ବେଙ୍ଗାଲୁରୁ: ରିଲ କରୁ କରୁ ଚାଲିଗଲା ଜୀବନ। ବେଙ୍ଗାଲୁରୁରେ ଘଟିଲା ଅଘଟଣ। ପାରାପ୍ପାନା ଅଗ୍ରାହାରାସ୍ଥିତ ଏକ ନିର୍ମାଣାଧୀନ ବହୁତଳ କୋଠାରୁ ଖସିପଡି ପ୍ରାଣ ହରାଇଛନ୍ତି ଜଣେ ୨୦ ବର୍ଷ ବୟସ୍କା ଯୁବତୀ। ସେ ୧୩ତମ ମହଲାରୁ ଖସିପଡ଼ି ହରାଇଛନ୍ତି ଜୀବନ। ପୋଲିସ ସୂତ୍ରରୁ ପ୍ରକାଶ, ଗତକାଲି ବିଳମ୍ବିତ ରାତିରେ କିଛି ଯୁବକ ଓ ଯୁବତୀ ୧୩ତମ ମହଲାକୁ ଯାଇଥିଲେ। ତେବେ ସେଠାରେ ରିଲେସନସିପ ପ୍ରସଙ୍ଗ ନେଇ ସେମାନଙ୍କ ମଧ୍ୟରେ ବିବାଦ ଉପୁଜିଥିଲା। ଏଥିରେ ଉତ୍ତ୍ୟକ୍ତ ହୋଇ ଯୁବତୀଜଣକ ଏକ ସ୍ୟାଡ ରିଲ ସୁଟିଂ କରୁଥିଲେ। ତେବେ ଲିଫ୍ଟ ଲାଗି ରହିଥିବା ଖୋଲାସ୍ଥାନରେ ସେ ତଳକୁ ଖସିପଡିଥିଲେ। ମୃତକଙ୍କ ଘରହେଉଛି ବିହାରେ। ସେ ବେଙ୍ଗାଲୁରୁର ଏକ ସପିଙ୍ଗ ମାର୍ଟରେ କାମ କରୁଥିଲେ। ଏହି ଘଟଣା ପରେ ସମସ୍ତେ ସେଠାରୁ ପଳାଇଯାଇଥିଲେ। ଡିସିପି ଫତିମା କହିଛନ୍ତି- ସେମାନେ କୋଠା ଉପରେ ପାର୍ଟି କରୁଥିଲେ। ପରେ ସେମାନେ ରିଲ୍ସ ସୁଟିଂ କରିବା ଲାଗି ଯୋଜନା କରିଥିଲେ। ସେଠାରେ ଯୁବତୀଙ୍କ ଗୋଡ଼ ଖସିଯିବାରୁ ସେ ପ୍ରାଣ ହରାଇଥିଲେ। ଏହି ଘଟଣାର ତଦନ୍ତ ଜାରି ରହିଛି।
ମିଲର ଦାମ୍ ୫ ହଜାର ଟଙ୍କା: ପାର୍ଲାମେଣ୍ଟ ଏଷ୍ଟିମେଟ କମିଟି ବୈଠକରେ ଖାନାପିନାକୁ ନେଇ ବିବାଦ
ମୁମ୍ବାଇ: ମୁମ୍ବାଇରେ ଆୟୋଜିତ ପାର୍ଲାମେଣ୍ଟ ଏଷ୍ଟିମେଟ କମିଟି ବୈଠକରେ ଖାନାପିନାକୁ ନେଇ ବିବାଦ । ବୈଠକରେ ଉପସ୍ଥିତ ଥିବା ସଦସ୍ୟଙ୍କ ଲାଗି ଲାଭିସ୍ ପାର୍ଟି ଆୟୋଜିତ ହୋଇଥିବା ଅଭିଯୋଗ ହୋଇଛି । ଏହାକୁ ନେଇ ବିଜେପି, ଏନସିପି, ଶିବସେନା ମେଣ୍ଟ ସରକାର ଉପରେ କଂଗ୍ରେସ ଓ ସାମାଜିକ କର୍ମୀ ପ୍ରଶ୍ନ ଉଠାଇଛନ୍ତି । ମୁମ୍ବାଇର ବିଧାନ ଭବନ ପରିସରରେ ଆୟୋଜିତ ଏହି ଦୁଇ ଦିନିଆ ବୈଠକରେ ଯୋଗଦେଇଥିଲେ ୬୦୦ ଅତିଥି । ଏହାକୁ ଉଦଘାଟନ କରିଥିଲେ ଲୋକସଭା ବାଚସ୍ପତି ଓମ୍ ବିରଲା । ତେବେ ଅତିଥିମାନଙ୍କୁ ଯେଉଁ ମିଲ୍ ଦିଆଯାଇଥିଲା ତାହାର ଦାମ୍ ଥିଲା ୫ ହଜାର ଟଙ୍କା । ଏପରିକି ସିଲଭର ପ୍ଲେଟଗୁଡିକର ଭଡ଼ା ଗୋଟା ପିଛା ୫୫୦ ଟଙ୍କା ଥିଲା ବୋଲି ଅଭିଯୋଗ ହୋଇଛି । ମହାରାଷ୍ଟ୍ରରେ ଆର୍ଥିକ ସଙ୍କଟ ଜାରି ରହିଥିବାବେଳେ ଏହି ବ୍ୟୟବହୁଳ କାର୍ଯ୍ୟକ୍ରମ କାହିଁକି ବୋଲି ପ୍ରଶ୍ନ କରିଛନ୍ତି କଂଗ୍ରେସ ବିଧାୟକ ଦଳ ନେତା ବିଜୟ ଓ୍ବାଦେତିଓ୍ବାର । ଚାଷୀମାନଙ୍କୁ ଋଣ ଛାଡ଼ କରାଯାଉ ନଥିବାବେଳେ ଅତିଥିଙ୍କ ଲାଗି ଏତେ ବ୍ୟୟବହୁଳ ମିଲ୍ କଣ ପାଇଁ ବୋଲି ସେ ପ୍ରଶ୍ନ କରିଛନ୍ତି । ଏହି ବୈଠକକୁ ନେଇ ମହାରାଷ୍ଟ୍ର କଂଗ୍ରେସ ସଭାପତି ହର୍ଷବର୍ଦ୍ଧନ ସପକାଲ ବି ସମାଲୋଚନା କରିଛନ୍ତି ।
ସେହିପରି ଏହି ବୈଠକରେ ୬୦୦ ଅତିଥିଙ୍କ ଲାଗି ୨୭ ଲକ୍ଷ ଟଙ୍କା ଖର୍ଚ୍ଚ ହୋଇଛି ବୋଲି କହିଛନ୍ତି ସାମାଜିକ କର୍ମୀ କୁମ୍ଭର । ୪୦ ଫୁଟର ବ୍ୟାନର ମରାଯିବା ସହ ଅତିଥିମାନେ ତାଜ ପ୍ୟାଲେସ ଓ ଟ୍ରାଇଡେଣ୍ଟର ରହିବାକୁ ନେଇ ପ୍ରଶ୍ନ କରିଛନ୍ତି । ସେପଟେ ଏହି ଅଭିଯୋଗକୁ ଖଣ୍ଡନ କରି କୁହାଯାଇଛି ପ୍ଲେଟଗୁଡିକ ରୁପାର ଥାଳି ନଥିଲା ବରଂ ରୁପାର କୋଟିଂ କରାଯାଇଥିଲା । ମିଲ ପିଛା ଖର୍ଚ୍ଚ ହୋଇଥିଲା ୪ ହଜାର ଟଙ୍କା । ଏହି ବୈଠକରେ ସଂସଦର ପ୍ରତିନିଧି, ରାଜ୍ୟ ଓ କେନ୍ଦ୍ରଶାସିତ ଅଞ୍ଚଲର ବିଧାୟକ ପ୍ରତିନିଧି ଯୋଗଦେଇଥିଲେ । ଏନେଇ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ଶିବସେନା ୟୁବିଟି ସାଂସଦ ସଞ୍ଜୟ ରାଓ୍ବତ । ବିଭିନ୍ନ ବିଭାଗ ଲାଗି ପ୍ରଦତ୍ତ ବଜେଟ ଓ ସେହି ପାଣ୍ଠିର ଖର୍ଚ୍ଚ ନେଇ ଏହି ବୈଠକରେ ଆଲୋଚନା ହୋଇଥିଲା । ଗତ ମାସରେ ରାଜ୍ୟ ଏଷ୍ଟିମେଟ କମିଟି ସଦସ୍ୟମାନଙ୍କ ଗସ୍ତ ପୂର୍ବରୁ ଧୁଲେ ଜିଲ୍ଲାର ଏକ ସରକାରୀ ଗେଷ୍ଟ ହାଉସରୁ ବିପୁଳ ଅର୍ଥ ଜବତ ଘଟଣା ଚର୍ଚ୍ଚାର କାରଣ ପାଲଟିଥିଲା ।
ନବୀନଙ୍କୁ ଭେଟିଲେ ବିଜେଡି ନେତ୍ରୀ: ବିରୋଧୀ ଦଳ ନେତା ସୁସ୍ଥ ହୋଇ ଫେରିବା ନେଇ କଲେ କାମନା
ନବୀନଙ୍କୁ ଭେଟିଲେ ବିଜେଡି ନେତ୍ରୀ । ମୁମ୍ବାଇରେ ଚିକିତ୍ସାଧୀନ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟିଛନ୍ତି ବିଜେଡି ସାଂସଦ ସୁଲତା ଦେଓ, ବରିଷ୍ଠ ବିଜେଡି ନେତ୍ରୀ ସ୍ନେହାଙ୍ଗିନୀ ଛୁରିଆ, ବିଏମସି ମେୟର ସୁଲୋଚନା ଦାସ ଓ ବିଜେଡି ନେତ୍ରୀ ଏଲିନା ଦାସ । ନବୀନ ଗତକାଲି ଆଇସିୟୁରୁ ରୁମକୁ ଆସିବା ପରେ ଆଜି ତାଙ୍କର ଫିଜିଓଥେରାପି ଚାଲିଛି । ସେ ସୁସ୍ଥ ଅଛନ୍ତି ଏବଂ ରୁମରେ ଚଲାବୁଲା କରୁଥିବା କହିଛନ୍ତି ବିଜେଡିର ନେତ୍ରୀ । ନବୀନ ମଧ୍ୟ ସେମାନଙ୍କୁ ଦେଖି ବହୁତ ଖୁସି ହେବା ସହ କଥା ହୋଇଛନ୍ତି । ଏହିସମୟରେ ନବୀନଙ୍କ ସହ ବଡ଼ ଭାଇ ପ୍ରେମ ପଟ୍ଟନାୟକ ମଧ୍ୟ ଉପସ୍ଥିତ ଥିଲେ । ଓଡିଶାବାସୀ ତାଙ୍କୁ ଅପେକ୍ଷା କରିଛନ୍ତି । ନବୀନ ପଟ୍ଟନାୟକ ଖୁବଶୀଘ୍ର ସମ୍ପୂର୍ଣ୍ଣ ସୁସ୍ଥ ହୋଇ ଓଡିଶା ଫେରିବାକୁ କାମନା କରିଛନ୍ତି ଏହି ନେତ୍ରୀମାନେ ।
ଯାତ୍ରା ଦୁନିଆରେ ନୂଆ ଚର୍ଚ୍ଚା: ତମସା-ନାଣ୍ଡୁ-ପ୍ରମୋଦଙ୍କ ଅଡିଓ ଭାଇରାଲ
ତମସା-ନାଣ୍ଡୁ-ପ୍ରମୋଦଙ୍କ ଅଡିଓ ଭାଇରାଲ । ଯାତ୍ରା ଅଭିନେତ୍ରୀ ତମସା ମିଶ୍ର, ତୁଳସୀ ମାଲିକ ଅନନ୍ତ ନାରାୟଣ ଧଳ ଓରଫ ନାଣ୍ଡୁ ଓ ସୂର୍ଯ୍ୟ ମନ୍ଦିର ମାଲିକ ପ୍ରମୋଦ ସ୍ୱାଇଁଙ୍କ ଅଡିଓ ଭାଇରାଲ ହେବାରେ ଲାଗିଛି । ଯେଉଁଥିରେ ସିଂହବାହିନୀରେ କାମ କରିବାକୁ ଚୁକ୍ତିବଦ୍ଧ ତମସାଙ୍କୁ ତୁଳସୀ ମାଲିକ ଅନନ୍ତ ସିଂହବାହିନୀକୁ ନଯିବାକୁ କହୁଛନ୍ତି । ତାଙ୍କର ବାଟ ଓଗାଳୁଛନ୍ତି ଉଭୟ ଅନନ୍ତ ଓ ପ୍ରମୋଦ । ଯାହାର କଥପୋକଥନ ଏବେ ଯାତ୍ରା ଦୁନିଆରେ ନୂଆ ଚର୍ଚ୍ଚା ସୃଷ୍ଟି କରିଛି । ଭାଇରାଲ ଅଡିଓରେ ଅନନ୍ତ ତମସାକୁ କହୁଛନ୍ତି, ବାଲିଆପାଳ ବହୁତ ବାଟ । ଏତେବାଟ କାହିଁକି ଯାଇ ନାଚ କରିବୁ ? ଘର ପାଖରେ ତୁଳସୀ ପାର୍ଟିରେ କାମ କରେ । ଯଦି ଏବେ ତୁ ନ ଆସିବୁ, ତେବେ ଜାନୁଆରୀ ୬ତାରିଖରେ ସିଂହବାହିନୀରୁ ବିଦା ହେବୁ । ଏହାର ଉତ୍ତରରେ ତମସା କହୁଛନ୍ତି, ମୋର ଛୋଟ ଛୁଆ । ମୋର କାମ ଦରକାର । ସିଂହବାହିନୀରୁ ପଇସା ଆଣିଛି । କାମ ନକଲେ ମାଲିକ ସଞ୍ଜୀବ ପାଢୀ ସଂଘରେ ଅଭିଯୋଗ କରି ହଇରାଣ କରିବେ । ଏହି ଅଡିଓ ଏବେ ଯାତ୍ରା ପାର୍ଟିର ଗୁମରକୁ ପଦାରେ ପକାଇଛି । କିପରି କଳାକାରଙ୍କୁ ମାଲିକମାନେ ହଇରାଣ ହରକତ କରୁଛନ୍ତି ତାର ବଡ଼ ପ୍ରମାଣ ହେଉଛି ଏହି ଅଡିଓ । ତମସା ମିଶ୍ର ହେଉଛନ୍ତି ସିରିଆଲ୍ ଓ ଯାତ୍ରା ଜଗତର ଜଣେ ପରିଚିତ ଅଭିନେତ୍ରୀ। ଗତ ବର୍ଷ ତୁଳସୀରେ କାମ କରୁଥିବା ତମସା ଚଳିତ ବର୍ଷ ସିଂହବାହିନୀରେ ଯୋଗ ଦେଇଛନ୍ତି ।
ଗୋପାଳପୁର ଗଣଦୁଷ୍କର୍ମ ମାମଲାରେ ୬ ଅଭିଯୁକ୍ତଙ୍କ ଆଜି ସରିଲା ରିମାଣ୍ଡ
ବ୍ରହ୍ମପୁର: ଗୋପାଳପୁର ଗଣଦୁଷ୍କର୍ମ ମାମଲାରେ ୬ ଅଭିଯୁକ୍ତଙ୍କ ଆଜି ସରିଲା ରିମାଣ୍ଡ। ରିମାଣ୍ଡ ଅବଧି ସରିବା ପରେ ତାଙ୍କୁ ଆଜି କୋର୍ଟରେ ହାଜର କରାଯାଇଥଲା। ରିମାଣ୍ଡ ସରିବା ପରେ ଅଦାଲତ ଅଭିଯୁକ୍ତଙ୍କୁ ଜେଲକୁ ପଠାଇ ଦେଇଛନ୍ତି। ଗତ ଶୁକ୍ରବାର ଏହି ୬ ଅଭିଯୁକ୍ତଙ୍କ ବ୍ରହ୍ମପୁର ଜେଲରେ ହୋଇଥିଲା ଟିଆଇ ପରେଡ। ସମସ୍ତ ଅଭିଯୁକ୍ତଙ୍କୁ ଚିହ୍ନିଥିଲେ ପୀଡ଼ିତା ଓ ତାଙ୍କ ସାଙ୍ଗ। ୧୫ ଦିନ ମଧ୍ୟରେ ତଦନ୍ତ ଶେଷ କରି କୋର୍ଟରେ ଚାର୍ଜସିଟ୍ ଦାଖଲ କରାଯିବ। ତ୍ଵରିତ ଫଇସଲା ପାଇଁ ବିଚାର ଫାଷ୍ଟଟ୍ରାକ କୋର୍ଟରେ କରାଯିବ। ଗତ ରଜସଂକ୍ରାନ୍ତିରେ ଗୋପାଳପୁର ବିଚ୍ ରେ ଜଣେ ଯୁବତୀଙ୍କୁ ଗଣଦୁଷ୍କର୍ମ ହୋଇଥିବାର ଅଭିଯୋଗ ହୋଇଥିଲା।
ଗଞ୍ଜେଇ ମୁକ୍ତ ହେବ ଓଡ଼ିଶା, ରାଜ୍ୟକୁ ସମ୍ପୂର୍ଣ୍ଣ ଗଞ୍ଜେଇ ମୁକ୍ତ କରିବାକୁ ପ୍ରକ୍ରିୟା ଆରମ୍ଭ: ଅବକାରୀ ମନ୍ତ୍ରୀ
ଭୁବନେଶ୍ବବର: ଗଞ୍ଜେଇ ମୁକ୍ତ ହେବ ଓଡ଼ିଶା। ଗଞ୍ଜେଇ ଚାଷରୁ ଲୋକଙ୍କୁ ନିବୃତ୍ତ କରାଯିବ। ରାଜ୍ୟକୁ ସମ୍ପୂର୍ଣ୍ଣ ଗଞ୍ଜେଇ ମୁକ୍ତ କରିବାକୁ ପ୍ରକ୍ରିୟା ଆରମ୍ଭ ହୋଇଛି। ଏଭଳି ସୂଚନା ଦେଇଛନ୍ତି ଅବକାରୀ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ। ରାଜ୍ୟରେ ବିଭିନ୍ନ ଜାଗାରେ ଜନଜାତିର ଲୋକଙ୍କୁ ପ୍ରଲୋଭିତ କରାଇ ଅନେକ ଜାଗାରେ ଚୋରା ଗଞ୍ଜେଇ ବ୍ୟବସାୟ କରାଯାଉଛି। ଚଳିତବର୍ଷ ସର୍ବାଧିକ ଗଞ୍ଜେଇ ଚାଷ ନଷ୍ଟ କରାଯାଇଛି। ଆଗାମୀ ଦିନ ଗୁଡିକରେ ଜନଜାତିର ଗରିବ ଲୋକଙ୍କୁ ମିଛ କହି ଯେଉଁମାନେ ଗଞ୍ଜେଇ ଚାଷ କରନ୍ତି ସରକାର ତାଙ୍କ ଉପରେ ନଜର ରଖିଛନ୍ତି। ଜନଜାତିଙ୍କୁ ଏହାର ବିକଳ୍ପ ଜୀବିକା କଣ ହୋଇ ପାରିବ ସେନେଇ ପୋଲିସ ବିଭାଗ ସହ ମିଶି ଆଲୋଚନା କରାଯାଉଛି।
ଗୁଜରାଟ ଉପନିର୍ବାଚନ ବିଜୟକୁ ନେଇ ଆପ୍ ଖୁସୀକୁ ଲାଗିଲା ନଜର: ଜିତିବାର ୭୨ ଘଣ୍ଟା ପରେ ଦଳ ଛାଡ଼ିଲେ ନବନିର୍ବାଚିତ ବିଧାୟକ
ବୋଟାଦ: ଗୁଜରାଟର ବୋଟାଦରୁ ଆମ ଆଦମୀ ପାର୍ଟି (ଆପ)ର ବିଧାୟକ ଉମେଶ ମକଓ୍ବାନା ପାର୍ଟିର ରାଷ୍ଟ୍ରୀୟ ସଂଯୁକ୍ତ ସଚିବ ପଦରୁ ଇସ୍ତଫା ଦେଇଛନ୍ତି । ଇସ୍ତଫା ଦେବା ପରେ ସେ କହିଛନ୍ତି, ’ମୁଁ ୨୦ ବର୍ଷ ପର୍ଯ୍ୟନ୍ତ ବିଜେପିରେ ଅଲଗା ଅଲଗା ପଦରେ କାମ କରିଛି । ଗୁଜରାଟରେ ଆପର କୌଣସି ପରିଚୟ ନଥିବା ସମୟରେ ମୁଁ କ୍ଷମତାସୀନ ବିଜେପି ଛାଡ଼ି ଆପରେ ସାମିଲ ହୋଇଥିଲି । ମୋତେ ଲାଗୁଛି, ଆମେ ଡ. ବି.ଆର ଆମ୍ବେଦକରଙ୍କ ସିଦ୍ଧାନ୍ତ ଠାରୁ ଦୂରେଇ ଯାଉଛେ । ଏହି କାରଣରୁ ମୁଁ ଆପର ସବୁ ପଦରୁ ଇସ୍ତଫା ଦେଇଛି ।’
ଉମେଶ ପୁଣି କହିଛନ୍ତି, ମୁଁ ପାର୍ଟିର କାର୍ଯ୍ୟକର୍ତ୍ତା ଭାବେ ନିଜର କାମ ଜାରି ରଖିବି । ମୁଁ ବୋଟାଦର ଲୋକଙ୍କ ପାଖକୁ ଯିବି । ମୁଁ କିଛି ଲୋକଙ୍କ ସହ ମିଶି ଅଲଗା ପାର୍ଟି ଗଠନ କରିବା, ନ କରିବା ଉପରେ ଚର୍ଚ୍ଚା କରିବି । ବିସାବଦର ଆସନରୁ ଆପର ବିଜୟର ୭୨ ଘଣ୍ଟା ମଧ୍ୟରେ ଉମେଶ ପାର୍ଟିର ପଦରୁ ଇସ୍ତଫା ଦେଇଛନ୍ତି । ଦଳ ନିଜର ମୂଳ ବିଚାରଧାରା ଠାରୁ ଦୂରେଇ ଯାଉଥିବା ସେ କହିଛନ୍ତି । ଆମ୍ବେଦକର ଓ ଭଗତ ସିଂହଙ୍କ ବିଚାରଧାରା ଠାରୁ ଦୂରେଇ ଯିବା କାରଣରୁ ସେ ଦଳରୁ ଇସ୍ତଫା ଦେଇଥିବା କହିଛନ୍ତି । ତେବେ ଜଣେ କାର୍ଯ୍ୟକର୍ତ୍ତା ଭାବେ କାମ ଜାରି ରଖିବେ ଓ ବିଧାୟକ ହୋଇ ରହିବେ ବୋଲି କହିଛନ୍ତି ।
ଫୋନ୍ କଲେ ତୁରନ୍ତ ଲାଗିବ କଲ୍, ଆଉ ଶୁଭିବନି ଅମିତାଭଙ୍କ ସାଇବର ଫ୍ରଡ୍ ଠକେଇ ଚେତାବନୀ
ନୂଆଦିଲ୍ଲୀ: ଦେଶରେ ଅନଲାଇନ କାର୍ଯ୍ୟ ବଢ଼ିବା ସହିତ ସାଇବର ଫ୍ରଡ ମାମଲା ମଧ୍ୟ ବଢ଼ିବାରେ ଲାଗିଛି । ଏନେଇ ସଚେତନତା ସୃଷ୍ଟି କରିବା ପାଇଁ ସରକାର ଏକ ବ୍ୟାପକ ଅଭିଯାନ ଚଳାଇଥିଲେ । ଆପଣମାନେ ଯେତେବେଳେ ବି ଫୋନ କରୁଥିଲେ, ସେହି ସମୟରେ ଏକ କଲର ଟ୍ୟନ ବାଜୁଥିଲା । ସେଥିରେ ଶତାବ୍ଦୀର ମହାନାୟକ ଅମିତାଭ ବଚନ ସାଇବର କ୍ରାଇମ ବାବଦରେ ସୂଚନା ଦେଉଥିଲେ । ମାତ୍ର ସେହି କଲର ଟ୍ୟୁନ ଲୋକଙ୍କ ପାଇଁ ସମସ୍ୟା ସୃଷ୍ଟି କରିଥିଲା ଓ ସୋସିଆଲ ମିଡ଼ିଆରେ ତାହାକୁ ବନ୍ଦ କରିବା ପାଇଁ ସ୍ବର ଉଠିଥିଲା ।
ମିଡ଼ିଆା ରିପୋର୍ଟ ମୁତାବକ, ସରକାର ଏବେ ତାହାକୁ ହଟାଇବାକୁ ନିଷ୍ପତ୍ତି ଗ୍ରହଣ କରିଛନ୍ତି । ସୂତ୍ର ମୁତାବକ, ଏହି ଅଭିଯାନ ଏବେ ସମାପ୍ତ ହୋଇଯାଇଛି । ଏଥିପାଇଁ କଲର ଟ୍ୟୁନକୁ ହଟାଇ ଦିଆଯାଇଛି । ବହୁ ଲୋକଙ୍କ ଠାରୁ ଅଭିଯୋଗ ଆସିବା ପରେ ଏହି ପଦକ୍ଷେପ ଗ୍ରହଣ କରାଯାଇଛି । ଜରୁରୀକାଳୀନ କଲ୍ କରିବା ସମୟରେ ତାହା ଲୋକଙ୍କୁ ଅସୁବିଧାରେ ପକାଉଥିଲା । ଏହି କାରଣରୁ ଫୋନ କଲେ ସାମ୍ନା ଲୋକଙ୍କ ସହ ତୁରନ୍ତ କଥା ହେବା ସମ୍ଭବ ହୋଇପାରୁନଥିଲା । ପୂର୍ବରୁ ଅମିତାଭଙ୍କ ସ୍ବର ଥିବା ଟ୍ୟୁନ ୪୦ ସେକେଣ୍ଡ ପର୍ଯ୍ୟନ୍ତ ବାଜୁଥିଲା, ତା’ପରେ କଲ୍ ସଂଯୋଗ ହେଉଥିଲା । ନିକଟରେ ଅମିତାଭଙ୍କୁ ଏହି ଟ୍ୟୁନ ପାଇଁ ଟ୍ରୋଲ କରାଯାଇଥିଲା ।
ରଥଯାତ୍ରା ପୂର୍ବରୁ ପୁରୀ ଶ୍ରୀମନ୍ଦିରରେ କାର୍ଯ୍ୟକ୍ଷମ ହେଲା ଆଣ୍ଟିଡ୍ରୋନ ବ୍ୟବସ୍ଥା
ପୁରୀ: ରଥଯାତ୍ରା ପୂର୍ବରୁ ପୁରୀ ଶ୍ରୀମନ୍ଦିରରେ କାର୍ଯ୍ୟକ୍ଷମ ହେଲା ଆଣ୍ଟିଡ୍ରୋନ ବ୍ୟବସ୍ଥା । ଶ୍ରୀମନ୍ଦିର ଦକ୍ଷିଣ ଦ୍ଵାର ନିକଟରେ ଉଡୁଥିବା ଡ୍ରୋନକୁ ଖସାଇଲା ଆଣ୍ଟିଡ୍ରୋନ । ଆଣ୍ଟି ଡ୍ରୋନ ଟେକ୍ନୋଲୋଜି ଦ୍ୱାରା ଡ୍ରୋନକୁ ଖସାଇଲା ପୋଲିସ । ସମ୍ପୃକ୍ତ ଡ୍ରୋନକୁ ଜବତ କରିଛି ପୋଲିସ । ଡ୍ରୋନ ଉଡାଉଥିବା ବ୍ୟକ୍ତିଙ୍କୁ ଅଟକ ରଖି ପଚରା ଉଚରା କରୁଛି ପୋଲିସ। କେଉଁ ଉଦେଶ୍ୟରେ ଉଡ଼ାଉଥିଲା ଡ୍ରୋନ ସେ ନେଇ ଚାଲିଛି ତଦନ୍ତ ।
ବ୍ରହ୍ମପୁର ଦୁଷ୍କର୍ମ ଘଟଣା: ଦକ୍ଷିଣାଞ୍ଚଳ IGଙ୍କୁ ଭେଟିଲା ବିଜେଡି ଟିମ୍
ଦକ୍ଷିଣାଞ୍ଚଳ IGଙ୍କୁ ଭେଟିଲା ବିଜେଡି ଟିମ୍। ବ୍ରହ୍ମପୁର ଦୁଷ୍କର୍ମ ଘଟଣାରେ ବ୍ରହ୍ମପୁର IGଙ୍କୁ ଭେଟି ଦାବିପତ୍ର ପ୍ରଦାନ କରିଛି ବିଜେଡି ଟିମ। ୧୭ ବର୍ଷର ଗରିବ ନାବାଳିକାଙ୍କୁ ନର୍ସିଂରେ ବିଏସସି କରାଇ ଦେବାକୁ ପ୍ରଲୋଭିତ କରି ଦୁଷ୍କର୍ମ କରିଥିଲେ ଜଣେ ନକଲି ହୋମିଓପାଥି ଡାକ୍ତର ।