ପଟ୍ଟାମୁଣ୍ଡାଇ: କିଏ  ବିପଦ ଏଡ଼ାଇବାକୁ ପୂଜାପାଠ କରୁଛି ତ କିଏ ପରିବାରର ମଙ୍ଗଳ ପାଇଁ ଠାକୁରଙ୍କ ପାଖରେ ମାନସିକ ରଖୁଛି । ସ୍କୁଲ କି ବାହାରକୁ ଯିବା ପାଇଁ ପିଲାଙ୍କୁ ବାରଣ କରାଯାଉଛି । ବହୁ ଅସମାହିତ ପ୍ରଶ୍ନ ଓ ଭୟର ଅଡ଼ୁଆ ସୂତାରେ ଛନ୍ଦି ହୋଇ ରହିଛନ୍ତି ଗାଁ ଲୋକେ ।

ଏଭଳି ଭୟର ବାତାବରଣ ଦେଖା ଦେଇଛି କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ୍‌ ଗଙ୍ଗାରାମପୁରରେ । ବିଲ ମଝିରେ ଦୁଇଟି ମଣିଷ ଖପୁରୀ ସହ କିଛି ଅସ୍ଥି କଙ୍କାଳ ଦେଖିବାକୁ ମିଳିଛି । କିଏ ଓ କାହିଁକି ଖପୁରୀ ରଖିଛି, ତାହା ସ୍ପଷ୍ଟ ହୋଇନାହିଁ । ବିପଦ ଦୂର ପାଇଁ କିଏ ଠାକୁରଙ୍କ ପାଖରେ ମାନସିକ ରଖୁଛନ୍ତି ତ ଆଉ କିଏ ଘର ମୁହଁରେ ରକ୍ଷା କବଚ ବାନ୍ଧୁଛି । ଲୋକ ଘରୁ ବାହାରିବାକୁ ଡରୁଛନ୍ତି ।

ବିଲରେ ମଣିଷ ଖପୁରୀ ।

କେଉଁଠୁ ଆସିଲା?

କିଏ ରଖିଲା ?

ତନ୍ତ୍ର ସାଧନା ?

ନା ଆତଙ୍କ ଖେଳାଇବା ଉଦ୍ଦେଶ୍ୟ ?

କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଗଙ୍ଗାରାମପୁର ବିଲ ମଝିରେ ୨ଟି ମଣିଷ ଖପୁରୀ ପାଖରେ ଛୋଟ ବଡ଼ ଅସ୍ଥି ପଡ଼ିଛି । କିଛି ଫୁଲ, ଦୀପ ଓ ସଳିତା ମଧ୍ୟ ଦେଖିବାକୁ ମିଳିଛି । କିଛି ପିଲା ପଡିଆକୁ ଖେଳିବାକୁ ଯାଇଥିବାବେଳେ ଖପୁରୀ ଦେଖି ଭୟଭୀତ ହୋଇ ଯାଇଥିଲେ । ଖବର ପ୍ରଘଟ ପରେ ଭୂତପ୍ରେତ ଭୟରେ ଦିନ କାଟୁଛନ୍ତି ଗାଁଲୋକ ।

ଘଟଣା ନେଇ ନାନା କଥା ପ୍ରଚାର ହେଉଛି । ଗୁଣି ଗାରେଡ଼ି ଉଦ୍ଦେଶ୍ୟରେ କେହି ଏଭଳିକରୁଥିବା ଲୋକ ସନ୍ଦେହ କରୁଛନ୍ତି । ଗାଁରେ ଲାଗି ରହିଛି ଭୟର ବାତାବରଣ ।

ଭୁବନେଶ୍ୱର: ଯୁବତୀଙ୍କୁ କମେଣ୍ଟ ମାରି ଛେଚା ଖାଇଲେ ନିଶାସକ୍ତ ଯୁବକ । ରାସ୍ତା ମଝିରେ ଗାଲକୁ ଗାଲକୁ ସେକିଲେ ଯୁବତୀ । ରାଜଧାନୀ ରାଜରାସ୍ତାରେ ଯୁବତୀଙ୍କ ସହ ଲୋକମାନେ ମଧ୍ୟ ମିଶି ଯୁବକକୁ ଧୁମ୍‌ ପିଟିଛନ୍ତି ।

ଭୁବନେଶ୍ୱର କଳ୍ପନା ଛକରେ ଏହି ଘଟଣା ଘଟିଛି । ଯୁବତୀ ଜଣଙ୍କ ସ୍କୁଟିରେ ଯାଉଥିବା ବେଳେ ଯୁବକ ତାଙ୍କୁ ପିଛା କରି କମେଣ୍ଟ ମାରିଥିଲା । ବିଭିନ୍ନ ଅଶ୍ଳୀଳ ଇଙ୍ଗିତ କରିଥିଲା ।

କଳ୍ପନା ଛକରେ ଯୁବତୀ ଓ ସ୍ଥାନୀୟ ଲୋକମାନେ ମିଶି ତାକୁ କାବୁ କରି ଧୁମ୍‌ ଛେଚିଛନ୍ତି । ପୋଲିସ ପହଞ୍ଚି ଯୁବକକୁ ଲକ୍ଷ୍ମୀସାଗର ଥାନାକୁ ନେଇଛି । ଯୁବକର ପରିଚୟ ମିଳିପାରିନାହିଁ ।

ପଟ୍ଟାମୁଣ୍ଡାଇ: ଯାତ୍ରାରେ ଆପତ୍ତିଜନକ ନୃତ୍ୟ ପରିବେଷଣ କରି ଚର୍ଚ୍ଚାକୁ ଆସିଥିବା ଲଭ୍‌ଲି ଏବେ ଆଉ ଏକ ଘଟଣାକୁ ନେଇ ଚର୍ଚ୍ଚାକୁ ଆସିଛନ୍ତି । ମାତ୍ରାଧିକ ମଦ ପିଇ ପୋଲିସ୍‌ ହାବୁଡ଼ରେ ପଡ଼ିଲେ ଲଭ୍‌ଲି । କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଅଞ୍ଚଳରେ ଆୟୋଜିତ ଯାତ୍ରାରେ ନୃତ୍ୟ ପରିବେଷଣ କରି ଘରକୁ କାର୍‌ରେ ଫେରିବା ବେଳେ ସେ ନିଶାଗ୍ରସ୍ତ ଅବସ୍ଥାରେ ପୋଲିସ ହାବୁଡ଼ରେ ପଡ଼ିଥିଲେ ।

ନିଶାରେ ଲଭ୍‌ଲି ଏତେ ଚୂର୍‌ ଥିଲେ ଯେ ପୋଲିସ କଥା ଶୁଣି ନଥିଲେ । କାର୍‌ ଡ୍ରାଇଭରଙ୍କ ସହଯୋଗରେ ପୋଲିସ୍‌ ତାଙ୍କୁ ପଟ୍ଟମୁଣ୍ଡାଇ ମେଡିକାଲ୍‌କୁ ନେଇ ଚିକିତ୍ସା କରାଇଥିଲା । ଭୁବନେଶ୍ୱର ଖଣ୍ଡଗିରି ଯାତ୍ରାରେ ଆପତ୍ତିଜନକ ନୃତ୍ୟ ପାଇଁ ଲଭ୍‌ଲିଙ୍କୁ ବିଭିନ୍ନ ମହଲରେ ସମାଲୋଚନା ପରେ ସେ ଆଉ ଏଭଳି ନୃତ୍ୟ ପରିବେଷଣ କରିବେ ନାହିଁ ବୋଲି କହିଥିଲେ ।କିନ୍ତୁ ପୁଣି ସେ ବିଭିନ୍ନ ଯାତ୍ରାମଞ୍ଚରେ ଆପତ୍ତିଜନକ ନୃତ୍ୟ ପରିବେଷଣ କରୁଥିବା ଦେଖିବାକୁ ମିଳୁଛି ।

ଆଉ ଏବେ ଲଭ୍‌ଲି ଅତ୍ୟଧିକ ମଦପିଇ ପୋଲିସ ହାବୁଡ଼ରେ ପଡ଼ିବା ଘଟଣାକୁ ନେଇ ପୁଣି ସେ ଚର୍ଚ୍ଚାକୁ ଆସିଛନ୍ତି । ଦେଖନ୍ତୁ ମେଡିକାଲରେ ଲଭ୍‌ଲି କିଭଳି ଆଚରଣ କରୁଛନ୍ତି ଓ କଣ କହୁଛନ୍ତି ।

ରାଉରକେଲା: ସୁନ୍ଦରଗଡ଼ ଜିଲ୍ଲା ବଣାଇରେ ଚାଞ୍ଚଲ୍ୟ । ଗୋଟିଏ ପରିବାରର ୪ ଜଣଙ୍କୁ ବୀଭତ୍ସ ହତ୍ୟା କରାଯାଇଛି । ଭାଇ ଭାଉଜଙ୍କ ସହ ୨ ଶିଶୁଙ୍କୁ ହାଣିଛି ସାନ ଭାଇ । ଶିବନାଥପୁର ଦେଉଳିହୁଡ଼ି ଗାଁରେ ଘଟିଛି ଏଭଳି ଅଭାବନୀୟ ଘଟଣା ।

ସ୍ୱାମୀ, ସ୍ତ୍ରୀ ଓ ୨ ପିଲାଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଥିବା ଅଭିଯୋଗ ହୋଇଛି । ଖବର ପାଇ ବଣାଇଁ ଥାନା ପୋଲିସ ଅଭିଯୁକ୍ତକୁ ଅଟକ ରଖି ଅଧିକ ପଚରାଉଚରା କରୁଛି ।

ସୁଚନା ଅନୁଯାୟୀ, ସାନଭାଇ କାଳୀ ମୁଣ୍ଡା ଏବଂ ବଡ଼ ଭାଇ କାନ୍ଦେ ମୁଣ୍ଡାଙ୍କ ମଧ୍ୟରେ ଟଙ୍କା ଏବଂ ଜାଗା ବାଡ଼ିକୁ ନେଇ ବହୁଦିନରୁ କଳହ ଲାଗି ରହିଥିଲା । ଗତ କାଲି ରାତିରେ ଦୁଇ ବାଇଙ୍କ ମଧ୍ୟରେ ଜାଗା ବାଡ଼ିକୁ ନେଇ ଝଗଡ଼ା ହୋଇଥିଲା ।

ଏଥିରେ ରାଗିଯାଇ ସାନ ଭାଇ କାଳୀ ମୁଣ୍ଡା ଟାଙ୍ଗିଆରେ ସମସ୍ତଙ୍କୁ ହାଣି ହତ୍ୟା କରିଥିଲା । ପରେ ଘଟଣା ସ୍ଥଳରେ ପୋଲିସ ପହଞ୍ଚି ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଛି ।

ଭୁବନେଶ୍ୱର: ଉଦାହରଣ ସୃଷ୍ଟି କଲେ ମୁଖ୍ୟମନ୍ତ୍ରୀ । ନିଜେ ଅଟକି ଆମ୍ୱୁଲାନ୍ସକୁ ବାଟ ଛାଡ଼ିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।  କେବଳ ଜଣେ ଭଲ ମୁଖ୍ୟମନ୍ତ୍ରୀ ନୁହେଁ ଜଣେ ଭଲ ମଣିଷ ଓ ଦାୟିତ୍ୱବାନ ନାଗରିକ ହେବାର ପରିଚୟ ଦେଇଛନ୍ତି ମୁଖ୍ୟମନ୍ତ୍ରୀ ।

ଶନିବାର ଜୟଦେବ ବିହାରରୁ ନନ୍ଦନକାନନ ରୋଡ୍‌ ଅଭିମୁଖେ ଯାଉଥିଲା ମୁଖ୍ୟମନ୍ତ୍ରୀଙ୍କ କାରରେଡ୍ । ଜାଭିୟର ଛକରୁ ୟୁଟର୍ଣ୍ଣ ନେବାର ଥିଲା ମୁଖ୍ୟମନ୍ତ୍ରୀଙ୍କ ଗାଡ଼ି । କିନ୍ତୁ ଏହା ପୂର୍ବରୁ ସେହି ରାସ୍ତା ଦେଇ ଆସିଥିଲା ଏକ ଆମ୍ୱୁଲାନ୍ସ । ଆଉ ସେହି  ରାସ୍ତାରେ ଭିଡ଼ ଥିବାରୁ କାରକେଡ୍‌କୁ ଅଟକାଇ ଆମ୍ୱୁଲାନ୍ସକୁ ରାସ୍ତା ଛାଡ଼ିଥିଲେ  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆମ୍ୱୁଲାନ୍ସ ଯିବା ପରେ ଯାଇଥିଲେ ମୁଖ୍ୟମନ୍ତ୍ରୀ ।

ବିଗତ ଦିନମାନଙ୍କରେ ଭିଡ଼ ଯୋଗୁଁ ବିଭିନ୍ନ ସମୟରେ ରାସ୍ତା ମଝିରେ ବହୁ ସମୟ ଧରି ଆମ୍ୱୁଲାନ୍ସକୁ ଅଟକି ଯାଉଥିବା ଦେଖିବାକୁ ମିଳିଛି । ଏଥିଲାଗି ରୋଗୀଙ୍କୁ ବହୁ ହଇରାଣ ହେବାକୁ ପଡ଼ଛୁ । ଏଭଳି ଘଟଣା ବିଭିନ୍ନ ଗଣମାଧ୍ୟମରେ ମଧ୍ୟ ପ୍ରସାରିତ ହେଉଛି । ଯାହାକୁ ଦେଖି ସାଧାରଣ ଜନତା ଓ ବୁଦ୍ଧିଜୀବୀ ବିବ୍ରତ ହେଉଛନ୍ତି । ଲୋକଙ୍କ ମଣିଷପଣିଆ ଓ ଟ୍ରାଫିକ ବ୍ୟବସ୍ଥା ପ୍ରତି ପ୍ରଶ୍ନ ଉଠୁଛି  । ଏଭଳି ସମୟରେ ସ୍ୱୟଂ ମୁଖ୍ୟମନ୍ତ୍ରୀ ନିଜେ ଅଟକି ଆମ୍ୱୁଲାନ୍ସକୁ ବାଟ ଛାଡ଼ିଛନ୍ତି । ଯାହା ସମସ୍ତଙ୍କୁ ଏକ ନିଆରା ବାର୍ତ୍ତା ଦେଉଛି ।