ଭୁବନେଶ୍ୱର: ସହିଦନଗର ଅଞ୍ଚଳରେ ଥିବା ଏକ ବସ୍ ରେ ଲାଗିଲା ନିଆଁ । ନିଆଁ ଲାଗିବା ସମୟରେ କୌଣସି ଯାତ୍ରୀ ବସ୍ ରେ ନଥିବା ସୂଚନା । ବସରେ ନିଆଁ ଲାଗିଥିବା ଖବର ପାଇ ଦମକଳ ବାହିନୀ ନିଆଁକୁ ଆୟତ୍ତ କରିଥିଲା ।

ସୂଚନା ଅନୁଯାୟୀ, ବସଟି ସେଠାରେ ଦୀର୍ଘ ୪ ବର୍ଷ ହେବ ସେଠାରେ ରହିଛି । ତେବେ କେଉଁ କାରଣରୁ ନିଆଁ ଲାଗିଲା ତାହା ଅସ୍ପଷ୍ଟ ରହିଛି ।

ଶିମିଳିପାଳ: ଡିଜେ ଶୁଣି ଘାଇଲା ହେଲା ଆଉ ପାଗଳ ଭଳି ଆଚରଣ କଲା ‘ବବ୍‌ଲୁ’ । ବଣଭୋଜି ବେଳେ ପାଗଳା ଭଳି ମାଡ଼ି ଆସିଲା ‘ବବଲୁ’ ଆଉ ଯାହା କଲା ତାହା ବିଶ୍ୱାସ କରିହେବନି । ସାଧାରଣତଃ ସିନେମାରେ ଏପରି ଦୃଶ୍ୟ ଦେଖିବାକୁ ମିଳିଥାଏ। କିନ୍ତୁ ଏମିତି ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲାର ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଅନ୍ତର୍ଗତ ପୀଠାବଟା ରେଞ୍ଜର ସୀତାକୁଣ୍ଡ ଅଞ୍ଚଳରେ।

ଶିମିଳିପାଳରେ ଥିବା ପୋଷା ହାତୀ ବବ୍‌ଲୁ ସବୁଦିନ ଭଳି ମହନ୍ତଙ୍କ ସହ ବୁଲିଥାଏ । ହେଲେ ଶନିବାର ଦିନ ଶିମିଳିପାଳର ସୀତାକୁଣ୍ଡକୁ ବୁଲିବାକୁ ଆସିଥିବା ବେଳେ ପର୍ଯ୍ୟଟକ ମାନେ ଆଣିଥିବା ଡିଜେ ଶବ୍ଦକୁ ‘ବବ୍‌ଲୁ’ ହଜମ କରିପାରିଲା ନାହିଁ । ତେଣୁ ସେ ବିଚଳିତ ହୋଇ ମାରି ଗୋଡ଼ାଇବା ଆରମ୍ଭ କଲା । ତା’ ସହ ସେଲ୍ଫି ଉଠାଇବାକୁ ଚେଷ୍ଟା କରିଥିଲେ ପର୍ଯ୍ୟଟକ ।

କିନ୍ତୁ ଅଫମୁଡ୍‌ରେ ଥିବା ‘ବବ୍‌ଲୁ’ ମହନ୍ତଙ୍କଠୁ ଦୁରେଇ ଆସି ଲୋକଙ୍କୁ ଆକ୍ରମଣ କରିବାକୁ ଗୋଡ଼ାଇଥିଲା। ଏମିତିକି ରୋଷେଇ ସାମଗ୍ରୀ ଖାଇଦେଇଥିଲା। ଦୀର୍ଘ ଏକ ଘଣ୍ଟା ଧରି ବବ୍‌ଲୁ ବୋବାଲ କରିବା ପରେ ତାକୁ ମହନ୍ତ ଝଞ୍ଜିରରେ ବାନ୍ଧିବାରେ ସକ୍ଷମ ହୋଇଥିଲେ। ଗୋଡ଼ରେ ଝିଞ୍ଜିରି ଲାଗିଥିବାରୁ ଅଳ୍ପକେ ବର୍ତ୍ତିଗଲେ ପର୍ଯ୍ୟଟକ। ନ ହେଲେ ବବ୍‌ଲୁ ସମ୍ଭାଳିବା ମୁସ୍କିଲ ହୋଇଥା’ନ୍ତା ।

ମୟୂରଭଞ୍ଜ: ମୟୂରଭଞ୍ଜ ଜିଲ୍ଲାରେ ହାତୀ ଉପଦ୍ରବ କମିବାରେ ନାଁ ଧରୁନି। କେଉଁଠି ହାତୀପଲ ଘରଦ୍ୱାର ଭାଙ୍ଗି ଦେଲେଣି ତା ଆଉ କେଉଁଠି ମଣିଷଙ୍କୁ ମାରି ଦେଉଛନ୍ତି। ତେବେ ଜୈନିକ ବୃଦ୍ଧାଙ୍କୁ ହାତୀ ଆକ୍ରମଣ କରିବା ଯୋଗୁଁ ତାଙ୍କର ମୃତ୍ୟୁ ହୋଇଛି। ଘଟଣାଟି ଘଟିଛି ବାଙ୍ଗିରିପୋଷି ରେଞ୍ଜ ଅନ୍ତର୍ଗତ ଗୋଶାଣିପାଳ ଗ୍ରାମରେ।

ସୂଚନା ଅନୁସାରେ କତରା ନଦୀକୁ ବୁଧବାର ସକାଳେ ଶୌଚ ହେବାକୁ ଯାଇଥିବାବେଳେ ୬୫ ବର୍ଷୀୟ ସ୍ନେହଲତା ସେଠୀ ହାତୀ ପଲ ହାବୁଡ଼ରେ ପଡ଼ିଯାଇଥିଲେ। ଫଳରେ ଦନ୍ତା ଘଟଣା ସ୍ଥଳରେ ତାଙ୍କୁ ଦଳି ମାରି ଦେଇଥିଲେ। ଗ୍ରାମରେ ମୃତକଙ୍କ ପରିବାରକୁ କ୍ଷତିପୂରଣ ସହ ହାତୀ ଉପଦ୍ରବକୁ ରୋକିବା ପାଇଁ ଉତ୍ତେଜନା ଦେଖାଦେଇଛି। ତେବେ ଘଟଣା ସ୍ଥଳରେ ବାଙ୍ଗିରିପୋଷି ରେଞ୍ଜର ଶ୍ରୀ ତପନ ଦାସ ପହଞ୍ଚି ମୃତକଙ୍କ ପରିବାରଙ୍କୁ ୪୦୦୦୦ ଟଙ୍କାର ଚେକ୍ ପ୍ରଦାନ କରିବା ସହିତ ବାକି କ୍ଷତି ପୂରଣ ଦେବାର ପ୍ରତିଶୃତି ଦେଇଛନ୍ତି।

ମୃତ ମହିଳାଙ୍କ ଶବ ବ୍ୟବଚ୍ଛେଦ ପାଇଁ ପିଆରଏମ୍ ମେଡିକାଲ କଲେଜ ଓ ହସ୍ପିଟାଲକୁ ଅଣାଯାଇଥିବା ଜଣାପଡିଛି। ସେପଟେ ମୟୂରଭଞ୍ଜ ଜିଲ୍ଲାର ବିଭିନ୍ନ ସ୍ଥାନରେ ହାତୀ ଉପଦ୍ରବ ଦିନକୁ ଦିନ ବଢ଼ିବାରେ ଲାଗିଥିବା ବେଳେ ବନବିଭାଗ କର୍ମଚାରୀ ମାନେ ଏହାକୁ ପ୍ରତିରୋଧ କରିବାରେ ବିଫଳ ହେଉଥିବା ଗ୍ରାମବାସୀ ମାନେ ଅଭିଯୋଗ କରିଛନ୍ତି ।

ଭୁବନେଶ୍ୱର: ମୋଟର ସାଇକେଲ୍‌ ଚଲାଇପାରିବେନି ସ୍କୁଲରେ ପଢ଼ୁଥିବା ଛାତ୍ରଛାତ୍ରୀ । କୌଣସି ବି ପରିସ୍ଥିତିରେ ୧୮ ବର୍ଷରୁ କମ୍ ପିଲାମାନେ ଗାଡ଼ି ଚଳାଇବେ ନାହିଁ । ଯଦି କୌଣସି ଛାତ୍ରଛାତ୍ରୀ ଗାଡ଼ି ଚଳାଇବା ସମୟରେ ଧରାପଡ଼ନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ଆଉ ଯଦି ଛାତ୍ର କିମ୍ୱା ଛାତ୍ରୀ ବିଦ୍ୟାଳୟକୁ ବାଇକ୍‌ ଆଣି ଆସୁଥିବେ ତେବେ ସ୍କଲୁ କର୍ତ୍ତୃପକ୍ଷ ତାଙ୍କୁ ବାରଣ କରିବେ । ଏକାଧିକ ଥର ସଚେତନ କରିବା ପରେ ଯଦି ଛାତ୍ରଛାତ୍ରୀ ନ ମାନନ୍ତି ତେବେ ଏନେଇ ନିକଟସ୍ଥ ଆରଟିଓଙ୍କ ଦୃଷ୍ଟି ଆକର୍ଷଣ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ସମସ୍ତ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ସରକାରୀ ସମେତ ଘରୋଇ ବିଦ୍ୟାଳୟଗୁଡ଼ିକ ନିୟମ ପାଳନ କରିବାକୁ କୁହାଯାଇଛି । ପିଲାଙ୍କୁ ସଚେତନ କରିବା ସହ ଅଭିଭାବକ-ଶିକ୍ଷକ ବୈଠକରେ ଏନେଇ ଅଭିଭାବକମାନଙ୍କୁ ଅବଗତ କରାଇବେ । ସ୍କୁଲ ବସ୍‌ ନୀତି ଯେପରି ଠିକ୍‌ ଭାବେ ପାଳନ କରାଯିବ ସେଦିଗରେ ଧ୍ୟାନ ଦେବେ । ୩ ଚକିଆ ଯାନ ତଥା ଅଟୋରେ ଯାଉଥିବା ଛାତ୍ରଛାତ୍ରୀ ବହୁ ସମୟରେ ଦୁର୍ଘଟଣାର ଶିକାର ହୁଅନ୍ତି । ତେଣୁ ରାଜ୍ୟ ସଡ଼କ ସୁରକ୍ଷା ପରିଷଦର ନିୟମ ଅନୁଯାୟୀ ଯେପରି ଅଧିକ ଛାତ୍ରଛାତ୍ରୀ ଗାଡ଼ିରେ ନ ଯାଅନ୍ତି ତାହାକୁ ସୁନିଶ୍ଚିତ କରିବା ଦିଗରେ ଅଧ୍ୟକ୍ଷମାନେ ଗୁରୁତ୍ୱ ଦେବାକୁ ନିର୍ଦ୍ଦେଶ ଦିଆଯାଇଛି ।

ସ୍ୱତନ୍ତ୍ର ସ୍କ୍ୱାଡ୍‌ ପକ୍ଷରୁ ସ୍କୁଲ୍‌ ବସ୍‌ଗୁଡ଼ିକ ଉପରେ ଚଢ଼ାଉ କରାଯାଇ ଯାଞ୍ଚ ହେବ । ରାଜ୍ୟର ୧୪୬ଟି ସ୍କୁଲ୍‌ ବସ୍‌ର ଫିଟ୍‌ନେସ୍‌ ସାର୍ଟିଫିକେଟ୍‌ ନାହିଁ । ତେଣୁ କମିଟିର ନିଷ୍ପତ୍ତି ଅନୁଯାୟୀ ଉକ୍ତ ବସ୍‌ଗୁଡ଼ିକର ପଞ୍ଜିକରଣ ପ୍ରମାଣପତ୍ର ବାତିଲ୍‌ କରିବାକୁ ଆରଟିଓମାନଙ୍କୁ କୁହାଯାଇଛି । ବସ୍‌ ହେଉ କି ୩ ଚକିଆ ଯାନ ସବୁଗାଡ଼ିର ଉଭୟ ପାର୍ଶ୍ୱରେ କେତେ ଛାତ୍ରଛାତ୍ରୀ ନେଉଥିବା ଧରାପଡ଼ିଛନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ।

ପୁରୀ: ପବିତ୍ର ବଡ଼ ଦିନ ଅବସରରେ ସମଗ୍ର ବିଶ୍ୱବାସୀଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଖ୍ୟାତ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ପୁରୀ ବେଳାଭୂମିରେ ନିର୍ମାଣ କରିଛନ୍ତି ନିଆାରା ବାଲୁକା କଳା । ସୁଦର୍ଶନ ଓ ତାଙ୍କ ଅନୁଷ୍ଠାନର ଛାତ୍ରଛାତ୍ରୀମାନେ ଏହି ବାଲୁକା କଳା ପ୍ରସ୍ତୁତ କରିଛନ୍ତି । ପୂର୍ବର କେବଳ ବାଲି ଗଦା କରାଯାଇ ବାଲୁକା କଳା ପ୍ରସ୍ତୁତ କରାଯାଇଥିଲା । ଏଥର କେବଳ ବାଲି ଉପରେ ଏହାକୁ କରାଯାଇଛି । ଯେଉଁଥିରେ । ସବୁଜ ବାର୍ତ୍ତା ଦେବା ପାଇଁ ସାନ୍ତାକ୍ଳଜ୍‌ ଏକ ଚାରା ଉପହାର ଦେଉଥିବା ଦୃଶ୍ୟ ଦେଖିବାକୁ ମିଳିଛି । ଏଥିସହିତ ପର୍ଯ୍ୟଟକମାନେ ବାଲି ଉପରେ ନିର୍ମିତ ସାନ୍ତାକ୍ଳଜ୍‌ ସହିତ ହାତ ମିଳାଇ ପାରିବେ । ତେବେ ଏହି ବାଲୁକା କଳା ବିଶ୍ୱର ସର୍ବବୃହତ 3D ସ୍ୟାଣ୍ଡ୍‌ ଆର୍ଟ ମାନ୍ୟତା ପାଇବ ବୋଲି ସୁଦର୍ଶନ ମତ ରଖିଛନ୍ତି । ୨୫ଶହ ବର୍ଗଫୁଟ ଅଞ୍ଚଳର ଏହି ବାଲୁକା କଳା ପ୍ରସ୍ତୁତ କରାଯାଇଛି ।