ବାଙ୍କୀ : ନନ୍ଦନକାନନରେ ପର୍ଯ୍ୟଟକ ହାତାହାତି। ରକ୍ତାକ୍ତ ହେଲେ ପର୍ଯ୍ୟଟକ। ଗତ ମଙ୍ଗଳବାର ଏହି ଘଟଣା ଘଟିଥିଲା ବୋଲି ଜଣାପଡ଼ିଛି। ଏହାର ଭିଜୁଆଲ ଏବେ ଭାଇରାଲ ହେବାରେ ଲାଗିଛି। କିଛି ପର୍ଯ୍ୟଟକ ପରସ୍ପର ମଧ୍ୟରେ ବାଡ଼ିଆ ପିଟା ହେବାରୁ ଜଣକର ମୁଣ୍ଡ ଫାଟି ଯାଇଥିଲା। ଏହି ଘଟଣା ପରେ ପ୍ରାଣୀ ଉଦ୍ୟାନରେ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ନନ୍ଦନକାନନରେ ସୁରକ୍ଷା ପାଇଁ ଓଆଇଏସଏଫ୍ ସହ ସିକ୍ୟୁରିଟି ଗାର୍ଡ ନିୟୋଜିତ ଅଛନ୍ତି। । ଏ ସମ୍ପର୍କରେ ନନ୍ଦନକାନନର ଏସିଏଫ ମନସ୍ମିତା ମହାରଣା କହିଛନ୍ତି, ବ୍ୟାଟେରି ଗାଡ଼ିରେ ବସିବାକୁ ନେଇ ପର୍ଯ୍ୟଟକଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ବାଡି଼ଆବାଡ଼ି ଯାଏ କଥା ଯାଇଥିଲା। କିନ୍ତୁ ଉପସ୍ଥିତ କର୍ମଚାରୀ ଦେଖଣାହାରୀ ସାଜିଥିଲେ ବୋଲି ଅଭିଯୋଗ ହୋଇଛି।
ତଳକୁ ଖସିଗଲେ ପାକିସ୍ତାନ ଖେଳାଳି, ଭାରତଠୁ ହାରିବା ପରେ କଲେ ଖରାପ ବ୍ୟବହାର
ନନ୍ଦିଘୋଷ ବ୍ୟୁରୋ : ଭାରତ ନିକଟରେ ୧୬ ବର୍ଷରୁ କମ୍ ଟେନିସ୍ ଟୁର୍ଣ୍ଣାମେଣ୍ଟ ଜୁନିଅର ଡେଭିସ୍ କପ୍ରେ ତା’ର ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୨-୦ ଗୋଲରେ ପରାସ୍ତ କରିଛି। କାଜାଖସ୍ତାନର ସିମକେଣ୍ଟରେ ଖେଳୁଥିବା ଭାରତୀୟ ଖେଳାଳି ପ୍ରକାଶ ସରନ ଓ ତାଭିଶ ପାହୱା ସୁପର ଟାଇ-ବ୍ରେକରେ ସେମାନଙ୍କର ସିଙ୍ଗଲ୍ସ ମ୍ୟାଚ୍ ଜିତି ଫାଇନାଲ ଷ୍ଟାଣ୍ଡିଂରେ ଭାରତର ସ୍ଥାନ ସୁନିଶ୍ଚିତ କରିଥିଲେ। କିନ୍ତୁ ଏବେ ଏହି ମ୍ୟାଚ୍ର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି, ଯାହା ଏକ ବଡ଼ ବିବାଦ ସୃଷ୍ଟି କରିଛି। ଭାଇରାଲ ହେଉଥିବା ଭିଡିଓରେ ଭାରତଠାରୁ ହାରିବା ପରେ, ପାକିସ୍ତାନୀ ଖେଳାଳି ଭାରତୀୟ ଖେଳାଳିଙ୍କ ସହ ହାତ ମିଳାଇବା ସମୟରେ ଖରାପ ବ୍ୟବହାର କରୁଥିବାର ଦେଖାଯାଉଛି।
ମ୍ୟାଚ୍ ଶେଷ ହେବା ପରେ, ଭାରତୀୟ ଖେଳାଳି ହାତ ମିଳାଇବାକୁ ଯାଇଥିଲେ। କିନ୍ତୁ ପାକିସ୍ତାନୀ ଖେଳାଳି ଜଣକ ଖରାପ ବ୍ୟବହାର ଦେଖାଇବା ସହ ପ୍ରଥମେ ହାତ ମିଳାଇ ନଥିଲେ । କିନ୍ତୁ ହାତ ମିଳାଇବା ସମୟରେ ସେ ହଠାତ୍ ଅପମାନଜନକ ଭାବରେ ଭାରତୀୟ ଖେଳାଳିଙ୍କ ହାତକୁ ଦୂରେଇ ଦେଇଥିଲେ। ଏହି କାମକୁ ନେଇ ପାକିସ୍ତାନ ଖେଳାଳିଙ୍କୁ ସମାଲୋଚନା କରାଯାଉଛି । ଅନ୍ୟପଟେ ଭାରତୀୟ ଖେଳାଳିଙ୍କ ଶାନ୍ତ ଆଚରଣ ପାଇଁ ତାଙ୍କୁ ପ୍ରଶଂସା କରାଯାଉଛି ।
ସୁନ୍ଦରଗଡ଼ ବିସ୍ଫୋରକ ଲୁଟ୍ ଘଟଣା, ଓଡି଼ଶା-ଝାଡ଼ଖଣ୍ଡ ସୀମାରେ ହାଇ ଆଲର୍ଟ
ସୁନ୍ଦରଗଡ଼ : ସୁନ୍ଦରଗଡ଼ କେ. ବଲାଙ୍ଗ ଥାନା ବାଙ୍କ ପଥର ଖାଦାନରୁ ୫ ଟନ ବିସ୍ଫୋରକ ଲୁଟ୍ ଘଟଣାରେ ଡିଜିପିଙ୍କ ସମୀକ୍ଷା। ରାଉରକେଲା ଏସପିଙ୍କ ଅଫିସରେ ବୈଠକ ହୋଇଛି। ଡିଜିଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ଆଇଜି ଅପରେସନ, ସୁନ୍ଦରଗଡ଼ ଏସପିଙ୍କ ସହ ବରିଷ୍ଠ ପୋଲିସ ଅଧିକାରୀ ସାମିଲ ହୋଇଛନ୍ତି। ଓଡ଼ିଶା- ଝାଡ଼ଖଣ୍ଡ ସୀମାରେ ହାଇଆଲର୍ଟ ଜାରି କରାଯିବା ସହ କମ୍ବିଂ ଅପରେସନକୁ ଜୋରଦାର କରାଯାଇଛି। ସୁନ୍ଦରଗଡ଼ କେ. ବଲାଙ୍ଗ ଥାନା ବାଙ୍କ ପଥର ଖାଦାନରୁ ୫ ଟନ୍ ବିସ୍ଫୋରକ ଲୁଟ୍ ହୋଇଥିଲା। ଏହି ଘଟଣାକୁ ୪୮ ଘଣ୍ଟା ବିତି ଯାଇଥିଲେ ମଧ୍ୟ ବିସ୍ଫୋରକ କୁଆଡ଼େ ଗଲା, କିଏ ନେଇଛି, ତାର ଟେର୍ ମିଳି ନାହିଁ।
ପୁଣି ଜନନୀ ଯନ୍ତ୍ରଣା, ଦେଢ଼ କିଲୋମିଟର ଖଟିଆରେ ବୁହାହେଲେ ଗର୍ଭବତୀ
ନବରଙ୍ଗପୁର : ନବରଙ୍ଗପୁର ଜିଲ୍ଲାରେ ପୁଣି ଦେଖିବାକୁ ମିଳିଛି ଜନନୀ ଯନ୍ତ୍ରଣା। ଗାଁକୁ ରାସ୍ତା ନଥିବାରୁ ପହଞ୍ଚି ପାରିଲାନି ଆମ୍ବୁଲାନ୍ସ। ଦେଢ଼ କିଲୋମିଟର ଖଟିଆରେ ବୁହାହେଲେ ଗର୍ଭବତୀ । ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ଇଚ୍ଛାପୁର ପଞ୍ଚାୟତର ଡୁମୁନିଗୁଡା ଗାଁରେ ଦେଖିବାକୁ ମିଳିଛି ଏଭଳି ଅଭାବନୀୟ ଘଟଣା । ଡୁମୁନିଗୁଡା ଗାଁର ଚକ୍ରଧର ଜାନିଙ୍କ ସ୍ତ୍ରୀ ବିମଳା ଜାନିଙ୍କୁ ପ୍ରସବ ଯନ୍ତ୍ରଣା ହେବାରୁ ପରିବାର ଲୋକ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । କିନ୍ତୁ ଆମ୍ବୁଲାନ୍ସ ପହଁଚି ଥିଲେ ମଧ୍ୟ ଗାଁକୁ ରାସ୍ତା ନଥିବାରୁ ଗାଁ ଠାରୁ ଦେଢ଼ କିଲୋମିଟର ଦୂରରେ ଅଟକି ରହିଥିଲା। ଫଳରେ ପରିବାର ଲୋକୋ ଓ ଗ୍ରାମବାସୀ ଏକ ଖଟରେ ଭାର କରି ଦେଢ଼ କିଲୋମିଟର ବାଟ କର୍ଲାପଡ଼ା ଗାଁ ପର୍ଯ୍ୟନ୍ତ ଗର୍ଭବତୀଙ୍କୁ ଖଟରେ ବୋହି ଆଣିଥିଲେ। ଆମ୍ବୁଲାନ୍ସରେ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଉଥିବା ବେଳେ ବାଟରେ ଆମ୍ବୁଲାନ୍ସ ଭିତରେ ଗର୍ଭବତୀ ଏକ ଶିଶୁପୁତ୍ର ଜନ୍ମ ଦେଇଥିଲେ। ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିବା ବେଳେ ମା ସୁସ୍ଥ ଥିବାବେଳେ ଶିଶୁପୁତ୍ରକୁ ମୃତ ଘୋଷଣା କରିଛନ୍ତି ଡାକ୍ତର। ତେବେ ଝରିଗାଁ ବ୍ଲକରେ ବାରମ୍ବାର ଜନନୀ ଯନ୍ତ୍ରଣା ଦୃଶ୍ୟ ଦେଖିବାକୁ ମିଳୁଛି । ରାସ୍ତାଘାଟ ଅବସ୍ଥା ଶୋଚନୀୟ ଥିବାରୁ ଗର୍ଭବତୀଙ୍କୁସୁରକ୍ଷିତ ପ୍ରସବ ପାଇଁ ଡାକ୍ତରଖାନା ଆଣିବାରେ ଅସୁବିଧା ହେଉଥିବା ହେଉଥିବା ବେଳେ ବାରମ୍ବାର ଏଭଳି ଜନନୀ ଯନ୍ତ୍ରଣା ଦେଖିବାକୁ ମିଳୁଛି।
ଆମେରିକାର ନୂଆ ପ୍ରସ୍ତାବକୁ ଗ୍ରହଣ କଲା ହମାସ, ତେବେ ଅସ୍ତ୍ରବିରତିରେ ବିଳମ୍ବ କାହିଁକି କରୁଛି ଗାଜା?
ନନ୍ଦିଘୋଷ ବ୍ୟୁରୋ : ଆମେରିକାର ପ୍ରତିନିଧି ଷ୍ଟିଭ ୱିଟକଫଙ୍କ ଦ୍ୱାରା ଉପସ୍ଥାପିତ ଏକ ନୂତନ ଅସ୍ତ୍ରବିରତି ପ୍ରସ୍ତାବକୁ ପାଲେଷ୍ଟାଇନୀ ଗୋଷ୍ଠୀ ହମାସ ଅନୁମୋଦନ ଘୋଷଣା କରିଛି, ଯାହା ଗାଜା ଷ୍ଟ୍ରିପରେ ଇସ୍ରାଏଲର ଆକ୍ରମଣକୁ ବନ୍ଦ କରିବା ପ୍ରୟାସରେ ସମ୍ଭାବ୍ୟ ସଫଳତାର ଆଶା ସୃଷ୍ଟି କରିଛି। ଏକ ସରକାରୀ ବିବୃତ୍ତିରେ, ହମାସ କହିଛି ଯେ ପ୍ରସ୍ତାବରେ ଏକ ସାଧାରଣ ଢାଞ୍ଚା ଅନ୍ତର୍ଭୁକ୍ତ ଯେଉଁଥିରେ ଏକ ସ୍ଥାୟୀ ଯୁଦ୍ଧବିରତି, ଗାଜା ଷ୍ଟ୍ରିପରୁ ଇସ୍ରାଏଲୀ ସେନାର ସମ୍ପୂର୍ଣ୍ଣ ପ୍ରତ୍ୟାହାର, ମାନବୀୟ ସହାୟତାର ତୁରନ୍ତ ପ୍ରବେଶ ଓ ଚୁକ୍ତିନାମାର ଆନୁଷ୍ଠାନିକ ଘୋଷଣା ପରେ ଏନକ୍ଲେଭର ନାଗରିକ ବ୍ୟାପାର ପରିଚାଳନା ପାଇଁ ଏକ ବୃତ୍ତିଗତ କମିଟି ଗଠନ ଅନ୍ତର୍ଭୁକ୍ତ ଅଛି। ହମାସ ବିବୃତ୍ତିରେ ଆହୁରି କୁହାଯାଇଛି ଯେ, ଚୁକ୍ତିନାମାରେ ଅନ୍ତର୍ଜାତୀୟ ମଧ୍ୟସ୍ଥତାଙ୍କ ତତ୍ତ୍ୱାବଧାନରେ ପାଲେଷ୍ଟାଇନୀ ବନ୍ଦୀଙ୍କ ସହମତ ସଂଖ୍ୟକ କଏଦୀଙ୍କ ବଦଳରେ ଦଶ ଜଣ ଇସ୍ରାଏଲୀ ବନ୍ଦୀଙ୍କୁ ମୁକ୍ତ କରିବା ଓ ଅନେକ ମୃତଦେହ ଫେରାଇବା ଅନ୍ତର୍ଭୁକ୍ତ ରହିଛି ।
ଷ୍ଟିଭେନ୍ ୱିଟକଫ ହ୍ୱାଇଟ୍ ହାଉସ୍ ପ୍ରେସ୍ ବ୍ରିଫିଙ୍ଗ୍ ସମୟରେ କହିଥିଲେ, ଆମେ ଏକ ଚୁକ୍ତିନାମା ଉପସ୍ଥାପନ କରିବାକୁ ନିକଟତର, ଯାହା ଆଜି ସମୀକ୍ଷା ପାଇଁ ରାଷ୍ଟ୍ରପତିଙ୍କ ନିକଟରେ ପହଞ୍ଚିବ ବୋଲି ଆଶା କରାଯାଉଛି। ସେ ଏହା ମଧ୍ୟ କହିଛନ୍ତି ଯେ ସେ ଏକ ଯୁଦ୍ଧବିରତି ଓ ସଂଘର୍ଷର ଏକ ଦୀର୍ଘକାଳୀନ ସମାଧାନରେ ପହଞ୍ଚିବାକୁ ଆଶା କରୁଛନ୍ତି।
ହମାସ ଯୁଦ୍ଧବିରତି ଚୁକ୍ତିନାମାରେ ରାଜି ହୋଇ ଏକ ବିବୃତ୍ତି ଜାରି କରିଛି। କିନ୍ତୁ ଯୁଦ୍ଧବିରତି ଚୁକ୍ତିନାମା ସମ୍ପର୍କରେ ଇସ୍ରାଏଲ ପକ୍ଷରୁ ଏପର୍ଯ୍ୟନ୍ତ କୌଣସି ସକାରାତ୍ମକ ବିବୃତ୍ତି ଆସିନାହିଁ। ନେତାନ୍ୟାହୁଙ୍କ ବିରୁଦ୍ଧରେ ଅଭିଯୋଗ କରାଯାଇଛି ଯେ ସେ ଯୁଦ୍ଧକୁ ଦୀର୍ଘ କରିବାକୁ ଚାହୁଁଛନ୍ତି ଓ କଏଦୀଙ୍କ ମୁକ୍ତି ପାଇଁ ଚିନ୍ତିତ ନାହାଁନ୍ତି। ଯୁଦ୍ଧବିରତି ପାଇଁ ଉଭୟ ପକ୍ଷର ସମ୍ମତି ଆବଶ୍ୟକ। ପୂର୍ବ ଯୁଦ୍ଧବିରତି ମଧ୍ୟ ଇସ୍ରାଏଲ ଦ୍ୱାରା ଭଙ୍ଗ କରାଯାଇଥିଲା।
ସେପ୍ଟିକ ଟାଙ୍କିରୁ ୬ ବର୍ଷ ଶିଶୁକନ୍ୟାର ମୃତଦେହ ଉଦ୍ଧାର
ରାଉରକେଲା : ରାଉରକେଲା ସହରର ଛେଣ୍ଡ କଲୋନୀରେ ଏକ ସେପ୍ଟିକ ଟାଙ୍କିରୁ ୬ ବର୍ଷର ଶିଶୁକନ୍ୟାର ମୃତଦେହ ଉଦ୍ଧାର ହୋଇଛି । ମୃତ ଶିଶୁ କନ୍ୟା ସୋରୁନ ବଡାଇକ ବୋଲି ଚିହ୍ନଟ କରାଯାଇଛି । ୩୦ ଫୁଟ ଗଭୀର ସେପ୍ଟିକ ଟାଙ୍କିରେ ଢାଙ୍କୁଣି ଲଗାଯାଇ ନଥିବାରୁ ଶିଶୁକନ୍ୟାଟି ଖେଳୁଥିବା ସମୟରେ ଖସିପଡିଥିବା ସନ୍ଦେହ କରାଯାଉଛି। ଛେଣ୍ଡ ଥାନା ପୋଲିସ ଟାଙ୍କିରୁ ମୃତଦେହ ଉଦ୍ଧାର କରି ଘଟଣାର ତଦନ୍ତ ଆରମ୍ଭ କରିଛି। ରାଉରକେଲା ସରକାରୀ ଡାକ୍ତରଖାନାର ମର୍ଗ ହାଉସରେ ମୃତଦେହ ରଖାଯାଇଛି।
ଯେଉଁ ତୁର୍କୀର ଅନ୍ଧଭକ୍ତ ପାକିସ୍ତାନ, ତା’ର ନାଗରିକଙ୍କୁ ହିଁ ସୁବିଧା ଦେଉନାହାନ୍ତି ଏର୍ଡୋଗାନ୍
ନନ୍ଦିଘୋଷ ବ୍ୟୁରୋ : ଭାରତ ସହିତ ଉତ୍ତେଜନା ସମୟରେ ତୁର୍କୀ ପାକିସ୍ତାନ ସହିତ ଛିଡା ହୋଇଥିଲା। ଯଦିଓ ତୁର୍କିର ଡ୍ରୋନ ପାକିସ୍ତାନକୁ ସାହାଯ୍ୟ କରିନଥିଲା, ତଥାପି ଏହାର ପ୍ରଧାନମନ୍ତ୍ରୀ ଶାହବାଜ ସରିଫ ସମଗ୍ର ବିଶ୍ୱକୁ କହି ଚାଲିଛନ୍ତି ଯେ କିପରି ରାଷ୍ଟ୍ରପତି ଏର୍ଡୋଗାନ ତାଙ୍କ ଲୋକଙ୍କ ଜୀବନ ରକ୍ଷା କରିଥିଲେ। ଏହି ଅନୁଗ୍ରହର ପରିଶୋଧ କରିବା ପାଇଁ, ଶାହବାଜ ତୁର୍କୀ ମଧ୍ୟ ଗସ୍ତ କରିଥିଲେ। କିନ୍ତୁ ଯେଉଁ ତୁର୍କୀର ବନ୍ଧୁତାକୁ ପାକିସ୍ତାନ ନିଜର ଶକ୍ତି ବୋଲି ଭାବୁଛି, ତା’ର ଲୋକଙ୍କ ଦେଶରେ ସହଜରେ ବୁଲିବା ପାଇଁ ସୁବିଧା ଦେଉନି ।
ଆମେ ଯେଉଁ ସୁବିଧା ବିଷୟରେ ଆଲୋଚନା କରୁଛୁ, ତାହା ହେଉଛି ମାଗଣା ଭିସା ପ୍ରବେଶ। ତୁର୍କୀ ପାକିସ୍ତାନର ଲୋକମାନଙ୍କୁ ଭିସା ବିନା ନିଜ ଦେଶରେ ପ୍ରବେଶ କରିବାକୁ ଅନୁମତି ଦିଏ ନାହିଁ। ପାକିସ୍ତାନର ଲୋକମାନଙ୍କୁ ତୁର୍କୀ ଯିବା ପାଇଁ ପ୍ରଥମେ ଭିସା ପାଇଁ ଆବେଦନ କରିବାକୁ ପଡିବ। ପାସପୋର୍ଟ ଧାରଣ କରିଥିବା ପାକିସ୍ତାନୀ ନାଗରିକମାନେ ତୁର୍କୀ ଇ-ଭିସା ପାଇଁ ଆବେଦନ କରିପାରିବେ। ଏଥିପାଇଁ ସେମାନଙ୍କର ଏକ ଇ-ମେଲ୍ ଆଇଡି ଓ ଡେବିଟ୍/କ୍ରେଡିଟ୍ କାର୍ଡ ଥିବା ଆବଶ୍ୟକ। ପାକିସ୍ତାନୀ ନାଗରିକମାନେ ଇ-ଭିସା ମାଧ୍ୟମରେ ତୁର୍କୀରେ ୩୦ ଦିନ ପର୍ଯ୍ୟନ୍ତ ରହିପାରିବେ। ଆପଣଙ୍କ ପ୍ରସ୍ଥାନ ତାରିଖରୁ ଅତି କମରେ ଛଅ ମାସ ପାଇଁ ପାକିସ୍ତାନୀ ପାସପୋର୍ଟ ବୈଧ ହେବା ଆବଶ୍ୟକ। ଆପଣ ତୁର୍କୀ ଇଲେକ୍ଟ୍ରୋନିକ୍ ଭିସା ବ୍ୟବହାର କରି ସ୍ଥଳ, ସମୁଦ୍ର କିମ୍ବା ଆକାଶପଥରେ ପହଞ୍ଚିପାରିବେ। ତଥାପି, ତୁର୍କୀ ପାକିସ୍ତାନର କିଛି ଲୋକଙ୍କୁ ଛାଡୁଛି । ଯେଉଁମାନଙ୍କର ସରକାରୀ ପାସପୋର୍ଟ ଅଛି, ସେମାନେ ଭିସା ବିନା୯୦ ଦିନ ପାଇଁ ତୁର୍କୀରେ ରହିପାରିବେ। ସେହିପରି, ଯଦି କୌଣସି ପାକିସ୍ତାନୀଙ୍କ ପାଖରେ ବାସସ୍ଥାନ ଅନୁମତି ଅଛି, ତେବେ ସେ ଇ-ଭିସା ବିନା ମଧ୍ୟ ତୁର୍କୀରେ ରହିପାରିବେ।
ଏହା ନୁହେଁ ଯେ କେବଳ ତୁର୍କୀ ପାକିସ୍ତାନକୁ ଏହି ସୁବିଧା ପ୍ରଦାନ କରୁନାହିଁ। ପାକିସ୍ତାନର ଆଉ ଏକ ବନ୍ଧୁ ଆଜରବାଇଜାନ ମଧ୍ୟ ଭିସା ବିନା ନିଜ ଦେଶରେ ପ୍ରବେଶ କରିବାକୁ ଅନୁମତି ଦିଏ ନାହିଁ। ପାକିସ୍ତାନୀ ଲୋକମାନଙ୍କୁ ଆଜରବାଇଜାନ ଯିବାକୁ ପ୍ରଥମେ ଭିସା ନେବାକୁ ପଡିବ। ସେମାନେ ଅନଲାଇନରେ ମଧ୍ୟ ଇ-ଭିସା ପାଇଁ ଆବେଦନ କରିପାରିବେ।
ପାକିସ୍ତାନୀ ପାସପୋର୍ଟଧାରୀ ଲୋକମାନେ କେବଳ ୯ଟି ଦେଶକୁ ବିନା ଭିସାରେ ପ୍ରବେଶ କରିପାରିବେ। ଏଥିରେ ହାଇତି, ମାଡାଗାସ୍କର ଅନ୍ତର୍ଭୁକ୍ତ। ମାଇକ୍ରୋନେସିଆ, ନିୟୁ ଭଳି ଦେଶ ଅନ୍ତର୍ଭୁକ୍ତ। ସେହି ସମୟରେ, ବିଶ୍ୱରେ ଏପରି ୪ଟି ଦେଶ ଅଛି ଯେଉଁଠାରେ ପାକିସ୍ତାନୀ ଲୋକମାନଙ୍କୁ ସେମାନଙ୍କ ଦେଶରେ ପ୍ରବେଶ କରିବାକୁ ମଧ୍ୟ ଅନୁମତି ଦିଆଯାଏ ନାହିଁ। ଏହି ଦେଶଗୁଡ଼ିକ ହେଉଛି ଇସ୍ରାଏଲ, ଭାରତ, ଲିବିଆ ଓ ସୁଡାନ।
ହୋମଗାର୍ଡ ଶାରୀରିକ ପରୀକ୍ଷା ବେଳେ ଟଳି ପଡ଼ିଲେ ଯୁବକ
ଗଜପତି : ହୋମଗାର୍ଡ ଶାରୀରିକ ପରୀକ୍ଷା ବେଳେ ଅଘଟଣ। ଜଣେ ପରୀକ୍ଷାର୍ଥୀଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି । ଗଜପତିରେ ଏହି ଅଭାବନୀୟ ଘଟଣା ଘଟିଛି। ମୃତକ ହେଲେ ରାମଗିରି ଥାନା ପରିସଲ ଗାଁର ଲାଦେନ ମିଶାଇ। ଗୁରୁତର ପରୀକ୍ଷାର୍ଥୀଙ୍କୁ ହସପିଟାଲରେ ଭର୍ତ୍ତି କରାଯାଇଛି। ସ୍ଥାନୀୟ ବେତାଗୁଡା ଠାରେ ଶାରିରୀକ ପରୀକ୍ଷା ଚାଲିଥିଲା। ରାଣିପେଣ୍ଠ ଠାରୁ ପଦ୍ମପୁର ଦୁଇ କିମି ରାସ୍ତାରେ ସକାଳୁ ଦୈାଡ ପରୀକ୍ଷା ଚାଲିଥିବା ବେଳେ ଦୈାଡରେ ସଫଳତାର ସହ ଉତ୍ତୀର୍ଣ୍ଣ ହୋଇଥିଲେ। କିନ୍ତୁ ହଠାତ୍ ତଳେ ପଡ଼ିଯିବା ପରେ ଗୁରୁତର ହୋଇ ପଡ଼ିବାରୁ ତୁରନ୍ତ ତାଙ୍କୁ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ସେହିଭଳି ଅନ୍ୟ ଜଣେ ପରୀକ୍ଷାର୍ଥୀ ପି. ଶଙ୍କର ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ଅନ୍ୟ ଦୁଇଜଣ ପ୍ରାର୍ଥୀ ପୁଣି ଅସୁସ୍ଥ ହେବା ପରେ ଚିକିତ୍ସାଳୟରେ ଭର୍ତ୍ତି କରାଯାଇଛି, ସେମାନେ ହେଲେ ଅର୍ପଣ ପାଣି ଓ ଅନ୍ୟ ଜଣଙ୍କ ପରିଚୟ ସ୍ପଷ୍ଟ ହୋଇ ନାହିଁ ।
ଟ୍ରମ୍ପ ପ୍ରଶାସନରୁ ଇସ୍ତଫା ଦେଲେ ଏଲନ ମସ୍କ
ନନ୍ଦିଘୋଷ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିକଟତର ବୋଲି ବିବେଚନା କରାଯାଉଥିବା ଏଲୋନ ମସ୍କ ଟ୍ରମ୍ପ ପ୍ରଶାସନରୁ ଇସ୍ତଫା ଦେଇଛନ୍ତି । ସଂଘୀୟ ଅମଲାତନ୍ତ୍ରକୁ ହ୍ରାସ ଏବଂ ସଂସ୍କାର ପାଇଁ ପ୍ରୟାସର ନେତୃତ୍ୱ ନେବା ପରେ ଏଲୋନ ମସ୍କ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୀର୍ଷ ପରାମର୍ଶଦାତା ଭାବରେ ତାଙ୍କର ସରକାରୀ ପଦବୀ ଛାଡିବାକୁ ଯାଉଛନ୍ତି।
ଏହା ଘୋଷଣା କରି, ମସ୍କ X ରେ ପୋଷ୍ଟ କରିଛନ୍ତି, ଜଣେ ସ୍ୱତନ୍ତ୍ର ସରକାରୀ କର୍ମଚାରୀ ଭାବରେ ମୋର ନିର୍ଦ୍ଧାରିତ ସମୟ ଶେଷ ହେଉଥିବାରୁ, ମୁଁ ଅପବ୍ୟବହାର ହ୍ରାସ କରିବାର ସୁଯୋଗ ପାଇଁ ରାଷ୍ଟ୍ରପତି ଟ୍ରମ୍ପଙ୍କୁ ଧନ୍ୟବାଦ ଦେବାକୁ ଚାହୁଁଛି। DOGE ମିଶନ ସମୟ ସହିତ ଅଧିକ ଶକ୍ତିଶାଳୀ ହେବ କାରଣ ଏହା ସରକାର ଚଳାଇବାର ଏକ ଉପାୟ ହୋଇଯିବ। ଏହି ଘୋଷଣା ପୂର୍ବରୁ ସେ ଟ୍ରମ୍ପଙ୍କ ‘ବିଗ୍ ବିଉଟିଫୁଲ୍’ ବିଲ୍ କୁ ସମାଲୋଚନା କରିଥିଲେ।
ମସ୍କଙ୍କୁ ଆମେରିକୀୟ ସରକାରଙ୍କର ଜଣେ ସ୍ୱତନ୍ତ୍ର ସରକାରୀ କର୍ମଚାରୀ ଭାବରେ ମନୋନୀତ କରାଯାଇଥିଲା – ଯାହା ଅଧୀନରେ ସେ ପ୍ରତିବର୍ଷ ୧୩୦ ଦିନ ପାଇଁ ସରକାରଙ୍କୁ ତାଙ୍କ କାମ ବିଷୟରେ ପରାମର୍ଶ ଦେବେ। ଜାନୁଆରୀ ୨୦ ତାରିଖରେ ଟ୍ରମ୍ପଙ୍କ ଶପଥ ଗ୍ରହଣ ସହିତ ମେ ମାସ ଶେଷରେ ଏହି ସୀମା ପହଞ୍ଚି ଯାଉଛି।
ଟ୍ରକକୁ ଧକ୍କା ଦେଲା ତୀର୍ଥଯାତ୍ରୀ ବସ୍, ୬ ଗୁରୁତର
ବ୍ରହ୍ମପୁର : ଗଞ୍ଜାମ ଜିଲ୍ଲା ରମ୍ଭା ଥାନା ୧୬ ନମ୍ବର ଜାତୀୟ ରାଜପଥ ସୁବଳୟା ଛକ ନିକଟରେ ଦୁର୍ଘଟଣା। ରାସ୍ତା କଡ଼ରେ ଛିଡା ହୋଇଥିବା ଟ୍ରକକୁ ଧକ୍କା ଦେଲା ତୀର୍ଥଯାତ୍ରୀ ବସ୍ । ୧୦ ଆହତ ମଧ୍ୟରୁ ୬ ଜଣ ଗୁରୁତର। ସେମାନଙ୍କୁ ଛତ୍ରପୁର ମେଡିକାଲରେ ଭର୍ତ୍ତି କରାଯାଇଛି। ବସଟି ଉତ୍ତରପ୍ରଦେଶରୁ ତୀର୍ଥ ସାରି ଆନ୍ଧ୍ର ପ୍ରଦେଶ ଫେରୁଥିବା ବେଳେ ଭୋର ୪ଟା ସମୟରେ ସୁବଳୟା ଠାରେ ଦୁର୍ଘଟଣା ଘଟିଛି। ବସରେ ପୁରୁଷ ଓ ମହିଳାଙ୍କ ସମେତ ମୋଟ ୨୦ ଜଣଙ୍କ ଯାତ୍ରୀ ଥିଲେ । ରମ୍ଭା ପୋଲିସ ପହଞ୍ଚି ଆହତଙ୍କୁ ଉଦ୍ଧାର କରିଛି।