ନନ୍ଦିଘୋଷ ବ୍ୟୁରୋ: ପୁଣି ଇସ୍କନର ମନମାନି । ଆଜି ଲଣ୍ଡନରେ ଆୟୋଜିତ ହେବାକୁ ଯାଉଛି ଅଦିନିଆ ରଥଯାତ୍ରା । ଇସ୍କନ ଅନୁଗାମୀ ଏବଂ ଜଗନ୍ନାଥ ପ୍ରେମୀ ଯୋଗଦେବା ପାଇଁ ଅନଲାଇନ ମାଧ୍ୟମରେ ସୂଚନା ଦେଇଛି ଇସ୍କନ । ୟୁଟ୍ୟୁବର ଗୋବିନ୍ଦ କ୍ରୀଷ୍ଣ ଦାସ ସ୍ଵତନ୍ତ୍ର ଅତିଥି ଭାବେ ଯୋଗଦେବା ନେଇ ମଧ୍ୟ ସୂଚନା ରହିଛି । ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ, କୀର୍ତ୍ତନ, ଯୋଗ ସହ ଅନ୍ୟାନ୍ୟ କାର୍ଯ୍ୟକ୍ରମ ମଧ୍ୟ ଆୟୋଜନ ହେବ । ତେବେ ଏହି ଘଟଣାକୁ ନେଇ ପୁରୀରେ ତୀବ୍ର ପତିକ୍ରିୟା ପ୍ରକାଶ ପାଇଛି । ଇସ୍କନ ଏପରି ବାରମ୍ବାର ନିୟମ ବାହାରେ କାର୍ଯ୍ୟକରୁଥିବାକୁ ସେବାୟତମାନେ କ୍ଷୋଭ ପ୍ରକାଶ କରିଛନ୍ତି । ଏପରିକି ବଲଭଦ୍ରଙ୍କ ବାଡ଼ଗ୍ରାହୀ ଏହାକୁ ତୀବ୍ର ବିରୋଧ କରିଥିବାବେଳେ ରଥଯାତ୍ରା ବନ୍ଦ କରିବା ନେଇ ସରକାର ପଦକ୍ଷେପ ନେବାକୁ ମତ ରଖିଛନ୍ତି ।
ଆଜି ସରୁଛି ଭାରତ-ପାକ୍ ଅସ୍ତ୍ରବିରତି ଅବଧି
ନନ୍ଦିଘୋଷ ବ୍ୟୁରୋ: ଆଜି ସରୁଛି ଭାରତ-ପାକ୍ ଅସ୍ତ୍ରବିରତି ଅବଧି। ୧୮ ତାରିଖ ପର୍ଯ୍ୟନ୍ତ ସୀମାରେ ଫାୟାରିଂ ନ କରିବାକୁ ଦୁଇ ଦେଶ ରାଜି ହୋଇଥିଲେ। ଆଜି ଏହି ଡେଡ୍ ଲାଇନ ସରୁଛି। ତା ପରେ କଣ ହେବ ଦୁଇ ଦେଶର ଆଭିମୁଖ୍ୟ, ତାକୁ ନେଇ ସସପେନ୍ସସ ଲାଗି ରହିଛି। ଦୁଇ ଦେଶ ପୁଣି ଥରେ ଏହି ଅସ୍ତ୍ରବିରତି ଚୁକ୍ତିର ଅବଧିକୁ ବୃଦ୍ଧି କରିବେ ନା ପୁଣି ଥରେ ସୀମାରେ ଗର୍ଜିବ ବନ୍ଧୁକ ଗୁଳି, କମାଣ, ତାକୁ ନେଇ ଆଶା ଆଶଙ୍କା ଲାଗି ରହିଛି। ପହଲଗାଁଓ ଆତଙ୍କବାଦୀ ଆକ୍ରମଣ, ତା ପରେ ଭାରତର ଅପରେସନ ସିନ୍ଦୂର ପରେ ସୀମାରେ ପ୍ରବଳ ଫାୟାରିଂ ହୋଇଥିଲା। ଉଭୟ ପଟୁ ପ୍ରବଳ ଗୁଳି ଗୋଳା ବର୍ଷଣ ହୋଇଥିଲା। ୧୦ ତାରିଖରେ ଡିିଜିଏମଓ ସ୍ତରୀୟ ଆଲୋଚନା ପରେ ଅସ୍ତ୍ରବିରତି ପାଇଁ ଦୁଇ ଦେଶ ରାଜି ହୋଇଥିଲେ। ଏହାକୁ ୧୮ ତାରିଖ ଅର୍ଥାତ ଆଜି ଯାଏ ବୃଦ୍ଧି କରାଯାଇଥିଲା। ଏବେ କଣ ହେବ, ତାକୁ ନେଇ ଲାଗି ରହିଛି ସସପେନ୍ସ।
ପିସିସି ସଭାପତି ଭକ୍ତଚରଣ ଦାସଙ୍କ ନୂଆ ଟିମ୍ ଘୋଷଣା
ନନ୍ଦିଘୋଷ ବ୍ୟୁରୋ: ଘୋଷଣା ହେଲା ପିସିସି ସଭାପତି ଭକ୍ତ ଚରଣ ଦାସଙ୍କ ନୂଆ ଟିମ୍ । ପୁନର୍ଗଠିତ ହୋଇଛ ରାଜ୍ୟ କଂଗ୍ରେସ । ୭ ଜଣ ଉପସଭାପତି, ୧୦ ଜଣ ସାଧାରଣ ସମ୍ପାଦକ, ୧୨ ଜଣ ସମ୍ପାଦକ, ଜଣେ କୋଷାଧ୍ୟକ୍ଷଙ୍କ ସମେତ ଘୋଷଣା ହୋଇଛି ସୋସିଆଲ ମିଡିଆ ବିଭାଗର ଅଧ୍ୟକ୍ଷ ଓ ଉପାଧ୍ୟକ୍ଷଙ୍କ ନାମ । ଏହା ଉପରେ ମୋହର ମାରିଛନ୍ତି ଏଆଇସିସି ସଭାପତି । ଏ ନେଇ ଦଳ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
ପ୍ରଦେଶ କଂଗ୍ରେସର ସଭାପତି ଭାବେ ନିଯୁକ୍ତି ପାଇବାର ଦୁଇ ମାସ ପରେ ନିଯୁକ୍ତି ପାଇଛନ୍ତି ଦଳର କର୍ମକର୍ତ୍ତା । ଉପସଭାପତି ଭାବେ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି, ରମେଶ ଜେନା, ପୂର୍ବତନ ବିଧାୟକ ସନ୍ତୋଷ ସିଂ ସାଲୁଜା, ଦେବାଶିଷ ପଟ୍ଟନାୟକ, ବିଧାୟକ ସି.ଏସ୍. ରାଜନ ଇକା, ପୂର୍ବତନ ବିଧାୟକ ଲଲାଟେନ୍ଦୁ ମହାପାତ୍ର ଓ ପୂର୍ବତନ ମହିଳା କଂଗ୍ରେସ ସଭାନେତ୍ରୀ ସସ୍ମିତା ବେହେରା ନିଯୁକ୍ତି ପାଇଛନ୍ତି । ନୂଆ କମିଟି ଗଠନ ନେଇ ପିସିସି ସଭାପତି ଭକ୍ତ ଦାସଙ୍କ ସୁପାରିଶ ଆଧାରରେ ଅଖିଳ ଭାରତ କଂଗ୍ରେସ କମିଟି ସଭାପତି ମଲ୍ଲିକାର୍ଜ୍ଜୁନ ଖଡ଼ଗେ ମଞ୍ଜୁରୀ ଦେଇଥିବା ଏଆଇସିସି ସାଧାରଣ ସମ୍ପାଦକ ତଥା ସାଂସଦ କେ.ସି ବେଣୁଗୋପାଳ ଜଣାଇଛନ୍ତି ।
ଲବ ହାଁସଦା ବିବାଦ: ମୁଁ ଟ୍ରାଭେଲର ଟିମ୍ ପକ୍ଷରୁ ଆସିଲା ବିବୃତି
ନନ୍ଦିଘୋଷ ବ୍ୟୁରୋ: ଲବ ହାଁସଦା ବିବାଦକୁ ନେଇ ମୁଁ ଟ୍ରାଭେଲର୍ ଟିମ୍ ପକ୍ଷରୁ ବିବୃତି ଦିଆଯାଇଛି । ଯାହାକୁ ସୋସିଆଲ୍ ମିଡିଆରେ ସେୟାର କରିଛନ୍ତି ଲବ ହାଁସଦା । ଏଥିରେ ମୁଁ ଟ୍ରାଭେଲର୍ ଟିମ୍ ପକ୍ଷରୁ କୁହାଯାଇଛି, ଏହି ଘଟଣା ପାଇଁ ଆମେ ବହୁତ ଦୁଃଖିତ । ଲବ ମଧ୍ୟ ଏବେ ବହୁତ କଷ୍ଟରେ ଅଛନ୍ତି । ଏପରି ସମୟରେ ଲବଙ୍କ ପ୍ରତି ଦରକାର ସ୍ନେହ ଶ୍ରଦ୍ଧା ଓ ସମର୍ଥନ । ଶୀଘ୍ର ଆମେ ସତ ସମସ୍ତଙ୍କୁ ଜଣାଇବୁ । ପ୍ରମାଣ ସହିତ, ସ୍ପଷ୍ଟତାର ସହିତ ସତ୍ୟ ପଦାକୁ ଆସିବ ।
ଲବ ହାଁସଦା ଲୁଚି ନାହାନ୍ତି, ସେ ସାମ୍ନାକୁ ଆସିବେ । ସବୁ ସତ କଥା ସଚ୍ଚୋଟତାର ସହିତ କହିବେ । ସମ୍ମାନର ସହିତ ସମସ୍ତଙ୍କୁ ସବୁ ଜଣାଇବେ । ଏଥିପାଇଁ ସେ କିଛି ଦିନ ସମୟ ନେଇ ନିଜକୁ ପ୍ରସ୍ତୁତି କରୁଛନ୍ତି । ଏପରି ସମୟରେ ହଠାତ କ’ଣ କହିଲେ, ତାହା ଭୁଲ ବୁଝାମଣା ସୃଷ୍ଟି କରିପାରେ । ଲାଭ ବଦଳରେ କ୍ଷତି ହୋଇପାରେ । ଏପରିକି ସତ୍ୟର ବି ଅସମ୍ମାନ ହେବ । ତେଣୁ ମନରେ ନିଜେ ନିଜେ କିଛି ନ ଭାବିବାକୁ ସମସ୍ତଙ୍କୁ ଆମେ ଅନୁରୋଧ କରୁଛୁ । ସତ୍ୟ ସାମନାକୁ ଆସିବ, କିନ୍ତୁ ଜୋର୍ ଶବ୍ଦ ନ କରି ଶାନ୍ତ, ସ୍ପଷ୍ଟତାର ସହିତ ତଥ୍ୟ ନେଇ ଆସିବ । ସେତେଦିନ ଯାଏଁ ଲବଙ୍କ ପ୍ରତି ସହାନୁଭୂତି ଦେଖାଇବାକୁ ମୁଁ ଟ୍ରାଭେଲର୍ ଟିମ୍ ତରଫରୁ ଅନୁରୋଧ କରାଯାଇଛି । ଲବଙ୍କ ପଛରେ ସେମାନେ ଠିଆ ହୋଇଥିବା ବି କୁହାଯାଇଛି ।
କୌଣସି କଥା ନିଜ ମନରେ କଳ୍ପନା ନ କରି ଲବଙ୍କୁ ସମର୍ଥନ କରିବାକୁ ମୁଁ ଟ୍ରାଭେଲର୍ ଟିମ୍ ପକ୍ଷରୁ ଆହ୍ଵାନ କରାଯାଇଛି । ପ୍ରେମିକାଙ୍କ ଆତ୍ମହତ୍ୟା ପରେ ସନ୍ଦେହ ଘେରକୁ ଆସିଛନ୍ତି ଲବ । ଲବଙ୍କ ବିରୋଧରେ ବେଙ୍ଗାଲୁରୁର ଏଚଏସଆର ଲେଆଉଟ ଥାନାରେ ଅଭିଯୋଗ କରିଛନ୍ତି ପ୍ରେମିକା ସୋଲୋମୀଙ୍କ ଭାଇ । ସୋସିଆଲ ମିଡିଆରେ ଲବ ପୋଷ୍ଟ କରୁଥିବା ଭିଡିଓ ପାଇଁ ତାଙ୍କ ଭଉଣୀ ଆତ୍ମହତ୍ୟା କରିଥିବା ଅଭିଯୋଗ କରିଛନ୍ତି । ପୋଲିସ ଏଯାଏଁ ଲବଙ୍କ ଟେର ପାଉ ନଥିବା ବେଳେ ଲବଙ୍କ ପାରିବାରିକ ଜୀବନକୁ ନେଇ ପ୍ରଶ୍ନ ଉଠିଛି । ଲବ ପୂର୍ବରୁ ବାହା ହୋଇଥିବା କହିଛନ୍ତି ପରିବାର ଲୋକେ । ଏସବୁ ଘଟଣାକୁ ନେଇ ବହୁତ ଅଡୁଆରେ ପଡ଼ିଛନ୍ତି ଲବ ହାଁସଦା ।
ଆପରୁ ଇସ୍ତଫା ଦେଇ ନୂଆ ଦଳ ଗଢ଼ିଲେ ୧୫ କାଉନସିଲର
ନନ୍ଦିଘୋଷ ବ୍ୟୁରୋ: ଆମ୍ ଆଦମୀ ପାର୍ଟିକୁ ବଡ଼ ଝଟକା । ଦିଲ୍ଲୀର ୧୫ କାଉନସିଲର ଦଳରୁ ଦେଲେ ଇସ୍ତଫା । ବିଦ୍ରୋହୀଙ୍କ ମଧ୍ୟରେ ଅଛନ୍ତି ମୁକେଶ ଗୋଏଲ । ଦିଲ୍ଲୀ ମହାନଗର ନିଗମ ଗୃହରେ ମୁକେଶ ଥିଲେ ବିରୋଧୀ ଦଳ ନେତା । ବିଦ୍ରୋହୀ କାଉନସିଲର ଗଠନ କରିଛନ୍ତି ଇନ୍ଦ୍ରପ୍ରସ୍ଥ ବିକାଶ ପାର୍ଟି ।
ଗତ ବିଧାନସଭା ନିର୍ବାଚନରେ ମୁକେଶ ଆପ୍ ଟିକେଟରେ ଆଦର୍ଶନଗରରୁ ବିଧାୟକ ପ୍ରାର୍ଥୀ ଲଢି ହାରି ଯାଇଥିଲେ । ଇସ୍ତଫା ଦେଇଥିବା ନେତାମାନେ ମ୍ୟୁନିସପାଲଟି ନିର୍ବାଚନ ପୂର୍ବରୁ କଂଗ୍ରେସ ଛାଡ଼ି ଆପରେ ସାମିଲ ହୋଇଥିଲେ । ବିଧାନସଭା ନିର୍ବାଚନରେ ଆପର ପରାଜୟ ପରଠାରୁ ଦଳ ଭିତରେ ଜାରି ରହିଥିଲା ନାନା ପ୍ରକାର କଳ୍ପନା ଜଳ୍ପନା । ଦିଲ୍ଲୀ ଶାଖାର ସଭାପତି ଭାବେ ସୌରଭ ଭରଦ୍ବାଜଙ୍କୁ ନିଯୁକ୍ତି କରିବା ପରଠାରୁ ଦଳରେ ଅସନ୍ତୋଷ ଜାରି ରହିଥିଲା ।
ନବୀନଙ୍କ ଅମଳରେ ପୁଞ୍ଜି ନିବେଶର ଡେଷ୍ଟିନେସନ ପାଲଟିଥିଲା ଓଡ଼ିଶା, ଏବେର ବିଜେପି ସରକାର ଲାଭ ଉଠାଇବାକୁ ଆଗଭର
ନନ୍ଦିଘୋଷ ବ୍ୟୁରୋ: ନବୀନ ସରକାର ଅମଳରେ ଓଡ଼ିଶା ଥିଲା ପୁଞ୍ଜିନିବେଶର ଫେଭରିଟ ଡେଷ୍ଟିନେସନ । କେବଳ ପୁଞ୍ଜିନିବେଶ ପ୍ରସ୍ତାବ ଆସୁ ନଥିଲା ବରଂ ଶିଳ୍ପାୟନ ବାସ୍ତବ ରୂପ ନେବା ସହ ନିଯୁକ୍ତି ବି ମିଳୁଥିଲା । ୨୦୨୫ରେ ବିଜେପି ସରକାର ଉତ୍କର୍ଷ ଓଡ଼ିଶା ଆୟୋଜନ କଲେ, ୨୨ ଲକ୍ଷ କୋଟିର ପ୍ରସ୍ତାବ ଆସିଛି ବୋଲି କହିଲେ । ହେଲେ, ଏବେ ଯେଉଁ ଶିଳ୍ପ ପ୍ରତିଷ୍ଠା ପାଇଁ ଭୂମି ପୂଜନ ହେଉଛି କି ଶିଳ୍ପ ପ୍ରତିଷ୍ଠା ହେଉଛି ଏସବୁ ନବୀନ ସରକାରଙ୍କ ଅବଦାନ ବୋଲି ବିଜେଡ଼ି କହିଛି । ବିଜେପି ସରକାରରେ ଶିଳ୍ପ ପ୍ରତିଷ୍ଠା ହେଉନି କି ନିଯୁକ୍ତି ବି ସୃଷ୍ଟି ହେଉନି ବୋଲି ଅଭିଯୋଗ କରିଛି କଂଗ୍ରେସ । ହେଲେ ଶିଳ୍ପ ମନ୍ତ୍ରୀ କହିଛନ୍ତି, ଆସନ୍ତା ସପ୍ତାହରେ ୧ ଲକ୍ଷ ୧୪ ହଜାର କୋଟି ଟଙ୍କାର ଗ୍ରାଉଣ୍ଡ ବ୍ରେକିଂ ଓ ଉଦଘାଟନ କରିବେ ମୁଖ୍ୟମନ୍ତ୍ରୀ । ଯାଜପୁର ଜିଲ୍ଲାରେ ୧୬ଟି ପ୍ରକଳ୍ପର ଶୁଭାରମ୍ଭ ହେବ ବୋଲି ସୂଚନା ମିଳିଛି ।
ନବୀନ ସରକାର ଅମଳରେ ଥିଲା ଓଡ଼ିଶା ପାଇଁ ଶିଳ୍ପାୟନରେ ସୁବର୍ଣ୍ଣ ଯୁଗ । ଟାଟା, ବେଦାନ୍ତ, ଆଦାନୀ, ନିପ୍ପନ ଷ୍ଟିଲ ଭଳି ଧାତବ ଶିଳ୍ପ ସହ ଆଇଟି, ପେଟ୍ରୋ-କେମିକାଲ, କୃଷି ଭିତ୍ତିକ ଶିଳ୍ପ ପାଇଁ ବଡ଼ ବଡ଼ କମ୍ପାନୀ ଓଡ଼ିଶାକୁ ଧାଉଁଥିଲେ । ନବୀନ ସରକାରଙ୍କ ଉଦ୍ୟମରେ ମିଳିଥିବା ପୁଞ୍ଜି ନିବେଶ ପ୍ରତିଶ୍ରୁତି ଏବେ ବାସ୍ତବ ରୂପ ନେଉଛି । ବିଜେଡ଼ି ସରକାର ବେଳେ ଶିଳ୍ପ ଅନୁକୂଳ ଭିତ୍ତିଭୂମି, ଗୋ-ସ୍ପିଫ୍ଟ ଭଳି ତ୍ବରିତ ସେବା, ଲ୍ୟାଣ୍ଡ ବ୍ୟାଙ୍କ ଯୋଗୁଁ ଶିଳ୍ପପତିମାନଙ୍କ ପ୍ରଥମ ପସନ୍ଦ ପାଲଟିଥିଲା ଓଡ଼ିଶା । ବିଜେପି ସରକାର ଆସିବା ପରେ ୨୦୨୫ ଜାନୁଆରୀରେ ଆୟୋଜନ କରିଥିଲେ ଉତ୍କର୍ଷ ଓଡ଼ିଶା । ଏହି ସମ୍ମିଳନୀରେ ୧୩ ଲକ୍ଷ କୋଟି ଟଙ୍କାର ପ୍ରସ୍ତାବ ଆସିଥିଲା ବୋଲି ସରକାର କହିଲେ । ଏଥିରୁ ୯ ଲକ୍ଷ କୋଟି ଟଙ୍କାର ଏମଓୟୁ ବି ସ୍ବାକ୍ଷରିତ ହୋଇଛି । ହେଲେ ଏସବୁ ନବୀନ ସରକାରଙ୍କ ଅବଦାନ ବୋଲି ବିଜେଡ଼ି କହିଛି । ପୋସ୍କୋକୁ ଦିଆଯାଇଥିବା ଜାଗାରେ ଜେଏସ୍ଡ଼ବ୍ଲୁ କାରଖାନା ପାଇଁ ନିଷ୍ପତ୍ତି ହୋଇଥିଲେ ବି ସରକାର ବଦଳିବା ପରେ ଏହା ଧିମେଇ ଯାଇଛି । କଂଗ୍ରେସ ମଧ୍ୟ ଶିଳ୍ପାୟନ ନେଇ ବିଜେପି ସରକାରଙ୍କ ଆଭିମୁଖ୍ୟକୁ ସମାଲୋଚନା କରିଛି ।
ଯାଜପୁରର କଳିଙ୍ଗ ନଗରରେ ଟାଟା ୬୩ ହଜାର କୋଟି ଟଙ୍କାର ପ୍ରକଳ୍ପ କରିବ । ୩୪ ହଜାର ଲୋକଙ୍କୁ ମିଳିବ ନିଯୁକ୍ତି । ରାଜ୍ୟକୁ ପୁଞ୍ଜିନିବେଶ ଆଣିବାକୁ ଉତ୍କର୍ଷ ଓଡ଼ିଶା ସହ ଦେଶର ବିଭିନ୍ନ ଜାଗାରେ ରୋଡ଼ ଶୋ କରିଛନ୍ତି ବିଜେପି ସରକାର । ମେ’ ୨୨ ତାରିଖରେ ୧ ଲକ୍ଷ ୧୪ ହଜାର କୋଟି ଟଙ୍କାର ଗ୍ରାଉଣ୍ଡିଙ୍ଗ ଓ ଶୁଭାରମ୍ଭ ହେବ । ଯାଜପୁର ଜିଲ୍ଲାରେ ୧୨ଟି ପ୍ରକଳ୍ପର ଶିଳାନ୍ୟାସ ଓ ୪ଟି ପ୍ରକଳ୍ପର ଲୋକାର୍ପଣ କରିବେ ମୁଖ୍ୟମନ୍ତ୍ରୀ । କେବଳ ଏମଓୟୁ ନକରି ବାସ୍ତବ ରୂପାୟନ ପାଇଁ ସରକାର କାମ କରୁଛନ୍ତି ବୋଲି ଶିଳ୍ପ ମନ୍ତ୍ରୀ କହିଛନ୍ତି । କେନ୍ଦ୍ରାପଡ଼ାରେ ନିପ୍ପନ ଷ୍ଟିଲ, ପାରାଦୀପରେ ମିତ୍ତଲ ଓ ଜଗତସିଂହପୁରରେ ଜେଏସ୍ଡ଼ବ୍ଲୁ କାମ ଆଗଉଛି ବୋଲି ମନ୍ତ୍ରୀ କହିଛନ୍ତି ।
ଶିଳ୍ପାୟନ ପାଇଁ ସାରା ଦେଶରେ ଜଣାଶୁଣା ଓଡ଼ିଶାକୁ ପୁଞ୍ଜିନିବେଶ ଆସୁଛି । କେବଳ ଧାତବ ଶିଳ୍ପ ନୁହେଁ ବରଂ ଆଇଟି, ଆଇଟିଇଏସ୍, ଖାଦ୍ୟ ପ୍ରକ୍ରିୟାକରଣ, ଗାରମେଣ୍ଟସ୍, ପେଟ୍ରୋ-କେମିକାଲ କ୍ଷେତ୍ରରେ ମଧ୍ୟ ଅନେକ ପୁଞ୍ଜିନିବେଶ ଆସୁଥିବା ବେଳେ ଏହାକୁ ବାସ୍ତବ ରୂପ ଦେବା ପାଇଁ ଆନ୍ତରିକ ଉଦ୍ୟମର ଆବଶ୍ୟକତା ରହିଛି ।
ପୋଲାଭରମ ପ୍ରକଳ୍ପ ସମୀକ୍ଷା କରିବେ ପ୍ରଧାନମନ୍ତ୍ରୀ, ଓଡ଼ିଶା ସରକାର ରାଜ୍ୟ ସ୍ବାର୍ଥ ଉଠାଇବାକୁ ଦାବି
ନନ୍ଦିଘୋଷ ବ୍ୟୁରୋ: ଓଡ଼ିଶାର ବ୍ୟାପକ କ୍ଷତି କରିବାକୁ ଯାଉଥିବା ଆନ୍ଧ୍ର ପୋଲାଭରମ ପ୍ରକଳ୍ପର ସମୀକ୍ଷା କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆସନ୍ତା ୨୮ ତାରିଖରେ ପ୍ରଧାନମନ୍ତ୍ରୀ ପୋଲାଭରମ ପ୍ରକଳ୍ପର ହାଇଲେବଲ ବୈଠକ କରିବେ । ଏହାପୂର୍ବରୁ ଓଡିଶା ସରକାର ଆଉ ଚୁପ ନ ରହି ରାଜ୍ୟର ସ୍ୱାର୍ଥ କଥା ଉଠାଇବାକୁ ଜୋରଦାର ଦାବି ହୋଇଛି ।
ପ୍ରକଳ୍ପ ଯୋଗୁଁ ଓଡ଼ିଶାର ବ୍ୟାପକ କ୍ଷତିଗ୍ରସ୍ତ ହେଉଥିଲେ ବି ରାଜ୍ୟ ବିଜେପି ସରକାର ମୁହଁ ଖୋଲୁ ନାହିଁ । ସେପଟେ ତେଲେଙ୍ଗାନା କିନ୍ତୁ ନିଜର କ୍ଷତି ବିରୋଧରେ ସ୍ୱର ଉଠାଇ ଚାଲିଛି । ତେଣୁ ଆସନ୍ତା ୨୮ ତାରିଖରେ ଓଡ଼ିଶାର ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀଙ୍କ ଆଗରେ ମୁହଁ ଖୋଲନ୍ତୁ ବୋଲି ଦାବି କରିଛି ଓଡ଼ିଆ ଅସ୍ମିତା ପରିଷଦ । ଓଡ଼ିଶାର ସ୍ୱାର୍ଥ ରକ୍ଷା ପାଇଁ ଶପଥ ଗ୍ରହଣ ବେଳେ ସଂକଳ୍ପ ନେଇଥିବା ମୁଖ୍ୟମନ୍ତ୍ରୀ କିଭଳି ନିଜ ସଂକଳ୍ପ ରକ୍ଷା କରୁଛନ୍ତି ତାହା ଏବେ ଜଣାପଡିବ ବୋଲି କୁହାଯାଇଛି । ଏହା ରାଜ୍ୟ ବିଜେପି ଓ ମୁଖ୍ୟମନ୍ତ୍ରୀଙ୍କ ପାଇଁ ଅଗ୍ନି ପରୀକ୍ଷା ହେବ ବୋଲି କୁହାଯାଇଛି ।
ସେପଟେ ପୋଲାଭରମ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ସହ ବୈଠକ ବେଳେ ରାଜ୍ୟ ବିଜେପିର ଅସଲ ଚେହେରା ପଦାକୁ ଆସିବ ବୋଲି କହିଛି ନାଗରିକ ସୁରକ୍ଷା ମଞ୍ଚ । ଆନ୍ଧ୍ର ପ୍ରକଳ୍ପ ଶେଷ ପର୍ଯ୍ୟାୟରେ ଥିବାବେଳେ ପ୍ରଧାନମନ୍ତ୍ରୀଙ୍କ ସହ ବୈଠକ ବେଳେ ରାଜ୍ୟ ବିଜେପି ସରକାର ଓ ମୁଖ୍ୟମନ୍ତ୍ରୀ କ’ଣ କଥା ରଖୁଛନ୍ତି ତା’ ଉପରେ ନଜର ରହିଛି । ଅନ୍ୟପଟେ କ୍ଷୟକ୍ଷତି ସମ୍ପର୍କରେ ନ ଜାଣି ପ୍ରଧାନମନ୍ତ୍ରୀଙ୍କୁ ରାଜ୍ୟ ସରକାର କ’ଣ କହିବେ ବୋଲି ପ୍ରଶ୍ନ କରିଛି ଆମ ଜନତା ଅଧିକାର ।
ବିଜେଡି ପିଏସି ବୈଠକରେ ଅପରେସନ ସିନ୍ଦୂରକୁ ପ୍ରଶଂସା
ନନ୍ଦିଘୋଷ ବ୍ୟୁରୋ: ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଦଳର ପ୍ରଥମ ରାଜନୈତିକ ବ୍ୟାପାର କମିଟି ବୈଠକ ହୋଇଯାଇଛି । ଯେଉଁଥିରେ ଜାତୀୟ ସୁରକ୍ଷା, ରାଜ୍ୟ ରାଜନୈତିକ ପରିସ୍ଥିତି, ଓଡିଶାର ଶିଳ୍ପ ବିକାଶ ଓ ବିଜେଡିର ସାଙ୍ଗଠନିକ ବ୍ୟାପାର ସମ୍ପର୍କରେ ପ୍ରସ୍ତାବ ଗୃହୀତ ହୋଇଛି । ଅପରେସନ ସିନ୍ଦୂରର ସଫଳତାକୁ ବୈଠକରେ ପ୍ରଶଂସା କରାଯାଇଛି ।
ବୈଠକ ପରେ ଗଣମାଧ୍ୟମକୁ ସୂଚନା ଦେଇ ପିଏସି ସଦସ୍ୟ ନିରଞ୍ଜନ ପୂଜାରୀ କହିଛନ୍ତି, ଦଳ ସବୁ ସମୟରେ ଭାରତୀୟ ସେନା ଓ ଅନ୍ୟ ଏଜେନ୍ସି ସହିତ ଅଛି । ଭାରତୀୟ ସେନା ପାଇଁ ବିଜେଡି ଗର୍ବିତ । ଏହି ଅବସରରେ ପହଲଗାଓଁରେ ଆତଙ୍କବାଦୀଙ୍କ ଗୁଳିରେ ନିହତ ବ୍ୟକ୍ତିମାନଙ୍କ ଅମରଆତ୍ମା ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା । ବିଜୁ ଜନତା ଦଳ ଭାରତୀୟ ସେନା ପାଇଁ ଗର୍ବିତ ବୋଲି କହିଛନ୍ତି ନିରଞ୍ଜନ ।
ସେହିପରି ନବୀନ ପଟ୍ଟନାୟକଙ୍କୁ ଶିଳ୍ପ ବିପ୍ଳବ ପାଇଁ ଧନ୍ୟବାଦ ଜଣାଇଛି ପିଏସି । ନବୀନ ସରକାର ସମୟରେ ଶିଳ୍ପ ଓ ଅର୍ଥନୈତିକ ବିକାଶ ହୋଇଥିଲା । ଆଇସିଆରଏ ରିପୋର୍ଟ ଅନୁଯାୟୀ ୨୦୧୫ରୁ ୨୦୨୪ ଭିତରେ ଓଡିଶା ଜିଏସଭିଏରେ ୧୦ ପ୍ରତିଶତ ବୃଦ୍ଧି ପାଇଛି । ଏଥିପାଇଁ ନବୀନଙ୍କ ଦୂରଦୃଷ୍ଟିକୁ ପ୍ରଶଂସା କରାଯିବା ସହିତ ପିଏସି ଧନ୍ୟବାଦ ଦେଇଛି । ଏହାସହ ରାଜ୍ୟର ରାଜନୈତିକ ପରିସ୍ଥିତି ସମ୍ପର୍କରେ ବୈଠକରେ ବିସ୍ତୃତ ଆଲୋଚନା କରାଯାଇଥିଲା । ଏଥିରେ ଜନସାଧାରଣ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା ନେଇ ବୈଠକରେ ଉଦବେଗ ପ୍ରକାଶ ପାଇଥିଲା ।
ବିକାଶ କ୍ଷେତ୍ରରେ ବର୍ତ୍ତମାନ ସୃଷ୍ଟି ହୋଇଥିବା ସ୍ଥାଣୁତା ଦୂର କରି ଜନସାଧାରଣଙ୍କ ଆଶା ଆକାଂକ୍ଷା ପୂରଣ ଦିଗରେ ରାଜ୍ୟ ସରକାର ଯତ୍ନବାନ ହେବେ ବୋଲି ବୈଠକରେ ଆଶା କରାଯାଇଛି । ବିଜ ଜନତା ଦଳର ସାଙ୍ଗଠନିକ ନିର୍ବାଚନ ପରିଚାଳନା ଓ ସାଙ୍ଗଠନିକ ପୁନର୍ବିନ୍ୟାସ ସୁରୁଖୁରୁରେ ସମ୍ପନ୍ନ ହୋଇଥିବାରୁ ବୈଠକରେ ସନ୍ତୋଷ ପ୍ରକାଶ ପାଇଥିଲା । ଆଗାମୀ ଦିନରେ ଦଳର ଅନ୍ୟ ପଦବୀ ପୂରଣ ଦିଗରେ ଦଳର ସଭାପତିଙ୍କୁ ପୂର୍ଣ୍ଣ ସମର୍ଥନ ଦେଇଛି ପିଏସି ।
ବଜ୍ରପାତ ପ୍ରତିହତ କରିବାକୁ ତାଳଗଛ ଲଗାଇବା ନେଇ ନବୀନଙ୍କ ନିଷ୍ପତ୍ତିକୁ ଆଗକୁ ନେଲେ ରାଜ୍ୟ ସରକାର
ନନ୍ଦିଘୋଷ ବ୍ୟୁରୋ: ଗୋଟିଏ ଦିନରେ ବଜ୍ରପାତରେ ଚାଲିଗଲା ୧୪ ଜଣଙ୍କ ଜୀବନ । ୬ ଜଣ ଗୁରୁତର ହୋଇଛନ୍ତି । କୋରାପୁଟ, ଗଞ୍ଜାମ, ଯାଜପୁର, କଟକ ଭଳି ଜିଲ୍ଲାରୁ ଏଭଳି ଖବର ଆସିଛି । ବଜ୍ରପାତକୁ ୨୦୧୫ରୁ ରାଜ୍ୟ ସରକାର ବିପର୍ଯ୍ୟୟ ଭାବେ ଘୋଷଣା କରିବା ସହ ୪ ଲକ୍ଷ ଟଙ୍କାର ଅନୁକମ୍ପା ରାଶି ବ୍ୟବସ୍ଥା କରିଛନ୍ତି । ହେଲେ ଏହା ଯଥେଷ୍ଟ ନୁହେଁ, କ୍ଷତିପୂରଣ ଅଧିକ ମିଳିବା ଦରକାର ବୋଲି କଂଗ୍ରେସ କହିଛି । ଏପଟେ ବଜ୍ରପାତ ମୃତ୍ୟୁ ରୋକିବାକୁ ଅଧିକ ତାଳ ଗଛ ଲଗାଇବା ଉପରେ ଗୁରୁତ୍ବ ଦେଇଛି ଜଙ୍ଗଲ ବିଭାଗ । ୨୦୨୩ରୁ ନବୀନ ସରକାର ତାଳଗଛ ଲଗାଇବା ପାଇଁ ନିଷ୍ପତ୍ତି ନେଇଥିଲେ । ଆଗକୁ କାଳବୈଶାଖୀର ସମ୍ଭାବନା ଥିବାରୁ ଏହା ଉପରେ ସମସ୍ତଙ୍କ ନଜର ରହିଛି ।
ଓଡିଶାରେ ୨୦୨୩ ସେପ୍ଟେମ୍ବର ୨ ତାରିଖରେ ଗୋଟିଏ ଦିନରେ ୩୯ ହଜାରରୁ ଅଧିକ ଥର ବିଜୁଳି ମାରିବା ପରେ ତତ୍କାଳୀନ ନବୀନ ସରକାର ୧୯ ଲକ୍ଷ ତାଳ ଗଛ ରୋପଣ ପାଇଁ ନିଷ୍ପତ୍ତି ନେଇଥିଲେ । ଓଡ଼ିଶା ବଜ୍ରପାତ ପ୍ରବଣ ରାଜ୍ୟ ହୋଇଥିବାରୁ ୨୦୧୫ରେ ରାଜ୍ୟ ସରକାର ଏହାକୁ ପ୍ରାକୃତିକ ବିପର୍ଯ୍ୟୟ ତାଲିକାରେ ସାମିଲ କରିବା ସହ ୪ ଲକ୍ଷ ଟଙ୍କାର ମୃତ୍ୟୁକାଳୀନ ଅନୁକମ୍ପା ରାଶିର ବ୍ୟବସ୍ଥା କରିଥିଲେ । ଏହାକୁ ୧୦ ଲକ୍ଷ କରିବାକୁ କଂଗ୍ରେସ ଦାବି କରିଛି । ୧୯ ଲକ୍ଷ ତାଳ ଗଛ ଲଗାଇବାକୁ ନବୀନ ସରକାରଙ୍କ ନିଷ୍ପତ୍ତି କାର୍ଯ୍ୟକାରୀ ହୋଇଥିବା ବେଳେ ଆହୁରି ତାଳଗଛ ଲଗାଇବାକୁ ସ୍ଥିର କରିଛି ଜଙ୍ଗଲ ବିଭାଗ । ଏବର୍ଷ ତାଳଗଛ ଲଗାଇବା ପାଇଁ ୫ରୁ ୬ କୋଟି ଖର୍ଚ୍ଚ ହେବ ବୋଲି ବିଭାଗୀୟ ମନ୍ତ୍ରୀ ଗଣେଶ ରାମ ସିଂହ ଖୁଣ୍ଟିଆ କହିଛନ୍ତି ।
୨୦୧୯-୨୦ରେ ବଜ୍ରପାତରେ ୨୦୭ ଜଣଙ୍କ ଜୀବନ ଯାଇଥିବା ବେଳେ ୨୦-୨୧ରେ ୧୫୬ ଜଣ, ୨୨-୨୩ରେ ୩୦୬ ଜଣ, ୨୩-୨୪ରେ ୨୭୨ ଏବଂ ୨୦୨୪-୨୫ରେ ୨୦୧ ଜଣଙ୍କ ଜୀବନ ନେଇଛି ବଜ୍ରପାତ । ମୟୂରଭଞ୍ଜ ଜିଲ୍ଲାରେ ସର୍ବାଧିକ ବଜ୍ରପାତ ଜନିତ ମୃତ୍ୟୁ ଘଟିଛି । କୃଷକ, ଗାଈ ଚରାଳି, ମତ୍ସ୍ୟଜୀବୀ, ଶ୍ରମିକ ବଜ୍ରପାତର ଅଧିକ ଶିକାର ହେଉଛନ୍ତି । ନବୀନ ସରକାର ଅମଳରେ ରାଜ୍ୟରେ ଡପଲର ରାଡ଼ାର ସ୍ଥାପନ ହୋଇଥିବାରୁ ଆଗୁଆ ସତର୍କ ସୂଚନା ମିଳିପାରୁଛି । ବଜ୍ରପାତରୁ ମଣିଷ ଜୀବନ ବଞ୍ଚାଇବାକୁ ଅଧିକ ତାଳଗଛ ଲଗାଇବାକୁ ନବୀନ ସରକାର ଦୂରଦୃଷ୍ଟି ସମ୍ପନ୍ନ ନିଷ୍ପତ୍ତି ନେଇଥିଲେ । ବିଜେପି ସରକାର ଏହାକୁ କାର୍ଯ୍ୟକାରୀ କରିଛନ୍ତି । ଅଧିକ ତାଳଗଛ ଲଗାଇବା ଉପରେ ମଧ୍ୟ ଗୁରୁତ୍ବ ଦେଇଛନ୍ତି ।
ସେପଟେ ଆସନ୍ତା ୨୪ ଘଣ୍ଟା ମଧ୍ୟରେ ବିଜୁଳି ଘଡ଼ଘଡ଼ି ହେବାର ଥିବାରୁ ୧୫ ଜିଲ୍ଲା ପାଇଁ ପାଣିପାଗ ବିଭାଗ ଅରେଞ୍ଜ ଓ୍ବାର୍ଣ୍ଣିଂ ଜାରି କରାଯାଇଛି । ଆସନ୍ତା ୪ ଦିନ ପର୍ଯ୍ୟନ୍ତ ଓଡ଼ିଶାରେ କାଳବୈଶାଖୀର ପ୍ରଭାବ ରହିବ ବୋଲି ପାଣିପାଗ ବିଭାଗ ଆକଳନ କରିଛି। ଉପକୂଳ ଓଡ଼ିଶା ସହ ଦକ୍ଷିଣରେ ମଧ୍ୟ ଏହାର ପ୍ରଭାବ ରହିବ । ତେବେ ବଜ୍ରପାତ ଘାତକ ସାବ୍ୟସ୍ତ ହେଉଥିବାରୁ ଏଥିପ୍ରତି ସତର୍କ ରହିବାକୁ ଲୋକଙ୍କୁ ପରାମର୍ଶ ଦିଆଯାଇଛି ।
ପାଣି ବୋତଲରେ ଟଙ୍କାଟେ ଜିଏସଟି ନେବା ରେଷ୍ଟୁରାଣ୍ଟକୁ ପଡ଼ିଲା ଭାରି, ଗଣିବେ ୮ ହଜାର ଫାଇନ
ନନ୍ଦିଘୋଷ ବ୍ୟୁରୋ: ପାଣି ବୋତଲ ଉପରେ ଜିଏସଟି ନେବା ରେଷ୍ଟୁରାଣ୍ଟକୁ ପଡ଼ିଲା ଭାରି । ଜିଏସଟି ବାବଦକୁ ନେଲେ ଟଙ୍କା ଟେ । ହେଲେ ଫାଇନ୍ ଗଣିଲେ ୮ ହଜାର । ଏମିତି ଏକ ଖବର ଆସିଛି ଭୋପାଲରୁ । ଉପଭୋକ୍ତା ଫୋରମ ଏକ ମାମଲାର ବିଚାର କରି ଜଣେ ଗ୍ରାହକଙ୍କ ପାଖରୁ ପାଣି ବୋତଲ ଉପରେ ଏକ ଟଙ୍କା ଜିଏସଟି ନେବା ଅଭିଯୋଗରେ ଏକ ରେଷ୍ଟୁରାଣ୍ଟ ଉପରେ ୮୦୦୦ ଟଙ୍କା ଜରିମାନା ଲଗାଇଛନ୍ତି ।
ଘଟଣା ୨୦୨୧ ଅକ୍ଟୋବର ମାସର । ଭୋପାଳର ଏକ ରେଷ୍ଟୁରାଣ୍ଟରେ ଐଶ୍ବର୍ଯ୍ୟା ନାମକ ଜଣେ ଯୁବତୀ ନିଜ ସାଙ୍ଗଙ୍କ ସହ ଖାଇବାକୁ ଯାଇଥିଲେ । ଖାଇବା ପରେ ଯେତେବେଳେ ବିଲ୍ ଦେବାକୁ ଯାଇଥିଲେ, ଦେଖିଲେ ସେଥିରେ ପାଣି ବୋତଲ ଉପରେ ଜିଏସଟି ପଡ଼ିଥିଲା । ପାଣି ବୋତଲର ଦାମ ୨୦ ଟଙ୍କା ଥିବା ବେଳେ ୨୯ ଟଙ୍କା ବିଲରେ ପଡ଼ିଥିଲା । ଏହି ୨୯ ଟଙ୍କା ମଧ୍ୟରେ ଏକ ଟଙ୍କା ଜିଏସଟି ଥିଲା । ସେ ଏନେଇ ରେଷ୍ଟୁରାଣ୍ଟ କର୍ମଚାରୀଙ୍କୁ ଅଭିଯୋଗ କରିବା ପରେ ଉତ୍ତର ମିଳିଥିଲା ସବୁ କିଛି ନିୟମ ଅନୁସାରେ ନିଆଯାଇଛି । ତେଣୁ ଏଥିରେ କିଛି କଟାଯିବ ନାହିଁ । ଏନେଇ ଐଶ୍ବର୍ଯ୍ୟା ଉପଭୋକ୍ତା ଫୋରମରେ ଅଭିଯୋଗ କରିଥିଲେ । ଯାହାର ରାୟ ୪ ବର୍ଷ ପରେ ଆସିଛି । ଐଶ୍ବର୍ଯ୍ୟାଙ୍କ ଓକିଲ ପ୍ରତୀକ ପାଓ୍ବର କହିଛନ୍ତି, ତାଙ୍କ ପକ୍ଷ ପାଖରୁ ପାଣି ବୋତଲ ଉପରେ ୨୯ ଟଙ୍କା ନିଆଯାଇଥିଲା । ଯାହା ଉପରେ ଅଭିଯୋଗ ହୋଇଥିଲା । ଏଥିରେ ଏକ ଟଙ୍କା ଜିଏସଟି ଥିଲା ।
ରେଷ୍ଟୁରାଣ୍ଟର ଓକିଲ କହିଥିଲେ, ନିୟମ ଅନୁସାରେ ରେଷ୍ଟୁରାଣ୍ଟରେ ବସିବା, ଏସି ଓ ଅନ ଟେବୁଲ ସର୍ଭିସ ଭଳି ସୁବିଧା ପାଇଁ ଏମଆରପିରୁ ଅଧିକ ଚାର୍ଜ ନେବାର ଅଧିକାର ରହିଛି । ହେଲେ ଉପଭୋକ୍ତା ଫୋରମ୍ ନିଜ ରାୟରେ କହିଥିଲେ, ପାଣି ବୋତଲର ଏମଆରପିରେ ପୂର୍ବରୁ ଜିଏସଟି ରହିଥାଏ । ତେଣୁ ପୁଣି ଜିଏସଟି ନେବା ବେଆଇନ ।
ଉପଭୋକ୍ତା ଫୋରମ ନିଜ ରାୟରେ ଜିଏସଟି ବାବଦକୁ ନିଆଯାଇଥିବା ଏକ ଟଙ୍କା ଗ୍ରାହକଙ୍କୁ ଫେରାଇବାକୁ ନିର୍ଦ୍ଦେଶ ଦେଇଥିଲେ । ଏହାସହ ଗ୍ରାହକ ଯେଉଁ ମାନସିକ କଷ୍ଟ ପାଇଲେ ସେ ବାବଦକୁ ତାଙ୍କୁ ୫୦୦୦ ଟଙ୍କା ଏବଂ ମାମଲାର ଆଇନଗତ ପରିଚାଳନା ବାବଦକୁ ୩୦୦୦ ଟଙ୍କା ରେଷ୍ଟୁରାଣ୍ଟକୁ ଦେବାକୁ ପଡ଼ିବ । ଏହି ପ୍ରକାରେ ମାତ୍ର ଏକ ଟଙ୍କା ଜିଏସଟି ପାଇଁ ରେଷ୍ଟୁରାଣ୍ଟକୁ ୮ ହଜାର ଟଙ୍କା ତଣ୍ଡ ଗଣିବାକୁ ପଡ଼ିଛି ।