ନୂଆଦିଲ୍ଲୀ: କରୋନା ସଙ୍କଟକୁ ଦୃଷ୍ଟିରେ ରଖି ରାଷ୍ଟ୍ରପତି ରାମନାଥ କୋବିନ୍ଦ ଏକ ବଡ଼ ନିଷ୍ପତ୍ତି ନେଇଛନ୍ତି । ରାଷ୍ଟ୍ରପତି ଭବନରୁ ସୂଚନା ମିଳିଛି ଯେ, ରାଷ୍ଟ୍ରପତି ତାଙ୍କର ମାସକର ଦରମା ପିଏମ କେୟାର ଫଣ୍ଡକୁ ଦେଉଛନ୍ତି ଏବଂ ସେ ତାଙ୍କ ବେତନର ୩୦ ପ୍ରତିଶତ ବର୍ଷେ ପାଇଁ ଦାନ କରିବେ । ଏହା ସହିତ ଅନ୍ୟ କେତେଗୁଡ଼ିଏ ପ୍ରସ୍ତାବ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି।

ରାଷ୍ଟ୍ରପତି ରାମନାଥ କୋବିନ୍ଦ କିଣିବେନି ନୂଆ କାର

ରାଷ୍ଟ୍ରପତି ଭବନ ପକ୍ଷରୁ ଦିଆଯାଇଥିବା ସୂଚନାରେ, ରାଷ୍ଟ୍ରପତି କୋବିନ୍ଦ ଏକ ଲିମୋଜିନ୍ କାର କିଣିବାର ପ୍ରସ୍ତାବକୁ ମଧ୍ୟ ସ୍ଥଗିତ ରଖିଛନ୍ତି । ସୂଚନା ଅନୁସାରେ ରାଷ୍ଟ୍ରପତି ରାମ ନାଥ କୋବିନ୍ଦଙ୍କ ପାଇଁ ଚଳିତ ବର୍ଷ ଏକ ନୂଆ ଲିମୋଜିନ୍ କିଣିବାକୁ ନିଷ୍ପତ୍ତି ନିଆଯାଇଥିଲା । କାରଣ ସେ ବର୍ତ୍ତମାନ ସୁଦ୍ଧା ମର୍ସିଡିଜ୍-ବେଞ୍ଜ୍ ଏସ୍ କ୍ଲାସ୍ (S600) ପୁଲମାନ୍ ଗାର୍ଡର ପୁରୁଣା ମଡେଲ୍ ବ୍ୟବହାର କରୁଛନ୍ତି । ସେଥିପାଇଁ ୨୦୨୧ ଗଣତନ୍ତ୍ର ଦିବସ ଅବସରରେ ସେ ଏକ ନୂତନ ଲିମୋଜିନ୍ କାରରେ ପ୍ୟାରେଡରେ ଆସିବାର ଥିଲା କିନ୍ତୁ କରୋନା ସଙ୍କଟ କାରଣରୁ ଏହାକୁ ବାତିଲ କରିଦିଆଯାଇଛି । କେବଳ ଏତିକି ନୁହେଁ, ରାଷ୍ଟ୍ରପତି ଭବନର କର୍ମଚାରୀଙ୍କୁ ଖର୍ଚ୍ଚ କମ୍ କରିବାକୁ ଏବଂ ବାକି ଟଙ୍କାକୁ କୋଭିଡ -୧୯ ବିରୋଧରେ ଲଢେଇ ପାଇଁ ଦାନ କରିବାକୁ  କୁହାଯାଇଛି ।

ରାଷ୍ଟ୍ରପତି ଭବନରେ ଅଧିକ ଖର୍ଚ୍ଚ ହେବ ନାହିଁ

କୋଭିଡ -୧୯ ସଙ୍କଟ ସମୟରେ ବହୁ ପଦକ୍ଷପ ନିଆଯାଉଛି । ଯେମିତିକି ଭୋଜିରେ କମ୍ ଅତିଥି, ଫୁଲର କମ୍ ବ୍ୟବହାର ସହ ଖାଦ୍ୟ ପ୍ରକାରକୁ କମାଇଦିଆଯିବାର ପଦକ୍ଷେପ ନିଆଯାଇଛି । ଏଥି ସହିତ ସାମାଜିକ ଦୂରତା ବଜାୟ ରଖିବା ଏବଂ ଖର୍ଚ୍ଚ କମାଇବା ପାଇଁ ରାଷ୍ଟ୍ରପତିଙ୍କୁ ଘରୋଇ ପରିଦର୍ଶନ କମାଇବା ଏବଂ କମ୍ କାର୍ଯ୍ୟକ୍ରମରେ ଅଂଶଗ୍ରହଣ କରିବାକୁ କୁହାଯାଇଛି । ରାଷ୍ଟ୍ରପତି ଭବନରେ କୁହାଯାଇଛି ଯେ, ଆମେ କୌଣସି ଅତିଥିଙ୍କ ସେବାରେ ସ୍ୱାଗତରେ କୌଣସି ଅଭାବ ରଖିବୁ ନାହିଁ, କିନ୍ତୁ ବର୍ତ୍ତମାନ ବେଶି ସୋ ଅଫ୍ କରାଯିବ ନାହିଁ ।

ବଢି ଚାଲିଛି କରୋନା ସଂକ୍ରମଣ

କରୋନା ଭାଇରସ୍ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ଲାଗିଛି ଏବଂ ଗତ ୨୪ ଘଣ୍ଟା ମଧ୍ୟରେ ୩୭୨୨ ଟି ନୂତନ କରୋନା ସଂକ୍ରମଣ ରିପୋର୍ଟ ଆସିଛି ଯାହା ଦ୍ୱାରା ସଂକ୍ରମିତଙ୍କ ସଂଖ୍ୟା ୭୮୦୦୩ ରେ ପହଞ୍ଚିଛି ଏବଂ ୧୩୪ ଜଣଙ୍କର ହୋଇଛି ଯାହାଦ୍ୱାରା ମୃତ୍ୟୁ ସଂଖ୍ୟା ୨୫୪୯ରେ ପହଞ୍ଚିଛି । ସଂକ୍ରମିତଙ୍କ ସଂଖ୍ୟା ୭୮ ହଜାର ଅତିକ୍ରମ କରିବା ପରେ, ୫୦ ହଜାରରୁ ଅଧିକ ସଂକ୍ରମଣ ଥିବା ଦେଶ ତାଲିକାରେ ଭାରତ ଦ୍ୱାଦଶ ସ୍ଥାନରେ ପହଞ୍ଚିଛି ।

ନୂଆଦିଲ୍ଲୀ: କରୋନା ଭାଇରସ୍ ମହାମାରୀର ପ୍ରକୋପ କମିବାର ନାଁ ନେଉ ନାହିଁ । କରୋନା ପାଇଁ ସାଧାରଣ ଜୀବନ ଶୈଳୀରେ ବହୁ ପ୍ରଭାବ ପଡ଼ିଛି । ଏହାସହ ଆମ କାର୍ଯ୍ୟକଳାପରେ ମଧ୍ୟ ପରିବର୍ତ୍ତନ ଆସିଛି । ବେସରକାରୀ ଅଫିସ୍ ସହ ଏହି ସମୟରେ ଭାରତ ସରକାରଙ୍କର କେତେକ ମନ୍ତ୍ରାଳୟ ମଧ୍ୟ ୱାର୍କ୍ ଫର୍ମ ହୋମ ମାଧ୍ୟମରେ ଅଫିସ କାମ କରୁଛନ୍ତି । ଏମିତିରେ ସରକାରଙ୍କ ତରଫରୁ ଏନେଇ ନୂଆ ଗାଇଡ଼ଲାଇନ ଜାରିକରାଯାଇଛି । ଏହି ଗାଇଡଲାଇନ ଜରିଆରେ କର୍ମଚାରୀମାନଙ୍କୁ ଘରୁ ହିଁ କାମ କରିବାକୁ ପଡ଼ିବ ।

ସରକାରଙ୍କ ଦ୍ୱାରା ଜାରି କରାଯାଇଥିବା ଗାଇଡଲାଇନ୍ସରେ କୁହାଯାଛି ଯେ, ସବୁ ୭୫ପ୍ରତିଶତ ମନ୍ତ୍ରାଳୟ ଇ-ଅଫିସ ଜରିଆରେ ଚାଲିଛି ।  ଏବେ ମନ୍ତ୍ରାଳୟର ପ୍ରାୟ ୮୦ ପ୍ରତିଶତ କାମ ଏହା ମାଧ୍ୟମରେ ହିଁ କରାଯାଉଛି । ତେଣୁ ଏହି ଅନୁସାରେ ଇ-ଅଫିସ ଜରିଆରେ ହିଁ ସବୁ ଫାଇଲଗୁଡିକୁ ପଠାଯିବ ।  ବିପିଏନ ଏବଂ ସୁରକ୍ଷିତ ନେଟୱର୍କର ବ୍ୟବସ୍ଥା ଡେପୁଟି ସେକ୍ରେଟରୀ ସ୍ତରର ଅଧିକରୀମାନଙ୍କ ପାଇଁ କରାଯିବ ।

ଗାଇଡଲାଇନ ଅନୁସାରେ, ମନ୍ତ୍ରାଳୟ ଗୁଡ଼ିକ ନିଜେ କମ୍ପ୍ୟୁଟର ଏବଂ ଲାପଟପର ବ୍ୟବସ୍ଥା କରିବେ । ଯେବେ ଆବଶ୍ୟକତା ପଡ଼ିବ ସେବେ ସେ ଲଜିଷ୍ଟିକର ସହାୟତା ନେଇପାରିବେ । ସବୁ କାର୍ଯ୍ୟର ସୂଚନା ପାଇବା ପାଇଁ ଇ-ଅଫିସକୁ ଏସଏମଏସ ଏବଂ ଇ-ମେଲ ଦ୍ୱାରା ଯୋଡ଼ା ଯିବ । ଘରୁ କାମକରିବା ପାଇଁ ଯେମିତି କିଛି ଅସୁବିଧା ନ ହୁଏ ସେଥିପାଇଁ ସବୁ ଫାଇଲ୍ ଏବଂ ଫୋଲ୍ଡର ଇ-ଅଫିସରେ ଅପଲୋଡ ହୋଇ ରହିବ । ଯଦି ଗୋଟେ ମନ୍ତ୍ରାଳୟରୁ ଆଉ ଏକ ମନ୍ତ୍ରାଳୟକୁ କୌଣସି ଫାଇଲକୁ ପଠାଯିବାର ଥିବ ତାହାକୁ କେବଳ ଇ-ଅଫିସ୍ ଜରୀଆରେ ହିଁ ପଠାଯିବ ଆବଶ୍ୟକ ।

ସେହିଭଳି, ଯଦି ଅତି ଜରୁରୀ  ମେଲ ଅଛି, ତେବେ ଏହାକୁ ଇ-ଅଫିସକୁ ସ୍ଥାନାନ୍ତର କରାଯାଇପାରିବ । ଯାହାଫଳରେ ଏହାର ରେକର୍ଡ ବଜାୟ ରହିବ । DOPT ମନ୍ତ୍ରଣାଳୟର କର୍ମଚାରୀମାନେ ମଧ୍ୟ ବର୍ଷକୁ ୧୫ ଦିନ ଘରୁ କାର୍ଯ୍ୟ କରିବାର ସୁବିଧା ପାଇବେ । ଘରୁ କାମ କରୁଥିବା କର୍ମଚାରୀମାନେ ଅଫିସ୍ ସମୟ ଅନୁଯାୟୀ ଫୋନରେ ଉପଲବ୍ଧ ହେବେ । ଘରୁ କାମ କରୁଥିବା ଅଧିକାରୀଙ୍କ ପାଇଁ ମନ୍ତ୍ରଣାଳୟ ସେମାନଙ୍କୁ ଟେକ୍ନିକାଲ ସହାୟତା ଡେସ୍କ ପ୍ରସ୍ତୁତ କରିବ । ଭିଡିଓ କନଫରେନ୍ସିଂ ଲିଙ୍କ୍ ମାଧ୍ୟମରେ ସମସ୍ତ ପ୍ରକାରର ବୈଠକ ବ୍ୟବସ୍ଥା କରାଯିବ । ସମସ୍ତ କର୍ମଚାରୀଙ୍କୁ ଇ-ଅଫିସ୍ ସମ୍ବନ୍ଧରେ ଦିଆଯାଇଥିବା ନିର୍ଦ୍ଦେଶାବଳୀ ଅନୁସରଣ କରିବାକୁ ପଡିବ ।