ନନ୍ଦିଘୋଷ ଟିଭି; ଗଭୀର ସମୁଦ୍ରରେ ପଣ୍ୟବାହୀ ଜାହାଜ ‘ଓସେନ୍ ଓ୍ବିନର’ ବୁଡ଼ିବା ଘଟଣାକୁ ପୂରିଲା ୯ ଦିନ। ଏହାରି ମଧ୍ୟରେ ସର୍ଚ୍ଚ ଅପରେସନ ବନ୍ଦ କରାଯାଇଥିବା ସୂଚନା ମିଳିଛି। ଏବେ ବି ଜାହାଜରେ ଥିବା ୨୪ ଜଣଙ୍କ ମଧ୍ୟରୁ ୨୨ ଜଣ କ୍ରିଉ ସଦସ୍ୟଙ୍କ କୌଣସି ପତ୍ତା ମିଳୁନି। ଘଟଣା ପରେ ମାତ୍ର ୨ ଜଣ ନାବିକଙ୍କୁ ଉଦ୍ଧାର କରାଯାଇଥିଲା। ଉଦ୍ଧାର ହୋଇଥିବା ଦୁଇ ନାବିକଙ୍କ ବୟାନ ଅନୁସାରେ, ଜାହାଜ ବୁଡ଼ିବା ସମୟରେ ମାତ୍ର ୧୦ ଜଣ ନାବିକ ବାହାରକୁ ଆସି ସମୁଦ୍ରକୁ ଡେଇଁ ପଡ଼ିଥିଲେ। ହେଲେ ଅନ୍ୟ ୧୪ ଜଣ ଜାହାଜ ଭିତରେ ହିଁ ରହିଯାଇଥିଲେ। ସେହିପରି ସମୁଦ୍ରକୁ ଡେଇଁଥିବା ୧୦ ଜଣଙ୍କ ମଧ୍ୟରୁ ୨ ଜଣ ଉଦ୍ଧାର ହୋଇଥିବା ବେଳେ ଅନ୍ୟ ୮ ଜଣ ଜାହାଜ ବୁଡ଼ିବା ସମୟରେ ସୃଷ୍ଟି ହୋଇଥିବା ଭଉଁରୀରେ ଫସି ଯାଇଥିବା ସୂଚନା ମିଳିଛି।
ଉଦ୍ଧାର କାର୍ଯ୍ୟରେ କୋଷ୍ଟଗାର୍ଡର ତିନୋଟି ଜାହାଜ ନିୟୋଜିତ ହୋଇଥିବା ବେଳେ ପରେ ଚୀନର ଦୁଇଟି ଜାହାଜ ଏବଂ ଭାରତୀୟ ନୌସେନାର ଏୟାରକ୍ରାଫ୍ଟ ମଧ୍ୟ ସର୍ଚ୍ଚ ଅପରେସନରେ ସାମିଲ ହୋଇଥିଲେ। ତେବେ ସରକାରୀ ଭାବେ କୌଣସି ଘୋଷଣା କରାଯାଇ ନଥିଲେ ମଧ୍ୟ ଭାରତୀୟ ନୌସେନା ଓ ଚୀନର ଦୁଇଟି ଜାହାଜ ସର୍ଚ୍ଚ ଅପରେସନରୁ ଓହରି ଯାଇଥିବା ସୂଚନା ମିଳିଛି।
ଦୀର୍ଘ ୯ ଦିନ ଧରି ୨୨ ଜଣ ନାବିକଙ୍କ କୌଣସି ପତ୍ତା ନ ମିଳିବାରୁ ସେମାନଙ୍କୁ ଜୀବିତ ଅବସ୍ଥାରେ ପାଇବା ନେଇ ଆଶା କ୍ଷୀଣ ହୋଇଛି। ଯଦି ସେମାନେ ମୃତ୍ୟୁବରଣ କରିଥାନ୍ତି, ତେବେ ଦୀର୍ଘ ୯ ଦିନ ପରେ ସେମାନଙ୍କ ମୃତଦେହ ମିଳିବା ମଧ୍ୟ କଷ୍ଟକର ବୋଲି ଆଶଙ୍କା କରାଯାଉଛି। ଗତ ୨୦ ତାରିଖରେ ୭୨ ହଜାର ମେଟ୍ରିକ ଟନ୍ ଲୁହାପଥର ନେଇ ଯାତ୍ରା କରିଥିବା ପଣ୍ୟବାହୀ ଜାହାଜ ‘ଓସେନ୍ ଓ୍ବିନର’ ଗତ ୨୧ ତାରିଖ ସନ୍ଧ୍ୟାରେ ପାରାଦ୍ଵୀପ ଠାରୁ ପ୍ରାୟ ୨୩୦ ନଟିକାଲ ମାଇଲ ଦୂର ଗଭୀର ସମୁଦ୍ରରେ ଯୋଗାଯୋଗ ବିଚ୍ଛିନ୍ନ ହେବା ପରେ ବୁଡ଼ିଯାଇଥିଲା।
