ଅନୁଗୁଳ: ଜାତୀୟ ରାଜପଥ ୫୫ ଗୁରୁଣ୍ଡୁ ନିକଟରେ ମର୍ମତୁଦ ସଡକ ଦୁର୍ଘଟଣା । ବୋଲେରୋକୁ ଧକ୍କାଦେଲା ଯାତ୍ରୀବାହୀ ବସ । ଗୋଟିଏ ପରିବାରର ୪ ମୃତ, ୫ ଗୁରୁତର ସୂଚନା ।
ପଟ୍ଟାମୁଣ୍ଡାଇରେ ଭୟାବହ ଅଗ୍ନିକାଣ୍ଡ, ଆଖି ସାମ୍ନାରେ ଜଳିଗଲା ଘର
ପଟ୍ଟାମୁଣ୍ଡାଇ: ପଟ୍ଟାମୁଣ୍ଡାଇ ଗୁଣ୍ଠି ଗାଁରେ ଜଳିଗଲା ୬ ବଖରା ଘର । ଗତକାଲି ବିଳମ୍ବିତ ରାତିରେ ଗୁଣ୍ଠି ଗାଁର କାଶୀନାଥ ସିଂ ଖାଇ ଶୋଇବା ପରେ ଘରେ ହଠାତ୍ ନିଆଁ ଲାଗିଯାଇଥିଲା । ହଠାତ୍ ନିଆଁ ଦେଖି ଜୀବନ ବିକଳରେ ଘରୁ ବାହାରି ଆସିଥିଲେ । ଫଳରେ କାଶୀନାଥଙ୍କ ଘର ସମ୍ପୂର୍ଣ୍ଣ ପୋଡି ପାଉଁଶ ହେବା ସହିତ ଘରର ସମସ୍ତ ଆସବା ପତ୍ର ମଧ୍ୟ ପୋଡି ଯାଇଛି । ଖବର ପାଇ ଦମକଳ ବାହିନୀ ନିଆଁକୁ ଆୟତ କରିଛି । କାଶୀନାଥକୁ ସରକାରୀ ସହାୟତା ପାଇଁ ଦାବି କରିଛନ୍ତି ଗାଁ ଲୋକେ ।
ତୀର୍ଥଯାତ୍ରା ହେଲା ଶେଷ ଯାତ୍ରା
ଅନୁଗୁଳ: ଜାତୀୟ ରାଜପଥ ୫୫ ଗୁରୁଣ୍ଡୁ ନିକଟରେ ମର୍ମନ୍ତୁକ ସଡକ ଦୁର୍ଘଟଣା । ଏକ ବୋଲେରୋକୁ ନାଇଟ-କୋଚ ବସ ଧକ୍କା ଦେଇଛି । ଡ୍ରାଇଭର ସହ ଗୋଟିଏ ପରିବାରର ୩ ଜଣଙ୍କର ମୃତ୍ୟୁ ହୋଇଥିବା ବେଳେ ୫ ଜଣ ଗୁରୁତର ହୋଇଛନ୍ତି । ପ୍ରଥମେ ଗୁରୁତରଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେମାନଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ କଟକ ସ୍ଥାନାନ୍ତରିତ କରା ଯାଇଛି ।
ସୂଚନା ଅନୁସାରେ, ରାଇପୁରରୁ ବୋଲେରୋରେ ଡ୍ରାଇଭର ସହ ଗୋଟିଏ ପରିବାରର ୯ ଜଣ ସଦସ୍ୟ ଜଗନ୍ନାଥ ଦର୍ଶନ ପାଇଁ ପୁରୀ ଯାଉଥିଲେ । ବିଳମ୍ବିତ ରାତି ପ୍ରାୟ ୨ଟା ବେଳେ ଜାତୀୟ ରାଜପଥ ୫୫ର ଗୁରୁଣ୍ଡୁ ଠାରେ ଭୁବନେଶ୍ଵରରୁ ଇବ ଅଭିମୁଖେ ଯାଉଥିବା ସୁଶ୍ରୀ ନାମକ ନାଇଟକୋଚ ବସ ବୋଲେକୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ବୋଲେରୋରେ ଥିବା ଡ୍ରାଇଭର ସମେତ ୪ ଜଣଙ୍କ ମୃତ୍ୟୁ ହୋଇଥିଲା । ମୃତକମାନଙ୍କ ମଧ୍ୟରେ ୩ ଜଣ ମହିଳା ଥିବା ସୂଚନା ରହିଛି । ସ୍ଥାନୀୟ ଲୋକ ଓ ପୋଲିସ ଖବର ପାଇ ଘଟଣାସ୍ଥଳରୁ ଅନ୍ୟ ୫ ଜଣଙ୍କୁ ଗୁରୁତର ଅବସ୍ଥାରେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରା ଯାଇଥିଲା । ସେମାନଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ କଟକ ସ୍ଥାନାନ୍ତରିତ କରା ଯାଇଛି । ମୁତାହତମାନେ ଗୋଟିଏ ପରିବାର ହୋଇଥିବା ସୂଚନା ମିଳିଛି ।
ରାତି ପାହିଲେ ବଡ଼ଦିନ: ଚଳଚଞ୍ଚଳ ଚର୍ଚ୍ଚ, ରାଜଧାନୀରେ ଜମିବାରେ ଲାଗିଛି ଖ୍ରୀଷ୍ଟମାସ ବଜାର
ଭୁବନେଶ୍ୱର: ଖ୍ରୀଷ୍ଟମାସ୍ ବା ବଡ଼ଦିନ ଲାଗି ଆରମ୍ଭ ହୋଇଯାଇଛି କାଉଣ୍ଟ ଡାଉନ୍ । ଖ୍ରୀଷ୍ଟିୟାନ ସମ୍ପ୍ରଦାୟର ଏହା ଏକ ବଡ଼ ପର୍ବ ହୋଇଥିଲେ ବି ସବୁ ଧର୍ମର ଲୋକେ ଏହାକୁ ଖୁବ ଧୁମ୍ଧାମରେ ମନାଇଥାନ୍ତି । ଯୁଗ ବଦଳିବା ସାଙ୍ଗକୁ ଲୋକଙ୍କ ରୁଚିରେ ବି ପରିବର୍ତ୍ତନ ଆସିଛି । ଏବେ ବଡ଼ଦିନରେ ସମସ୍ତେ ଘରକୁ ସଜାଇବା ସହ ଖ୍ରୀଷ୍ଟମାସ୍ ଟ୍ରୀ ଟିଏ ରଖିବାକୁ ପସନ୍ଦ କରୁଛନ୍ତି । ଆଉ ଗ୍ରାହକଙ୍କ ଚାହିଦା ଅନୁସାରେ ରାଜଧାନୀରେ ଜମିବାରେ ଲାଗିଛି ଖ୍ରୀଷ୍ଟମାସ ବଜାର ।
ରାସ୍ତାକଡ଼ରେ ଖ୍ରୀଷ୍ଟମାସ୍ ପସରା । ଭଳିକି ଭଳି କ୍ରୀସମାସ୍ ଟ୍ରୀ । ଜିଙ୍ଗଲ୍ ବେଲ୍, ଲାଇଟ୍ ଷ୍ଟାର, ଡୋର ଷ୍ଟିକର, ସାଣ୍ଟା ଟୟ, ସାଣ୍ଟା ଟୋପି, ହ୍ୟ।ଙ୍ଗିଙ୍ଗ୍ ଡେକୋରେସନ୍ ଆଇଟମ୍, ଏକ୍ସ-ମାସ୍ କାର୍ଡ, କ୍ୟାଣ୍ଡେଲ୍, ପୋଷ୍ଟର ଏମିତି କେତେ କଣ । ଏସବୁର ସମ୍ଭାର କେବଳ ଏକ୍ସ ମାସ୍ ସେଲିବ୍ରେସନ୍ ପାଇଁ । ବଡ଼ ଦିନକୁ ଆଖି ଆଗରେ ରଖି ରାଜଧାନୀର ରାସ୍ତା କଡ଼ରେ ମେଲିଛି ସିଜନ୍ ସେଣ୍ଟରର ପସରା ।
ଆଉ ସେଠାରେ ରହିଛି ପିଲାଙ୍କ ପାଇଁ କଣ୍ଢେଇ, ସାଣ୍ଟା ଡ୍ରେସ୍, ଟକୋଲେଟ୍, ଗିଫ୍ଟ ସହ ବଡ଼ଙ୍କ ପାଇଁ ବି ନାନା ରକମର ଫ୍ୟାନ୍ସି ଆଇଟମ୍ । ଖ୍ରୀଷ୍ଟମାସ ଟ୍ରୀ ସହ ଘରକୁ ସଜାଇବା ପାଇଁ ଅନେକ ପ୍ରକାରର ରଙ୍ଗୀନ୍ ବଲ୍, ଘଣ୍ଟି, ଜରିଲଗା ମାଳା, ଝୁମର୍ ବି ରହିଛି । ଚଳିତ ବର୍ଷ ମୁଖ୍ୟ ଆକର୍ଷଣ ସାଚିଛି ସ୍ନୋ ଫଲିଂ ଟ୍ରି ସାଙ୍ଗକୁ ପାରାଚ୍ୟୁଟ୍ ସାନ୍ତା ।
ଅନ୍ୟପଟେ ସବୁ ବର୍ଷ ଭଳି ଏଥର ବଡଦିନ ପାଇଁ ୟୁନିଟ୍-୪ରେ ଥିବା ୟୁନିୟନ ଚର୍ଚ୍ଚ ମଧ୍ୟ ବେଶ୍ ସଜେଇ ହୋଇଛି । ଏଠାରେ ପ୍ରଭୁଙ୍କ ଜନ୍ମ ଦିନକୁ ଭିନ୍ନ ଧରଣର ପାଳନ କରାଯାଏ । ପ୍ରଭୁଙ୍କ ବାକ୍ୟ ମୁଁ ପଥ, ସତ୍ୟ ଓ ଜୀବନ ରାସ୍ତାରେ ଚାଲୁଥିବା ଏହି ଚର୍ଚ୍ଚରେ ଯୀଶୁଙ୍କ ପ୍ରତିମୂର୍ତ୍ତି ଦେଖିବାକୁ ମିଳେନି । କେବଳ ସମୂହ ପ୍ରାର୍ଥନା ଦ୍ଵାରା ଯୀଶୁଙ୍କ ଗାଥା ପ୍ରଚାର କରାଯାଏ ବୋଲି କହିଛନ୍ତି ଫାଦର । ସତ୍ୟନଗର କ୍ୟାଥୋଲିକ ଚର୍ଚ୍ଚ ମଧ୍ୟ ବଡ଼ଦିନ ପାଇଁ ସଜେଇ ହୋଇଛି । ଯୀଶୁଙ୍କୁ ଦର୍ଶନ କରିବା ପାଇଁ ଚର୍ଚ୍ଚ ସମ୍ମୁଖରେ ସ୍ୱତନ୍ତ୍ର କୁଡ଼ିଆର ବ୍ୟବସ୍ଥା କରାଯାଇଛି । ମଙ୍ଗଳବାର ରାତି ୧୨ଟାରୁ ଏଠାରେ ଆରମ୍ଭ ହେବ ପ୍ରଭୁଙ୍କୁ ଆରାଧନା ।
ବଡ଼ଦିନର ଆଗମନରେ ବେଶ ଉତ୍ସାହିତ ରାଜଧାନୀବାସୀ । ଚଳିତ ବର୍ଷ କିଛି ଭଲ ବ୍ୟବସାୟ କରିବା ଲକ୍ଷ୍ୟରେ ବ୍ୟବସାୟୀ ଥିବା ବେଳେ ବଡ଼ଦିନକୁ ସ୍ମରଣୀୟ କରିବାକୁ ଲାଗିପଡିଛନ୍ତି ଖ୍ରୀଷ୍ଟଧର୍ମାବଲମ୍ବୀ ।
ପିକ୍ନିକ୍ ବସ୍ ଦୁର୍ଘଟଣାଗ୍ରସ୍ତ,୩୦ରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଆହତ: ଘଟଣାସ୍ଥଳରୁ ଡ୍ରାଇଭର ଛୁ
ଦିଗପହଣ୍ଡି: ରେଭେନ୍ସା ବିଶ୍ୱବିଦ୍ୟାଳୟ ପିକ୍ନିକ୍ ବସ୍ ଦୁର୍ଘଟଣାଗ୍ରସ୍ତ । ଭାରସାମ୍ୟ ହରାଇ ଘାଟିରେ ଓଲଟିଲା ପିକ୍ନିକ୍ ବସ୍ । ଦୁର୍ଘଟଣାରେ ୩୦ରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଆହତ । ପାଟପୁର ଥାନା ଅନ୍ତର୍ଗତ ତପ୍ତପାଣି ଘାଟି ହନୁମାନ ମନ୍ଦିର ନିକଟରେ ପିକନିକ୍ ବସ୍ ଦୁର୍ଘଟଣାଗ୍ରସ୍ତ । ଘଟଣାସ୍ଥଳରେ ସାନଖେମୁଣ୍ଡି ଅଗ୍ନିଶମ ବିଭାଗ ପାଟପୁରଥାନା କର୍ତ୍ତୃପକ୍ଷ ଆହାତମାନଙ୍କୁ ଆମ୍ବୁଲାନ୍ସ ଯୋଗେ ଦିଗପହଣ୍ଡି ମେଡିକାଲରେ ଭର୍ତ୍ତି କରିଛନ୍ତି ।
ସୂଚନା ଅନୁଯାୟୀ କଟକ ରେଭେନ୍ସା ବିଶ୍ୱବିଦ୍ୟାଳୟ ଏମ୍.ସି.ଏ ଛାତ୍ରଛାତ୍ରୀମାନେ ନେହା ଆଣ୍ଡ ନିକିତା ନାମକ ବସରେ (0R-AW-3663) ଗଜପତି ଜିଲ୍ଲା ଗଣ୍ଡାହାତି ପିକନିକ୍ ଯାଇଥିଲେ । ଆଜି ସଂନ୍ଧ୍ୟାରେ ଗଣ୍ଡାହାତୀରୁ ଫେରୁଥିବା ସମୟରେ ତପ୍ତପାଣି ଘାଟି ନିକଟରେ ଡ୍ରାଇଭର ଭାରସାମ୍ୟ ହରାଇବାରୁ ବସଟି ରାସ୍ତା କଡ଼କୁ ଓଲଟି ପଡିଛି ।
ବସରେ ୬୦ ଜଣ ବିଦ୍ୟାର୍ଥୀ ଆସିଥିବା ସୂଚନା ମିଳିଥିବା ବେଳେ ସେଥିରୁ ୩୦ ରୁ ଉର୍ଦ୍ଧ୍ୱ ଆହାତ ହୋଇଥିବା ସୂଚନା ରହିଛି । କିଛି ଆହତଙ୍କୁ ବ୍ରହ୍ମପୁର MKCG କୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରୁ ଗାଡି ଡ୍ରାଇଭର ଚମ୍ପଟ ମାରିଥିବା ସୂଚନା ମିଳିଛି । ପାଟପୁର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଇଣ୍ଡିଆନ ରଗବୀ ଫୁଟବଲ ୟୁନିୟନ ଏବଂ କିସ-କିଟ ମଧ୍ୟରେ ବୁଝାମଣା, କିସରେ ହେବ ରଗବୀ ହାଇପର୍ଫମାନ୍ସ ସେଣ୍ଟର
ଭୁବନେଶ୍ୱର: ଇଣ୍ଡିଆନ ରଗବି ଫୁଟବଲ ୟୁନିୟନ ଏବଂ କିସ୍ ଓ କିଟ୍ ମଧ୍ୟରେ ବୁଝାମଣା ଆଜି ଲୋକସେବା ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ସ୍ୱାକ୍ଷରିତ ହୋଇଛି । ଏଥିରେ IRFUର ସଭାପତି ଶ୍ରୀ ମହେଶ ମାଥାଇ ଏବଂ କିସ୍-କିଟ୍ ପକ୍ଷରୁ ଏହାର ସି.ଇ.ଓ ଡଃ ପ୍ରଶାନ୍ତ ରାଉତରାୟ ସ୍ୱାକ୍ଷର କରିଖିଲେ । ଦେଶର ପ୍ରଥମ ବିଶ୍ୱବିଦ୍ୟାଳୟ ଭାବରେ କିଟ୍ ଭାରତୀୟ ଜାତୀୟ ମହିଳା ଓ ପୁରୁଷ ରଗବୀ ହାଇପର୍ଫମାନ୍ସ ସେଣ୍ଟର ପ୍ରତିଷ୍ଠା କରାଯିବ । ୨୦୦୫ ମସିହାରୁ ଓଡ଼ିଶାରେ ରଗବି ଫୁଟବଲର ପ୍ରସାର ଦିଗରେ ଉଲ୍ଲେଖନୀୟ କାର୍ଯ୍ୟ ପାଇଁ କିସକୁ ଏହି ସୁଯୋଗ ଦିଆଯାଇଛି । ଏହି ଅବସରରେ ଉଦବୋଧନ ଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କିସକୁ ଅଭିନନ୍ଦନ ଜଣାଇବା ସହିତ ଆଗାମୀ ଦିନରେ ଭାରତୀୟ ଜାତୀୟ ଦଳ ଦେଶ ପାଇଁ ସୁନାମ ଆଣିବ ବୋଲି ଆଶା ପ୍ରକାଶ କରିଥିଲେ ।
ଏହି କାର୍ଯ୍ୟକ୍ରମରେ କ୍ରୀଡ଼ା ମନ୍ତ୍ରୀ ତୁଷାରକାନ୍ତ ବେହେରା, ସାଂସଦ ଡଃ ଅଚ୍ୟୁତ ସାମନ୍ତ, ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ରଗବୀର ଜାତୀୟ ଆମ୍ବାସଡର ରାହୁଲ ବୋଷ ପ୍ରମୁଖ ଉପସ୍ଥିତ ଥିଲେ । କ୍ରୀଡ଼ା ସଚିବ ଶ୍ରୀ ବିଶାଳ ଦେବ ସ୍ୱାଗତ ଭାଷଣ ଦେଇଥିଲେ ।
ଅନ୍ୟପଟେ ଆଜି ଲୋକସଭା ଭବନରେ ଆୟୋଜିତ ଏକ ସଂକ୍ଷିପ୍ତ କାର୍ଯ୍ୟକ୍ରମରେ ୧୮ ବର୍ଷରୁ କମ ଦୃଷ୍ଟି ବାଧିତ ମହିଳା କ୍ରିକେଟ ଦଳକୁ ସମ୍ବର୍ଦ୍ଧିତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନିକଟରେ ଦିଲ୍ଲୀରେ ଅନୁଷ୍ଠିତ ପ୍ରଥମ ଟି-୨୦ କ୍ରିକେଟ ମ୍ୟାଚରେ ଓଡ଼ିଶାର ଦୃଷ୍ଟିବାଧିତ ମହିଳା କ୍ରିକେଟ ଦଳ କର୍ଣ୍ଣାଟକକୁ ୮୭ ରନରେ ହରାଇ ଚମ୍ପିଆନ ହୋଇଥିଲେ । ଓଡ଼ିଶା ଦଳର କ୍ୟାପଟେନ ଲୀନା ସ୍ୱାଇଁ ଓ ପଦ୍ମିନୀ ଟୁଡୁ ପ୍ଲେୟର ଅଫ୍ ଦ ମ୍ୟାଚ ବିବେଚିତ ହୋଇଥିଲେ ।
ଏହି କାର୍ଯ୍ୟକ୍ରମରେ କ୍ରୀଡାମନ୍ତ୍ରୀ ତୁଷାରକାନ୍ତ ବେହେରା , ଭିନ୍ନକ୍ଷମ କମିଶନର ଶ୍ରୀମତୀ ସୁଲୋଚନା ଦାସ, ମୁଖ୍ୟ ଶାସନ ସଚିବ, ଉନ୍ନୟନ କମିଶନର, କ୍ରୀଡା ସଚିବ ପ୍ରମୁଖ ଉପସ୍ଥିତ ଥିଲେ ।
ଏଣିକି ବର୍ଷ ସରିବା ସହ ସରିବ ପଦୋନ୍ନତି ପ୍ରକ୍ରିୟା, ନୂଆ ବର୍ଷରେ ମିଳିବ ପଦୋନ୍ନତି: ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ସରକାରୀ କର୍ମଚାରୀଙ୍କ ପାଇଁ ଖୁସି ଖବର । ଏଣିକି ନିର୍ଦ୍ଦାରିତ ସମୟରେ ପଦୋନ୍ନତି ପାଇବେ ଯୋଗ୍ୟ ସରକାରୀ କର୍ମଚାରୀ । ଜିଲ୍ଲା, ବିଭାଗୀୟ ମୁଖ୍ୟ ଏବଂ ରାଜ୍ୟସ୍ତରୀୟ ସମସ୍ତ ସରକାରୀ କାର୍ଯ୍ୟାଳୟ ଏବଂ ବିଭାଗରେ ପଦୋନ୍ନତି ଅପେକ୍ଷାରେ ଥିବା ଅଧିକାରୀ ଓ କର୍ମଚାରୀମାନଙ୍କ ପଦୋନ୍ନତି ପ୍ରକ୍ରିୟା ଡିସେମ୍ୱର ୩୧ ତାରିଖ ସୁଦ୍ଧା ଶେଷ କରାଯାଇ ଜାନୁଆରୀ ୧ ତାରିଖ ସୁଦ୍ଧା ପଦୋନ୍ନତି ଯୋଗ୍ୟ ସମସ୍ତ କର୍ମଚାରୀ ଏବଂ ଅଧିକାରୀମାନଙ୍କୁ ପଦୋନ୍ନତି ଦେବା ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଡିସେମ୍ୱର ୩୧ ତାରିଖ ସନ୍ଧ୍ୟା ସୁଦ୍ଧା ଏ ସମ୍ପର୍କରେ ଅନୁପାଳନ, ମୁଖ୍ୟ ସଚିବଙ୍କ ନିକଟକୁ ପ୍ରେରଣ କରିବା ପାଇଁ ସମସ୍ତ ବିଭାଗ, ବିଭାଗୀୟ ମୁଖ୍ୟ ଏବଂ ଜିଲ୍ଳାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ପଦୋନ୍ନତି କ୍ଷେତ୍ରରେ ନିମ୍ନ ଓ ମଧ୍ୟମ ବର୍ଗର କର୍ମଚାରୀମାନଙ୍କ କ୍ଷେତ୍ରରେ ହେଉଥିବା ଅଯଥା ବିଳମ୍ୱ, ହଇରାଣ ହରକତ ତଥା ଅସାଧୁ ଉପାୟ ଅବଲମ୍ୱନ ହେଉଥିବା ଘଟଣାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ଷୋଭ ପ୍ରକାଶ କରିବା ସହିତ ଯଥା ସମୟରେ ସମ୍ପୂଣ୍ଣ ସ୍ୱଚ୍ଛତାର ସହ ଅଧିକାରୀମାନଙ୍କୁ ପଦୋନ୍ନତି ଦିଆଯାଉ ବୋଲି ଆଗ୍ରହ ପ୍ରକାଶ କରିଛନ୍ତି ।
ପଦୋନ୍ନତି ଅପେକ୍ଷାରେ ଥିବା କୌଣସି ଯୋଗ୍ୟ ଅଧିକାରୀ କିମ୍ୱା କର୍ମଚାରୀ ଯେପରି ନିଜ ପଦୋନ୍ନତି ପାଇଁ ହଇରାଣ ନହେବେ ସେଥିପ୍ରତି ପ୍ରଚଳିତ ବ୍ୟବସ୍ଥାରେ ଆବଶ୍ୟକୀୟ ପରିବର୍ତ୍ତନ ଓ ଶୃଙ୍ଖଳା ଆଣାଯିବା ପାଇଁ ପରାମର୍ଶ ଦେଇଛନ୍ତି । ଏଥିସହିତ ଅହେତୁକ ବିଳମ୍ୱ କ୍ଷେତ୍ରରେ ସମ୍ପୃକ୍ତ ମୁଖ୍ୟମାନଙ୍କୁ ଦାୟୀ କରାଯିବ ବୋଲି ମୁଖ୍ୟମନ୍ତ୍ରୀ ସତର୍କ କରିଦେଇଛନ୍ତି ।
ମୁଖ୍ୟମନ୍ତ୍ରୀ କହିଛନ୍ତି ଯେ, 5-Tର ଗୁରୁତ୍ୱପୂର୍ଣ୍ଣ ଅଂଶୀଦାର ଭାବରେ ଦାୟିତ୍ୱ ନିର୍ବାହ କରୁଥିବା ସରକାରୀ କର୍ମଚାରୀଙ୍କୁ HRMS ସୁବିଧା ଥାଇ ପଦୋନ୍ନତି ଦେବା କ୍ଷେତ୍ରରେ ଅହେତୁକ ବିଳମ୍ୱ ଘଟୁଥିବାରୁ ଆବଶ୍ୟକସ୍ଥଳେ ଏଥିରେ ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରାଯାଇ ଠିକ୍ ସମୟରେ ପଦୋନ୍ନତି ଦିଆଗଲେ ଟିମ୍ ଓ୍ୱାର୍କ ପାଇଁ କର୍ମଚାରୀ ଉତ୍ସାହିତ ହେବେ ବୋଲି ମୁଖ୍ୟମନ୍ତ୍ରୀ ମତ ପ୍ରକାଶ କରିଛନ୍ତି ।
ସ୍ୱାଭିମାନ ଅଞ୍ଚଳବାସୀଙ୍କ ମୁଁହରେ ହସ, ଗୁରୁପ୍ରିୟା ପରେ ଉଦଘାଟିତ ହେଲା ରାଜ୍ୟର ପ୍ରଥମ ‘ମାଣ୍ଡିଆ ମଣ୍ଡି’
ଭୁବନେଶ୍ୱର : ଦିନେ ମାଇଲ୍ ମାଇଲ୍ ଚାଲୁଥିବା ମାଆକୁ ଆଜି ଘର ପାଖରେ ଦେବାକୁ ହେବ ମାଣ୍ଡିଆ । ଦିନେ କୋଷ କୋଷ ବାଟ କାନ୍ଧେଇ ନେଉଥିବା ରୋଗୀକୁ ଏବେ ମାତ୍ର କେଇ ମିନିଟ୍ ମଧ୍ୟରେ ଗୁରୁପ୍ରିୟା ଦେଇ ପହଞ୍ଚାଯାଉଛି ଡାକ୍ତରଖାନା । ଦିନେ ଅପହଞ୍ଚ ବିଚ୍ଛିନ୍ନାଞ୍ଚଳ ଥିବା ଇଲାକା ଏବେ କହୁଛି ସ୍ୱାଭିମାନ ଓ ବିକାଶର କଥା । ସ୍ୱାଭିମାନ ଅଞ୍ଚଳବାସୀଙ୍କ ପାଇଁ ରାଜ୍ୟ ସରକାର ଆରମ୍ଭ କରିଛନ୍ତି ସ୍ୱାଭିମାନୀ କାମ ।
ସ୍ୱାଭିମାନ ଅଞ୍ଚଳ କୁହାଯାଉଥିବା ଚିତ୍ରକୋଣ୍ଡା ବ୍ଲକର ବଡ଼ପଡ଼ା ପଞ୍ଚାୟତରେ ଉଦଘାଟିତ ହୋଇଛି ରାଜ୍ୟର ସର୍ବପ୍ରଥମ ମାଣ୍ଡିଆ ମଣ୍ଡି । କୃଷି ଓ କୃଷକ ସଶକ୍ତିକରଣ ବିଭାଗର ମନ୍ତ୍ରୀ ଅରୁଣ ସାହୁ ଏହାକୁ ଉଦଘାଟନ କରିଛନ୍ତି । ଏହି ଅବସରରେ ସେ କହିଥିଲେ ଯେ, ଓଡ଼ିଶା ମିଲେଟ୍ ମିଶନ୍ ମୁଖ୍ୟମନ୍ତ୍ରୀଙ୍କ ଭିଜନ୍ । ଏହା ମଧ୍ୟରେ ଅଞ୍ଚଳବାସୀଙ୍କ ଜୀବନଶୈଳୀରେ ପରିବର୍ତ୍ତନ, ଉତ୍ପାଦନ ବୃଦ୍ଧି, ନିଶ୍ଚିତ ଅମଳ ଓ ସଚେତନତା ସୃଷ୍ଟି ଉପରେ ସରକାର ଗୁରୁତ୍ୱ ଦେଉଛନ୍ଚି । ଅଞ୍ଚଳବାସୀଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ସହିତ ବିଭିନ୍ନ ବିକାଶ ମୂଳକ କାର୍ଯ୍ୟ ପାଇଁ ସରକାରଙ୍କର ସମସ୍ତ ଯୋଜନା କିଭଳି ଲୋକମାନଙ୍କ ପାଖରେ ପହଞ୍ଚିବ ସେନେଇ ଗୁରୁତ୍ୱ ଦେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମାଣ୍ଡିଆ ମଣ୍ଡିର ଉଦଘାଟନ ପରେ ମନ୍ତ୍ରୀ ଶ୍ରୀ ସାହୁ ପାଖରେ ଥିବା ଗାଁ ଗୁଡ଼ିକର ସ୍ୱୟଂ ସହାୟିକା ଗୋଷ୍ଠୀଙ୍କ ସହ ସାକ୍ଷାତ ଆଲୋଚନା କରିଥିଲେ । ହଳଦୀର ଚାଷ ସଂପର୍କରେ ମଧ୍ୟ ସେ ଆଲୋଚନା କରିଥିଲେ । ଅଧିକ ପୁଷ୍ଟିଶସ୍ୟ ସାମଗ୍ରୀ ପ୍ରସ୍ତୁତ ଉପରେ ଗୁରୁତ୍ୱ ଦେଇଥିଲେ କୃଷି ମନ୍ତ୍ରୀ ।
ସ୍ୱାଧୀନତାର ଦୀର୍ଘ ବର୍ଷ ପରେ ମଧ୍ୟ ମାଲକାନଗିରି ଜିଲ୍ଲାର ଉପାନ୍ତ ଅଞ୍ଚଳର ଚିତ୍ରକୋଣ୍ଡା ଜଳ ଭଣ୍ଡାରର ଅପର ପାର୍ଶ୍ଵରେ ଥିବା ୧୫୧ଟି ଗାଁ ବାହ୍ୟ ଜଗତରୁ ବିଛିନ୍ନ ହୋଇ ରହିଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆନ୍ତରିକ ଉଦ୍ୟମ ଫଳରେ ନିର୍ମାଣ ହୋଇଥିଲା “ଗୁରୁପ୍ରିୟା ସେତୁ” । ଏଥିପାଇଁ ୧୦୦ କୋଟି ଟଙ୍କାର ବିକାଶ ପ୍ରକଳ୍ପ ଘୋଷଣା ହୋଇଥିଲା ।
୨୦୧୭ରେ ରାଜ୍ୟ ସରକାର ପ୍ରଥମ ପର୍ଯ୍ୟାୟରେ ୭ଟି ଜିଲ୍ଲାର ୩୦ଟି ବ୍ଲକରେ ଆରମ୍ଭ କରିଥିଲେ ମିଲେଟ୍ ମିଶନ୍ । ଏହାପରେ ମିଶନକୁ ୧୪ଟି ଜିଲ୍ଲାର ୭୨ଟି ବ୍ଲକକୁ ସଂପ୍ରସାରିତ କରାଯାଇଥିଲା । ତେବେ “ଓଡ଼ିଶା ମିଲେଟ ମିଶନ”ର ମୁଖ୍ୟ ଲକ୍ଷ ହେଉଛି ମିଲେଟର ଉତ୍ପାଦନ ଓ ପୋଷଣତାକୁ ରାଜ୍ୟର ଏହି ୭୨ଟି ବ୍ଲକରେ ପୁନରୁଦ୍ଧାର କରାଇବା । ଏହି ଯୋଜନାଟି ମାଲକାନଗିରି ଜିଲ୍ଲାର ମାଥିଲି , ଖାଇରପୁଟ , ଚିତ୍ରକୋଣ୍ଡା ଓ କୋରକୁଣ୍ଡା ବ୍ଲକରେ କାର୍ଯ୍ୟକାରୀ ହୋଇଛି । ଆଜି ମାଣ୍ଡିଆ ମଣ୍ଡି ଉଦଘାଟିତ ହେବା ପରେ ୨୦୦ ଚାଷୀଙ୍କ ଠାରୁ ୧୦୨ କ୍ୱିଣ୍ଟାଲ୍ ମାଣ୍ଡିଆ TDCCOL ଦ୍ୱାରା ସଂଗୃହୀତ ହୋଇଛି ।
କଳିଙ୍ଗ ବିହାର ବେବିଡଲ୍ ସ୍କୁଲର ଚତୁର୍ଦ୍ଦଶ ବାର୍ଷିକ ଉତ୍ସବ
ଭୁବନେଶ୍ୱର : ସ୍ଥାନୀୟ କଳିଙ୍ଗ ବିହାର ସ୍ଥିତ ବେବୀ ଡଲ୍ ପ୍ଲେ ସ୍କୁଲର ଚତୁର୍ଦ୍ଦଶ ବାର୍ଷିକ ଉତ୍ସବ ଅନୁଷ୍ଠିତ ହୋଇଯାଇଛି । ଅକ୍ଷୟ କୁମାର ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉତ୍ସବରେ ଅଖିଳ ଭାରତୀୟ ଆୟୁର୍ବିଜ୍ଞାନ ପ୍ରତିଷ୍ଠାନର ରେଜିଷ୍ଟ୍ରାର ବିଧୁଭୂଷଣ ମିଶ୍ର ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।
ଭୁବନେଶ୍ୱର ବ୍ଲକର ଅଧ୍ୟକ୍ଷ ଅବିନାଶ ପଟ୍ଟନାୟକ ଏବଂ ବିଦ୍ୟାଳୟର ସଭାପତି ଡାକ୍ତର ଶଶିଭୂଷଣ ମହାପାତ୍ର ପ୍ରମୁଖ ସମ୍ମାନୀତ ଅତିଥି ଭାବେ ଯୋଗଦେଇ କୃତୀ ଛାତ୍ର ଛତ୍ରୀଙ୍କୁ ପୁରସ୍କୃତ କରିଥିଲେ । ବିଦ୍ୟାଳୟର ଅଧକ୍ଷା ସଂଗୀତା ପଟ୍ଟନାୟକ ବାର୍ଷିକ ବିବରଣୀ ପାଠ କରିଥିଲେ ।
ଶିକ୍ଷୟତ୍ରୀ ବନ୍ଦନା ସାମଲ, ବନଜା ରାଉତଙ୍କ ପରିଚାଳନାରେ ରଂଗାରଂଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ ଛାତ୍ରଛାତ୍ରୀ । ଶଶାଙ୍କ ଦାସ୍, ବିଜୟଲକ୍ଷ୍ମୀ ବାରିକ୍, ସମିତା ପ୍ରଧାନ, ସୁରେଶ୍ ପ୍ରଧାନ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।