ନୂଆଦିଲ୍ଲୀ: ବଲିଉଡର ବହୁ ଚର୍ଚ୍ଚିତ ଅଭିନେତା ସ୍ୱର୍ଗତ ଅମରେଶ ପୁରୀ ୨୨ ଜୁନ ୧୯୩୨ ମସିହାରେ ଜନ୍ମ ଗ୍ରହଣ କରିଥିଲେ । ଅମରେଶ ପୁରୀଙ୍କ ମୃତ୍ୟୁକୁ ୧୫ ବର୍ଷ ପୁରିସାରିଥିଲେ ମଧ୍ୟ ତାଙ୍କ ଅଭିନୟକୁ ଆଜି ପର୍ଯ୍ୟନ୍ତ ଦର୍ଶକ ମନେପକାଉଛନ୍ତି ।
ଅମରେଶ ପୁରୀ ବଲିଉଡରେ ଭିଲେନ ଭାବରେ ଖୁବ୍ ଜଣାଶୁଣା । ସେ ବଲିଉଡରେ ବଡ଼ ବଡ଼ ଚଳଚିତ୍ରରେ ଭିଲେନ ଭାବରେ ଖୁବ ସୁନ୍ଦର ଅଭିନୟ କରିଛନ୍ତି । ଅଭିନେତା ଜଣଙ୍କ କେତେବଳେ ମୋଗାମ୍ବୋ ହୋଇ ଲୋକଙ୍କୁ ଡରାଇଛନ୍ତି ତ ପୁଣି କେତେବେଳେ ଦାମିନୀ ଚଳଚିତ୍ରରେ ଚଡଢ଼ା ହୋଇ ଲୋକଙ୍କ ପ୍ରଂଶସା ସାଉଁଟିଛନ୍ତି । ଏମିତି କିଛି ଥିଲା ଅମରେଶ ପୁରୀଙ୍କ ଚଳଚିତ୍ର ଜଗତରେ ଯାତ୍ରା ।
କିନ୍ତୁ ଯେଉଁ ଅମରେଶ ପୁରୀଙ୍କୁ ଆମେ ଜଣେ ଭିଲେନ୍ ଭାବରେ ଜାଣିଛୁ, ବାସ୍ତବରେ ସେ ୨୧ ବର୍ଷ ଧରି ଆଉ ଏକ କାମ କରୁଥିଲେ । ଆଜ୍ଞା ହଁ, ଅମରେଶ ପୁରୀ ଦୁଇ ଦଶନ୍ଧି ଧରି ବଲିଉଡରୁ ଦୂରରେ ଥିଲେ । ସେ ନିଜ ଜୀବନର ୨୧ ବର୍ଷ ବୀମା ନିଗମରେ କର୍ମଚାରୀ ଥିଲେ । ଅମରେଶଙ୍କୁ ଅଭିନୟ କରିବାର ଇଚ୍ଛା ତ ଥିଲା କିନ୍ତୁ ତାଙ୍କୁ ଅଧିକ ସୁଯୋଗ ମିଳିପାରୁନଥିଲା ।
ତାପରେ ଅମରେଶ ପୁରୀଙ୍କ ଜୀବନରେ ଆସିଲେ ଇବ୍ରାହୀମ ଇଲ୍କାଜୀ ଯିଏ କି ଅମରେଶଙ୍କୁ ଥିଏଟର ଦୁନିଆ ସହିତ ପରିଚିତ କରାଇଲେ । ଏହି ସମୟରେ ଅମରେଶ ପୁରୀ ଅନେକ ଚମତ୍କାର ପ୍ଲେ’ରେ କାମ କରିଛନ୍ତି । କିନ୍ତୁ ଥିଏଟର କରିବା ପରେ ମଧ୍ୟ ଅମରେଶଙ୍କୁ ବଲିଉଡରେ ସୁଯୋଗ ମିଳିପାରୁନଥିଲା ।
ତା’ ପରେ ଅମରେଶ ପୁରାଙ୍କ ଜୀବନକୁ ଆସିଲେ ସତ୍ୟଦେବ ଦୁବେ । ସତ୍ୟଦେବ ଦୁବେ ସେହି ସମୟର ଜଣେ ବିଖ୍ୟାତ ଅଭିନେତା, ଲେଖକ ଏବଂ ନିର୍ଦ୍ଦେଶକ ଥିଲେ । ଅତି କମ୍ ବୟସରେ ସେ ଏତେମାତ୍ରାରେ ସଫଳତା ପାଇଥିଲେ ଯେ ସମସ୍ତେ ତାଙ୍କ ପ୍ରଂଶସା କରୁଥିଲେ । କିନ୍ତୁ ଅମରେଶ ପୁରୀ ସତ୍ୟଦେବଙ୍କ ତୁଳନାରେ ବୟସରେ ବହୁତ ବଡ଼ଥିଲେ । ସେ ନିଜ କରିୟରରେ ନିଜଠାରୁ ବୟସରେ ସାନ ବ୍ୟକ୍ତିଙ୍କୁ ନିଜ ଗୁରୁ ବୋଲି ମାନିଥିଲେ ।
ଅମରେଶ ବହୁ ସମୟ ଧରି ସତ୍ୟଦେବଙ୍କ ସାଙ୍ଗରେ ଜଣେ ସହାୟକ ରୂପରେ କାମ କରିଥିଲେ । ଏହି ସମୟ ଠାରୁ ଅମରେଶଙ୍କ ଜୀବନର ନୂତନ ଅଧ୍ୟାୟ ଆରମ୍ଭ ହେଲା ଏବଂ ସେ ବଲିଉଡରେ ପାଦ ଥାପିଥିଲେ । ୧୯୭୧ ମସିହାରେ ରେଶମା ଏବଂ ଶେରା ନାମକ ଦୁଇ ଚଳଚିତ୍ରରେ ଅମରେଶ ପୁରୀଙ୍କ ଅଭିନୟକୁ ସମସ୍ତେ ଖୁବ ପ୍ରଶଂସା କରିଥିଲେ ।
ଏହାପରେ ଅମରେଶ କେବେ ପଛକୁ ଦେଖିନାହାନ୍ତି ଅମରେଶ ପୁରୀ ବଲିଉଡର ପ୍ରାୟ ଅନେକ ବଡ଼ ବଡ଼ ଚଳଚିତ୍ରରେ ଜଣେ ଭିଲେନ ଚରିତ୍ରରେ ଦର୍ଶକଙ୍କ ହୃଦୟ ଜିତିବାରେ ସଫଳ ହୋଇଛନ୍ତି ।
