ଆସନ୍ତା ଡିସେମ୍ବର ୨୬ରେ ସୂର୍ଯ୍ୟପରାଗ ପାଇଁ ରାଜ୍ୟର ସମସ୍ତ ଶିକ୍ଷାନୁଷ୍ଠାନକୁ ଛୁଟି ଘୋଷଣା କରାଯାଇଥିଲା । ଏବେ ରାଜ୍ୟ ସରକାର ସମସ୍ତ ସରକାରୀ କାର୍ଯ୍ୟାଳୟକୁ ଛୁଟି ଘୋଷଣା କରିଛନ୍ତି । ଏ ନେଇ ରାଜସ୍ୱ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି  କରାଯାଇଛି ।

୨୫ରେ ବଡ଼ ଦିନ ପଡୁଥିବାରୁ ସେଦିନ ସରକାରୀ ଛୁଟି ରହିଥିବା ବେଳେ ଏବେ ୨୬ରେ ସୂର୍ଯ୍ୟ ପରାଗ ପାଇଁ ଛୁଟି ଘୋଷଣା ହେବା ପରେ ସରକାରୀ କର୍ମଚାରୀ ଏବେ ଦୁଇଦିନ ଛୁଟି ପାଇଛନ୍ତି ।

ସୂଚନା ଅନୁସାରେ, ୨୬ତାରିଖ ସକାଳେ ବିରଳ ସୂର୍ଯ୍ୟପରାଗ ସଂଘଠିତ ହେବାକୁ ଯାଉଛି। ଏହା ଦକ୍ଷିଣ-ଭାରତର କେତେକ ଅଞ୍ଚଳରେ ପୂର୍ଣ୍ଣ ଭାବେ ଦେଖାଯିବାକୁ ଥିବାବେଳେ ଓଡ଼ିଶାରେ ଆଂଶିକ ଭାବେ ଦେଖାଯିବ। ଓଡ଼ିଶାରେ ଏହା ସକାଳ ୮ଟା ୨୦ମିନିଟରୁ ଆରମ୍ଭ ହୋଇ ପୂର୍ବାହ୍ନ ୧୧ଟା ୨୮ମିନିଟରେ ଶେଷ ହେବ। ସକାଳ ୯ଟା ୪୬ ମିନିଟରେ ସର୍ବାଧିକ ପରାଗ ଦେଖାଯିବ। ଉକ୍ତ ସମୟରେ ଚନ୍ଦ୍ର ସୂର୍ଯ୍ୟଙ୍କୁ ପ୍ରାୟ ୫୫-୬୫% ଘୋଡ଼ାଇଦେବ ଏବଂ ସୂର୍ଯ୍ୟର ଆଲୋକ ମଳିନ ପଡ଼ିବା ସହ ଏହା ଅଧାଖଣ୍ଡିଆ ଦେଖାଯିବ।

ରାୟଗଡ଼ା: ପୁଅ ପାଇଁ ବାପାଙ୍କୁ କାଟିବାକୁ ପଡ଼ିଲା ୨୫ ହଜାର ଟଙ୍କାର ଚାଲାଣ । ନୂଆ ଟ୍ରାଫିକ୍‌ ନିୟମର ଶିକାର ହେଲେ ଏହି ବ୍ୟକ୍ତି । ୧୩ ବର୍ଷର ବାଳକ ରାସ୍ତା ଉପରେ ଦ୍ରୁତଗତିରେ କାର ଚଳାଇବାକୁ ଯାଇ କାଟିବାକୁ ପଡ଼ିଛି ଚାଲାଣ । ଏଭଳି ଘଟଣା ଦେଖିବକୁ ମିଳିଛି ରାୟଗଡା ସଦର ରିଂ ରୋଡ଼ଠାରେ ।

ସୂଚନା ଅନୁଯାୟୀ, ଆଜି ଦୁଇଜଣ ନାବାଳକ  ଏକ ସେଣ୍ଟ୍ରୋ କାର ଯୋଗେ ସଦର ରିଂ ରୋଡ଼ରେ ଦ୍ରୁତଗତିରେ ଗାଡ଼ି ଚଳାଉଥିଲେ । ଏହି ସମୟରେ କିଛି ସ୍ଥାନୀୟ ଲୋକେ କାରଟିକୁ ଅଟକାଇ ଆର୍‌ଟିଓ ଏବଂ ପୋଲିସକୁ ଖବର ଦେଇଥିଲେ ।

ଘଟଣା ସ୍ଥଳରେ ଆର୍‌ଟିଓ ଏବଂ ପୋଲିସ ପହଞ୍ଚିବାପରେ ନାବାଳକଙ୍କ ପରିବାର ଲୋକେ ପହଞ୍ଚିଥିଲେ । କାର ସହିତ ନାବାଳକ ଚାଳକ ଏବଂ ବାପାଙ୍କୁ ଆଞ୍ଚଳିକ ପରିବହନ କାର୍ଯ୍ୟାଳୟକୁ ନିଆଯାଇଥିଲା । ସେଠାରେ  ନାବାଳକ ଚାଳକଙ୍କ ବାପା ୨୫ ହଜାର ଟଙ୍କା ଜରିମାନା ଦେଇଥିଲେ ।

ଭୁବନେଶ୍ୱର: ଭିବନେଶ୍ୱର ଉପକଣ୍ଠସ୍ଥ ସତ୍ୟଭାମାପୁରସ୍ଥିତ ବକ୍ସି ଜଗବନ୍ଧୁ ଇଂରାଜୀ ମାଧ୍ୟମ ବିଦ୍ୟାଳୟ-୨ର ଚତୁର୍ଦଶ ବାର୍ଷିକ ଉତ୍ସବ ‘ପଲସାଶିଓ ୨୦୧୯’ ବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି ।

ଏହି ଉତ୍ସବ ଦୁଇଦିନ ଧରି ଚାଲିଥିବା ବେଳେ ଏଥିରେ ଜୟଦେବ ନିର୍ବାଚନମଣ୍ଡଳୀ ବିଧାୟକ ଅରବିନ୍ଦ ଢାଲି କାର୍ଯ୍ୟକ୍ରମକୁ ଉଦଘାଟନ କରି ଛାତ୍ରଛାତ୍ରୀଙ୍କ ଉନ୍ନତି କାମନା କରିଥିଲେ । ଦ୍ୱିତୀୟ ଦିନ ଉଦଯାପନୀ ସନ୍ଧ୍ୟାରେ ମୁଖ୍ୟ ଅତିଥି ଭାବେ ଅବସରପ୍ରାପ୍ତ ଆଇ.ପି.ଏସ୍. ଶିଶିର କୁମାର ମିଶ୍ର ଯୋଗଦେଇ ନିଜର ବକ୍ତବ୍ୟ ରଖିଥିଲେ ।

ପ୍ରାରମ୍ଭରେ ବିଦ୍ୟାଳୟର ପରିଚାଳକ ପ୍ରତାପ କୁମାର ଜେନା ସ୍ୱାଗତ ଭାଷଣ ଦେଇଥିବା ବେଳେ ବିଦ୍ୟାଳୟର ଅଧ୍ୟକ୍ଷା କ୍ଷଣିକା ଦାସ ବାର୍ଷିକ ବିବରଣୀ ପାଠ କରିଥିଲେ । ବିଦ୍ୟାଳୟର ସଭାପତି ରଘୁନାଥ ମିଶ୍ର, ଉପସଭାପତି ଅଶ୍ୱିନୀ କୁମାର ତିୱାରୀ, ପରିଚାଳକ ପ୍ରତାପ କୁମାର ଜେନା , ସହପରିଚାଳକ ଚିତ୍ତରଞ୍ଜନ ବରିସଲ୍, ଅଧ୍ୟକ୍ଷା  କ୍ଷଣିକା ଦାସ, ଉପାଧ୍ୟକ୍ଷ ସର୍ବେଶ୍ୱର ସାମଲ ଓ ବି.ଜେ. ଶିକ୍ଷା ପରିଷଦର ସଦସ୍ୟଗଣ ଯୋଗଦେଇ ନିଜ ନିଜର ବକ୍ତବ୍ୟ ରଖିଥିଲେ ।

ତେବେ ଏଥିରେ ଅନେକ ସଫଳ ଛାତ୍ରଛାତ୍ରୀ ମାନଙ୍କୁ ପୁରସ୍କୃତ କରାଯିବା ସହ ପରିଶେଷରେ ଛାତ୍ରଛାତ୍ରୀଙ୍କ ଦ୍ୱାରା ରଙ୍ଗାରଙ୍ଗ୍ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।

ବାଲିଆପାଟଣା: ତ୍ରୟୋଦଶତମ ଆନ୍ତର୍ଜାତୀୟ ୬୪ ଯୋଗିନୀ ମହୋତ୍ସବ ଉଦ୍‌ଘାଟିତ । ମହୋତ୍ସବକୁ ଉଦ୍‌ଘାଟନ କଲେ ରାଜ୍ୟ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ । କାର୍ଯ୍ୟକ୍ରମରେ ଗୁରୁ ରାମହରି ଦାସଙ୍କୁ ୬୪ ଯୋଗୀନି ସଂଗୀତ ସମ୍ମାନ, ଧିରେନ୍ଦ୍ରନାଥ ମଲ୍ଲିକଙ୍କୁ ୬୪ ଯୋଗୀନି ନାଟ୍ୟ ସମ୍ମାନରେ ସମ୍ମାନୀତ କରାଯାଇଛି ।

ବିଭିନ୍ନ ସଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା । ଏହି କାର୍ଯ୍ୟକ୍ରମରେ ବିଶେଷ ଆକର୍ଷଣ ଥିଲା ଦିଲ୍ଲୀର ଗୁରୁ ଶାନ୍ତନୁ ଚକ୍ରବର୍ତ୍ତି ଏବଂ ସାଥିଙ୍କ ଦ୍ୱାରା ପ୍ରସ୍ତୁତ ଭାରତନାଟ୍ୟମ । ଏହା ସମସ୍ତଙ୍କ  ହୃଦୟକୁ ଛୁଇଁ ପାରିଥିଲା । ଏବଂ ଏଭଳି କାର୍ଯ୍ୟକ୍ରମକୁ ଉଚ୍ଚ ପ୍ରଶଂସା କରିଥିଲେ ସମସ୍ତ କଳାକାର ଓ ଦର୍ଶକ ।