କଟକ : ଆଧୁନିକ ଯୁଗରେ ବି ଲୋକଙ୍କ ମନରୁ ଲିଭିନି ଅନ୍ଧ ବିଶ୍ଵାସ । ଆଜି ବି କୁପ୍ରଥାରୁ ବାହାରିପାରୁନାହାଁନ୍ତି ଲୋକେ । ଏପରି କିଛି ଘୃଣ୍ଯ ଦୃଶ୍ଯ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ ବିଜୟନଗର ଗାଁରେ । ଯାହା ଦେଖିଲେ ଯେକେହି ଚକିତ ହୋଇଯିବେ । ଜଣେ ଗର୍ଭବତୀଙ୍କ ମୃତ୍ୟୁ ପରେ ମୃତଦେହକୁ ସଂସ୍କାର କରିବା ବଦଳରେ ମହିଳାଙ୍କ ପେଟ ଚିରି ଭୃଣକୁ ବାହାର କରାଯାଇ ଗଛରେ ଡେରି ଦିଆଯାଇଛି । ଅନ୍ଧବିଶ୍ଵାସ ରହିଛି, ଗର୍ଭବତୀ ମହିଳାଙ୍କ ମୃତ୍ୟୁ ହେଲେ ସେ ଚିରୁଗୁଣୀ ହୋଇଯାଆନ୍ତି। ସେଇ ଅନ୍ଧବିଶ୍ବାସରେ ମହିଳାଙ୍କର ଶବ ଶତ୍କାର କରିବା ବଦଳରେ ଗଛରେ ଡେରି ଦିଆଯାଇଥିଲା । ସୂଚନା ମୁତାବକ ବିଜୟନଗର ଗାଁର ସନ୍ତୋଷ ସାହୁଙ୍କ ପତ୍ନୀ ପଦ୍ମିନୀ ୪ ମାସର ଗର୍ଭବତୀ ଥିଲେ । ଏହା ତାଙ୍କର ଦ୍ଵିତୀୟ ଗର୍ଭ ଥିଲା । କିନ୍ତୁ ସେ ମଧୁମେହ ରୋଗରେ ପୀଡିତ ଥିବା କାରଣରୁ କଟକ ବଡ଼ ଡାକ୍ତରଖାନାରେ ଭର୍ତ୍ତିହୋଇ ଚିକିତ୍ସିତ ହେଉଥିଲେ। ଗତ ରବିବାର ବିଳମ୍ବିତ ରାତିରେ ପଦ୍ମିନୀ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ। ସୋମବାର ଦିନ ପଦ୍ମିନୀଙ୍କ ମୃତଦେହ ଘରକୁ ଆସିବା ପରେ ରାତିରେ ପଦ୍ମିନୀଙ୍କ ପେଟ ଚିରି ଭୃଣକୁ ବାହାର କରି ନଦୀ କୂଳରେ ଏକ ଗଛ ମୂଳରେ ଡେରି ବସାଇ ଦିଆଯାଇଥିବା ଦେଖିବାକୁ ମିଳିଛି ।
ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଆଲୋଡନ ଖେଳିଯାଇଥିଲା। ସ୍ଥାନୀୟ ଅଞ୍ଚଳର କେତେକ ସ୍ବେଛାସେବୀ ଓ ବୁଦ୍ଧିଜୀବୀ ପରିବାର ଲୋକଙ୍କୁ ଭେଟି ଏପରି କାର୍ଯ୍ୟକୁ ବାରଣ କରିବା ସହିତ ବୁଝାସୁଝା କରିଥିଲେ। ପରେ ସେମାନେ ମୃତଦେହଟିକୁ ବସାଯାଇଥିବା ସ୍ଥାନରୁ ଆଣି ମାଟି ଖୋଳି ପୋତାଯାଇଥିଲା । ତେବେ ଏପରି କୁସଂସ୍କାରକୁ ଆଜିର ସମାଜରୁ ଦୁରେଇ ଦେବାକୁ ହେଲେ ଅଧିକ ସଚେତନତା କାର୍ଯ୍ୟକ୍ରମର ଆବଶ୍ୟକତା ରହିଛି ବୋଲି କହିଛନ୍ତି ହେତୁବାଦୀ। ଘଟଣାରେ କିଛି ବୁଦ୍ଧିଜୀବୀ ପରିବାର ଲୋକଙ୍କୁ ବୁଝାସୁଝା ପରେ ମୃତ ଦେହକୁ ପୋତାଯାଇଥିଲା ।
