ମାଲକାନାଗିରି: ନୂଆବର୍ଷ ପାଇଁ ସବୁଠି ଆନନ୍ଦ ଉଲ୍ଲାସ । ସମସ୍ତେ ପରସ୍ପରକୁ ଶୁଭ କାମନା ଜଣାଉଛନ୍ତି । ଅଫିସ୍‌ରେ ମଧ୍ୟ ଉଚ୍ଚ ପଦାଧିକାରୀଙ୍କୁ କର୍ମଚାରୀମାନେ ସାକ୍ଷାତ କରି ଜଣାଉଛନ୍ତି ନୂଆବର୍ଷ ଶୁଭେଚ୍ଛା । କିନ୍ତୁ ମାଲକାନଗିରିରେ ଦେଖିବାକୁ ମିଳିଛି ଓଲଟା ଘଟଣା ।

ଜିଲ୍ଲାପାଳଙ୍କ ଅଫିସ୍‌ ପାଚେରିରେ ଜିଲ୍ଲାପାଳଙ୍କୁ ବିରୋଧ କରି ଏଣୁତେଣୁ ଲେଖାଯାଇଛି । ଗତ ୨୮ ତାରିଖରେ ମାଲକାନଗିରି ଜିଲ୍ଲାପାଳଙ୍କ ପିଏ ଦେବନାରାୟଣ ପଣ୍ଡାଙ୍କ ମୃତଦେହ ସତୀଗୁଡ଼ା ଡ୍ୟାମ୍‌ରୁ ଉଦ୍ଧାର କରାଯାଇଥିଲା । ଏହି ଘଟଣା ପାଇଁ ମାଲକାନଗିରି ଜିଲ୍ଲାପାଳଙ୍କୁ ଦାୟୀ କରି ଏଣୁତେଣୁ ଲେଖାଯାଇଥିବା ଦେଖିବାକୁ ମିଳିଛି । କିଏ ଏମିତି ଲେଖିଛି, ତାହା ଜଣାପଡ଼ିନାହିଁ । ଏହି ଲେଖାକୁ ଲିଭା ଯାଉଛି ।

ଦିଗପହଣ୍ଡି: ଥାନା ଅଧିକାରୀଙ୍କ ଉପରକୁ ଆକ୍ରମଣ ଘଟଣା । ସମ୍ପୃକ୍ତି ନେଇ ଏସ୍‌.ଆଇ ପ୍ରୀତିମଞ୍ଜରୀ ଗଡ ନାୟକଙ୍କୁ ନିଲମ୍ବିତ କରାଯାଇଛି । ଗଞ୍ଜାମ ପାଟପୁର ଥାନା ଭିତରେ ପଶି ଆଇଆଇସିଙ୍କୁ ଆକ୍ରମଣ କରାଯାଇଥିବା ଅଭିଯୋଗ ହେଇଥିଲା ।

ଏସଆଇ ଓ ତାଙ୍କର ସ୍ୱାମୀ ଥାନା ଭିତରେ ପଶି ଦୁର୍ବ୍ୟହାର କରିବା ସହିତ ହତ୍ୟା ଉଦ୍ୟମ କରିଥିବା ଅଭିଯୋଗ ଆଣିଥିଲେ ଆଇଆଇସି ଅଜୟ ବାରିକ । ଏନେଇ ଉଭୟଙ୍କ ନାଁରେ  ପାଟପୁର ଥାନାରେ ଲିଖିତ ଅଭିଯୋଗ କରିଥିଲେ । ଏନେଇ ଏସଆଇଙ୍କୁ ନିଲମ୍ବିତ କରାଯିବା ସହିତ ଘଟଣାର ତଦନ୍ତ ଆରମ୍ଭ ହୋଇଛି ।

ଆଜିଠୁ ଏସବିଆଇର ନୂଆ ନିୟମ । ଏଣିକି ଏସବିଆଇ ଏଟିମରୁ ଟଙ୍କା ଉଠାଇଲେ ମୋବାଇଲକୁ ଆସିବ ଓ୍ୱାନ ଟାଇମ୍‌ ପାସଓ୍ୱାର୍ଡ ବା ଓଟିପି । ଏଟିଏମରେ ବେଆଇନ କାରବାରକୁ ରୋକିବାକୁ ଏସବିଆଇ ଏହି ନୂଆ ନିୟମ ଲାଗୁ କରିଛି । ନୂଆ ନିୟମ ଅନୁସାରେ ଯ଼ଦି ଏସବିଆଇ ଗ୍ରାହକ ଏଟିଏମରୁ ଟଙ୍କା ଉଠାଇବେ ତେବେ ପଞ୍ଜୀକୃତ ମୋବାଇଲ ନମ୍ବରକୁ ଓଟିପି ଯିବ ।

ଏଟିଏମ ସ୍କ୍ରିନ ଉପରେ ଓଟିପି ଦେଲେ ହିଁ ଟଙ୍କା ଉଠାଇପାରିବେ । ତେବେ ରାତି ୮ଟାରୁ ସକାଳ ୭ଟା ମଧ୍ୟରେ ୧୦ହଜାରୁ ଅଧିକ ଟଙ୍କା ଉଠାଇଲେ ଏହି ନିୟମ ଲାଗୁ ହେବ । ତେବେ ଏସବିଆଇ ଗ୍ରାହକ ଯ଼ଦି ଅନ୍ୟ ବ୍ୟାଙ୍କରୁ ଟଙ୍କା ଉଠାଇବେ ତେବେ ଏହି ନିୟମ ଲାଗୁ ହେବ ନାହିଁ ।

ପୁରୀ: ନୂଆବର୍ଷକୁ ସ୍ୱାଗତ କରି ଆନ୍ତର୍ଜାତିକ ଖ୍ୟାତିସଂପନ୍ନ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ପୁରୀ ବେଳାଭୂମିରେ ବାଲୁକା କଳା ନିର୍ମାଣ କରିଛନ୍ତି । ଏଥିରେ ସମସ୍ତଙ୍କୁ ନୂଆବର୍ଷର ଶୁଭକାମନା ଜଣାଇଛନ୍ତି ।

୨୦୨୦ ବର୍ଷର ପବିତ୍ର କାର୍ତ୍ତିକ ମାସରେ ପଡୁଥିବା ଶ୍ରୀଜିଉଙ୍କ ନାଗାର୍ଜୁନ ବେଶ ବାଲୁକା କଳାରେ ସ୍ଥାନ ପାଇଛି । ଏଥିସହିତ ବାତ୍ୟା ଫନି ଦ୍ଵାରା ଘଟିଥିବା କ୍ଷୟକ୍ଷତିକୁ ମନେ ପକାଇ ପରିବେଶ ସନ୍ତୁଳନ ରକ୍ଷା ପାଇଁ ‘ଗୋ ଗ୍ରୀନ୍‌’ର ବାର୍ତ୍ତା ଦେଇଛନ୍ତି ସୁଦର୍ଶନ । ଏହି ବାଲୁକା କଳା ଦେଖିବା ପାଇଁ ପୁରୀ ବେଳାଭୂମିରେ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କ ଭିଡ଼ ଲାଗିଛି ।

ପୁରୀ: ସ୍ୱାଗତଂ ୨୦୨୦। ନୂଆ ବର୍ଷ ନୂଆ ଆଶା ନେଇ ଆସିଛି ସକାଳର ସୂର୍ଯ୍ୟ । ପୁରୁଣା ବର୍ଷକୁ ବିଦାୟ ଦେବା ସହ ସବୁ ତିକ୍ତତାକୁ ଭୁଲି ପରସ୍ପରକୁ ଜଣାଇଛନ୍ତି ନୂଆ ବର୍ଷର ଶୁଭେଚ୍ଛା । ଜିରୋ ନାଇଟ ସେଲିବ୍ରେସନରେ ନାଚି ଝୁମି ୨୦୧୯ ବର୍ଷକୁ ବିଦାୟ ଦେଇଛନ୍ତି ।

ଏଥିପାଇଁ ସବୁ ହୋଟେଲରେ ସ୍ୱତନ୍ତ୍ର ବ୍ୟବସ୍ଥା ହୋଇଥିଲା । ଏଥିପାଇଁ ପୁରୀରେ ଲାଗିଛି ଭକ୍ତଙ୍କ ପ୍ରବଳ ଗହଳି । ରାତି ଗୋଟାଏରୁ ଦର୍ଶନ ଦେଉଛନ୍ତି ମହାପ୍ରଭୁ । ସେପଟେ ଶ୍ରୀଜିଉଙ୍କ ଦର୍ଶନରୁ ବର୍ଷ ଆରମ୍ଭ କରିଛନ୍ତି ଶ୍ରଦ୍ଧାଳୁ । ସେପଟେବର୍ଷର ପ୍ରଥମ ଦିନରେ ଶ୍ରୀଜଗନ୍ନାଥଙ୍କୁ ଦର୍ଶନ କରିଛନ୍ତି ୫ଟି ସଚିବ ଭି. କାର୍ତ୍ତିକେୟ ପାଣ୍ଡିଆନ୍‌। ଆଜି ସକାଳୁ ପୁରୀରେ ପହଞ୍ଚି ସେ ଶ୍ରୀମନ୍ଦିର ଯାଇଥିଲେ। ସେଠାରେ ଶ୍ରୀଜିଉଙ୍କୁ ସେ ସପରିବାରେ ଦର୍ଶନ କରିଛନ୍ତି ।

ସେହିପରି ଚନ୍ଦ୍ରଭାଗାରେ ବର୍ଷର ପ୍ରଥମ ସୂର୍ଯ୍ୟୋଦୟ ଦେଖିଛନ୍ତି ହଜାର ହଜାର ଭକ୍ତ ।