ଲକ୍ଷ୍ମୌ: ବଡ଼ ଅଘଟଣରୁ ବର୍ତ୍ତିଲା ବିମାନ। ଲକ୍ଷ୍ମୌ ବିମାନ ବନ୍ଦରରେ ବିମାନ କଲା ଅବତରଣ। ସାଉଦି ଏୟାରଲାଇନ୍ସର ଏହି ବିମାନ ହଜ ଯାତ୍ରୀଙ୍କୁ ଧରି ଯାଉଥିବା ବିମାନରେ ଯାନ୍ତ୍ରିକ ତ୍ରୁଟି ପରିଲକ୍ଷିତ ହେବା ପରେ ବିମାନ କରିଛି ଜରୁରୀ ଅବତରଣ। ବିମାନରୁ ଧୂଆଁ ବାହାରିବା ସହ ଗୋଟିଏ ଚକରୁ ସ୍ପାର୍କ ହୋଇଥିବା ଜଣାଯାଇଛି। ଏହି ଘଟଣାକୁ ନେଇ ଯାତ୍ରୀଙ୍କ ମଧ୍ୟରେ ଆତଙ୍କ ପ୍ରକାଶ ପାଇଥିଲା। ସୂଚନା ପାଇ ବିମାନବନ୍ଦରର ଜରୁରୀକାଳୀ ସେବା ବିଭାଗ ପଦକ୍ଷେପ ନେଇଥିଲା। ଏହି ଘଟଣାରେ ସମସ୍ତ ଯାତ୍ରୀ ସୁରକ୍ଷିତ ଥିବାବେଳେ କୌଣସି ଅଘଟଣ ଘଟିନାହିଁ। ତେବେ ବିମାନରେ ସୃଷ୍ଟି ହୋଇଥିବା ସମସ୍ଯାର ସମାଧାନ କରାଯାଇଥିଲା। ଓଭରହିଟ କାରଣରୁ ହୁଇଲରୁ ସ୍ପାର୍କ ସୃଷ୍ଟି ହୋଇଥିବା ଜଣାଯାଇଛି। SV 3112 ବିମାନ ଜେଡାହରୁ ରାତି ୧୦ଟା ୪୫ରେ ବାହାରିଥିଲା। ଆଜି ଭୋର ସାଢେ ୬.୩୦ରେ ବିମାନ ଲକ୍ଷ୍ମୌ ବିମାନ ବନ୍ଦରରେ ପହଞ୍ଚିଥିଲା। ବିମାନରେ ୨୫୦ ଯାତ୍ରୀ ଥିବା ସୂଚନା ମିଳିଛି।
‘ଯଦି ସୋନମ ନିଖୋଜ ହୋଇଥାନ୍ତେ ତାହାଲେ ଆମର ପୂରା ପରିବାର ଜେଲରେ ଥାଆନ୍ତେ’
ନନ୍ଦିଘୋଷ ବ୍ୟୁରୋ: ମେଘାଳୟରେ ରାଜା ରଘୁବଂଶୀ ହତ୍ୟା ମାମଲାରେ ନ୍ୟାୟ ଦାବି କରି ଗତକାଲି ସନ୍ଧ୍ୟାରେ ଇନ୍ଦୋରରେ ଏକ ମହମବତୀ ରାଲି କରାଯାଇଥିଲା । ରାଜାଙ୍କ ବଡ଼ ଭାଇ ସଚିନ ରଘୁବଂଶୀ ମେଘାଳୟ ପୋଲିସର କାର୍ଯ୍ୟାନୁଷ୍ଠାନ ଉପରେ ପ୍ରଶ୍ନ ଉଠାଇ କହିଛନ୍ତି ଯେ, ଯଦି ତାଙ୍କ ବୋହୂ ସୋନମ ରଘୁବଂଶୀ ନିଖୋଜ ହୋଇଯାଇଥାନ୍ତେ ତାହାଲେ ତାଙ୍କର ସମଗ୍ର ପରିବାର ଜେଲରେ ଥାଆନ୍ତେ । କିନ୍ତୁ ରାଜାଙ୍କୁ ହତ୍ୟା କରାଯିବା ପରେ ମଧ୍ୟ ସୋନମଙ୍କ ପରିବାର ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ । ଯଦି ଗୋଟିଏ ସପ୍ତାହ ମଧ୍ୟରେ ଠୋସ ପଦକ୍ଷେପ ନିଆ ନଯାଏ ତାହାଲେ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ରାଜାଙ୍କ ପରିବାର ।
ରାଜା ରଘୁବଂଶୀଙ୍କ ପରିବାର ଏବଂ ସମର୍ଥକମାନେ ଇନ୍ଦୋରର ସହକାର ନଗରରେ ମହମବତୀ ରାଲି କରିଥିଲେ ଏବଂ ହତ୍ୟା ପାଇଁ ଦାୟୀ ଲୋକଙ୍କୁ ଦଣ୍ଡ ଦେବାକୁ ଦାବି କରିଥିଲେ ।
ସଚିନ ରଘୁବଂଶୀ ଭାବପ୍ରବଣ ହୋଇ କହିଥିଲେ ଯେ, ମୋ ଭାଇର ହତ୍ୟା ୨୪ ଦିନ ବିତିଲାଣି କିନ୍ତୁ ଆଜି ପର୍ଯ୍ୟନ୍ତ ପୋଲିସ ହତ୍ୟାକାରୀମାନଙ୍କୁ ଧରିବାରେ ସଫଳ ହୋଇନାହିଁ । ଯଦି ବୋହୂ ସୋନମ ନିଖୋଜ ହୋଇଯାଇଥାନ୍ତେ ତାହାଲେ ସମଗ୍ର ପରିବାର ଜେଲ ଯାଇଥାନ୍ତୁ । ଯଦି ପୋଲିସ ଉଚିତ କାର୍ଯ୍ୟାନୁଷ୍ଠାନ ନ ନିଏ ତାହାଲେ ଜୋରଦାର ପ୍ରତିବାଦ କରିବୁ ।
ଅହମ୍ମଦାବାଦ ବିମାନ ଦୁର୍ଘଟଣାରେ ମିଳିଲା ଦ୍ବିତୀୟ ବ୍ଲାକବକ୍ସ
ଅହମ୍ମଦାବାଦ: ଅହମ୍ମଦାବାଦ ବିମାନ ଦୁର୍ଘଟଣାରେ ମିଳିଲା ଦ୍ବିତୀୟ ବ୍ଲାକବକ୍ସ । ଏ ନେଇ ତଦନ୍ତ କରୁଥିବା ଅଧିକାରୀମାନେ କକପିଟ ଭଏସ ରେକର୍ଡର ବ୍ଲାକ୍ ବକ୍ସ ମିଳିଥିବା କଥା ନିଶ୍ଚିତ କରିଛନ୍ତି । ଏବେ ଦୁର୍ଘଟଣାର ମୂଳ କାରଣ କ’ଣ ଥିଲା ତାହା ଜଣାପଡ଼ିବ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରମୁଖ ସଚିବ ପିକେ ମିଶ୍ରଙ୍କୁ ବ୍ଲାକ୍ ବକ୍ସ ଉଦ୍ଧାର ସମ୍ପର୍କରେ ଅଧିକାରୀମାନେ ଜଣାଇଛନ୍ତି । ବିକେ ମିଶ୍ର ରବିବାର ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାସ୍ଥଳ ପରିଦର୍ଶନ କରିଥିଲେ । ଆହତମାନଙ୍କର ଚିକିତ୍ସା ଚାଲିଥିବା ସିଭିଲ ହସ୍ପିଟାଲ ମଧ୍ୟ ପରିଦର୍ଶନ କରିଥିଲେ ।
ଅନ୍ୟପଟେ ଦୁର୍ଘଟଣାର ୫ ଦିନ ପରେ ହସ୍ପିଟାଲ ଅଧିକାରୀମାନେ DNA ଅନୁସାରେ ୯୨ ଜଣଙ୍କୁ ଚିହ୍ନଟ କରିଛନ୍ତି । ଏହି ଦୁର୍ଘଟଣାରେ ୨୭୪ ଜଣଙ୍କ ମୃତ୍ୟୁ ଘଟିଛି । ଏ ଯାଏ ୪୭ ଜଣଙ୍କ ମୃତଦେହ ସେମାନଙ୍କ ପରିବାରକୁ ସ୍ଥାନାନ୍ତର କରାଯାଇଛି ।
ଡିଏନଏ ପରୀକ୍ଷା ଦଳରେ ମୋଟ ୫୯୦ ଜଣ ସାମିଲ ଅଛନ୍ତି। ସେମାନଙ୍କ ମଧ୍ୟରୁ ୩୬ ଜଣ ଫୋରେନସିକ୍ ବିଶେଷଜ୍ଞ। ଦଳରେ ୮ ଜଣ ମହିଳା ଏବଂ ୫୫୪ ଜଣ ଡାକ୍ତରୀ କର୍ମଚାରୀ ଅଛନ୍ତି। ଡିଏନଏ ରିପୋର୍ଟ ପ୍ରସ୍ତୁତ ହେବା ପରେ, ସମ୍ପର୍କୀୟମାନଙ୍କ ସହିତ ଯୋଗାଯୋଗ କରିବା ପରେ ଏହାକୁ ହସ୍ତାନ୍ତର କରାଯାଉଛି। ସୂଚନା ଅନୁଯାୟୀ, ଆମ୍ବୁଲାନ୍ସ ମାଧ୍ୟମରେ ସୁରକ୍ଷା ସହିତ ମୃତଦେହଗୁଡ଼ିକୁ ସେମାନଙ୍କ ଘରକୁ ପଠାଯାଉଛି। ଏଥିପାଇଁ ୨୩୦ ଟି ଦଳ ଗଠନ କରାଯାଇଛି, ଯେଉଁମାନେ ମୃତକଙ୍କ ସମ୍ପର୍କୀୟଙ୍କ ସହିତ ସିଧାସଳଖ ଯୋଗାଯୋଗ କରୁଛନ୍ତି।
୧୯୨ ଆମ୍ବୁଲାନ୍ସ ଏବଂ ଯାନବାହନ ପ୍ରସ୍ତୁତ ରହିଛି। ଦୁର୍ଘଟଣାରେ ପ୍ରାଣ ହରାଇଥିବା କିଛି ବିଦେଶୀ ନାଗରିକଙ୍କ ସମ୍ପର୍କୀୟମାନେ ଅହମ୍ମଦାବାଦରେ ପହଞ୍ଚିଛନ୍ତି। ମୃତଦେହ ରଖିବା ପାଇଁ ଭଦୋଦରାରୁ ଅହମ୍ମଦାବାଦକୁ ୧୦୦ଟି କଫିନ୍ ଅଣାଯାଇଛି।
ଇରାନ ଏବଂ ଇସ୍ରାଏଲ ମଧ୍ୟରେ ଆରମ୍ଭ ହେଲା ଭୟଙ୍କର ଯୁଦ୍ଧ, ଆମେରିକା ପଠାଇଲା ୨୪ଟି ଟ୍ୟାଙ୍କର
ନନ୍ଦିଘୋଷ ବ୍ୟୁରୋ: ଇରାନ ଏବଂ ଇସ୍ରାଏଲ ମଧ୍ୟରେ ଆରମ୍ଭ ହେଲା ଭୟଙ୍କର ଯୁଦ୍ଧ । ଆମେରିକା ପଠାଇଲା ୨୪ଟି ଟ୍ୟାଙ୍କର । ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଆମେରିକା ବାୟୁସେନା ଏ ପର୍ଯ୍ୟନ୍ତ ସବୁଠାରୁ ବଡ଼ ଏୟାର ଇନ୍ଧନ ଭର୍ତ୍ତି ଟ୍ୟାଙ୍କର ବିମାନ ମୁତୟନ କରିଛି । ଏହି ବିମାନ ଗୁଡ଼ିକୁ ଆଟଲାଣ୍ଟିକ ମହାସାଗର ପାର ହୋଇ ଆମେରିକା ସାମରିକ ଘାଟି ୟୁରୋପକୁ ପଠାଉଛି ।
ଆମେରିକାର ପ୍ରତିରକ୍ଷା ମନ୍ତ୍ରଣାଳୟ (ପେଣ୍ଟାଗନ୍) ଏପର୍ଯ୍ୟନ୍ତ ଏହି ନିୟୋଜନର ଉଦ୍ଦେଶ୍ୟ ବିଷୟରେ କୌଣସି ସରକାରୀ ବିବୃତ୍ତି ଦେଇନାହିଁ। ତଥାପି, ଏପରି ପରିସ୍ଥିତିରେ ଆବଶ୍ୟକୀୟ ଲଜିଷ୍ଟିକ୍ସ ଏବଂ ସମର୍ଥନ ବିମାନର ଶୀଘ୍ର ନିୟୋଜନ ପାଇଁ ନାଟୋର ସହଯୋଗୀ ଦେଶମାନଙ୍କ ମଧ୍ୟରେ ପାରସ୍ପରିକ ସମନ୍ୱୟର ଏକ ବ୍ୟବସ୍ଥା ପୂର୍ବରୁ ରହିଛି। ପୂର୍ବରୁ ମଧ୍ୟ, ସିରିଆ ଏବଂ ଇରାକରେ ସଂଘର୍ଷ ସମୟରେ, ଆମେରିକା ସମାନ ଟ୍ୟାଙ୍କର୍ ବିମାନ ସାହାଯ୍ୟରେ ଏହାର ସହଯୋଗୀ ଦେଶମାନଙ୍କ ପାଇଁ ଅଭିଯାନକୁ ସମର୍ଥନ କରିଥିଲା।
ପୂର୍ବ ଦିଗରେ ବହୁ ସଂଖ୍ୟକ ଟ୍ୟାଙ୍କର୍ ବିମାନ ମୁତୟନ ସ୍ପଷ୍ଟ ଭାବରେ ସୂଚିତ କରୁଛି ଯେ ଆମେରିକା ସେନା ଏକ ଦୀର୍ଘକାଳୀନ ଅଭିଯାନ ପାଇଁ ପ୍ରସ୍ତୁତ ହେଉଛି, ବିଶେଷକରି ଯଦି ମଧ୍ୟପ୍ରାଚ୍ୟରେ ଉତ୍ତେଜନା ବୃଦ୍ଧି ପାଏ କିମ୍ବା ନାଟୋ ସମର୍ଥନ ଆବଶ୍ୟକ ହୁଏ। ଏହା କହିବା କଷ୍ଟକର ଯେ ଏହି ମୁତୟନ କେବଳ ସତର୍କତା ଭାବରେ କରାଯାଉଛି ନା ଏହା ପଛରେ ଏକ ବଡ଼ ସାମରିକ ଅଭିଯାନ ଲୁଚି ରହିଛି।
ବୋମା ଧମକ ଯୋଗୁ ଫେରିଗଲା ହାଇଦ୍ରାବାଦ ଅଭିମୁଖେ ଆସୁଥିବା ବିମାନ
ନୂଆଦିଲ୍ଲୀ: ବୋମା ଧମକ ଯୋଗୁ ହାଇଦ୍ରାବାଦ ଅଭିମୁଖେ ଆସୁଥିବା ବିମାନ ଫେରିଯାଇଛି । ହାଇଦ୍ରାବାଦ ଅଭିମୁଖେ ଆସୁଥିବା ଲୁଫ୍ଥାନସା ବିମାନ ୟୁଟର୍ଣ୍ଣ ନେଇ ଫ୍ରାଙ୍କଫର୍ଟ ବିମାନବନ୍ଦରରେ ପୁନର୍ବାର ଅବତରଣ କରିଛି । ରବିବାର ସ୍ଥାନୀୟ ସମୟ ଅପରାହ୍ନ ୨. ୧୪ରେ ଜର୍ମାନୀରୁ ଉଡାଣ ଭରିବାର ଦୁଇ ଘଣ୍ଟା ପରେ ବିମାନ LH752 ବୋମା ଧମକ ପାଇଥିଲା । ସୋମବାର ଭୋର ସମୟରେ ଏହା ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବାର କାର୍ଯ୍ୟକ୍ରମ ଥିଲା।
ଲୁଫ୍ଥାନସା କହିଛି ଯେ, ହାଇଦ୍ରାବାଦରେ ଅବତରଣ ପାଇଁ ଅନୁମତି ନ ପାଇବାରୁ ଏହାକୁ ପଛକୁ ଫେରିବାକୁ ବାଧ୍ୟ କରାଯାଇଥିଲା। ବିମାନଟି ସନ୍ଧ୍ୟା ପ୍ରାୟ ୫:୩୦ ସମୟରେ ଫ୍ରାଙ୍କଫର୍ଟରେ ପୁନର୍ବାର ଅବତରଣ କରିଥିଲା, ଏୟାରଲାଇନ୍ସର ଲାଇଭ୍ ଫ୍ଲାଇଟ୍ ଟ୍ରାକର ଦେଖାଇଛି।
ଅହମ୍ମଦାବାଦ ପ୍ଲେନ୍ କ୍ରାସ ପରଠୁ ନିଖୋଜ ଅଛନ୍ତି ଚଳଚ୍ଚିତ୍ର ନିର୍ମାତା, ଏ ଯାଏ ମିଳୁନି ପତ୍ତା
ଅହମ୍ମଦାବାଦ: ଗୁରୁବାର ଦିନ ଅହମ୍ମଦାବାଦରେ ହୋଇଥିବା ଭୟଙ୍କର ଏୟାର ଇଣ୍ଡିଆ ବିମାନ ଦୁର୍ଘଟଣା ପରଠାରୁ ନିଖୋଜ ଅଛନ୍ତି ଚଳଚ୍ଚିତ୍ର ନିର୍ମାତା ମହେଶ କଳାଭାଡିଆ । ତାଙ୍କ ପରିବାର ଆଶଙ୍କା ପ୍ରକାଶ କରିଛନ୍ତି ଯେ ଦୁର୍ଘଟଣା ସମୟରେ ସେ ତଳେ ଥିବା ଲୋକଙ୍କ ମଧ୍ୟରେ ରହିପାରନ୍ତି। ଏଥିପାଇଁ ପରିବାର ଚିହ୍ନଟ ପାଇଁ ଡିଏନଏ ନମୁନା ଦାଖଲ କରିଛନ୍ତି। ତାଙ୍କ ମୋବାଇଲ୍ ଫୋନ୍ର ଶେଷ ସ୍ଥାନ ଦୁର୍ଘଟଣାସ୍ଥଳରୁ ମାତ୍ର ୭୦୦ ମିଟର ଦୂରରେ ଥିଲା।
ଗୁରୁବାର ଅପରାହ୍ନ ୧:୩୯ ସମୟରେ ଏହି ଘଟଣା ଘଟିଥିଲା, ଯେତେବେଳେ ଏୟାର ଇଣ୍ଡିଆର ବିମାନଟି ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଆରମ୍ଭ କରିବାର କିଛି ମିନିଟ୍ ପରେ ମେଘନାନିଗର ଅଞ୍ଚଳରେ ଥିବା ଏକ ମେଡିକାଲ କଲେଜ ପରିସରରେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଭୟଙ୍କର ଦୁର୍ଘଟଣାରେ ବିମାନରେ ଥିବା ୨୪୨ ଜଣ ଯାତ୍ରୀଙ୍କ ମଧ୍ୟରୁ ୨୪୧ ଜଣଙ୍କର ମୃତ୍ୟୁ ହୋଇଥିଲା ଏବଂ ତଳେ ଥିବା ୨୯ ଜଣଙ୍କର ମୃତ୍ୟୁ ହୋଇଥିଲା।
ନିଖୋଜ ଚଳଚ୍ଚିତ୍ର ନିର୍ମାତାଙ୍କ ନାମ ମହେଶ କଳାଭାଡିଆ, ଯାହାଙ୍କୁ ମହେଶ ଜିରାୱାଲା ମଧ୍ୟ କୁହାଯାଏ, ତାଙ୍କୁ ଚିହ୍ନଟ କରାଯାଇଛି। ସେ ନରୋଦାର ବାସିନ୍ଦା ଥିଲେ ଏବଂ ସଂଗୀତ ଆଲବମ୍ ତିଆରି କରୁଥିଲେ। ତାଙ୍କ ପତ୍ନୀ ହେତଲ କହିଛନ୍ତି ଯେ ଗୁରୁବାର ସେ ଲ’ ଗାର୍ଡେନ୍ ଅଞ୍ଚଳରେ କାହାକୁ ଭେଟିବାକୁ ଯାଇଥିଲେ। ହେତଲ କହିଛନ୍ତି, ‘ମୋ ସ୍ୱାମୀ ମୋତେ ଅପରାହ୍ନ ୧:୧୪ ରେ ଫୋନ୍ କରି କହିଥିଲେ ଯେ ତାଙ୍କର ବୈଠକ ସରିଯାଇଛି ଏବଂ ସେ ଘରକୁ ଆସୁଛନ୍ତି। କିନ୍ତୁ ଯେତେବେଳେ ସେ ଘରକୁ ଫେରିଲେ ନାହିଁ, ମୁଁ ତାଙ୍କୁ ବାରମ୍ବାର ଫୋନ୍ କଲି, କିନ୍ତୁ ତାଙ୍କ ଫୋନ୍ ବନ୍ଦ ଥିଲା। ଯେତେବେଳେ ପୋଲିସକୁ ସୂଚନା ଦିଆଯାଇଥିଲା, ମୋବାଇଲର ଶେଷ ଲୋକେସନ୍ ଦୁର୍ଘଟଣାସ୍ଥଳରୁ ମାତ୍ର ୭୦୦ ମିଟର ଦୂରରେ ଥିବା ଜଣାପଡ଼ିଥିଲା।’
ନାବାଳିକାକୁ ଅପହରଣ ବେଳେ ୨ ବଙ୍ଗୀୟ ଯୁବକଙ୍କୁ ମାଡ଼ି ବସିଲେ ଲୋକେ
ଭୁବନେଶ୍ବର: ରାଜଧାନୀରେ ଚାଞ୍ଚଲ୍ୟ। ରାତି ଅଧରେ ନାବାଳିକାଙ୍କୁ ଧରି ଫେରାର ହେଉଥିଲେ ୨ ବଙ୍ଗୀୟ ଯୁବକ। ନିଶାଦେଇ ନାବାଳିକାକୁ ଅପହରଣ କରୁଥିବା ବେଳେ ୨ ଯୁବକଙ୍କୁ ମାଡି ବସିଲେ ସ୍ଥାନୀୟ ଲୋକେ। ୨ ଯୁବକ ନିଶାସକ୍ତ ଅବସ୍ଥାରେ ଥିବା ବେଳେ ନାବାଳିକାଙ୍କୁ କୁଆଡେ ଓ କାହିଁକି ନେଉଥିଲେ କାରଣ ଅସ୍ପଷ୍ଟ ରହିଛି। ଅନ୍ୟପଟେ ନାବାଳିକା ଜଣକ ଅଚେତ ଅବସ୍ଥାରେ ଥିବାରୁ ଦୁଷ୍କର୍ମ ଉଦ୍ୟମ ହୋଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ। ମୂର୍ମୁଷ ଅବସ୍ଥାରେ ଧରି ନେଉଥିବା ବେଳେ ସ୍ଥାନୀୟ ଲୋକ ଦେଖିଥିଲେ। ସନ୍ଦେହ ହେବାରୁ ୨ ଜଣଙ୍କୁ ଅଟକ ରଖି ଖଣ୍ଡଗିରି ଥାନା ପୋଲିସକୁ ଜିମା ଦିଆଯାଇଛି। ନାବାଳିକାକୁ ଉଦ୍ଧାର କରି ଚିକିତ୍ସା ପାଇଁ ଏମସରେ ଭର୍ତ୍ତି କରାଯାଇଛି। ଅଟକ ୨ ଯୁବକ ହେଲେ ପଶ୍ଚିମବଙ୍ଗ ମେଦିନାପୁରର ଗୋପାଳ ମଜୁମଦାର ଓ ମୃତ୍ୟୁଞ୍ଜୟ ଘୋଷ। ଖଣ୍ଡଗିରିର ଥାନା ଡୁମଡୁମା ଅଞ୍ଚଳରେ ଥିବା ହୋଟେଲରେ ଶ୍ରମିକ ଭାବରେ କାମ କରନ୍ତି ୨ ଯୁବକ। ଦୁଷ୍କର୍ମ ଅଭିଯୋଗ ପରେ ଉଦ୍ଧାର ନାବାଳିକାର ଚିକିତ୍ସା ପରେ ଡାକ୍ତରୀମାଇନା କରିବ ପୋଲିସ ।
ଆଜି ପ୍ରକାଶ ପାଇବ ଆସନ୍ତା ଜନଗଣନା ବିଜ୍ଞପ୍ତି, ଦୁଇଟି ପର୍ଯ୍ୟାୟରେ ହେବ ଜନଗଣନା
ନୂଆଦିଲ୍ଲୀ: ଆଜି ପ୍ରକାଶ ପାଇବ ଆସନ୍ତା ଜନଗଣନାର ବିଜ୍ଞପ୍ତି। ଏକ ବୈଠକରେ ଜନଗଣନା ପ୍ରସ୍ତୁତିର ସମୀକ୍ଷା କରିଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ। କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ ଏବଂ ଅନ୍ୟ ବରିଷ୍ଠ ଅଧିକାରୀଙ୍କ ସହିତ ଆଗାମୀ ଜନଗଣନାର ପ୍ରସ୍ତୁତି ସେ ସମୀକ୍ଷା କରିଛନ୍ତି। ଜାତି ଗଣନା ସହିତ ଭାରତର ଷୋଡ଼ଶ ଜନଗଣନା ୨୦୨୭ରେ କରାଯିବ। ଲଦାଖ ଭଳି ତୁଷାରପାତ ଅଞ୍ଚଳଗୁଡ଼ିକରେ ଅକ୍ଟୋବର ପହିଲା ୨୦୨୬ ରୁ ଆରମ୍ଭ ହେବ ଜନଗଣନା। ଦେଶର ଅନ୍ୟାନ୍ୟ ସ୍ଥାନରେ ୧ ମାର୍ଚ୍ଚ ୨୦୨୭ରୁ ଏହି ପ୍ରକ୍ରିୟା ଆରମ୍ଭ ହେବ।
ଏଥର ଜାତିଗଣନା ବି ହେବ। ଜନଗଣନା ଦୁଇଟି ପର୍ଯ୍ୟାୟରେ କରାଯିବ। ପ୍ରଥମ ପର୍ଯ୍ୟାୟରେ ଗୃହ ତାଲିକାକରଣ କାର୍ଯ୍ୟ, ପ୍ରତ୍ୟେକ ପରିବାରର ବାସସ୍ଥାନ ଅବସ୍ଥା, ସମ୍ପତ୍ତି ଏବଂ ସୁବିଧା ସୁଯୋଗର ତଥ୍ୟ ସଂଗ୍ରହ କରାଯିବ। ପରବର୍ତ୍ତୀ ସମୟରେ ଦ୍ୱିତୀୟ ପର୍ଯ୍ୟାୟ ଅର୍ଥାତ୍ ଜନସଂଖ୍ୟା ଗଣନାରେ ପ୍ରତ୍ୟେକ ପରିବାରର ପ୍ରତ୍ୟେକ ବ୍ୟକ୍ତିଙ୍କ ଜନସଂଖ୍ୟାଗତ, ସାମାଜିକ, ଅର୍ଥନୈତିକ, ସାଂସ୍କୃତିକ ଏବଂ ଅନ୍ୟାନ୍ୟ ବିବରଣୀ ସଂଗ୍ରହ କରାଯିବ। ଜନଗଣନାରେ ଜାତି ଗଣନା ମଧ୍ୟ କରାଯିବ ବୋଲି ବିବୃତ୍ତିରେ କୁହାଯାଇଛି। ଜନଗଣନା କାର୍ଯ୍ୟ ପାଇଁ ୩୪ ଲକ୍ଷ ଗଣନାକାରୀ, ପର୍ଯ୍ୟବେକ୍ଷକ ଏବଂ ପ୍ରାୟ ୧.୩ ଲକ୍ଷ ଜନଗଣନା କାର୍ଯ୍ୟକର୍ତ୍ତାଙ୍କୁ ନିୟୋଜିତ କରାଯିବ। ଆଗାମୀ ଜନଗଣନା ମୋବାଇଲ୍ ଆପ୍ଲିକେସନ୍ ବ୍ୟବହାର କରି ଡିଜିଟାଲ୍ ମାଧ୍ୟମରେ କରାଯିବ। ଲୋକମାନଙ୍କୁ ସ୍ୱୟଂ-ଗଣନାର ବ୍ୟବସ୍ଥା ମଧ୍ୟ ଉପଲବ୍ଧ କରାଯିବ। ପ୍ରତି ୧୦ ବର୍ଷରେ ଥରେ ଜନଗଣନା ହୁଏ। କିନ୍ତୁ କରୋନା ପାଇଁ ୨୦୨୧ରେ ଏହା ହୋଇପାରିନଥିଲା।
ଇସ୍କନ ପକ୍ଷରୁ ପୁଣି ଜଗନ୍ନାଥ ସଂସ୍କୃତି ଓ ପରମ୍ପରାକୁ ଅବମାନନା
ନନ୍ଦିଘୋଷ ବ୍ୟୁରୋ: ଇସ୍କନ ପକ୍ଷରୁ ପୁଣି ଜଗନ୍ନାଥ ସଂସ୍କୃତି ଓ ପରମ୍ପରାକୁ ଅବମାନନା । ଆମେରିକାର ବିଭିନ୍ନ ସହରରେ ଇସ୍କନ ପକ୍ଷରୁ ଭିନ୍ନ ଭିନ୍ନ ଦିବସରେ ସ୍ନାନଯାତ୍ରା କରାଯାଇଛି । ଏହା ଶାସ୍ତ୍ରୀୟ ମତ ଅନୁସାରେ ହୋଇ ନଥିବା ଦର୍ଶାଇ କ୍ଷୋଭ ପ୍ରକାଶ କରିଛନ୍ତି ପୁରୀ ଗଜପତି ମହାରାଜା । ଏ ନେଇ ଇସ୍କନ କର୍ତ୍ତୃପକ୍ଷଙ୍କୁ ଚିଠି ଲେଖିଛନ୍ତି । ଇସ୍କନ ଗଭର୍ଣ୍ଣିଂ ବଡି କମିଶନର ଅଧ୍ୟକ୍ଷଙ୍କୁ ପତ୍ର ଲେଖିଛନ୍ତି ଗଜପତି ମହାରାଜା l ଭାରତ ବାହାରେ ବିଭିନ୍ନ ଦେଶର ଇସ୍କନ କେନ୍ଦ୍ର ତଥା ମନ୍ଦିରଗୁଡ଼ିକ ମହାପ୍ରଭୁ ଶ୍ରୀଜଗନ୍ନାଥଙ୍କ ସ୍ନାନଯାତ୍ରା ଏବଂ ରଥଯାତ୍ରା ଭିନ୍ନଭିନ୍ନ ତିଥିରେ ପାଳନ କରୁଥିବା ନଜରକୁ ଆସିଛି । ଏହା ସମ୍ପୂର୍ଣ୍ଣ ଶାସ୍ତ୍ର ବିରୋଧୀ ବୋଲି ପତ୍ରରେ ଲେଖିଛନ୍ତି ଗଜପତି । ବିଭିନ୍ନ ଇସ୍କନ ମନ୍ଦିର ପକ୍ଷରୁ ଇଣ୍ଟରନେଟରେ ଏ ସମ୍ପର୍କରେ ଦିଆଯାଇଥିବା ଘୋଷଣାନାମାକୁ ମଧ୍ୟ ଚିଠି ସହିତ ସଂଲଗ୍ନ କରାଯାଇଛି l ଗତ ମାର୍ଚ୍ଚ ୨୦ ତାରିଖରେ ଭୁବନେଶ୍ବର ଠାରେ ହୋଇଥିବା ଆଲୋଚନା ସମୟରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଶ୍ରୀଜଗନ୍ନାଥ ସଂସ୍କୃତି ଗବେଷକମାନେ ଦୃଢ଼ ଭାବେ ସ୍ନାନଯାତ୍ରା କେବଳ ଜ୍ୟେଷ୍ଠ ପୂର୍ଣ୍ଣିମା ତିଥି ଜୁନ୍ ୧୧ ତାରିଖରେ ପାଳନ କରାଯିବାକୁ କହିଥିଲେ । ଏବଂ ଆଷାଢ ଶୁକ୍ଳ ଦ୍ବିତୀୟା ଜୁନ୍ ୨୭ ତାରିଖ ଠାରୁ ଆଷାଢ ଶୁକ୍ଳ ଦଶମୀ ଜୁଲାଇ ୫ ତାରିଖ ୯ ଦିନ ମଧ୍ୟରେ ହିଁ ରଥଯାତ୍ରା ଶ୍ରୀଗୁଣ୍ଡିଚା ଯାତ୍ରା ଏବଂ ବାହୁଡାଯାତ୍ରା ପାଳନ କରାଯାଇ ପାରିବ ବୋଲି ସ୍ପଷ୍ଟ କରିଥିଲେ l ମହାପ୍ରଭୁଙ୍କ ସବୁଠାରୁ ପବିତ୍ର ଏହି ଯାତ୍ରା ଅନ୍ୟ ତିଥି କିମ୍ବା ତାରିଖରେ ପାଳନ କରାଯିବା ଦ୍ବାରା ଶାସ୍ତ୍ର ତଥା ପବିତ୍ର ଶ୍ରୀଜଗନ୍ନାଥ ପରମ୍ପରା ଉଲ୍ଲଂଘନ ହେଉଛି । ତେଣୁ ସମଗ୍ର ବିଶ୍ୱରେ କୌଣସି ଇସ୍କନ କେନ୍ଦ୍ର କିମ୍ବା ମନ୍ଦିରରେ ଶାସ୍ତ୍ର ସମ୍ମତ ତିଥି ବ୍ୟତିତ ଅନ୍ୟ ଦିନ ସ୍ନାନଯାତ୍ରା କିମ୍ଵା ରଥଯାତ୍ରା ଯେପରି ପାଳିତ ନହୁଏ, ତାହା ନିଶ୍ଚିତ କରିବାକୁ ଇସ୍କନ ଗଭର୍ଣ୍ଣିଂ ବଡି କମିଶସନ ଅଧ୍ୟକ୍ଷ ଗୋବର୍ଦ୍ଧନ ଦାସ ପ୍ରଭୁଙ୍କୁ କହିଛନ୍ତି ଗଜପତି ମହାରାଜା ।….
ଡାଇରିଆ ବ୍ୟାପିଥିବାରୁ ୨ ସପ୍ତାହ ବନ୍ଦ ରହିବ ସମସ୍ତ ଜଳଖିଆ ଦୋକାନ
ଯାଜପୁର: ଯାଜପୁର ଜିଲ୍ଲାରେ ଡାଇରିଆ ବ୍ୟାପିଥିବାରୁ ବରୀ ବ୍ଲକ ପ୍ରଶାସନର କଡ଼ା ନିର୍ଦ୍ଦେଶ। ୨ ସପ୍ତାହ ବନ୍ଦ ରହିବ ସମସ୍ତ ଜଳଖିଆ ଦୋକାନ, ମାଛ ଦୋକାନ , ଫାଷ୍ଟ ଫୁଡ୍ ଦୋକାନ, ଗୁପଚୁପ, ଦହିବରା ଷ୍ଟଲ୍। ଡାଇରିଆ ସ୍ଥିତି ନେଇ ଯାଜପୁର ଜିଲ୍ଲା ବରୀରେ ବିଧାୟକ ବିଶ୍ଵରଞ୍ଜନ ମଲ୍ଲିକ ସମୀକ୍ଷା କରିଛନ୍ତି। ସ୍ୱଚ୍ଛ ପାନୀୟ ଜଳ ଯୋଗାଣ, ହୋଟେଲ, ଜଳଖିଆ ଦୋକାନରେ ଯେମିତି ବାସି ଖାଦ୍ୟ ଦିଆ ନ ଯାଏ ତାହା ନିଶ୍ଚିତ କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ବିଧାୟକ। ବରୀ ବାଲିଆପାଳରେ ଥିବା ଆଇସକ୍ରିମ ଫ୍ୟାକ୍ଟ୍ରିକୁ ସିଲ କରାଯିବା ସହିତ ଜଳଖିଆ ଦୋକାନ, ମାଛ ଦୋକାନ, ଫାଷ୍ଟ ଫୁଡ୍ ଦୋକାନ, ଗୁପଚୁପ, ଦହିବରା ଷ୍ଟଲରେ ଚଢାଉ କରାଯାଇଛି। ବାସି ଖାଦ୍ୟ ବିକିଲେ, ଆଇନଗତ ଆକ୍ସନ ନିଆଯିବ ବୋଲି କହିଛନ୍ତି, ବରୀ ତହସିଲଦାର। ବିଭିନ୍ନ ହସପିଟାଲରେ ଚିକିତ୍ସିତ ହେଉଥିବା ୩୦ରୁ ଅଧିକ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି। ସାଲାଇନ, ହାଲୋଜିନ ବଟିକା ଓ ଆବଶ୍ୟକ ଔଷଧ ମହଜୁଦ ଥିବା କହିଛନ୍ତି ବରୀ ହସପିଟାଲ କର୍ତ୍ତୃପକ୍ଷ। ବିଶୁଦ୍ଧ ପାନୀୟ ଜଳ ଯୋଗାଣକୁ ବି ଗୁରୁତ୍ଵ ଦିଆଯାଉଛି।