେନ, ଔଷଧ ଏବଂ ଟୀକାର ଉପଲବ୍ଧତା ସୁନିଶ୍ଚିତ କରିବାକୁ ପଡିବ। ଏହା ବ୍ୟତୀତ, ଭେଣ୍ଟିଲେଟର, BiPAP ମେସିନ୍, ଅମ୍ଳଜାନ ଏବଂ PSA ୟୁନିଟ୍ ଭଳି ସମସ୍ତ ଆବଶ୍ୟକୀୟ ଉପକରଣ ସମ୍ପୂର୍ଣ୍ଣ କାର୍ଯ୍ୟକ୍ଷମ ଅବସ୍ଥାରେ ରଖିବାକୁ ପରାମର୍ଶ ଦିଆଯାଇଛି । ସ୍ୱାସ୍ଥ୍ୟ ବିଭାଗ ସମସ୍ତ ସ୍ୱାସ୍ଥ୍ୟ ପ୍ରତିଷ୍ଠାନକୁ ଜିନୋମ୍ ସିକ୍ଵେନ୍ସିଂ ପାଇଁ ସମସ୍ତ କୋଭିଡ୍-୧୯ ପଜିଟିଭ୍ ନମୁନା ହସ୍ପିଟାଲକୁ ପଠାଇବାକୁ ନିର୍ଦ୍ଦେଶ ଦେଇଛି। ଏହା ସହିତ ଦିଲ୍ଲୀ ରାଜ୍ୟ ସ୍ୱାସ୍ଥ୍ୟ ଡାଟା ପରିଚାଳନା ପୋର୍ଟାଲରେ ସମସ୍ତ ମାନଦଣ୍ଡ ଏବଂ ଦୈନିକ ରିପୋର୍ଟିଂ ବାଧ୍ୟତାମୂଳକ କରାଯାଇଛି
ସେହିଭଳି ଆନ୍ଧ୍ର ପ୍ରଦେଶ ସରକାର ଜାରି କରିଛନ୍ତି କୋଭିଡ୍ ନିର୍ଦ୍ଦେଶାବଳୀ। ଜନଗହଳିପୂର୍ଣ୍ଣ ସ୍ଥାନରେ ମାସ୍କ ପିନ୍ଧିବାକୁ ଜନସାଧାରଣଙ୍କୁ ଅନୁରୋଧ କରାଯାଇଛି। ଘରେ ରହିବା ପାଇଁ ବୟସ୍କ ଓ ଗର୍ଭବତୀଙ୍କୁ ପରାମର୍ଶ ଦିଆଯାଇଛି । ଆନ୍ଧ୍ରପ୍ରଦେଶର ପଡ଼ୋଶୀ ରାଜ୍ୟଗୁଡ଼ିକରେ କୋଭିଡ୍ ମାମଲା ସାମ୍ନାକୁ ଆସିବା ପରେ, ସ୍ୱାସ୍ଥ୍ୟ, ଚିକିତ୍ସା ଶିକ୍ଷା ଏବଂ ପରିବାର କଲ୍ୟାଣ ବିଭାଗ ଏକ ନିର୍ଦ୍ଦେଶାବଳୀ ଜାରି କରିଛି। ଜନସାଧାରଣଙ୍କୁ ଭିଡ଼ ସ୍ଥାନରେ ଏବଂ ଯାତ୍ରା ସମୟରେ ‘ଅବଶ୍ୟକୀୟ ଭାବରେ’ ମାସ୍କ ପିନ୍ଧିବାକୁ ନିର୍ଦ୍ଦେଶ ଦିଆଯାଇଛି।
ନନ୍ଦିଘୋଷ ବ୍ୟୁରୋ: ସାବିତ୍ରୀ ପାଇଁ ଚଳଚଞ୍ଚଳ ଜଟଣୀ ବଜାର । ଦୋକାନୀ ବି ଗ୍ରାହକଙ୍କ ଆବଶ୍ୟକତାକୁ ଦେଖି ବିଭିନ୍ନ ଦେଶୀ ଫଳ ଉପଲବ୍ଧ କରିଛନ୍ତି । ଦର ଉଚ୍ଚା ରହିଲେ ବି ଲୋକଙ୍କ ଭିଡ଼ ଦେଖି ଜଟଣୀ ଫଳବଜାର ଏବେ ସରଗରମ । କାରବାର ଦେଖି ଦୋକାନୀ ବି ଖୁସ୍ ।
ଆମ୍ବ, ପଣସ, ଲିଚୁ, ତାଳ, ଡାଳିମ୍ବ, ସପୁରୀ, ଖଜୁରି । ଦେଶୀ ଫଳରେ ମହକୁଛି ପୁରା ବଜାର । ଏ ହେଉଛି ଜଟଣୀ ଫଳ ବଜାରର ଦୃଶ୍ୟ । ଆଉ ୩ ଦିନ ପରେ ସାବିତ୍ରୀ ବ୍ରତ । ହାତରେ ଅଳ୍ପ ଦିନ ଥିବାରୁ କିଏ ଝିଅ ଘରକୁ ଭାର ପଠାଉଛି ତ କିଏ ବୋହୂ ପାଇଁ ନେଉଛନ୍ତି ଶାଢ଼ି, ଶଙ୍ଖା, ସିନ୍ଦୂର ଅଳତା । ଦର ଉଚ୍ଚା ଥିଲେ ବି ଫଳସବୁ କିଣି ନେଉଛନ୍ତି ଲୋକେ । ଜଟଣୀରେ ଫଳ ବଜାରରେ ଲାଗିଛି ଲୋକଙ୍କ ଭିଡ଼ । ସହରର ବିଭିନ୍ନ ଶାଢ଼ି ଦୋକାନ ସମେତ ମନୋହରି ଦୋକାନରେ ଜମୁଛି ଗ୍ରାହକଙ୍କ ଭିଡ ।
ସ୍ବାମୀଙ୍କ ସୁସ୍ଥ ଓ ଦୀର୍ଘଜୀବନ କାମନା କରି ବ୍ରତ ପାଳିବେ ଓଡ଼ିଆ ସଧବା ମହିଳା । ଏଥିପାଇଁ ଚଳଚଞ୍ଚଳ ବଜାର । କିନ୍ତୁ ଏସବୁ ଭିତରେ ଫଳ ଦାମ ଆକାଶ ଛୁଆଁ ହୋଇଛି । ସାବିତ୍ରୀ ବ୍ରତକୁ ଆଖି ଆଗରେ ରଖି ଅନେକ ବେପାରୀ ଚଢ଼ା ଦରରେ ବିକ୍ରି କରୁଛନ୍ତି ଫଳ.. ।
ପ୍ରତିବର୍ଷ ସାବିତ୍ରୀ ଆସିଲେ ବଜାରରେ ଫଳ ଦାମ ନିୟନ୍ତ୍ରଣ ବାହାରକୁ ଯାଏ । ହେଲେ ନା ପ୍ରଶାସନ ଏଥିପ୍ରତି କେବେ ବି ଧ୍ୟାନ ଦିଅନ୍ତି ନାହିଁ ।
ନନ୍ଦିଘୋଷ ବ୍ୟୁରୋ: ଦିବ୍ୟାଙ୍ଗଙ୍କୁ ଚିହ୍ନଟ ନ କରି ଉପହାସ କରାଯାଉଛି । ଏଭଳି ଅଭାବନୀୟ ଘଟଣା ସାମ୍ନାକୁ ଆସିଛି ରାୟଗଡ଼ାର ମୁନିଗୁଡ଼ା ବ୍ଲକରୁ । ଦିବ୍ୟାଙ୍ଗ ଚିହ୍ନଟ ପାଇଁ ସ୍ବତନ୍ତ୍ର କ୍ୟାମ୍ପ କରାଯାଇଥିଲେ ବି ସ୍ବାସ୍ଥ୍ୟ ଅଧିକାରୀ ଓ ସ୍ଥାନୀୟ ପ୍ରଶାସନର ମନମାନି ଯୋଗୁ ୮୦ ପ୍ରତିଶତରୁ ଅଧିକ ଭିନ୍ନକ୍ଷମ ପ୍ରମାଣ ପତ୍ର ପାଇବାରୁ ବଞ୍ଚିତ ହେଉଥିବା ଅଭିଯୋଗ ହୋଇଛି ।
କିଏ ଅଭିନୟ କରୁଛି? ଦିବ୍ୟାଙ୍ଗ ନା ସରକାରୀ ବାବୁ । ଏପରି ଅଭିଯୋଗ ଆସିଛି ରାୟଗଡ଼ାର ମୁନିଗୁଡ଼ାରୁ । ଦିବ୍ୟାଙ୍ଗ ଚିହ୍ନଟ ପାଇଁ ସରକାରଙ୍କ ପକ୍ଷରୁ ଚିହ୍ନଟ କ୍ୟାମ୍ପ ଚାଲିଛି । ଯେଉଁ ବ୍ୟକ୍ତି ୮୦ ପ୍ରତିଶତ ଦିବ୍ୟାଙ୍ଗ ସେମାନଙ୍କୁ ଚିହ୍ନଟ କରାଯିବ । ହେଲେ ଚିହ୍ନଟ କରୁଥିବା ଅଭିଜ୍ଞ ଡାକ୍ତର ଦିବ୍ୟାଙ୍ଗଙ୍କୁ ଅଭିନୟ କରୁଥିବା କହି ଉପହାସ କରୁଛନ୍ତି ।
ସମ୍ପର୍କୀୟଙ୍କୁ କୋରାପୁଟ ପଠାଇ ଦେବାକୁ କୁହାଯାଉଛି। ନବେ ଓ ଶତ ପ୍ରତିଶତ ଦିବ୍ୟାଙ୍ଗ ୧୮ ଓ ୪୦ ପ୍ରତିଶତ ଦିବ୍ୟାଙ୍ଗ ବୋଲି ପ୍ରମାଣପତ୍ର ଦିଆଯାଉଥିବା ଅଭିଯୋଗ । ବ୍ଲକ ପ୍ରଶାସନ ଏବଂ ସ୍ୱାସ୍ଥ୍ୟ ବିଭାଗର ମନମାନିରେ ଚାଲିଛି ଦିବ୍ୟାଙ୍ଗ ଚିହ୍ନଟ ପ୍ରକ୍ରିୟା । ସରକାରୀ ତଥ୍ୟ ଅନୁସାରେ ମୁନିଗୁଡାରେ ୧ ହଜାର ୮୫ ଜଣ ଦିବ୍ୟାଙ୍ଗ ଭତ୍ତା ପାଉଥିବା ବେଳେ ସେଥିରୁ ମାତ୍ର ୧୮୨ ଜଣ ବର୍ଦ୍ଧିତ ଭତ୍ତା ପାଇଛନ୍ତି । ସାସ୍ଥ୍ୟ ବିଭାଗର ଟାଳଟୁଳ ନୀତି ଓ ଡାକ୍ତରବାବୁଙ୍କ ମନମାନି ଯୋଗୁ ଭିନ୍ନକ୍ଷମ ସରକାର ବର୍ଦ୍ଧିତ ଯୋଜନାରୁ ବାଦ ପଡି ଦୁର୍ବିସହ ଜୀବନ ବିତାଉଛନ୍ତି ।
ଏ ହେଉଛନ୍ତି ମୁନିଗୁଡ଼ା ବ୍ଲକ ଜଗଦଳପୁର ପଞ୍ଚାୟତ ସର୍ଗୀଗୁଡା ଗାଁର ୨୬ ବର୍ଷୀୟ ଟୁନା କୁସୁଲିଆ । ଜନ୍ମରୁ ଭିନ୍ନକ୍ଷମ ହୋଇଥିବା ବେଳେ ହାତ ଗୋଡ କାମ କରୁନି, କଥା ବି କହିପାରୁନାହାଁନ୍ତି । ଶତ ପ୍ରତିଶତ ଭିନ୍ନକ୍ଷମ ହୋଇଥିବା ନେଇ ଅଫଲାଇନରେ ତାଙ୍କୁ ପ୍ରମାଣ ପତ୍ର ମିଳିଛି । ହେଲେ ତାଙ୍କର ଆଧାରକାର୍ଡ ନ ଥିବାରୁ ଖାଉଟି ଯୋଜନାରେ ମିଳୁଥିବା ୫ କିଲୋ ଚାଉଳ ବନ୍ଦ କରିଦିଆଯାଇଛି । ବର୍ଦ୍ଧିତ ଭତ୍ତା ବି ପାଉନାହାନ୍ତି । ସେହିପରି ଅମ୍ବାଦଳା ପଞ୍ଚାୟତ ଇନ୍ଦିରାସାହିର ୨୩ ବର୍ଷୀୟ ସୁଲତାନ ସୁନା ଜନ୍ମରୁ ଦିବ୍ୟାଙ୍ଗ।
ଦୁଇଟି ଯାକ ଗୋଡ଼ କାମ କରୁନି କି କଥା କହିପାରୁନାହାନ୍ତି । ନଥିବା ବେଳେ ପାଟିରେ କଥା କହିପାରୁନାହାଁନ୍ତି । ହେଲେ ତାଙ୍କୁ ଭିନ୍ନକ୍ଷମ ଶିବିରରେ ୪୦ ପ୍ରତିଶତର ପ୍ରମାଣ ପତ୍ର ଦିଆଯାଇଛି । ରଘୁବାରି ଗ୍ରାମର ବିଲମ୍ ସୁନାଙ୍କ ୪ବର୍ଷର ଶିଶୁ ପୁତ୍ର ରିହାନ ସୁନା, ଅମ୍ବାଦଳା ନୂଆପଡାର ବେଣୁଧର ଖୋସଲାଙ୍କ ୨୨ ବର୍ଷର ଝିଅ ଭବାନୀ ଖୋସଲା, ଇନ୍ଦିରା ସାହି ରାଜାରାମ ବାଥ୍ରାଙ୍କ ଝିଅ ଗୁପ୍ତେଶ୍ୱରୀ ବାଥ୍ରା ସମସ୍ତଙ୍କ ସମାନ ଅବସ୍ଥା । ସେମାନଙ୍କୁ ଯଥାଶୀଘ୍ର ଦିବ୍ୟାଙ୍ଗ ପ୍ରମାଣ ପତ୍ର ନି ମିଳିଲେ ରାଜରାସ୍ତାରେ ଆନ୍ଦୋଳନ କରାଯିବ ବୋଲି ସ୍ଥାନୀୟ ବାସିନ୍ଦା ଚେତାବନୀ ଦେଇଛନ୍ତି ।
