ଉତ୍ତରାଖଣ୍ଡ : ନେତା ଗିରି ଦେଖାଇବାକୁ ଆସିଥିଲେ । ସବୁଠି ପିଆଜର ଦର ଆକାଶ ଛୂଆଁ ହୋଇଥିବା ବେଳେ ନେତା ବାବୁ ଭାବିଥିଲେ କମ୍ ଦାମରେ ପିଆଜ ବିକ୍ରୀ କରି ବାହାବା ନେବେ । କିନ୍ତୁ ୩୦ ଟଙ୍କାରେ ପିଆଜ ଶୁଣି ଛୁଟି ଆସିଥିଲେ ଶତାଧିକ ଲୋକ । ପରିସ୍ଥିତି ଏପରି ହେଲା ଯେ, କେହି ପିଆଜ ନେଇପାରିଲେ ନାହିଁ । ସମସ୍ତେ ଟଣା ଘୋଷରାରେ ବ୍ୟସ୍ତ ରହିଲେ । ନେତା ବାବୁଙ୍କ କ୍ରେଡିଟ୍ ନେବା ବି ଅଧା ବାଟରେ ରହିଲା । ପରିସ୍ଥିତି ଏପରି ହେଲା ଯେ, ନେତାଙ୍କୁ ଚିକିତ୍ସା ପାଇଁ ଯିବାକୁ ହେଲା ହସ୍ପିଟାଲ ।

ଉତ୍ତରାଖଣ୍ଡର ଜଣେ କଂଗ୍ରେସ ନେତାଙ୍କୁ ପିଆଜ ପାଇଁ କାମୁଡ଼ା ଖାଇବାକୁ ପଡ଼ିଛି ? ଆଙ୍ଗୁଠିକୁ ପୁରା କାମୁଡ଼ି ଜଣେ ବ୍ୟକ୍ତି ରକ୍ତାକ୍ତ କରିଦେଇଛନ୍ତି । ଏମିତି କିଛି ଘଟଣା ଏବେ ସାରା ଦେଶରେ ଚର୍ଚ୍ଚାର ବିଷୟ ହୋଇଛି । ପିଆଜର ଚଢ଼ା ଦର ଗରିବ ଲୋକଙ୍କ କଂସାରୁ ପିଆଜ ହଜାଇ ଦେଇଛି । ଦର କେଉଁଠି ୧୪୦ ତ ଆଉ କେଉଁଠି କେଜି ପିଛା ୧୬୦ ।  ଉତ୍ତରାଖଣ୍ଡରେ ବି ପିଆଜ ଦର ଆକାଶ ଛୁଆଁ । ପିଆଜର ଦର ଯେତିକି ବଢ଼ିବାରେ ଲାଗିଛି ସେତିକି ଆଶ୍ଚର୍ଯ୍ୟ ପୂର୍ଣ୍ଣ ଘଟଣା ଦେଖିବାକୁ ମିଳୁଛି । କେଉଁଠି ପିଆଜକୁ ନେଇ ଟିକଟକ୍‌ ହେଲାଣିତ କେଉଁଠି ନେତା କାମୁଡା ଖାଇ ରକ୍ତାକ୍ତ ହେଲେଣି ।

ଉତ୍ତରାଖଣ୍ଡର ନୈନିତାଲରେ ପିଆଜର ଦର ବୃଦ୍ଧି ନେଇ ଚାଲିଥିଲା ପ୍ରତିବାଦ । କଂଗ୍ରେସ କର୍ମୀ ମାନେ କମ୍‌ ଦରରେ ପିଆଜ ବିକ୍ରୀ କରି ପ୍ରତିବାଦ କରୁଥିଲେ । କିଲୋ ପିଛା ୩୦ ଟଙ୍କାରେ ବିକ୍ରି ହେଉଥିଲା ପିଆଜ । ମହିଳା ଆନ୍ଦୋଳନ ମଧ୍ୟରେ ଜଣେ ବ୍ୟକ୍ତି ପଶି ମହିଳା ମାନଙ୍କୁ ଗାଳି ଗୁଲଜ କରିବାକୁ ଲାଗିଥିଲେ ।

କଂଗ୍ରେସର କର୍ମୀ ନନ୍ଦନ ମେହେରା ସଂପୃକ୍ତ ବ୍ୟକ୍ତିଙ୍କୁ ଅଟକାଇବା ସହ ତାଙ୍କୁ ପିଆଜ ଦେବେନାହିଁ ବୋଲି ମନାକରିଥିଲେ । ଏହାପରେ ସେ ରାଗିଯାଇ ତାଙ୍କ ହାତକୁ କାମୁଡ଼ି ପୁରା ରକ୍ତାକ୍ତ କରିଦେଇଥିଲା । ଏ ଘଟଣା ଦେଖି, ପାଖରେ ଥିବା କଂଗ୍ରେସ କର୍ମୀ ମାନେ ପୋଲିସକୁ ଫୋନ କରିଥିଲେ । ଏହାପରେ ତାଙ୍କୁ ପୋଲିସ ଧରିନେଇଥିଲା । କିନ୍ତୁ ସେ ଯିବା ବେଳେ କହୁଥିଲେ, ନେତାଗିରି ଘରେ କର । ପିଆଜ ବିକ୍ରୀ ଛାଡ଼ ।

ନନ୍ଦନ ମେହେରା ଉତ୍ପାତ ମଚାଇଥିବା ବ୍ୟକ୍ତି ବିଜେପିର ବୋଲି କହିଛନ୍ତି । ହଲଦଓ୍ୱାନୀ ପୋଲିସର ଏସ୍‌ଏଚ୍‌ଓ ଙ୍କ କହିବା ଅନୁସାରେ ସେହି ବ୍ୟକ୍ତି ଜଣକ ନିଶାରେ କିମ୍ବା କୌଣସି ଚାପରେ ଥାଇ କରିଛନ୍ତି ବୋଲି ପ୍ରାଥମିକ ତଦନ୍ତରୁ ଯଣାପଡ଼ିଛି । ଅନ୍ୟପଟେ ପିଜେପି ଏଭଳି ଅଭିଯୋଗକୁ ସଫା ସଫା ମନାକରିଦେଇଛି । ତେବେ କଂଗ୍ରେସ ନେତା ଘଟଣା ସ୍ଥଳରେ ପ୍ରତିବାଦ ନକରି କାମୁଡା ଖାଇବା ପରେ ହସ୍ପିଟାଲ ଯାଇଥିଲେ । ସମସ୍ତେ କହୁଛନ୍ତି ପିଆଜ ବିକିବାରୁ ନେତାଜୀଙ୍କର ହେଲା ଏ ଅବସ୍ଥା ।