କେନ୍ଦ୍ରାପଡ଼ା ପଟ୍ଟାମୁଣ୍ଡାଇରେ ଛାତ୍ରୀ ଆତ୍ମାହୁତି ଘଟଣାରେ ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଶୋକ ପ୍ରକାଶ। ମୃତ ଛାତ୍ରୀଙ୍କ ଆତ୍ମାର ସଦଗତି କାମନା ସହ ପରିବାର ପ୍ରତି ସମବେଦନା ଜଣାଇଛନ୍ତି ନବୀନ। ଏହି ଅପୂରଣୀୟ କ୍ଷତିର ସାମ୍ନା କରିବାକୁ ପରିବାରବର୍ଗଙ୍କୁ ଭଗବାନ ଅପାର ଶକ୍ତି ପ୍ରଦାନ କରନ୍ତୁ। ମାସକ ମଧ୍ୟରେ ତିନି ତିନିଟି ନାବାଳିକା ସମାନ ସ୍ଥିତିରେ ଜୀବନ ହାରିଲେଣି। ଜୁଇରେ ଜଳିଯାଇଛି ନିରୀହ ଜୀବନ।ପ୍ରଶାସନିକ ସ୍ଥାଣୁତା ଯୋଗୁଁ ସ୍ପଷ୍ଟ ଦିବାଲୋକରେ ଆମ ମାଟିର ୩ ଜଣ ଝିଅ ଜୀବନ ଯାଇଛି। ସବୁ କ୍ଷେତ୍ରରେ ପ୍ରଶାସନିକ ବିଫଳତା ସ୍ପଷ୍ଟ ହୋଇଛି। ପ୍ରତିଦିନ ଏଇ ଧରଣର ଘଟଣା ସାରା ରାଜ୍ୟରୁ ଆସୁଛି। ରାଜ୍ୟ ବିଜେପି ସରକାର ଅମଳରେ ଆଉ କେତେ ଝିଅଙ୍କ ଜୀବନ ଯିବ ବୋଲି ପ୍ରଶ୍ନ କରିଛନ୍ତି ନବୀନ। ଆଉ କେତେ ମାଆ ସେମାନଙ୍କ ଝିଅଙ୍କୁ ହରାଇବେ। ଏହା ରାଜ୍ୟ ବିଜେପି ସରକାରଙ୍କ ଚରମ ବିଫଳତା ବୋଲି କହିଛନ୍ତି ନବୀନ
କିଛି ଦେଶ ଅନ୍ୟ ଦେଶ ଉପରେ କ’ଣ ପାଇଁ ଟାରିଫ୍ ଲାଗୁ କରିଥାନ୍ତି, ଏହା ପଛର କାରଣ କ’ଣ ?
ସାରା ବିଶ୍ବରେ ବର୍ତ୍ତମାନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫକୁ ନେଇ ବଡ଼ ଚର୍ଚ୍ଚା । ଟ୍ରମ୍ପ ଭାରତ ଉପରେ ପ୍ରଥମେ ୨୫ ପ୍ରତିଶତ ଟାରିଫ ଲାଗୁ କରିଥିବା ବେଳେ ପୁଣି ୨୫ ପ୍ରତିଶତ ଲାଗୁ କରିଛନ୍ତି । ଏହାଫଳରେ ଟ୍ରମ୍ପ ଭାରତ ଉପରେ ମୋଟ ୫୦ ପ୍ରତିଶତ ଟାରିଫ ଲଗାଇଛନ୍ତି । ଭାରତ ମଧ୍ୟ ଏହାର ଜବାବ ଦେଇଛି । ଆମେରିକୀୟ ରାଷ୍ଟ୍ରପତିଙ୍କ ଟାରିଫ ନିଷ୍ପତ୍ତି ଅନୁଚିତ, ଅନ୍ୟାୟପୂର୍ଣ୍ଣ ଓ ତର୍କହୀନ ବୋଲି ଭାରତର ବିଦେଶ ମନ୍ତ୍ରଣାଳୟ ସ୍ପଷ୍ଟ କରିଛି । ଏବେ ପ୍ରଶ୍ନ ଉଠୁଛି, ଟାରିଫ ଶବ୍ଦର ଅର୍ଥ କ’ଣ ଓ ଦୁନିଆର ଦେଶମାନେ ଏହାକୁ କାହିଁକି ଲଗାନ୍ତି ? ଟାରିଫ ହେଉଛି ଏକ ପ୍ରକାର ଟ୍ୟାକ୍ସ, ଯାହା ଦେଶକୁ ଆମଦାନୀ ହେଉଥିବା ଜିନିଷ ଉପରେ ଲାଗିଥାଏ । ସହଜ ଭାଷାରେ ବୁଝିଲେ ଟାରିଫ ହେଉଛି ଏକ ପ୍ରକାରର ଆର୍ଥିକ ହତିଆର । ନିଜର ଉତ୍ପାଦଗୁଡ଼ିକୁ ବଞ୍ଚାଇବା, ଆୟ ବଢ଼ାଇବା ଓ ଅନ୍ୟ ଦେଶ ଉପରେ ଚାପ ସୃଷ୍ଟି କରିବା ପାଇଁ ଅଲଗା ଅଲଗା ଦେଶ ଏହାକୁ ପ୍ରୟୋଗ କରିଥାନ୍ତି । ତେବେ ଟ୍ରମ୍ପଙ୍କ ଘୋଷଣା ଏକଛତ୍ରବାଦୀ ଓ ପ୍ରତିଶୋଧପରାୟଣ ପରି ପ୍ରତୀୟମାନ ହେଉଛି । କୌଣସି ଦେଶ ପାଇଁ ଟାରିଫ ଲଗାଇବା କାହିଁକି ଜରୁରୀ ହୋଇଥାଏ, ଆସନ୍ତୁ ଏହାକୁ ବୁଝିବା ।
ପ୍ରଥମ କାରଣ: ଯଦି କୌଣସି ଦେଶ ବାହାରୁ ଶସ୍ତା ସାମଗ୍ରୀ ମଗାଏ ଓ ଉକ୍ତ ଦେଶର କମ୍ପାନୀମାନେ ଉକ୍ତ ଦରରେ ସାମଗ୍ରୀ ପ୍ରସ୍ତୁତ କରି ନପାରନ୍ତି, ତେବେ ଟାରିଫ ଲଗାଇ ବିଦେଶ ସାମଗ୍ରୀକୁ ମହଙ୍ଗା କରାଯାଏ ।
ଦ୍ବିତୀୟ କାରଣ: ଦେଶର ବ୍ୟବସାୟ କ୍ଷତିକୁ କମ୍ କରିବା ପାଇଁ ଟାରିଫ ଲଗାଇଥାନ୍ତି । ଯଦି କୌଣସି ଦେଶ ଅଧିକ ସାମଗ୍ରୀ ଆମଦାନୀ କରିଥାଏ ଓ କମ୍ ବିକ୍ରି କରିଥାଏ, ତେବେ ଘାଟା ହୋଇଥାଏ । ଏପରି ଭାବେ ଟାରିଫ ଲଗାଇ ଆମଦାନୀକୁ ହ୍ରାସ କରାଯାଏ, ଫଳରେ ବେପାର ସନ୍ତୁଳିତ ରହିଥାଏ ।
ତୃତୀୟ କାରଣ: ରାଜନୈତିକ କାରଣରୁ ମଧ୍ୟ ଏଭଳି ନିଷ୍ପତ୍ତି ନିଆଯାଇଥାଏ । କୌଣସି ଦେଶ ଯାହାକୁ ନିଜର ଶତ୍ରୁ ଭାବିଥାଏ ଓ ପସନ୍ଦ କରିନଥାଏ, ତା’ ଉପରେ ଆର୍ଥିକ ଚାପ ପକାଇବା ପାଇଁ ଟାରିଫ ଲଗାଇଥାଏ ।
ଚତୁର୍ଥ କାରଣ: କିଛି ଦେଶ ନିଜର ରାଜସ୍ବ ଭରିବା ପାଇଁ ଟାରିଫ ଲଗାଇଥାନ୍ତି । ଏହାଦ୍ବାରା ବହୁମାତ୍ରା ଫଣ୍ଡ ସଂଗ୍ରହ କରାଯାଇଥାଏ ଓ ଦେଶ ଚାଲିଥାଏ ।
ପଞ୍ଚମ କାରଣ: କିଛି ଦେଶ କ୍ବାଲିଟି ପ୍ରଡକ୍ଟକୁ ମେଣ୍ଟେନ କରିବା ପାଇଁ ଏଭଳି ପଦକ୍ଷେପ ଉଠାଇଥାନ୍ତି । ଫଳରେ ଉକ୍ତ ଦେଶର ବଜାରରେ ଅନ୍ୟ ଦେଶର ଖରାପ ସାମଗ୍ରୀ ପହଞ୍ଚି ପାରିନଥାଏ ।
ସରକାରୀ ବିଜ୍ଞାପନରେ ବ୍ୟବହାର ହୋଇପାରିବ ପୂର୍ବତନ ମୁଖ୍ୟମନ୍ତ୍ରୀମାନଙ୍କ ଫଟୋ : ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : ସରକାରୀ ବିଜ୍ଞାପନରେ ବ୍ୟବହାର ହୋଇପାରିବ ପୂର୍ବତନ ମୁଖ୍ୟମନ୍ତ୍ରୀମାନଙ୍କ ଫଟୋ । ଏହା ଉପରେ ନିଷେଧାଦେଶ ଜାରି କରିଥିବା ମାଡ୍ରାସ ହାଇକୋର୍ଟଙ୍କ ରାୟକୁ ରଦ୍ଦ କରିଛନ୍ତି ସୁପ୍ରିମକୋର୍ଟ । ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ ନେତୃତ୍ବାଧୀନ ସରକାରର ଏକ ବିଜ୍ଞାପନର ପୂର୍ବତନ ମୁଖ୍ୟମନ୍ତ୍ରୀମାନଙ୍କ ବ୍ୟବହାର ହୋଇଥିବା ପ୍ରତିବାଦରେ ମାଡ୍ରାସ ହାଇକୋର୍ଟରେ ଦାୟର ହୋଇଥିଲା ପିଟିସନ । ମାମଲାର ଶୁଣାଣି କରି ଫଟୋ ବ୍ୟବହାର ଉପରେ ଜାରି କରିଥିଲେ ହାଇକୋର୍ଟ । ପ୍ରତିବାଦରେ ତାମିଲନାଡୁ ସରକାର ସୁପ୍ରିମକୋର୍ଟ ଯାଇଥିଲେ । ସର୍ବୋଚ୍ଚ ଅଦାଲତ ହାଇକୋର୍ଟଙ୍କ ରାୟକୁ ରଦ୍ଦ କରି କହିଛନ୍ତି- କୌଣସି ସରକାର ପୂର୍ବତନ ମୁଖ୍ୟମନ୍ତ୍ରୀମାନଙ୍କ ଫଟୋ ବ୍ୟବହାର କରିପାରିବେ । ସାରା ଦେଶରେ ଏହି ନିୟମ କାର୍ଯ୍ଯକାରୀ ହେବ । ବିଭିନ୍ନ କଲ୍ଯାଣମୂଳକ ଯୋଜନାର ବିଜ୍ଞାପନ ପ୍ରସାର ବେଳେ ତାମିଲନାଡୁ ସରକାର କେତେକ ବିଭିନ୍ନ ଦଳର କେତେକ ପୂର୍ବତନ ମୁଖ୍ୟମନ୍ତ୍ରୀଙ୍କ ଫଟୋ ପ୍ରସାରିତ କରିଥିଲେ ।
ତାମିଲନାଡୁ ସରକାରଙ୍କ ପକ୍ଷରୁ ଯୁକ୍ତି କରାଯାଇଥିଲା- ସାରା ଦେଶରେ ବିଭିନ୍ନ ରାଜ୍ୟ ସରକାର ପୂର୍ବତନ ମୁଖ୍ୟମନ୍ତ୍ରୀମାନଙ୍କ ଫଟୋ ବ୍ୟବହାର କରୁଛନ୍ତି । ଏଥିଲାଗି କୌଣସି ଆଇନଗତ ପ୍ରତିବନ୍ଧକ ନାହିଁ । ତେଣୁ ତାମିଲନାଡୁ ସରକାରଙ୍କୁ ଏଥିଲାଗି ଅନୁମତି ମିଳୁ । କୌଣସି ରାଜନେତାଙ୍କ ନାମରେ ଯୋଜନାକୁ ନାମିତ କରିବାରେ ସୁପ୍ରିମକୋର୍ଟ କୌଣସି ପ୍ରତିବନ୍ଧକ ଲଗାଇନାହାନ୍ତି ବୋଲି ଯୁକ୍ତି ବାଢ଼ିଥିଲା ଡିଏମକେ । କୋର୍ଟରେ ବରିଷ୍ଠ ଆଇନଜୀବୀ ମୁକୁଲ ରୋହତଗୀ ଯୁକ୍ତି ବାଢିଥିଲେ ଯେ, ତାମିଲନାଡୁ ସରକାରଙ୍କ ଷ୍ଟାଲିନ ଉଇଥ ୟୁ ଯୋଜନା ଏକ ନୂଆ ଯୋଜନା ନୁହେଁ, ବରଂ ଏକ ବିଭିନ୍ନ ଯୋଜନାର ସୁଫଳ ପାଇବା ଲାଗି ନାଗରିକମାନଙ୍କୁ ସକ୍ଷମ କରିବା ଦିଗରେ ଏହି ଡିଜିଟାଲ ପ୍ଲାଟଫର୍ମ ଉଦ୍ଦିଷ୍ଟ । ପୂର୍ବରୁ କେତେକ ରାୟରେ ସରକାରୀ ଯୋଜନା କ୍ଷେତ୍ରରେ ସାମ୍ବିଧାନିକ ପଦାଧିକାରୀ ଯଥା ପ୍ରଧାନମନ୍ତ୍ରୀ, ରାଷ୍ଟ୍ରପତି, ମୁଖ୍ୟ ବିଚାରପତିମାନଙ୍କ ଫଟୋ ଲଗାଯାଇପାରିବ ବୋଲି କହିଥିଲେ ସୁପ୍ରିମକୋର୍ଟ । ଡିଏମକେ ସରକାରଙ୍କ ବିରୋଧରେ ଏହି ପ୍ରସଙ୍ଗରେ କୋର୍ଟକୁ ଯାଇଥିବାରୁ ଏଆଇଏଡିଏମ ସାଂସଦ ସନମୁଗମଙ୍କ ଉପରେ ୧୦ ଲକ୍ଷ ଟଙ୍କା ଜରିମାନା ଲଗାଇଛନ୍ତି ସୁପ୍ରିମକୋର୍ଟ ।
୨୩ ଜଣ ଯବାନଙ୍କୁ ନେଇ ଯାଉଥିବା ଆର୍ମି ଗାଡି ଦୁର୍ଘଟଣାଗ୍ରସ୍ତ, ୨ ଯବାନ୍ ସହିଦ
ନନ୍ଦିଘୋଷ ବ୍ୟୁରୋ : ଜାମ୍ମୁ ଓ କାଶ୍ମୀର ଉଦ୍ଧମପୁରରେ ଦୁର୍ଘଟଣା। ଦୁର୍ଘଟଣାରେ ୨ ସିଆରପିଏଫ ଯବାନ ସହିଦ ହୋଇଥିବାବେଳେ ୧୬ ଜଣ ଯବାନ ଆହତ ହୋଇଛନ୍ତି । ଉଦ୍ଧମପୁର ଜିଲ୍ଲାର ବସନ୍ତଗଡ଼ରେ ଘଟିଛି ଦୁର୍ଘଟଣା । ୨୩ ଜଣ ଯବାନଙ୍କୁ ନେଇ ଯାଉଥିବା ଆର୍ମିଗାଡି ହୋଇଛି ଦୁର୍ଘଟଣାଗ୍ରସ୍ତ । ଘଟଣାସ୍ଥଳକୁ ଉଦ୍ଧମପୁର ଅତିରିକ୍ତ ଏସପି ସନ୍ଦୀପ ଭଟ୍ଟଙ୍କ ନେତୃତ୍ବରେ ପୋଲିସ ଟିମ ପହଞ୍ଚି ରେସ୍କ୍ୟୁ ଅପରେସନ କରିଛନ୍ତି । କଦୱା ଅଞ୍ଚଳରେ ଆଜି ସକାଳ ସାଢ଼େ ୧୦ଟାରେ ଘଟିଛି ଦୁର୍ଘଟଣା । ବସନ୍ତଗଡ଼ରୁ ଅପରେସନ ସାରି ଫେରିବାବେଳେ ଏହି ଦୁର୍ଘଟଣା ଘଟିଥିଲା । ଦୁର୍ଘଟଣାଗ୍ରସ୍ତ ଗାଡ଼ିଟି ହେଉଛି ୧୮୭ ବାଟାଲିଅନର । ଏହି ଘଟଣାରେ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ ଶୋକପ୍ରକାଶ କରିଛନ୍ତି । ଉଦ୍ଧାର ପ୍ରକ୍ରିୟା ସମ୍ପର୍କରେ ସେ ଉଦ୍ଧମପୁର ଡେପୁଟି କମିଶନର ସାଲୋନି ରାୟଙ୍କ ସହ ଆଲୋଚନା କରିଛନ୍ତି ।
ପୁରୀ : ଲାଇନ କଟିଯିବାରୁ ଟର୍ଚ୍ଚ ଲାଇଟରେ ଚାଲିଛି ଚିକିତ୍ସା
ନନ୍ଦିଘୋଷ ବ୍ୟୁରୋ : ଅନ୍ଧାରରେ ଚାଲିଛି ଜରୁରୀ ଚିକିତ୍ସା। ଲାଇନ କଟିଯିବାରୁ ଟର୍ଚ୍ଚ ଲାଇଟରେ ଚାଲିଛି ଚିକିତ୍ସା। ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ଏପରି ଅଭାବନୀୟ ଦୃଶ୍ୟ। ଗତକାଲି ସନ୍ଧ୍ୟା ୫ଟା ୧୫ରେ ହଠାତ୍ ଜିଲ୍ଲା ମୁଖ୍ୟ ଚିକିତ୍ସାଳୟରେ କଟିଗଲା ଲାଇନ୍ । କାଜୁଆଲିଟି ବିଭାଗରେ ଲାଗିଥିଲା ଲମ୍ବା ଲାଇନ୍ । ଛୋଟ ପିଲାଠାରୁ ଆରମ୍ଭ କରି ଥିଲେ ବୟସ୍କ ରୋଗୀ ସମସ୍ତେ ଏହି ଲାଇନରେ ଛିଡା ହୋଇଥିଲେ । ହଠାତ୍ ଅନ୍ଧାର ହେବାରୁ ଯିଏ ଯୁଆଡେ ପାଇଲେ ମୋବାଇଲ୍ ଟର୍ଚ୍ଚ ଅନ୍ କଲେ। ଆଉ ସେଇ ଝାପସା ଆଲୁଅରେ ପ୍ରେସକ୍ରିପସନ୍ ଲେଖି ଚାଲିଥିଲେ ଉପସ୍ଥିତ ଡାକ୍ତର । ଉପସ୍ଥିତ ଦୁଇ ଡାକ୍ତର ଅବଶ୍ୟ ତାଙ୍କ କର୍ତ୍ତବ୍ୟ କରି ଚାଲିଥିଲେ। ହେଲେ ପ୍ରାୟ ଦଶ ମିନିଟ ଏଭଳି ଲାଇନ୍ କଟି ଆସିନଥିଲା। ୫ଟା ୨୫ ମିନିଟ ବେଳକୁ ଆସିଥିଲା ଲାଇନ୍। ଗୋଟିଏ ପଟେ ଟାଟାର ମନମାନି। ଅନ୍ୟପଟେ ବଡ ପ୍ରଶ୍ନ ହସ୍ପିଟାଲର ପାୱାର ବ୍ୟାକଅପ୍ କୋଉଠି ଥିଲା। ଗୋଟିଏ ପଟେ କାଜୁଆଲିଟିରେ ଲମ୍ବା ଲାଇନ୍ ଅନ୍ୟପଟରେ ବିଦ୍ୟୁତ୍ ବିଭ୍ରାଟ। ଏମର୍ଜେନ୍ସିରେ କେମିତି ରୋଗୀ ପାଇବେ ଚିକିତ୍ସା, ତାକୁ ନେଇ ପ୍ରଶ୍ନ ଉଠିଛି ।
କେନ୍ଦ୍ରାପଡ଼ା ଛାତ୍ରୀ ଆତ୍ମାହୂତି ଘଟଣାର କ୍ରାଇମବ୍ରାଞ୍ଚ ତଦନ୍ତ ଦାବି କଲା ବିଜେଡ଼ି
ନନ୍ଦିଘୋଷ ବ୍ୟୁରୋ : କେନ୍ଦ୍ରାପଡ଼ା ଛାତ୍ରୀ ଆତ୍ମାହୂତି ଘଟଣାର କ୍ରାଇମବ୍ରାଞ୍ଚ ତଦନ୍ତ ଦାବି କରିଛି ବିଜେଡି । ଦଳର ବରିଷ୍ଠ ନେତା ତଥା ଆଳି ବିଧାୟକ ପ୍ରତାପ ଦେବ, ଯଦି ପୋଲିସ ଆରମ୍ଭରୁ ପଦକ୍ଷେପ ନେଇଥାନ୍ତା,ଆଜି ସେହି ଛାତ୍ରୀ ଜଣକ ଜୀବିତ ଥାଆନ୍ତେ । ପୋଲିସ ଏତଲା ରଖିଲା ନାହିଁ । ମାମଲାକୁ ଖାମଖିଆଲି ଭାବେ ନେଇ ଅଶ୍ଲୀଳ ଭିଡିଓ ଡିଲିଟ କରିବାକୁ ଓ ମୋବାଇଲ ସ୍ଵିଚ୍ ଅପ୍ କରିବାକୁ କହି ଚୁପ୍ ବସିଲା। ଯଦି ଆରମ୍ଭରୁ ଆକ୍ସନ ନେଇଥାନ୍ତା, ତେବେ ଏତେ ବଡ଼ ଅଘଟଣ ଘଟିନଥାନ୍ତା। ଘଟଣା ପାଇଁ ପୋଲିସ ପ୍ରଶାସନକୁ ଦାୟୀ କରିଛନ୍ତି ବିଜେଡି। ଏହା ସହିତ ଆଇନ ଶୃଙ୍ଖଳା ପାଇଁ ରାଜ୍ୟ ସରକାରଙ୍କ ଉପରେ ବର୍ଷିଛି ଦଳ। ବର୍ତ୍ତମାନ ଚାଲିଆଡ଼େ, ସାରା ରାଜ୍ୟରେ ନାରୀ ହିଂସା ବଢ଼ିଛି । ଦୁଷ୍କର୍ମ ବଢ଼ିଛି । ଏଥିରୁ ଲାଗୁଛି ରାଜ୍ୟରେ ଆଇନ ଶୃଙ୍ଖଳା ନାହିଁ। ପୋଲିସ ଅପାରଗ ପାଲଟି ଯାଇଛି । ଉପଯୁକ୍ତ ପଦକ୍ଷେପ ନେଇ ଲୋକଙ୍କୁ ସୁରକ୍ଷା ଦେବାକୁ ଡିଜିପିଙ୍କ ନିକଟରେ ଦାବି କରିଛି ବିଜେଡି।
ଚାଷୀଙ୍କ ସ୍ବାର୍ଥ ରକ୍ଷାରେ ବୁଝାମଣା ହେବନି : ମୋଦି
ନନ୍ଦିଘୋଷ ବ୍ୟୁରୋ : ଟ୍ରମ୍ପଙ୍କ ଟାରିଫ ଧମକ ଭିତରେ ମୋଦିଙ୍କ ବଡ ବୟାନ । ଆମେରିକା ଭାରତ ଉପରେ ୫୦ ପ୍ରତିଶତ ଟାରିଫ୍ ଲାଗୁ ପରେ ପ୍ରଥମ ଥର ପାଇଁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଯେ ଭାରତ ଚାଷୀଙ୍କ ସ୍ୱାର୍ଥ ସହିତ କୌଣସି ପ୍ରକାରର ସାଲିସ କରିବ ନାହିଁ । ସେ ପଶୁପାଳନ ଚାଷୀ ଏବଂ ମତ୍ସ୍ୟଜୀବୀଙ୍କ ସ୍ୱାର୍ଥକୁ ଯେକୌଣସି ମୂଲ୍ୟରେ ବି ସୁରକ୍ଷା ଦେବେ । ସେ ଏହା ମଧ୍ୟ କହିଛନ୍ତି ଯେ ଏଥିପାଇଁ ଡୋନାଲଡ୍ ଟ୍ରମ୍ପଙ୍କୁ ବ୍ୟକ୍ତିଗତ ଭାବରେ ଏକ ବଡ଼ ମୂଲ୍ୟ ଦେବାକୁ ପଡିବ । ଦୀର୍ଘ ସମୟ ଧରି, ଆମେରିକା ରାଷ୍ଟ୍ରପତି ଭାରତ ବିରୁଦ୍ଧରେ ଶୁଳ୍କ ଲାଗୁ କରିବା ବିଷୟରେ ବାରମ୍ବାର କଥା ହୋଇଆସୁଛନ୍ତି । ଏହି ମାସ ଆରମ୍ଭରେ, ଆମେରିକା ଭାରତ ଉପରେ 25 ପ୍ରତିଶତ ଶୁଳ୍କ ଲାଗୁ କରିବା ବିଷୟରେ କଥା ହୋଇଥିଲା ।
ତା’ପରେ ଗତକାଲି ରାତିରେ ସେ ଭାରତ ଉପରେ ୫୦ ପ୍ରତିଶତ ଶୁଳ୍କ ଘୋଷଣା କଲେ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାରମ୍ବାର ବକ୍ତବ୍ୟ ସତ୍ତ୍ୱେ, ଭାରତ ଏହି ପ୍ରସଙ୍ଗରେ କୌଣସି ସାର୍ବଜନୀନ ବିବୃତ୍ତି ଦେବାରୁ ନିବୃତ୍ତ ରହିଛି । ଭାରତ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଚେଷ୍ଟା କରିଥିଲା । ଆମେରିକା ସହିତ ଏକ ବାଣିଜ୍ୟ ଚୁକ୍ତି ଉପରେ ଗମ୍ଭୀର ଆଲୋଚନା ହୋଇଥିଲା, କିନ୍ତୁ ଡୋନାଲ୍ଡ ଟ୍ରମ୍ପ ପ୍ରଶାସନର ଆମେରିକା ପାଇଁ ଦୁଗ୍ଧ ଏବଂ କୃଷି କ୍ଷେତ୍ର ଖୋଲିବା ଦାବି ଉପରେ ଆଲୋଚନା ଭାଙ୍ଗିଗଲା । ଭାରତ ସ୍ପଷ୍ଟ କରିଦେଲା ଯେ ସେ କୌଣସି ମୂଲ୍ୟରେ ଏହି କ୍ଷେତ୍ର ଖୋଲିପାରିବ ନାହିଁ । ଭାରତର ପ୍ରାୟ ୬୦ ପ୍ରତିଶତ ଜନସଂଖ୍ୟା ଏହି କ୍ଷେତ୍ର ଉପରେ ନିର୍ଭର କରନ୍ତି । ଯଦି ଏହି କ୍ଷେତ୍ର ଆମେରିକା ପାଇଁ ଖୋଲାଯାଏ, ତେବେ ଏହି କ୍ଷେତ୍ରର ଚାଷୀ, ମତ୍ସ୍ୟଜୀବୀ ଏବଂ ପଶୁପାଳନ ଚାଷୀଙ୍କ ସ୍ୱାର୍ଥ ଗୁରୁତର ଭାବରେ ପ୍ରଭାବିତ ହେବ ।
ଏମଏସ ସ୍ୱାମୀନାଥନଙ୍କ ଜନ୍ମ ଶତବାର୍ଷିକୀ ପାଳନ
ଦେଶରେ ସବୁଜ ବିପ୍ଳବର ଜନକ ଏମ୍ ଏସ୍ ସ୍ୱାମୀନାଥନଙ୍କ ଶତବାର୍ଷିକୀ ଜନ୍ମବାର୍ଷିକୀରେ ଆୟୋଜିତ ଏକ ଅନ୍ତର୍ଜାତୀୟ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଆମ ପାଇଁ ଆମ ଚାଷୀଙ୍କ ସ୍ୱାର୍ଥ ସର୍ବୋପରି । ଭାରତ କେବେବି ଏହାର ଚାଷୀ, ମତ୍ସ୍ୟଜୀବୀ ଏବଂ ଦୁଗ୍ଧ ଚାଷୀଙ୍କ ସ୍ୱାର୍ଥ ସହିତ ସାଲିସ କରିବ ନାହିଁ । ମୁଁ ବ୍ୟକ୍ତିଗତ ଭାବରେ ଜାଣେ ଯେ ଏଥିପାଇଁ ମୋତେ ବହୁତ ମୂଲ୍ୟ ଦେବାକୁ ପଡିବ । କିନ୍ତୁ, ମୁଁ ଏଥିପାଇଁ ପ୍ରସ୍ତୁତ । ଆଜି ଭାରତ ଏହାର ଚାଷୀ, ମତ୍ସ୍ୟଜୀବୀ ଏବଂ ଦୁଗ୍ଧ ଚାଷୀଙ୍କ ପାଇଁ ପ୍ରସ୍ତୁତ ।
ଭାରତକୁ ଟାରିଫ ଜାଲରେ ଫସାଇବା ପରେ ମୁନିରଙ୍କୁ ଫୋନ କଲେ ଟ୍ରମ୍ପ
ନନ୍ଦିଘୋଷ ବ୍ୟୁରୋ : ଭାରତ ଏବଂ ଆମେରିକା ମଧ୍ୟରେ ଟାରିଫକୁ ନେଇ ଉତ୍ତେଜନା ବୃଦ୍ଧି ପାଇବାରେ ଲାଗିଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୫୦ ପ୍ରତିଶତ ଶୁଳ୍କ ଘୋଷଣା କରିଛନ୍ତି। ଏହାରି ମଧ୍ୟରେ, ଆମେରିକା ଏବଂ ପାକିସ୍ତାନ ନିକଟତର ହେଉଥିବା ପରି ମନେ ହେଉଛି। ପାକିସ୍ତାନ ସେନା ମୁଖ୍ୟ ଅସୀମ ମୁନିର ଦ୍ୱିତୀୟ ଥର ପାଇଁ ଆମେରିକା ଗସ୍ତ କରିବାକୁ ଯାଉଛନ୍ତି। ପାକ୍ ନ୍ୟୁଜ୍ ୱେବସାଇଟ୍ ଡନ୍ ର ଏକ ରିପୋର୍ଟ ଅନୁଯାୟୀ, ମୁନିର ଚଳିତ ବର୍ଷ ଅଗଷ୍ଟ ମାସର ଶେଷ ସପ୍ତାହରେ ୱାଶିଂଟନ ଗସ୍ତ କରିପାରନ୍ତି।
ଅସୀମ ମୁନିର ଅପରେସନ ସିନ୍ଦୂର ପରେ ମଧ୍ୟ ଆମେରିକା ଗସ୍ତ କରିଥିଲେ । ଏବେ ସେ ପୁଣି ଥରେ ପ୍ରସ୍ତୁତି କରୁଛନ୍ତି । ଏହା ଆମେରିକା ଏବଂ ପାକିସ୍ତାନ ମଧ୍ୟରେ ଦ୍ୱିପାକ୍ଷିକ ସମ୍ପର୍କକୁ ଗଭୀର କରିବାର ଏକ ସଙ୍କେତ ହୋଇପାରେ । ରିପୋର୍ଟ ଅନୁଯାୟୀ, ମୁନିର ଆମେରିକା ସେନା ଜେନେରାଲ ଏବଂ ଯୁକ୍ତରାଷ୍ଟ୍ର କେନ୍ଦ୍ରୀୟ କମାଣ୍ଡର ମାଇକେଲ କୁରିଲାଙ୍କ ବିଦାୟ ସମାରୋହରେ ଅଂଶଗ୍ରହଣ କରିବେ। ମୁନିର ଏହି କାରଣରୁ ୱାଶିଂଟନ ଯାଉଛନ୍ତି।
ଆମେରିକୀୟ ଜେନେରାଲ ପାକିସ୍ତାନକୁ କାହିଁକି ପ୍ରଶଂସା କଲେ?
ଆମେରିକାର ଭୟଙ୍କର ସେନା ଜେନେରାଲ କୁରିଲା ମଧ୍ୟପ୍ରାଚ୍ୟରେ ତାଙ୍କ ସେନାର ନେତୃତ୍ୱ ନେଇଛନ୍ତି । ସେ ଏହି ମାସରେ ଅବସର ନେଉଛନ୍ତି । ‘ ଦି ହିନ୍ଦୁ’ରେ ପ୍ରକାଶିତ ଏକ ରିପୋର୍ଟ ଅନୁଯାୟୀ , କିଛି ମାସ ପୂର୍ବରୁ ପାଞ୍ଚ ଜଣ ISIS ଆତଙ୍କବାଦୀଙ୍କୁ ଧରିବା ପାଇଁ କୁରିଲା ପାକିସ୍ତାନର ପ୍ରଶଂସା କରିଥିଲେ। ସେ କହିଥିଲେ ଯେ ଆମେରିକା ଦ୍ୱାରା ପ୍ରଦାନ କରାଯାଇଥିବା ତଥ୍ୟ ଆଧାରରେ ପାକିସ୍ତାନ ଆତଙ୍କବାଦୀଙ୍କୁ ଧରାଇବାରେ ଏକ ମହାନ କାମ କରିଛି।
ମୁନିର–ଟ୍ରମ୍ପ୍ ସାକ୍ଷାତକୁ ହ୍ୱାଇଟ୍ ହାଉସ୍ କିପରି ପ୍ରତିକ୍ରିୟା ଦେଇଥିଲା?
ମୁନିର ଚଳିତବର୍ଷଜୁନ୍ମାସରେଆମେରିକାଗସ୍ତକରିଥିଲେ । ସେ ଟ୍ରମ୍ପଙ୍କ ସହିତ ମଧ୍ୟାହ୍ନଭୋଜନ ମଧ୍ୟ କରିଥିଲେ, ଯାହା ବିଷୟରେ ବହୁତ ଆଲୋଚନା ହୋଇଥିଲା ।ଟ୍ରମ୍ପ ଏବଂ ମୁନିରଙ୍କ ମଧ୍ୟରେ ପ୍ରାୟ ଦୁଇ ଘଣ୍ଟା ଧରି ବୈଠକ ହୋଇଥିଲା। ହ୍ୱାଇଟ୍ ହାଉସର ସୂଚନା ଯେ ଟ୍ରମ୍ପ ମୁନିରଙ୍କୁ ନିମନ୍ତ୍ରଣ କରିଥିଲେ । ସେ କହିଛନ୍ତି ଯେ ଟ୍ରମ୍ପ ଭାରତ ଏବଂ ପାକିସ୍ତାନ ମଧ୍ୟରେ ପରମାଣୁ ଯୁଦ୍ଧ ରୋକିବାକୁ ସୁପାରିଶ କରିଛନ୍ତି ।
ଖଣ୍ଡପଡ଼ା ଗଡ଼ର ରାଜା ବିଭୁତି ଭୂଷଣ ସିଂହ ମର୍ଦ୍ଦରାଜଙ୍କ ବିୟୋଗ
ନନ୍ଦିଘୋଷ ବ୍ୟୁରୋ : ପୂର୍ବତନ ଉପବାଚସ୍ପତି ତଥା ପୂର୍ବତନ ମନ୍ତ୍ରୀ ବିଭୂତି ଭୂଷଣ ସିଂହ ମର୍ଦ୍ଦରାଜଙ୍କ ପରଲୋକ । ଭୁବନେଶ୍ବରର ଏକ ଘରୋଇ ହସ୍ପିଟାଲରେ ତାଙ୍କର ବିୟୋଗ ହୋଇଛି। ମୃତ୍ୟୁ ବେଳକୁ ତାଙ୍କୁ ୭୦ ବର୍ଷ ବୟସ ହୋଇଥିଲା। ଗତ ରାତିରେ ତାଙ୍କର ବିୟୋଗ ହୋଇଛି। ହୃଦ୍ ଜନିତ ସମସ୍ୟା ଯୋଗୁଁ କିଛି ଦିନ ହେବ ସେ ଅସୁସ୍ଥ ଥିଲେ। ଖଣ୍ଡପଡ଼ା ଗଡ଼ର ରାଜା ଥିଲେ ବିଭୁତି ଭୂଷଣ ସିଂହ ମର୍ଦ୍ଦରାଜ। କଂଗ୍ରେସ ଦଳ ସହ ଦୀର୍ଘ ବର୍ଷ ଧରି ଜଡ଼ିତ ଥିଲେ ବିଭୁତି ଭୂଷଣ ମର୍ଦ୍ଦରାଜ। ସେ ୧୯୮୦, ୧୯୮୫ ଓ ୧୯୯୫ – ଏପରି ତିନି ଥର ଖଣ୍ଡପଡ଼ା ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ।
ବହୁଚର୍ଚ୍ଚିତ ବଳଙ୍ଗା ନାବାଳିକା ମୃତ୍ୟୁ ମାମଲାକୁ ନେଇ ପୁରୀରେ ବିଜେଡ଼ିର ହରତାଳ
ନନ୍ଦିଘୋଷ ବ୍ୟୁରୋ : ବହୁଚର୍ଚ୍ଚିତ ବଳଙ୍ଗା ନାବାଳିକା ମୃତ୍ୟୁର ପ୍ରତିବାଦ। ଏହା ସହ ରାଜ୍ୟରେ ବଢ଼ିଚାଲିଥିବା ନାରୀ ନିର୍ଯାତନାର ପ୍ରତିବାଦରେ ପୁରୀ ଜିଲ୍ଲା ବିଜେଡି ପକ୍ଷରୁ ଶାନ୍ତିପୂର୍ଣ୍ଣ ହରତାଳ। ସକାଳ ୬ଟା ରୁ ଦିନ ୧୨ଟା ପର୍ଯ୍ୟନ୍ତ ହରତାଳ କରାଯିବ। ବଳଙ୍ଗା ଛାତ୍ରୀମୃତ୍ୟୁ ମାମଲାର ତଦନ୍ତ ରିପୋର୍ଟ ସାର୍ବଜନୀନ କରାନଯାଇଥିବା ବେଳେ ଦୋଷୀକୁ ଧରିବାରେ ପୋଲିସ ସକ୍ଷମ ହୋଇପାରିନାହିଁ। ଓଡ଼ିଶାର ଆଇନ୍ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି । ରାଜ୍ୟରେ ଅପରାଧିକ କାର୍ଯ୍ୟକଳାପ ନିତିଦିନିଆ ଘଟଣା ହୋଇଯାଇଛି। ଦୁର୍ବଳ ତଦନ୍ତ ପ୍ରକ୍ରିୟା ଅପରାଧୀମାନଙ୍କୁ ଅଧିକ ଅପରାଧ କରିବା ପାଇଁ ପ୍ରୋତ୍ସାହିତ କରୁଛି । ଅବାଧ ନିଶା କାରବାର ରାଜ୍ୟସାରା କାୟା ବିସ୍ତାର କରିବାରେ ଲାଗିଛି । ସାରା ରାଜ୍ୟରେ ଅଶାନ୍ତି ଓ ବିଶୃଙ୍ଖଳିତ ବାତାବରଣ ଜନମାନସକୁ ଅସ୍ତବ୍ୟସ୍ତ କରିପକାଇଛି। ଏହି ଉଦ୍ବେଗଜନକ ପରିସ୍ଥିତିରେ ସରକାରଙ୍କ ଆଭିମୁଖ୍ୟକୁ ବିରୋଧ କରି ପୁରୀ ଜିଲ୍ଲା ବିଜୁ ଜନତା ଦଳ ପକ୍ଷରୁ ଶାନ୍ତିପୂର୍ଣ୍ଣ ହରତାଳ ଡାକରା ଦିଆଯାଇଛି।