ଭୁବନେଶ୍ୱର: ବିଭିନ୍ନ କ୍ଷେତ୍ରରେ ଉନ୍ନତ ପ୍ରଦର୍ଶନ ଲାଗି କେନ୍ଦ୍ରର ବିଜେପି ନେତୃତ୍ୱାଧୀନ ଏନ୍‍ଡିଏ ସରକାର ଓଡିଶାକୁ ଦିଲ୍ଲୀରେ ପୁରସ୍କୃତ କରିଛନ୍ତି । କିନ୍ତୁ ଓଡିଶା ବିଜେପି ଲୋକଙ୍କୁ ଭୁଲ୍‍ ସୂଚନା ଦେଇ ବିଭ୍ରାନ୍ତ କରିବାକୁ ଉଦ୍ୟମ କରୁଥିବା ଅଭିଯୋଗ କରିଛନ୍ତି ବିଜେଡି ମୁଖପାତ୍ର ଡକ୍ଟର ସସ୍ମିତ ପାତ୍ର । ‘ପ୍ରଧାନମନ୍ତ୍ରୀ ଆବାସ’ ଯୋଜନାକୁ ରାଜ୍ୟ ସରକାର ଓଡିଶାରେ ସଫଳତାର ସହ କାର୍ଯ୍ୟକାରୀ କରୁଛନ୍ତି । ଗାଁ ଗହଳିର ଲୋକଙ୍କୁ ପକ୍କାଘର ଯୋଗାଣ ଲାଗି କେନ୍ଦ୍ର ସରକାର ଓଡିଶାକୁ ସର୍ବଶ୍ରେଷ୍ଠ ପ୍ରଦର୍ଶନକାରୀ ରାଜ୍ୟ ଭାବେ ପୁରସ୍କୃତ କରିଛନ୍ତି । କିନ୍ତୁ ରାଜ୍ୟ ବିଜେପି ନେତାମାନେ ରାଜ୍ୟ ସରକାର ଏଭଳି କାମକୁ ଭୁଲି ଯାଉଛନ୍ତି । ବିଜେପି ନେତାମାନେ ଗ୍ରାମାଞ୍ଚଳରେ ଗୃହ ନିର୍ମାଣ ସମ୍ପର୍କିତ ସୂଚନା କେନ୍ଦ୍ର ସରକାରଙ୍କ ଠାରୁ ସଂଗ୍ରହ କରି ଓଡ଼ିଶା ଲୋକଙ୍କୁ ବିଭ୍ରାନ୍ତ କରିବାରୁ କ୍ଷାନ୍ତ ରହିବେ ବୋଲି ବିଜେଡି ଆଶା କରୁଥିବା ଶ୍ରୀ ପାତ୍ର କହିଛନ୍ତି । ଏଭଳି ଦାୟିତ୍ୱହୀନ ଏବଂ ଅସତ୍ୟ ମନ୍ତବ୍ୟ ଦେବା ଫଳରେ ରାଜ୍ୟବାସୀଙ୍କ ନିକଟରେ ଓଡ଼ିଶା ବିଜେପି ତାହାର ବିଶ୍ୱସନୀୟତା ହରାଉଛି ଏବଂ ପ୍ରତ୍ୟାଖ୍ୟାତ ହେଉଛି । ଏଭଳି ଆଚରଣରୁ ବିରତ ନରହିଲେ ଭବିଷ୍ୟତରେ ମଧ୍ୟ ରାଜ୍ୟବାସୀ ଏହି ଦଳକୁ ପ୍ରତ୍ୟାଖ୍ୟାନ କରିବେ ବୋଲି ଡକ୍ଟର ପାତ୍ର ସତର୍କ କରାଇଦେଇଛନ୍ତି ।

ଓଡ଼ିଶା ଆସିଲା ଜାପାନରେ ପ୍ରାଣ ହରାଇଥିବା ୨ ଯୁବକଙ୍କ ମୃତଦେହ । କୋଲକାତା ବିମାନବନ୍ଦରରେ ମୃତଦେହ ପହଞ୍ଚିବା ପରେ ସେମାନଙ୍କ ଗାଁକୁ ପଠାଇବାର ବ୍ୟବସ୍ଥା କରାଯାଇଛି । ‘ଓଡ଼ିଶା ମୋ ପରିବାର’ ସଂଗଠନ ପକ୍ଷରୁ ଏହି ପଦକ୍ଷେପ ନିଆଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ‘ଓଡ଼ିଶା ମୋ ପରିବାର’ର ଆବାହକ ଅରୂପ ପଟ୍ଟନାୟକ ଏବଂ ଅବୈତନିକ ଉପଦେଷ୍ଟା ବିବେକାନନ୍ଦ ପଟ୍ଟନାୟକ କୋଲକାତା ଯାଇ ମୃତଦେହ ଗାଁକୁ ପଠାଇବାର ବ୍ୟବସ୍ଥା କରିଥିଲେ । ବାଲେଶ୍ୱର ଜିଲ୍ଲା କମର୍ଦ୍ଦ। ଅଞ୍ଚଳର ଶେଖ୍‌ ମନ୍‌ତାଜ ଓ ଯାଜପୁର ଜିଲ୍ଲା ବଡ଼ଚଣା ଅଞ୍ଚଳର ଶେଖ୍‌ ବାହାରୁଦ୍ଦିନ ଜାପାନର ରାଜଧାନୀ ଟୋକିଓରେ ଏକ ହୋଟେଲରେ କାମ କରୁଥିବା ବେଳେ ଗ୍ୟାସ୍‌ ଦୁର୍ଘଟଣାରେ ପ୍ରାଣ ହରାଇଥିଲେ । ସେମାନଙ୍କ ପରିବାରର ଆର୍ଥିକ ଅବସ୍ଥା ସ୍ୱଚ୍ଛଳ ନଥିବାରୁ ମୃତଦେହ ଆଣିବାରେ ସମସ୍ୟା ସୃଷ୍ଟି ହୋଇଥିଲା । ସହାୟତା ପାଇଁ ଉଭୟଙ୍କ ପରିବାର ଲୋକ ନିବେଦନ କରିଥିଲେ । ଏହାପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ‘ଓଡ଼ିଶା ମୋ ପରିବାର’ର ଆବାହକ ଅରୂପ ପଟ୍ଟନାୟକ ଏବଂ ଅବୈତନିକ ଉପଦେଷ୍ଟା ବିବେକାନନ୍ଦ ପଟ୍ଟନାୟକ ଜାପାନସ୍ଥିତ ଭାରତୀୟ ଦୂତାବାସ ସହ ଯୋଗାଯୋଗ କରି ୨ ଯୁବକଙ୍କ ପାର୍ଥିବ ଶରୀର ଓଡ଼ିଶା ଆଣିବାରେ ସକ୍ଷମ ହୋଇଛନ୍ତି । ଉଭୟଙ୍କ ପରିବାରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ପକ୍ଷରୁ  ‘ଓଡ଼ିଶା ମୋ ପରିବାର’ର ଆବାହକ ଅରୂପ ପଟ୍ଟନାୟକ ଆର୍ଥିକ ସହାୟତା ପ୍ରଦାନ କରିଛନ୍ତି ।